SPCD-KABUM-02-KHA-004
༄༅། །རི་ཆོས་ཀྱི་འགྲེལ་པ་ཐར་པའི་ཐེམ་སྐས་ཞེས་བྱ་བ་བཞུགས་སོ།། མཆོག་ཐུན་གྱི་མངའ་བདག་བླ་མ་ལ་ཕྱག་འཚལ་ནས་རྩོམ་པ་མཐར་ཕྱིན་པ་དང་དོན་དང་ལྡན་པར་ཤོག །ཅེས་དམ་བཅས་ནས་རི་ཆོས་རྩ་བའི་ས་བཅད་ལས་ཅུང་ཟད་འགྲེལ་ན། ཐོག་མ་མེད་པ་ནས་འཁྲུལ་པའི་གོམས་སྟོབས་ཀྱི་དབང་དུ་སོང་སྟེ་དམ་ཆོས་སྒྲུབ་པ་ལ་བར་ཆད་ཁོ་ནའི་དབང་དུ་དུས་འདའ་སྟེ་ཆོས་ཀྱི་ཕྱོགས་ལ་བག་ཆགས་མེད་པ་ཆོས་མིན་གྱི་ཕྱོགས་ལ་རྣམ་པར་གཡེང་བའི་རང་བཞིན་ཏེ། ཚེ་སྟོད་སྨད་དང་ཉིན་ཞག་རེར་དགེ་བ་སྒྲུབ་དབང་མེད་པ་བར་ཆད་སོང་བའི་རང་བཞིན་ལ་སོམས་དང་། རུ་ཏྲའི་སྨྲེ་བཤགས་ལས། ཁམས་གསུམ་གྲངས་མེད་སྐྱེ་ཤི་ཁ་བརྒྱུད་དེ། །བྱས་པའི་ལས་རྣམས་དོན་མེད་ཆུད་རེ་ཟོས། །ཤ་རུས་བསགས་ན་འཇིག་རྟེན་གཏོས་དང་མཉམ། །རྣག་ཁྲག་བསགས་ན་རྒྱ་མཚོ་ཆེན་པོ་ཙམ། །ལས་འཕྲོ་བསགས་ན་བསམ་འདས་བརྗོད་མི་ལང་། །ཞེས་དང་། ཨོ་རྒྱན་ཆེན་པོས། ཡུན་ཐུང་ཚེ་ཡི་ཕྱེད་ཆ་གཏི་མུག་གཉིད། །ཕྱེད་ཆ་སུམ་གཉིས་རྣམ་གཡེང་འདུ་འཛིའི་ལས། །ཕྱེད་ཆ་གཅིག་ལ་བར་ཆད་རྐྱེན་དབང་མང་། །དེ་ཕྱིར་འདུ་བྱེད་མི་རྟག་སྤྲིན་ལྟར་གཡོ། །ཞེས་གསུངས་པ་ལྟར་མདོར་ན་ལྟོ་འབོལ་བ། སྦྱིན་བདག་ལེགས་པ། གོས་དྲོ་བ། སྡོད་གནས་སྐྱིད་པ། གཏམ་སྙན་པ། མི་ཆོས་དང་མཐུན་པ་ཞིག་གི་སྟ་གོན་བྱས་ཕན་ཆད་ཆོས་མ་འགྲུབ་གོང་ནས་བདུད་གྲུབ་ཚར་བ་ཡིན་གསུངས་པ་མ་ཟད། གྲོགས་གསུམ་འདུས་ན་ཆགས་སྡང་རྩོད་པ་འཕེལ། གཉིས་འདུས་ན་གཏམ་འཕེལ། གཅིག་པུར་དགེ་སྦྱོར་འཕེལ་ཤས་ཆེ་བ་དང་། དེ་བཞིན་དུ་འདུག་པའི་གནས་ཡུལ་མ་དབེན་ན། ཚོགས་དྲུག་གི་སྣང་བ་མི་དབེན། སྣང་བ་མ་དབེན་ན་སྒོ་གསུམ་ངན་གོམས་ཀྱི་རྗེས་སུ་འབྲང་འགྲོ་བས། ལུས་ངག་བག་མི་ཕེབས། ལུས་ངག་བག་མ་ཕེབས་ན་སེམས་ངོ་མི་འཕྲོད་པའམ་ཞི་བར་ནམ་ཡང་མི་གནས། སེམས་ཞི་བར་མ་གནས་ན་རྟོགས་པ་ལྷད་མེད་ངོ་མི་འཕྲོད་ཅིང་དྭངས་ཆ་འབྱིན་ནས་གཏན་སྲིད་ཟིན་མིན་སོགས་ཀྱི་སྐྱོན་ཡོན་གྱི་གནད་འགག་གལ་པོ་ཆེ་ཡོད་པ་དང་། མ་ཟད་སེམས་གཡེང་བའི་དགེ་སྦྱོར་ཐམས་ཅད་ནི་རྩ་བ་རུལ་བའི་སྡོང་པོ་དང་འདྲ། ནང་ན་མེད་པ་ཕྱིའི་གཟུགས་བརྙན་ཙམ་ཡིན་པར་གསུངས་པས་སོ། །དེས་ན་གནས་དབེན་ཞེས་པ་ནི། ཡུལ་པས་རྨོས་རྨོ་ས་བོན་འདེབས་སྟོན་ཐོག་བརྔ་རྡུང་གི་ལས་ཀྱིས་དབྱར་དགུན་ཅུང་ཟད་དལ་སྲིད་ན་ལས་མེད། འབྲོག་པས་ཟོག་ལུག་འཚོ་སྐྱོང་འོ་མ་བཞོ་དཀྲུག་སོགས་ཀྱི་ལས་ཀྱིས་དགུན་དཔྱིད་གཉིས་ཅུང་ཟད་དལ་སྲིད་ན་ལས་མེད་པས་སྙིགས་དུས་འདིར་དེ་དག་ལ་སོགས་སྤང་བ་གལ་ཆེ་སྟེ། གླང་ཆེན་སྐར་ཁུང་ནས་ཐར་ཡང་གླང་མཇུག་སྐར་ཁུང་ནས་མི་ཐར་ཟེར་བའི་དཔེ་ལྟར་དང་། རིག་འཛིན་འཇིགས་མེད་གླིང་པས། ཁྱིམ་ཆུང་སྤངས་ནས་ཁྱིམ་ཆེན་འགྲིམས། །དགེ་སྦྱོར་ཀླ་ཀློའི་ཆོས་ལུགས་ཅན། །དེ་ཡི་རྣམ་བཞག་རང་ས་རུ། །བརྗོད་ན་ངོ་ཚ་ཆེ་བའི་ཕྱིར། །ཞེས་གསུངས་པ་ལྟར་མདོར་ན་མི་ཁྱིའི་སྒྲ་སྐད་མེད་པ་སྔར་གྱི་ས་རྒྱུས་མེད་པའི་གནས་ལུང་སྟོང་དབེན་པར་སོང་ལ། ལུས་ཀྱིས་གནས་ཁང་གཟབ་པ། ཤིང་བཏུ་བ། མེ་དུས་གྲངས་འབུད་པ། ཕན་ཚུན་འགྲོ་བ་སོགས་མི་བྱ་བར་ལུས་རི་བོ་ལྟ་བུར་ལྷོད་ཆགས་པར་འདུག །ངག་ཀྱང་རིང་བཅད་བྱེད་པའམ། མིན་ཀྱང་ཐུན་སྒང་པོར་བཅད་ཅིང་། ཅུང་ཟད་བཤད་དགོས་གལ་སྲིད་བྱུང་རུང་ཚིག་རེ་གཉིས་ནང་འདུས་པ་ལས་མི་བཤད་པར་ངག་ལྐུགས་པ་བཞིན་བསྡམས་ནས། ཡིད་ཀྱིས་དགྲ་འདུལ་གཉེན་སྐྱོང་སྔོན་བསུ་རྗེས་དཔྱོད་ག་ལ་བྱེད་དེ། ཆོས་ཀྱི་ཕྱོགས་ནས་རྟོག་དཔྱོད་བསམ་གཞིག་མང་པོ་མི་བྱེད་པར་ཡིད་ནམ་མཁའ་སྤྲིན་ཐག་ཆད་པ་བཞིན་དུ་བཞག་དགོས། གསང་རྒྱུད་ལས། ལུས་ངག་ཡིད་ཀྱི་བྱ་བ་དགུ་ཕྲུགས་སྤང་། །དལ་བ་བརྟེན་ཅིང་དབེན་པ་བསྒྲུབས་པར་བགྱི། །ཞེས་གསུངས་པ་ལྟར། ལུས་ཀྱི་བྱ་བ་གསུམ་ནི། དང་པོ་ལུས་ཕྱི་ཡི་བྱ་བ་སོ་ནམ་དང་འཁྲུགས་རྩོད་འཇིག་རྟེན་བྱ་བ་ཐ་དག་སྤང་། ནང་གི་བྱ་བ་ཕྱག་བསྐོར་ཆོས་སྤྱོད་སྤང་། གསང་བའི་བྱ་བ་གླུ་གར་ལ་སོགས་པ་སྤང་། མདོར་ན་གྲོགས་མེད་གཅིག་པུར་གནས་པར་བྱའོ། །ངག་གི་བྱ་བ་གསུམ་ནི། ངག་ཕྱི་ཡི་བྱ་བ་ཐ་མལ་གྱི་འཁྲུལ་གཏམ་སྤང་། ནང་གི་བྱ་བ་རོལ་མོ་དང་མཆོད་བསྟོད་ཐམས་ཅད་སྤང་། གསང་བའི་བྱ་བ་བསྙེན་སྒྲུབ་བཟླས་བརྗོད་སྤང་། དཔེར་ན་ལྐུགས་པ་ལྟ་བུར་གནས་པར་བྱའོ། ཡིད་ཀྱི་བྱ་བ་གསུམ་ནི། ཡིད་ཕྱི་ཡི་བྱ་བ་འཁྲུལ་རྟོག་ཐམས་ཅད་སྤང་། ནང་གི་བྱ་བ་བསྐྱེད་རིམ་ལྷ་བསྒོམ་པ་སྤང་། གསང་བའི་བྱ་བ་རྫོགས་རིམ་སེམས་འཛིན་སྤང་། དཔེར་ན་སེམས་སྤྲིན་བྲལ་ནམ་མཁའ་ལྟ་བུའི་ངང་ལ་བཞག་པས་བྱ་བ་དགུ་ཕྲུགས་སུ་སྤང་བར་བྱའོ། །ཟས་ཀྱི་རིགས་སྡིག་པ་ཆེ་ཞིང་འཁོར་བ་པ་རྣམས་ཟས་གོས་བཀྲེན་དོགས་ཀྱིས་འབད་རྩོལ་འདུ་འཛི་རྣམ་གཡེང་ཁོ་ནས་འབྱམས། ཆོས་པ་རྣམས་དེ་བཞིན་བར་ཆད་དང་ཉོན་མོངས་འཕེལ་ཞིང་བྱིང་རྒོད་རྨུགས་འཐིབས་ཀྱི་རྒྱུར་འགྱུར་བས་དགེ་སྦྱོར་བྱེད་པའི་གྲོགས་ཁྱད་པར་ཅན་ནི་ཟས་གོས་བཀྲེན་པོ་བྱེད་པ་གལ་ཤིན་ཏུ་ཆེ་བས། དེས་ན་ལྟོ་ཡི་ཕྱེད་ཆ་ཟས། ཕྱེད་ཆ་སྐོམ། ཕྱེད་ཆ་སྟོང་པར་བཞག་ནས་ཟས་སྐོམ་ལ་ཉིན་གཅིག་བྲེ་ཕུལ་ནས་གཞལ་བ་ལྟ་བུར་བྱེད། ལུས་གྲང་ནད་ཀྱིས་མི་བཟུང་བ་དང་མི་འཁྱག་པའི་ཕྱིར་ཙམ་ཡིན་པས་གོས་སླག་གཅིག་གཉིས་ཀྱིས་ཆོག་པར་བྱ། བྱེ་བྲག་ལུས་ཀྱི་སྨད་དུ་དྲོ་བར་གྱོན་སྟོད་བསིལ་བར་བྱས་པས་དགེ་སྦྱོར་འཕེལ་ཆེ། མི་ཚེ་ལ་གོས་ལྷམ་གཅིག་གཉིས་ཆོག་ཤེས་བཟུང་། གཉིད་ཀྱང་དུད་འགྲོའི་རྒྱུ་ཡིན་པ་དང་། ཚེ་རབས་ནས་གཉིད་ཀྱང་ཟིན་པ་མེད་པ་ཚེ་ཕྱེད་ཤི་མིན་རོ་མིན་དུ་འགྱུར་བ་དང་། ཆོས་ལ་བར་དུ་གཅོད་པའི་གེགས་ཆེན་ཡིན་པས། མཚན་མོ་མ་ཟད་ཉིན་སྒང་པོར་གཉིད་ཀྱང་གཉིད་འདོད་ཇེ་ཆེ་ལས་ཡོང་རྒྱུ་མེད་ངེས་པས། དེས་ན་ཐུན་སྒང་དུ་གཉིད་དུ་ཅུང་ཟད་མི་ཡོལ་བཟང་ངན་གང་སློབ་ལ་རག་ལས་པས་ན། མཚན་གཞུང་གཉིད་ཐུན་རིང་བ་ཞིག་ལོག་པ་ལས་དེ་མིན་ཐུན་དུ་བཅད། ཁྱད་པར་གཉིད་འོད་གསལ་ལ་རྩལ་སྦྱང་བར་བསླབས་ནས་གཉིད་སྲང་དུ་གཅུར། ཐུན་ཚོད་ཀྱང་ཐོ་རང་བྱ་དང་པོ་གྲགས་ཚོད་ལ་ལངས་ནས། ཉི་མ་ཤར་དྲོས་བར་དང་། དེ་ནས་ཉིན་གུང་བར་དང་། ཕྱི་དྲོ་ནས་ཉི་མ་རི་རྩེ་ལས་མ་བཞུད་བར་དང་། དེ་ནས་མུན་རུབ་ནས་ཉལ་ཕྱི་ཙམ་དུ་ཐུན་བཟུང་། ནམ་ཟླ་དུས་བཞི་ཉི་མ་ཆུ་ཚོད་ཀྱི་ཚོད་ཉིན་གཅིག་བཞིན་བཟུང་སྟེ། ཉིན་གུང་གི་ཐུན་མཚམས་རྣམས་སུ། ཆོས་སྤྱོད་ཐམས་ཅད་ཀྱི་མན་ངག་མངོན་པར་རྟོགས་པའི་རྒྱུད་ལས། ཡི་གེ་འབྲི་མཆོད་སྦྱིན་པ་དང་། །ཉན་དང་ཀློག་དང་འཛིན་པ་དང་། །འཆད་དང་ཁ་བཏོན་བྱེད་པ་དང་། །དེ་སེམས་པ་དང་སྒོམ་པ་སྟེ། །སྤྱོད་པ་འདི་བཅུའི་བདག་ཉིད་ནི། །བསོད་ནམས་ཕུང་པོ་དཔག་ཏུ་མེད། །ཅེས་གསུངས་པ་ལྟར་ཆོས་སྤྱོད་བཅུ་པོ་གང་རུང་ལ་སྐབས་སྐབས་སུ་ཇི་ལྟར་འོས་པ་ནན་ཏན་དུ་སྤྱད་པ་བྱ་དགོས་ཤིང་། དེ་ལྟ་བུ་དམ་བཅའ་མི་ཉམས་པ་བཟུང་བའི་ཕྱིར་རྒྱལ་ཆེན་བཞི་ལ་ཕྲིན་ལས་བཅོལ། ཐོ་འཛུགས་ནས་བཟུང་བསྐྱེད་པའི་ཕ་བྱུང་ཡང་དམ་བཅའ་མི་ཧྲལ་འཁྲུལ་བའི་ལས་མི་བྱེད། དེ་ལྟ་བུའི་དམ་བཅའ་དེ་ཤ་སེན་མོས་བཏོག་སྟེ་བསད་ཀྱང་དེ་ལས་མི་འགལ་ བ་བྱ་སྙམ་སྟེ་རྒལ་ཚིགས་བྲག་ལ་སྦྱར། ངོ་ནག་སྐྲ་ནག་གིས་རྩེ་གཅིག་གནས་དགོས་ཏེ། ཇི་སྐད་དུ། ཚོགས་ལས་བསྲིང་ཞིང་ཞི་ལ་རབ་ཏུ་མོས། །ནམ་མཁའི་རླུང་བཞིན་རྙེད་ལ་མི་ཆགས་ཤིང་། །གྲོགས་མེད་རི་དྭགས་བཞིན་དུ་གཅིག་པུར་རྒྱུ། །དེ་དག་གིས་ནི་བྱང་ཆུབ་རིང་བར་མིན། །ཞེས་དང་། འཇིགས་གླིང་པས། སྔོན་བྱོན་འཕགས་པའི་རྣམ་འཕྲུལ་གྲུབ་རྣམས་ཀྱིས། །མཛད་ཕྲིན་ནམ་མཁའི་ཕ་མཐའ་བརྡལ་བ་ལ། །སྐྱིད་འདོད་ཆོས་བརྒྱད་བྱ་བའི་སྒྲ་མི་གྲགས། །འཁོར་འདས་བྲག་ཕུག་ནང་དུ་རུ་ཤན་ཕྱེད། །ཅེས་དང་། ད་ནི་འདུ་འཛིའི་སྒོ་བརྒྱ་འབྱེད་པའི་སྐབས། །སྐུ་གསུང་ཐུགས་རྟེན་བཞེངས་དང་འཁོར་སློབ་སྐྱོང་། །ཆོ་ག་སྒྲུབ་མཆོད་འཛུག་སྤེལ་རྒྱུན་རྣམས་ཀྱང་། །སྔོན་ཆད་གྲུབ་རྣམས་བསྟན་པའི་ཞབས་ཏོག་རློམ། །ཞེས་དང་། དྷརྨ་རཀྵྀ་ཏས། ལོག་འཚོའི་སྒྲུབ་པའི་རྟེན་གསུམ་དེ། །བདག་འཛིན་རེ་དོགས་འཆིང་བའི་རྒྱུ། །གཉུག་མ་དོན་གྱི་ཆོས་སྐུ་ལས། །བྱ་བྱེད་མ་མང་སྙིང་གཏམ་ཡིན། །ཞེས་གསུངས་པ་ལྟར། མདོར་ན་བདག་ཅག་གི་བླ་མ་རིན་པོ་ཆེ་གྲུབ་དབང་ཤྲཱིའི་མཚན་ཅན་དེ་ཉིད་ནི་དང་པོ་སྐུ་བལྟམས་པ་དང་། བར་དུ་ཆོས་འཁོར་བསྐོར་བ་དང་། མཐར་སྐུ་གཤེགས་པའི་ཉམས་ཙམ་བསྟན་པ་ལས། སྒྲུབ་པ་ལ་དཀའ་སྤྱད་དང་བརྩོན་འགྲུས་ཚད་བཟུང་དུ་མི་བཏུབ་པ་མ་ཟད་ཉམས་དང་རྟོགས་པ་ལ་འཕོ་འགྱུར་དང་འཕེལ་འགྲིབ་ཅུང་ཟད་ཙམ་མེད་པ་ཐོག་མཐའ་བར་མེད་སངས་རྒྱས་ཉག་གཅིག་གི་ངོ་བོར་བཞུགས་པ་དང་། རིག་འཛིན་འཇིགས་མེད་གླིང་པ་དཔལ་གྱི་རི་ལ་བཞུགས་སྐབས་ཀྱང་ལོ་གསུམ་གྱི་རིང་ལ་ཟས་ལ་མང་ཉུང་མེད། གོས་རས་གཟན་གཅིག་ཁོ་ནས་འཁྱོལ་བར་བྱས། བུག་སྒོར་ངག་ཚིག་གཅིག་བཏང་བ་མེད། ནང་ན་མཚམས་གཡོག་ཡོང་བའི་སྐབས་བུག་སྒོ་ནང་མ་ལས་འདའ་ས་མེད། འཁོར་བ་ལ་ངེས་འབྱུང་དང་སྐྱོ་ཤས། ནམ་འཆི་ཆ་མེད་ཀྱི་བློ་དུང་ངེ་སྐྱེས་པ་ལས་ངག་འཆལ་དང་རང་བཞིན་གྱི་འཕྲོས་གཏམ་ཕྲན་བུ་ཙམ་ཡང་ལབ་ས་མེད་ཅེས་གསུངས་པ་ལྟར། ཁོ་བོས་ཀྱང་ལོ་བཅུ་གཉིས་ཀྱི་རིང་ལ་དཀའ་སྤྱད་དང་སྙིང་རུས་བརྩོན་འགྲུས་དང་ཉམས་ལེན་དེ་ལྷག་ལས། མི་ཞན་པ་བྱས་ཁུལ་ཡིན་པས་ན། ངོས་ཀྱི་རྗེས་སུ་ཞུགས་པའམ། སྒྲུབ་ལ་གཞོལ་ཞིང་དབེན་ཁྲོད་བརྟེན་མི་རྣམས་མཚམས་ཀྱི་མིང་བཏགས། སྒོ་དྲུང་ཐོ་བརྩེགས། རྣམ་རྟོག་རྒྱ་འབྱམས་སུ་ཤོར། ཕྱི་རོལ་དུ་ཐག་ཟེར་ན་བྱ་ར། ཅ་ཅོ་སྒྲོགས་ན་རྣ་ཉན། བུག་སྒོར་མི་དང་འཕྲད་ན་རྒྱ་བོད་ཧོར་གསུམ་གྱི་གཏམ་བརྗོད་གླེང་བ་སོགས་ཚོགས་དྲུག་ཡུལ་ཕྱིར་སོང་བ། མཚམས་ཀྱི་གཡང་ཤོར། སྣང་བ་ཡུལ་ཕྱིར་འབྲངས་པ། དངོས་གྲུབ་ཕྱི་རུ་ཡལ་བ། བར་ཆད་ནང་དུ་འགུགས་པ། བློ་ལང་ཤོར་དུ་ཐལ་བའི་ངང་ལོ་མཚམས་ཟླ་མཚམས་ཀྱི་ཞག་གྲངས་རྫོགས། ཤེས་རྒྱུད་སྔར་ལས་སྤུ་གང་གི་བཟང་དུ་མ་སོང་བར། མཚམས་ཐ་མལ་དུ་གྲོལ་བ་དེ་ནམ་ཡང་མ་བྱེད་པར་སྙིང་ལ་རུས་པ་བསྐྱེད། དགའ་རུང་། སྡུག་རུང་། ན་རུང་། ཚ་རུང་། ཤི་རུང་དམ་བཅའ་དེ་ལས་མི་འདའ་བར་ཚེ་དང་སྒྲུབ་པ་མཉམ། སྒྲུབ་པའི་རྒྱལ་མཚན་ཚུགས་པ་ཞིག་བྱ་དགོས་ཞེས་གསུངས་པ་ལྟར་རང་རེ་སྒྲུབ་པ་དབེན་ཁྲོད་བརྟེན་མི་རྣམས་ནས་དེ་བཞིན་བྱ་དགོས་ཤིང་། དེ་ནས་ཐོ་རངས་གཉིད་སད་པ་དང་ཉལ་བའི་བདེ་བ་ལ་མི་ཆགས་པར་ཧར་གྱིས་ལངས་ལ། མཁའ་དབྱིངས་ནས་རྩ་བའི་བླ་མ་དཔའ་བོ་མཁའ་འགྲོས་ཨཱ་ལི་ཀཱ་ལི་དང་ཌཱ་མ་རུའི་སྒྲ་བསྒྲགས་པས་གཉིད་སད་པར་བསམ། གནས་ཁང་ཟངས་མདོག་དཔལ་རི། རང་ལུས་རྡོ་རྗེ་རྣལ་འབྱོར་མ་གསལ་བཞིན། རཏ་གླིང་ཐུགས་སྒྲུབ་ལས་བྱུང་བའི་གཏི་མུག་གཉིད་དཀྲོགས་འདོན་བསྒོམ་བྱ། དང་པོ་ཐུན་གྱི་སྔོན་འགྲོ་ལུས་གནད་ནི་རྡོ་རྗེ་སྐྱིལ་ཀྲུང་བཅས་པས་ཐུར་སེལ་གྱི་རླུང་ཟིན། ལག་མཉམ་བཞག་བྱས་པས་མཉམ་པ་ཉིད་ཀྱི་རྟོགས་པ་སྐྱེ། རྒལ་ཚིགས་མདའ་ལྟར་བསྲང་བའམ་རྐང་པ་ཉག །ལྟོ་བ་ཐེར་བྱས་པས་རྩ་དབུ་རྐྱང་རོ་གསུམ་དྲང་ཞིང་མེ་མཉམ་རླུང་ཟིན་དྲོད་སྐྱེ། ལུས་སེམས་བདེ། དཔུང་པ་རྒོད་གཤོག་ལྟར་བརྒྱངས་པས་ལས་རླུང་དབུ་མར་ཚུད་ཅིང་མི་རྟོག་ཡེ་ཤེས་འཆར། མགྲིན་པ་ཡིད་ཙམ་དགུགས་པས་གྱེན་རྒྱུའི་རླུང་ཟིན་ཅིང་རྩ་མདུད་གྲོལ། ལྕེ་ཡ་རྐན་ལ་སྦྱར་བས་ཐིག་ལེ་སྤྱི་བོར་འཆིང་། མིག་སྣ་རྩེ་ལ་ཕབ་པས་ཡེ་ཤེས་འཆར་བ་སྟེ་བདུན་ནོ། །རླུང་རོ་བསལ་བ་ནི། གཡོན་རྡོ་རྗེ་ཁུ་ཚུར་གྱིས་བརླའི་རྩ་བོ་ཆེ་མནན། གཡས་རྡོ་རྗེ་རྩེ་གསུམ་པའི་རྒྱས་སྣ་བུག་གཡས་བཀག །གཡོན་པ་ནས་རླུང་དལ་བུས་རྔུབ་སྟེ། འོག་ཏུ་ཆིལ་གྱིས་མནན། བདག་གི་ཚེ་རབས་ཐོག་མེད་ནས་བསགས་པའི་སྡིག་སྒྲིབ་དང་། བྱིང་རྒོད་རྨུགས་འཐིབ་བཞི་རླུང་ནག་པོའི་རྣམ་པར་ཕྱིར་འགྲོ་བར་བསམ་ལ་རླུང་འཕེན་དུས་དང་པོ་ཆུང་། བར་དུ་ཆེ། ཐ་མར་ནར་གྱིས་ལྷག་ལུས་མེད་པར་འཕངས། དེ་བཞིན་ལག་གཡས་གཡོན་བརྗེ་བ་དང་། དགུ་སྤྲུག་སྐབས། ལག་གཉིས་བརླ་རྩ་མནན་ནས་དབུས་གཡས་གཡོན་བཅས་ལན་གསུམ་རེ་དེ་ལྟར་སྤྲུག་ནས་རང་བབ་བཞག །དེ་ནས་ངག་འདོན་བཞིན། ཨོཾ་ཨཱཿཧཱུྃ། ལྕེ་དབང་རཾ་ཡིག་སོགས་འདོན་བསྒོམ་བྱ། དེ་ནས་སེམས་གནད་ནི། དགེ་མི་དགེའི་རྟོག་པ་གང་སྐྱེས་ཉམས་དཔྱད་པ་དང་། དད་དང་དག་སྣང་ངེས་འབྱུང་བྱང་སེམས་སྐྱེས་འདུག་ན། དགའ་བ་བསྒོམ། ཆགས་སྡང་གཡོ་སྒྱུ་ལོག་ལྟ་སོགས་དྲན་འདུག་ན་འགྱོད་པ་བསྐྱེད། མཚན་གཉིད་གཏིང་རིང་གི་སྐབས་དང་སད་མ་ཐག་འདི་ལྟར་དྲན་འདུག་ན་ང་ཆོས་པ་མི་འོང་ངོ་མ་རེད་བསམས་ནས་ལུང་མ་བསྟན་གྱི་ཀུན་སློང་བཅས་བཟང་པོར་བཅོས། བཟང་པོའི་ཀུན་སློང་དེའང་ཚེ་འདིའི་ནད་གདོན་སོགས་ལས་སྐྱོབ་ཕྱིར་དང་རྙེད་བསྟོད་སོགས་འགྲུབ་འདོད་ཀྱི་ཀུན་སློང་སྤང་། ཚེ་ཕྱི་མ་ངན་སོང་གསུམ་གྱི་འཇིགས་པ་སྐྱོབ་ཙམ་དང་། མཐོ་རིས་ལྷ་མིའི་བདེ་བ་སྒྲུབ་འདོད་སྐྱེས་བུ་ཆུང་ངུའི་ཀུན་སློང་། རང་ཉིད་ཁོ་ན་ཙམ་རིགས་དྲུག་གི་སྡུག་བསྔལ་ལས་ཐར་ཏེ་ཞི་བ་ཉན་རང་གི་གོ་འཕང་དོན་གཉེར་གྱི་ཀུན་སློང་བཅས་ཡོངས་སུ་སྤང་དགོས། འདི་ལྟར་སེམས་ཅན་ཐམས་ཅད་སྡུག་བསྔལ་རྒྱུ་འབྲས་གཉིས་དང་བྲལ་ཞིང་། བདེ་བའི་རྒྱུ་འབྲས་གཉིས་དང་ལྡན་ནས་རྫོགས་པའི་སངས་རྒྱས་ཀྱི་གོ་འཕང་ཁོ་ན་ལ་འགོད་པར་བྱ། དེའི་ཆེད་དུ་དགེ་བ་འདི་དག་བསྒྲུབ་པར་བྱའོ་སྙམ་དགོས་ཏེ། འདི་ནས་མ་འཕྱུགས་ན་ཅི་བྱས་ཐེག་ཆེན་བྱང་ཆུབ་ཆེན་པོའི་རྒྱུར་འགྱུར་བ་ཞིག་གོ། །འདི་ནས་འཕྱུགས་ན་སྒོམ་ཉིན་མཚན་འདྲེས། མངོན་ཤེས་དང་རྫུ་འཕྲུལ་ལྡན། ཡི་དམ་ལྷའི་ཞལ་གཟིགས། མཁའ་འགྲོས་ལུང་བསྟན། བསྙེན་པ་དུང་ཕྱུར་མང་པོ་བགྲངས་ཀྱང་ཕན་ཡོན་ཆེར་མེད་པར་གསུངས་པས། ཀུན་སློང་བྱང་ཆུབ་སེམས་དང་མ་བྲལ་བ་གལ་ཆེ། དེ་ནས་བླ་མའི་རྣལ་འབྱོར་ནི་ནུབ་མོ་ཉལ་བའི་ཚེ་སྙིང་དབུས་སུ་བཞུགས་པ་གསལ་བཏབ་ནས་གཉིད་ལས་ལངས་དུས་མོས་གུས་གདུང་བ་དྲག་པོས། བླ་མ་མཁྱེན་ལན་གསུམ་བརྗོད་པས་བླ་མས་ཐུགས་དམ་རྗེས་སུ་དགོངས་པར་བསམས་ནས། སྙིང་དབུས་དད་པའི་སོགས་ནས་བཞེངས་སུ་གསོལ་བར་བརྗོད་ནས། བླ་མ་ཉིད་སྙིང་པདྨ་འདབ་བརྒྱད་ཁ་གྱེས་པའི་དབུས་ནས་ཆུ་ལས་ཉ་རྡོལ་བའི་ཚུལ་བཞིན། རྩ་དབུ་མའི་ལམ་ནས་མེ་རེ་རེ་ཐོན་ནས་སྤྱི་བོར་པདྨ་འབུམ་བརྡལ་ཟེའུ་འབྲུ་དམར་སེར་གྱེས་པའི་སྟེང་དུ་སེང་ཁྲི་དར་ཟབ་འབོལ་གདན་བརྩེགས་པའི་གདན་ལ། རབ་བྱུང་ངམ་སྔགས་པའི་ཆ་ལུགས་ཅན་ཇི་ལྟ་བ་བཞིན་གསལ་ལ། གསོལ་འདེབས་རྒྱས་འབྲིང་བསྡུས་སོགས་ཅི་རིགས་འདོན། གསོལ་བ་དྲག་ཏུ་བཏབ་པས་བླ་མ་ཉིད་ཐུགས་དགྱེས་པའི་ཚུལ་གྱིས་འོད་དུ་ཞུ་ནས། རང་ལ་ཐིམ་པས་བླ་མའི་སྐུ་གསུང་ཐུགས་དང་རང་གི་ལུས་ངག་ཡིད་གསུམ་དབྱེར་མེད་དུ་རྒྱུད་བྱིན་གྱིས་བརླབ་བྱུང་སྙམ་ནས་ཅུང་ཟད་མཉམ་པར་འཇོག །དེ་ནས་བློ་ལྡོག་རྣམ་པ་བཞི་སྒོམ་པ་ལ། སྐྱེ་བ་ཚེ་རབས་ནས་དེང་ཕན་ཆོད་ཚེ་འདིའི་དབང་ཁོ་ནར་སོང་སྟེ། ཁེ་གྲགས་དང་ཆགས་སྡང་། གསོག་འཇོག་དང་ལེ་ལོ། རྣམ་གཡེང་ཁོ་ནའི་དབང་དུ་འབྱམས་ཀླས་པར་གྱུར་ནས། རྒྱུ་ནོར་སྙན་གྲགས་ཀྱི་འབྱོར་བ་ཕྲན་བུ་དང་སངས་རྒྱས་ཐོབ་པ་གཉིས་འདམ་ཀ་ནོར་བ་ལྟ་བུ་སོང་སྟེ། དམ་པའི་ཆོས་གཏན་ནས་མི་བསྒྲུབ་པར་དམ་བཅའ་དྲག་པོ་བྱས་པ་ལས་མེད་པ། བཙུན་ཆེ་བ་ཕལ་ཆེར་ལ་ཡོང་འདུག་པ་དེ་ཚོ། དལ་འབྱོར་རྙེད་དཀའ་བ་དང་། འཆི་བ་མི་རྟག་པ་སོགས་གོ་མྱོང་རྒྱུད་ལ་མ་འབྱོར་བས་ལན་པ་རང་ལ་ཐུག་འདུག་པས། དེས་ན་ལམ་བསྐྱེད་རྫོགས་ཀྱི་རིམ་པ་ལ་གང་མྱུར་གྱིས་མཐོ་སྙབ་འགའ་མི་བྱ་བར་མདའ་འཕེན་པ་ལ་འབེན་ངོས་ཟིན་དགོས་པ་ལྟར། དང་པོ་ནས་ཆོས་དང་འཇིག་རྟེན་གྱི་རྣམ་དབྱེ་དགེ་སྡིག་སྐྱོན་ཡོན་དང་། རྒྱུ་མཚན་རྣམས་མ་འདྲེས་པ་ཡང་དག་པ་སོ་སོར་ཕྱེས་ནས། ཉམས་སུ་ལེགས་པར་བླང་ཤེས་དགོས་པ་ཡིན། དེ་ལྟར་ཕྱེ་བའི་ཐབས་ཟབ་མོ་ཡིན་ལུགས་ནི། མདོ་སྔགས་གཉིས་ཀྱི་ཆོས་ཇི་སྙེད་ཅིག་ཞལ་བསྡུར་བའི་སྙིང་པོ་བླ་མ་དམ་པའི་ཞལ་རྒྱུན་ཟབ་མོ་ལྟར་བློ་ལྡོག་རྣམ་པ་བཞིའི་བློ་སྦྱང་ཡང་ཡང་སྔོན་དུ་འགྲོ་བས་ཁ་ཙམ་དང་ཕྱོགས་ལམ་མ་ཡིན་པར་ངེས་འབྱུང་གི་བློ་ཁྱད་པར་ཅན་རང་རྒྱུད་ལ་སྐྱེས་པ་ཞིག་ཅི་ནས་གལ་ཆེ་བའི་རང་བཞིན་འདི་ལྟར་ལགས་ཏེ། དེའང་མི་ལུས་ཙམ་པོ་པ། འཕྱོར་པོ་པ། འཇའ་ཚོན་པ། སྙིང་མེད་པོ། སྟོང་ལོག་མཁན་ལྟ་བུ་མ་ཡིན་པ། དམ་པའི་ཆོས་ཟབ་མོ་སྒྲུབ་པ་ལ་མི་ཁོམ་པའི་གནས་བརྒྱད་དང་བྲལ་ཞིང་ཁྱད་པར་གྱི་འབྱོར་བ་བཅུ་ངེས་པར་ཅན་གྱིས་ཚང་དགོས་ཏེ། ཇི་སྐད་དུ། དམྱལ་བ་ཡི་དྭགས་དུད་འགྲོ་དང་། །ཀླ་ཀློ་ཚེ་རིང་ལྷ་དང་ནི། །ལོག་ལྟ་སངས་རྒྱས་ཀྱིས་སྟོང་པ། །ལྐུགས་པ་འདི་དག་མི་ཁོམ་བརྒྱད། །ཅེས་དང་། མི་ཉིད་དབུས་སྐྱེས་དབང་པོ་ཚང་། །ལས་མཐའ་མ་ལོག་གནས་ལ་དད། །སངས་རྒྱས་བྱོན་དང་དེས་ཆོས་གསུངས། །བསྟན་པ་གནས་དང་དེར་རྗེས་འཇུག །གཞན་ཕྱིར་སྙིང་ནས་བརྩེ་བའོ། །ཞེས་གསུངས་པ་ལྟར་དལ་འབྱོར་དེ་ལྟ་བུ་ནི། རྒྱུ་དང་ངོ་བོ། དཔེ་དང་གྲངས་གང་གི་སྒོ་ནས་གཞལ་ཀྱང་རྙེད་དཀའ་བའི་རང་བཞིན་དེ་དག་རང་རྒྱུད་དུ་ཚང་ངམ་མ་ཚང་ཞིབ་པར་དཔྱད་དེ། ཚང་འདུག་ན་དབུལ་པོས་ནོར་རྙེད་པ་ལྟ་བུར་དགའ་སྤྲོ་ཚད་མེད་པ་བསྒོམ་དགོས་པ་སྟེ། སྤྱོད་འཇུག་ལས། དལ་འབྱོར་འདི་ནི་ཤིན་ཏུ་རྙེད་པར་དཀའ། །སྐྱེས་བུ་དོན་གྲུབ་ཐོབ་པར་གྱུར་པ་ལ། །གལ་ཏེ་འདི་ལ་ཕན་པ་མ་བསྒྲུབས་ན། །ཕྱིས་ནས་ཡང་དག་ལུས་རྟེན་རྙེད་མི་འགྱུར། །ཞེས་དང་། ཇི་སྐད་དུ། མི་ཡི་གྲུ་ལ་བརྟེན་ནས་ནི། །སྡུག་བསྔལ་ཆུ་བོ་ཆེ་ལས་སྒྲོལ། །གྲུ་འདི་ཕྱིན་ཆད་རྙེད་དཀའ་བས། །རྨོངས་པ་རྣམས་ནི་གཉིད་མ་ལོག །ཅེས་གསུངས་པ་ལྟར། མ་ཟད་བསྟན་འགྲོ་ཀུན་གྱི་འཕྲལ་ཡུན་བདེ་སྐྱིད་འབྱུང་གནས་ཆེན་པོ་ངེས་པ་དོན་གྱི་བསྟན་པ་འཛིན་པའི་སྐྱེས་བུ་ཞིག་རང་རེས་མཐོང་ཐོས་རེག་བྱའི་ཡུལ་དུ་འདུག་ཕྱིན་ཆོད་ལྷག་པར་དུའང་གནས་དང་། དུས་དང་། ཆོས་དང་། སྒྲུབ་པའི་ཐབས་རྟེན་སོགས་ཀུན་གྱི་སྙིང་པོའི་སྙིང་པོ་ཡང་ཟབ་རྩེ་མོ་གཅིག་ཏུ་ཡིན་པར་ཤེས་པའི་ངང་ནས། ཆོས་སྒོར་མ་ཞུགས་པ་རྣམས་དུས་མྱུར་བ་ཉིད་དུ་ཞུགས་པར་བྱོས། འཇུག་བཞིན་པ་རྣམས་ཆོས་དྲེད་དུ་མ་ལྷག་པར་སྡིག་སྤོང་དགེ་སྒྲུབ་ལ་གོང་འཕེལ་དུ་བརྩོན་འགྲུས་བསྐྱེད། བརྩོན་འགྲུས་ཁྱད་པར་ཅན་དང་ལྡན་པ་རྣམས་ཀྱིས་ཉམས་རྟོགས་ཡོན་ཏན་ཐམས་ཅད་མཐར་ཕྱིན་ནས་དོན་གཉིས་ལྷུན་གྱིས་གྲུབ་པ་ཞིག་བྱ་བ་ཅི་ནས་གལ་ཆེ་བའི་རང་བཞིན་ནོ། །དེ་བཞིན་འདུན་སྤྱོད་ཐམས་ཅད་ཆོས་ལ་མྱུར་བར་རྩེ་གཅིག་ཏུ་བརྩོན་འགྲུས་བསྐྱེད་རྒྱུ་མ་བྱུང་ན་ཕལ་ཆེར་སྐྱེས་དང་། ཚར་ལོང་མེད་པ། རྒས་དང་ན་ལོང་མེད་པར། དགྲ་འདུལ་འཕྲོ། གཉེན་སྐྱོང་འཕྲོ། ལས་ལས་འཕྲོ། གཏམ་བཤད་འཕྲོ། ཟས་ཟ་འཕྲོ་ལུས་ནས་འཆི་འགྲོ་དགོས་པ་ཨི་མི་འདུག་ན། རང་རེས་དམ་པའི་ཆོས་སྒྲུབ་པའི་ལོང་ཁོམ་ག་ལ་ཡོང་སྟེ། བཤེས་སྤྲིངས་ལས། ས་དང་ལྷུན་པོ་རྒྱ་མཚོ་ཉི་མ་བདུན། །འབར་བས་བསྲེགས་པས་ལུས་ཅན་འདི་དག་ཀྱང་། །ཐལ་བ་ཡང་ནི་ལུས་པར་མི་འགྱུར་ན། །ཤིན་ཏུ་ཉམ་ཆུང་མི་རྟག་སྨོས་ཅི་འཚལ། །ཞེས་དང་། འདུལ་བ་ལུང་ལས། གང་དུ་གནས་ཀྱང་འཆི་བས་མི་ཚུགས་པ། །ས་ཕྱོགས་དེ་ནི་གང་ན་ཡོད་མ་ཡིན། །ནམ་མཁའ་ལ་མེད་རྒྱ་མཚོའི་གཏིང་ནའང་མེད། །རི་བོ་ཀུན་གྱི་ཕུག་ན་ཡོད་མ་ཡིན། །ཞེས་གསུངས་པ་ལྟར། དེའི་ཕྱིར་མི་རྟག་པའི་རང་བཞིན་ལས་ནམ་ཡང་མ་འདས་པའི་ཚུལ། ཡིན་ལུགས་ཅུང་ཟད་བཤད་པ་ལ། ཕྱི་སྣོད་ཆགས་འཇིག །ནང་བཅུད་སྐྱེ་འཆི། དཔེ་དོན་སྣ་ཚོགས་གང་ལ་བསམ་ནའང་། མི་རྟག་པའི་རང་བཞིན་ལས་མ་འདས་ཏེ། དཔེར་ན་སེམས་ཅན་ལུག་བརྒྱ་སྟོང་གི་ནང་ནས་གློ་བུར་དུ་ཤན་པའི་ཞགས་ནག་དེ་སུའི་སྐེ་ལ་ཐེབ་ཡོང་ཆ་མི་གཏོགས་པ་ལྟར་རམ། མཆོད་མེ་བརྒྱ་མཆོད་ནང་ནས་གཡས་གཡོན་མདུན་རྒྱབ་མཐའ་དབུས་གང་ནས་མར་ཁུ་ཟད་དེ་དས་ཡོང་ཆ་མི་གཏོགས་པ་ལྟར་རམ། རླུང་གསེབ་ཀྱི་མར་མེ་ལྟར་རམ། ཉི་རྒས་ཀྱི་གྲིབ་མ་ལྟར་རམ། ཤིང་འབྲས་སྨིན་ནས་ལྷུང་ལ་ཉེ་བ་ལྟ་བུའི་ཚེ་མཇུག་རྣམས་ནི་ནམ་འཆི་ངེས་པ་ལྷག་པར་མ་མཆིས་ཤིང་། ཚེ་ཟད་ནས་འཆི་ལ་ཉེ་བའི་དུས་དེར། སངས་རྒྱས་སྨན་ལྷས་སྨན། ཚེ་དཔག་མེད་ཀྱིས་དབང་། འཇམ་དཔལ་དབྱངས་ཀྱིས་དཔྱད། ཐུགས་རྗེ་ཆེན་པོས་འདུལ། ཕྱག་ན་རྡོ་རྗེས་སྲུང་བར་མཛད་ཀྱང་བཟློག་ཏུ་མི་བཏུབ་སྟེ། ལོ་ན་ཆུང་ཡང་མི་འཆིའི་གདེང་མེད། ཟས་གོས་རྒྱུ་ནོར་ཕྱུག་ཀྱང་མི་འཆི་བའི་གདེང་མེད། ནད་མེད་ཀྱང་མི་འཆི་བའི་གདེང་མེད། མི་འཆི་སྙམ་ན་སྟོན་པས་ཚེ་ཚད་བསྟན་པའམ། ཡང་ན་རང་ལ་ཟག་མེད་མངོན་ཤེས་ཡོད་དགོས། ཡང་ན་གཤིན་རྗེ་ཆོས་རྒྱལ་དང་འཕྲད་ནས་རེ་ཞིག་མི་འཁྲིད་པའི་དམ་བཅའ་བླང་བ་འདྲ་ཡོད་ན་མ་གཏོགས་ངེས་ངེས་ཅི་ཡང་མེད་རུང་ཤེས་མི་མི་འདུག །བསམ་པའི་སེམས་དང་། ལྟ་བའི་མིག །ཉན་པའི་རྣ་བ་ཡོད་ན་ནི་ཀུན་གྱིས་མཐོང་ཆོས་མྱོང་གྱུར་དུ་ཡོད་པ་འདི་དག་ལ་ཐུགས་བསམ་རེ་ངེས་པར་བསྐོར་ཏེ། ད་ལྟ་རྒྱུ་ནོར་གྱི་འབྱོར་ཚོགས་རྒྱས་པ། ཐོབ་ཐང་དང་རྣམ་དཔྱོད་ལྡན་པ། དཔའ་རྩལ་དང་སྤྱང་གྲུང་འཛོམས་པ། རིགས་རུས་དང་ལང་ཚོ་དར་བ། ཐོས་བསམ་གྱི་མཁྱེན་རྒྱ་ཆེ་བ། འཆད་རྩོད་རྩོམ་ལ་མཁས་པ། མཛད་ཕྲིན་རྒྱས་པ་དང་། བྱ་བ་ལམ་དུ་སློང་བ་སོགས་ཁ་ཕྱིར་བལྟས་ང་རྒྱལ་གྱི་དབང་དུ་འདྲ་ཆགས་མདོག་བྱེད་ནས་ནམ་ཡང་མ་ལྡིང་ཞིག །འཆི་ནད་དྲག་པོ་བཟློག་ཏུ་མི་བཏུབ་པ་ནང་ཁྲོལ་ལས་ཚུར་ངེས་པར་སྨིན་ནས་མི་རྟག་པའི་རང་བཞིན་གཅིག་ཏུ་ངོམ་ཡོང་བས་ན། དེང་ཕན་ཆོད་ཚེ་ཅི་ཡོད་འཆི་བསྒུག་བྱས་པ་ལྟ་བུའི་ངང་དུ་སྡོད་ཐབས་ག་ལ་ཡོད། དེ་སྔོན་ཚེ་དོན་ཡོད་ལ་མེད་ཟད་སོང་བ་ལའང་། གནོང་འགྱོད་དྲག་པོ་སྐྱེས་པའི་སྒོ་ནས་དགེ་སྦྱོར་ལ་འཕེལ་སྐྱེད་ལྷག་ཏུ་ཐོན་པར་བྱ་དགོས་པ་ཡིན་ཞིང་། མདོར་ན་འཁོར་ལོས་སྒྱུར་བའི་རྒྱལ་སྲིད་ཐོབ་རུང་། ཁྱིས་རྩྭ་བཞིན་དོར་ནས། རྟ་ཕོ་ལྕག་གིས་བྲབ་པ་ལས་ཆེར་མྱུར་བར་སྔོན་ནས་ཁྲིད། རྒྱབ་ནས་དེད་མཁན་བརྒྱ་སྟོང་ཁྲི་འབུམ་དུ་མར་ཡོད་པ་ལས་ལྷག་ཙམ་ཆོས་ལ་བརྩོན་འགྲུས་ཤུགས་དྲག་ལ་རྒྱུན་རིང་བ་ཉིན་མཚན་བར་མེད་དུ་དུས་འདའ་བར་སྤྱོད་འགྲོ་མི་རྣམས་ནི་མི་རྟག་པ་སོགས་རྒྱུད་ལ་འབྱོར་བའི་བཀའ་དྲིན་ཁོ་ན་ལས་འབྱུང་བ་ཡིན་འདུག་པས། དེ་ལྟ་བུ་རང་རེའི་རྒྱུད་ལ་ངེས་པར་མ་སྐྱེས་བར་དུ་མ་བསྒོམས་ན། ཆོས་ཞུ་ལོ་དང་ཐོས་ལོ་སྒྲུབ་ལོ་འདྲ་ཆགས་པོ་སོགས་ཇི་ཙམ་བྱས་བསྡད་ཀྱང་། ཚེ་འདི་ཡི་ལད་མོ་ལྟ་བུའི་མཐར་ཆོས་དྲེད་ངན་པའི་རྒྱུ་ལས་མ་འདས་པས། ད་ནི་ལེ་ལོ་ཕྱི་བཤོལ་གྱི་དབང་དུ་སྐད་ཅིག་ཙམ་ཡང་མི་བཏང་བར། སྙིང་པོ་དམ་པའི་ཆོས་མཐར་ཕྱིན་པ་ཞིག་ཅི་ནས་གལ་ཆེ་བར་མཛོད་ལགས། དེ་ལྟར་ཤི་ནས་མེ་དས་པའམ། ཆུ་སྐམ་པའམ། འཇའ་ཡལ་བ་ལྟར་རམ། མུ་སྟེགས་རྒྱང་འཕེན་པའི་ལྟ་བ་ལྟ་བུ་ཅང་མེད་དུ་མི་འགྲོ་བར། ད་ལྟའི་ཕུང་པོ་བྱ་ཁྱིས་ཟོས་ནས་རྡུལ་ཕྲན་མེད་པར་བརླག་ཀྱང་། སྔར་བཞིན་རྣམ་ཤེས་འཁོར་བ་ལས་འདའ་ས་མེད་པས་ན། སླར་ལུས་བླངས་ནས། ལས་དང་རྣམ་སྨིན་ཐམས་ཅད་སྐྱེ་བ་ནས་ཚེ་རབས་ཀུན་ཏུ་ཇི་བཞིན་མྱོང་དགོས་པའི་ཚུལ། ལས་རྒྱུ་འབྲས་ཀྱི་རིམ་པ་ནི། ད་ལྟ་ལ་ལ་བདེ་བ་ཤ་སྟག །ལ་ལ་སྡུག་བསྔལ་ཤ་སྟག །ལ་ལ་བདེ་སྡུག་འདྲེས་མ་སྣ་ཚོགས་ཡོང་བ་རྣམས་ད་ལྟའི་སྐབས་འདིར་ལས་ཡག་ཉེས་ལམ་འགྲོ་ཆེ་ཆུང་། ཕོ་རྒོད་ཞན་ཡིན་སྙམ་པ་ནི་མི་ཕལ་ཆེས་བྱེད་ཀྱིན་འདུག་སྟེ། དེ་ནི་ལས་རྒྱུ་འབྲས་ལ་ཕྱོགས་ཙམ་ཉེ་བ་མ་ཡིན་ནོ། །ཚེ་སྔོན་དགེ་སྡིག་གི་ལས་གང་བསགས་ཀྱི་འབྲས་བུ་ཁོ་ན་ལ་རག་ལས་པ་ཡིན་ཏེ། རང་ཕྱོགས་ལ་ཆགས་པ་དང་། གཞན་ཕྱོགས་ལ་སྡང་བ་དང་། ལས་འབྲས་ལ་རྨོངས་པ་གསུམ་གྱིས་ཀུན་ནས་བསླང་བའི་ལས་དང་འབྲས་བུ་རྣམས་ནི་རྩ་བ་དུག་ལས་བྱུང་བའི་ལོ་མ་མེ་ཏོག་འབྲས་བུ་བྱེད་ལས་དང་བཅས་པ་དུག་གི་རང་བཞིན་ཏེ། ཕལ་པོ་ཆེ་ལས། ཇི་ལྟར་ས་བོན་ཁྱད་པར་གྱིས། །འབྲས་བུ་སྣ་ཚོགས་སྣང་བ་ལྟར། །དེ་བཞིན་ལས་ཀྱི་ཁྱད་པར་གྱིས། །སེམས་ཅན་རྣམས་དང་ཞིང་འབྱུང་ངོ་། །ཞེས་དང་། རིན་ཆེན་ཕྲེང་བ་ལས། དགེ་བ་ཡིས་ནི་བདེ་བ་དང་། །དེ་བཞིན་བདེ་འགྲོ་ཐམས་ཅད་ཀྱང་། །མི་དགེ་བས་ནི་ངན་སོང་དང་། དེ་བཞིན་སྡུག་བསྔལ་ཐམས་ཅད་དོ། །ཞེས་གསུངས་པ་ལྟར། སྤང་བྱ་རྒྱུ་དུག་གསུམ་གྱིས་ཀུན་ནས་སློང་བའི། ལས་མི་དགེ་བ་བཅུ་རྣམ་སྨིན་འབྲས་བུ་ངན་སོང་གསུམ་དང་། བྱེད་པ་རྒྱུ་མཐུན་དང་། མྱོང་བ་རྒྱུ་མཐུན་དང་། དབང་འབྲས་ཡུལ་ལ་སྨིན་པ་སྐྱེས་བུ་བྱེད་འབྲས་སོགས་རྒྱུ་འབྲས་དེ་དག་སྤང་དགོས་པ་དང་། ད་ནི་བསྒྲུབ་བྱ་དགེ་བའི་ལས་ནི། རང་ཕྱོགས་ལ་མི་ཆགས་པ་དང་། གཞན་ཕྱོགས་ལ་ཞེ་སྡང་མེད་པ་དང་། ལས་འབྲས་ལ་རྨོངས་པ་མེད་པའི་ཤེས་རབ་གསུམ་གྱིས་ཀུན་ནས་སློང་བའི་ལས་འབྲས་དེ། དཔེར་ན་རྩ་བ་སྨན་ལས་བྱུང་ན། ལོ་མ་མེ་ཏོག་འབྲས་བུ་བྱེད་ལས་དང་བཅས་པ་སྨན་གྱི་རང་བཞིན་ཡིན་པ་ལྟར་དགེ་བའི་ལས་བཅུ་དང་། རྣམ་སྨིན་མཐོ་རིས་གསུམ་གང་རུང་དང་། བྱེད་པ་རྒྱུ་མཐུན། མྱོང་བ་རྒྱུ་མཐུན། དབང་འབྲས་ཡུལ་ལ་སྨིན་པ་སྐྱེས་བུ་བྱེད་འབྲས་སོགས་བདེ་བའི་རྒྱུ་འབྲས་དེ་དག་བསྒྲུབ་བྱ་ཡིན་པ་དང་། དེ་ལྟར་ལས་གང་བྱས་དེ་ཡང་ན་འབྲས་བུ་མྱངས་ནས་འཛད། ཡང་ན་བཤགས་པས་སོར་ཆུད་དེ་འཛད་ན་མ་གཏོགས་ས་ལ་མི་སྨིན། རྡོ་ལ་མི་སྨིན། མི་སུམ་མི་རུལ་མི་སྐམ་མི་ཟད་ཅིང་དུས་ནམ་ཡང་རང་ཐོག་ཏུ་སྨིན་ངེས་ལས་མི་ལྡོག །ཤུལ་དུ་མི་སྡོད། གཞན་གྱི་རྗེས་སུ་མི་འབྲངས། མེད་པར་ཡང་མི་འགྱུར་ལ། འཕགས་པ་དགྲ་བཅོམ་པ་རྣམས་ཀྱིས་ཕྲ་ཞིང་ཕྲ་བ་མྱོང་དགོས་པའི་ལོ་རྒྱུས་འདུག་ན། རང་རེ་རྣམས་ནི་དགེ་སྒྲུབ་ལ་ཕྲ་ཞིང་ཕྲ་བ་ནས་ཞིབ་པ་ཅི་ནས་ཀྱང་གལ་ཆེ། དེ་ལྟར་དགེ་བ་བསྒྲུབས་ནས་སྡིག་པ་ཡོངས་སུ་མ་སྤངས་ན། རྒྱུ་དེ་དག་གིས་འཁོར་བའི་གནས་རིས་གང་དུ་སྐྱེས་ཀྱང་། མེ་ཡི་འོབས་ལྟ་བུ། སྲིན་མོའི་གླིང་། དུག་སྦྲུལ་གྱི་ཚང་། མཚོན་གྱི་རྩེ། མི་གཙང་བའི་འདམ་ལྟ་བུ་སྡུག་བསྔལ་གྱི་རང་བཞིན་ལས་ནམ་ཡང་མ་འདས་པའི་ཚུལ་འཁོར་བའི་ཉེས་དམིགས་ནི། བཤེས་སྤྲིངས་ལས། དམྱལ་བ་བྲིས་དང་མཐོང་དང་ཐོས་པ་དང་། །དྲན་དང་བཀླག་དང་གཟུགས་སུ་བྱས་རྣམས་ཀྱང་། །འཇིགས་པ་སྐྱེ་བར་འགྱུར་ན་མི་བཟོད་པའི། །རྣམ་སྨིན་ཉམས་སུ་མྱོང་ན་སྨོས་ཅི་དགོས། །ཞེས་དང་། དེ་ལྟར་ཤིན་ཏུ་སྡུག་བསྔལ་མི་བཟོད་པ། །བྱེ་བ་ཕྲག་བརྒྱ་ཉམས་སུ་མྱོང་ཡང་ནི། །ཇི་སྲིད་མི་དགེ་དེ་ཟད་མ་གྱུར་བར། །དེ་སྲིད་སྲོག་དང་བྲལ་བར་མི་འགྱུར་རོ། །ཞེས་གསུངས་པ་ལྟར། ཚ་དམྱལ་བརྒྱད་དང་། ཉི་ཚེ་ཉེ་འཁོར་གཉིས། གྲང་དམྱལ་བརྒྱད། ཡི་དྭགས་བཀྲེས་སྐོམ། དུད་འགྲོ་བསྐོལ་སྤྱོད། ལྷ་འཕོ་ལྟུང་། ལྷ་མ་ཡིན་འཐབ་རྩོད། མི་སྐྱེ་རྒ་ན་འཆི་སོགས་ཡོད་པས་མདོ་དོན་བསྡུ་ན། དེ་ལྟར་འགྲོ་བའི་གནས་རིས་གང་དུ་སྐྱེས་ཀྱང་། ཚ་གྲང་ལྟོགས་སྐོམ། ངལ་དུབ། ན་ཚ། འཐབ་རྩོད། འཕོ་འགྱུར། བསགས་སྲུང་། དགྲ་གཉེན་ཆགས་སྡང་ཁོ་ན་ལས་མ་འདས་ཏེ། འདོད་པ་སེམས་ཀྱི་སྡུག་བསྔལ། མྱོང་བ་ལུས་ཀྱི་སྡུག་བསྔལ། སྣང་བ་ཡུལ་གྱི་སྡུག་བསྔལ། སྒོ་གསུམ་རྩོལ་སྒྲུབ་ཀྱི་སྡུག་བསྔལ། སྡུག་བསྔལ་གྱི་རང་བཞིན། སྡུག་བསྔལ་གྱི་ཡོ་ལང་། སྡུག་བསྔལ་གྱི་འཁྲུལ་འཁོར་ཁོ་ན་ལས་མ་འདས་པས་ན། སྡུག་བསྔལ་དེ་དག་མཐོང་ཐོས་ཙམ་དུ་མི་བཞག་པར་དཔེ་ཞིབ་ཀྱིས་བླངས་ཏེ་སེམས་ཀྱིས་ཡང་ཡང་ནན་ཏན་དུ་སྒོམ་ཞིང་། ངེས་ཤེས་དྲག་པོ་བཅོས་མ་མ་ཡིན་པར་རྒྱུད་ལ་ངམ་ངམ་ཤུགས་ཀྱིས་སྐྱེས་ཏེ། དེ་རྒྱུ་འཁོར་བའི་བྱ་བཞག་ཐམས་ཅད་ལ་ཞེན་པ་གཏིང་ནས་ལོག་པ་ཉེས་ཆེན་བཙོན་དོང་ནས་བྲོས་པ་ལྟར་རམ། རི་དྭགས་རྒྱ་ནས་ཐོན་པ་ལྟར་རམ། མཁྲིས་ནད་ཅན་གྱིས་བཙོ་ཟན་མཐོང་བ་ལྟ་བུ་ཞིག་ནི་ངེས་པར་ཅན་གྱི་རང་རྒྱུད་དུ་འབྱོངས་དགོས་པ་ཡིན་ནོ། །དལ་འབྱོར་རྙེད་དཀའ་བ་དང་། འཆི་བ་མི་རྟག་པས་ཚེ་འདིའི་བློ་སྣ་བསྟུང་། ལས་རྒྱུ་འབྲས་དང་འཁོར་བའི་ཉེས་དམིགས་ཀྱིས་ཕྱི་མ་ངན་འགྲོའི་གནས་ལས་བློ་ལྡོག་སྟེ་ཚེ་འདིར་སྣང་ཆོས་བརྒྱད་སོགས་ཀྱི་སྤྱོད་པ་ལྟ་ཅི་སེམས་ཐོག་ཏུ་ཅུང་ཟད་སྐྱེས་ཀྱང་། སྤང་གཉེན་སྐད་ཅིག་གིས་ར་འཕྲོད་ནས་འགྲོ་འདུག་ཟ་ཉལ་ལ་ལོངས་སྤྱོད་ནས་འདུ་ཤེས་བཞི་ཙམ་ལའང་། དགོས་མེད་ཆོག་ཤེས་གཅིག་ཏུ་བརྟེན་པ་དང་། དེ་བཞིན་སྔོན་བྱོན་རྒྱལ་བ་སྲས་དང་སློབ་མར་བཅས་པ་ཐམས་ཅད་ཀྱང་མི་རྟག་པ་སོགས་ཀྱི་ཐུགས་རྒྱུད་ཤིན་ཏུ་མྱུར་བར་བསྐུལ་ཏེ་ཚེ་འདི་བློས་ཡོངས་སུ་བཏང་སྟེ་སྒྲུབ་པ་སྙིང་པོ་ཁོ་ནར་མཛད་པ་དང་། དོན་གཉིས་རླབས་པོ་ཆེ་མཐའ་རུ་ཕྱིན་པ་ཡིན་ཏེ། མདོར་ན་རང་གཞན་གྱི་དོན་གཉིས་རླབས་ཆེ་བ། རྣམ་གྲངས་མང་བ། ཤུགས་དྲག་པ། རྒྱུན་རིང་བ། མཐའ་ཡས་པ་དེ་ལྟ་བུ་འགྲུབ་པའི་རྩ་བ་ནི་རང་རེའི་ཞག་ཟླ་ལོ་གྲངས་དང་ཚེ་ཡི་ཡུན། འདི་ལས་ལྷག་ཙམ་ཆེར་བཞུགས་པ་མིན་ཀྱང་། དོན་མེད་ཚེ་འདིའི་དགྲ་འདུལ་གཉེན་སྐྱོང་། ཟས་གོས་དོན་གཉེར། འགྲོ་འདུག་བྱ་བཞག་འདུ་འཛི་གཡེང་བ་སོགས་ལས་མི་དགེ་བའི་རིགས་རྒྱང་རིང་དུ་བསྲིང་སྟེ། སྒོ་གསུམ་དམ་པའི་ཆོས་ལ་ཉག་གཅིག་དྲིལ་བས་གོམས་སྟོབས་ཀྱིས་མཐའ་གཉིས་ལ་མི་གནས་པ། དོན་གཉིས་ལྷུན་གྱིས་གྲུབ་པ། གང་ཟག་མི་ཡི་ལུས་ལ་དགོངས་པ་སངས་རྒྱས་སུ་མངའ་བ། འཇིག་རྟེན་ལྷ་མི་ཀུན་གྱིས་མཆོད་འོས་ཀྱི་གནས་ཆེན་པོ་དུས་གསུམ་རྒྱལ་བ་སྲས་དང་སློབ་མར་བཅས་པས་དེ་ལྟར་འགྲུབ་པ་རང་ཡིན་འདུག་པས། དེས་ན་རང་རེ་རྣམས་ཀྱི་རྒྱུད་ལ་ངེས་འབྱུང་དྲག་པོའི་བློ་དེ་དེ་བཞིན་དུ་འབྱོར་ངེས་རེ་བྱས་ནས། རང་གཞན་གྱི་གཏན་དོན་ཆོས་རྣམ་དག་ཁོ་ན་སྒྲུབ་དགོས་པ་ཡིན་ནོ། །དེ་ནས་ཐུན་མིན་སྔོན་འགྲོའི་བསགས་སྦྱང་གི་རིམ་པ་ལ་ཚིག་ཙམ་རྗེས་ཟློས་ཀྱིས་གྲངས་བསགས་པ་དང་། ལ་འུར་ཡ་ཡོལ་གྱི་ངང་ནས་ཚེ་འདིའི་དཔོན་པོ་ལ་ཁྲལ་མཇལ་བྱེད་པ་ལྟ་བུའམ། གཡོག་ངན་ལ་ལས་ཀ་ལྟ་བུར་བྱས་པས་དོན་ཆེར་མི་འབྱུང་བས་ན། བརྒྱུད་ལྡན་གྱི་བླ་མའི་ཞལ་རྒྱུན་དང་ཕྱག་བཞེས་ཟབ་མོ་མཐུན་ངེས་པར་སྒོ་གསུམ་ཐུགས་ཉམས་ཤིན་ཏུ་བག་ཕེབས་པའི་ངང་ནས་དང་པོ་ངག་འདོན་གང་ཡིན་པ་དེ་དག་བློ་རུ་བྱང་ཆུབ་པར་འཛིན་ཅིང་། དེ་ནས་ཟླ་བ་ཁ་ཤས་ལ་སྐྱབས་ཡུལ་རྣམས་མ་འདྲེས་པར་གསལ་བཏབ་ལ་བརྟན་ཆ་གཅིག་ཏུ་ཆེ་བ་མ་བྱུང་གི་བར་དུ་སྒོམས། ཡིད་ཁྱེད་ཤེས་ཀྱི་དད་པ་རྩེ་གཅིག་འགྲོ་ངེས་པར་གྱུར་པའི་སྤྱན་སྔར། མཆོད་པ་སོགས་དངོས་བཤམས་ཡིད་སྤྲུལ་ཏིང་ངེ་འཛིན་གྱི་མཁའ་ཁྱབ་ཏུ་སྤེལ་བའི་དམིགས་འདུན་རྩེ་གཅིག་དྲིལ་ནས་སྒོམ་པར་མཛད་པ་ལས་གཞན་སའམ་རྡོའམ། བར་སྣང་སྟོང་པར་འབུལ་བྱ་འབུལ་བྱེད་གྱུར་པ་ལྟ་བུ་སླ་ཆོས་སུ་ནམ་ཡང་མི་བྱེད་པར་དཀའ་བ་དང་དུ་ལོངས། སླ་བ་རྒྱབ་ཏུ་དོར་ནས་སྦྱོར་བ་སེམས་བསྐྱེད་དམ་པ། དངོས་གཞི་དམིགས་པ་མེད་པ། རྗེས་རྨི་ལམ་དང་སྒྱུ་མ་ལྟ་བུའི་བསྔོ་བ་སྟེ། དམ་པ་གསུམ་ཀ་ཚང་བའི་སྒོ་ནས་ལག་ལེན་ཚད་ལྡན་རེ་རིམ་གྱིས་ངེས་པར་གདབ་དགོས་པ་ཡིན་ནོ། །དེ་བཞིན་དུ་རྒྱུད་ལས་སུ་རུང་བར་བྱེད་པ་སྐྱབས་འགྲོའི་ཁྲིད་ལ། ཇི་སྐད་དུ། ཕྱི་པ་ནང་པ་སྐྱབས་འགྲོའི་ཁྱད། །ཐེག་པ་ཆེ་ཆུང་སེམས་བསྐྱེད་ཁྱད། །ཅེས་དང་། མདོ་ལས། སྐྱབས་སུ་སོང་བའི་བསོད་ནམས་གང་། །གལ་ཏེ་འདི་ལ་གཟུགས་མཆིས་ན། །ནམ་མཁའི་ཁམས་ནི་ཀུན་བཀང་ཡང་། །དེ་ནི་དེ་ལས་ལྷག་པར་འགྱུར། །ཞེས་དང་། མདོ་སྡེ་རྒྱན་ལས། རྟག་ཏུ་ཉོན་མོངས་ཚོགས་ཀུན་དང་། །ཉེས་པར་སྤྱོད་པ་ཐམས་ཅད་དང་། །རྒ་དང་འཆི་བ་དག་ལས་ཀྱང་། །སངས་རྒྱས་ཉིད་ཀྱིས་ཡོངས་སུ་སྐྱོབས། །འཚེ་བ་དག་ནི་ཐམས་ཅད་དང་། །ངན་སོང་དག་གི་གནས་མིན་དང་། །འཇིགས་ཚོགས་ཐེག་པ་དམན་དག་ལས། །སྐྱོབ་ཕྱིར་སྐྱབས་ཀྱི་དམ་པའོ། །ཞེས་གསུངས་པ་ལྟར། དཔེར་ན་བྱིས་པ་ཁྱིས་དེད་པ་མི་ཆེན་པོ་ལ་སྐྱབས་སུ་འགྲོ་བ་ལྟར་རམ། ཉེས་ཆེན་གྱི་མི་རྒྱལ་པོ་ཆེན་པོ་ལ་མགོ་བཏགས་པ་དང་འདྲ་ཞིང་། དེ་ལྟར་ཆོས་ལ་འཇུག་པའི་སྒོ་སྐྱབས་སུ་འགྲོ་བ་ནི་གལ་གནད་ཤིན་ཏུ་ཆེ་བའི་རང་བཞིན་ཏེ། སྐྱབས་སུ་མ་སོང་བས་སྡོམ་པ་ཙམ་ཡང་མི་ཐོབ་ལ། སྡོམ་པས་མ་བསྡམས་ན་ལམ་གཏན་ནས་མེད་པའི་ཕྱིར་ལམ་ཐམས་ཅད་ཀྱི་རྟེན་གཞི་མཆོག་རབ་རྩེ་མོ་ཡིན་པར་བཤད་པས། དེ་ལྟར་ཉམས་སུ་ལེན་པའི་དུས་རང་གིས་དད་པ་རྣམ་པ་གསུམ་གྱིས་གཞི་བཟུང་ན། རྒྱལ་བ་རྣམས་དགོངས་པར་གཤེགས་བཞུགས་ཁྱད་མེད། མཁྱེན་པར་གསལ་འགྲིབ་མེད་པ། བརྩེ་བར་ཉེ་རིང་མེད་པ། ནུས་པར་ཐོགས་རྡུགས་མེད་པ་རྒྱལ་བའི་ཡོན་ཏན་ཡིན་པའི་ངེས་ཤེས་བསྐྱེད་ནས། ཐེག་པ་ཆེ་འབྲིང་ཆུང་གསུམ་གྱི་སྐྱབས་འགྲོའི་དོན་དང་། ཡུལ་དང་། དུས་སོགས་ཅུང་ཟད་དབྱེ་ཞིང་ས་གཞི་རྒྱ་མཚོ་པད་སྡོང་བཞུགས་ཁྲི་དང་། སྐྱབས་ཡུལ་ལྷ་ཚོགས་ཐོ་བརྩེགས་དང་དཀྱིལ་འཁོར་དུ་གསལ། སྐྱབས་བྱ་རང་གཞན་སེམས་ཅན་ཐམས་ཅད་དམིགས་འོག་ཏུ་ཆུད་པ་དང་། ལུས་ཀྱིས་ཕྱག །ངག་གིས་སྐྱབས་འགྲོ། ཡིད་ཀྱིས་འདོད་གསོལ་བྱ་ཚུལ་སོགས་སྒོ་གསུམ་འདུན་པ་ཆིག་དྲིལ་དཀའ་སྤྱད་སྙིང་རུས་ལྡན་ངེས་བྱས་ཏེ། བསྡུ་རིམ་དང་བསྔོ་སྨོན་བྱ། ཕྱིན་ཆད་སྐྱབས་འགྲོའི་བསླབ་བྱ་ནི། སྤང་བྱ་དང་། བླང་བྱ། ཆ་མཐུན་གྱི་རིམ་པ་རྣམས་ཚུལ་བཞིན་སྲུང་སྡོམ་བྱ་བ་གལ་ཆེའོ། །དེ་ནས་སེམས་བསྐྱེད་ནི། དེ་ལྟར་སྐྱབས་ཡུལ་རྣམས་དཔང་པོའི་ཚུལ་དུ་བྱས་ཏེ་ཆོས་ཐེག་པ་ཆེན་པོའི་ལམ་ལ་ཞུགས་ནས་བཟུང་སྟེ། སྐྱེས་བུ་ཆེན་པོའི་སེམས་བསྐྱེད་ཡང་རབ་ཀྱི་ཐབས་ཟབ་མོ་དང་ངེས་པར་མ་ལྡན་ན། བྱ་ཡིན་ཀྱང་གཤོག་པ་མེད་པ་ལྟར་རམ། རྟ་ཁ་སྲབ་ཀྱིས་བསྒྱུར་བ་ལྟ་བུ་དགེ་སྡིག་གི་རྣམ་དབྱེ་གཞི་ནས་ཕྱེ་མཁས་དང་། ཆོས་དང་གང་ཟག་མཚམས་སྦྱོར་མཁན་དང་། དགེ་རྩའམ་འགྱུར་སྐྱེད་ཀྱི་རྩལ་བཏོན་མཁན་དང་། གཞན་དོན་རླབས་ཆེ་ཆུང་། ས་ལམ་མྱུར་ཞན། འབྲས་བུ་རབ་འབྲིང་ཐ་མ་ཐོབ་ལུགས་སོགས་ཀུན་སློང་བཟང་པོ་ཁོ་ན་ལ་རག་ལས་པ་ཡིན་ཏེ། བྱང་ཆུབ་སེམས་འགྲེལ་ལས། བྱང་ཆུབ་སེམས་ནི་མ་བསྐྱེད་པར། །སངས་རྒྱས་ནམ་ཡང་ཐོབ་མི་འགྱུར། །འཁོར་བར་བདག་གཞན་དོན་འགྲུབ་པའི། །ཐབས་གཞན་ཡོད་པ་མ་ཡིན་ནོ། །ཞེས་གསུངས་པ་ལྟར། གལ་ཆེ་ཞིང་མདོར་བསྡུ་ན་རང་རེ་རྣམས་ནི་དེ་སྔོན་རང་འདོད་ཁོ་ནའི་བསམ་སྦྱོར་གྱི་དབང་དུ་སོང་བའི་ལེ་ལན་གྱིས་འཁོར་བ་ངན་སོང་གི་གནས་སུ་མུ་མཐའ་མེད་པར་ལས་ངན། ལུས་ངན། འབྲས་བུ་ངན་པ་མྱོང་ནས་འཁྱམས་བསྡད་པ་ཡིན་འདུག་པས། ད་ནི་དེའི་གཉེན་པོ་ཆོས་ཤིག་སྒྲུབ་ན་རང་འདོད་ཡིད་བྱེད་ཀྱི་བློ་ངན་འདི་དག་དྲུངས་ནས་འབྱིན་ཏེ་གཞན་ཕན་གྱི་བསམ་སྦྱོར་ལྷད་མེད་རང་ལ་གཙོར་སྟོན་པ་ནི་གལ་གནད་ཤིན་ཏུ་ཆེ་ཤོས་ཡིན་པས། དེས་ན་དགྲ་གཉེན་བར་མ་དོའི་སེམས་ཅན་ཐམས་ཅད་མར་ཤེས་པ་དང་། དྲིན་དྲན་པ་དང་། དྲིན་ལན་འཇལ་དགོས་པའི་ཕྱིར། བྱང་ཆུབ་ཀྱི་སེམས་རིན་པོ་ཆེ་མ་སྐྱེས་པ་སྐྱེ་བར་བྱ་བའི་ཐབས་ཚད་མེད་པ་བཞི་ལ་བློ་སྦྱོང་། སྨོན་འཇུག་གཉིས་ཀྱི་སེམས་དངོས་སུ་བསྐྱེད་ནས་གྲངས་གསོག །སྐྱེས་པ་མི་ཉམས་པ་བསྲུང་བར་བྱ་བའི་ཕྱིར་བཟོད་པའི་གོ་ཆ་གྱོན། མི་ཉམས་པ་གོང་ནས་གོང་དུ་འཕེལ་བར་བྱ་བའི་ཕྱིར་སྨོན་འཇུག་གཉིས་ཀྱི་བསླབ་བྱ་རྒྱལ་སྲས་བྱང་ཆུབ་སེམས་དཔའི་སྤྱོད་པ་རླབས་པོ་ཆེ་ལ་བརྩོན་པར་བྱ་དགོས་སོ། །དེ་ལྟར་སེམས་བསྐྱེད་པའི་ཕན་ཡོན་ཀྱང་ཚད་མེད་དེ། ཐེག་ཆེན་གྱི་རྩ་བ་སེམས་བསྐྱེད་དུ་འགྲོ་བ་དང་། དགེ་བ་སྣ་གཅིག་ཡོད་རུང་སངས་རྒྱས་ཀྱི་ཡོན་ཏན་དང་སེམས་ཅན་གྱི་གྲངས་དང་མཉམ་པར་འཕེལ། དགེ་རྩ་ནམ་ཡང་ཆུད་མི་ཟ་བར་གོང་ནས་གོང་དུ་འཕེལ་བ་དང་། བསོད་ནམས་རྒྱ་ཆེ་བ་རྒྱུན་མི་ཆད་པར་ཐོབ་ཅིང་སངས་རྒྱས་ཀྱི་གདུང་འཛིན་པ་དང་། གཞན་དོན་རླབས་པོ་ཆེ་དངོས་བརྒྱུད་བར་གསུམ་ནས་འགྲུབ་པ་སོགས་དང་མཚམས་མེད་ཀྱི་ལས་བསགས་ཏེ། དམྱལ་བར་སྐྱེས་རུང་དར་གྱི་ཕོ་ལོང་བརྡབ་པ་ཙམ་ལས་གནས་མི་དགོས་པ་དང་། གཞན་སྡིག་བྱས་ཐམས་ཅད་དུས་མཐའི་མེ་ལྕེས་རྩ་སྦུར་ཐམས་ཅད་སྲེག་པ་ལྟར་འཇོམས་པ་དང་། འཇིག་རྟེན་ལས་འདས་པའི་ཆོས་ཐམས་ཅད་ཀྱི་རྩ་བའམ་ལམ་ཐམས་ཅད་ཀྱི་སྙིང་པོར་གྱུར་ནས་སེམས་ཅན་ཐམས་ཅད་ཀྱི་འདྲེན་པ་མཆོག་སྟེ་མྱུར་དུ་བླ་ན་མེད་པའི་ཁང་བཟང་དུ་བགྲོད་པའི་བཞོན་པ་བཟང་པོ་ལྟ་བུ་ཡིན་པ་སོགས་ཕན་ཡོན་ཚད་མེད་པས་ལྷག་པར་ཤེས་དགོས་སོ། །དེ་ནས་རྡོར་སེམས་སྒོམ་བཟླས་ནི། རིགས་ཐམས་ཅད་ཀྱི་བདག་པོ། དཀྱིལ་འཁོར་ཀུན་གྱི་གཙོ་བོ། རྒྱལ་བ་ཐམས་ཅད་ཀྱི་སྤྱི་གཟུགས་ཡིན་པར་བཤད་དེ། ལྷ་ཐམས་ཅད་ཞི་ཁྲོ་དམ་པ་རིགས་བརྒྱ་རུ་འདུས་པ་དང་། དེ་ལའང་རིགས་ལྔའི་ཁོངས་སུ་གཏོགས་པ་དང་། དེའང་གསང་ཆེན་གྱི་ལྷ་རིགས་ཀུན་ཁྱབ་བདག་དཔལ་ལྡན་རྡོ་རྗེ་སེམས་དཔའ་ལ་ཡོངས་སུ་འདུས་པ་དང་། མ་ཟད་སྔོན་གྱི་ཐུགས་བསྐྱེད་པའི་དུས་བདག་གི་མཚན་ཙམ་འཛིན་པ་ཐམས་ཅད་ཀྱི་སྡིག་ལྟུང་བྱང་བར་ཤོག་ཅེས་སྨོན་ལམ་བཏབ་པས་ཡོངས་སུ་འགྲུབ་ནས་སངས་རྒྱས་པ་ཡིན་པས་ན། ཕྱོགས་བཅུའི་སངས་རྒྱས་རེ་རེའི་མདུན་དུ་ཕྱིན་ནས་བཤགས་པའི་ཐབས་སྣ་ཚོགས་ལ་འབད་པ་ལས། གོང་དུ་བཤད་པ་བཞིན་དཀྱིལ་འཁོར་ཐམས་ཅད་ཀྱི་སྤྲོ་དང་སྡུད་པའི་བྱེད་པོ་དཔལ་རྡོ་རྗེ་སེམས་དཔའ་བསྒོམས་ནས་བཤགས་པ་བྱེད་པ་འདི་ཉིད་འགྱུར་སྟོབས་ཆེ་སྟེ། དགོངས་པ་ཚིག་གསུམ་གྱི་རྒྱུད་ལས། རྡོ་རྗེ་སེམས་དཔའ་བསྒོམས་ནས་ནི། །སྔགས་ཀྱང་རབ་ཏུ་བཟླ་བྱེད་པ། །དེ་ཡིས་སྡིག་སྒྲིབ་ཀུན་བྱང་ནས། །རྡོ་རྗེ་སེམས་དཔའ་འདྲ་བར་འགྱུར། །ཅེས་དང་། སྙིང་པོ་རྒྱན་ལས། པད་དཀར་ཟླ་བའི་གདན་སྟེང་དུ། །རྡོ་རྗེ་སེམས་དཔའ་ལེགས་དམིགས་ནས། །ཡི་གེ་བརྒྱ་པ་ཆོ་ག་བཞིན། །ཉི་ཤུ་རྩ་གཅིག་བཟླས་གྱུར་ན། །ལྟུང་སོགས་བྱིན་གྱིས་བརླབ་པར་འགྱུར། །འབུམ་ཕྲག་གཅིག་ཏུ་བཟླས་གྱུར་ན། །རྣམ་པར་དག་པའི་བདག་ཉིད་འགྱུར། །ཅེས་གསུངས་པ་ལྟར། གལ་ཆེ་བར་ཤེས་ནས་དེའང་སྦྱང་བྱ་སྡིག་པའི་སྒོ་དྲུག་ཤེས་པའི་ངང་ནས། ཡོངས་སུ་སོར་ཆུད་པ་ཞིག་ད་ལན་བཤགས་རྒྱུ་མ་བྱུང་ན༑ མེ་ལོང་ཞིག་ས་ཞབས་སོང་ནས་བཙའ་གཡའ་སྐྱོན་ཆེར་གྱིས་བཟུང་བ་ལྟ་བུའམ། ཕྱི་མཛེས་ནང་རུལ། ཤིང་ཐོག་ཀུ་མུནྟ་དང་མཚུངས་པའམ། མཛེ་ཅན་འབུས་གཡེངས་ལ་ཕྱི་ནས་གོས་རྒྱན་གྱིས་སྤྲས་པ་ལྟར་རམ། སྡིག་བྱས་ཀྱི་ལས་རྣམས་ནི་བཙན་དུག་ཧ་ལ་ནག་པོ་ཁོང་དུ་ཤོར་བ་ལས་ཀྱང་བརྒྱ་འགྱུར་གྱི་ཐུ་ཆེ་སྟེ། དེས་ནི་ད་ལྟའི་སྐབས་འདིར་ལུས་ན་བ་དང་། འཆི་རྐྱེན་བྱེད་པ་ཙམ་ལས། ཚེ་རབས་ཀུན་ཏུ་སྡུག་བསྔལ་ལ་སྦྱོར་བར་ག་ལ་ནུས་ཏེ། ལས་ངན་མི་དགེ་བས་ནི་ཚེ་འདིར་མི་བདེ་བར་རྐྱེན་ངན་རྣམ་པ་སྣ་ཚོགས་འབྱུང་བ་དང་། ཕྱི་མ་བར་དོའི་འཁྲུལ་སྣང་གི་ཉིང་མཚམས་སྦྱོར་ནས། ངན་སོང་གི་གནས་སུ་སྐྱེས་ཤིང་སྡུག་བསྔལ་བཟོད་དཀའ་བ་ཤུགས་དྲག་པ། རྒྱ་ཆེ་བ། ཡུན་རིང་བ༑ མཐའ་མི་མངོན་པ་འབའ་ཞིག་གིས་མནར་ནས། ཚེ་རབས་ཐམས་ཅད་དུ་འཁོར་བའི་གནས་ལས་ནམ་ཡང་མི་ཐར་བ་བྱེད་པས་ན་ཤིན་ཏུ་ཕུང་ཚབས་ཆེ་བའི་རང་བཞིན་ཏེ། དེས་ན་སྐྱོན་མེད་ལྟ་བུར་འཇོག་ག་ལ་རུང་སྟེ། སྨན་དུ་རེ་ནས་དུག་ཟས་ནོར་བ་དང་འདྲ་བར་དེ་ཚུག་ནས་བཤལ་སྐྱུག་བཏང་བ་བཞིན་གནོང་འགྱོད་དྲག་པོ་སྐྱེས་པའི་ངང་ནས་སྡིག་སྒྲིབ་ལྷག་མེད་དུ་སྦྱང་བ་ལ་འབད་པ་ཅི་ནས་གལ་ཆེ་ཞིང་། སྦྱོང་བྱེད་གཉེན་པོ་སྟོབས་བཞི་ཚང་བའི་སྒོ་ནས་རྩེ་གཅིག་འབད་པར་བྱས་ནས་རང་ཉིད་རྡོ་རྗེ་སེམས་དཔར་གནས་གྱུར་དོན་གཉིས་བྱས་ནས་བསྡུ་རིམ་ལ་ཡོངས་སུ་འཇུག་སྟེ། དོན་དམ་པའི་བཤགས་སྦྱོང་ལ་མཉམ་པར་འཇོག་ཅིང་སྡིག་སྒྲིབ་རྣམས་བྱང་རྟགས་ཀྱི་རིམ་པ་དངོས་ཉམས་རྨི་ལམ་དུ་མ་གྱུར་བར་དུ་འབད་པ་གལ་ཆེའོ། །ཕྱིན་ཆད་ཀྱང་སྡིག་པས་མི་གོས་པའི་ཐབས་ལ་འབད་དེ། དཔེར་ན་རྫི་བོའི་ཕྱུགས་ལུག་འཚོ་སྐྱོང་དང་བསྔོ་བགྲང་བྱེད་པ་ལྟར། དྲན་ཤེས་བག་ཡོད་ལྡན་པའི་སྒོ་ནས་སྡིག་སྤང་དགེ་སྒྲུབ་རྣམས་འཆོལ་ཉོག་རེད་མིན་བརྟག་དཔྱད་བྱ། གལ་སྲིད་མི་དགེ་བའི་ལས་བསགས་ཚེ་ལྟུང་བ་དང་ཡུན་དུ་འགྲོགས་ནས་ལེ་ལོ་བྱས་ན་དུག་མདའ་ངན་པས་ཟིན་པ་ལྟར་ཉེས་ལྟུང་དེས་དམྱལ་བར་སྐྱུར་ནུས་པར་གསུངས་པས་ལྟུང་བ་དང་ཞག་དང་སྐད་ཅིག་ཙམ་མི་འགྲོགས་པར། དཔེ་ཟས་དུག་ཟོས་པས་བཤལ་སྐྱུག་བཏང་བ་བཞིན་བཤགས་སྦྱོང་ལ་འབད། ཕྱིན་ཆད་སྡིག་པ་མི་དགེ་བའི་རིགས་གཏན་ནས་མི་བྱ་བའི་སྡོམ་སེམས་བཟུང་ནས་འཕྲོ་ཆོད་པར་བྱ་དགོས་ཏེ། དཔེར་ན་སྔར་དུག་ནད་ཀྱིས་མནར་བའི་མི་དེས་ཕྱིས་དུག་གི་སྒྲ་ཙམ་ཐོས་པས་ཤིན་ཏུ་འཇིགས་དངངས་སྐྱེས་ཏེ་ཟས་སྤྱོད་ལ་རིམ་གྱིས་འཛེམ་པ་ལྟར་བྱེད་པ་ལས་སྐུད་པ་ཡར་སྒྲིམ་ཕྱིར་སྒྲིམ་བྱས་པ་ལྟ་བུས་དགེ་སྒྲུབ་སྡིག་སྤང་མི་ཡོང་བས་བླང་དོར་གྱི་གནས་མི་བརྗེད་པའི་དྲན་པ་བརྟེན། ཤེས་བཞིན་པའི་བྱ་ར་བྱེད། བག་ཡོད་ཀྱི་ཚུལ་བཞིན་གནས་དགོས་པ་ཡིན་ནོ། །དག་པ་ཡེ་ཤེས་ཀྱི་ཆོས་སྐུ་མངོན་དུ་གྱུར་པའི་ཕྱིར། རྒྱུ་བསོད་ནམས་ཀྱི་ཚོགས་བསགས་པ་མཎྜལ་གྱི་རིམ་པ་ནི། ད་ལྟ་འབྱོར་བ་ཡོད་མེད་རྣམས་ལ་དཔྱད་པ་རེ་གཏོང་དང་ཤེས་ཤིང་། ཕྱི་ས་ཡུལ་ཁང་ཁྱིམ་རྒྱ་ཆེ་བ། ནང་སྐྱེ་འགྲོ་འཁོར་སློབ་མངའ་འབངས་སྒོ་ཟོག་གི་རིགས་དང་། རིན་པོ་ཆེའི་རིགས་དང་ཟས་གོས་འབྲུ་ནོར་ལོངས་སྤྱོད་ཕུན་སུམ་ཚོགས་པ་དང་། གསང་བ་ལུས་སེམས་རྣམ་པར་བཀྲ་བ་ནད་མེད་ཚེ་རིང་བ་སོགས་ནི་སྔོན་རྣམ་དཀར་གྱི་ཚོགས་བསགས་པའི་འབྲས་བུ་ཁོ་ནས་འབྱུང་བ་དང་། དབུལ་པོ་རྣམས་ནི་ས་དང་ཁང་ཁྱིམ་ཟས་གོས་སོགས་ཀྱི་དབུལ་ཞིང་། དབང་པོ་མ་ཚང་བར་ནད་གདོན་རྐྱེན་ངན་རྣམ་པ་སྣ་ཚོགས་ཀྱིས་དུས་རྟག་ཏུ་མནར་བ༑ དེ་དག་ཀྱང་སྔོན་བསོད་ནམས་ཀྱི་ཚོགས་མ་བསགས་པས། ད་ལྟ་འབྲས་བུ་བདེ་སྐྱིད་ཀྱི་འབྱོར་བས་དབུལ་བ་ཡིན་བཞིན་པ། མ་ཟད་བླ་མ་གྲྭ་པ་རྣམས་ནི་རྣམ་དཀར་གྱི་ཚོགས་བསགས་མཁན་པོར་ཡིན་འོས་ཀྱང་། དངོས་སུ་རྒྱུ་ནོར་གྱི་འབྱོར་བ་རྒྱ་ཆུང་བ་དང་། སེམས་བསྐྱེད་བསྐྱེད་རྫོགས་མི་ལྡན་པར་འཇིག་རྟེན་ཆོས་བརྒྱད་ཀྱི་དབང་དུ་སོང་ནས། བསོད་ནམས་ཀྱི་ཚོགས་ཡང་དག་གསོག་མཁན་མཆོད་ཡོན་གཉིས་ཆར་དཀོན་པའི་ཕྱིར། དེའི་མཐུས་ཕལ་ཆེར་བསོད་ནམས་དམན་པར་གྱུར་ནས་མཆོད་སྦྱིན་དང་རང་གི་ལོངས་སྤྱོད་ཙམ་དབུལ་གྲབ་ཀྱིས་དབྱར་ལྡོམ་སྟོན་ལྡོམ་དང་ཚོང་ཁེ་སྤོགས་སོགས་སྡིག་བྱས་ཀྱི་ལས་འབའ་ཞིག་ལ་གཡེང་ནས་ཚེ་ཟད་དགོས་པ་དེ་དག་ཀྱང་། བསོད་ནམས་ཀྱི་ཚོགས་མ་བསགས་པས་ལན་པ་དང་། བྱེ་བྲག་རང་རྒྱུད་དགེ་བའི་བག་ཆགས་སད་པ་དང་། དངོས་གཞི་ཉམས་རྟོགས་སྐྱེ་སླ་བ་དང་། བགེགས་དང་གོལ་ས་ཆུང་བ་དང་། བསྒྲུབ་བྱ་མཐར་ཐུག་རྟོགས་པ་ཕུན་སུམ་ཚོགས་པ་ཆོས་ཀྱི་སྐུ་དང་། གཞན་དོན་ཕུན་སུམ་ཚོགས་པ་གཟུགས་སྐུ་ཐོབ་པར་བྱེད་པ་སོགས་དགོས་ཆེད་དུ་མ་ཡོད་པས། དེས་ན་འབད་རྩོལ་རི་བོ་ཙམ་བཟོ་བ་ལས་བསོད་ནམས་མེ་སྟག་ཙམ་གསོག་ན་དགའ་བའི་རང་བཞིན་ཏེ། རྒྱལ་བའི་བཀའ། བླ་མའི་ལུང་། རང་གི་རིགས་པ་ཚད་མ་སོགས་ཀྱིས་མཐོང་ཆོས་མྱོང་འགྱུར་དུ་མངོན་སུམ་གྲུབ་འདུག་པས་ན་ཚོགས་བསགས་ཀྱི་རིམ་པ་ཆེད་དུ་འབད་པ་གལ་ཆེ་ཞིང་། དེའང་རྒྱལ་བ་རྣམས་ཐབས་མཁས་ལ་ཐུགས་རྗེ་ཆེ་བས་ལུས་ངག་ཡིད་གསུམ། ཕྱི་ནང་གསང་གསུམ་འབྱོར་ཚོགས་ཅི་རིགས་ཀྱི་སྒོ་ནས་ཚོགས་བསགས་པའི་ཐབས་མཐའ་ཡས་པར་གསུངས་པའི་ནང་ཚན་མཆོག་ཏུ་གྱུར་པ་ནི་མཎྜལ་གྱི་རིམ་པ་ཉིད་ཡིན་ཏེ། ཅི་ཕྱིར་སྙམ་ན་དངོས་པོའི་རྒྱུ་ནོར་རྫས་ལོངས་སྤྱོད་ཀྱི་འབྱོར་བ་རྒྱ་ཆུང་ཞིང་སྡིག་ཚོགས་དང་སེར་སྣའི་དྲི་མས་ཐོག་མཐའ་བར་དང་དངོས་བརྒྱུད་བར་གསུམ་ནས་མ་གོས་པ་ནི་ཅི་ལྟར་བྱས་ཀྱང་འབྱུང་དཀའ་ཞིང་། དེས་ན་གླིང་བཞི་གླིང་ཕྲན་སྟོང་གསུམ་འཇིག་རྟེན་གྱི་ཞིང་ཁམས་རབ་འབྱམས་མཐའ་དང་མུ་མེད་པ་རྣམས་དང་། ཐ་ན་བདག་ལུས་ལོངས་སྤྱོད་དང་བཅས་པ་སྒོ་གསུམ་འདུན་པ་ཆིག་དྲིལ་གྱི་བློས་ཡོངས་སུ་འཁྱུད་དེ། འབུལ་བ་ནི་བྱ་སླ་ལ་ཆོད་ཆེ་བའི་རང་བཞིན་གསང་སྔགས་ཐབས་ཀྱི་ཁྱད་ཆོས་དུ་མས་འཕགས་པའི་ཕྱིར། མཎྜལ་གྱི་མདོ་ལས། འདི་ལ་ལུས་ཀྱི་ལས་བྱས་ན། །ཁ་དོག་གསེར་ལྟར་འགྱུར་བ་དང་། །ནད་རྣམས་ཀུན་ལས་རྣམ་པར་གྲོལ། །ལྷ་དང་མི་ལས་ཆེས་ལྷག་ཅིང་། །ཟླ་བ་ལྟ་བུར་གཟི་བྱིན་ལྡན། །ནོར་དང་གསེར་སོགས་ཕུན་སུམ་ཚོགས། །རྒྱལ་པོའི་རིགས་དང་སངས་རྒྱས་ས། །མཆོག་གི་རིགས་སུ་སྐྱེ་བར་འགྱུར། །ཅེས་དང་། མདོ་སྡེ་རྒྱན་ལས། ཇི་སྲིད་ཚོགས་གཉིས་དམ་པ་དེ་ནི་མ་རྫོགས་ན། །དེ་སྲིད་སྟོང་ཉིད་དམ་པ་དེ་ནི་རྟོགས་མི་འགྱུར། །ཞེས་གསུངས་པ་ལྟར། སྒྲུབ་པའི་མཎྜལ་མཆོད་པའི་རིགས་ཅི་འབྱོར་བཤམས་ཤིང་མཆོད་ཡུལ་གསལ་བཏབ་སྟེ་མཎྜལ་རྒྱས་པ་སོ་བདུན་མ་དང་། ཚོམ་བུ་བདུན་མའམ་སྐུ་གསུམ་མཎྜལ་སོགས་ལག་ལེན་ཚད་ལྡན་ཆད་ལྷག་མ་སོང་བར་བཏབ་ནས། ཁྱད་པར་དམིགས་པ་གཙོར་འདོན་པས་ཚོགས་རླབས་པོ་ཆེ་རྫོགས་དགོས་པ་ཡིན་པས་ཚོགས་རྫོགས་པའི་རྟགས་མཚན་རྣམས་མངོན་དུ་མ་གྱུར་བར་འབད་དགོས་སོ། །དེ་ནས་བླ་མའི་རྣལ་འབྱོར་ནི། འགྲོ་བ་ལྷ་དང་བཅས་པ། སྐྱེ་དགུའི་བདག་པོ་ཚངས་པ་སོགས་ཀྱིས་སྟོན་མི་ནུས་པ་དང་། རང་ཉིད་ལ་བརྩེ་བའི་ཕ་མ་དང་། གཉེན་གྲོགས་དགའ་མཛའ་སོགས་ཀྱིས་སྟོན་མི་ནུས་པ། ཐར་པ་དང་ཐམས་ཅད་མཁྱེན་པའི་ལམ་སྟོན་མཁན་གྱི་བླ་མ་ནི་བཀའ་དྲིན་ཤིན་ཏུ་ཆེ་བས་དད་པ་དང་དག་སྣང་གི་སྒོ་ནས་ཤེས་པར་བྱ་བ་ལྔ་ལྔ་སོགས་ཀྱིས་འགྲོ་བ་རྣམས་གང་ལ་གང་འདུལ་གྱི་ཕྲིན་ལས་གཅིག་ཏུ་མ་ངེས་པར་བཟང་ངན་བར་མ་དོར་རྣམ་པ་སྣ་ཚོགས་སྟོན་པར་མཛད་པས་ན་དད་པ་དག་སྣང་ཡང་དག་པར་བྱས་ནས། ལུས་ངག་ཡིད་གསུམ་གྱི་སྒོ་ནས་མ་གུས་པ་རྣམས་ཡོངས་སུ་སྤངས་ཏེ། ལུས་ངག་ཡིད་གསུམ་གྱིས་གུས་འདུད་ཚུལ་ལྡན་དང་། རྒྱུ་ནོར་ལོངས་སྤྱོད་ཀྱིས་མཆོད་པ་དང་། རབ་སྒྲུབ་པའི་ཞབས་ཏོག་སོགས་ཀྱིས་ཐུགས་མཉེས་པར་བྱས་ཏེ། བླ་མའི་རྣལ་འབྱོར་སྒོམ་པར་བྱ་བ་གལ་ཆེ་སྟེ། ས་ར་ཧས། བརྗོད་བྲལ་ལྷན་ཅིག་སྐྱེས་པའི་ཡེ་ཤེས་ནི། །ཚོགས་བསགས་སྒྲིབ་པ་དག་པའི་ལག་རྗེས་དང་། །རྟོགས་ལྡན་བླ་མའི་བྱིན་རླབས་ཁོ་ན་ལས། །ཐབས་གཞན་བརྟེན་པ་རྨོངས་པར་ཤེས་པར་བྱ། །ཞེས་དང་། ཨཱ་ལི་ཀཱ་ལིའི་རྒྱུད་ལས། དུས་རྣམས་ཀུན་ཏུ་བླ་མའི་རྣལ་འབྱོར་ལ། །ཡུན་དུ་བསྲིང་སྟེ་འབུངས་བར་མ་གཏོགས་པར། །བསྐྱེད་རྫོགས་ལ་སོགས་བྱ་བ་མང་པོས་ཀྱང་། །དག་པའི་སྣང་བ་ལམ་དུ་སློང་བར་དཀའ། །ཞེས་གསུངས་པ་ལྟར། རྟོགས་པའི་ཡེ་ཤེས་རང་རྒྱུད་དུ་བཙན་ཐབས་སུ་འཕོ་བའི་མན་ངག་ཀུན་གྱི་མཐར་ཐུག་བླ་ན་མེད་པ་ཉིད་ཡིན་ཏེ། ཅི་ཕྱིར་ཞེ་ན། བྱིན་རླབས་དངོས་གྲུབ་ཐམས་ཅད་ཀྱི་འབྱུང་གནས་ཆེན་པོ་ནི། སྤྲོས་བྲལ་བདེ་བར་གཤེགས་པའི་སྙིང་པོ་ཉིད་ཡིན་པས། དེ་ལྟ་བུ་དབྱེར་མེད་རྟོགས་ཤིང་མཆོག་ཐུན་མོང་གི་དངོས་གྲུབ་ཡོངས་སུ་བརྙེས་པའི་བྱིན་རླབས་ཀྱི་ཚན་ཁ་འབར་བ་ནི་བླ་མ་རང་ལས་གཞན་འོས་སུ་ནམ་ཡང་མ་མཆིས་ཤིང་། དེ་ལྟ་བུའི་བྱིན་རླབས་གང་ཟག་སོ་སོ་སྐྱེ་བོའི་རྒྱུད་ལ་འཇུག་པར་བྱ་བའི་ཐབས་ཟབ་མོ་ནི། དད་པ་དང་མོས་གུས་ཁོ་ནའི་ལམ་ནས་དྲང་དགོས་པ་ཡིན་ཞིང་། དགོས་ཆེད་ནི་རང་གནས་ཀྱི་ཡེ་ཤེས་ངོ་མ་འཕྲོད་པའམ། མ་སྨིན་པ་སྨིན་པར་བྱེད་པའི་བྱིན་རླབས་ཀྱི་སྙིང་པོ་ཡོངས་སུ་ཐོབ་ཡོང་བའི་ཕྱིར། དཔེར་ན་མཆན་ལ་ཕབ་བཏབ་པའི་རྐྱེན་གྱིས་རོ་བཅུད་ནུས་པ་ཐམས་ཅད་མྱུར་བ་ཉིད་དུ་མངོན་སུམ་སྟོན་ཡོང་བ་ལྟར་རམ། ཉི་མའི་ཟེར་མེ་ཤེལ་གྱི་མཚམས་སྦྱོར་བས་སྤྲ་བ་ལ་མེ་ཐོགས་མེད་འབྱུང་བ་ལྟར་ཡིན་མ་གཏོགས་གཞན་ཚེ་འདིར་སྣང་ལ་མཁས་པ་དང་། ཆོས་ཚིག་ལ་མཁས་པ་དང་། དབང་ཆེ་ཞིང་བཙན་པ་དང་། ནོར་ཕྱུག་ཅིང་ཕོ་རྒོད་པ་དང་། ཁ་མཁས་ཤིང་དབང་ཆེ་བ་དང་། ཚུལ་ཁྲིམས་ལྡན་པ་དང་། ཐོས་བསམ་མཁས་པ་དང་། ཤེས་རབ་དང་བརྩོན་འགྲུས་ཆེ་བས་ཀྱང་རྟོགས་བྱ་མིན་པས་ན་བགེགས་གོལ་ས་ཡོད་མེད། ཉམས་རྟོགས་ཡོན་ཏན་སྐྱེས་ཆེ་ཆུང་། ས་ལམ་གྱི་བགྲོད་པ་མྱུར་ཞན། རང་གཞན་གྱི་གཏན་དོན་འགྲུབ་ཆེ་ཆུང་སོགས། ལམ་ཟབ་བླ་མའི་རྣལ་འབྱོར་ཁོ་ན་ལ་གཙོ་ཆེ་བས། རང་རྒྱུད་ལ་ནན་ཏན་བསྒོམ་དགོས་པ་ཡིན་ཏེ། ཉམས་ལེན་གྱི་སྐབས་སུ་བདག་བསྐྱེད་རྡོ་རྗེ་རྣལ་འབྱོར་མ་དང་། མདུན་བསྐྱེད་རྒྱལ་ཀུན་འདུས་ཞལ་ཨོ་རྒྱན་རིན་པོ་ཆེ་གསལ་ལ་ཡན་ལག་བདུན་པ་འབུལ་བ་དང་། གསོལ་འདེབས་ཅི་རིགས་དབྱངས་སྙན་པོས་འདོན་ཏེ་ལུས་བ་སྤུ་ལྡང་། མིག་མཆིལ་མ་འབབ། སེམས་དྲན་མེད་དུ་བརྒྱལ། ལུས་ཚུགས་མི་ཟིན་པ་མ་བྱུང་བར་དུ་མོས་གུས་ཀྱི་རྩལ་ཡང་ཡང་དུ་བསྐྱེད་པ་དང་། བཛྲ་གུ་རུ་བཟླས་མཐར་དབང་བཞི་ཞུ་ཐུགས་ཡིད་དབྱེར་མེད་དུ་བསྲེ་ཞིང་མཉམ་པར་འཇོག་ལ། བྱིན་རླབས་འཇུག་རྟགས་རྣམས་དངོས་ཉམས་རྨི་ལམ་དུ་མ་བྱུང་བར་དུ་འབད་པར་བྱའོ། །དེ་ནས་མ་ཧཱ་ཡོ་གའི་བསྐྱེད་རིམ་བསྒོམ་ཚུལ་ནི། རྒྱལ་བ་རྡོ་རྗེ་འཆང་ཉིད་ཀྱིས་གདུལ་བྱའི་སེམས་ཅན་གྱི་སྐལ་པ་དང་འཚམས་པའི་ཆོས་སྒོ་བསམ་གྱིས་མི་ཁྱབ་པ་ཞིག་གསུངས་པ་ཀུན་གྱི་སྐྱེལ་སོ་ནི་འབྲས་བུ་གསང་ཆེན་རྡོ་རྗེ་ཐེག་པ་ཉིད་ཡིན་ལ། དེའི་ལམ་ནི་ཐབས་བསྐྱེད་པའི་རིམ་པ་དང་། ཤེས་རབ་རྫོགས་པའི་རིམ་པ་གཉིས་སུ་འདུས་ཏེ། སྣང་བ་རྡོ་རྗེ་འཆང་བའི་རྒྱུད་ལས། གང་ཕྱིར་རྡོ་རྗེ་འཆང་ཆེན་གྱིས། །གསུངས་པའི་དོན་ནི་རྣམ་མང་པོ། །མདོར་བསྡུས་རྣམ་པ་གཉིས་ཡིན་ཏེ། །སྨིན་པ་དང་ནི་གྲོལ་བའོ། །ཞེས་དང་། གསང་འདུས་ལས། སངས་རྒྱས་རྣམས་ཀྱི་ཆོས་བསྟན་པ། །རིམ་པ་གཉིས་ལ་ཡང་དག་འདུས། །བསྐྱེད་པའི་རིམ་པ་དང་པོ་སྟེ། །རྫོགས་པའི་རིམ་པ་གཉིས་པའོ། །ཞེས་གསུངས་པ་ལྟར། འདིར་བསྐྱེད་རིམ་གྱི་སྒོམ་དོན་མདོ་ཙམ་བསྟན་ན། རང་བཞིན་གནས་པའི་གཞི་ཡེ་ནས་འཆིང་བ་ལས་འདས་པ་ནི་སྦྱང་གཞི། འཁྲུལ་བ་བཏགས་པའི་གཞི་མེད་སྣང་གློ་བུར་བ་རྣམས་ནི་སྦྱང་བྱ། ཡེ་ཤེས་ལམ་བདེན་གྱི་ཆ་གྱུར་འཁོར་དང་བཅས་པ་ནི་སྦྱོང་བྱེད་ལམ། འཁྲུལ་པ་དག་པའི་ཆ་ནི་བྲལ་བའི་འབྲས་བུ་མངོན་དུ་གྱུར་པ་ཡིན་ནོ། །སྒྲུབ་བྱའི་ལྷ་ནི་ཆོས་ཉིད་དོན་གྱི་ལྷ་རང་བྱུང་གི་ཡེ་ཤེས་བྱང་ཆུབ་སེམས་ཀྱི་འཁོར་ལོ་སྟེ། དེའི་ངང་ན་སྣང་སྲིད་ཀྱི་ཆོས་ཐམས་ཅད་ཡེ་ནས་འདུ་འབྲལ་མེད་ཀྱང་། དེ་ལྟར་མ་རྟོགས་པའི་དབང་གིས་རང་དང་ལྷ་མཆོག་དམན། ཉེ་རིང་། ཐ་དད་དུ་སྣང་ནས། བདག་འཆིང་བ་ཀུན་ལྡན་པས་ཉོན་མོངས་ཀྱི་སྦུབས་སུ་འཐུམ། ལྷ་ནི་རང་དོན་མཐར་ཕྱིན་ལ། གཞན་དོན་མཁྱེན་བརྩེ་ནུས་པ་ཚད་མེད་པའི་སྒོ་ནས་སྐུ་མཚན་མ་དང་། གསུང་རིག་སྔགས་དང་། ཐུགས་ཏིང་ངེ་འཛིན་གྱི་འཇུག་པའི་སྒོ་ནས་མཆོག་ཐུན་གྱི་དངོས་གྲུབ་ཡིད་བཞིན་དུ་སྩོལ་བར་མཛད་དོ། །དེ་ལྟར་སྒྲུབ་ཚུལ་ལ་ཕྱི་ནང་གསང་གསུམ་ལས། འདིར་ཕྱི་ལྟར་སྒྲུབ་པའི་ཚུལ་ལ། དང་པོ་སྐྱབས་སེམས། བགེགས་ཕྲལ་སྲུང་འཁོར། དེ་ནས་བྱིན་དབབ། མཆོད་རྫས་བྱིན་རླབས་འདི་ཡན་སྔོན་འགྲོའོ། །དངོས་གཞི་ནི། སེམས་ཀྱི་ཆོས་ཉིད་སྟོང་གསལ་སྤྲོས་པ་བྲལ་བ་ནམ་མཁའི་དཀྱིལ་ལྟར་མཐོང་བ་ནི། དེ་བཞིན་ཉིད་ཀྱི་ཏིང་ངེ་འཛིན། གནས་ལུགས་དེ་ལྟ་བུ་ལ་འཁོར་འདས་གཉིས་སུ་མ་གྲུབ་པས་རང་རྩལ་ལ་སྒྱུ་མའི་མཚང་མ་རིག་སྟེ་འཁོར་བར་དབང་མེད་འཁྱམས་པའི་འགྲོ་བ་རྣམས་ལ་སྙིང་རྗེ་སྒྱུ་མ་ལྟ་བུར་སྐྱེས་པ། ཀུན་སྣང་གི་ཏིང་ངེ་འཛིན། སྟོང་ཉིད་སྙིང་རྗེ་ཟུང་འཇུག་གི་སྤྲུལ་པ་སོ་སོའི་ས་བོན་གང་རུང་རྒྱུའི་ཏིང་ངེ་འཛིན་རྣམ་པ་གསུམ་ཏེ། འདིས་འཆི་བར་སྐྱེ་གསུམ་གྱི་བག་ཆགས་སྦྱང་བ་དང་། སྐུ་གསུམ་གྱི་རྟེན་འབྲེལ་འགྲིགས་པ་དང་། སྦྱོང་བྱེད་ཁམས་རང་གི་ངོ་བོའི་སྟོང་ཉིད་སྙིང་རྗེའི་སྙིང་པོ་ཅན་ཏེ། འདི་ལ་གོ་མྱོང་ཅི་རིགས་སྐྱེས་ན་བསྐྱེད་རིམ་ཕྱི་མ་རྣམས་ཀྱི་དག་སྦྱོར་རེ་རེ་བཞིན་ཞིབ་པར་མ་གྲུབ་ཀྱང་འགལ་བ་ཆུང་སྟེ། དོན་གྱི་གནད་རྣམས་འདིར་ཚང་བ་ཡིན་པས། ཐོག་མར་འདི་ཁོ་ན་ལ་གོམས་འདྲིས་བྱ་རྒྱུ་གལ་ཆེ། དེ་ནས་ས་བོན་རྣམས་ལས་འབྱུང་རིམ་དང་གཞལ་ཡས་ཁང་གདན་སོགས་བསྐྱེད་ཅིང་། ཐུན་མོང་དུ་མངལ་སྐྱེས་སྦྱོང་བྱེད་མངོན་བྱང་ལྔ་བསྐྱེད་དང་། མངོན་བྱང་བཞི་བསྐྱེད། ཆོ་ག་གསུམ་བསྐྱེད་གསུངས་པ་ལས་སྔ་འགྱུར་རྙིང་མའི་ཕྱོགས་འདིར་བསྡུས་པ་རྡོ་རྗེའི་ཆོ་ག་གསུམ་བསྐྱེད་ཕལ་ཆེར་བཤད་དེ། བསྐྱེད་ཚུལ་འདིས་ནི་སྐྱེ་གནས་གཞན་གྱི་བག་ཆགས་རྣམས་ཀྱང་ཞོར་ལ་སྦྱང་བར་གསུངས་པས། སྦྱོང་བྱེད་ནི་རྒྱུའི་ས་བོན་ནམ་མཁའ་ནས་གདན་ལ་བབ་པ་ནི་གསུང་ཡིག་འབྲུའི་ཆོ་ག །ཕྱག་མཚན་གང་ཡིན་ས་བོན་གྱི་མཚན་པ་ལས་འོད་ཟེར་འཕྲོས་པས། ཕྱོགས་བཅུའི་སངས་རྒྱས་སྤྱན་དྲངས་ནས་འོད་ཟེར་གྱི་ཚུལ་དུ་ཐིམ་པ་ནི། ཐུགས་ཕྱག་མཚན་གྱི་ཆོ་ག །ས་བོན་ཕྱག་མཚན་ཡོངས་སུ་གྱུར་བ་ལས། བསྐྱེད་བྱའི་ལྷ་གང་ཡིན་པ་མཚན་དཔེ་གསལ་རྫོགས་སུ་གྱུར་པ་ནི་སྐུ་ཡོངས་རྫོགས་ཀྱི་ཆོ་གའོ། །བསྐྱེད་བྱའི་ལྷ་དེའང་ཡི་དམ་གང་ལ་བརྟེན་པའི་མངོན་རྟོགས་ལྟར་སྒོམ་པར་བྱ་བ་ལས་མཐའ་གཅིག་ཏུ་ངོས་བཟུང་དཀའ་ཡང་སྤྱི་ཙམ་དུ་བསྒོམ་བྱའི་ལྷ་ཞི་བ་དང་ཁྲོ་བོ་གཉིས་སུ་འདུས་པས་ཞི་བ་དེའང་ཞི་ཚུལ་དགུ་རྒྱན་ཆས་བཅུ་གསུམ་གྱིས་སྤྲས་པ་ཅན། ཁྲོ་བོར་ཉམས་དགུ་དང་། དཔལ་གྱི་ཆས་བརྒྱད་དང་། དུར་ཁྲོད་ཀྱི་ཆས་བརྒྱད་ཀྱིས་བརྒྱན་པའོ། །དེ་ལྟར་བྱིན་གྱིས་རླབས། ཡེ་ཤེས་པ་སྤྱན་དྲངས། བཞུགས་སུ་གསོལ། ཕྱག་འཚལ། ཕྱི་མཆོད་འདོད་ཡོན་རྣམ་ལྔ། ནང་མཆོད་སྨན་རཀ་གཏོར་གསུམ། གསང་མཆོད་སྦྱོར་སྒྲོལ་གཉིས། ཡང་གསང་དེ་ཁོ་ན་ཉིད་ཀྱིས་མཆོད་དོ། །དེ་ནས་བསྟོད་པར་བྱས་ཤིང་ལྷའི་སྣང་ཞེན་བསླབ་པ་ལ་གསུམ་སྟེ། རྣམ་པ་གསལ་བ། ང་རྒྱལ་བརྟན་པ། དག་པ་དྲན་པ་སྟེ། མདོར་ན་སྤྱན་དཀར་ནག་ཚུན་ཆད་མ་འདྲེས་པ་སོ་སོར་ཁྲ་ལམ་མེར་གསལ་བ། ལྷ་བསྐྱེད་པའི་རྟེན་དང་བརྟེན་པའི་དཀྱིལ་འཁོར་སྐུ་མདོག་ཞལ་ཕྱག་རྒྱན་ཆས་སོགས་བརྡའ་རྟགས་ཀྱི་རྩིས་ཟིན་པ། གཉུག་མའི་རྡོ་རྗེ་གསུམ་གྱི་ངོ་བོར་ཡེ་ནས་སྐྱོན་ཀུན་ཟད། ཡོན་ཏན་ཀུན་རྫོགས་སངས་རྒྱས་ཐམས་ཅད་ཀྱི་ཡེ་ཤེས་ཀྱི་སྤྱི་གཟུགས་བསྒོམ་བྱའི་ལྷ་གང་ཡིན་པ་ངའོ་སྙམ་པའི་ང་རྒྱལ་བཟུང་། ལྷ་དང་ཡེ་ཤེས་སེམས་དཔའ་ཐུགས་སྲོག་སྔགས་ཕྲེང་བཅས་བཀོད་པ་ཟླ་བ་སྐར་ཕྲེང་ལྟ་བུའི་བཟླས་པའོ། །ཐུགས་ས་བོན་སྔགས་ཕྲེང་ལས་འོད་ཟེར་དཀར་པོ་ཞི་བ། སེར་པོ་རྒྱས་པ། དམར་པོ་དབང་། ལྗང་ནག་དྲག་པོ། སྣ་ལྔ་ལས་དོན་གཉིས་བྱེད་པ་སོགས། ཐམས་ཅད་དམིགས་པའི་དལ་ཁ་བསྒྱུར་བ་རྒྱལ་པོའི་ཕོ་ཉ་ལྟ་བུའི་བཟླས་པ། ཡབ་ཡུམ་ཞལ་གསང་བརྒྱུད་ནས་སྔགས་ཕྲེང་བསྐོར་བ་དོ་ལིའི་བཟླས་པའམ། སྒྲ་འབྲུག་སྟོང་ལྡིར་བ་ལྟ་བུ་སྒྲོགས་པར་མོས་པ་སྒྲུབ་པ་ཆེན་པོའི་བཟླས་པ་སྟེ། དེ་ལྟར་སྒོམ་བཟླས་བྱས་པས། སྐུ་དངོས་སུ་མཐོང་བ་དང་། ངག་ལ་བདེན་པ་གྲུབ་པ་དང་། སེམས་ཀྱི་ཆོས་ཉིད་ཀྱི་བདེན་པ་མཐོང་བ་སོགས་འབྱུང་བ་དགོས་ཆེད་དུ་མར་གསུངས། དེ་ནས་ཆོ་གའི་ཡན་ལག་ཚོགས་མཆོད་སྦྱང་སྤེལ། སྤྱན་འདྲེན། མཆོད་བཤགས། བསྒྲལ་བསྐང་། ཚོགས་རོལ། ལྷག་གཏོར་བཏང་། རྟ་བྲོ་བརྡུང་། དངོས་གྲུབ་བླང་། གནོང་བཤགས་བསྡུ་རིམ། བསྔོ་སྨོན། བཀྲ་ཤིས་སོགས་བརྗོད་ཅིང་ཚིག་རྗེས་དོན་འདྲེས་ངེས་བྱ་དགོས་པ་ཡིན་ཏེ། དཔེར་ན་འཕགས་ཡུལ་གྱི་གྲུབ་ཆེན་རྣམས་ཀྱིས་བསྐྱེད་རྫོགས་མན་ངག་སྣ་རེ་ལའང་སེམས་འཛིན་ལོ་གྲངས་སུ་མཛད་པས་རྒྱུད་ནས་བཤད་ཚོད་ཀྱི་ཡོན་ཏན་སྐྱེ་ཞིང་གྲུབ་པ་ཐོབ་པ་ལགས། རང་རེ་བོད་ཀྱི་ཡུལ་དུ་རྒྱུད་སྡེ་བཞིའི་བསྙེན་སྒྲུབ་ཐེངས་མ་ཁ་གྲངས་དུང་ཕྱུར་མང་པོར་བཟླས་ཀྱང་། ངག་གི་བདེན་པ་ཚད་ལྡན་ཞིག་འགྲུབ་པའི་ངེས་ཏིག་མེད་པ་འདི་དག་སྔགས་ཉམས་སུ་ལེན་པར་རློམ་ཡང་གནད་དང་མི་ལྡན་པའི་རྟགས་ཡིན་པར་གསུངས་པས། དེས་ན་ཆོ་ག་ལ་བསྐྱེད་རྫོགས་སོགས་ཀྱི་སྤྲོས་པ་དམིགས་བཅས་ཆེ་ཞིང་ཆེ་བ་ཕྲ་ཞིང་ཕྲ་བ་དུ་མར་ཡོད་ཀྱང་ཅུང་ཟད་ཙམ་མི་གསལ་མི་དྲན་པར་སེམས་ནག་ཐོམ་ལུང་མ་བསྟན་ཡུག་གཅིག་ཏུ་སོང་བ་འདི་དག་ལ་རྩོལ་བཅས་ཀྱི་གོམས་ཆ་བརྩོན་འགྲུས་རིམ་གྱིས་ན་སྤར་ནུས་པ་གལ་ཆེ་ཞིང་། ནང་ལྟར་ན་ལྷ་དེ་དག་ཐམས་ཅད་ཀྱི་སྙིང་པོ་ནི་རང་གི་དབུ་མའི་གྲོང་ཁྱེར་དུ་ཡེ་ཤེས་ཀྱི་རླུང་དང་ཐིག་ལེའི་དྭངས་མ་རང་ཡིན་པས། རྩ་གནས་རྣམས་སུ་རང་བཞིན་བཞུགས་པའི་ལྷ་ཡི་འཁོར་ལོ་གསལ་ལ། དེ་ཡང་རྩ་བ་ཙིཏྟ་འོད་ཀྱི་གུར་ཁང་བྱང་ཆུབ་སེམས་ཀྱི་ཐིག་ལེ་བདེ་ཆེན་འགྱུར་བ་མེད་པ་འདུས་མ་བྱས་པའི་རང་སྣང་ལ་དམིགས་ཏེ་རླུང་སྔགས་ཤེས་པ་གསུམ་དབྱེར་མེད་གཅིག་ཏུ་བཟླས་པས་མྱུར་དུ་འགྲུབ་སླ་སྟེ། རང་གི་མ་དག་པའི་སྒོ་གསུམ་སྤྱོད་ཡུལ་དང་བཅས་པ་ནི་གཡོ་བྱེད་ལས་རླུང་གི་ཆོ་འཕྲུལ་རང་ཡིན་པའི་ཕྱིར་རོ། །ད་ནི་ཨ་ཏི་ཡོ་གའི་དགོངས་དོན་ཤིན་ཏུ་སྤྲོས་མེད་གསང་བ་ལྟར་བསྒྲུབ་ཚུལ་ནི། འཁོར་འདས་ཐམས་ཅད་ཡེ་ནས་མཉམ་པའི་དབྱིངས་རང་སེམས་གདོད་ནས་མ་སྐྱེས་པ་རང་བྱུང་ཡེ་ཤེས་ཀྱི་དོན་རྟོགས་ན་བསྒྲུབ་བྱའི་ལྷ་ལོགས་ན་ཅུང་ཟད་ཙམ་ཡང་མེད་དེ། བརྟག་གཉིས་ལས། ལྷ་ཉིད་རང་ལ་རང་ཉིད་ལྷ། །ལྷ་དང་ལྷན་ཅིག་སྐྱེས་པ་ལ། །སྤྱན་དྲངས་གཤེགས་གསོལ་འདིར་མི་དགོས། །ཡེ་ནས་ལྷུན་མཉམ་དཀྱིལ་འཁོར་ལ༑ །ཡིན་པར་ཤེས་པས་བསྒོམས་པ་ལས། །ཐ་དད་བློ་ཡི་རིམ་པ་ཡིས། །སྤྱན་འདྲེན་གཤེགས་གསོལ་འདིར་མི་དགོས། །ཞེས་དང་། སྤྲོས་པ་མེད་པའི་གང་ཟག་ལ། །ལྷ་དང་སྔགས་ནི་ཡང་དག་གནས། །ཞེས་གསུངས་པ་ལྟར། སྣང་གྲགས་རྟོག་ཚོགས་ཀྱིས་བསྡུས་པའི་ཆོས་ཐམས་ཅད་རྒྱལ་བའི་སྐུ་གསུང་ཐུགས་རྡོ་རྗེའི་ངོ་བོར་ཡེ་སངས་རྒྱས་བཞིན་མ་བསྐྱེད་ལྷུན་གྱིས་རྫོགས་པའི་དཀྱིལ་འཁོར་རྩོལ་བྲལ་འབྲས་བུའི་ས་ལ་ད་ལྟ་ནས་གནས་བཞིན་བཟང་ངན་རྣམ་པར་དབྱེ་བའི་འཁྲུལ་རྟོག་གིས་མི་བཅིང་བར། རིག་པ་ཡེ་ནས་རྩོལ་སྒྲུབ་མེད་པའི་དོན་ལ་མཉམ་པར་རྩེ་གཅིག་བཞག་པས་སྒྲུབ་པ་ནི་ཟབ་མོ་ཀུན་གྱི་མཐར་ཐུག་སྟེ། ལྷ་དང་རང་སེམས་གདོད་ནས་དབྱེར་མེད་ཆེན་པོའི་གྲུབ་མཐའ་སྙེགས་ནས་སྒྲུབ་པ་ཀུན་གྱི་སྙིང་པོ་ཡོངས་སུ་གྲུབ་པར་འགྱུར་བ་ཡིན་ནོ། །འཁོར་འདས་ཀུན་དབྱིངས་དེ་ལས་སྣང་བའི་ཆོ་འཕྲུལ་ཙམ་ཡིན་པའི་ཕྱིར་ད་ལྟ་རང་མ་རིག་པ་སེམས་ཀྱི་ལྷ་དང་བདག་མཆོག་དམན་ཉེ་རིང་ཐ་དད་དུ་མར་འཛིན་སོང་བ་ལས། གནས་ལུགས་ཡེ་ཤེས་ཀྱི་ངང་དུ་ལྷ་དང་ཉེ་རིང་བཟང་ངན་ལ་སོགས་པ་ཐམས་ཅད་གཉིས་མེད་ལྷུན་གྲུབ་ཏུ་ཡེ་ནས་རང་བཞིན་གྱིས་གནས་པ་ནི། ད་ལྟར་གྱི་རིག་པ་སྐད་ཅིག་མའི་ཐོག་ཏུ་ཉམས་མྱོང་འཁྲུལ་བྲལ་གྱིས་ཐག་ཡོངས་སུ་ཆོད་རྒྱུ་ཡོད་པ་ཡིན་པས་ན། ཚུལ་འདི་ལྟར་སྦྱོར་དངོས་རྗེས་གསུམ་ཚང་བའི་ཚུལ་བཞིན་སྟན་ཐོག་གཅིག་ཏུ་ཉམས་སུ་བླང་བས་བསྐལ་པ་མང་པོའི་ཚོགས་འདུམ་པར་གསུངས་པས་རྩེ་གཅིག་ཏུ་བརྩོན་པ་གལ་ཆེའོ། འོད་གསལ་རྫོགས་པ་ཆེན་པོའི་བླ་བརྒྱུད་དང་ཀ་དག་ཁྲེགས་ཆོད་དང་ལྷུན་གྲུབ་ཐོད་བརྒལ་ཉམས་སུ་བླང་ཚུལ་སོགས་ནི། ཀུན་ཏུ་བཟང་པོ་དང་། རྡོ་རྗེ་སེམས་དཔའ། ཕྱག་ན་རྡོ་རྗེ། ཐུབ་པ་དྲུག །སྟོན་པ་བཅུ་གཉིས། བསྐལ་བཟང་གི་སངས་རྒྱས་སྟོང་སོགས་དགོངས་བརྒྱུད་དང་། དགའ་རབ་རྡོ་རྗེ། འཇམ་དཔལ་བཤེས་གཉེན། ཤྲཱི་སིངྷ། ཛྙཱ་ན་སུ་ཏྲ། བི་མ་མི་ཏྲ། ཨོ་རྒྱན་པདྨ་འབྱུང་གནས་བཅས་བརྡའ་བརྒྱུད། མྱང་བན་ཏིང་འཛིན་བཟང་པོ། ལྡང་མ་ལྷུན་རྒྱལ། ལྕེ་བཙུན་སེངྒེ་དབང་ཕྱུག །རྒྱལ་བ་ཞང་སྟོན་པ༑ མཁས་པ་ཉི་འབུམ། གུ་རུ་ཇོ་བེར། འཁྲུལ་ཞིག་ཆེན་པོ། མེ་ལོང་རྡོ་རྗེ། རིག་འཛིན་ཀུ་མཱ་རཱ་ཛ། རྒྱལ་བ་ཀློང་ཆེན་རབ་འབྱམས། རིག་འཛིན་འཇིགས་མེད་གླིང་པ། འཇམ་དབྱངས་མཁྱེན་བརྩེའི་དབང་པོ། གྲུབ་དབང་ཤཱཀྱ་ཤྲཱི་སོགས་སྙན་བརྒྱུད་དེ་རྣམས་ཀྱི་རྣམ་ཐར་དང་ད་སྐབས་བླ་སློབ་བརྟགས་ཏེ་བསྟེན་ཚུལ་ཅུང་ཟད་བཤད་ཅིང་། བརྒྱུད་པ་དེ་དག་ལས་བྱུང་བའི་འོད་གསལ་རྫོགས་པ་ཆེན་པོ་ནི། གོ་རིམ་ཅུང་ཟད་སྤྲོས་ཞིང་བསྡུ་ན། སྟོན་པ་ཤཱཀྱ་ཐུབ་པས་སྡེ་སྣོད་གསུམ། སྔགས་ཕྱི་རྒྱུད་གསུམ་གསུངས། ལོངས་སྐུ་སྟོན་པ་རྡོ་རྗེ་འཆང་ངམ་རྡོ་རྗེ་སེམས་དཔས་བསྐྱེད་རྫོགས་གཉིས་གསུངས། ཆོས་སྐུ་སྟོན་པ་ཀུན་ཏུ་བཟང་པོས་ཨ་ཏི་ཡོ་ག་གསུངས། སྟོན་པ་གསུམ་པོ་ཡང་སོ་སོར་མ་ཡིན་པ་ཆོས་སྐུའི་དུས་ན་ཀུན་བཟང་། ལོངས་སྐུའི་དུས་ན་རྡོ་རྗེ་འཆང་། སྤྲུལ་སྐུའི་དུས་ན་ཤཱཀྱ་ཐུབ་པ་རྒྱལ་བ་སྐུ་གསུམ་གྱི་བདག་ཉིད་ཅན་དེ་དག་གིས་བསྟན་པའི་ཆོས་ནི། ཕུང་པོ་བརྒྱད་ཁྲི་བཞི་སྟོང་ཡོད། ཐེག་པའི་འཇུག་སྒོ་ལ་བསྡུ་ན། འཇིག་རྟེན་པའི་ཐེག་པ་དང་། འཇིག་རྟེན་ལས་འདས་པའི་ཐེག་པ་གཉིས་སུ་འདུས། འཇིག་རྟེན་ལས་འདས་པའི་ཐེག་པ་དེའང་། རྣམ་གྲོལ་གྱི་ཐེག་པ་དགུར་འདུས། དེའང་ཉམས་སུ་ལེན་བྱ་མན་ངག་གི་ཚུལ་དུ་བསྡུ་ན་སྐྱེས་བུ་གསུམ་ལ་འདུས། སྐྱེས་བུ་ཆེན་པོ་དེ་ལའང་རིང་ལམ། མྱུར་ལམ་གཉིས་ཡོད། རིང་ལམ་བསྐལ་པ་གྲངས་མེད་མང་པོར་རྫོགས་སྨིན་སྦྱང་བ་རྒྱ་མཚོའི་ཕ་མཐར་ཕྱིན་ནས་སངས་རྒྱས་ཐོབ་པ་དང་། ཉེ་ལམ་སྔགས་ཕྱི་རྒྱུད་ལྟ་བུར་ཡིན་ན་མི་ཚེ་བཅུ་དྲུག་གམ་བདུན་ནམ། བསྐྱེད་རྫོགས་གཉིས་ཀྱིས་མི་ཚེ་གཅིག་མྱུར་ལམ་གྱི་ལོ་དང་ཟླ་བས་ཟུང་འཇུག་རྡོ་རྗེ་འཆང་གི་གོ་འཕང་ཐོབ་པར་བཞེད་དེ། ཨ་ནུ་མན་ཆད་ཐེག་པ་བརྒྱད་པོ་རྩོལ་བཅས་ཀྱི་ལམ་ཡིན་པ་དང་། སེམས་ལས་འདས་པའི་ཡེ་ཤེས་ལམ་དུ་བྱེད་པ་རྩོལ་མེད་རྫོགས་པ་ཆེན་པོ་ཨ་ཏི་ཡོ་གར་རྒྱུད་འབུམ་ཕྲག་དྲུག་ཅུ་རྩ་བཞི་ཡོད། ཚུར་བསྡུ་ན་སེམས་ཀློང་མན་ངག་གི་སྡེ་གསུམ་ལ་འདུས། མན་ངག་སྡེ་ལ་ཕྱི་སྐོར་ནང་སྐོར་གསང་སྐོར་ཡང་གསང་བླ་ན་མེད་པའི་སྐོར་དང་བཞི་ཡོད། ཡང་གསང་དེ་ལ་རྒྱུད་བཅུ་བདུན་སྔགས་སྲུང་ཁྲོས་མའི་རྒྱུད་དང་བཅོ་བརྒྱད་ཡོད། དེ་ཡི་དབང་དང་མན་ངག་གི་གནད་ཐམས་ཅད་བསྡུས་པ་བི་མའི་གསང་བ་སྙིང་ཐིག་དང་། པདྨ་མཁའ་འགྲོའི་སྙིང་ཐིག་ནི་མ་ལྟ་བུར་ཡིན་ཞིང་། ཀློང་ཆེན་པའི་བླ་མ་ཡང་ཏིག་དང་ཟབ་མོ་ཡང་ཏིག་བཅས་བུ་ཡིག་ཡིན། སྤྱིར་ཕྱག་རྫོགས་དབུ་གསུམ་ལ་གཞི་ལམ་འབྲས་གསུམ་རེ་ཡོད་ཀྱང་། འདིར་སྐབས་སུ་བབ་པ་བསྡུ་ན། ཀྱེ་རྡོ་རྗེ་ལས། སེམས་ཅན་རྣམས་ནི་སངས་རྒྱས་ཉིད། །ཅེས་གསུངས་པ་ལྟར། དང་པོ་གཞི་རྫོགས་པ་ཆེན་པོ་ནི། སེམས་ཅན་ཤེས་རྒྱུད་ཀྱིས་བསྡུས་པའི་འགྲོ་བ་རྐང་གཉིས་རྐང་བཞི་རྐང་མང་རྣམས་ཀྱི་ཤེས་རྒྱུད་འདི་ལ་གཞི་ཟེར། གཞི་དེའི་གནས་ལུགས་ནི། སེམས་ཅན་གྱི་རྒྱུད་ན་ཡེ་སངས་རྒྱས་པའི་རིགས་སམ། བདེ་གཤེགས་སྙིང་པོ་ཅན་དེ་ཡིན། མིང་གི་རྣམ་གྲངས་ནི། ངོ་བོ་ཡེ་དག་གི་སངས་རྒྱས། རང་བཞིན་རྣམ་དག་གི་སངས་རྒྱས། གཞི་ལྷུན་གྲུབ་ཀྱི་སངས་རྒྱས་སོགས་ཟེར་ལ་འབྲས་བུ་སངས་རྒྱས་ཀྱི་ཡོན་ཏན་རྫོགས་ཡོད་རུང་གོ་མི་ཆོད་ཟེར་བ། འོན་ཀྱང་གློ་བུར་དྲི་མས་སྒྲིབ། །ཅེས་གསུངས་པ་ལྟར། གློ་བུར་གྱི་དྲི་མ་རྒྱས་པ་ཞིག་ཕྱེ་ན་ཕུང་པོ་ལྔ། དེ་ཚུར་བསྡུ་ན་སྒོ་གསུམ། དེ་བསྡུ་ན་གཟུང་འཛིན་གཉིས། དེ་བསྡུ་ན་བློ་རྣམ་པར་རྟོག་པ་བྲེང་ངེ་འདིའི་བསྒྲིབས་པས། དཔེར་ན་ཉི་མ་སྤྲིན། ནོར་བུ་འདམ་ལྟ་བུའི་དྲི་མ་བཅས་པའི་སྐབས་སུ་གཞི་རྫོགས་པ་ཆེན་པོ་ཟེར། ལམ་རྫོགས་པ་ཆེན་པོ་ནི། ལམ་གྱི་འཇུག་སྒོ་སྨིན་བྱེད་ཀྱི་དབང་དང་། གྲོལ་བྱེད་ཀྱི་གདམས་པ་གཉིས་ལས། དང་པོ་ཆོས་སྡེ་འདིའི་དབང་ནི་ཚིག་དབང་དེ་ལ་དབྱེ་ན་སྤྲོས་བཅས་སོགས་བཞི་ཡོད། གྲོལ་བྱེད་གདམས་པ་ལ་སྔོན་འགྲོ་དངོས་གཞི་གཉིས། དངོས་གཞི་ཐུན་མིན་བསྐྱེད་རྫོགས་གཉིས་བཞག་པ་ལས། ཐུན་མོང་མ་ཡིན་པ་འོད་གསལ་རྫོགས་པ་ཆེན་པོའི་ཁྲིད་འཆད་པར་བྱ་སྟེ། ཆོས་དབྱིངས་མཛོད་ལས། རྒྱུ་དང་འབྲས་བུ་ཐེག་པ་ཅན་རྣམས་ཀྱི། །ང་དང་ང་ཡི་རང་བཞིན་མཐོང་འདོད་པ། །མཁའ་ལ་གོམ་བོར་ས་ལ་ལྷུང་བ་བཞིན། བྱིས་པའི་འདག་ཁང་འདྲ་སྟེ་འཇིག་པའི་ཆོས། །རྒྱུ་འབྲས་བྱིས་པ་དྲང་བའི་ལམ་ཉིད་དེ། །མས་འཛེག་སྐལ་དམན་ལམ་དུ་ཐག་བཅད་དེ། །རང་བཞིན་བཅུ་ཡི་རྩོལ་སྒྲུབ་འདས་པའོ། །ཞེས་དང་། ཀུན་བྱེད་ལས། ཆོས་གཅིག་བྱང་ཆུབ་སེམས་ཀྱི་ངོ་བོ་ལ། །ཏིང་འཛིན་གསུམ་དང་ལྕོག་བཞག་རྣམ་པ་ལྔ། །རང་བྱུང་དག་པ་རྡོ་རྗེ་ཕུང་པོ་ལ། །བསྙེན་སྒྲུབ་ཡན་ལག་བཞི་ཡི་ལྷ་བསྒོམས་ནས། །སྣང་ལ་རང་བཞིན་མེད་པ་བྱེད་པ་ནི། །བཙལ་ཞིང་བསྒྲུབས་ནས་རང་སེམས་ལྷར་བཅོས་པས། །དེས་སོགས་རང་སེམས་བྱར་མེད་མཐོང་བ་མེད། །ཅེས་གསུངས་པ་ལྟར། སྒོམ་པའི་སྐབས་མདོར་བསྡུ་ན་གྲོལ་འཁྲུལ་གྱི་ཀུན་གཞི་རྣམ་དབྱེ་ཕྱེད་ཅིང་། ལྟ་བ་ངོས་བཟུང་སྒོམ་པའི་སྐབས་མདོར་ན་ལུས་ངག་ཡིད་གསུམ་གཙོ་དེད་བྱ། ལུས་རྡོ་རྗེའི་འདུག་སྟངས། ངག་ཧཱུྃ་གི་རྩལ་སྦྱང་། གཉེན་རྩལ། རྗེས་འདེབས། ལམ་སློང་དང་། སེམས་བྱུང་གནས་འགྲོ་གསུམ་གྱིས་བརྡར་ཤ་བཅད་དེ། བར་དུ་སེམས་རིག་གི་དབྱེ་བ་ཕྱེད་ཅིང་སྐུ་གསུམ་ངོ་རང་ཐོག་ཏུ་སྤྲད། བཞག་ཐབས་རྣམ་པ་བཞི་དང་གསུམ་གྱི་ངང་ལ་བསྐྱངས། གྲོལ་ལུགས་གསུམ་མམ་བདུན་གྱི་གདེང་བཟུང་ཞིང་མཐར་རྣམ་ཤེས་ཡེ་ཤེས་ཀྱི་རྣམ་དབྱེ་ཕྱེད་ཅིང་དབྱིངས་རིག་དབྱེར་མེད་ཀྱི་ངང་དུ་འཁོར་འདས་ལ་བཟླ་བར་བྱ་སྟེ། དེའང་བསྡུ་ན། བླ་མ་ཚད་ལྡན་ནི། ངལ་གསོ་ལས། ཡེ་ཤེས་ཉི་མ་ལྟ་བུའི་འོད་ཟེར་རྒྱས་པ་ཡི། །མ་རིག་རིག་པར་བྱེད་པའི་སྐྱེས་བུ་མཆོག་དེ་ནི། །གསེར་འགྱུར་རྩི་ལྟར་ཆོས་རྣམས་བདེ་བར་བསྒྱུར་མཛད་པ། །ཐབས་ལ་མཁས་པ་འཁོར་ལོས་སྒྱུར་རྒྱལ་བསྟེན་པར་བྱ། །ཞེས་དང་། ཇི་སྐད་དུ། གྲངས་མེད་གསུམ་དུ་དཀའ་ཐུབ་ཀྱི། །གདུང་བས་དབང་པོ་ཚར་བཅད་ཀྱང་། །རྟོགས་པར་དཀའ་བའི་རྡོ་རྗེ་སེམས། །མ་ནོར་མངོན་སུམ་སྟོན་ལ་འདུད། །ཅེས་དང་། གདམས་ངག་ཚད་ལྡན་ནི། དཔལ་སྤྲུལ་གྱི་མཛོད་བདུན་བསྟོད་པ་ལས། མོས་གུས་ཐོབ་ནས་ཚིག་དོན་དཔྱོད་ཤེས་ན༑ །གཞུང་བཟང་འདི་དག་ཇི་ཙམ་མཇལ་བའི་ཡུན། །དེ་སྲིད་དེ་བློར་ཆོས་ཉིད་མངོན་སུམ་གྱི། །འོད་གསལ་མཆོག་ལས་གཡོས་པ་ཡོད་རེ་སྐན། །ཞེས་དང་། གཞུང་བཟང་འདི་དག་ཡན་ལག་ཡོངས་རྫོགས་པའི། །ལྷ་ལུས་མཛེས་པ་རྒྱན་གྱིས་སྤྲས་པ་འདྲ། །འདི་དང་བསྒྲུན་ན་མཁས་པའི་བསྟན་བཅོས་གཞན། །ཕྱོགས་རིས་ཡན་ལག་དུམ་བུར་མཐོང་དང་མཚུངས། །ཞེས་དང་། སློབ་མ་སྣོད་ལྡན་ནི། ཀོང་སྤྲུལ་ཞལ་གདམས་ལས། སྦྱང་བ་སྔོན་སོང་དབང་པོ་ཡང་རབ་དང་། །མོས་གུས་ཚད་དུ་ཕྱིན་པའི་སྐྱེས་བུ་མཆོག །དེ་དག་སུ་ལྡན་རིམ་རྩོལ་མ་བྱས་ཀྱང་། །ཆོས་ཉིད་བདེན་པ་གཟིགས་པ་འཐད་རུང་ཡིན། །ཞེས་དང་། སྡོམ་གསུམ་རྣམ་ངེས་ལས། རབ་མཆོག་སྦྱངས་པ་མཐར་སོན་སྐལ་ལྡན་ནི། །དབང་བསྐུར་ཐོབ་པས་སྡོམ་གསུམ་གཅིག་ཆར་སྐྱེས། །རྟོགས་གྲོལ་དུས་མཉམ་ཨིནྡྲ་བྷཱུ་ཏི་བཞིན། །ཞེས་དང་། མོས་གུས་ཚད་ལྡན་ནི། ཡོན་ཏན་མཛོད་ལས། མོས་གུས་ཆེ། སྤྲོ་བ་འགའ་ཞིག་སྐྱེས། སེམས་བཙན་ཐབས་སུ་གྲོལ། འདུས་པ་བརྒྱ་ཕྲག་ཐལ་བ་ལ་ཁྲིད་འཆད་རྒྱུ་བྱུང་གསུངས་ལྟར་དང་། འཇིགས་གླིང་གིས། སྒོམ་སྲན་ཅན་འཇིག་རྟེན་པའི་བསམ་གཏན་ལས་ན་མི་འཕར། མོས་གུས་ཅན་གནས་ལུགས་ཀྱི་གསང་ཐེབ་པ་ཤ་སྟག་འབྱུང་། ཞེས་གསུངས་པ་ལྟར། ཚད་ལྡན་བཞི་ཚོགས་ནས་བཟུང་། ལྟ་བ་ངོ་རང་ཐོག་ཏུ་སྤྲད་པ་ལ་ཀ་དག་རྗེན་པ་ཟང་ཐལ་ལམ། རང་བབ་ཀྱི་ཤེས་པ་ཕྱིར་མི་སྤྲོ་བར་ནང་དུ་ལྷོད་ཀྱི་གློད་དེ་བཞག་པས་མིང་འདོག་དཔྱོད་པ་དང་བྲལ་བར་འཆར་བ་དེ་གཉུག་མའི་ཡེ་ཤེས་རྫོགས་པ་ཆེན་པོ་ཡིན། སྒོམ་པ་ཐག་གཅིག་ཐོག་ཏུ་བཅད་པ་ནི། བཟོ་བཅོས་སྤང་བླང་། དགག་སྒྲུབ་གཉིས་འཛིན་རེ་དོགས། བྱ་སྤྱོད་གང་དང་ཅིར་ཡང་མི་བྱ་བར་དུས་རྣམ་ཀུན་ཏུ་གཅེར་མཐོང་རང་གྲོལ་དུ་ཤེས་པའི་ངང་དེ་ཉིད་མ་ཤོར་བར་སོ་མར་སྐྱོང་བ་ནི་སྒོམ་པ། སྤྱོད་པ་གྲོལ་ཐོག་ཏུ་གདེང་བཟུང་བ་ལ། དེ་ལྟར་འཆར་གཞི་རིག་པ་རྒྱུན་ཆད་མེད་པར་བསྐྱངས་བས་རྩལ་གྱི་རྣམ་རྟོག་དང་ཉོན་མོངས་སོགས་རང་ཤར་རང་གྲོལ་རང་གནས་ལས་འདའ་ས་མེད་པས་སྤྱོད་པའོ། །འབྲས་བུ་དབྱིངས་རིག་དབྱེར་མེད་བཙན་ས་བཟུང་བ་ནི། དེ་ལྟར་དབྱེར་མེད་ཆུ་ལ་ཆུ་བཞག་པའམ་རྫ་སྣོད་ཀྱི་ནམ་མཁར་འདྲེས་པ་ལྟར་ངོ་བོ་སྟོང་པ་ཆོས་སྐུ། རང་བཞིན་གསལ་བ་ལོངས་སྐུ། ཐུགས་རྗེ་ཀུན་ཁྱབ་སྤྲུལ་པའི་སྐུ། སྐུ་གསུམ་རང་གནས་ཀྱི་ཡེ་ཤེས་མངོན་དུ་གྱུར་ནས་གང་ཟག་མིའི་ལུས་ལ་དགོངས་པ་སངས་རྒྱས་རྟོགས་པ་ནི་འབྲས་བུའོ། །ཡང་ན་ད་ལྟར་གྱི་རིག་པ་དྲན་བསམ་བཅོས་དང་བྲལ་བ་འདི་ཀ་ཆོས་སྐུ་ཀ་དག་གི་དགོངས་པ་རང་བྱུང་གི་ཡེ་ཤེས་ངོ་རང་ཐོག་ཏུ་སྤྲོད། སྔ་ཕྱི་དྲན་རྟོག་མེད་པ་ད་ལྟར་གྱི་རིག་པ་སོ་མ་བཞི་ཆ་སུམ་བྲལ་གྱི་ངང་བསྐྱངས་ཏེ། ཐག་གཅིག་ཏུ་བཅད། རང་ཤར་རང་གྲོལ་རྦ་རླབས་ཆུར་ཐིམ་པ་ལྟར་དྲན་རྟོག་རྗེས་མེད་བྱུང་ཚོར་གཞིར་ཐིམ་གདེང་གྲོལ་ཐོག་ཏུ་བཅའ་དགོས་པ་ཡིན་ནོ། །ལུང་ལས། བག་ཆགས་སྦུབ་ཀྱི་རིག་པ་དང་། །མཁའ་ལ་གནས་པའི་རིག་པ་གཉིས། །ཡེ་ཤེས་སྒོ་ཡིས་མཚམས་སྦྱར་ནས། །བག་ཆགས་སྦུབ་ཀྱི་མ་བསྒྲིབས་པར། །གཉིས་མེད་ཟང་ཐལ་ཆེན་པོར་གནས། །རྟོགས་པའི་དོན་ཆེན་དེ་ལྡན་ན། །སེངྒེ་མཆོང་བའི་ས་ཆོད་ལྟར། །རང་རིག་ཡེ་ཤེས་ཆེན་པོ་ཡིས། །བར་དོ་མེད་ཅིང་སྐད་ཅིག་ལ། །རིན་ཆེན་སྦུབ་ཀྱི་ནང་དུ་ཆུད། །ཅེས་དང་། མི་ཕམ་རྣམ་རྒྱལ་རྒྱ་མཚོའི་ཞལ་གདམས་ལས། གློག་འདྲ་ཚེ་འདིའི་སོ་ཚིས་ལྟ་ཅི་སྨོས། །སྲིད་བདེའི་རྒྱུར་བྱེད་སྨོན་པ་ཀུན་བཏང་ལ། །འཁྲུལ་སེམས་བདག་ཏུ་འཛིན་པའི་གསོས་འདེབས་པའི། །ཀློག་དང་བཟླས་སྒོམ་མཆོད་སོགས་ཀུན་ཀྱང་ཞོགས། །མ་འཁྲུལ་ཡིན་ལུགས་ལྟོས་དང་བདག་མེད་དོ། །ཞེས་དང་། གང་ཞིག་བུ་རུ་བཟུང་ན་དེར་ཤེས་འགྱོད། །གང་ཞིག་དགྲ་རུ་བཟུང་ན་དེར་ཤེས་དཀའ། །ངོ་བོའི་གཏིང་ན་བདེ་སྡུག་ཡེ་གྲུབ་མེད། །ལུས་ལ་ཆགས་པ་རྣམས་ཀྱིས་ལུས་སྲུང་ཞིང་། །དེ་ལ་མ་ཆགས་པ་རྣམས་ལུས་ཀྱང་གཏོང་། །བདག་གཞན་བཟོད་བསྲན་ཆུང་རྣམས་ཚེར་མས་འཇིགས། །ཞེན་མེད་རྣམས་ནི་མནར་མེད་མེས་མི་འཇིགས། །ཞེས་པ་ལྟར་དང་། ལྷུན་གྲུབ་ཐོད་རྒལ་ནི། དེ་ལས་ཁྱད་པར་བདུན་སོགས་ཀྱིས་འཕགས་ཤིང་། དག་པ་ཡེ་ཤེས་ཀྱི་སྣང་བ་འདི་མིག་གིས་མཐོང་བ་ཙམ་གྱིས། འགྲོ་དྲུག་གི་སྐྱེ་སྒོ་ཆོད་དེ། འོད་ལྔ་རྩིབ་ཤར། གྱེན་འགྲེང་སོགས་འཆར་དུས་སྐྱེ་བ་འཕོས་ཀྱང་བར་དོར་སངས་རྒྱས། རྩོལ་མེད་ཐིག་ལེ་སྟོང་སྒྲོན་མཐོང་བ་ཙམ་གྱིས་སྐྱེ་བ་གཉིས་ནས་ཆོས་འདི་དང་འཕྲད་དེ་སངས་རྒྱས། ཁྱད་པར་དབྱིངས་རིག་སྨིན་མཚམས་བྲལ་དུས་འཁོར་འདས་རྒྱབ་གྱེས་ཏེ་མངལ་གྱི་གྲོང་ཁྱེར་མི་འཇུག་ཅིང་། རང་བཞིན་སྤྲུལ་སྐུའི་ཞིང་ཁམས་སུ་རྫུས་ཏེ་སངས་རྒྱས་པ་ལ་ཐེ་ཚོམ་མེད་དོ། །དེ་ནས་ཡེ་ཤེས་ཀྱི་གནས་དང་འཆར་བའི་ལམ་དང་། སྒོ་ལ་སོགས་པ་དང་། ལུས་འདུག་སྟངས་གསུམ། མིག་གི་གཟིགས་སྟངས་གསུམ། ཡུལ་གྱི་རྟེན་གསུམ་དང་། རླུང་རིག་དལ་བར་བསླབས་པས་སྒྲོན་མ་བཞི་འཆར་ཚུལ་དང་སྣང་བ་བཞིའི་འོད་སྐུར་ཚེ་འདི་དང་བར་དོར་སོགས་གྲོལ་ཚུལ་གྱི་རིམ་པ་རྣམས་ཏེ། ཡི་གེ་མེད་པ་ལས། དག་པའི་རང་བཞིན་ཀུན་ལ་ཁྱབ། །ཆོས་སྐུ་གདམས་ངག་ཉིད་ལ་ཐུག །ཅེས་དང་། ཐལ་འགྱུར་ལས། མངོན་སུམ་རྙེད་པའི་སྐལ་ལྡན་ལ། །ཁམས་གསུམ་འཁོར་བའི་མིང་མེད་པའི། །སྲིད་གསུམ་བརྡར་ཤ་ཆོད་པའོ། །ཞེས་སོགས་གསུངས་པ་ལྟར། ཀ་དག་ཁྲེགས་ཆོད་ཀྱིས་སེམས་ཡོངས་སུ་རིག་པར་སྨིན་པ་དང་། ལྷུན་གྲུབ་ཐོད་རྒལ་གྱིས་རིག་པ་དག་པའི་སྐུར་ཡོངས་སུ་སྨིན་ནས་སྐུ་དང་ཞིང་ཁམས་ཚད་དང་མུ་མེད་པའི་དཀྱིལ་འཁོར་འདུས་མ་བྱས་པའི་རང་བཞིན་དབྱིངས་དང་ཡེ་ཤེས་འདུ་འབྲལ་མེད་པར་འུབས་སུ་ཆུབ་ནས་མཐར་ཐུག་གི་འབྲས་བུ་གདོད་མའི་ཆོས་སྐུ་འགྱུར་བ་མེད་པ་ཐིག་ལེ་ཉག་གཅིག་གི་བདག་ཉིད་ཐོབ་པར་བྱེད་པའོ། །དེ་ནས་འོད་གསལ་ཕྱག་རྒྱ་ཆེན་པོའི་བླ་བརྒྱུད་དང་། གདམས་པའི་གོ་རིམ་དང་ཉམས་སུ་བླང་ཚུལ་སོགས་ནི། འོག་མིན་གནས་ན་བཞུགས་པའི་རྒྱལ་བ་རྡོ་རྗེ་འཆང་། རྒྱ་གར་གྱི་གྲུབ་ཆེན་ཏཻ་ལོ། ནཱ་རོ། བོད་ཀྱི་ལོ་ཙཱ་བ་མར་པ། མི་ལ། དྭགས་པོ། ཕག་གྲུ། གླིང་རས། རྒྱ་རས། དབོན་རས་སོགས་ནས་བློ་གྲོས་སེངྒེ། མཁྱེན་བརྩེ་རྟོགས་ལྡན། འཇམ་དབྱངས་ཡེ་ཤེས་རིན་ཆེན། བློ་གྲོས་མཆོག་ལྡན། ཤེས་རབ་བཟང་པོ། འཁྲུལ་ཞིག་ནམ་མཁའི་རྣལ་འབྱོར། རྒྱལ་དབང་ཆོས་རྗེ། ངག་དབང་ཆོས་རྒྱལ། འཇམ་དབྱངས་ཆོས་གྲགས། ཀུན་སྤང་ཤེས་རབ་རྒྱ་མཚོ། ཀུན་མཁྱེན་པདྨ་དཀར་པོ། ངག་དབང་བཟང་པོ། བསྟན་པའི་ཉི་མ། གྲུ་དབང་ཤཱཀྱ་ཤྲཱི་སོགས་ནས་བརྒྱུད་པའི་འོད་གསལ་ཕྱག་རྒྱ་ཆེན་པོ་དེ་ལའང་། རྣལ་འབྱོར་ཆེན་པོའི་རྒྱུད་ལས། རྟོག་པ་མེད་ཅིང་འཁྲུགས་མེད་པ། །ཡིད་འོང་རྡོ་རྗེའི་གསུང་གཅིག་པུ། །གདུལ་བྱའི་བསམ་པའི་དབང་གིས་ནི། །བྱེ་བྲག་མང་པོར་འགྱུར་བ་ཡིན། །ཞེས་པ་ལྟར། ཐེག་པའི་རྣམ་གྲངས་ཀྱང་། ཉན་ཐོས། རང་རྒྱལ། ཐེག་པ་ཆེན་པོ་དང་གསུམ་ལས། ཐེག་ཆེན་དེ་ལ་ཡང་། རྣམ་ཀུན་མཆོག་ལྡན་གྱི་སྟོང་པ་ཉིད་གཙོ་བོར་སྟོན་པ། ཕར་ཕྱིན་རྒྱུའི་ཐེག་པ་དང་། མཆོག་ཏུ་མི་འགྱུར་བའི་བདེ་བ་ཆེན་པོ་གཙོ་བོར་སྟོན་པ་འབྲས་བུ་སྔགས་ཀྱི་ཐེག་པ་གཉིས་སུ་ཡོད་པ་ལས། ཕྱི་མ་སྔགས་ཀྱི་ཐེག་པ་འདི་ལའང་། ནང་གསེས་བྱ་བའི་རྒྱུད། སྤྱོད་པའི་རྒྱུད། རྣལ་འབྱོར་རྒྱུད། རྣལ་འབྱོར་བླ་ན་མེད་པའི་རྒྱུ་སྡེ་བཞིར་དབྱེ་ཡང་། དེ་དག་ཐམས་ཅད་ཀྱི་མཐར་ཐུག་གི་འབབ་ས་ནི། སྙིང་པོ་བླ་ན་མེད་པ་ཕྱག་རྒྱ་ཆེན་པོའི་གདམས་པ་འདི་ཉིད་ཡིན་ནོ། །འདི་ཡི་མཚན་དོན་ཡང་དྭགས་པོ་རིན་པོ་ཆེས། སྣང་སྲིད་འཁོར་འདས་རྣམས་ཆོས་ཉིད་སྐྱེ་བ་མེད་པའི་ངང་ལས་མི་འདའ་བར་རྟོགས་པ་ནི་ཕྱག་གོ། །ཅིར་སྣང་ཅི་སྲིད་ཐམས་ཅད་གཉུག་མའི་དོན་ལས་མི་འདའ་བས་རྒྱའོ། །ཆོས་ཉིད་རང་གྲོལ་དུ་རྟོགས་པས་ན་ཆེན་པོའོ། །དེ་ལྟར་ཕྱག་ཆེན་རང་ལ་ཡང་ནང་གསེས། བཤད་པ་ཚིག་གི་སྐོར། གདམས་ངག་ཉམས་ལེན་གྱི་སྐོར། རྟོགས་པ་བྱིན་རླབས་ཀྱི་སྐོར་དང་གསུམ་ཡོད་པའི། དང་པོ་བཤད་པ་ཚིག་གི་སྐོར་ལ། གསང་བ་གྲུབ་པ་དང་། ཐབས་ཤེས་གྲུབ་པ་སོགས་གྲུབ་པ་སྡེ་བདུན། དོ་ཧ་དང་བདག་བྱིན་རླབས་པ་སོགས་སྙིང་པོ་སྐོར་དྲུག །དོ་ཧ་དེ་དང་། བདག་མེད་གསལ་བ་སོགས་ཡིད་ལ་མི་བྱེད་པའི་ཆོས་སྐོར་ཉེར་གཅིག་རྗེས་འབྲང་དང་བཅས་པའོ། །གདམས་ངག་ཉམས་ལེན་གྱི་སྐོར་ལ། གཅིག་ཅར་བའི་ལམ་གཙོ་བོར་སྟོན་པ་ཐོག་བབས། ཐོད་རྒལ་བའི་ལམ་གཙོ་བོར་སྟོན་པ་བསམ་གཏན་ཐུན་འཇོག །རིམ་གྱིས་པའི་ལམ་གཙོ་བོར་སྟོན་པ་རྟོགས་བརྗོད་གསེར་ཕྲེང་སོགས་ལས་ཕྱི་མ་རྟོགས་པ་བྱིན་རླབས་ཀྱི་སྐོར་ཏེ་འདི་ལ་ལྷན་ཅིག་སྐྱེས་སྦྱོར་དང་། དངོས་གཞི་དེ་ལ་ཐོག་མཐའི་ཉམས་ལེན་བསྣན་པ་ལྔ་ལྡན། ངོ་སྤྲོད་ཐོག་མར་བྱས་ནས་རྒྱུན་སྐྱོང་བ་ཕྱག་རྒྱ་ཆེན་པོ་ཡི་གེ་བཞི་པ་སོགས་ཡོད་པ་ལས། ཀུན་གྱི་ཕྱི་མོར་གྱུར་པ་ལྷན་ཅིག་སྐྱེས་སྦྱོར་དུ་གྲགས་པ་འདི་ཉིད་འཆད་པའི་སྐབས་སུ་བབས་པ་ལ། ལྷན་ཅིག་སྐྱེས་སྦྱོར་ཞེས་པའི་མཚན་དོན་ཡང་བརྟན་གཡོ་གཉིས་བསྡུས་ཀྱི་ཆོས་ཐམས་ཅད་དང་། རང་རང་གི་ཆོས་ཉིད་དེ་བཞིན་ཉིད་དག་སྔ་ཕྱི་མེད་པར་གདོད་མ་ནས་དུས་མཚུངས་པར་གནས་པས་ན། ལྷན་ཅིག་སྐྱེས་པ་ཞེས་བྱ་སྟེ། ལྷན་སྐྱེས་དེ་ལ་ཡང་། རང་བཞིན་ལྷན་སྐྱེས། ཞུ་བདེ་ལྷན་སྐྱེས། བདེ་སྟོང་ལྷན་སྐྱེས་ཞེས་བཞེད་པ་ལྟར་ན་ཡང་། འདིར་ནི་རེ་ཞིག་དང་པོ་ལྟར་ཡིན་ལ། ཕྱིས་ནས་ནི་སྔ་ཕྱི་དེ་དག་ཀྱང་རྣམ་དབྱེར་མེད་པར་འགྱུར་བ་ཡིན་ནོ། །ཚུལ་འདི་ནི་གོང་དུ་བཤད་པ་ལྟར་མདོ་རྒྱུད་མཐའ་དག་གི་ངོས་ནས་ཡིན་པའི་ཕྱིར། དེ་དག་ཀུན་ཀྱང་འདི་ཉིད་སྟོན་པའི་གཞུང་དུ་འགྱུར། དེ་ཡི་གཙོ་བོ་དེ་ཉིད་ཀྱི་རྩ་གཞུང་ནི། རྗེ་བཙུན་ནཱ་རོ་པའི་ཁྱད་ཆོས་བསྲེ་འཕོའི་གཞུང་གི་སེམས་དངོས་པོའི་གནས་ལུགས་བསྟན་ལ་དབབ་པའི་སྐབས་སུ། སེམས་ཀྱི་གནས་ལུགས་བསྟན་པ་ནི། །ཞེས་སོགས་གཞི་ལམ་འབྲས་བུ་སྟོན་པའི་གཞུང་དེ་དག་ལས་འཕྲོས་ནས། གྲུབ་ཆེན་ཏིལླིས། རྗེ་བཙུན་ནཱ་རོ་པ་ལ་ངོ་སྤྲོད་དུ་གསུངས་པའི་ཚིགས་བཅད་དང་། ནཱ་རོ་པའི་གཉུག་མ་ཆིག་ཆོད་དུ་ཁྲིད་གཅིག་ཅར་བའི་ལམ། རྗེ་སྒམ་པོ་པའི་ཚིགས་རྐང་གསུམ་མ་འདི་སོགས་ཐོད་རྒལ་བའི་ལམ། དཔལ་ལྡན་ཕག་གྲུའི་ཕྱག་ཆེན་ཚིགས་བཅད་མ་དང་། འགྲོ་མགོན་རྒྱ་རས་ཀྱིས་མཛད་པའི་ཚིགས་བཅད་མ་གཉིས་རིམ་གྱིས་པའི་ལམ། དེ་ལྟར་དོན་ཚན་གསུམ་པོ་ལ་ལྷན་ཅིག་སྐྱེས་སྦྱོར་སྔ་ཕྱི་བར་གསུམ་གྱི་ཐ་སྙད་མཛད་མོད། དོན་སྒོམ་རིམ་བསྡུས་འབྲིང་རྒྱས་པར་ཕྱེ་བ་གསུམ་ཡིན་ལ། དེ་ལས་འཕྲོས་པ་ཕག་གྲུའི་ཞུས་ལན་དང་། ཆོ་རྗེ་རས་པ་དཔོན་སློབ་རྗེས་འབྲང་དང་བཅས་པས་མཛད་པའི་རྣལ་འབྱོར་བཞིའི་ཞལ་གདམས་གསུང་སྒྲོས་རྣམས་ལ་ཉམས་མྱོང་གི་སྤུ་རིས་འབྱེད་པའི་སྐོར། སྒམ་པོ་པ་ཁུ་དབོན་ནས་བདག་གི་འདྲེན་པའི་བར་དུ་བྱུང་བ་ངོ་སྤྲོད་ཀྱི་ཡིག་རིས་ཀུན་ཀྱང་ལམ་ཁྱེར་གྱི་སྐོར་ཞེས་གྲགས་པ་ཡིན་ལ། དེ་ལས་འདིར་ལམ་རིམ་རྒྱས་པ་ལྷན་ཅིག་སྐྱེས་སྦྱོར་གྱི་མན་ངག་སྟོན་པར་བྱེད་པ་སོགས་ཆོས་ཀྱི་གོ་རིམ་ཅུང་ཟད་ཤེས་པར་བྱས་ནས། ཞི་གནས་བསྒྲུབ་བྱ་མ་དག་པ་རྡེའུ། དག་པ་དེ་བཞིན་གཤེགས་པའི་སྐུ་གསུང་ཐུགས་རྟེན་དང་། རླུང་ཅན་གྱི་རིམ་པ་བཅས་ཉིན་བདུན་རེ་སྒོམས། དེའང་གང་ཟག་གི་བློས་གྲིམ་ལྷོད་དང་བརྩོན་འགྲུས་ཆེ་ཆུང་ལ་བསྟུན། རྟེན་མེད་ལ་གནས་འགྱུ་ཡེངས་རིགས་བཞི་དང་ལྡན་པའི་ཞི་གནས་བརྟན་ཆ་ཐོབ་ཙམ་ནས་ཐོལ་སྐྱེས་རྦད་ཆོད་ཀྱིས་ཉིན་བདུན་གཉིས་གསུམ་ལ་སྒྲིམ། གང་ཤར་བཟོ་མེད་དུ་ལོ་གཉིས་གསུམ་དུ་གློད། དེ་ནས་བདེ་གསལ་མི་རྟོག་པའི་ཉམས་ཤར་ཚེ་བཞག་ཐབས་བཞིས་རྒྱུན་སྐྱོངས། ཉམས་རྩལ་རྫོགས་ཕྱིར་ལོ་གཅིག་གཉིས་བསྒོམ། དེ་ནས་གནས་འགྱུའི་རྩད་གཅོད་ལྷག་མཐོང་ངོས་བཟུང་སྤྲོས་བྲལ་གཏན་ལ་འབེབས་ཤིང་ལོ་ཁ་ཤས་བཞག །སྣང་བ་སོགས་རོ་གཅིག་རྟོགས་པ་དང་། རོ་གཅིག་དུ་མར་འཆར་ཕྱིར་རོ་སྙོམས་སྐོར་དྲུག་གིས་སྤྱོད་པའི་བོགས་དབྱུང་ཞིང་ལོ་ལྔ་བདུན་གང་རུང་བཞག །འཁོར་འདས་དབྱེར་མེད་རྟོགས་ཕྱིར་སྒོམ་མེད་ཆེན་པོས་མི་ཚེའི་ཉི་མ་ཟད་དུ་འཇུག་པར་བྱ་དགོས་ཤིང་། དེའང་གོ་མྱོང་རྟོགས་གསུམ་གྱི་རྣམ་དབྱེ་ཕྱེད། རིག་ཁམས་སྒྲིབ་བྱེད་བྱིང་རྒོད་རྨུགས་འཐིབས་བཞི་ངོས་བཟུང་། ཞི་གནས་རྐྱང་པར་གོལ་ས་དང་། ཉམས་བདེ་གསལ་མི་རྟོག་པ་གསུམ་གྱི་གོལ་ས་དང་། དགྲ་ལང་གི་གེགས་བཞི། སྟོང་ཉིད་ཀྱི་འཕྲལ་ཤོར་བཞི། རྣལ་འབྱོར་བཞིའི་གོལ་ས་བཞི་སོགས་ཀྱི་དབང་དུ་མ་སོང་བར། རྣལ་འབྱོར་བཞིའི་བར་ལག་འགྱེལ་ལུགས་དང་། སྐྱེ་འགག་གནས་གསུམ་དང་བྲལ་བ། རྣམ་པར་ཐར་པའི་སྒོ་གསུམ་དང་ལྡན་པ། སྤྲོས་པའི་མཐའ་བརྒྱད་ལས་འདས་པ། སྟོང་ཉིད་བཅོ་བརྒྱད་དང་ལྡན་པའི་རང་བཞིན་ལ་དཔེ་ཆའི་གོ་བ་དང་འོལ་ཚོད་ཙམ་མ་ཡིན་པར་ཉམས་མྱོང་གི་རྡོ་རུས་ཐུག་པར་བྱ་བ་གལ་ཤིན་ཏུ་ཆེ་ཞིང་། དེ་བཞིན་དུ་བླ་མ་ཉམས་མྱོང་ལྡན་ངེས་ཀྱིས་མ་ཟིན་ན་སྤྲོས་བྲལ་རྟོགས་དུས་ནས་བལྟ་རྒྱུ་ཅི་ཡང་མེད་པར་རེད་སོང་སྙམ་ནས་སྒོམ་སྣ་སུན་ཁུར་བ་དང་། མིན་ཀྱང་ཉམས་རྟོགས་རེས་འགའ་སྐྱེས་དུས་ནས་མཐོན་པོར་བརླམས་ནས་དྲན་པས་འཚོ་སྐྱོང་མི་བྱེད་པར་ལྟ་སྒོམ་སྤྱོད་པ་ཐ་མལ་དུ་འཁྱོར་ཉན་སོགས་ཡོད་པ་དང་། བླ་མས་ཀྱང་ཉམས་མྱོང་སྐྱེས་ཙམ་ནས་རྟོགས་པ་ལ་ན་སྤར་སྔ་སོང་ན་སྔ་མའི་ཉམས་བོར་ནས་ཕྱི་མའི་རྟོགས་པ་སྐྱེ་ཆུང་བ་ཡིན། དཔེར་ན་ཚད་རིམས་དྲག་པོ་མ་སྨིན་པའི་ཐོག་ཏུ་སྨན་ཆེན་གཏོང་སྔ་ན་ཚ་བ་འཐོར་ནས་རྒྱུན་ནད་དུ་སོང་སྟེ་གདུང་བ་ལྟ་བུ་དང་། ན་སྤར་ཕྱི་ནའང་སྔ་མའི་ཉམས་ལ་གོམས་འདྲིས་འཇགས་ནས་ན་སྤར་མི་ཐུབ་པའི་སྐྱོན་ཡོད་པ་ནི། དཔེར་ན་ནད་སྐྲན་བཅའ་ཚར་བའི་རྗེས་སུ་སྨན་ཕྱེ་བཏང་བ་ལྟ་བུ་ལས་དོན་མི་ཡོང་བ་སོགས་གནད་འགག་ཤིན་ཏུ་མང་བས་གོང་དུ་བཤད་མ་ཐག་པའི་ཚུལ་ལྟར། ལས་དང་པོ་པའི་སྐབས་སུ་གཉེན་པོ་གྲིམ་ཆ་གཙོ་བོར་བྱས་ནས་སེམས་ཞི་གནས་ཀྱི་བརྟན་ཆ་རབ་ཏུ་གྱུར་པས་ཤིན་སྦྱངས་ཐོབ་པ་ཞིག་དགོས་པ་ཡིན་མ་གཏོགས། སེམས་ཀྱི་རྙོག་མ་མ་དྭངས་ན་ནམ་ཡང་གོམས་སྟོབས་ཀྱི་དཔྱིས་ཟིན་པར་དཀའ་བ་དང་། བར་དུ་གྲིབ་ལྷོད་སྙོམས་དགོས་ཏེ་སེམས་ཀྱི་དྭངས་སྙིགས་མ་འབྱེད་ན་རྣམ་པར་མི་རྟོག་པའི་བསམ་གཏན་ནམ་ལྷག་མཐོང་གི་རང་ངོ་ནམ་ཡང་མི་འཕྲོད་པ་དང་། མཐར་ལྷོད་ཆ་གཙོ་བོར་གཏོང་དགོས་ཏེ་རང་བྱུང་གི་རིག་པའམ་གཞིར་གནས་ཀྱི་ཡེ་ཤེས་འཕོ་མེད་འགྱུར་མེད་ཀྱི་གདེང་ཡོངས་སུ་བརྙེས་ནས་གྲུབ་པ་ཐོབ་དགོས་པའི་ཕྱིར་རོ། །དེའང་ཐུན་དང་པོ་ལ་གོང་བཞིན་བླ་མའི་རྣལ་འབྱོར་བསྒོམས་ནས། གཉིས་པར་བསྙེན་སྒྲུབ་བམ་མཉམ་བཞག་བྱ། གྲོལ་དུས་ཕྱག་བརྒྱ་རེ་འཚལ་བས་ལུས་ཀྱི་ནད་ཞི། རླུང་ཁུག་པ་སངས། ཁམས་ཤིན་ཏུ་དྭངས། ལུས་ཡང་ཞིང་རྒས་པའི་སྡུག་བསྔལ་མི་འབྱུང་ཞིང་མཐར་ཐུག་དགེ་བའི་འབྲས་བུ་སོགས་ཚད་མེད་པ་དང་། གཉེན་པོ་སྟོབས་བཞི་ལྡན་པས་ཡིག་བརྒྱ་ཚར་ཉེར་གཅིག་རེ་བཟླས་པས། སྡིག་སྒྲིབ་ཆེ་བ་རྣམས་མགོ་མནན། འབྲིང་པོ་རྣམས་ཁ་བྲི། ཆུང་ངུ་རྣམས་རྩ་བ་ནས་འབྱིན་པར་བྱེད་པའི་དགོས་ཆེད་ཁྱད་པར་ཅན་ཡོད་པ་དང་། མ་ཟད་ཚིག་རྗེས་དོན་དྲན་སྙིང་རྗེའི་མཚམས་སྦྱོར་ཡོང་ངེས་ཀྱིས་བར་དོའི་སེམས་ཅན་རྣམས་ལ་གཏོར་མ་དང་གསུར་བསྔོ་ཞིང་བསྔོ་སྨོན་གྱི་མཚམས་སྦྱོར་བྱ་བ་དང་། བསྟན་འགྲོ་ཕན་བདེའི་རྒྱུ་འགྱུར་བའི་ཕྱིར། སྤྱོད་འཇུག་ལས། འགྲོ་བའི་སྡུག་བསྔལ་སྨན་གཅིག་པུ། །བདེ་བ་ཐམས་ཅད་འབྱུང་བའི་གནས། །བསྟན་པ་རྙེད་དང་བཀུར་སྟི་དང་། །བཅས་ཏེ་ཡུན་རིང་གནས་གྱུར་ཅིག །ཅེས་དང་། ཨོ་རྒྱན་ཆེན་པོས། ལྷའམ་བླ་མ་ལ་སོགས་པ། །དཀོན་མཆོག་གསུམ་གྱི་རྟེན་དྲུང་དུ། །བསམ་འདུན་དག་པའི་ཚོགས་བསག་ཅིང་། །སྨོན་ལམ་རྒྱ་ཆེན་གདབ་པར་བྱ། །དེ་ཡི་བསོད་ནམས་ཚད་མེད་དོ། །ཞེས་དང་། འགྲོ་བའི་དོན་དུ་སྨོན་ལམ་སུས་བཏབ་པ། །དེ་ནི་སངས་རྒྱས་ལམ་ལ་མྱུར་བ་ཡིན། །ཞེས་གསུངས་པ་ལྟར། སངས་རྒྱས་ཀྱི་བསྟན་པ་དར། བླ་མའི་སྐུ་ཚེ་བརྟན། དགེ་འདུན་ཐུགས་མཐུན་ཁྲིམས་གཙང་། ཐོས་བསམ་སྒོམ་གསུམ་འཆད་རྩོད་རྩོམ་གསུམ། མཁས་བཙུན་བཟང་གསུམ་སོགས་ཀྱི་ཡོན་ཏན་གོང་ནས་གོང་འཕེལ་དུ་ཕྱུག་ཅིང་། བསྟན་པའི་སྦྱིན་བདག་རྣམས་ཀྱི་གཙོས་གྱུར་ལ་ནད་ཡམས་འཁྲུགས་རྩོད་སོགས་དུས་ཀྱི་རྒུད་པ་ཞི་བ་དང་། ཚེ་བསོད་ནམས་བདེ་སྐྱིད་བདེ་བའི་དངོས་པོ་ཀུན་དབྱར་མཚོ་བཞིན་དུ་བརྡོལ་བའི་ཕྱིར་དུས་རྒུད་ཞི་བ་དང་། སངས་རྒྱས་བསྟན་པ་རྒྱས་པའི་སྨོན་ལམ་ཁྱད་པར་ཅན་རྣམས་ཆེད་དུ་འདོན་པར་བྱ་ཞིང་། ཇ་བསྐོལ་བའི་ཚེ་རང་ཡི་དམ་བསྒོམ། ཐབ་ཁ་གཞལ་ཡས་ཁང་། མེ་ལྷ་ཡེ་ཤེས་པ་རྡོ་རྗེ་སེམས་དཔའི་ངོ་བོར་བཞུགས་པར། བུད་ཤིང་སྲེག་རྫས་གང་འཛོམས་ལ་བདག་དང་སེམས་ཅན་ཐམས་ཅད་ཀྱི་སྡིག་སྒྲིབ་ཐིམ། དེ་དག་ཕུལ་བས་སྦྱོང་བར་མོས་ལ། ཨོཾ་བཛྲ་སཏྭ་ཧཱུྃ། ཨོཾ་སརྦ་པ་པཾ་ཤཱནྟིཾ་ཀུ་རུ་ཡེ་སྭཱ་ཧཱ། ཞེ་བརྗོད་དོ། །ཆུ་ནི་མཱ་མ་ཀི་ཡི་ངོ་བོ་ཡིན་པ་ལ་ཡིན་པའི་ངེས་ཤེས་བསྐྱེད་ལ། རྣམ་པ་བཾ་ལས་ཆུ་ཡི་ལྷ་མོ་རྡོ་རྗེ་ཌཱཀྐིའི་སྐུར་གསལ། བཛྲ་ཌཱཀྐི་ཤཱནྟིཾ་ཀུ་རུ་ཡེ་སྭཱ་ཧཱ། ཞེས་བཟླ་ཞིང་། ནད་གདོན་སྡིག་སྒྲིབ་ཞི་བའི་གསོལ་བ་བཏབ་མཐར་འོད་དུ་ཞུ་ནས་བདུད་རྩིའི་རང་བཞིན་བསམ་ལ་ཆུ་ལེན་པ་དང་། ཁྲུས་བྱ་བ་སོགས་བྱའོ། །གཞན་བཟའ་བཏུང་བྱིན་རླབས་བྱ་ཚུལ་ནི། ཡི་དམ་སྐུར་གསལ་བའི་མགྲིན་པར་བླ་མ། སྙིང་ཁར་ཡི་དམ། ལྟེ་བར་ཆོས་སྐྱོང་། རྩ་ཁམས་དཔའ་བོ་དཔའ་མོ་གསལ་ལ། འཛམ་བུའི་གླིང་གི་འོག་ཏུ་ཡཾ་ལས་རླུང་། རཾ་ལས་མེ། ཀཾ་ལས་མི་མགོའི་སྒྱེད་པུ་གསུམ་པའི་སྟེང་དུ། ཨཱཿལས་ཐོད་པའི་ནང་དུ་ཤ་ལྔ་བདུད་རྩི་ལྔ་ས་བོན་ཕྱག་མཚན་བཅས་པར། རླུང་གཡོས་མེ་སྦར་རྫས་རྣམས་ཞུ་ཞིང་ཁོལ་བའི་སྟེང་གི་ནམ་མཁར་ཨོཾ་ཨཱཿཧཱུྃ་གི་འོད་ཟེར་གྱིས་སངས་རྒྱས་རྣམས་ཀྱི་སྐུ་གསུང་ཐུགས་དང་། ཡེ་ཤེས་ཀྱི་བདུད་རྩི་བཀུག་ནས་ཐིམ་པས། དམ་ཡེ་གཉིས་སུ་མེད་པ་བདུད་རྩིའི་རྒྱ་མཚོ། ཡི་དམ་ཡབ་ཡུམ་གྱི་བྱང་སེམས་བདེ་སྟོང་གི་ངོ་བོར་གྱུར་པར་བསྒོམས་པས་བཟའ་བཏུང་ཟོས་ཚད་བྱིན་གྱིས་བརླབས་པར་འགྱུར་ཞིང་། དཀོར་དང་སྐུ་གླུད་ཀྱི་ཉེས་པ་དག་པར་གསུངས་སོ། །བཏུང་བའི་སྐབས་རང་ཡི་དམ་གྱི་ཐུགས་ཀ་ནས་འོད་འཕྲོས་པས་ཡི་གེ་བཾ་སེར་གཅིག་ཏུ་གྱུར་པ་འོད་དུ་ཞུ། ཨོཾ་བཛྲ་ཨ་མྲྀཏ་ཧཱུྃ་ཧྲཱིཿཋཱ། ཕུད་གཏོར་ཏེ། ཉོན་མོངས་ལྔ་པོ་རྣམ་དག་ཅིང་། །ཡེ་ཤེས་ལྔ་ཡི་ངོ་བོ་ཉིད། །བདུད་རྩི་ལྔ་ཡི་རང་བཞིན་མཆོག །བླ་མ་ཡི་དམ་རྣམས་ལ་འབུལ། །ཞེས་བརྗོད་ནས་ལྷ་རྣམས་མཆོད་པར་མོས་ལ་བཏུང་ངོ་། །ཤ་སྤང་ཐུབ་ན་རབ་དེ་མིན་ན་ཉ་སྟོང་ཚེས་བརྒྱད་གསུམ་དུ་སྤང་ཞིང་ཉིན་ཤ་བསྔོས་ཤ་མི་ཟ། སེམས་ཅན་ཐམས་ཅད་ཕ་མ་ལན་གྲངས་བྱས་པ་ཡིན་ངེས། ཁྱད་པར་འཕགས་པ་ཀཱ་ཏྱཱ་ཡ་ནས་གཟིགས་པ་ལྟར་ན་ཚེ་འདིའི་ཕ་མ་སྤུན་སྲིང་ཤི་བ་དེའི་རྣམ་ཤེས་ཞུགས་པའི་ཤ་ཨེ་ཡིན་ངེས་པ་མེད། དེ་ཡིན་ན་ད་ལྟའི་ཕ་མ་སོགས་ཤན་པས་སྲོག་བཅད་དེ། ཤ་དེ་བདག་ལ་སྦྱིན་པ་བཟའ་འདོད་སྐྱེའམ། ཤ་འདི་ནི་དེ་དངོས་ཡིན་སྙམ་པར་གྱིས་དང་། སྙིང་འཁུམས་ཤིང་། ཞེ་ལོག་ཏིང་ངེ་བ་ཞིག་དང་། སྙིང་རྗེ་མི་སྐྱེ་བའི་ཐབས་ག་ལ་ཡོད། དེ་ཁའི་ཤེས་པ་ངར་མི་ཉམས་པའི་ངང་ནས། ཀཾ་ཀ་ནའི་གཟུངས་དང་བཏགས་གྲོལ་གྱི་སྙིང་པོ། ཡིག་བརྒྱ་སོགས་ཅི་ནུས་བཟླས་ཤ་ལ་ཕུས་འདེབས་ཏེ་བསྔོ་བ་དང་སྨོན་ལམ་གདབ་སྟེ་བཟའོ། །དེ་བཞིན་ཆང་ནི་ཆོས་པའི་བདུད་འདི་ལས་ཆེ་བ་མེད་དེ། དཔེར་ན་ཉེས་པ་གཞན་གཅིག་བྱས་པས་བྱས་པ་དེའི་ཉམས་ཆགས་ལས། སྲུང་སྡོམ་གཞན་རྣམས་དག་པར་ཡོད་པས་དེའི་རྟེན་བྱེད་ནས་ཡོན་ཏན་སྐྱེ་ཐབས་ཡོད། ཆང་གིས་མྱོས་པར་གྱུར་ན་ཁྱིམ་པའི་དགེ་བསྙེན་ཡིན་ན་རྩ་བཞིའི་སྣ་འགའ་དང་། ཕལ་ཆེར་གྱི་བསྲུང་བྱ་ཐམས་ཅད་བག་མེད་པས་ཉམས། དགེ་ཚུལ་ཡིན་ན་རགས་པ་བཅུ། བླང་འདས་སུམ་ཅུ། དགེ་སློང་ཡིན་ན་འདུལ་ཁྲིམས་ཉིས་བརྒྱ་ལྔ་བཅུ་རྩ་གསུམ། བྱང་སེམས་ཡིན་ན་ཕར་ཕྱིན་དྲུག །བསྡུ་དངོས་བཞི། དཀར་ནག་གི་ཆོས་བརྒྱད། རྩ་ལྟུང་བཅོ་བརྒྱད། སྨོན་འཇུག་གི་བསླབ་བྱ་གཉིས་དང་ཉི་ཤུ། ཉེས་བྱས་རྣམས། གསང་སྔགས་ཡིན་ན་བླ་མེད་སྤྱིའི་དམ་ཚིག་ཏུ་རྩ་བའི་ལྟུང་བ་བཅུ་བཞི། ཡན་ལག་གི་དམ་ཚིག་སྦོམ་པོ་བརྒྱད། ཁྱད་པར་རྫོགས་པ་ཆེན་པོའི་ལུགས་ལ་སྲུང་མེད་གཅིག་ཆར་བའི་དམ་ཚིག་བཞི། སྲུང་མཚམས་ཅན་གྱི་དམ་ཚིག་ལ་རྩ་བ་བླ་མའི་སྐུ་གསུང་ཐུགས་གསུམ་ལ་དགུ་དགུར་ཕྱེ་བས་ཉེར་བདུན། ཡན་ལག་གི་དམ་ཚིག་འབུམ་སྡེ་རྣམས་ཀྱང་ཆང་གིས་མྱོས་པས་བསྲུང་མཚམས་བག་མེད་གྱུར་ནས་ཉམས་པར་བྱེད་ཅིང་། ཡོན་ཏན་སྐྱེ་བའི་རྟེན་མེད་པར་བྱེད་པའི་ཕྱིར་ཤིན་ཏུ་གཟབ་དགོས་སོ། །འོ་ན་ཕལ་ཆེར་གྱིས་ཆང་བཏུང་ཞིང་སོ་ཐར་བྱང་སེམས་གཉིས་ལ་བཀག་སྟེ། གསང་སྔགས་ལམ་ལ་ཡོན་ཏན་ཆེ་བར་བཞེད་དེ་འདོད་ཡོན་མ་སྤངས་གསུངས་པ་དང་དངོས་སུ་ཉམས་རྟོགས་འཕེལ་བའི་བདུད་རྩི་ཡིན་པ་དང་། ཨོ་རྒྱན་ཆེན་པོ་དང་། བིར་ཝ་པ་སོགས་ཀྱི་རྣམ་ཐར་སྨོས་རྒྱུ་ཡོད་དོ་སྙམ་ན། དེའི་རྗེས་སུ་འཇུག་ནུས་མིན་རང་རྒྱུད་ལ་བརྟག་དཔྱད་གྱིས་དང་རྟོགས་གོམས་གདེང་ཚད་ལྡན་པའི་གུ་རུ་རིན་པོ་ཆེས། ཆང་ཁལ་ལྔ་བརྒྱ་དུས་གཅིག་ལ་བཞེས་ཀྱང་བཟི་བ་ལྟ་ཅི་ངོམ་པ་ཙམ་མ་བྱུང་། དེ་བཞིན་དུ་ཆང་རིན་མ་འཁྱོངས་པས། ཉི་མ་སྟོད་ལ་མནན་པ་སོགས་ཀྱི་ལོ་རྒྱུས་འདུག་པས་རང་རེས་ཀྱང་དུག་རྗེན་ཟ། ཉི་ཟླ་བཙོན་དུ་བཟུང་། རི་བོ་ཕན་ཚུན་བརྗེ། ནམ་མཁའ་ལ་འཕུར་བ་སོགས་བྱ་ནུས་སམ་མི་ནུས་སྐྱོན་ཡོན་ཏན་ཅི་འདུག་ཉམས་དཔྱད་ནས་སྤང་བླང་ངེས་པར་བྱ་དགོས་ཤིང་། རྟོགས་གོམས་གདེང་དང་ལྡན་ན་སོ་ཐར་བྱང་སེམས་གཉིས་ལའང་ཆང་བཀག་མི་དགོས། གལ་སྲིད་བཀག་ན་ཨོ་རྒྱན་ཆེན་པོ་ལ་སོ་ཐར་དང་བྱང་སེམས་གཉིས་པོ་མེད་པར་ཁས་ལེན་དགོས་པ་དང་། དེ་བཞིན་སངས་རྒྱས་བཅོམ་ལྡན་འདས་ལ་གསང་སྔགས་ཀྱི་སྡོམ་པ་ཡང་མེད་པར་འགྱུར་བས། དེ་ལྟར་ན་ལོག་ལྟ་དེ་བས་ཆེ་བ་མེད། རྟོགས་གོམས་ཀྱི་གདེང་དང་མ་ལྡན་ན་གསང་སྔགས་ཡིན་ཀྱང་བཀག་བྱ་ལས་གནང་བ་མེད་དེ། ཨོ་རྒྱན་ཆེན་པོས། སྙིགས་མ་ལྔ་བདོར་གྱུར་པའི་དུས། །གསང་སྔགས་དམ་རྫས་ཤ་ཆང་ལ། །སྤྱོད་དུ་རུང་བའི་ལུང་སྨོས་ཏེ། །ཏིང་འཛིན་ཉམས་ཀྱི་དྲོད་མེད་པར། །ཤ་ཁྲག་ཆང་ལ་ཐམས་ཅད་སྦྱོར། །འདི་ཡང་དམ་ཚིག་མེད་དོ་ཞེས། །ཆོས་བཞིན་སྤྱོད་རྣམས་ཐབས་ཀྱིས་སྨོད། །དེ་འདྲ་བསྟན་པའི་མཐའ་རུ་འབྱུང་། །ཀྱེ་མ་ཀྱེ་ཧུད་དམྱལ་བ་ལས། །འགྲོ་ས་མེད་དོ་སྙིང་རེ་རྗེ། །ཞེས་གསུངས་པ་ལྟར་མདོར་ན་ལམ་ཞུགས་པས་རྣལ་འབྱོར་གྱི་སྤྱོད་པ་མི་བྱ། རྣལ་འབྱོར་པས་གྲུབ་ཐོབ་ཀྱི་སྤྱོད་པ་མི་བྱ་བར་སྤྱོད་པ་དུས་ཚོད་དང་འབྲེལ་ངེས་པར་བྱ་དགོས་གསུངས་པས་གཟབ་འཚལ། ཐུན་བར་དུ་རྣམ་ཐར་དང་སྔོན་འགྲོ་ལ་ཅུང་ཟད་བལྟ་དགོས་ཞེས་པའང་། ངེད་རང་སྒོམ་ཆེན་པ་རྣམས་ལ་ཐོས་བསམ་རྒྱ་ཆེ་བ་རེ་མེད་ན་གནས་ལུགས་མི་རྟོགས་ཟེར་བ་དང་། ཐོས་བསམ་གཏན་ནས་མི་དགོས་ཟེར་བ་སོགས་མཚུངས་ལྡན་ཞིག་ལབ་པ་མ་ཡིན་ཞིང་། དོན་དུ་རིག་འཛིན་འཇིགས་མེད་གླིང་པས། ཡོན་ཏན་མཛོད་དུ་གསུངས་པ་ལྟར། ཐོས་བསམ་དགོས་ཟེར་བ་དེ་གཞན་དག་ཅི་རིགས་རིགས་ལ་གོ་དགོས་པ་མིན། རང་རང་གི་ཉམས་སུ་བླང་བྱའི་ལྟ་སྒོམ་སྤྱོད་འབྲས། སྦྱོར་དངོས་རྗེས་གསུམ་ཙམ་ལ་ཐོས་པས་གོ་རྒྱ་ཆེ་བ། བསམ་པས་སྒྲོ་འདོགས་ཆོད་པ། སྒོམ་པས་ངང་བསྐྱང་རྒྱུ་ཡོད་པ་ཞིག་བྱ་དགོས། ཞེས་གསུངས་པ་ལྟར་བྱ་བ་ལས། མུན་ནག་མདའ་འཕེན། ནེ་ཙོས་ཆོས་འདོན། དྲེད་མོང་གི་ཕྱི་བ་བརྐོ་བའམ། བྱིས་པའི་མེ་ཏོག་བཏུ་བའམ། མགོ་མ་ཚོས་གོང་ནས་ལྕེ་ལ་བསྙབ། གང་མ་ཞུ་གོང་ནས་དོ་འཐུང་། ཟེར་བའི་དཔེ་ལྟར་དང་། མཁས་པ་དཔེ་ཆའི་ནང་ན་ཡོད། །དཔེ་ཆ་སྔས་མགོའི་སྟེང་ན་ལྷག །དགོས་པའི་དུས་ན་འུ་ཐུག་ཅིང་། །ཞེས་གསུངས་པ་ལྟར་དུ་མ་སོང་བར། ཉིན་གཞུང་རྒྱལ་བ་གོང་མ་རྣམས་ཀྱི་རྣམ་ཐར་ཁྱད་པར་ཅན་རྣམས་དང་། སྔོན་འགྲོ་ཐུན་མོང་ཐུན་མིན་ཙམ་མཇལ་ཞིང་ཚིག་དོན་བློ་ལ་མངོན་པར་བྱང་ཆུབ་པས་ངེས་ཤེས་ཁྱད་པར་ཅན་རྒྱུད་ལ་སྐྱེས་པ་ཞིག་དང་། གཞན་ལ་འཆད་པའི་དབང་དུ་བྱས་ནའང་ཐོགས་རྡུགས་མེད་པ་གོམས་ཆ་ཐོན་ངེས་ཞིག་བྱ་དགོས་སོ། །དེ་ནས་ཐུན་དུང་ལན་གསུམ་འབུད་པའི་སྐབས་དུད་འགྲོས་དུང་གི་སྒྲ་ཐོས་པ་ལྟ་བུར་མི་བྱ་བར་དྲན་ཤེས་བག་ཡོད་ལྡན་པས་བསྐྱེད་རྫོགས་ཀྱི་ཉམས་ལེན་གང་རུང་ལ་འཇུག་ནས་ཐུན་གྲོལ་ཚེ། མེ་ལ་ཚ་བའམ། ཆུ་ལ་རླན་ནམ། ནམ་མཁའ་ཀུན་ལ་རིས་མེད་དུ་ཁྱབ་པ་ལྟར་དགེ་བ་མཁའ་ཁྱབ་ཀྱི་སེམས་ཅན་ཐམས་ཅད་ལ་བསྔོ་དགོས་ཏེ། རྗེ་འབྲིང་གུང་སྐྱོབས་པས། ཚོགས་གཉིས་ཡིད་བཞིན་གྱི་ནོར་བུ་ལ། །སྨོན་ལམ་གྱིས་བྱི་དོར་མ་བྱས་ན། །དགོས་འདོད་ཀྱི་འབྲས་བུ་མི་སྨིན་པས། །གཞུག་བསྔོ་སྨོན་འདི་ལ་ནན་ཏན་གྱིས། །ཞེས་དང་། སྦྱིན་དང་ཚུལ་ཁྲིམས་སྒོམ་ལ་སོགས། །ཇི་སྙེད་དགེ་བའི་རྩ་བ་རྣམས། །མི་ཟད་འབྲས་བུ་འབྱིན་པའི་ཕྱིར། བྱང་ཆུབ་ཆེན་པོའི་རྒྱུ་རུ་བསྔོ། །ཞེས་དང་། ཇི་སྐད་དུ། བསྔོ་བ་མི་ཟད་ལམ་ཡིན་པས། །སྤེལ་དང་སྦྱོང་བའི་ཆོས་ཅན་ནོ། །ཞེས་གསུངས་པ་ལྟར། རྒྱུ་ནི་རང་གི་ལམ་བསྐྱེད་རྫོགས་ཀྱི་རིམ་པ་མཚོན་བྱེད་བྱས་ནས། རྒྱལ་བ་སྲས་བཅས་ཀྱིས་དུས་གསུམ་བསགས་པའི་དགེ་ཚོགས་བཅས། ཡུལ་ལྷ་མི་དང་ཉན་རང་བྱང་སེམས་ཀྱི་གོ་འཕང་ཐོབ་ཕྱིར་ཙམ་མ་ཡིན་པར་དོན་གཉིས་ལྷུན་གྱིས་གྲུབ་པ་རྒྱལ་བ་རྫོགས་པའི་སངས་རྒྱས་ཀྱི་ས་ཁོ་ནར་རང་དོན་དང་ཉེ་འབྲེལ། འབྲེལ་ཐོག་ཕྱོགས་རེ་བ་ཙམ་གྱི་ཕྱིར་དུ་མ་ཡིན་པར་ནམ་མཁའི་མཐར་ཁྱབ་པའི་སེམས་ཅན་ཐམས་ཅད་སྡུག་བསྔལ་རྒྱུ་འབྲས་གཉིས་དང་བྲལ་ཞིང་། བདེ་བའི་རྒྱུ་འབྲས་གཉིས་ཀྱིས་མཐར་ཐུག་དེ་ལྟ་བུ་ཐོབ་པར་བྱ་བའི་ཕྱིར། རྒྱལ་བ་སྲས་བཅས་ཀྱིས་སེམས་ཅན་ཐམས་ཅད་ཀྱི་དོན་ཇི་ལྟར་བསྔོ་བ་བཞིན་དུ་བདག་གིས་ཀྱང་རྗེས་སུ་སློབ་ནས་དེ་དེ་བཞིན་དུ་ཡོངས་སུ་བསྔོ་བར་བགྱིའོ་སྙམ་དགོས་སོ། །དགོང་ཐུན་སྐབས་སངས་རྒྱས་བསྟན་པ་དར་བ་སེམས་ཅན་ལ་བདེ་སྐྱིད་འབྱུང་བ་དང་རང་རེ་ཆོས་མཛད་ཡོངས་ཀྱི་བློ་ཆོས་སུ་འགྲོ་བ། ཆོས་ལམ་དུ་སློང་བ་དང་ལམ་འཁྲུལ་པ་ཟད་པ། འཁྲུལ་པ་ཡེ་ཤེས་སུ་འཆར་བ་སོགས་ཀྱི་ཕྱིར་གསོལ་ཁ་ཕྲིན་བཅོལ་དང་། གཅོད་དང་། བསམ་ལྷུན་བར་ཆད་ལམ་སེལ་སྒྲོལ་མ་སོགས་འདོན་པར་བྱ། ཁྱད་པར་གཅོད་འདོན་རྒྱུ་ནི། ཀུ་སཱ་ལི་པའི་ཚོགས་བསགས་པའི་ཐབས་བླ་ན་མེད་པ་ཡིན་པ་དང་། ཆོས་སྒྲུབ་པའི་བར་ཆད་ཞི་བ་དང་། ཕྱི་ནང་གསང་གསུམ་གྱི་བདག་འཛིན་ཚར་གཅོད་པ་སོགས་གལ་གནད་ཤིན་ཏུ་ཆེ་བ་ཡོད་པས་ཡན་དུ་མི་བོར་བ་རྒྱལ་བ་གོང་མ་རྣམས་ཞལ་བཞུགས་པའི་དུས་བཞིན་ཆགས་མེད་དུ་འདོན་སྒོམ་བྱ་བ་གལ་ཆེ། གཉིད་དུ་འཇུག་པའི་སྐབས་ལུས་སེངྒེ་ཉལ་སྟབས་བྱས་འོད་གསལ་ཟིན་པའི་གསོལ་བ་ཡང་ཡང་འདེབས། བླ་མ་རྩ་དབུ་མའི་ལམ་ནས་སྙིང་དབུས་སུ་ཐིམ། རྒྱུད་བྱིན་གྱིས་བརླབས་པར་བསམས་ཤིང་སྙིང་དབུས་ཟླ་གདན་སྟེང་རང་སེམས་སྐྱེ་མེད་ཡི་གེ་ཨཱཿདཀར་པོའི་འོད་ཀྱིས་ལུས་ཕྱི་ནང་སོགས་རིམ་གྱིས་གསལ་བར་སྒོམ་པ་སོགས་གོམས་ཆ་ཐོན་པར་བྱ། ཡང་ན་འཇམ་དཔལ་དབྱངས་ཀྱི་ལྷ་སྙིང་དབུས་སུ་གསལ། གསོལ་བ་འདེབས་བསྙེན་པ་ཡིད་བཟླས་ཆུ་བོའི་རྒྱུན་བཞིན་བྱས་པས་བརྩོན་འགྲུས་དང་ཤེས་རབ་མེ་འབར་བ་ལྟ་བུ་འབྱུང་བར་འགྱུར་རོ། །དེ་དག་གི་དོན་མདོར་བསྡུ་ན་རིགས་དྲུག་གི་རྒྱུ་འབྲས་གང་ལའང་སྡུག་བསྔལ་གྱི་རང་བཞིན་མཐོང་སྟེ་གཡང་ས་ཆེན་པོ་ནས་ལྷུང་རན་པའི་མི་དེ་ཐར་འདོད་ཀྱི་བློ་རྒྱུན་ཆད་མེད་པར་སྐྱེས་པ་ལྟ་བུ་དང་། བྱང་ཆུབ་ཀྱི་སེམས་འབྱོངས་པའི་རྟགས་དགྲ་གཉེན་བར་མ་དོ་ཐམས་ཅད་ལ་མས་བུ་གཅིག་པུ་ལ་བརྩེ་བ་ལྟ་བུའམ། ཕ་གསོད་པའི་དགྲ་བོ་མཐོང་རུང་ཕན་སེམས་ལས་གནོད་སེམས་ནམ་ཡང་མི་སྐྱེ་བ་ཞིག་དགོས། སྒོམ་པ་ཉམས་རྟོགས་ཀྱི་རིམ་པ་ཉིན་མཚན་ཁོར་ཡུག་ཆེན་པོས་འཁོར་འདས་དབྱེར་མེད་དུ་ལ་བཟླ་བ་ཞིག་བྱ་དགོས་ཤིང་། དེ་ལྟར་བྱས་པས་ཀ་དག་ཁྲེགས་ཆོད་རིག་པའི་བཙན་ས་ཟིན་ནས་ཆོས་ཅན་གྱི་སྣང་བ་ཆོས་ཉིད་ཀྱི་དབྱིངས་སུ་ཟད་ནས་རིག་པ་འཕོ་འགྱུར་མེད་པའི་སྐྱེས་བུ་དེ་ཉིད་ཟག་བཅས་ཀྱི་ཕུང་པོ་ཟག་མེད་རྡུལ་ཕྲན་དུ་དེངས་པ་དང་། འབྲིང་དབུགས་ཆད་པ་དང་ཀ་དག་གི་དབྱིངས་སུ་རང་ས་ཟིན་ནས་ངོ་བོ་ལ་འཕོ་འགྱུར་མེད་པའོ། །གང་ཟག་དབང་པོ་ཐ་མ་རྣམས་ཆོས་ཉིད་བར་དོའི་སྐབས་གཞི་ལམ་གྱི་འོད་གསལ་མ་བུ་འདྲེས་ནས་ཡར་གྱི་མངོན་པར་རྫོགས་པར་སངས་རྒྱས་སོ། །ཅུང་དམན་པ་ལྷུན་གྲུབ་བར་དོའི་སྒྲ་འོད་ཟེར་གསུམ་རང་སྣང་དུ་ངོ་ཤེས་ནས། ཤེས་ཐོག་ཏུ་མཉམ་པར་འཇོག་ཐོག་དཔག་ཆེན་གྱིས་མདའ་འཕང་བ་བཞིན་དུ་ཕྱིར་མི་ལྡོག་པར་འགྱུར་རོ། །གང་ཟག་ཐ་མའི་ཡང་ཐ་རྣམས་རྫོགས་ཆེན་སྨིན་གྲོལ་གྱི་གདམས་པ་ཐོབ། ཆོས་དང་གང་ཟག་ལ་སེལ་མེད་པ་རྣམས་སྲིད་པ་བར་དོའི་སྣང་བ་ཤར་ནས་འཁྲུལ་སྣང་ཐམས་ཅད་རྨི་ལམ་སྒྱུ་མ་ལྟ་བུར་རང་སར་དག་ནས་ཤར་ཕྱོགས་མངོན་དགའ་སོགས་ཞིང་ཁམས་གང་རུང་། མེ་ཏོག་པདྨའི་སྦུབས་སུ་རྫུས་ཏེ་སྐྱེས་ནས་སངས་རྒྱས་ཀྱི་ཞལ་མཐོང་། གསུང་ཐོས་ཉོན་སྒྲིབ་ཕྲ་རགས་དག་ནས། ས་བརྒྱད་དང་བཅུ་ལ་གནས་པའི་བྱང་ཆུབ་སེམས་དཔའ་རྣམས་དང་བསྐལ་པ་མཉམ། ལོ་ལྔ་བརྒྱ་ནས་ཞིང་ཁམས་ཐམས་ཅད་ཀྱི་སྟེང་ཕྱོགས་དུར་ཁྲོད་མེ་རི་འབར་བའི་ཞིང་དུ་སྐྱེས་ནས་གཞོན་ནུ་དཔའ་བོ་སྟོབས་ལྡན་གྱི་ཞལ་མངོན་སུམ་མཇལ་ཤེས་བྱའི་སྒྲིབ་པ་ཕྲ་རགས་ཐམས་ཅད་དག་ནས་ཀ་དག་དབྱིངས་སུ་མངོན་པར་བྱང་ཆུབ་པར་འགྱུར་རོ། །དེ་ལྟར་ཁྱད་པར་དུ་མའི་འཕགས་པའི་ཆོས་ཡིན་རུང་དེང་སང་སྙིགས་དུས་འདིར་བཤད་ཀྱང་མི་གོ། བསྟན་ཀྱང་མི་རིག །མྱོང་ཡང་མི་བསམ། སྒོམ་ཡང་གོམས་ཡུན་མི་བསྲིང་བར། རྒྱུ་ནོར་སྙན་གྲགས་ཀྱི་འབྱོར་བ་ཕྲན་བུ་དང་སངས་རྒྱས་ཐོབ་པ་གཉིས་གདམ་ཀ་ནོར་བ་ལྟ་བུ་སོང་སྟེ། བླ་མ་མིག་འདྲིས་ཁྱེར། གདམས་ངག་ལ་རྣ་དྲེད་ཁྱེར། དམ་ཚིག་ལ་ཚོད་ཡོད་ཁྱེར། དད་པ་ལ་སྣུམ་དྲེད་ཁྱེར་ནས་དྲེད་པོ་ཆོས་རྒྱུས་མཁན་ཞིག་ལས་ཀྱང་མི་ཡོང་བར། བདག་སྤྲད་པའི་སྒོམ་ཆེན་བློ་རྒྱ་ཆེ་རུ་སོང་། ཆོས་ལ་རྒྱུས་ཡོད། བླ་མ་ལ་ཚོད་འཛིན། མཆེད་གྲོགས་ལ་སྐྱོན་བརྗོད། ཕྱུགས་བསྲེལ་འདུ་ལོང་བསྒྲུབ། མི་བྱེད་དགུ་བྱེད་གཅིག་གི་སྟེང་དུ་འཁྱོལ་བའི་ཚེ། སྐྱེ་བོ་ཀླད་མེད་ཆོས་སྐུ་བསོད་ནམས་རེ་ཆེ་ཟེར། འགྲོ་དོན་རྒྱས་ཟེར། ཕྱེ་གཏོར་འགམ་པ་ནི་བདུད་ཀྱི་བར་ཆད་མངོན་སུམ་བཞུགས་པའི་རྟགས་མཐར་ཕྱིན་པ་ཡིན་པས་གཟབ་དགོས་ཞེས་གསུངས་པ་ལྟར། དྷརྨ་རཀྵི་ཏས། དུས་དེང་སང་ཅི་བྱས་ཆོས་མིན་སོང་། །བློ་ཆོས་བརྒྱད་བྱ་བ་སྟོབས་ཤུགས་རྒྱས། །དྲན་ཤེས་བཞིན་ཀུན་ཀྱང་བག་ལ་ཞར། །ནམ་ཉིན་མཚན་འཁྲུལ་བ་རྒྱ་འབྱམས་ལ། །སྒོམ་རྣལ་མའི་བབས་སུ་བཅོས་ནས་གདའ། །ལུས་རི་ཁྲོད་དབེན་པར་བཙོན་དུ་བཟུང་། །སེམས་གྲོང་ཡུལ་ཁྱི་སྨྱོན་བཞིན་དུ་འཁྱམས། །མི་གཞན་གྱི་བལྟས་ན་སྒོམ་ཆེན་འདྲ། །རང་རང་བསམ་བཏང་ན་འཁོར་བ་པ༑ །ཞེས་དང་། ཀརྨ་པ་མཁའ་ཁྱབ་རྡོ་རྗེས། ཁོ་བོ་དགེ་སྦྱོར་སྒོམ་ཆེན་ཞེས། །ལོ་ཟླ་མང་པོ་བསྒོམས་བྱས་ཀྱང་། །རྙེད་བཀུར་ཅུང་ཞིག་ངན་པ་འམ། །ཚིག་ངན་ཟུར་ཙམ་ཐོས་ན་ཡང་། །སྒོམ་དང་དགེ་སྦྱོར་མི་དྲན་པར། །དུག་སྦྲུལ་བཞིན་དུ་ཚིག་བྱེད་ན། །དགེ་སྦྱོར་བོགས་ནི་ཅི་ལྟར་དབྱུང་། །དེ་འདྲའི་སྒོམ་ཆེན་མང་དུ་མཆིས། །ཞེས་དང་། ཆོས་པར་རློམ་ཀྱང་ཆོས་བརྒྱད་ཉམས་ལེན་མཁས། །དེ་དག་ཅི་ཙམ་ལེགས་ཀྱང་མི་གཙང་ལུད། །ཟ་འོག་གོས་ཀྱིས་སྐབས་བཞིན་ཡི་མུག་ལྡང་། །ཞེས་དང་། ས་པཎ་གྱིས། ནད་ཀྱིས་མནར་ལ་ལས་རྣམས་མཐུ་ཆུང་ཞིང་། །དེ་བཞིན་རྨོངས་པས་སེམས་དཀྲུག་ན། །ཆོས་རྣམས་ཀུན་ལ་མཐུ་མེད་དོ། །ཞེས་དང་། ལྷ་ཡི་རྒྱལ་པོས་ཆར་ཕབ་ཀྱང་། །ས་བོན་མི་རུང་མི་འཁྲུངས་ལྟར། །དུས་གསུམ་སངས་རྒྱས་ཞལ་བསྡུས་ཀྱང་། །སྔོན་ལས་མེད་ལ་བཟང་མི་འགྱུར། །ཞེས་དང་། ཟེ་ཆེན་རྒྱལ་ཚབ་རིན་པོ་ཆེས། དེ་ཕྱིར་ཡུལ་ཅན་བསེར་བུས་རབ་བསྐྱོད་པས། །གཡོ་བའི་ཀུན་རྟོག་སྐུ་ཤའི་རྩེ་མོ་བཞིན། །རྣམ་པར་གཡོ་བའི་ངང་ཚུལ་འདི་མཐོང་བས། །སྐྱོ་བས་སེམས་ལ་དྭངས་པའི་སྐབས་མ་རྙེད། །ཅེས་དང་། བྱས་ན་བསམ་པ་གཅིག་ཀྱང་མི་བྱེད་པར། །མ་བྱས་བསམ་པ་བརྒྱ་ཕྲག་ཁུར་དུ་ལེན། །ད་ནི་སྤྲང་པོའི་རང་ཚུགས་བཟུང་བའི་དུས། །ཉམ་ཆུང་བས་མཐར་ཁྱི་བཞིན་ཤི་བར་སྨོན། །ཞེས་གསུངས་པ་ལྟར། ནང་རང་རྒྱུད་ཞི་དུལ་ཡོད་པ་ཅན་ཕལ་ཆེར་དཀོན་ཞིང་། ལོ་ཟླ་མང་པོར་བསྒོམས་ཀྱང་དུག་ལྔ་ངོས་བཟུང་གཉེན་པོ་བརྟེན་ཙམ་བྱེད་རྒྱུ་མ་བྱུང་ཞིང་། སྒོམ་ཆེན་གསར་པ་འགའ་རེ་ནི་མ་བསམས་ན་མ་རིག་པ་གཏི་མུག །བསམ་ཚེ་ཆགས་སྡང་གཉིས། བཤད་ཚད་ནི་རྫུན་དང་ཕྲ་མ། ལས་ཚད་ནི་མི་དགེ་བ། ཐོས་ཚད་ལ་ཕྲག་དོག །མཐོང་ཚད་ལ་ང་རྒྱལ། རྐང་ཆུང་རླུང་གི་འཁོར་ལོ་བསྐོར་བའི་རང་བཞིན་མ་ཟད་ད་ལྟར་རང་ཅག་རྣམས་སྐྲ་བྲེག་མིང་བརྗེ། བསམ་པ་བརྗེ། སྦྱོར་བ་བརྗེ། རྟགས་བརྗེས་ནས་སངས་རྒྱས་བསྟན་པའི་རྗེས་ཞུགས་པའི་ཕྱི་རྟགས་ཀྱང་འདོར་ལ་ཉེ་ཞིང་། སྤྲོ་བའི་དུས་འདིར་གཟན་ཤམ་དམར་སེར་གྱོན་པ་རིང་དུ་དོར་ནས་རྒྱ་དཀར་གྱི་ཞྭ་མོ་དང་སྟོད་ཐུང་། རྒྱ་ནག་གི་ལྷམ་སྒོག་དང་སྨད་འདུང་གྱོན་ནས་འབྲུག་གྲི་གློ་མ་གང་རེ་བཏགས་ཤིང་མེ་མདའ་ཨུ་ཤང་ལ་འདི་ཕྱིའི་སྐྱབས་གནས་བཅོལ་ལ་ཉེ་བའི་རང་བཞིན་ལ་དགོངས་ཏེ་ཀོང་སྤྲུལ་རིན་པོ་ཆེས། སྔོན་བོད་འདིར་སངས་རྒྱས་ཀྱི་བསྟན་པའི་དབུ་འཛུགས་ནས་བཟུང་གོས་དཀར་ལྕང་ལོ་ཅན་གྱི་སྡེ། རབ་བྱུང་ངུར་སྨྲིག་ཅན་གྱི་སྡེ་གཉིས་ལས་རྐུ་མ་ཁྲམ་པའི་སྡེ་ཞེས་སྡེ་གསུམ་པ་ཞིག་མ་གསུངས་ཞིང་དགེ་འདུན་ཅེས་པ་ལས། དགྲ་འདུན་གྱོད་འདུན་ཚོང་འདུན་ཟེར་བ་མ་ཡིན། ཞེས་དང་། འབྲུག་པ་རིན་པོ་ཆེས། ངུར་སྨྲིག་རྒྱལ་མཚན་འཛིན་པའི་དགེ་འདུན་རྣམས། །སྐྱ་ཆས་སྤྲད་ནས་ཕྱོར་ཕྱོར་རྫིག་རྫིག་པོ། །བསོད་ཟད་འདི་ཕྱི་གཉིས་མེད་བན་རྒོད་རྣམས། །མ་ཎི་རྡོག་རེ་ཡིན་ཡང་ཨེ་ཐོན་ལྟོས། །ཞེས་གསུངས་པ་ལྟར། དེང་སང་རང་རེས་ཅུང་ཟད་དྲན་སློང་གི་གཟབ་ཤེས་པར་བྱས་ནས་ཕྱི་ནང་མཚུངས་ལྡན་འདི་ལྟ་བུ་ལ་བསླབ་པར་བྱ་སྟེ། སྤྱོད་འཇུག་ལས། བདག་ལ་ཕུན་སུམ་ཚོགས་ཡོད་ཀྱང་། །གཞན་ལ་བརྙས་པར་མི་བྱ་སྟེ། །ཞུམ་པ་ལྟ་བུའི་སེམས་ཀྱིས་ནི། །ཡོན་ཏན་མཐའ་དག་ཁོང་དུ་སྦས། །ཞེས་དང་། གཞན་གྱི་གྲགས་པ་ལྷག་པར་བརྗོད། །རང་གི་གྲགས་པ་ཟིལ་གྱིས་གནོན། །བདག་ནི་བྲན་གྱི་ཐ་མ་བཞིན། །ལས་རྣམས་ཀུན་ལ་བསྐོལ་བར་གྱིས། །ཞེས་དང་། ཇི་སྐད་དུ། ཐོས་རྟགས་ཞི་ཞིང་དུལ་བ་དང་། །སྒོམ་རྟགས་ཉོན་མོངས་ཆུང་བ་ཡིན། །ཞེས་དང་། ཞེ་སྡང་སྒོམ་པའི་རྣལ་འབྱོར་པས། །སྣང་བ་ཐམས་ཅད་དགྲ་རུ་མཐོང་། །སྙིང་རྗེ་སྒོམ་པའི་རྣལ་འབྱོར་པས། །དགྲ་གཉེན་དབྱེར་མེད་ཕ་མར་མཐོང་། །ཞེས་དང་། ཇི་སྐད་དུ། བཀའ་བཀྱོན་དྲག་པོས་ཚར་བཅད་ཀྱང་ཁྲོ་བ་དང་འཁོན་འཛིན་མེད་པ་རྟ་མཆོག་ལྟ་བུ། མངག་གཞུག་སོགས་ལ་སྐྱོ་ངལ་མེད་པ་གྲུ་ལྟ་བུ། ལས་བཟང་ངན་ཐམས་ཅད་ཁུར་ཐེག་པ་ཟམ་པ་ལྟ་བུ། དྲེགས་པ་སྤངས་ནས་ཐམས་ཅད་ལ་གུས་པ་ཁྱུ་མཆོག་རྭ་ཆད་པ་ལྟ་བུ། དེ་བཞིན་བླ་མ་དང་མཆེད་གྲོགས་འགྲོགས་ཡུན་ཇི་ཙམ་རིང་ཡང་སྐྱོ་སུན་མེད་པ་འགྲོགས་བདེ་བ་སྐེ་རགས་ལྟ་བུ་ཞིག་དགོས་སོ། །ཞེས་དང་། ཡོངས་འཛིན་ངག་དབང་བཟང་པོས། ཞེན་ལོག་མོས་གུས་བློས་བཏང་གསུམ། །དྲན་ཤེས་སྙིང་རུས་འདུན་པ་གསུམ། །འདི་དྲུག་སྒོམ་གྱི་བདག་པོ་ཡིན། །ཆོ་འཕྲུལ་ན་ཚ་རྡུང་གཏག་གསུམ། །ཟས་གོས་ཕོངས་དང་བརྙས་བཅོས་གསུམ། །འདི་དྲུག་སྒོམ་གྱི་བོགས་འདོན་ཡིན། །བཀྲེན་ཟས་བཅུད་ལེན་རླུང་ཟས་གསུམ། །དཀོར་མེད་ཞེན་བྲལ་ལྡོམ་བུ་གསུམ། །འདི་དྲུག་སྒོམ་ཆེན་འཚོ་བ་ཡིན། །གཏུམ་མོ་རས་གོས་ལྭ་བ་གསུམ། །བེམ་ཧྲུལ་རོ་གོས་ཁྱི་ཐུལ་གསུམ། །འདི་དྲུག་སྒོམ་ཆེན་གྲང་སྐྱོབ་ཡིན། །ཐེམ་སྤང་ཤིང་དྲུང་ཕུག་སྟོང་གསུམ། །དུར་ཁྲོད་གནས་ཆེན་ལུང་སྟོང་གསུམ། །འདི་དྲུག་སྒོམ་ཆེན་སྡོད་གནས་ཡིན། །ཞེས་དང་། ཐོས་བསམ་གྱི་ཞལ་གདམས་ལས། མི་རྟག་རྣོ་མྱུར་གློག་གི་གོ་སྐབས་ལ། །རྩོལ་སྒྲུབ་ཞེན་པ་སྙིང་གི་དཀྱིལ་ནས་ལོག །ཁ་ཕོར་ཕྱེ་ཁུག་ཙམ་གྱི་ཡོ་བྱད་ཀྱང་། །མེ་ལ་བསྲེགས་ནས་ཆུ་ལ་འཕོ་སྙིང་འདོད། །འཕོ་འགྱུར་འཕེལ་འགྲིབ་སྒྱུ་མའི་གར་བསྒྱུར་ལ། །ཡིད་བརྟན་མེད་པས་སྐྱོ་བའི་ལུས་སེམས་གདུང་། །སྲོག་འཚོ་ལྷགས་སྐྱོབ་ཙམ་གྱི་ཟས་གོས་ཀྱང་། །ཤུལ་དུ་བཞག་ནས་གཅེར་བུ་འཕྱོང་སྙིང་འདོད། །ཤི་ནས་ལུས་ཀྱང་ཤ་ཡི་ཕུང་པོར་གཏོར། །ང་ཞེས་གཅེས་པར་མཐོང་བའི་རྫུན་ཕུག་རྡིབ། །ཉེར་མཁོ་སྙམ་པའི་ཆོས་མཐུན་ཡོ་བྱད་ཀྱང་། །རྡོ་ཡིས་བརྡུངས་ནས་རླུང་ལ་བསྐུར་སྙིང་འདོད། །ཅེས་དང་། དྷརྨ་རཀྵི་ཏས། རང་རྒྱུད་མ་གྲོལ་ཤེས་པ་མང་པོས། །སླར་ཡང་རང་རྒྱུད་རིང་བའི་རྒྱུ་ལས། །རང་གཞན་གང་ལ་ཕན་ཐོགས་མི་འདུག །སྤྲང་པོས་མང་པོའི་ཡིག་སྣ་མི་གསོག །དབེན་པར་རང་སེམས་དཔང་བཙུག་མ་གཏོགས། །ཚིག་མཐའ་མི་དེད་བླ་མ་དཀོན་མཆོག །ཅེས་དང་། རྒྱ་ཆེ་གྲངས་མང་ཆོས་ཀྱི་སྙིང་པོ། །རྩ་བ་རང་སེམས་གྱོང་པོ་འདི་ཉིད། །འདུལ་ཐབས་གཅིག་པུ་ལས་གཞན་མི་འདུག །སྤྲང་པོའི་ཐུགས་དམ་རྣམ་གྲངས་མི་མང་། །བླ་མའི་གདམས་ངག་ཚིག་གསུམ་མ་གཏོགས། །འཁྲུལ་བ་མི་གསོག་བླ་མ་དཀོན་མཆོག །ཅེས་དང་། རིག་འཛིན་འཇིགས་མེད་གླིང་པས། མི་མེད་ཀྱི་ལུང་པར་བཤེས་མེད་རིག་པའི་གྲོགས་དང་འགྲོགས་ནས་གནས་ལུགས་མ་བཅོས་པ་ལ་རྒྱུན་སྐྱོང་བར་དམ་བཅའ་བཟུང་ནས། སྤང་ལ་བེ་ཕུར་བཏབ་པ་བཞིན་ལྷན་ནེར་སྡོད་ཚུགས་པ་ཞིག་དགོས། བཟང་ངན་རེ་དོགས་ཀྱི་གཏམ་ལ་བདེན་འཛིན་དགག་སྒྲུབ་མི་བྱ་བར་མི་ཤི་བའི་ཤུལ་གྱི་གཏམ་བཞིན་ཅི་ལབ་ལབ་ཏུ་བཅུག་དགོས། ཆོས་རྣམ་དག་སྒྲུབ་པ་ལ་མཚན་ལྡན་གྱི་བླ་མ་མ་གཏོགས་བསླབ་བྱ་དྲང་པོ་བཤད་མཁན་རང་གི་ཕ་མ་ཡིན་ཡང་མི་ཡོང་བས་རང་ཚོད་རང་གིས་བཟུང་། སུས་ཀྱང་ཁ་ལ་མི་ཉན་རི་དྭགས་རྒྱ་ནང་ནས་ཤོར་བ་ལྟ་བུ་ཞིག་དགོས། གཏམ་ངན་དང་རྐྱེན་ངན་བྱུང་བའི་ཚེ་སེམས་ལ་འཁྲིགས་མི་ཚུད་པ་སྨྱོན་པ་འུར་ལང་བ་ལྟ་བུ་ཞིག་དགོས། མི་མང་དང་ལྷན་ཅིག་གནས་པའི་ཚེ་དྲན་པ་ཐ་མལ་དུ་མ་ཡེངས་པར་མ་གསར་གཅེས་ཕྲུག་དང་བྲལ་བ་ལྟ་བུ་ཞིག་དགོས། ལྷ་སྐུ་དང་དག་དྲན་སྒོམ་པའི་ཚེ་སྣང་སྲིད་དག་པ་རབ་འབྱམས་སུ་བསླབ་པ་ཞིག་དགོས། རླུང་དང་རྫོགས་རིམ་སྒོམ་པའི་ཚེ་ཁབ་མིག་ཏུ་སྐུད་པ་འཛུད་པ་ལྟར་གྲིམ་ཆ་བག་ཡངས་སུ་མ་སོང་བ་ཞིག་དགོས། འཆི་བ་ཐོག་བབ་བྱུང་ཡང་སྐྱོ་སུན་དང་བློ་ལྷག་མེད་པ་བྱ་རྒོད་ནམ་འཕང་ཆོད་པ་ལྟ་བུ་ཞིག་དགོས། དགོས་པ་བརྒྱད་དང་ལྡན་པ་ཞིག་བྱུང་ན་རྒྱལ་བ་གོང་མའི་གྲུབ་མཐའ་སྙོགས་ཤིང་། བདག་གི་བསམ་པ་རྫོགས་པ་ལགས་སོ། །ཁྱོད་ཀྱི་མི་ལུས་ཐོབ་པའི་དོན་ལྡན་ནོ། །དམ་པའི་ཆོས་སྒོར་ཞུགས་པའི་འབྲས་བུ་འབྱུང་བ་ཡིན་ནོ། །ཞེས་དང་། ཕ་དམ་པས། ཐོས་པའི་དུས་ཁྲ་ཚང་མས་ཟས་ཚོལ་བ་ལྟ་བུ་ཞིག་དགོས། བསམ་པའི་དུས་བྱང་པའི་ལུག་འབྲེག་པ་ལྟ་བུ་ཞིག་དགོས། སྒོམ་པའི་དུས་ལྐུགས་པའི་རོ་མྱོང་བ་ལྟ་བུ་ཞིག་དགོས། འབྲས་བུའི་དུས་ཉི་མ་སྤྲིན་ལས་གྲོལ་བ་ལྟ་བུ་ཞིག་དགོས། གསུངས་པ་ལྟར་རང་ནུས་ལྡན་དུ་མ་གྱུར་བར་གཞན་གྱི་འགྲོ་དོན་མི་འབྱུང་སྟེ། གདམས་ངག་སྒྲོན་མེ་ལག་བརྒྱུད་དང་འདྲ། རང་གསལ་ཙ་ན་གཞན་མི་གསལ། གདམས་ངག་ཐམས་ཅད་བུམ་པ་གང་བྱོ་དང་འདྲ། གཞན་གང་རྩ་ན་རང་སྟོང་པར་འགྱུར། ཞེས་གསུངས་པ་ལྟར། རང་དོན་མ་འགྲུབ་བར་གཞན་དོན་སྒྲུབ་ལོ་གཟུགས་བརྙན་ཙམ་ལས་མི་འབྱུང་བས། འགྲོ་དོན་སྔ་རྩོམ་བྱེད་མི་ཉན་ཞིང་རང་དོན་འགྲུབ་ནས་བཟུང་ཉིན་མཚན་དུས་དྲུག་རེར་སེམས་ཅན་ལ་སྙིང་རྗེ་བསྐྱེད་ཅིང་གང་ལ་གང་འདུལ་གྱི་འགྲོ་དོན་རྩོམ་པར་བྱ་དགོས་ཏེ། རྡོར་སེམས་ལས། བདག་ནི་རྒྱལ་སྲིད་མཐོ་རིས་ལོངས་སྤྱོད་དང་། །འདོད་པའི་ཡོན་ཏན་སྒྲུབ་པར་མ་ལགས་ཏེ། །འགྲོ་ལ་སྙིང་བརྩེ་ཁོ་ནའི་དོན་བརྩོན་པ། །འདི་ལ་ཀུན་མཁྱེན་ཁྱེད་ནི་དཔང་པོར་འཚལ། །ཞེས་དང་། ན་རག་བསྐང་བཤགས་ལས། སྦྱིན་དང་སྙན་སྨྲ་དོན་མཐུན་དོན་སྤྱོད་སོགས། བསྡུ་བ་རྣམ་པ་བཞི་ཡི་དཔུང་འགྲོགས་ནས། །ཐབས་ལ་མཁས་པའི་རྣམ་གྲངས་དཔག་མེད་ཀྱིས། །རང་སྐལ་གང་ལྡན་ཆོས་ཀྱི་ཆར་འབེབས་ཏེ། །ཕ་མ་འགྲོ་དྲུག་འཁོར་བ་ལས་བསྒྲལ་ཞིང་། །མ་རིག་མུན་པའི་སྒྲོན་མེ་བྱེད་པར་ཤོག །ཅེས་དང་། སྤྱོད་འཇུག་ལས། དངོས་སམ་གཞན་དག་བརྒྱུད་ཀྱང་རུང་། །སེམས་ཅན་དོན་ལས་གཞན་མི་སྤྱོད། །ཅེས་དང་། མདོ་སྡེ་རྒྱན་ལས། མགོ་ལ་སེམས་ཅན་ཁུར་ཆེན་ཁུར་ནས་ནི། །སེམས་དཔའ་ཆེ་རྣམས་དལ་གྱིས་འགྲོ་མི་མཛེས། །བདག་གཞན་མ་ལུས་འཆིང་བ་ཀུན་ལྡན་ལ། །བརྩོན་པ་བརྒྱ་འགྱུར་དུ་ནི་བསྐྱེད་པར་རིགས། །ཞེས་དང་། ཀྱེ་མ་ཀྱེ་ཧུད་དཀོན་མཆོག་ཐུགས་རྗེ་ཅན། །རྒྱལ་བའི་རྒྱལ་ཚབ་སྲས་དང་བཅས་པ་རྣམས། །སྙིགས་མའི་འགྲོ་ལ་བརྩེ་བས་ལྷག་པར་དགོངས། །བསྟན་པ་རིན་ཆེན་སྒྲོན་མེ་གསལ་དུ་གསོལ། །ཞེས་པ་ལྟར། མ་གྱུར་སེམས་ཅན་རྣམས་སྡུག་བསྔལ་རྒྱུ་འབྲས་གཉིས་དང་ཡོངས་སུ་བྲལ་ཏེ། བདེ་བའི་རྒྱུ་འབྲས་གཉིས་དང་ལྡན་པའི་ཕྱིར་ཟང་ཟིང་གི་སྦྱིན་པ་དང་། ཆོས་ཀྱི་སྦྱིན་པ་དང་། མི་འཇིགས་པ་སྐྱབས་ཀྱི་སྦྱིན་པ་སོགས་དངོས་བརྒྱུད་བར་གསུམ་ནས་འབད་པས་ཕན་ཅི་ཐོགས་གང་ཐོགས་བྱེད་དགོས་པ་ཡིན་ནོ། །ཞེས་པ་འདིའང་བཀའ་དང་དགོངས་འགྲེལ་ཟབ་རྒྱས་དུ་མར་བཞུགས་ཀྱང་མཐོང་ཐོས་ཀྱི་སྤྱོད་ཡུལ་དུ་མ་གྱུར་པ་བློ་དམན་རྣམས་དང་། ཁ་ཅིག་གོ་ལོ་ཤེས་ལོ་སྒྲུབ་ལོ་ཙམ་གྱིས་ཆོག་ཤེས་པར་བཟུང་བ་དང་། ཁ་ཅིག་ཐོས་བསམ་ཤེས་རབ་བརྩོན་འགྲུས་རབ་ཏུ་གཞོལ་བ་རྣམས་ལ་དགོས་གལ་ཆེ་བ་འགའ་ཞིག་མཐོང་སྟེ་རི་ཆོས་རྩ་བའི་ས་བཅད་ལས་ཅུང་ཟད་འགྲེལ་ཏེ་རྒྱས་བསྡུས་འཚམས་པ་གོ་སླ་གཙོ་བོར་བཟུང་སྟེ་རྒྱུད་ལུང་མན་ངག་འགའ་རེའི་སྙིང་པོ་དམར་རྗེན་དུ་བསྟན་པ་འདི་ཡང་གྲུབ་སྲས་མིང་པས་ལྷག་བསམ་བཟང་པོ་དང་བཅས་གྲུབ་རི་ངོ་མཚར་སྨན་ལྗོངས་སུ་སྦྱར་བ་འདིས་ཀྱང་རྗེས་འཇུག་རྣམས་ཀྱིས་ཐོས་བསམ་སྒོམ་པར་བྱ་བའི་གསོས་སུ་ཅུང་ཟད་འགྱུར་བར་ཤོག་ཅིག། །།
