SPCD-KABUM-02-KHA-031

བླ་སྒྲུབ་ཚོགས་མཆོད་བསྡུས་པ་ནི། རྃ་ཡྃ་ཁྃ། ཨོཾ་ཨཱཿཧཱུྃ་གིས་བྱིན་གྱིས་བརླབས། ཧྲཱིཿ ལྷོ་ནུབ་ཟངས་མདོག་དཔལ་རི་ནས། །རྒྱལ་ཀུན་འདུས་གཟུགས་པདྨ་འབྱུང་། །རིག་འཛིན་རྩལ་འཆང་ཚོགས་རྣམས་དང་། །ཡེ་ཤེས་མཁའ་འགྲོའི་འཁོར་དང་བཅས། །གནས་འདི་ཉིད་དུ་གཤེགས་སུ་གསོལ། །ཕྱི་ནང་གསང་བའི་ཚོགས་མཆོད་འདི། །དགྱེས་པ་ཆེན་པོས་རོལ་ནས་ཀྱང་། །བདག་ཅག་ཉོན་མོངས་དབང་གྱུར་པས། །རྩ་བ་ཡན་ལག་དམ་ཚིག་ལ། །འགལ་ཉམས་འདས་རལ་ཅི་མཆིས་ཀུན། །གནོང་འགྱོད་དྲག་པོས་བཤགས་སྡོམ་ན། །ཐུགས་རྗེ་ཆེན་པོས་རྗེས་བཟུང་ནས། །བྱང་ཞིང་དག་པར་མཛད་པ་དང་། །མཆོག་ཐུན་དངོས་གྲུབ་རྒྱ་མཚོ་སྩོལ། །ག་ཎ་ཙཀྲ་པཱུ་ཛ་ཁཱ་ཧི། ཡིག་བརྒྱ་བརྗོད་ཅིང་ཚར་གྲངས་བསོག། སྲས་འཕགས་པས་སོ།། །།