DKYD-DZINDROL-062

༄༅། །ཡང་གསང་འཛིན་པ་རང་གྲོལ་གྱི་ཆོ་གའི་ཟིན་བྲིས་ཀུན་གསལ་མེ་ལོང་བཞུགས།། རྒྱལ་ཀུན་མཁྱེན་བརྩེའི་སྤྱི་གཟུགས་མཚོ་སྐྱེས་རྗེ། །སླར་ཡང་འདི་ན་གྲུབ་པའི་རིག་འཛིན་གྱི། །རྫུ་ལ་ཆགས་པ་འཇའ་ལུས་རྡོ་རྗེའི་ཞབས། །ཚེ་རབས་ཀུན་ཏུ་རིགས་ཀྱི་བདག་པོར་བསྟེན། །གྲུབ་བརྒྱའི་གཙུག་རྒྱན་ཧེ་རུ་ཀཿདཔལ་དེའི། །གསུང་གི་གསང་ཟབ་ཡང་གསང་ཐིག་ལེའི་ཆོས། །འཛིན་པ་རང་སར་གྲོལ་བའི་མན་ངག་གི། །ཆོག་ཁྲིགས་ཟིན་བྲིས་ཀུན་གསལ་མེ་ལོང་སྤེལ། །དེ་ལ་འདིར་སྔ་འགྱུར་བཀའ་གཏེར་གྱི་ཆོས་བཀའ་ཟབ་ཅིང་རྒྱ་ཆེ་བའི་མཛོད་ཇི་སྙེད་པའི་སྙིང་པོ་ཡང་ཞུན་རྫོགས་པ་ཆེན་པོ་ཐིག་ལེ་གསང་བའི་སྐོར་གྱི་མཁའ་འགྲོ་གསང་བའི་སྙན་བརྒྱུད་ཨ་ཏི་ཐུགས་ཀྱི་ཐིག་ལེའི་ཆོ་ག་འདི་ལ། སྨིན་བྱེད་དབང་གི་རིམ་པ། གྲོལ་བྱེད་བསྐྱེད་རྫོགས་ཀྱི་མན་ངག །བོགས་འབྱིན་བརྟུལ་ཞུགས་ཀྱི་ལམ་ཁྱེར། །རྐྱེན་སེལ་འཕྲལ་དགོས་ཀྱི་ཆ་ལག །ལོག་འདྲེན་ཕུང་བྱེད་ཀྱི་གཏད་སེར་སོགས་སྐོར་ཚོ་འགའ་ཞིག་བཞུགས་པ་ལས། བསྐྱེད་རྫོགས་བསྙེན་པའི་ལས་རིམ་ལ་ཇི་ལྟར་འཇུག་པའི་དང་པོ་བཅའ་གཤོམ་གྱི་རིམ་པ་ནི། ཡིད་མཐུན་གྱི་གནས་སུ་ཡུལ་དུས་དང་བསྟུན་པའི་དཀྱིལ་འཁོར་སྟེག་བུ་གྲུ་བཞིའམ་བང་རིམ་ཅན་སོགས་ཅི་བདེར་བཀོད་པའི་དབུས་སམ་སྟེགས་གོང་མར། བྷནྡྷ་བམ་རིལ་སོགས་མཚན་ལྡན་གྱི་ནང་མར་གྱིས་བྱུགས་ཏེ་རུས་པ་རྗེན་པར་མི་མངོན་པར་བྱས་པའི་ནང་ཆང་བཟང་པོར་སེལ་མེད་ཆོས་སྨན་བཏབ་པས་སུམ་གཉིས་ལེགས་པར་བཀང་བའི་ཁ་མར་ཁུས་བཅད་དེ་སྟེང་དར་དམར་བརྒྱད་ལྟེབས་ཀྱིས་བཀབ་ལ་བཞག །ཐོད་པའི་སྟེང་ངམ་རྒྱབ་ཏུ་ཁྲོས་མ་ལྷ་ལྔའི་གཏོར་མ་ཆོས་འབྱུང་བསྣོལ་མའི་སྟེང་དམར་གཏོར་འཁོར་བཞི་མཚམས་སུ་མཐེབ་རིལ་ཅན། གཡོན་ཕྱོགས་སུ་བཀའ་གཏེར་སྤྱི་བསྡུས་ལ་དམར་གཏོར་ཟུར་གསུམ་ལྔ་རྒྱབ་ཏུ་དཀར་གཏོར་འདབ་བཞི་མཚམས་སུ་མཐེབ་རིལ་ཅན། དེ་དག་གི་གཡས་གཡོན་དུ་ཆད་ཐོ་བརྟན་མ་རྙིང་ལུགས་སྤྱི་འགྲོ་ལྟར་གྱི་གཡས་གཡོན་དུ་སྨན་རཀ་ཀྱང་བཤམས། མདུན་དུ་ཆུ་གཉིས་སྔོན་འགྲོའི་ཉེར་སྤྱོད་མཆོད་མགོ་སྨན་ནས་བརྩམ་སྟེ་གཤམས། མདུན་སྟེགས་ལ་ནང་མཆོད་རྡོར་དྲིལ་ཌཱ་རུ་རྣམས་ཀྱང་བཞག །ཉེ་ལོགས་གང་བདེར་གསེར་སྐྱེམས་དཀར་བགེགས་བཅས་བཤམས། ཚོགས་མཆོད་ཕྲིན་གློག་སྐབས་བསྐང་གཏོར་བམ་བསྐང་ཞེས་པ། ཕྱེ་གཙང་མར་དང་མངར་གསུམ་གྱིས་སྦྲུས་པའི་དཀར་ཟླུམ་བླ་གཏོར་རྩེ་བཅད་ལྟ་བུའི་རྒྱབ་མ་ཉམས་པའི་མདུན་ངོས་བམ་རོའི་རྣམ་པར་བཅོས་པ་ཙོག་བུའི་པུས་སྟེང་ལག་གཉིས་ཐལ་མོ་གྱེན་བཟེད་ཀྱི་མགོ་སྟེང་དང་ཕྲག་གོང་གཉིས་ཐལ་མོ་གཉིས་ཏེ་ལྔར་དམར་གཏོར་ཟླུམ་པོ་ལྔ་ཡང་བཞག་པ་ཞིག་བཅས་ཏེ་དཀྱིལ་འཁོར་གྱི་སྟེགས་གང་བདེར་བཞག །ཚོགས་རྒྱས་པར་མ་གཏོགས་བམ་བསྐང་མི་དགོས། བསྙེན་པ་སོགས་ཀྱི་ཚེ་ལས་བྱང་ལ་ཉིན་བཞིན་ཚོགས་རྫས་བཅས་སྣེ་ཚང་རེ་དགོས། རྒྱུན་མཆོད་ཆད་བརྟན་གསོལ་ཀ་རྣམས་བ་ལིང་རེ་ཡོད་དགོས། རྒྱུན་པར་བགེགས་གཏོར་མི་དགོས། དེ་ནས་ཆོ་ག་དངོས་ལ་ཐོག་མར་ཚིག་བདུན་མ་དང་བསམ་ལྷུན་རྒྱས་བསྡུས་སྔོན་དུ་བཏང་ནས་རང་གཞུང་སྔོན་འགྲོ་རྒྱས་པའམ། བསྡུ་ན་ཚིག་བདུན་མའི་མཇུག་ཏུ་ཀུན་བཟང་ཡབ་ཡུམ་སོགས་བརྒྱུད་འདེབས་དང་སྐྱབས་ཡུལ་མདུན་མཁར་སད་སྐྱབས་འགྲོ་ནས་མཆོད་བརླབ་བར་གཏོང་། བླ་རྣལ་བཟླས་པ་ག་ཏེ་རྒྱུན་དུ་བརྒྱ་རྩ་བརྒྱད་རེ་དང་། བསྙེན་པར་ཞི་བསྙེན་ཚུལ་བྱེ་བ་གཅིག་གམ། སྙིང་ཐིག་བླ་རྣལ་ལྟར་བྱེ་བ་བཅུ་སྟེ་འབུམ་ཕྲག་བརྒྱ་གཏོང་བའི་ཕྱག་ལེན་དང་ལུགས་གཉིས་འདུག །དེ་ནས་ཐུགས་ཐིག་སྤྱི་འགྲོའི་ཟུར་རྒྱན་ལྟར་མཐར་ཆགས་སུ་གཏོང་། མཆོད་བརླབ་ནས་བཟླས་པའི་བར་དཀྱུས་བཞིན་དང་། བསྙེན་ཚད་ལས་རུང་ཙམ་ལ་འབུམ་ལྔ་ཁ་སྐོང་བཅས་དང་དུས་ཀྱིས་བཞི་འགྱུར་གཏོང་ན་འབུམ་ཕྲག་ཉི་ཤུའོ། །རྩ་བསྙེན་ཐེམ་ནས་ལས་བཞིའི་བསྙེན་པ་ཞག་བདུན་ནམ་ལྔའམ་གསུམ་སོགས་གང་རུང་ལ་ཅི་འགྲུབ་གཏོང་། དེ་ཡང་ཐོག་མར་རྩ་བསྙེན་བརྒྱ་རྩ་བརྒྱད་བཟླས་ཏེ་འཇུག་གོ །བསྙེན་མཇུག་ཏུ་དབྱངས་གསལ་ཡིག་བརྒྱ་ཡེ་དྷར་བཅས་དང་། རང་གཞུང་མཆོད་བསྟོད་ཀྱིས་མཇུག་བསྡུས་ཏེ་ཡིག་བརྒྱ་གཏོང་། ཐུན་མཚམས་སུ་དངོས་གྲུབ་བསྐུལ་ཚིག །ཧོཿ མ་ཅིག་ཡུམ་ཆེན་སོགས་ནས་ཤིས་བརྗོད་བར་ཆ་ཚང་གཏོང་། རང་གཞུང་སྨོན་ལམ་དང་། མཐའ་གཏད་དྲག་གཅོད་སོགས་གང་དགོས། གདན་གཅིག་མའམ་ལུས་སྦྱིན་གང་རུང་གི་མཐར། གདན་གཅིག་མའི་གདུལ་བྱར་འགྱུར་བར་ཤོགཿ ཕཊཿཀྱི་འཕྲོས་དང་། ལུས་སྦྱིན་གྱི་ཕཊཿབདག་ཉིད་ཡེ་ནས་སོགས་ཀྱི་མགོར་སྦྱར་དགོས། དུར་གཅོད་ཀྱང་འདྲ། གཉན་ཁྲོད་ལྟ་བུར་འགྲོ་ཚེ། བླ་མར་གསོལ་འདེབས་དང་། འཛིན་གྲོལ་གདམས་པ་དང་ལུས་སྦྱིན་བཏང་སྟེ། སྙིང་རྗེ་བྱང་སེམས་མོས་གུས་ཀྱི་རྩི་དང་མ་བྲལ་བའི་མཉམ་ཉིད་ཀྱི་ལྟ་བ་དང་རོ་སྙོམ་གྱི་བརྟུལ་ཞུགས་ཟུང་དུ་འབྲེལ་བས་གང་ལ་ཡང་ལམ་དུ་འཁྱེར། ཡུལ་རྐྱེན་ལ་རང་དབང་བསྒྱུར་ཅིང་ལྟ་སྒོམ་གྱི་བོགས་ཐོན་པར་བྱའོ། །དེ་ལྟར་ཟབ་གསང་མཁའ་འགྲོའི་སྙན་བརྒྱུད་ཀྱི། །ཟབ་དོན་མན་ངག་འཛིན་པ་རང་གྲོལ་ཆོས། །ཉམས་སུ་ལེན་པའི་ཆ་ལག་ཟིན་བྲིས་འདི། །ཉུང་ངུར་བསྡུས་ཏེ་ལེགས་པར་བཀོད་པ་ལགས། །ཟིན་བྲིས་འདི་ཉིད་མཛད་པོ་རྫོགས་ཆེན་གཅོད་ཀྱི་རྣལ་འབྱོར་པ་སྨན་ལྷ་ལ་རིགས་གསུམ་སྤྲུལ་པའི་སྲས་གསུམ་འཁྲུངས་པའི་བར་མ་མཁན་ཆེན་རྡོ་རྗེ་འཆང་འཇིགས་མེད་ཡོན་ཏན་མགོན་པོའི་རྡོ་རྗེའི་གསུང་བྱིན་ཆེན་ལགས་སོ།། ༈ །།ཡང་རྫོགས་ལུགས་འཛིན་གྲོལ་བཅའ་གཤོམ་རྒྱས་པར། དབུས་སུ་བླ་མ་སྤྱི་འགྲོའི་གཡས་སུ་ཡི་དམ་དཔལ་གཏོར་རིན་ཆེན་འབར་བའི་དབྱིབས་ཅན། གཡོན་དུ་མཁའ་འགྲོའི་གཏོར་མ་གྲི་གུག་གི་དབྱིབས་ཅན། གསུམ་ཀ་པད་འདབ་མཐེབ་རིལ་ཅན་བཀོད། སྤྲོས་མེད་སྤྱི་བསྡུས་བླ་མའི་ཟླུམ་གཏོར་འདབ་བཞི་འཁོར་བཞི་པ། བཀའ་གཏེར་ལ་དམར་གཏོར་མཐེབ་ཀྱུ་བཞི་པ་དང་། བསྙེན་པའི་ཁ་སྐོང་ཁྲི་ལྔ་ཡིན་ཞེས་གསུངས། ཟངས་མདོག་དཔལ་རིའི་སྨོན་ལམ་ཡང་རང་གཏེར་གྱི་ལུགས་ཡིན།། །། ༄༅། །ཡང་ཟབ་འཛིན་པ་རང་གྲོལ་གྱི་ཟིན་བྲིས་ཤེལ་དཀར་མེ་ལོང་བཞུགས། དབུས་མཐའ་བྲལ་བའི་ཆོས་དབྱིངས་ཆེན་པོ་རུ། །མངོན་པར་བྱང་ཆུབ་འོད་མི་འགྱུར་བའི་དཔལ། །རྒྱལ་ཚབ་རིགས་ལྔ་བཙུན་མོར་བཅས་རྣམས་དང་། །གཉེར་འཛིན་ཌཱཀྐིའི་ཚོགས་ཀྱིས་ཤིས་པ་སྩོལ། །ཟབ་ལས་ཆེས་ཟབ་གསང་ཆེན་ཨ་ཏིའི་ཆོས། །བརྒྱུད་གསུམ་ཌཱཀྐིའི་ཐུགས་ཐིག་བཅུད་དྲིལ་བ། །གྲུབ་བརྒྱའི་གཙུག་རྒྱན་པད་འབྱུང་ཡབ་ཡུམ་དང་། །དབྱེར་མེད་འཇའ་ལུས་རྡོ་རྗེའི་དགོངས་པའི་གཏེར། །ཐུགས་ཐིག་རྣམ་གསུམ་དྲི་མ་མེད་པའི་བཀའ། །འཕུར་འགྲོའི་བསྟན་པའི་སྙིང་པོ་ཟབ་པའི་ཐིག །བླ་མ་མཁའ་འགྲོའི་བཀའ་རྒྱས་བཏབ་པའི་ཆོས། །ཡང་ཟབ་སྐལ་བཟང་ཁོ་ནའི་སྤྱོད་ཡུལ་ལས། །ཚེ་འདི་དོན་གཉེར་ལེ་ལོ་རང་ཆེ་འབྱིན། །གསང་སྒོ་འཆོལ་དང་ཐེ་ཚོམ་ཟོལ་ཟོག་ཅན། །སྤྲོས་མེད་ཉམས་ལེན་དམིགས་པ་གཙོ་ཆེ་བས། །སྣོད་མིན་དམ་འགལ་ལོག་པའི་གང་ཟག་ལ། །རླུང་ཕྱོགས་ཙམ་དུའང་མི་སྤེལ་གསང་རྒྱས་གདབ། །སྙིང་ནས་ཆོས་དོན་གཉེར་བའི་ལས་འཕྲོ་ཅན། །ཐུགས་ཐིག་གསང་བའི་མན་ངག་ཉམས་བླང་བས། །ལྟ་སྒོམ་དྲོད་ཐོབ་ཉམས་མྱོང་གདེངས་ལྡན་པའི། །ལམ་གྱི་བོགས་འབྱིན་འཛིན་གྲོལ་གདམས་པ་སྟེ། །སྤྲོས་བཅས་ཆོག་ཁྲིགས་གདངས་དབྱངས་ལ་སོགས་ཀྱི། །རྣམ་གཞག་རྒྱ་ཆེ་གང་ཡང་དགོས་མིན་ཞེས། །བརྒྱུད་པ་གོང་མའི་གསུང་རྒྱུན་བཞུགས་མོད་ཀྱང་། །ཐུན་མོང་སྤྲོས་ལ་དགའ་བའི་རིགས་ཅན་ལ། །བརྒྱུད་པའི་ཕྱག་བཞེས་མ་ནོར་ཇི་བཞིན་དུ། །རང་བློར་ངེས་པ་གང་ཡོད་མདོར་བསྡུས་སུ། །འགོད་ལ་བླ་མ་མཁའ་འགྲོས་གནང་བ་སྩོལ། །དེ་ལ་འདིར་བདག་ཅག་གི་སྟོན་པ་འོད་མི་འགྱུར་བ་འདི་ཉིད་ནང་གསལ་སྤྲོས་པ་དང་བྲལ་བའི་རྣམ་ཀུན་མཆོག་ལྡན་གྱི་ཆོས་དབྱིངས་ཆེན་པོར། སྐུ་དང་ཡེ་ཤེས་འདུ་འབྲལ་མེད་པའི་བདག་ཉིད་དུ་ཡེ་ཐོག་དང་པོར་མངོན་པར་རྫོགས་པ་བྱང་ཆུབ་པའི་གོ་འཕང་མངོན་དུ་མཛད་དེ། དབྱིངས་དང་ཡེ་ཤེས་འདུ་འབྲལ་མེད་པའི་དགོངས་པ་ལས་མ་གཡོས་བཞིན་དུ། ཡེ་ཤེས་རང་སྣང་བའི་ཞིང་ཁམས་ལྔ་ལྡན་སྒྱུ་འཕྲུལ་དྲྭ་བའི་འཁོར་ལོ་ཚད་མེད་པ་རྣམ་པར་བཀོད་པ་ལ། རང་བཞིན་ཡེ་ཤེས་ཀྱི་སྣང་ཆ་འབྱམས་ཀླས་པའི་ཐུགས་རྗེའི་རྩལ་སྣང་འགགས་པ་མེད་པའི་ཆོ་འཕྲུལ་ཕྱོགས་བཅུ་རང་བཞིན་སྤྲུལ་པའི་ཞིང་ཁམས་གདུལ་བྱ་དག་པའི་སྤྱོད་ཡུལ་དང་འཚམ་པར་སྣང་ཞིང་། དེ་ལས་བཟོ་དང་སྐྱེ་བ་བྱང་ཆུབ་མཆོག་གི་རོལ་པ་མུ་མེད་པའི་ཚུལ་རྒྱ་མཚོས། སྣང་བ་གསུམ་གྱིས་གདུལ་བར་བྱ་བའི་འགྲོ་ཁམས་མ་ལུས་པ་རང་བཞིན་གྱིས་གྲོལ་བར་མཛད་པ་ལས། རྫོགས་པ་ཆེན་པོ་ཨ་ཏི་ཡོ་གའི་མན་ངག་གི་ཆ་ལག་དབང་ཁྲིད་ལམ་གྱི་ཆ་རྐྱེན་ལུས་མེད་མཁའ་འགྲོའི་ཐུགས་ཐིག་ནུབ་ཕྱོགས་ཨོ་རྒྱན་གྱི་ཡུལ་དུ་མཁའ་འགྲོ་མ་གསང་བ་ཡེ་ཤེས་ཀྱི་ཡབ་ཀྱི་ཚུལ་དང་། བཀོད་པ་ལྷུན་གྱིས་གྲུབ་པའི་ཞིང་ན་རིག་འཛིན་གྱི་རྒྱལ་པོ་རྡོ་རྗེ་ཆོས་དང་། གཞན་རིག་འཛིན་ཐོད་པ་རྩལ་དང་རྡོ་རྗེ་སྙིང་པོ་སོགས་མཚན་དང་སྐུའི་བཀོད་པ་དུ་མ་དང་ལྡན་པའི་རིགས་ཀྱི་བདག་པོ་བླ་མ་དྲི་མ་མེད་པའི་དགོངས་བཅུད་ཟབ་པའི་མཐར་ཐུག་མན་ངག་གི་ཉིང་ཁུ་འདི་ཉིད། བླ་མ་དྲི་མ་མེད་པ་ཉིད་གང་འདུལ་སྤྲུལ་པའི་རོལ་པ་ཅིར་ཡང་བསྒྱུར་པ་ཨོ་རྒྱན་ཐོད་ཕྲེང་རྩལ་དང་། བརྟུལ་ཞུགས་ཨ་ཙརྻ་དམར་པོ། ཕ་གཅིག་དམ་པ་ནག་པོ་སོགས། རྒྱ་གར་འཕགས་པའི་ཡུལ་ཁོ་ནར་ཡང་གྲུབ་ཐོབ་ལྔ་བསྐོར་ཙམ་དུ་སྣང་བར་མཛད་ཅིང་། སླར་ཡང་སྙིགས་མའི་དུས་འདིར་གྲུབ་པའི་རིག་འཛིན་གྱི་ཚུལ་དུ་ཕེབས་པ་མཁྱེན་བརྩེ་ཡེ་ཤེས་རྡོ་རྗེའམ་གཏེར་ཆེན་འཇའ་ལུས་རྡོ་རྗེ། བརྟུལ་ཞུགས་ཁྲག་འཐུང་དཔའ་བོ་སོགས་མཚན་གྱི་རྣམ་གྲངས་དུ་མ་དང་ལྡན་པའི་གྲུབ་པའི་དབང་ཕྱུག་ཆེན་པོ་དེ་ཉིད་སྐུ་གསུམ་གྱི་སྟོན་པ་རྣམས་དང་མཉམ་གཞག་ཆོས་སྐུའི་དགོངས་ཀློང་གཅིག་ཏུ་འདྲེས་ཤིང་། རྗེས་ཐོབ་དུ་དག་ཆེན་ཡེ་ཤེས་ཀྱི་གཟིགས་པ་འབྱམས་སུ་ཀླས་པའི་འོད་གསལ་གྱི་སྣང་ཆར་བླ་མ་མཁའ་འགྲོ་འདུ་འབྲལ་མེད་པའི་བྱིན་རླབས་དོན་བརྒྱུད་ཀྱི་དབང་བསྐུར་ཞིང་། རང་བྱུང་གསང་བ་ཆེན་པོའི་བརྡའི་རི་མོ་འགྱུར་མེད་དགོངས་པའི་དབྱིངས་སུ་སྤར་བཏབ་པ་བཞིན་མངོན་སུམ་སྣང་བར་མཛད་དེ། ལས་ཅན་གྱི་ཆོས་བདག་དང་གཉེར་འཛིན་ཌཱཀྐིའི་བཀས་གནང་ཞིང་ཆེད་དུ་བསྐུལ་མ་མཛད་པ་ལ་བརྟེན། བསྟན་ལ་ཕན་པའི་ཆོས་སྡེ་ཨ་ཏི་འཛིན་པ་རང་གྲོལ་ཞེས་ཡོངས་སུ་གྲགས་པའི་གདམས་པ་ཟབ་མོ་འདི་ཉིད་ལ་ཉམས་བཞེས་གཅིག་ཏུ་གཞོལ་བའི་སྐལ་ལྡན་རྣམས་ཀྱིས། བརྒྱུད་པ་བར་མ་ཆད་པའི་ཕྱག་བཞེས་བཞིན་བཅའ་བཤམས་དང་འདོན་འགྲིགས་ཀྱི་རིམ་པ་རགས་རིམ་ཙམ་འགོད་པ་ལ། ཐོག་མར་ལོ་རྒྱུས་གཉིས་དང་ལྡན་ཞིང་གངས་ཁྲོད་སོགས་མཚན་ཉིད་ཚང་བའི་གནས་སུ་དབང་གིས་སྨིན་ཅིང་དམ་ཚིག་དང་ལྡན་པའི་རྣལ་འབྱོར་པ་ལམ་འདི་ལ་ཞུགས་ཏེ་མཆོག་ཐུན་གྱི་དངོས་གྲུབ་ཚེ་འདིར་སྒྲུབ་པར་འདོད་པ་རྣམས་ཀྱིས། རང་གཞུང་གསེར་ཡིག་ཅན་གྱི་ཁྲིད་རིམ་ལྟར་རྒྱུད་སྦྱོང་བའི་མན་ངག་བླ་མའི་ཞལ་ཁྲིད་ཇི་ལྟ་བར་བརྒྱུད་པ་བར་མ་ཆད་པའི་ཕྱག་བཞེས་བཞིན་དང་། དངོས་གཞིའི་ངོ་སྤྲོད་ཐུན་མིན་གྱི་རང་ལུགས་ཉམས་ཁྲིད་ཀྱི་ཚུལ་དུ་གནད་དུ་སྨིན་ངེས་དགོས་ཀྱང་། དེང་སང་ཐུགས་ཐིག་རྣམ་གསུམ་གྱི་ཁྲིད་རྒྱུན་ཆེར་མི་བཞུགས་པས། ཀློང་ཆེན་སྙིང་ཐིག་གི་ཐུན་མོང་ཕྱི་ནང་དང་། ཁྱད་པར་གྱི་སྔོན་འགྲོ་དངོས་གཞི་བཅས་ཀྱི་ལམ་ལ་གོམས་པའི་སྐལ་ལྡན་རྣམས་ཀྱིས་ལམ་གྱི་བོགས་འབྱིན་པ་དང་། ལྟ་སྒོམ་རྩལ་སྦྱང་བའི་ཆ་རྐྱེན་དུ་ཟབ་དོན་གཅོད་ཀྱི་གདམས་པ་འདི་ཉིད། རིག་པ་བརྟུལ་ཞུགས་ཀྱི་སྤྱོད་པ་དང་འོད་གསལ་སྤྱོད་པའི་གནད་ཡིག་སོགས་དང་མན་ངག་གནད་གཅིག་པས་དེ་ཀའི་ཆ་ལག་ཏུ་བྱས་ཀྱང་མི་འགལ་ཞིང་འཐད་ཆེ་བར་གསུངས་པས། དེའི་ལུགས་ལྟར་བྱ་བ་འཇུག་པ་བདེ་ཞིང་སྐབས་སུ་བབས་ལ། སྤྱིར་གདམས་པ་འདི། ཨ་ཏི་ཐུགས་ཀྱི་ཐིག་ལེ་ཞེས་རྫོགས་པ་ཆེན་པོའི་མན་ངག་ཁོ་ནར་ངེས་པ་ལས། རྒྱུད་སྡེ་འོག་མ་ལྟར་སྤྲོས་བཅས་ཀྱི་བསྐྱེད་རྫོགས་ལ་ལྟོས་པ་ཅན་མིན་ཡང་། ཨ་ཏི་རང་ལུགས་ཀྱི་ལྷུན་གྲུབ་སྣང་སྟོང་དུ་ཤར་བ་ཟབ་མོའི་བསྐྱེད་རིམ་ལྟར་རིམ་གཉིས་ཟུང་འཇུག་སྤྲོས་མེད་ཀྱི་བསྐྱེད་རྫོགས་ཁོ་ནར་རྩལ་དུ་བཏོན་ཏེ། དྲིལ་སྒྲུབ་སྙིང་པོ་བཅུད་དྲིལ་གྱི་གཞི་བསྙེན་ལས་རུང་ཙམ་ཐ་ནའང་སྔོན་དུ་འགྲོ་དགོས་པས། དེའི་བཅའ་གཤོམ་གྱི་རིམ་པ་ལ། དཀྱིལ་འཁོར་རྒྱས་བསྡུས་སྐབས་བསྟུན་ལ། བསྡུས་པ་གཞུང་གི་དངོས་བསྟན་ལྟར་འབྲུའི་ཚོམ་བུ་ལྔའི་ཁར། དབུས་སུ་བྷནྡྷ་བམ་རིལ་ལམ་མིན་ཡང་དུམ་གསུམ་མཚན་ལྡན་གྱི་ནང་དུ་འབྲུ་བཅུད་ཆང་ངམ། རྩི་བཅུད་འོ་མ་བུར་སྦྲང་སོགས་ཀྱིས་གཏམས་པ་ལ། སེལ་མེད་ཀྱི་ཆོས་སྨན་བཏབ་པ་དར་དམར་བརྒྱད་ལྟེབ་ཀྱིས་ཁ་དགབ། དེའི་ཤར་དུ་ཕྱི་ནང་གི་མཆོད་པ་དང་། ལྷོ་རུ་སྨན། ནུབ་ཏུ་ཁྲོས་མ་ལྷ་ལྔའི་གཏོར་མ་ཆོས་འབྱུང་བསྣོལ་མ་གདན་ཐབས་ཀྱི་སྟེང་དུ་ཞིང་ལྤགས་གན་རྐྱལ་མགོ་བོ་མདུན་དུ་བསྟན་པའི་དབུས། དམར་གཏོར་གྲི་རིས་ཅན་འཁོར་རང་འདྲ་བཞི། མཚམས་སུ་མཐེབ་རིལ་ཁྲོས་མའི་སྐུ་ཙཀ་གམ་མིན་ཡང་མདའ་སྒྲོ་ལྡན་ལ་དར་མཐིང་གའི་གཏོར་གདུགས་ཀྱིས་སྤྲས་པ་རྒྱབ་ཏུ་གཟུགས། བྱང་དུ་རཀྟ། མཚམས་བཞིར་རྙིང་ལུགས་སྤྱི་འགྲོས་ཆད་ཐོ་དང་། འཛིན་གྲོལ་བཀའ་དང་གཏེར་སྲུང་གི་མཆོད་གཏོར་གཏོར་སྤུངས་སུ་འཁོར་གཏོར་ཆུང་ལྔ་རྒྱབ་ཏུ་དཀར་གཏོར་པད་འདབ་བཞི་ལྡན་མཚམས་སུ་མཐེབ་རིལ་ཅན་དང་། ཚོགས་དང་རྒྱུན་གཏོར་མཆོད་པ་བ་ལིང་བཅས་དང་། སྔོན་གཏོར་གཏོར་ཆུང་ཆངས་བུ་མཐེབ་རིལ་བཅས་པ་དང་གསེར་སྐྱེམས་བཅས་འདུ་བྱ་ཞིང་། མཚམས་ཀྱི་སྔོན་འགྲོ་རྒྱལ་ཆེན་ཐོ་འཛུགས་སོགས་བསྙེན་ཡིག་སྤྱི་འགྲོས་ལྟར་བྱ། གཞུང་ལ་འཇུག་པའི་དང་པོར། ཚིག་བདུན་གསོལ་འདེབས་དང་བསམ་པ་ལྷུན་གྲུབ་སོགས་གུ་རུའི་གསོལ་འདེབས་རྒྱས་བསྡུས་ཅི་རིགས་དང་། ཀུན་བཟང་རྡོར་སེམས་སོགས། འཛམ་གླིང་མཛེས་པའི་སོགས། ཤེས་བྱ་ཀུན་མཁྱེན་སོགས། དུས་གསུམ་ཀུན་མཁྱེན་སོགས། ཨོ་རྒྱན་པད་འབྱུང་སོགས་ལེ་ཚན་གསུམ། རང་གཞུང་ཨེ་མ་ཧོ། སངས་རྒྱས་ཀུན་འདུས་སོགས་ལན་གསུམ་མཐར་རང་གཞུང་སྐྱབས་སེམས་ཡན་ལག་བདུན་པ་བཅས་སོང་མཚམས། འབྲུ་གསུམ་དང་སྔགས་དྲུག་ཕྱག་དྲུག་གསེར་སྐྱེམས་རྒྱས་བསྡུས་ཅི་རིགས་དང་། བགེགས་གཏོར་ལྡེབ་གཅིག་ཟུར་དུ་ཡོད་པ་སྦྱར། དེ་ནས་བླ་མའི་རྣལ་འབྱོར་ཡུམ་ཆེན་སྒོམ་བཟླས་ལ། སྤྱི་ཁྱབ་ལས་རུང་ཙམ་ལ་བསྙེན་པ་ག་ཏེ་བརྒྱ་སྐོར་ཙམ་རེ་བསགས་མཐར་གཞུང་ལ་འཇུག་ནས་ཁྲོས་མའི་བསྙེན་པ་གྲངས་གསག་ཡིན་ཡང་། ཞི་བསྙེན་ལྟ་བུའི་དོད་དུ་མ་མཐའ་འབུམ་ཕྲག་བཅུ་རེ་དང་། རབ་ན་འབུམ་ཕྲག་བརྒྱ་རེ་གསག་དགོས་གསུང་སྲོལ་ཡོད་པས་དེ་ལྟར་བྱེད་ཚེ། ཐོག་མར་ཐུན་དངོས་གཞིའི་གྲངས་གསག་རྒྱུ་ག་ཏེ་མ་ལ་བྱེད། ཐུན་མཇུག་ལས་གཞུང་གྲངས་སྐབས་བསྟུན་ནས། གྲུབ་མཚམས་གཏང་རག་མཆོད་བསྟོད་སོགས་མཐར་ཆགས་སུ་བཏང་ནས་ཐུན་བཞི་བྱེད། ཕྱི་ཐུན་ལ་ཚོགས་དང་བཀའ་སྲུང་རྒྱུན་གཏོར་ཆགས་མེད་བྱ། ཐུན་གཞན་ལ་བསྙེན་བསྟོད་མཇུག་དངོས་གྲུབ་ལེན་པ་ནས་བརྩམ་སྟེ་དེ་མན་ཆད་ཚང་བར་བཏོན་པས་འཐུས། བགེགས་གཏོར་ཡང་སྔ་ཐུན་ལ་མ་གཏོགས་མ་བཏོན་ཡང་ཆད་སྐྱོན་མེད་ཀྱང་། ཐུན་རེ་རེ་བཞིན་འདོན་གྲུབ་ནའང་ཐུན་མཚམས་ཀྱི་ཉུལ་ལེ་འདུལ་བའི་ཚུལ་དུ་ཕུན་སུམ་ཚོགས་པའི་ཡན་ལག་ཡིན་གསུངས། རྒྱུན་དུ་ཚོགས་རྫས་སྣེ་ཚང་རེ་དགོས་ཤིང་། རྒྱུན་གཏོར་ཆད་བརྟན་སོགས་སྤྱི་འཐུས་བ་ལིང་ཁོ་ནས་ཆོག །ཁྲོས་མའི་བསྙེན་པ་ལ་ལས་རུང་ཙམ་ལ་འབུམ་ཕྲག་ལྔ་ཁ་སྐོང་བཅས་དང་། རྒྱས་པར་བྱེད་ན་དུས་ཀྱི་དབང་གིས་དེ་ཉིད་བཞི་འགྱུར་བྱེད་དགོས་པར་གསུངས་པས་འབུམ་ཕྲག་ཉེར་གཉིས་བྱ་བ་ལགས། བསྙེན་པ་ཁ་སྐོང་གི་སྦྱིན་སྲེག་ནི་བསྙེན་པའི་བཅུ་ཆ་ངེས་པར་དགོས་ལ་མཁའ་འགྲོ་སྒྲུབ་པའི་སྒེར་ཆོས་སུ། མེ་དང་ཚོགས་དང་གཏོར་མའི་མཆོད་པ་གལ་ཆེ་བར་གསུངས་པས་སོ། །དེ་ཡང་རང་གཞུང་དྲག་སྲེག་ཁོ་ན་ལས་འཇུག་བདེ་མེད་ཀྱང་། ཡུམ་ཀ་བདེ་ཆེན་རྒྱལ་མོ་ནི་དབྱིངས་ཀྱི་ཌཱཀྐིའི་རྗེ་མོར་ཞུགས་པས། སྐུ་གསུམ་གྱི་རྣམ་རོལ་ཞི་ཆགས་ཁྲོ་མོའི་སྣང་ཆ་ཅིར་ཡང་བསྒྱུར་པའི་ནང་ཚན་སྤྲུལ་སྐུའི་མཁའ་འགྲོ་བདུད་འདུལ་ཁྲོས་མའི་ལྷ་ཡིན་ཕྱིར། ཡུམ་ཀའི་མེ་མཆོད་ལ་མཆོད་བསྟོད་སོགས་འཛིན་གྲོལ་གཞུང་ལྟར་སྦྱར་ཞིང་ཁྲོས་མའི་བསྙེན་པས་རྫས་འབུལ་བ་ཙམ་ཁྱད་པར་ལས་གཞན་དཀྱུས་ལྟར་བྱས་པས་གྲུབ་པ་ལགས་སོ། །བསྙེན་མཇུག་དངོས་གྲུབ་ལེན་པ་ཆོ་ག་སྤྱི་འགྲེ་ལྟར་ལས་དམིགས་བསལ་གང་ཡང་མེད་དོ། ༈ །དུས་རྒྱུན་གཅོད་གཞུང་ལ་ཚོགས་སྦྱར་ཏེ་ཉིན་ཆོག་ལྟ་བུ་བྱེད་ན། ཐོག་མར་གནས་ཁང་དེར་སླེབ་མ་ཐག །ཨེ་མ་ཧོ། སངས་རྒྱས་ཀུན་འདུས་སོགས་རང་གཞུང་གསོལ་འདེབས་སྔོན་དུ་འགྲོ་བས་དབང་སྡུད་ཟིལ་གནོན་རྡོ་རྗེའི་གད་མོ་ལྟར་བྱ། དེ་ནས་བཅའ་གཤོམ་ལ། དབུས་སུ་ཁྲོས་མའི་གཏོར་མ་དང་བཀའ་དང་གཏེར་གྱི་སྲུང་མ་ཆད་བརྟན་རྣམས་ལས་བྱང་ལྟར་དང་། ཚོགས་ཀྱི་སྐོང་གཏོར་བམ་བསྐང་ཞེས་པ་དཀར་ཟླུམ་རྩེ་བཅད་རྒྱབ་མ་ཉམས་པ་མདུན་ངོས་བམ་གཟུགས་ཙོག་པུའི་པུས་སྟེང་ཐལ་མོ་གྱེན་ལ་བསྟན་ཅིང་། མགོ་དང་ཕྲག་པ་གཉིས་དང་ལག་གཉིས་བཅས་ལྔ་ལ་དམར་ཟླུམ་ཚོགས་ཀྱི་དབྱིབས་འདྲ་བ་ལྔ་ཡོད་པ་དང་། ཚོགས་ཀྱང་བམ་གཟུགས་ཚོགས་ཟླུམ་སོགས་ཅི་རིགས་ཤ་ཆང་སོགས་ཚོགས་རྫས་བཟའ་བཏུང་གི་བྱེ་བྲག་ཚང་བར་འདུ་བྱ། ཐོག་མར་ཆོས་སྤྱོད་རྒྱས་བསྡུས་སྐབས་དང་བསྟུན། གཞུང་དངོས་ཀྱི་དང་པོ། ཨེ་མ་ཧོ། སངས་རྒྱས་ཀུན་འདུས་བླ་མ་ཆོས་ཀྱི་སྐུ། །སོགས་ལན་གསུམ། འཛིན་པ་རང་གྲོལ་གདམས་པ་སྐྱབས་སེམས་གསོལ་འདེབས་བསྙེན་པའི་བར་གཞུང་ལྟར་ལ། ན་མོཿ གཏན་གྱི་སྐྱབས་གནས་སོགས་གསོལ་འདེབས་ཤྭ་ལོ་ཀ་གཅིག་པོ་གསུམ་མམ་བདུན་བརྗོད། ག་ཏེ་བརྒྱ་སྐོར་ཙམ་བཟླ། བླ་མ་ཡབ་ཡུམ་སོགས་ནས། མངོན་ཞེན་སྦྱངསཿ ཞེས་པའི་མཐར་ཡང་ག་ཏེ་ཅུང་ཟད་བཟླས་མཐར། ཌཱ་དྲིལ་བཅས། ཕཊཿ ཨ་འཐས་འཁྲུལ་སྣང་སོགས་ནས། རོ་གཅིག་ཆེན་པོའི་ངངཿབར་འདོན་ལ་ཌཱ་བཅད་དེ། ཕཊཿ གཙོ་མོའི་ཐུགས་ཀར་སོགས་བཟླས་དམིགས་སྔ་ཕྱི་གཉིས་ཀའི་མཐར་བསྙེན་སྒྲུབ་སྔགས་བཟླ། དེ་ནས་གཞུང་ལྟར་མཐར་ཆགས་སུ་མཇུག་རྫོགས་ཀྱི་བར་བཏང་། དེ་ནས་ཉམས་ལེན་གཞུང་ཤིང་ཆེན་མོ་ཚང་བར་འདོན། དེ་ནས་ཚོགས་མཆོད་ཕྲིན་ལས་གློག་ཞགས་དཀྱུས་ལྟར་ལྷག་མ་བསྔོ་ཞིང་སྨོན་ལམ་བཅས་སྲུང་མ་ལ་གཏོར་མ་སྦྱིན་པའི་བར་ཆ་ཚང་མཐར་འདི་མཚམས་བཀའ་དང་གཏེར་སྲུང་གི་རྒྱུན་གཏོར་སྦྱར་དགོས། ཆད་བརྟན་སོགས་ཚོགས་མཆོད་ཀྱི་མཇུག་ཏུ་མཐའ་སྡུད་རྗེས་ཆོག་སྦྱར་བས་རྒྱས་པའི་ལུགས་ལྟར་གྲུབ་པ་ལགས། ༈ འབྲིང་པོར་སྤྱིར་དེ་ལྟར་ལ་ཉམས་ལེན་གཞུང་ཤིང་ཚབ་ཏུ་གདན་ཐོག་གཅིག་མ་དང་། ༈ བསྡུས་པ་ལ་འཛིན་གྲོལ་གདམས་པ་ཡང་མི་དགོས་ཤིང་། ཉམས་ལེན་སྤར་བཅང་ཁོ་ནའི་མཇུག་ཏུ་ཚོགས་མཆོད་སྦྱར་བ་ཙམ་གྱི་ཁྱད་པར་ལས་མེད། ༈ དྲག་གཅོད་མཐའ་གཏད་སོགས་ལ། འཛིན་གྲོལ་གདམས་པ་སྔོན་དུ་འགྲོ་བས། གདན་གཅིག་གམ་ཉམས་ལེན་སྤར་བཅང་མ་གང་ཡིན་གྱི་དམར་འགྱེད་ཀྱི་ལྷག་མའི་མཇུག་ཏུ་སྦྱར་དགོས། རྗེས་ལ་དེ་མན་རྗེས་ཆོག་ཚུལ་དུ་བྱའོ། ༈ །དྲག་སྲེག་ཀྱང་གཞུང་རྒྱས་འབྲིང་བསྡུས་གསུམ་གང་རུང་མཇུག་ཏུ་སྦྱར་བ་ལགས། ༈ གཤིན་པོ་རྗེས་འཛིན་སྐབས་ཚོགས་རྒྱས་པ་ཉིན་ཆོག་བྱེད་ན་གོང་དུ་བཤད་པ་ལྟར་ཆ་ཚང་བའི་མཇུག་ཏུ་སྦྱར་བའམ། བསྡུས་པ་བྱེད་ན་ཉམས་ལེན་སྤར་བཅང་ལ་སྦྱར་བས་ཆོག །ལར་ཕྱག་བཞེས་རྗེས་བཅད་ཁྲིགས་ཆགས་ཁོ་ན་དགོས་པའི་ཆོ་ག་གཞན་འགྲེ་ལྟར་བྱ་མི་དགོས་མོད། ཀུ་སུ་ལུའི་ཉམས་ལེན་ལྟ་དགོངས་དང་དམིགས་པ་གཙོ་ཆེ་བའི་ལུགས་གཉན་ཁྲོད་སོགས་སུ་གཏད་མེད་བྱུང་རྒྱལ་སྨྱོན་པ་ལྟ་བུའི་ཚུལ་གྱིས་ཉམས་སུ་ལེན་རུང་ཡིན་ཞེས་གསུང་སྲོལ་ཡོད་པས་གྲོང་ཆོག་སོགས་ལ་ཧ་ཅང་ཁྱབ་བདལ་དུ་འདོན་སྲོལ་ཡང་མེད། སླར་སྨྲས་པ། གསང་ཆེན་གསང་བའི་མཐར་ཐུག་བླ་ན་མེད། །ཌཱཀྐིའི་ཐུགས་ཐིག་འཛིན་གྲོལ་གདམས་པ་འདི། །ལས་སྐལ་ལྡན་པའི་ལམ་གྱི་བོགས་འབྱིན་ལས། །གྲོང་གཅོད་ཕལ་གྱི་སྤྱོད་ཡུལ་མ་ལགས་ཀྱང་། །དེང་སང་གདུལ་བྱ་དུས་བབས་རྟེན་འབྲེལ་གྱིས། །ཐོས་གྲོལ་གདམས་པ་འདི་ཀོ་རླུང་ལྟར་དུ། །ཡོངས་ལ་གྲགས་པ་རྒྱལ་བའི་ཕྲིན་ལས་ཕྱིར། །འབྲེལ་ཚད་དོན་ལྡན་གྱུར་རྣམས་ཡི་རང་སྐྱེས། །དེ་ལྟའི་ཚུལ་འདིར་ཉམས་བཞེས་ལྷུར་མཛད་པའི། །མཆོག་གི་ནིརྨཱ་ཀཱ་དེའི་བཞེད་སྐོང་དུ། །རྨོངས་རྟུལ་གདོལ་སྤྱོད་མཁན་པོ་ནཱ་ཐའི་མིང་། །གང་དེས་ས་བཅད་མ་སྟོང་ཙམ་དུ་བྲིས། །དེ་ལས་ཐོབ་པའི་རྣམ་དཀར་མཆིས་སྲིད་ན། །འགྲོ་ཀུན་སངས་རྒྱས་འཐོབ་པའི་རྒྱུ་རུ་བསྔོ། །གཞན་དུ་རྨོངས་བློའི་ནོངས་པ་མཆིས་སོ་ཅོག །ཡེ་ཤེས་སྤྱན་ལྡན་རྣམས་ལ་བཟོད་པར་གསོལ། །དགེའོ། །བཀྲ་ཤིས།། །།