DKYD-DZINDROL-004
སྡོམ་གསུམ་བརྒྱུད་པའི་གསོལ་འདེབས་སྙིང་པོར་བསྡུས་པ་དད་པའི་གསོས་སྨན། ན་མོ་གུ་རུ་རཏྣ་ཡ། ཐུབ་དབང་ཤཱ་རིའི་བུ་དང་སྒྲ་གཅན་འཛིན། །བྲམ་ཟེའི་བཙུན་པ་ཀླུ་སྒྲུབ་ཡབ་སྲས་དང་། །བཀའ་དྲིན་ཟླ་མེད་ཞི་འཚོ་བླ་ཆེན་སོགས། །སོ་ཐར་བརྒྱུད་པའི་བླ་མར་གསོལ་བ་འདེབས། །རྒྱལ་སྲས་འཇམ་དཔལ་དབྱངས་དང་མ་ཕམ་མགོན། །ཀླུ་སྒྲུབ་ཞི་བ་ལྷ་དང་ཐོགས་མེད་མཆེད། །ཨ་ཏི་ཤ་དང་ཀུན་མཁྱེན་ཆོས་རྗེ་སོགས། །བྱང་སེམས་བརྒྱུད་པའི་བླ་མར་གསོལ༴ ཀུན་བཟང་རིགས་ལྔ་རིགས་གསུམ་རྒྱལ་པོ་ཛཿ དགའ་རབ་ཤྲཱི་སེང་པད་འབྱུང་རིག་འཛིན་བརྒྱད། །རྨ་གཉགས་གནུབས་ཟུར་གཏེར་སྟོན་བརྒྱ་རྩ་སོགས། །གསང་སྔགས་བརྒྱུད་པའི་བླ་མར་གསོལ༴ བརྒྱུད་སྲོལ་ཀུན་འདུས་གཏེར་ཆེན་བླ་མ་དང་། །དྷརྨ་ཤྲཱི་རྩ་བའི་བླ་མ་སོགས། །བཀའ་དྲིན་ཟླ་མེད་གསེར་རིའི་ཕྲེང་བཟང་ལ། །མི་ཕྱེད་སྙིང་ནས་གུས་པས་གསོལ་བ་འདེབས། ༼།སྤྱི་དང་འདྲེན་དང་དབང་བསྐུར་ཉམས་ཆག་སྐོང་། །མན་ངག་སྟོན་དང་ཤེས་རྒྱུད་འགྲོལ་མཛད་པའི། །རྩ་བའི་བླ་མ་རྣམས་ལ་གསོལ་བ་འདེབས། །ཐུགས་ཡིད་གཅིག་ཏུ་འདྲེས་པར་བྱིན་གྱིས་རློབས། །ཅེས་པདྨ་བི་ཛས་སོ། །ཚེ་རབས་ཕྲེང་བར་དམ་པའི་མགོན་རྣམས་ཀྱིས། །རྗེས་བཟུང་ཐེག་པ་ཆེན་པོའི་རིགས་སད་ནས། །སྡོམ་པ་གསུམ་གྱི་བཅས་ཁྲིམས་རྣམ་པར་དག །རང་གཞན་དོན་གཉིས་འགྲུབ་པར་བྱིན་གྱིས་རློབས། །བསྟན་འཛིན་མཆོག་རྣམས་ཞབས་བརྟན་བཤད་སྒྲུབ་མངའ། །ཚུལ་གནས་ཐོས་བསམ་སྒོམ་པའི་བྱ་བ་འཕེལ། །བསླབ་གསུམ་རྒྱན་མཛེས་བསྡུ་བཞིའི་ཕྲིན་ལས་ཀྱིས། །ཐུབ་བསྟན་ཕྱོགས་བཅུར་རྒྱས་པའི་བཀྲ་ཤིས་ཤོག །ཅེས་པའང་སྔགས་བཙུན་ཟེ་ཆེན་པ་འགྱུར་མེད་པདྨ་རྣམ་རྒྱལ་གྱིས་གསོལ་བ་བཏབ་པ་དགེ །མངྒ་ལཾ།། །།
