JKCL-KABUM-08-NYA-011-024-wylie
<div class="wylie-content"
!_zhal gdams nyung ngu phan bde'i sa bon ces bya ba bzhugs so/__/dpal ldan bla ma'i zhabs la phyag 'tshal nas/__/grogs mchog gang gis nan gyis bskul ba yi/__/gdams par rim pa shin tu nyung ngu ni/__/bka' dang bstan bcos bla ma'i zhal lung bzhin/__/'chad la gang thugs dgyes pa bskyed pa'i rigs/__/shin tu rnyed dka'i rten 'di don che yang /__/skad cig mi rtag 'jig par 'gyur bas na/__/da lta nyid du snying po blangs dgos te/__/nam zhig stor blag chen po 'byung ta re/__/dge sdig las rnams chen pos smos ci dgos/__/sa bon phra yang a shwa ka bzhin du/__/las 'phel 'bras bu mi bzad bskyed pas na/__/las 'bras phra zhib blang dor ma nor gces/__/srid pa'i gnas 'dir nyes brgya skyed byed cing /__/da lta bde yang srog 'phrog kim+ba dang /__/mtshungs pa'i 'khor bde ji snyed thams cad la/__/ma chags 'phags pa'i rigs su gnas par mdzod/__/rang nyid thar par 'dod pa'i blo ngan des/__/dman lam lhung zhing byang chub spyod pa'i gegs/__/gtan bde'i go 'phang sgrub par rgya chung bas/__/theg chen lam la 'jug pa shin tu gces/__/rgyal sras lam gyi bgrod pa gcig pu ni/__/rin chen byang chub sems las gzhan med pas/__/mkha' mnyam sems can byang chen 'god pa'i slad/__/sgo gsum dge ba'i bya bar rtag tu brtson/__/gzhan don sems pas rang don zhor la 'grub/__/g.yo sgyu spangs shing lhag pa'i bsam pa yis/__/sems can gzhan gyi don du bdag bkol na/__/nam zhig chos kyi rgyal po'i go 'phang thob/__/dwang 'dod yid ches dad mos drag po yis/__/rjes dran drug po rtag tu yid la byed/__/thub gsung dri med mdo sde rin po cher/__/yang yang blta ba'i skal bzang bskyed pa gces/__/chos kyi snying po zab mo rdo rje'i theg/__smin grol lam bzang 'phrad pa da res tsam/__/yin phyir slob dpon dam tshig srog bzhin srungs/__/bskyed rdzogs rim gnyis zab mor rtag tu brtson/__/de yi yang snying dus gsum sangs rgyas kyi/__/dgongs pa gcig tu rab bsngags sems nyid kyi/__/gnas lugs zab mo bla ma'i byin rlabs kyis/__/rtogs phyir bsags sbyong bla mar gsol 'debs gces/__/rang sems ma bcos ji bzhin bzhag pa na/__/gsal stong zung 'jug spros pa kun bral 'di/__/rang bzhin lta ba'i ming du 'dogs pas na/__/spros pa'i gzeb tu nam yang ma 'chings shig/__de la dmigs gtad 'dzin pas ci byar med/__/bsgom bya sgom byed gnyis 'dzin kun thongs la/__/tha mal yengs shing phyal bar ma shor bar/__/chos nyid gnyug ma'i rang 'gros ngang la zhog/__zhog ces bya ba'ang tshig gi bla dwags tsam/__/mtshon dpe phyogs gcig nam mkha'i rang bzhin yang /__/bsam par mi nus brjod pa kun bral na/__/gnyug ma'i gnas lugs bsam par ga la nus/__/dbyings dang ye shes 'du 'bral med pa dang /__/rtsol bcas sgom pa'i ngal dub kyis ma reg/__/'bras bu gzhan nas smon pa med pa yi/__/sku gsum lhun grub 'od gsal chen por bzhugs/__/lta ba mi 'gyur ri bo cog bzhag dang /__/sgom pa yengs med rgya mtsho cog bzhag dang /__/spyod pa ma 'chings snang ba cog ger bzhag/__'bras bu ma bcos rig pa cog bzhag gnad/__/de ltar goms pas lam gyi bogs 'don ni/__/snying po'i rang gdangs dbang po'i sgor 'dren nas/__/phyi nang mi 'gul sgron me'i gnad bsten pas/__/snang bzhi'i rtsal rdzogs gdod ma'i dbyings su grol/__/goms pa dman pas tshe 'dir ma grol na/__/'chi kha'i gdams pa 'pho ba'i rim pa dang /__/chos nyid lam gyi bar do'i gnas lugs la/__/da lta thos bsam goms 'dris shin tu gces/__/der ma grol na srid pa'i bar do la/__/lha dang bla ma gdams ngag dran pa'i mod/__/rang bzhin sprul pa'i zhing du skyes byas nas/__/lam gyi lhag ma myur du bgrod par 'gyur/__/mdor na tshul gnas nges 'byung byang sems dang /__/yang dag lta dang dad mos dam tshig dag/__dge ba ci byas dam pa gsum gyis zin/__/des ni nges par byang chen mchog thob nges/__/de ltar gdams pa rang gis nyams ma longs/__/gzhan la 'doms pa ne tso'i smra dang mtshungs/__/'on kyang blo gsal don dam chos mchog la/__/rab tu spro bas rmongs gzugs gyi na ba/__/chos kyi blo gros zhes byas springs pa 'dis/__/thar pa'i sa bon 'debs pa'i gsos gyur nas/__/tshul bzhin bslabs pas srid dang zhi las grol/__/mi gnas mya ngan 'das pa'i go 'phang thob/__/rang gzhan don gnyis mtha' ru phyin par shog/__sarba dza ga taM//___//
