JKCL-KABUM-08-NYA-010-015-wylie
<div class="wylie-content"
!_rang gi slob bu mchog gsum skyabs la spring yig bzhugs so/__/rje dran pas gdung sel bla ma la/__/yid mos gus gdung bas gsol ba 'debs/__/bu mchog gsum skyabs la thugs rjes zungs/__/thar pa'i lam sna drang du gsol/__/mi nga la dag snang cher bskyed pa'i/__/mchog gi ming can slob ma khyod/__/dad pa dang dam tshig sa gzhi la/__/mos gus kyi dpag bsam rab rgyas pas/__/byin rlabs kyi 'bras bzang thob pa de/__/dkor rgan nga byin chen ma lags kyang /__/pha brgyud ldan bla ma'i thugs rje yin/__/chos kun gyi sngon 'gror sems bskyed dang /__/dngos dmigs med ngang la blo bzhag dang /__/rjes bsngo ba smon lam byed pa 'di/__/byang chub sems dpa'i khyad chos yin/__/'khor ba'i nyes dmigs dran pa yis/__/rgyu 'bras 'jug ldog byed pa dang /__/dal 'byor rnyed dka'i 'du shes bskyed/__/de yun du mi rtag 'chi ba dran/__/dam chos la brtson 'grus bskyed pa dang /__/srid 'khor ba'i gnas la nges 'byung mdzod/__/skyabs kun 'dus rtsa ba'i bla ma de/__/sangs rgyas yin par thag bcad nas/__/mos gus la ltem rkyang ma byed na/__/de kho nas mchog gi dngos grub thob/__/gzhi bde gshegs snying po 'pho 'gyur med/__/ka nas dag pa'i chos nyid la/__/gshis spangs blang bsal bzhag med lags kyang /__/ma 'dres shan 'byed shin tu gces/__/kun rnam kyi gsal cha rkyen la ltos/__/skabs res 'ga' dwangs gsal 'phel 'grib can/__/sems brgyal sogs skabs su de 'gag la/__/mtha' dbus dang bral ba'i rig pa 'di/__/rkyen bzang ngan gyis brdzi ba mi nus shing /__/nang du bsdam pa ltar mi dgos/__/rig pa rgya grol phyogs med yin/__/had de ba la zang thal ler/__/smra bsam brjod bral gyi gnas lugs yin/__/nam mkha' lta bu rgya re yangs/__/nyi zla lta bu 'od gsal ba/__/ye shes de spros mtshan dngos po dang /__/spros med kyi chos las 'das pa la/__/rang byung gi rig pa zhes su grags/__/bu blo yi chos kyis ma 'chings shig/__'ching na srin bu'i kha chu bzhin/__/rang gis rang bcings grol dus med/__/rnam rtog bzang ngan gang shar ba/__/byung yang chos kyi dbyings las byung /__/gnas kyang chos kyi dbyings la gnas/__/thim yang chos kyi klong du thim/__/mnyam nyid kyi chos la bzang ngan med/__/bzang ngan gyi gdam ka bskyur la thongs/__/mkhar sprin dengs bzhin rang grol zhog/__grol byed gnyen po gzhan mi dgos/__/rtog tshogs du ma ro gcig 'dres/__/ro gcig ngang la 'dzin pa med/__/mdor bsdu na gzung 'dzin gyis ma bslad par/__/chos nyid rig pa'i gshis lugs 'di/__/dus gsum rgyun chad med pa la/__/bu yengs par ma shor phyam brdal zhog/__gu yangs blo bde chen por zhog/__zhog ces bya ba tshig yin te/__/don spyi la bzhag bya gzhag byed bral/__/bsgom 'dod kyi zhen pa'i 'ching ba shigs/__/dbyings stong pa'i ngo bo chos kyi sku/__/gdangs gsal cha longs spyod rdzogs pa'i sku/__/rtsal ma 'gag shar ba sprul pa'i sku/__/de gsum du dbye yang don dbyer med/__/da lta yi rig pa sal le ba/__/'di la sku gsum tshang ba yin/__/'di ma bcos ma yengs dang ldan na/__/de goms pas skye shi bar do yi/__/'khrul rtog snang thams cad dbyings su thim/__/phyi yul snang phyi ru mi bzung zhing /__/rig pa nang du ma bcos pa/__/snang sems gnyis med chen po shar/__/de rtogs pas cir snang kun bzang rgyan/__/rig pa'i cho 'phrul chen por go__/go bya go byed gnyis su med/__/gnyis med kyi ngang la gang dgar zhog/__'khor ba 'di gdod nas rnam par dag/__'khrul sems g.ya' dris gos pa 'di/__/bsal ba'i phyir du bsags sbyang bya/__/blo chos su 'gro bar nges 'byung bskyed/__/chos lam du 'gro phyir byams snying rje/__/byang chub sems mchog bsgom par bya/__/lam 'khrul pa zhi phyir stong nyid bsgom/__/'khrul ye shes dag cing zung 'jug gi__/ye shes rgyud la skye ba'i phyir/__/rdo rje theg pa'i rim gnyis bsgom/__/de las kyang 'od gsal rdzogs pa che'i/__/ye shes rang la gzhir rdzogs de/__/rje bla ma'i drin gyis ngo sprod la/__/bus 'dzin pas ma bslad rang sar zhog/__rig bzo med pa'i rang gsal 'di/__/gnyug ma'i dran rig yin mod kyang /__/kun gzhi'i rnam shes gsal cha dang /__/'khor 'das gnyis su 'dzin pa 'khrul/__/don dam gyi bden pa gcig pu lags/__/khyod kyi thun min thun mongs gi__//rtogs myong go ba skyon med gsungs/__/mchog 'dzin dang zhen pa ma byed cig/__gnyis snang dbyings su ma nub bar/__/rgyu 'bras kyi spang blang zhib mor gyis/__/bla ma la mos gus bskyed cig dang /__/dkar po'i tshes kyi zla ba bzhin/__/nyams rtogs je bas je bzang 'gro/__/chos 'dus byas kyi dge tshogs rgya cher bsgrubs/__/de la bsngo bas rgyas btab yod/__/lus me yi tshig pa'i sdug bsngal des/__/khyod kyi las sgrib rgya cher dag/__de bla ma dkon mchog gi thugs rje yin/__/dga' ba bsgom la gsol ba thob/__/rnal 'byor ma yi bsgom bzlas dang /__/tshes bcu'i mchod pa ma chag ang /__/khyod 'dir phyogs slebs par ma gyur kyang /__/khyod dang nga gnyis 'du 'bral med/__/des na e 'byor blta mi dgos/__/tshe thar stong gcig dge ba dang /__/dam tshig gtsang ba'i bden stobs kyis/__/nged kyang ring du 'tsho bar smon/__/tshul khrims kyi sa gzhi gtsang ma la/__/byang chub sems kyi dpag bsam 'khrungs/__/mchog thun gyi 'bras bu bzang po des/__/rang gzhan kun rtag tu bkra shis shog/__dngos 'bul 'byor lan zur du yod/__/chos kyi blo gros ngo mas phul/__sarba mang+ga laM//___//
