JKCL-KABUM-07-JA-005-wylie
<div class="wylie-content"
@#/__/bla ma rin 'byung dang thang rgyal g.yang skyabs sbrag sgrub kyi 'don zin phywa g.yang 'gugs pa'i lcags kyu ces bya ba bzhugs so/__/
oM swasti/__bskal mang sngon nas thugs bskyed rgya mtsho las/__/'thon pa'i bla ma rin chen 'byung ldan dang /__rtsa gsum nor lha'i tshogs la gus btud nas/__/'dod dgu'i dpal 'byor spel ba'i cho ga dbye/__/de la 'dir bla ma rin 'byung gi byin rlabs dang /__rje grub thob chen po'i g.yang 'bod kyis lung legs par nos nas/__nyi ma byang bgrod kyi yar ngo'i gza' skar tshes dus bzang por 'dzug par bya ste/__gong du bla ma rin 'byung gi snang brnyan sogs nor lha'i sku bris 'bur yod na bshams shing /__mchod pa'i maN+Dal tshom bu lnga pa/__nyer spyod brgya rtsa sogs dang /__bkra shis rdzas rtags/__sna bdun sogs tshogs bsags pa gal che bas mchod pa ci 'byor gang rgyas spros bcas su bshams/__stegs bu khebs ldan gyi steng du 'bru dkar gyi g.yung drung ris dang /__dga' 'khyil gyis mtshan par g.yang bshos rin po che 'bar ba/__g.yang sgye g.yang phor/__g.yang rdzas sogs phywa g.yang chags pa'i rdzas ci 'byor bkram shing /__de'i mdun du dkar mngar skyems phud/__bza' bca'i rigs sna tshogs pa dang /__nyer spyod rnams bshams/__cho ga'i las rim dngos la/__bdag bskyed dang /__mdun rten bskyed pa'o/__/dang po ni/__ma nam mkha' dang mnyam pa'i sems can thams cad bla ma sangs rgyas rin po che la skyabs su mchi'o/__/sangs rgyas chos dang dge 'dun rnams la skyabs su mchi'o/__/bla ma yi dam mkha' 'gro'i tshogs la skyabs su mchi'o/__/rang sems stong gsal chos kyi sku la skyabs su mchi'o/__/zhes ci nus dang /__sangs rgyas chos tshogs sogs lan gsum gyis skyabs sems dang /__sems can thams cad bde ba dang sogs tshad med bzhi bsgom/__oM swa b+hA wa sogs/__stong pa'i ngang las rang nyid skad cig gis 'phags pa thugs rje chen po 'gro 'dul yid bzhin nor bu sku mdog dkar gsal zhal gcig phyag bzhi pa/__phyag dang po gnyis thugs kar thal mo sbyar ba'i bar du yid bzhin nor bu dang g.yas 'og mas shel phreng dang /__g.yon 'og mas me tog pad+ma dkar po bsnams pa/__ri dwags kriSh+Na sA ra'i pags pas nu ma g.yon pa bkab cing dar dang rin po che'i rgyan thams cad kyis brgyan pa/__pad+ma dang zla ba'i gdan la zhabs rdo rje'i skyil mo krung gis bzhugs pa'i skur gyur par bsam la/__oM ma Ni pad+me hU~M/__zhes ci nus bzlas mthar/__'phags pa thugs rje chen pos bdag dang sems can thams cad la 'dod rgu'i 'byor pa zad mi shes pa'i dngos grub ma lus pa stsal du gsol/__zhes gsol ba gdab/__/gnyis pa mdun rten bskyed pa la/__rten bskyed pa/__tshogs bsags pa/__gsol ba gdab pa/__phywa g.yang bsdu ba/__sngags bzla ba/__g.yang len/__bla ma'i rnal 'byor gyi bsgrub pa dang las sbyor/__g.yang chog gi rjes kyi rim pa'o/__/dang po ni mdun gyi rten la dmigs te/__oM swa b+hA wa sogs nas/__stong pa'i ngang las rang gnas pa'i sa phyogs 'di nyid baiDUR+Ya'i sa gzhi yangs shing rgya che ba'i steng du rin po che sna tshogs kyi khri lhun stug pa/__bkod pa legs pa/__'od chags pa/__rgya che zhing dpang mtho ba/__de'i steng du sna tshogs pad+ma'i sdong bu 'dab ma brgyad pa/__de'i steng du nyi ma'i dkyil 'khor/__de'i steng du zla ba'i dkyil 'khor dang bcas pa gdan lnga brtsegs kyi steng du phywa g.yang gi rten rnams ngo bo rtsa ba'i bla ma dam pa dang dbyer med pa'i rnam pa bcom ldan 'das yon tan rin chen 'byung ldan sku mdog gser gtso ma lta bu zhal gcig phyag gnyis pa/__phyag g.yon mnyam gzhag gi steng na dgos 'dod thams cad 'byung ba'i nor bu rin po che dbang gi rgyal po bsnams pa/__/g.yas pa mchog sbyin gyi phyag rgyas gdul bya rnams la ci 'dod ster ba/__zhabs rdo rje'i skyil mo krung gis bzhugs pa/__rin po che'i dbu rgyan la sogs pa rgyan thams cad kyis brgyan pa/__dar sna tshogs kyi na bza' can/__spyi gtsug sems can thams cad kyis blta bar mi mngon pa la sogs pa mtshan bzang po sum cu rtsa gnyis dang /__sen mo zangs kyi mdog ltar dmar ba la sogs pa dpe byad bzang po brgyad cu'i spras pa/__'od zer bye ba 'gyed pa/__de'i mdun nas brtsam ste pad zla'i gdan la/__/byang chub sems dpa' nam mkha' mdzod sku mdog ser po rin po che'i rgyan dang dar gyi na bza' can/__phyag gnyis nam mkha' mdzod kyi phyag rgya mdzad pa/__rgyal po chen po rnam mang thos sras sku mdog gser gtso ma'i mdog can/__rgyal mtshan dang ne'u le 'dzin cing rin po che'i prog zhu dang /__rgyan sna tshogs pas brgyan cing pad zla seng ge'i steng na rol pa'i stabs kyis bzhugs pa/__'khor gnod sbyin rta bdag brgyad kyis bskor ba/__AR+Ya dzam b+ha la dkar po 'brug la zhon zhing /__g.yas kha T+wA~M rtse gsum dang /__g.yon be con 'dzin pa/__dzam+b+ha la ser po g.yas bi dza pu ra ka dang /__g.yon ne'u le 'dzin cing zhabs gnyis dung dang pad+ma'i gter mnan ba/__smugs 'dzin nag po mi'u thung gi gzugs can gcer bu rna ba ma phug pa phyag g.yas thod khrag__/g.yon ne'u le 'dzin pa/__zhabs g.yas bkyang gis nor bdag ser po mnan pa/__smugs 'dzin dmar po zhal gsum phyag drug pa/__g.yas dkar g.yon sngo/__dbus dmar ba/__phyag dang po gnyis kyis nor bu dang thod pa/__bar pa gnyis kyis lcags kyu dang zhags pa/__tha ma gnyis kyis ne'u le btsir ba/__zhabs gnyis gnod sbyin nor bu skyugs pa gnyis mnan pa/__dzam lha ljang gu g.yas mchog sbyin gyis shing tog dang /__g.yon ne'u le 'dzin pa/__lha mo nor rgyun ma zhal gcig phyag gnyis g.yas mchog sbyin dang /__g.yon gter bum 'bras kyi snye ma bcas bsnams pa/__dar sngon po'i sha 'gags/__dkar po'i stod g.yogs/__kha dog sna tshogs pa'i smad g.yogs sogs rin po che'i rgyan gyis brgyan cing zhabs rdo rje'i skyil krung gis bzhugs pa/__lha mo dpal chen mo sku mdog ljang gu/__g.yas nor bus mtshan pa'i pad+ma dang /__g.yon skyabs sbyin mdzad pa/__gter gyi bum pa dang /__pad zla seng+ge'i gdan la 'khor grogs mo brgyad kyis bskor nas bzhugs pa/__mgon dkar yid bzhin nor bu sku mdog gangs ri ltar dkar ba zhal gcig phyag drug pa/__g.yas gsum gyis gri gug dang nor bu DA ma ru/__g.yon gsum na thod pa nor bus gang ba dang /__rtse gsum zhags pa rnams 'dzin cing zhabs gnyis mnyam pa'i stabs kyis bgegs rgyal gyi steng du 'gying ba/__lha chen tshogs kyi bdag po sku mdog dkar po glang po che'i gdong pa can/__phyag bzhi'i dang po gnyis kyis la phug dang /__dgra s+t+wa/__gnyis pas thod pa nor bus gang ba dang /__rtse gsum 'dzin pa/__gsus khyim che zhing mi'u thung gi gzugs can zla tshes kyi cod pan dang /__rin po che'i rgyan gyis brgyan cing /__dar sna tshogs kyi na bza' gsol ba/__byi ba sngon po'i gdan la phyed skyil gyis bzhugs pa/__lha mo dbyu gu mched gsum sku mdog mthing dmar ljang ba zhal gcig phyag gnyis/__g.yas nor bu rin po che dang /__g.yon gter gyi bum pa rin chen 'bar bas mtshan pa pad zla'i gdan sum bsgrigs kyi steng du zhabs g.yas bskum g.yon brkyang gis bzhugs pa zhi 'dzum mdzes pa'i lha mo'i gzugs can/__dar gyi stod g.yogs dang /__lhab lhub/__rin po che dang rus pa'i rgyan gyis spras pa/__gnod sbyin chen po a pa ra dzI ta sku mdog dkar po lcags kyu dang bum pa 'dzin pa/__AR+Ya re man+ta sku mdog ser po phyag na gser gyi ral gri dang ne'u le 'dzin cing /__rta mchog sngon po la chibs pa/__lha sman bkra shis tshe ring ma sku mdog dkar mo/__g.yas rdo rje dang /__mda' dar/__g.yon tshe bum 'dzin pa/__dar dang rin po che'i rgyan gyis brgyan cing /__seng ge dkar mo rgyan ldan gyi steng du 'gyings shing /__'khor sman btsun mched bzhis bskor ba/__klu rgyal chen po nor rgyas sku mdog dkar po stod lha yi rnam pa smad sbrul mjug 'khyil pa phyag gnyis thugs kar thal mo sbyar ba'i bar du gter bum nor bus gang ba 'dzin cing /__sbrul mgo'i gdeng ka bdun dang ldan pa/__gter srung rma rgyal spom ra sku mdog dkar po dung khrab dang 'khor gsum gsol ba/__g.yas mdung dar/__g.yon nor bu dbang gi rgyal po thugs kar bsnams pa/__lha rta dkar po la zhon pa/__de dag gi mtha' skor dang bar mtshams rnams su/__rtsa brgyud kyi bla ma/__yi dam dpa' bo mkha' 'gro/__chos skyong nor lha gter bdag gi tshogs dpag tu med pas bskor ba mngon sum bzhin du bzhugs par gyur/__de thams cad kyang sku mdog ser po mdangs dang 'od zer ser po dpag tu med pa 'phro ba'i sgo nas bdag dang sems can thams cad kyi tshe dang bsod nams/__dpal dang 'byor pa/__dbang phyug dang shes rab/__snyan grags dang phrin las la sogs pa legs pa'i yon tan thams cad gong nas gong du 'phel zhing rgyas pa'i las mdzad pa'o/__/ces brjod cing bsam mo/__/gnyis pa tshogs bsags pa la bsdus pa dang /__rgyas pa'o/__/dang po ni/__gang gi drin gyis bde chen nyid/__/skad cig nyid la 'char ba gang /__/bla ma rin chen lta bu'i sku/__/rdo rje can zhabs pad la 'dud/__/sangs rgyas kun gyi rang bzhin sku/__/slob dpon la ni bdag skyabs mchi/__/dang po me tog phog pa yi/__/dkyil 'khor lha tshogs rnams la 'dud/__/rin chen rdo rje 'bar ba'i me/__/mnyam nyid ye shes ngo bo nyid/__/mchog sbyin chen po'i phyag rgya can/__/phyag 'tshal rin chen 'byung ldan la/__/oM gu ru rat+na saM b+ha wa maN+Dal la sa pa ri wA ra ar+g+haM sogs nas/__shab+da AHhU~M/__oM gu ru rat+na saM b+ha wa ma hA maN+Dal la sa pa ri wA ra sarba a mr-i ta bo d+hi tsit+ta a ho ma hA su kha AHhU~M gis mchod la/__/dkon mchog gsum la bdag skyabs mchi/__/sogs lan gsum gyi mthar/__maN+Dal/__oM badz+ra b+hU mi sogs nas/__ma tshang ba med pa dang rang gi lus longs spyod dus gsum du bsags pa'i dge ba'i rtsa ba thams cad kyang ltos med du 'bul bar bgyi'o/__/khyad par du rang gi 'dod pa'i longs spyod kyi dngos po de dang de/__re ltos med par yang dang yang du dbul bar bgyi'o/__/thugs rjes 'gro ba'i don du bzhes su gsol/__bzhes nas byin gyis brlab tu gsol/__de lta bu lan gsum mam lnga la sogs grangs mang du 'bul lo/__/bsdu na/__maN+Dal gling bzhi ri rab nyi zla zung gcig lha mi'i dpal 'byor phun sum tshogs pa ma tshang ba med pa sogs nas gong bzhin no/__/tshogs bsags rgyas par spro na/__paN chen nam mkha' dpal bzang gi lam 'bras bla mchod dang /__lam zab gang rung la sbyar ba ri tho yig ltar mchod phreng rjes la maN+Dal grangs bsogs dang /__yan lag phyi ma rnams bya'o/__/gsum pa gsol gdab ni/__phyogs bcu dus gsum gyi sogs nas/__byin gyis brlab tu gsol/__zhes snying thag pa nas gsol ba gdab bo/__/kun mkhyen gyi mdzad pa'i bstod pa sogs 'don/__/bzhi pa phywa g.yang bsdu ba ni/__spos rol dang dbyangs kyi 'gyur ba snyan pos/__kyai/__dang po g.yang len gar srid na/__/sngon gyi bskal pa'i dang po la/__/kha ba can gyi rgyal khams su/__/spyan ras gzigs kyi sprul pa las/__/spre'u byang chub sems dpa' byung /__/jo mo sgrol ma'i sprul pa las/__/brag srin nag mo bya ba byung /__/de gnyis thabs shes 'phrad pa las/__/gdong dmar mi rnams thams cad byung /__/mi rnams phongs pas mnar ba las/__/spre'u'i rgyal po yar gshegs te/__/po ta la yi rtse mo na/__/spyan ras gzigs dbang bzhugs pa la/__/spre'u'i rgyal pos 'di skad zhus/__kye ma las kyi 'bras bu smin/__/dbon sras mang po 'phel ba na/__/dran pa gsal ba lha dang 'dra/__/gdug rtsub che ba lha min 'dra/__/gos med gcer bu dud 'gro 'dra/__/bkres skom sdug bsngal yi dwags 'dra/__/shin tu sdug bsngal dmyal ba 'dra/__/rigs drug sdug bsngal ngad pa tsha/__/'di la las thabs ci zhig bya/__/de skad zhus pas bka' stsal pa/__/spre'u'i rgyal po legs par nyon/__/khyod kyi bu dang tsha bo rnams/__/gdong dmar srin po yin zer te/__/kha ba can gyi zhing khams su/__/byin gyis brlabs pa'i sprul pa yin/__/zas la 'bras bu sna tshogs zo/__/skom du 'byung ba chu la 'thung /__/gos su lha yi na bza' gtod/__/skabs su g.yang 'gugs g.yang len bya/__/spyan ras gzigs kyis de skad gsungs/__/de nas spre'u'i rgyal po des/__/sngags 'chang rgyal po spyan drangs nas/__/lha gzhi dkar po'i gdan steng du/__/dkon mchog mchod pa rgya chen bshams/__/rgod sgro mda' dar dkar po la/__/dngul dkar me long btags pas g.yab/__/khu ye brjod cing 'o dod bos/__/thugs rje chen po'i byin rlabs dang /__/sngags 'chang bdag gi smre sngags dang /__/dbu nag bod kyi bsod nams las/__/'od zer sna lnga steng du 'phros/__/tshangs pa dung thod dkar por phog__/lha yi longs spyod ldan pa las/__/'od rlangs dkar po gcig tu sprul/__/lha yi longs spyod bod du 'ong /__/bod lha khams 'dra ba de nas srid/__/'od zer 'og tu 'phros pa las/__/klu rgyal gtsug na rin chen phog__/klu yi longs spyod 'phan po las/__/klu yi longs spyod bod du 'ong /__/bod klu las grol ba de nas srid/__/'od zer bar snang khams su 'phros/__/gnyan gyi rgyal po chen por phog__/gnyan gyi longs spyod bod du 'ong /__/bod 'grol thabs gnyan pa de nas srid/__/'od zer shar phyogs gling du 'phros/__/yul 'khor srung gi rgyal po la/__/longs spyod ldan zhing skye ba bzang /__/shar phyogs g.yang rnams bod du 'ong /__/bod skye ba bzang ba de nas srid/__/'od zer lho phyogs gling =__/'phags skyes po yi rgyal po=__/longs spyod ldan zhing dkor nor phyug__/lho phyogs g.yang rnams bod du=__/bod dkor nor phyug pa de=__/'od zer nub phyogs=__/spyan mi bzang gi=__/longs spyod ldan zhing mi 'phel che/__/nub phyogs g.yang rnams=__/bod mi 'phel che ba de=__/'od zer byang gi phyogs su 'phros/__/rnam thos sras kyi rgyal=__/longs spyod ldan zhing sku tshe ring /__/byang phyogs g.yang rnams=__/bod sku tshe ring ba de=__/'od zer phyogs bcu kun tu 'phros/__/de rnams longs spyod=__/bod nor g.yang 'phel ba de nas srid/__/'od zer rgya gar yul du=__/rgya gar chos rnams=__/bod chos la dga' ba de=__/'od zer ta zig yul du 'phros/__/ta zig nor rnams bod=__/bod dkor nor phyug pa=__/'od zer rgya nag yul du=__/rgya yi ja dar=__/bod ja dar 'phel ba=__/'od zer hor gyi yul=__/hor gyi rta g.yang =__/bod rta drel 'phel ba=__/'od zer bod kyi yul du 'phros/__/mi dang g.yang gnyis kyi li li/__/phywa dang g.yang gnyis sga ra ra/__/longs spyod sna tshogs de las tshogs/__sngon gyi bzang 'phro dpal bzhin du/__/dar dkar g.yab cing 'dir 'bod na/__/de ring khu ye phywa g.yang len/__/ces sngon byung gi gleng gzhis mtshams sbyar nas g.yang 'gugs dngos ni/__bsang shing gi dud pa dang dkar mngar rin chen 'bru sman ja chang zas sna'i phud sogs kyis mchod cing /__oM AHhU~M/__phyogs bcu'i 'jig rten khams bzhugs pa'i/__/dkon mchog rnam gsum thugs rje'i gter/__rtsa brgyud bla ma byin rlabs can/__/yi dam zhi khro dngos grub mdzod/__/mkha' 'gro chos skyong phrin las bdag__/khyad par mtshan tsam 'dzin pas kyang /__/rgud cing phongs pa kun bsal nas/__/'dod rgu'i longs spyod stsol mdzad pa'i/__/byang chub sems dpa' rin chen mang /__/rnam mang thos sras rta bdag brgyad/__/smugs 'dzin dbang po nor rgyun ma/__/yab yum 'khor dang bcas pa dang /__/g.yang gi lha mo dpal chen mo/__/'khor gyi grogs mo brgyad dang bcas/__/a pa ra dzI ta tshogs kyi bdag__/re man+ta sogs gnod sbyin dang /__/nor lha gter bdag bye ba'i tshogs/__/gtsang ris dpal mgon dam tshig can/__/lhan cig skyes dang 'go ba'i lha/__/mdor na dkar phyogs skyong ba'i sde/__/sprul dang yang sprul bcas pa la/__/phyag 'tshal bstod cing gsol ba 'debs/__dngos 'byor yid sprul mchod pa 'bul/__/sman shing spos kyi dud pas mchod/__/zas mchog phye mar 'bru snas mchod/__rin chen dar zab rgyan gyis mchod/__/dkar gsum gtsang ma'i phud kyis mchod/__/mngar gsum dang ma'i bcud kyis mchod/__/ja chang 'dod yon skyems kyis mchod/__/bdag cag snyigs ma lnga yi 'gro/__/dbul zhing phongs pas nyams thag tshe/__/mos gus gdung bas gsol 'debs na/__/sngon gyi dam bca' ma g.yel bar/__/thugs rje thugs dam shugs bskyed la/__/phywa g.yang 'gugs pa'i phrin las mdzod/__/mda' dar g.yab cing /__kye/__steng phyogs lha khams rnams kyi g.yang /__de ring khu ye phywa g.yang khug__/bar snang gnyan gyi rgyal po'i g.yang /__/de ri khu ye=__/sa 'og klu yi rgyal po'i g.yang /__/de ring khu ye=__/shar phyogs yul 'khor srung gi g.yang /__/de ring khu ye=__/lho phyogs 'phags skyes po yi g.yang /__de ring khu ye=__/nub phyogs spyan mi bzang gi g.yang /__/de ring khu ye=__/byang phyogs rnam thos sras kyi g.yang /__/de ring khu ye=phyogs skyong nor lha rnams kyi g.yang /__/de ring khu ye=__/lha 'dre mthu rtsal can gyi g.yang /__/de ring khu ye=__/rgya gar rgyal po'i chos g.yang de/__/de ring khu ye=__/rgya nag rgyal po'i ja dar g.yang /__/de ring khu ye=__/ta zig rgyal po'i nor g.yang de/__/de ring khu ye=__/ge sar rgyal po'i dmag g.yang de/__/de ring khu ye=__/bal po'i skye bzhin legs g.yang de/__/de ring khu ye=__/sog po'i mda' rtsal che ba'i g.yang /__/de ri khu ye=__/dgung sngon mthon po'i pha g.yang de/__/de ring khu ye=__/dog mo sa yi ma g.yang de/__/de ring khu ye=__/nyi zla skar gsum bkra g.yang de/__/de ring khu ye=__/'ja' tshon sna lnga'i bkrag g.yang de/__/de ring khu ye=__/lho sprin smug po'i phyur g.yang de/__/de ring khu ye=__/ri rab lhun po'i brtan g.yang de/__de ring khu ye=__/gling chen bzhi yi bkod g.yang de/__/de ring khu ye=__/gling phran brgyad kyi 'khor g.yang de/__de ring khu ye=__/ri phran rnams kyi btsun g.yang de/__/de ring khu ye=__/rgya mtsho chen po'i zab g.yang de/__/de ring khu ye=__/dpag bsam shing gi lo g.yang de/__/de ring khu ye=__/rtsi shing nags tshal 'phan g.yang de/__/de ring khu ye=__/phyug po rnams kyi phyug g.yang de/__/de ring khu ye=__/'phan po rnams kyi 'phan g.yang de/__/de ring khu ye=__/btsan po rnams kyi btsan g.yang de/__/de ring khu ye=__/gnyan po rnams kyi gnyan g.yang de/__/de ring khu ye=__/'chi med rdo rje'i tshe g.yang de/__/de ring khu ye phywa g.yang khug__/rgyal ba rnams kyi thugs rje'i g.yang /__/de ring khu ye phywa g.yang khug__/khu ye phywa khug g.yang khug la/__/g.yang len phud kyis nor lha mchod/__/g.yang len phud kyis phyugs lha mchod/__/g.yang len phud kyis khyim lha mchod/__/g.yang len phud kyis tshe lha mchod/__/'chi med tshe dang 'dzad med nor/__/dpal 'byor longs spyod phywa g.yang kun/__/ri ltar spungs shing mtsho ltar bskyil/__/bde skyid bkra shis dngos grub stsol/__/rang gi thugs ka nas 'od zer 'phros/__/mdun bskyed kyi thugs rgyud bskul/__/de rnams kyi thugs ka nas 'od zer lcags kyu'i dbyibs can grangs med pa 'phros pas/__srid zhi'i tshe bsod dpal 'byor phywa g.yang longs spyod brtan g.yo'i dwangs bcud thams cad bkra shis rdzas rtags rgyal srid bdun dang 'ja' zer thig le'i rnam par spyan drangs/__mdun gyi rten rdzas rnams la thim pas 'dod rgu thams cad yid bzhin du stsol bar gyur/__par bsams la/__/lnga pa sngags bzla ba ni/__gong gi bskyed chog dang mthun par sngags bzla bar bya ste/__oM AHgu ru rat+na saM b+ha wa sarba sid+d+hi hU~M/__bla ma rin 'byung gi sngags dang /__oM na maHsarba ta thA ga ta b+h+yoHbi shwa mu khe b+h+yaHsarba tha khaM ang+ga te s+pha ra Na i maM ga ga na khaM swA hA/__zhes nam mkha' mdzod kyi sngags dang /__oM bai shra wa NA ye swA hA/__zhes rnam sras dang /__oM pad+ma kro d+ha Ar+ya dzam b+ha la hr-i dA ya hU~M phaT/__dzam dkar dang /__oM dzam b+ha la dza len+d+ra ya swA hA/__dzam ser nag ljang gsum thun mong dang /__oM dzam+b+ha la dza len+d+ra ya d+ha na me d+hi hrIHswA hA/__dzam dmar dang /__oM ba su d+ha rI Ni swA hA/__nor rgyun ma dang /__oM ka ma la bA si ni/__ka ma le ma hA la k+Sh+mir dz+yaM me/__ba su nA nA kha d+he sarba sid+d+hi de hi de hi ba ra de swA hA/__dpal chin ma dang /__gu ru ma hA kA la ha ri ni sa sid+d+hi dzaHmgon dkar dang /__oM b+h+rU~M ga Na pa ti ye swA hA/__tshogs bdag dang /__oM i li ki li pi li ki ki li swA hA/__oM a na le kuN+Da lI gr-ih+na bin+Da pi shA tsi na ye swA hA/__oM na maHshuk+Sha Na ba su mu kha~M ma hA pi shA tsi na ye swA hA/__zhes dbyug gu lha mo mched gsum dang /__oM a pa ra dzI ta rat+na sarba sid+d+hi b+h+rU~M/__zhes a pa ra dzI ta dang /__oM AR+Ya ra man+tA ye swA hA/__zhes re man+ta dang /__/ba~M ha ri ni sa badz+ra pra mo ha tsit+ta hriM hriM dza dzaHzhes tshe ring mched lnga dang /__oM ba su ki maM swA hA/__zhes klu nor rgyas dang /__oM ku ma ra phu tri sarba sid+d+hi sid+d+hi hU~M swA hA/__zhes spom ra dang /__tad+ya thA/__hi li ma Ni b+ha dra/__hi li hi li ma Ni b+ha dra/__ki li ma Ni b+ha dra/__ki li ki li ma Ni b+ha dra/__ku ru ma Ni b+ha dra/__ku ru ku ru ma Ni b+ha dra/__tu ru ma Ni b+ha dra/__tu ru tu ru ma Ni b+ha dra/__tsi li ma Ni b+ha dra/__tsi li tsi li ma Ni b+ha dra/__su ru ma Ni b+ha dra/__su ru su ru ma Ni b+ha dra/__tsu ru ma Ni b+ha dra/__tsu ru tsu ru ma Ni b+ha dra/__oM e h+ye hi tiSh+Tha tiSh+Tha/__sarba ar+tha me sA d+ha ya/__tad+ya thA/__su d+ha ne/__su ra Ne/__su ma ti/__su pu She/__hi li mi li swA hA/__zhes nor lha spyi'i sngags rnams ci nus bzlas/__grangs bsogs na g.yang 'bod gzhung ltar dang /__mchod pa zhal gso/__oM AHhU~M/__phyogs bcu'i 'jig rten sogs nas/__'di yan bskyar zhing sngags bzlab spel/__/drug pa g.yang len ni/__kye/__mtho ba srid gsum yar rtse nas/__rlung gi rgya gram yan bar gyi/__/khams lnga'i nus bcud tshe dpal g.yang /__/deng 'dir khu ye phywa g.yang len/__/phyogs bcu dag pa'i zhing khams dang /__'dzam gling rnga yab gzhan gsum nas/__dam pa chos kyi chab srid de/__/deng 'dir khu ye phywa g.yang len/__/lha gnas sum cu rtsa gsum dang /__/lus 'phags lus dang 'phags pa nas/__/mtho ris snyan grags rgyal srid de/__/deng 'dir khu ye=__/gnod sbyin grong khyer khang bzang dang /__/ba lang spyod gling g.yo lam nas/__/ba phyugs nor mdzod rma g.yang de/__/deng 'dir khu ye=__/mtho ris nam mkha' gnas rnams dang /__/sgra mi snyan gnyis de'i zla nas/__/'chi med tshe yi srog g.yang de/__/deng 'dir khu ye phywa g.yang len/__/bsam gtan bzhi gnas man chad dang /__sa 'og lto 'phye'i gnas yan gyi/__/bde skyid bkra shis phun tshogs de/__/deng 'dir khu ye phywa g.yang len/__/kye/__phyogs bcu dus gsum byon pa yi/__/dkon mchog rin chen rnam gsum dang /__/rtsa brgyud bla ma'i byin rlabs de/__/deng 'dir khu ye phya g.yang len/__/theg pa rim dgu rgyud sde bzhi/__/yi dam dkyil 'khor lha tshogs kyi/__/mchog dang thun mong dngos grub de/__/deng 'dir khu ye phya g.yang len/__/gnas gsum dpa' bo mkha' 'gro dang /__chos srung dam can rgya mtsho'i sder/__/gang bcol g.yel med phrin las de/__/deng 'dir khu ye phya g.yang len/__/gnod sbyin dbul sel nor skyong dang /__/mi zad 'dod dgu dbang rnams kyi/__/dgos 'byung longs spyod gter mdzod de/__/deng 'dir khu ye=__/rigs rus snag 'brang dang skyes lha/__/'go ba'i dgra lha dpung gnyen du/__/mi 'bral zung du 'grogs pa'i g.yang /__/deng 'dir khu ye=__/dam ldan dkar po'i phyogs skyong ba'i/__/yul lha gzhi bdag gnas srung rnams/__/rkyen bsal mthun 'grub mi 'bral g.yang /__/deng 'dir khu ye=__/snang srid snod bcud dkyil 'khor lha/__gdod nas dag pa lhun grub gshis/__/gnas lugs phyag rgya chen po'i g.yang /__/deng 'dir khu ye phywa g.yang len/__kye/__tshe snang mtha' yas rnam par rgyal/__/'phags ma pad 'byung grub rgyal sogs/__/'chi med brnyes rnams tshe dngos de/__/deng 'dir khu ye phywa g.yang len/__/bde gshegs mched bdun sprul pa lnga/__/nang pa lha mi drang srong phyi'i/__/na gso 'chi bslu sman nus de/__/deng 'dir khu ye phyA g.yang len/__/'jam mgon ngag dbang dbyangs can sogs/__/phyogs dus rgyal ba sras bcas kyi/__/mkhyen rab blo gros spobs pa de/__/deng 'dir khu ye phywa g.yang len/__/snying rje'i spyan ras gzigs 'gro mgon=sa dang lam gnas byang sems rnams/__/thugs bskyed gzhan don phyogs med de/__/deng 'dir khu ye phywa g.yang len/__/gsang bdag rdor 'dzin rta mgrin sogs/__/gsang sngags rigs gzungs grub brnyes pas/__/log 'dren gzhom pa'i mthu stobs de/__/deng 'dir khu ye phywa g.yang len/__/'dul ba mdo sde ma mo sngags/__/gsar rnying bstan 'dzin brgyud bcas kyi/__/spangs rtogs brtul zhugs grub 'bras de/__/deng 'dir khu ye phywa g.yang len/__/rgya bod mkhan slob paN grub los/__/'chad nyan rtsom bsgyur sgom sgrub rgyun/__/sangs rgyas bstan pa dar ba'i g.yang /__/deng 'dir khu ye phywa g.yang len/__/mo rtsis rdzas sngags sgom sgrub sogs/__/zag bcas zag med mngon mkhyen lngas/__/dus gsum gsal ston pra g.yang de/__/deng 'dir khu ye phywa g.yang len/__/so 'brang sogs lnga pad+ma 'byung /__/nA gA rdzu na'i drang srong sogs/__/sri 'dul srid spel srung skyobs g.yang /__/deng 'dir khu ye phywa g.yang len/__/lha klu gnod sbyin gter gyi bdag__/brgyad brgyad blon 'khor 'bangs bcas kyi/__/'dzad med dbyig gi bang mdzod de/__/deng 'dir khu ye=__/dzaM lha nor bu rnam mang bu/__/gnod sbyin sde dpon 'brog gnas sogs/__/rkang bzhi'i phyugs g.yang rma g.yang de/__deng 'dir khu ye=__/mkhar khyim thab mdzod 'dod 'jo'i lha/__/ma phyi'i grogs rgyal mthing ge sogs/__/bza' btung zas bcud srid g.yang de/__/deng 'dir khu ye=__/ma dros chu bzhi gangs can ri/__/'bigs byed yul drug 'dzam gling spyi'i/__/skam gsher yul gnas gzhi bdag g.yang /__/deng 'dir khu ye=__/khyad par ti se thang lha rma/__/ma pham g.yu mtsho khri shod sogs/__/bod khams gnas bdag rma g.yang de/__/deng 'dir khu ye=__/chos rgyal rigs ldan mang bkur sogs/__/mi dbang gser dngul zangs lcags kyi/__/'khor los sgyur rnams chab srid brtan/__deng 'dir khu ye=__/gshin rabs phywa lha dgu khri 'bum/__/gas kar sum brgya drug cu sogs/__/g.yung drung bon gyi phywa g.yang de/__/deng 'dir khu ye=__/'phags bod bde 'byung u rgyan sogs/__/rgyal bstan spel skyong chos kyi khrims/__/bstan 'gror dge ba'i legs mdzad de/__/deng 'dir khu ye=__/ta zig rgya bod hor khrims sogs/__/nor spel dgra 'dul gnyen skyong ba'i/__/che btsun btsan phyug rgyal srid g.yang /__/deng 'dir khu ye=__/mtha' klung dbus ljongs tsI na sogs/__/mi rgyud lo 'bras 'phan dar 'phel/__/rin chen ja dar gos zas g.yang /__/deng 'dir khu ye phywa=__/kye/__stong khams gsum na yul bde zhing /__/rdzong btsan khrims brtan dus char 'bebs/__/lo legs chos dar phyi yi g.yang /__/deng 'dir khu ye=__/mi chos phyugs rgyud 'phel nang gshin/__/pho dpa' mo 'dzang 'og rta mgyogs/__/go btsan mtshon rno nang gi g.yang /__/deng 'dir khu ye=__/mkhas grub rtsod rgyal don gnyis grub/__/nad med tshe ring rgyags skyid bde/__/mthar thug 'tshang rgya don gyi g.yang /__/deng 'dir khu ye=__/chos dbyings chos can bslu med mthus/__/bden pa'i tshig la dbang rnams kyis/__/ci btab smon lam 'grub pa'i g.yang /__/deng 'dir khu ye phywa g.yang len/__/tshogs rdzogs rten 'brel mnga' thang las/__/rdzas rtags rgyal srid nyer bcas kyi/__/'jig rten dge mdzad bkra shis g.yang /__/deng 'dir khu ye phywa g.yang len/__/longs spyod bkra shis phun tshogs kun/__/gnas 'dir brtan pa'i dngos grub stsol/__/'dod rgu'i dpal 'byor rgyas pa dang /__bsam don yid bzhin 'grub par mdzod/__/ces gsol ba gdab/__/bdun pa bla ma rin 'byung rnal 'byor gyi bsgrub pa dang /__las sbyor ni/__slar yang bla ma gong mas mdzad pa'i rin 'byung gsol 'debs dang /__phyogs dus ma sogs kyis gsol gdab byas la/__lam zab dang sbyar tshe dbang bzhi blang ba'i mthar/__thal mo sbyar te/__bla ma yon tan rin chen 'byung ldan 'khor dang bcas pas bdag dang sems can thams cad kyi tshe dang bsod nams dpal dang 'byor pa/__dbang phyug dang shes rab/__snyan grags dang phrin las la sogs pa legs pa'i yon tan thams cad gong nas gong du 'phel zhing rgyas par byin gyis brlab tu gsol/__zhes gsol ba lan gsum la sogs pa btab pas/__bla ma'i phyag g.yas pa mchog sbyin gyi mthil nas dgos 'dod thams cad char bzhin du babs/__rang gi gnas khang lung pa la sogs pa mer gyis khengs/__bdag dang sems can thams cad kyi bsam pa rdzogs par gyur/__ces brjod pa ni sgrub pa'o/__/las sbyor de kho na nyid la blo bzhag pa ni/__bla ma rin chen 'byung ldan 'khor dang bcas pa las rang 'dra gnyis pa re chad de rang gi smin mtshams nas thim pas bla ma rin chen 'byung ldan gyi sku gsung thugs yon tan phrin las dang /__rang gi lus ngag yid gsum bya byed phrin las dang bcas pa rnams dbyer med du gyur pa las sngar gyi gdan lnga brtsegs kyi steng du rang nyid bla ma rin chen 'byung ldan sku mdog gser btso ma lta bu zhal gcig phyag gnyis pa/__g.yon pas mnyam bzhag dang /__g.yas pas mchog sbyin gyi phyag rgyas gdul bya rnams la ci 'dod ster ba zhabs rdo rje'i skyil mo krung gis bzhugs pa/__rin po che'i dbu rgyan la sogs pa rgyan thams cad kyis brgyan pa/__/dar sna tshogs kyi na bza' can/__spyi gtsug sems can thams cad kyis blta bar mi mngon pa la sogs pa mtshan bzang po sum cu rtsa gnyis dang /__sen mo zangs kyi mdog ltar dmar ba la sogs pa dpe byad bzang po brgyad cus spras pa/__'od zer bye ba 'gyed pas nam mkha' dang mnyam pa'i sems can thams cad la gang la ci 'dod kyi re ba dang 'dod dgu phun sum tshogs par thams cad bskang nas bla na med pa yang dag pa rdzogs pa'i sangs rgyas kyi sa la bkod par gyur/__zhes bsam mo/__/de rnams kyang rang gi sems nyid dag pa gcig gi cho 'phrul du shes par byas la/__gsal ba lhug pa/__mi rtog pa gsum sor sor bzung nas gsal ba sems kyi mtshan nyid/__stong pa sems kyi rang bzhin/__bcos min sems kyi ngo bo/__zhes dran par byas la sems ma bcos lhug pa'i ngang la ci nus mnyam par bzhag go/__brgyad pa g.yang chog gi rjes rim ni/__mchod pa kha gsos la byin gyis brlabs/__oM gu ru rat+na saM b+ha wa maN+Dal la sa pa ri wA ra ar+g+haM sogs nas/__shab+da AHhU~M gi bar gyis mchod/__rin chen rdo rje 'bar ba'i me/__/mnyam nyid ye shes ngo bo nyid/__/mchog sbyin chen po'i phyag rgya can/__/phyag 'tshal rin chen 'byung ldan la/__/bstod par 'os pa sogs kyis bstod/__thal mo sbyar te/__rtse gcig pa'i sems kyis/__dpal ldan bla ma dam pa rin chen 'byung ldan gyis bdag gi rgyud byin gyis brlab tu gsol/__tshe 'khor ba thog ma med pa nas bsags pa'i dbul 'phongs bkres skom gyi sdug bsngal thams cad zhi zhing dag nas/__tshe dang bsod nams rgyas par mdzad du gsol/__'khor dang longs spyod rgyas par mdzad du gsol/__dpal dang 'byor pa rgyas par mdzad du gsol/__dbang phyug phun sum tshogs pa rgyas par mdzad du gsol/__snyan grags phyogs bcur rgyas par mdzad du gsol/__lung rtogs yon tan rgyas par mdzad du gsol/__rnam dkar phrin las rgyas par mdzad du gsol/__zhes lan mang du brjod nas gsol ba btab/__yig brgya lan gsum dang /__ma 'byor pa dang sogs kyis nongs pa bshags/__oM 'dir ni rten dang sogs dang /__mdun du bzhugs pa'i bla ma rin chen 'byung ldan rtsa gsum nor lha rab 'byams kyi tshogs 'khor dang bcas pa rnams 'od du zhu ste rten rnams la thim pas g.yang rten rnams ngo bo bla ma nor lha 'khor bcas dang gnyis su med pa la rnam pa 'khor 'das kyi phywa g.yang dwangs bcud thams cad gcig tu 'dus pa dgos 'dod thams cad 'byung ba'i yid bzhin gyi nor bu rin po che lta bur gyur/__ces brjod de ye shes pa rnams rten la bstims/__rten 'brel snying po brjod cing me tog 'thor bas brtan par bya/__dge ba 'di yis myur du bdag__/bla ma rin 'byung 'grub gyur nas/__sogs/__dge ba 'di yi skye bo kun/__/bsod nams ye shes tshogs rdzogs shing /__/bsod nams ye shes las byung ba'i/__/dam pa sku gnyis thob par shog__/thams cad nam mkha' mdzod bzhin du/__/longs spyod zad pa med par shog__/rtsod pa med cing 'tshe med pa/__/rang dbang du ni spyod par shog__/'jig rten bde zhing lo legs dang /__/'bru rnams 'phel zhing phyugs 'phel ba/__/dge legs thams cad 'byung ba yi/__/yid la 'dod pa kun 'grub shog__/zhes sogs khyad par gyi bsngo smon dang /__che ba'i che mchog sogs mdo rgyud las byung ba dang /__'bad dang rtsol bas ma gos kyang /__/yid bzhin nor bu dpag bsam bzhin/__/sems can re ba skong mdzad pa/__/bsam pa 'grub pa'i bkra shis shog__/gnas 'dir nyin mo bde legs sogs skabs su babs pa'i bkra shis kyi tshigs su bcad pa dang bcas te me tog gi char sil mar bsnyil bar bya'o/__/grol nyin sbyin bdag la g.yang gtad sogs byed na brtan bzhugs tshar ba'i rjes stan bzang po la 'bru dkar gyis g.yung drung ris bris par yon bdag gos rgyan bcas te 'khod/__spro na sbyong ba gsum gyis/__bkra shis pa'i cho ga sgrub pa la bar du gcod pa'i bgegs bskrad/__gang ltar yang /__sbyin pa'i bdag po nor sbyin bye ba'i sde dpon dzam+b+ha la'i skur gyur la phywa g.yang longs spyod kyi rdzas rnams gtad pas 'dod rgu'i 'byor pa'i dngos grub zad mi shes pa la longs spyod pa'i dge mtshan rgyas par gyur/__pa'i mos pas sngags rnams kyi mthar rten 'brel snying po sbrel ba bzla zhing me tog 'thor ba dang bcas rten rdzas rnams lag tu gtad/__spro na g.yang 'gugs tshar gcig bskyar gang ltar yang smon lam dang bkra shis gong du smos ba ltar rgyas bsdus ci rigs par brjod cing me tog gi char dbab rol mo'i sgra snyan bar sbyar bas dge legs su bya'o/__/'di byas dge tshogs nor bu'i sprin chen las/__/byung ba'i gru char 'dod dgu'i 'byor pa yis/__/bstan 'gro'i dbul ba ma lus kun sel nas/__/dge legs yid bzhin dpal gyis 'byor par shog__/ces pa'ang lcags ra bsam 'grub rtse'i lha bris pa blo gros chos 'phel nas bzang gos stegs khebs bcas bskul ngor/__'jam dbyangs chos kyi blo gros pas gro bzhin zla ba'i yar tshes brgyad bzang por 'don bder bsgrigs pa'i/__yi ge pa chab mdo skyo mda' sprul sku 'jam dbyangs chos kyi nyin byed kyis sgo gsum gus pas bgyis pa ste 'dis kyang mtha' yas pa'i bstan pa dang sems can la phan bde rgya chen po 'byung zhing /__'dod rgu'i 'byor pa rdzogs ldan dpal gyis khyab pa'i rgyur gyur cig__///__
