JKCL-KABUM-04-NGA-004-wylie
<div class="wylie-content"
bla ma'i rnal 'byor byang chub bde lam zhes bya ba bzhugs so/__/na mo lo ke shwa rA ya/__skal bzang gang zhig byang chub chen po'i go 'phang myur du thob par 'dod pas sangs rgyas kun gyi bgrod pa gcig pa'i lam bla ma'i rnal 'byor la brtson par bya ste/__nges 'byung byang sems thog ma nyid du rgyud la bskyed nas/__mdun mkhar rten bskyed pa ni/__/e ma ho/__dbyings snang dag pa 'ja' 'od 'khrigs pa'i klong /__/pad dkar zla ba rgyas pa'i gdan steng du/__/rtsa ba'i bla ma thugs rje chen po'i sku/__/sems nyid ngal bso gangs ri'i mdog ltar dkar/__/zhi 'dzum zhal gcig phyag gnyis g.yas mchog sbyin/__/g.yon pas dku yi sta zur gdan la bkab/__/mtheb mdzub bar nas pad dkar sdong bu rgyas/__/snyan g.yon thad kar 'dab rgyas ze'u 'bru rgod/__/lha rdzas dar dang rin chen rgyan cha dang /__/ri dwags lpags pas nu ma g.yon pa bkab/__/dbu skra thor cog spyi bor bcings pa'i rtser/__/nor bu rin chen tog gis spras pa dang /__/lhag ma sil bur grol zhing gnag snum mdzes/__/zhabs gnyis rta bab skyil mo krung gis bzhugs/__/gnas gsum yi ge gsum las 'od 'phros pas/__/rang bzhin gnas nas spyan drangs gnyis med gyur/__/skyabs kun 'dus pa'i bdag nyid chen por gsal/__/rgyas par bzang spyod kyi yan lag bdun pa sbyar/__/phra rab rdul gyi grangs snyed lus sprul te/__/sgo gsum gus pas rtag tu phyag 'tshal lo/__/dngos su 'byor dang yid las byung ba yi/__/mchod pa'i sprin chen mkha' dbyings khyab par mchod/__/thog med bsags pa'i sdig sgrib nyes ltung kun/__/gnong 'gyod drag pos mthol zhing bshags par bgyi/__/'khor 'das lam gyis bsdus pa'i dge rtsa la/__/dga' zhing phrag dog med par rjes yi rang /__/gdul bya rnams kyi blo dang 'tsham pa yi/__/zab cing rgya che'i chos 'khor bskor bar bskul/__/gang dag mya ngan 'da' bar bzhed rnams la/__/'gro sgrol slad du rtag par bzhugs gsol 'debs/__/dus gsum bsags pa'i dge ba'i rtsa ba kun/__/mkha' mnyam 'gro rnams rnam mkhyen thob phyir bsngo/__/spro na maN+Dal rgyas bsdus kyang sbyar/__e ma ho/__bde ldan zhing na chos sku snang mtha' yas/__/gru 'dzin ri bor longs sku spyan ras gzigs/__/rnga yab dpal rir sprul sku pad ma 'byung /__/dbyer med bla ma sems nyid ngal bso la/__/snying nas gsol 'debs bdag la thugs rjes gzigs/__/byang chub sems gnyis 'byongs par byin gyis rlobs/__/oM AHma hA gu ru lo ki shwa ra kha sar pa Ni sarba sid+d+hi hU~M/__zhes dang /__ma Ni ci nus bzla/__/bla ma'i gnas gsum rdo rje gsum mchog las/__/sku dang sngags phreng 'od zer bdud rtsi'i rgyun/__/rang gi gnas gsum rim dang cig car zhugs/__/sgrib dag dbang dang byin rlabs dngos grub thob/__/bla ma'i sku las 'od zer mkha' khyab 'phros/__/zhing khams rab 'byams rgya mtsho gsal bar byas/__/'phags mchod byin bsdus rigs drug sdug bsngal sbyangs/__/snod bcud 'phags pa'i zhing dang sku ru gyur/__/de dag kun gyis sngags kyi sgra chen po/__/bar med sgrogs shing tha mal sgo gsum rnams/__/'phags pa'i sku gsung thugs dang dbyer med gyur/__/yi ge drug pa ci nus bzla/__mthar ni bla ma rang thim dbyer med ngang /__/rang nyid 'phags pa'i sku ru gsal ba yi/__/thugs kar zla steng hrIHmthar sngags phreng bskor/__/de las 'od 'phros lus khengs sdig sgrib sbyangs/__/rang lus ba spu'i bu ga thams cad du/__/sangs rgyas sras dang bcas pa rab bzhugs te/__/mkha' khyab 'gro ba'i don kun byed par bsams/__/yi ge bdun ma bzla bar bya'o/__/mthar ni lhar snang rten dang brten par bcas/__/'od gsal dbyings thim chos sku'i rang zhal blta/__/slar yang 'gro 'dul thugs rje'i sku ru ldang /__/gang snang sgyu ma lta bu'i ngang nas spyod/__/oM AHhU~M gis gnas gsum srungs/__/bzang spyod smon lam sogs bsngo smon rgyas bsdus ci rigs bya'o/__/zhes pa'ang a mdo d+hI phu chos rje'i gsol dpon rgan pa klu sgrub nas bskul ngor 'jam dbyangs chos kyi blo gros pas gang shar bris pa 'dis kyang phan bde bla na med pa'i rgyur gyur cig__/sarba dA mang+ga laM//____//
