JKCL-KABUM-08-NYA-012-069

Previous Text Back to Volume PageNext Text

Wylie title		page=1
Location	chos kyi blo gros bka' 'bum Volume 12, Text 69, Pages (Folios to )
Author	འཇམ་དབྱངས་མཁྱེན་བརྩེ་ཆོས་ཀྱི་བློ་གྲོས་
Less details More details
Citation
Genre

Tibetan Text

Wylie

[edit]

༈ ཀུན་མཁྱེན་ཆེན་པོར་གསོལ་འདེབས་རྒྱང་འབོད་བཞུགས་སོ། །སྐྱབས་གནས་ཀུན་འདུས་རྩ་བའི་བླ་མ་ཁྱེད་མཁྱེན་ནོ། །རྒྱལ་ཀུན་ཡེ་ཤེས་སྒྱུ་མའི་རང་གཟུགས། །དྲན་པ་ཙམ་གྱིས་སྲིད་ཞིའི་འཇིགས་འཕྲོག། ཀུན་མཁྱེན་དྲི་མེད་འོད་ཟེར་མཁྱེན་ནོ། །ད་ལྟ་ཉིད་དུ་ཐུགས་རྗེས་གཟིགས་ཤིག། །གདན་གསུམ་ཚང་བའི་སྐུ་ཡི་དཀྱིལ་འཁོར། །གྲགས་སྟོང་ཚངས་དབྱངས་དྲུག་ཅུའི་གསུང་ལྡན། །ཟབ་ཞི་སྤྲོས་བྲལ་འོད་གསལ་སྙིང་པོ། །སྐུ་གསུམ་དབྱེར་མེད་ཀློང་ཆེན་རབ་འབྱམས། །མི་མངོན་དབྱིངས་ནས་འབྲལ་མེད་གཟིགས་ཤིག། སྤྱི་གཙུག་བདེ་ཆེན་འཁོར་ལོའི་རྒྱན་དང་། །སྙིང་དབུས་འོད་ཀྱི་གུར་ཁང་ནང་དུ། །འབྲལ་བ་མེད་པར་རྟག་པར་བཞུགས་ནས། །བྱིན་རླབས་དབང་དང་དངོས་གྲུབ་སྩོལ་ཅིག། བདག་གི་སྙིང་ལ་གནས་པའི་མུན་པ། །ཁྱེད་ཀྱི་མཁྱེན་བརྩེའི་འོད་ཀྱི་སྣང་བས། །རྩ་བ་དྲུང་ནས་འབྱིན་པར་མཛོད་ཅིག། ཕྱི་ནང་རིག་པའི་གཞུང་ལུགས་ཀུན་དང་། །ཁྱད་པར་ཟབ་དོན་དེ་ཉིད་གནས་ལུགས། །མ་ནོར་མངོན་སུམ་བཞིན་དུ་རྟོགས་ནས། །རིག་པའི་ཡེ་ཤེས་རྩལ་ཁ་ཕྱེས་ཏེ། །སྤོབས་པའི་གཏེར་ཆེན་གྲོལ་བར་མཛོད་ཅིག། འོད་གསལ་སྣང་བ་བཞི་ཡི་ལམ་ལ། །ཉིན་མཚན་ཆུ་བོའི་རྒྱུན་བཞིན་བརྩོན་པས། །ཆོས་ཅན་སྣང་བ་ཆོས་ཉིད་ཀློང་དུ། །ཟད་ནས་སྲིད་པ་ཇི་སྲིད་བར་དུ། །འཇའ་ལུས་རྡོ་རྗེའི་སྐུ་མཆོག་བརྙེས་ཏེ། །གཞན་དོན་དཔག་མེད་འབྱུང་བར་ཤོག་ཅིག། འོད་གསལ་གཞོན་ནུ་བུམ་སྐུའི་སྦུབས་སུ། །ཡེ་ཤེས་ནང་གསལ་ཐིམ་ལ་མ་རྨུག། ཕྱིར་སྣང་སྐུ་དང་ཡེ་ཤེས་ཞིང་ཁམས། །རབ་འབྱམས་མུ་མཐའ་མེད་པར་བཀོད་དེ། །འགྲོ་བ་སྒྲོལ་བའི་ཕྲིན་ལས་ཚད་མེད། །རྟག་ཁྱབ་ལྷུན་གྲུབ་འབྱུང་བར་ཤོག་ཅིག། སྐྱེ་བ་འདི་དང་ཚེ་རབས་ཀུན་ཏུ། །ཀུན་མཁྱེན་རྫོགས་པའི་སངས་རྒྱས་ཁྱེད་ཉིད། །རིགས་བདག་ཐོབ་ནས་འབྲལ་བ་མེད་པར། །རྡོ་རྗེའི་ཡེ་ཤེས་སྩོལ་བར་མཛོད་ཅིག། མཁྱེན་ནོ་མཁྱེན་ནོ་བླ་མ་མཁྱེན་ནོ།། །།

[edit]

!_kun mkhyen chen por gsol 'debs rgyang 'bod bzhugs so/__/skyabs gnas kun 'dus rtsa ba'i bla ma khyed mkhyen no/__/rgyal kun ye shes sgyu ma'i rang gzugs/__/dran pa tsam gyis srid zhi'i 'jigs 'phrog/__kun mkhyen dri med 'od zer mkhyen no/__/da lta nyid du thugs rjes gzigs shig/__/gdan gsum tshang ba'i sku yi dkyil 'khor/__/grags stong tshangs dbyangs drug cu'i gsung ldan/__/zab zhi spros bral 'od gsal snying po/__/sku gsum dbyer med klong chen rab 'byams/__/mi mngon dbyings nas 'bral med gzigs shig/__spyi gtsug bde chen 'khor lo'i rgyan dang /__/snying dbus 'od kyi gur khang nang du/__/'bral ba med par rtag par bzhugs nas/__/byin rlabs dbang dang dngos grub stsol cig/__bdag gi snying la gnas pa'i mun pa/__/khyed kyi mkhyen brtse'i 'od kyi snang bas/__/rtsa ba drung nas 'byin par mdzod cig/__phyi nang rig pa'i gzhung lugs kun dang /__/khyad par zab don de nyid gnas lugs/__/ma nor mngon sum bzhin du rtogs nas/__/rig pa'i ye shes rtsal kha phyes te/__/spobs pa'i gter chen grol bar mdzod cig/__'od gsal snang ba bzhi yi lam la/__/nyin mtshan chu bo'i rgyun bzhin brtson pas/__/chos can snang ba chos nyid klong du/__/zad nas srid pa ji srid bar du/__/'ja' lus rdo rje'i sku mchog brnyes te/__/gzhan don dpag med 'byung bar shog cig/__'od gsal gzhon nu bum sku'i sbubs su/__/ye shes nang gsal thim la ma rmug/__phyir snang sku dang ye shes zhing khams/__/rab 'byams mu mtha' med par bkod de/__/'gro ba sgrol ba'i phrin las tshad med/__/rtag khyab lhun grub 'byung bar shog cig/__skye ba 'di dang tshe rabs kun tu/__/kun mkhyen rdzogs pa'i sangs rgyas khyed nyid/__/rigs bdag thob nas 'bral ba med par/__/rdo rje'i ye shes stsol bar mdzod cig/__mkhyen no mkhyen no bla ma mkhyen no//___//