JKCL-KABUM-04-NGA-019

🚧 This website is under continued development. We appreciate your patience!

Previous Text Back to Volume PageNext Text

Wylie title
Location	chos kyi blo gros bka' 'bum Volume 4, Text 19, Pages (Folios 1a1 to )
Author	འཇམ་དབྱངས་མཁྱེན་བརྩེ་ཆོས་ཀྱི་བློ་གྲོས་
Less details More details
Citation	'jam dbyangs mkhyen brtse chos kyi blo gros. '. In Rdzong sar mkhyen brtse 'jam dbyangs chos kyi blo gros kyi gsung 'bum, Vol. 4: . Bir, H.P.: Khyentse Labrang, 2012.
Genre	Guru Yoga Texts - bla ma'i rnal 'byor

1 Texts in this Section (sde tshan or chos tshan)

101-102	རྣལ་འབྱོར་དབང་མོ་རྗེ་བཙུན་ལོ་ཆེན་གྱི་བླ་རྣལ། rnal 'byor dbang mo rje btsun lo chen gyi bla rnal Guru Yoga Texts - bla ma'i rnal 'byor	Text page View PDF
	[[|འཇམ་དབྱངས་མཁྱེན་བརྩེ་ཆོས་ཀྱི་བློ་གྲོས་ ()]]

Tibetan Text

Wylie

[edit]

རྣལ་འབྱོར་དབང་མོ་རྗེ་བཙུན་ལོ་ཆེན་གྱི་བླ་རྣལ་བཞུགས། ན་མོ་ཛྙཱ་ན་ཌཱ་ཀི་ནི་ཡེ། རང་རིག་དོན་གྱི་བླ་མ་ལ། །རང་ངོ་ཤེས་པའི་ཕྱག་གིས་འདུད། །བྱིན་རླབས་མྱུར་དུ་འཇུག་པའི་སླད། །བླ་མའི་རྣལ་འབྱོར་ཉུང་ངུ་དབྱེ། །དེ་ལ་བདེ་བའི་སྟན་འཁོད་ནས། །ངེས་འབྱུང་བྱང་སེམས་རྒྱུད་ལ་བསྐྱེད། སྔོན་འགྲོ་སྐྱབས་སེམས་ནི། ཨ། བླ་མ་སྐུ་གསུམ་ལྷ་ཚོགས་ལ། །རང་ངོ་ཤེས་པས་སྐྱབས་སུ་མཆི། །གཟུང་འཛིན་སྣང་བ་རང་གྲོལ་ཕྱིར། །ཡེ་གྲོལ་ཆེན་པོར་སེམས་བསྐྱེད་དོ། །ལན་གསུམ། དངོས་གཞི་ནི། ཨ། རང་སྣང་རྣམ་དག་མདུན་གྱི་མཁར། །དབྱིངས་སྣང་ལྷུན་གྲུབ་འཇའ་ཟེར་ཀློང་། །པད་ཟླ་ཉི་མ་བམ་རོའི་སྟེང་། །རྣལ་འབྱོར་རིག་འཛིན་གྲུབ་པའི་རྗེ། །ཆོས་ཉིད་དབང་མོ་དཀར་དམར་མདངས། །ཕྱག་གཡས་ཐོད་པའི་ཅང་ཏེ་འཁྲོལ། །གཡོན་པ་མཉམ་བཞག་ཐོད་བུམ་བསྣམས། །ཧེ་རུ་ཀ་དཔལ་ཁ་ཊྭཱྃ་འཆང་། །གཅེར་བུ་ཨང་རག་རུས་རྒྱན་གསོལ། །ཞབས་གཉིས་ཕྱེད་སྐྱིལ་རོལ་པས་འགྱིང་། །གནས་གསུམ་ཡི་གེ་འབྲུ་གསུམ་མཚན། །འོད་འཕྲོས་ཡེ་ཤེས་སྤྱན་དྲངས་ཐིམ། །དམ་ཡེ་དབྱེར་མེད་ཆེན་པོར་གསལ། །ཡན་ལག་བདུན་གྱི་ཚོགས་བསགས་ནི། །རང་རིག་བླ་མའི་ལྷ་ཚོགས་ལ། །སྒོ་གསུམ་གུས་པས་ཕྱག་འཚལ་ལོ། །དངོས་འབྱོར་ཡིད་སྤྲུལ་མཆོད་པ་འབུལ། །སྡིག་ལྟུང་སྐྱེ་མེད་ངང་དུ་བཤགས། །གཉིས་འཛིན་བྲལ་བས་རྗེས་ཡི་རང་། །གཞོམ་མེད་ཆོས་འཁོར་བསྐོར་དུ་གསོལ། །འཕོ་འགྱུར་མེད་པར་བཞུགས་གསོལ་འདེབས། །དགེ་ཚོགས་གཞོན་ནུ་བུམ་སྐུར་བསྔོ། །ཀུན་བཟང་གོ་འཕང་ཐོབ་པར་ཤོག །ཅེས་དང་། གསོལ་འདེབས་ནི། ཕྱི་ལྟར་རིག་འཛིན་ཆོས་ཉིད་དབང་མོ་ནི། །ནང་དུ་དབྱིངས་ཕྱུག་བདེ་ཆེན་མཚོ་རྒྱལ་ཡུམ། །གསང་བ་ལྷན་སྐྱེས་རྡོ་རྗེ་རྣལ་འབྱོར་མར། །གསོལ་བ་འདེབས་སོ་མཆོག་ཐུན་དངོས་གྲུབ་སྩོལ། །ལན་གྲངས་ཅི་ནུས་དང་། བསྙེན་པ་ནི། ཨོཾ་ཨཱཿགུ་རུ་ཛྙཱ་ན་ཌཱ་ཀི་ནི་སརྦ་སིདྡྷི་ཕ་ལ་ཧཱུྃ། ཅི་འགྲུབ་བཟླ། ཐུན་མཐར་དབང་བླང་བ་ནི། བླ་མའི་གནས་གསུམ་རྡོ་རྗེའི་འབྲུ་གསུམ་ལས། །འོད་ཟེར་དཀར་དམར་མཐིང་གསུམ་རིམ་དང་ནི། །ཅིག་ཅར་བྱུང་བ་རང་གི་གནས་གསུམ་ཐིམ། །སྒྲིབ་དག་དབང་དང་དངོས་གྲུབ་ཐོབ་པར་གྱུར། །སྐུ་བཞིའི་ས་བོན་རྒྱུད་ལ་བཞག་པར་བསམ། །མཐར་ནི་བླ་མ་དགྱེས་པས་རང་ལ་ཐིམ། །དུས་གསུམ་རྟོག་པས་མ་བསླད་གཉུག་མའི་ངང་། །རང་རིག་འོད་གསལ་ཆོས་སྐུའི་རང་ཞལ་བལྟ། །ཞེས་བརྗོད་ལ་དགོངས་པའི་ངང་བསྐྱང་ངོ་། །དགེ་བ་བསྔོ་ཞིང་སྨོན་ལམ་གདབ་བོ། །ཅེས་པའང་རྗེ་བཙུན་ཉིད་ཀྱི་ཞལ་སློབ་ངག་དབང་ཆོས་ཉིད་ནས་བསྐུལ་ངོར། འཇམ་དབྱངས་ཆོས་ཀྱི་བློ་གྲོས་པས་གངས་རི་ཐོད་དཀར་ཀུན་མཁྱེན་གཟིམ་ཕུག་ཏུ་སྨྲས་རིམ་བཞིན་རང་སློབ་འགྱུར་མེད་གྲགས་པས་བྲིས་པ་དགེ་ལེགས་འཕེལ།། །།

[edit]

rnal 'byor dbang mo rje btsun lo chen gyi bla rnal bzhugs/__na mo dz+nyA na DA ki ni ye/__rang rig don gyi bla ma la/__/rang ngo shes pa'i phyag gis 'dud/__/byin rlabs myur du 'jug pa'i slad/__/bla ma'i rnal 'byor nyung ngu dbye/__/de la bde ba'i stan 'khod nas/__/nges 'byung byang sems rgyud la bskyed/__sngon 'gro skyabs sems ni/__a/__bla ma sku gsum lha tshogs la/__/rang ngo shes pas skyabs su mchi/__/gzung 'dzin snang ba rang grol phyir/__/ye grol chen por sems bskyed do/__/lan gsum/__dngos gzhi ni/__a/__rang snang rnam dag mdun gyi mkhar/__/dbyings snang lhun grub 'ja' zer klong /__/pad zla nyi ma bam ro'i steng /__/rnal 'byor rig 'dzin grub pa'i rje/__/chos nyid dbang mo dkar dmar mdangs/__/phyag g.yas thod pa'i cang te 'khrol/__/g.yon pa mnyam bzhag thod bum bsnams/__/he ru ka dpal kha T+wA~M 'chang /__/gcer bu ang rag rus rgyan gsol/__/zhabs gnyis phyed skyil rol pas 'gying /__/gnas gsum yi ge 'bru gsum mtshan/__/'od 'phros ye shes spyan drangs thim/__/dam ye dbyer med chen por gsal/__/yan lag bdun gyi tshogs bsags ni/__/rang rig bla ma'i lha tshogs la/__/sgo gsum gus pas phyag 'tshal lo/__/dngos 'byor yid sprul mchod pa 'bul/__/sdig ltung skye med ngang du bshags/__/gnyis 'dzin bral bas rjes yi rang /__/gzhom med chos 'khor bskor du gsol/__/'pho 'gyur med par bzhugs gsol 'debs/__/dge tshogs gzhon nu bum skur bsngo/__/kun bzang go 'phang thob par shog__/ces dang /__gsol 'debs ni/__phyi ltar rig 'dzin chos nyid dbang mo ni/__/nang du dbyings phyug bde chen mtsho rgyal yum/__/gsang ba lhan skyes rdo rje rnal 'byor mar/__/gsol ba 'debs so mchog thun dngos grub stsol/__/lan grangs ci nus dang /__bsnyen pa ni/__oM AHgu ru dz+nyA na DA ki ni sarba sid+d+hi pha la hU~M/__ci 'grub bzla/__thun mthar dbang blang ba ni/__bla ma'i gnas gsum rdo rje'i 'bru gsum las/__/'od zer dkar dmar mthing gsum rim dang ni/__/cig car byung ba rang gi gnas gsum thim/__/sgrib dag dbang dang dngos grub thob par gyur/__/sku bzhi'i sa bon rgyud la bzhag par bsam/__/mthar ni bla ma dgyes pas rang la thim/__/dus gsum rtog pas ma bslad gnyug ma'i ngang /__/rang rig 'od gsal chos sku'i rang zhal blta/__/zhes brjod la dgongs pa'i ngang bskyang ngo /__/dge ba bsngo zhing smon lam gdab bo/__/ces pa'ang rje btsun nyid kyi zhal slob ngag dbang chos nyid nas bskul ngor/__'jam dbyangs chos kyi blo gros pas gangs ri thod dkar kun mkhyen gzim phug tu smras rim bzhin rang slob 'gyur med grags pas bris pa dge legs 'phel//____//