JKW-KABUM-23-'A-001-013

🚧 This website is under continued development. We appreciate your patience!

Previous Text Back to Volume PageNext Text

བདེ་ཆེན་རྡོ་རྗེའི་ལམ་མཆོག་ལ་སྐུལ་བའི་གླུ་བདེ་བ་ཆེན་པོའི་ཏམྦུ་ར།

Wylie title	bde chen rdo rje'i lam mchog la skul ba'i glu bde ba chen po'i tam+bu ra
Location	mkhyen brtse'i bka' 'bum Volume 23, sde tshan 1, Text 13, Pages 26-27 (Folios 13b3 to 14a6)
Author	འཇམ་དབྱངས་མཁྱེན་བརྩེའི་དབང་པོ་
Less details More details
Citation	'jam dbyangs mkhyen brtse'i dbang po. bde chen rdo rje'i lam mchog la skul ba'i glu bde ba chen po'i tam+bu ra. In 'jam dbyangs mkhyen brtse'i dbang po'i bka' 'bum, Vol. 23: 26-27. Khams sde dge rdzong sar dgon: Rdzong sar blo gros phun tshogs, 2020.
Genre

Tibetan Text

Wylie

[edit]

བདེ་ཆེན་རྡོ་རྗེའི་ལམ་མཆོག་ལ་སྐུལ་བའི་གླུ་བདེ་བ་ཆེན་པོའི་ཏམྦུ་ར་ཞེས་བྱ་བ། ཨ་ཧོ་མ་ཧཱ་སུ་ཁ་ཧོ། ཀ་མ་ལ་ཡི་ཟེའུ་འབྲུའི་འཛུམ་དཀར་གྱི་དབུས་ནས། །ཁ་ཁ་མུ་ཁའི་ལྕགས་ཀྱུ་གསང་སྦུབས་སུ་དྲངས་ཏེ། །ག་ལས་འཇིགས་པ་མེད་པའི་བརྟུལ་ཞུགས་ལ་སྤྱོད་ན། །ང་བདག་འཛིན་བྲལ་རྟོགས་པའི་གསེང་ལམ་ཞིག་ཡོད་དོ། །ཅ་ཅོ་ཧ་ཧའི་བཞད་སྒྲའི་འཁུན་གླུ་དང་བཅས་ཏེ། །ཆ་ལུགས་ཡིད་འཕྲོག་རིག་མའི་སྙོམས་འཇུག་གི་རྩེད་འཇོ། །ཇ་ཆང་བདུད་རྩིའི་དཔལ་བཞིན་ངོམ་མེད་དུ་སྤྱོད་ན། །ཉ་ཟླས་གདུང་བ་སེལ་འདྲའི་དགའ་སྟོན་ཞིག་ཡོད་དོ། །ཏ་ན་ནུ་མ་མཁྲེགས་ཤིང་རྒྱས་པའི་གཞོན་ནུ་མའི་ཚོགས་ལ། །ཐ་མལ་འདུ་ཤེས་ལྷ་སྔགས་ཆོས་སྐུ་རུ་བསྒྱུར་ཏེ། །ད་གཟོད་བསྲུབས་ཤིང་བསྲུབ་པའི་འཁྲུལ་འཁོར་ལ་སྤྱོད་ན། །ན་མར་བདེ་ཆེན་འདྲེན་པའི་ཉམས་དགའ་ཞིག་ཡོད་དོ། །པཱ་ར་མི་ཏའི་ཡེ་ཤེས་མངོན་སུམ་དུ་མཚོན་པ། །ཕ་རོལ་མཚན་ལྡན་དགའ་མའི་རེག་བྱ་ལ་བརྟེན་ནས། །བ་ལིཾ་གསང་བ་ཆེན་པོའི་ཚོགས་འཁོར་ལ་སྤྱོད་ན། །མ་དང་མཁའ་འགྲོ་དགྱེས་པའི་དངོས་གྲུབ་ཞིག་ཡོད་དོ། །ཙ་ཀོ་ར་བཞིན་ཆགས་པའི་ཟུར་མིག་གི་ལྕགས་ཀྱུ། །ཚ་དྲོད་བདེ་བས་བརྒྱན་པའི་བུ་མོ་ལ་བཏབ་ནས། །ཛ་ལང་ཁ་སྦྱོར་བདེ་བའི་ངལ་འཚོ་ལ་སྤྱོད་ན། །ཝ་ལེར་རིག་སྟོང་མཚོན་པའི་ཐབས་མཁས་ཞིག་ཡོད་དོ། །ཞ་རེངས་བྲལ་བའི་སྲ་མཁྲེགས་ཐབས་མཆོག་གི་རྡོ་རྗེ། །ཟ་མ་ཏོག་བཞིན་ཤེས་རབ་བྷ་ག་རུ་གསོར་བས། །འ་ཅག་ཐིག་ལེ་དབབ་ལྡོག་འཛིན་འགྲིམས་ལ་བརྩོན་ན། །ས་ལམ་བཙན་ཐབས་བགྲོད་པའི་མྱུར་ལམ་ཞིག་ཡོད་དོ། །ཧ་རིའི་དྲི་བསུང་འཐུལ་བའི་པད་ཅན་གྱི་དམར་ཆ། །ཨ་ཧྃ་སྙོམས་ཞུགས་ཞུ་བདེའི་ཏིང་འཛིན་གྱིས་དྲངས་ནས། །ཧ་ལ་བདུད་རྩིར་བསྒྱུར་བའི་ངེས་གསང་ལ་སྤྱོད་ན། །ཨ་ཧོ་འཆི་མེད་གྲུབ་པའི་དགེ་མཚན་ཞིག་ཡོད་དོ། ། ༈

[edit]

bde chen rdo rje'i lam mchog la skul ba'i glu bde ba chen po'i tam+bu ra/ bde chen rdo rje'i lam mchog la skul ba'i glu bde ba chen po'i tam+bu ra zhes bya ba/__a ho ma hA su kha ho/__ka ma la yi ze'u 'bru'i 'dzum dkar gyi dbus nas/__/kha kha mu kha'i lcags kyu gsang sbubs su drangs te/__/ga las 'jigs pa med pa'i brtul zhugs la spyod na/__/nga bdag 'dzin bral rtogs pa'i gseng lam zhig yod do/__/ca co ha ha'i bzhad sgra'i 'khun glu dang bcas te/__/cha lugs yid 'phrog rig ma'i snyoms 'jug gi rtsed 'jo/__/ja chang bdud rtsi'i dpal bzhin ngom med du spyod na/__/nya zlas gdung ba sel 'dra'i dga' ston zhig yod do/__/ta na nu ma mkhregs shing rgyas pa'i gzhon nu ma'i tshogs la/__/tha mal 'du shes lha sngags chos sku ru bsgyur te/__/da gzod bsrubs shing bsrub pa'i 'khrul 'khor la spyod na/__/na mar bde chen 'dren pa'i nyams dga' zhig yod do/__/pA ra mi ta'i ye shes mngon sum du mtshon pa/__/pha rol mtshan ldan dga' ma'i reg bya la brten nas/__/ba liM gsang ba chen po'i tshogs 'khor la spyod na/__/ma dang mkha' 'gro dgyes pa'i dngos grub zhig yod do/__/tsa ko ra bzhin chags pa'i zur mig gi lcags kyu/__/tsha drod bde bas brgyan pa'i bu mo la btab nas/__/dza lang kha sbyor bde ba'i ngal 'tsho la spyod na/__/wa ler rig stong mtshon pa'i thabs mkhas zhig yod do/__/zha rengs bral ba'i sra mkhregs thabs mchog gi rdo rje/__/za ma tog bzhin shes rab b+ha ga ru gsor bas/__/'a cag thig le dbab ldog 'dzin 'grims la brtson na/__/sa lam btsan thabs bgrod pa'i myur lam zhig yod do/__/ha ri'i dri bsung 'thul ba'i pad can gyi dmar cha/__/a ha~M snyoms zhugs zhu bde'i ting 'dzin gyis drangs nas/__/ha la bdud rtsir bsgyur ba'i nges gsang la spyod na/__/a ho 'chi med grub pa'i dge mtshan zhig yod do/___/__!_