JKW-KABUM-23-'A-001-039

🚧 This website is under continued development. We appreciate your patience!

Previous Text Back to Volume PageNext Text

གླུ་ཤིན་ཏུ་རྣམ་དག་མ།

Wylie title	glu shin tu rnam dag ma
Location	mkhyen brtse'i bka' 'bum Volume 23, sde tshan 1, Text 39, Pages 81-82 (Folios 41a2 to 41b2)
Author	འཇམ་དབྱངས་མཁྱེན་བརྩེའི་དབང་པོ་
Less details More details
Citation	'jam dbyangs mkhyen brtse'i dbang po. glu shin tu rnam dag ma. In 'jam dbyangs mkhyen brtse'i dbang po'i bka' 'bum, Vol. 23: 81-82. Khams sde dge rdzong sar dgon: Rdzong sar blo gros phun tshogs, 2020.
Genre

Tibetan Text

Wylie

[edit]

རྫོགས་པའི་སངས་རྒྱས་དོན་ཐམས་ཅད་ཡོངས་སུ་གྲུབ་པ་ལ་ཕྱག་འཚལ་ལོ། །ཤིན་ཏུ་རྣམ་པར་དག་པ་ཆོས་ཀྱི་སྐུ། །ངེས་པ་ལྔ་ལྡན་ལོངས་སྤྱོད་ཆེན་པོར་རྫོགས། །གང་འདུལ་སྤྲུལ་པའི་རྣམ་རོལ་མཐའ་ཡས་པའི། །ཨོ་རྒྱན་རྡོ་རྗེ་འཆང་དེས་ཁྱོད་ལ་སྲུངས། །འདི་ན་དལ་བརྒྱད་འབྱོར་བཅུས་ཡོངས་ཕྱུག་ཅིང་། །འཁོར་ལོ་གསུམ་གྱི་དགེ་མཚན་རྨད་བྱུང་བའི། །བཤེས་གཉེན་གང་དེས་རིན་ཆེན་གཉིས་པ་ནི། །སྲང་འཁོར་དང་བཅས་ཁོ་བོའི་སུག་པར་སོན། །དེ་ཚེ་མཆོག་གསུམ་རྒྱ་མཚོར་མོས་གུས་ཀྱིས། །མངོན་སུམ་སད་པར་བྱས་པའི་སྤྱན་སྔ་རུ། །ཡན་ལག་བདུན་གྱི་བསགས་སྦྱངས་སྤེལ་གསུམ་བཅས། །སྨོན་ལམ་ཀུན་ཏུ་བཟང་པོའི་རྗེས་སུ་ཟློས། །ཨ་ཧོ། རྙེད་དཀའི་མི་ལུས་ཐོབ་པ་ད་རེས་ཙམ་ཡིན་པས། །ནམ་འཆི་ཆ་མེད་བསམ་པའི་ངེས་འབྱུང་དང་སྦྲགས་ནས། །ལས་འབྲས་བླང་དོར་གནས་ལ་ཚུལ་བཞིན་དུ་བརྩོན་ན། །མཐོ་རིས་གོ་འཕང་ཐོབ་པ་མངོན་མཐོ་ཡི་ལམ་བཟང་། །འཁོར་བའི་སྡུག་བསྔལ་དྲན་པའི་ངེས་འབྱུང་དང་འགྲོགས་ནས། །ལས་ཉོན་ཀུན་འབྱུང་སྤོང་བའི་གཡར་དམ་དེ་བཙན་པོས། །ཐར་པའི་ལམ་བཟང་སྙིང་གི་བཅུད་ལེན་དུ་བརྟེན་ན། །འགོག་བདེན་མངོན་དུ་བྱེད་པ་ངེས་ལེགས་ཀྱི་ཐེམ་སྐས། །ཀུན་རྫོབ་ཆོས་ཀུན་སྒྱུ་མའི་དཔེ་བརྒྱད་དུ་བལྟས་ནས། །དོན་དམ་སྤྲོས་པ་བྲལ་བའི་ངལ་འཚོ་དང་སྦྲགས་ཏེ། །གསང་ཆེན་ཟབ་མོའི་ལམ་གྱིས་ཐབས་མཁས་དང་སྦྱར་ནས། །རྣམ་མཁྱེན་ཕ་མཐར་སོན་པ་མྱུར་ལམ་གྱི་ཁྱད་ཆོས། །དེ་སྐད་རྒྱུ་དང་འབྲས་བུའི་ཐེག་པ་ཡི་གླུ་དབྱངས། །གང་ཤར་ལོངས་སྤྱོད་འཁོར་ལོའི་རྒྱུད་མང་ལ་བླངས་པས། །གདུལ་བྱའི་མོས་སྣང་དམ་པའི་ཆོས་ཕྱོགས་ལ་བསྒྱུར་ནས། །འབྲེལ་ཚད་དོན་དང་ལྡན་པའི་སྨོན་ལམ་ཞིག་ཞུའོ། ། ༈

[edit]

glu shin tu rnam dag ma/__ rdzogs pa'i sangs rgyas don thams cad yongs su grub pa la phyag 'tshal lo/__/shin tu rnam par dag pa chos kyi sku/__/nges pa lnga ldan longs spyod chen por rdzogs/__/gang 'dul sprul pa'i rnam rol mtha' yas pa'i/__/o rgyan rdo rje 'chang des khyod la srungs/__/'di na dal brgyad 'byor bcus yongs phyug cing /__/'khor lo gsum gyi dge mtshan rmad byung ba'i/__/bshes gnyen gang des rin chen gnyis pa ni/__/srang 'khor dang bcas kho bo'i sug par son/__/de tshe mchog gsum rgya mtshor mos gus kyis/__/mngon sum sad par byas pa'i spyan snga ru/__/yan lag bdun gyi bsags sbyangs spel gsum bcas/__/smon lam kun tu bzang po'i rjes su zlos/__/a ho/__rnyed dka'i mi lus thob pa da res tsam yin pas/__/nam 'chi cha med bsam pa'i nges 'byung dang sbrags nas/__/las 'bras blang dor gnas la tshul bzhin du brtson na/__/mtho ris go 'phang thob pa mngon mtho yi lam bzang /__/'khor ba'i sdug bsngal dran pa'i nges 'byung dang 'grogs nas/__/las nyon kun 'byung spong ba'i g.yar dam de btsan pos/__/thar pa'i lam bzang snying gi bcud len du brten na/__/'gog bden mngon du byed pa nges legs kyi them skas/__/kun rdzob chos kun sgyu ma'i dpe brgyad du bltas nas/__/don dam spros pa bral ba'i ngal 'tsho dang sbrags te/__/gsang chen zab mo'i lam gyis thabs mkhas dang sbyar nas/__/rnam mkhyen pha mthar son pa myur lam gyi khyad chos/__/de skad rgyu dang 'bras bu'i theg pa yi glu dbyangs/__/gang shar longs spyod 'khor lo'i rgyud mang la blangs pas/__/gdul bya'i mos snang dam pa'i chos phyogs la bsgyur nas/__/'brel tshad don dang ldan pa'i smon lam zhig zhu'o/___/__!_