JKW-KABUM-02-KHA-001-022

🚧 This website is under continued development. We appreciate your patience!

First section in volume. Back to Volume PageLast section in volume.

Wylie title		page=1
Location	mkhyen brtse'i bka' 'bum Volume 1, sde tshan 22, Pages (Folios to )
Author	འཇམ་དབྱངས་མཁྱེན་བརྩེའི་དབང་པོ་
Less details More details
Citation
Genre	Collected Works - Selected - bka' 'bum

Tibetan Text

Wylie

[edit]

དཔལ་ལྡན་བླ་མའི་ཞབས་པད་དུ་བསྙེན་པས་ཆོས་ཀྱི་བདུད་རྩི་ཐོབ་པ་ལས་བྱུང་བའི་གཏམ་ངོ་མཚར་དཔྱིད་ཀྱི་དགའ་སྟོན།

དཔལ་ལྡན་བླ་མའི་ཞབས་པད་དུ་བསྙེན་པས་ཆོས་ཀྱི་བདུད་རྩི་ཐོབ་པ་ལས་བྱུང་བའི་གཏམ་ངོ་མཚར་དཔྱིད་ཀྱི་དགའ་སྟོན་ཅེས་བྱ་བ། །

ཨཱ་དི་པྲཱ་པཉྩ་པར་མི་ཏས་དཱཤཱནྟ་ཡོདྷརྨཀཱཡཿམཱདྭཡྻཾ་སཔྟཱཙུབིཀབྷབནཛྙཱནསཾབྷོགཀཱཡཾཿབྱནྟདམྱཱནཱཙིཏནུགབཧུཾརཱུཔིཀཾནིརྨཀཱ༷ཡ༷ཿཔཱལནྟུཤྲཱིམཱཾགུརུཙཀུལིཤཾདྷྲྀཏྣབྷེདཾཏྲཾཀཱ༷ཡ༷ཿ གཟོད་ནས་སྤྲོས་པའི་ཕ་རོལ་ལས་བརྒལ་ཤིན་ཏུ་ཞི་བ་ཆོས་ཀྱི་སྐུ། །གཉིས་སུ་མེད་པའི་ཡེ་ཤེས་ལས་བྱུང་ཁ་སྦྱོར་བདུན་ལྡན་ལོངས་སྤྱོད་རྫོགས། །མཐའ་ཀླས་གདུལ་བྱའི་མོས་པའི་རྗེས་འགྲོ་སྣ་ཚོགས་གཟུགས་ཅན་སྤྲུལ་པའི་སྐུ། །སྐུ་གསུམ་དབྱེར་མེད་དཔལ་ལྡན་བླ་མ་རྡོ་རྗེ་སྙེམས་མའི་བདག་པོས་སྐྱོངས། །བྲལ་སྨིན་ཡོན་ཏན་བྱེ་བའི་གཞིར་གྱུར་མཚན་དཔེའི་མཚར་སྡུག་རྫོགས་པའི་སྐུ། །ཡན་ལག་དྲུག་ཅུའི་དབྱངས་སྙན་དང་འགྲོགས་ལུང་རྟོགས་ཆོས་ཕུང་རྒྱ་མཚོའི་གསུང་། །ཇི་ལྟ་ཇི་སྙེད་གཟིགས་པའི་ཡེ་ཤེས་རྣམ་པ་ཀུན་གྱི་མཆོག་ལྡན་ཐུགས། །མི་ཟད་རྒྱན་གྱི་འཁོར་ལོར་བསྔགས་འོས་རྫོགས་སངས་རྒྱས་དེས་ཤིས་པར་མཛོད། །གང་གིས་ཕན་དགོངས་བརྩེ་བའི་རོལ་མཚོ་ཅིར་ཡང་འཕྱུར་བའི་རྦ་རླབས་ལས། །རྨད་བྱུང་ཞི་བསིལ་བདུད་རྩིའི་སྤྲིན་ཕུང་རྒྱས་པར་དཀྲིགས་པའི་འཇོ་སྒེག་གིས། །བསླབ་གསུམ་ནོར་བུའི་གྲུ་ཆར་འབེབས་པས་རིགས་ཅན་གསུམ་གྱི་འགྲོ་བ་ཀུན། །ཐར་པ་མཆོག་གི་ངལ་འཚོ་སྦྱིན་མཛད་དམ་པའི་ཆོས་ཀྱིས་དགེ་ལེགས་སྩོལ། །བག་མེད་འགོག་པའི་ས་བོན་ལས་འཁྲུངས་མང་ཐོས་རྩ་བ་རབ་བརྟན་པར། །བསམ་བྱུང་རིག་ལམ་པདྨོ་འཛུམ་ཞིང་བསྒོམ་སྤང་འབྲས་བུའི་ཁུར་ལྕི་བས། །སྔོན་མེད་ཡོངས་འདུ་ས་བརྟོལ་ཉིད་ཅེས་གྲགས་པའི་ཡི་གེས་མཛེས་འབར་བ། །བྱང་ཆུབ་སེམས་དཔའི་དགེ་འདུན་ཚོགས་ཀྱིས་ཤིས་པའི་མེ་ཏོག་ཆར་དུ་བསྙིལ། །མཐའ་ཀླས་སྡེ་སྣོད་རྒྱུད་སྡེའི་ཆུ་གཏེར་མཁྱེན་དཔྱོད་དཔུང་པས་བསྲུབས་པ་ལས། །རྒྱལ་བསྟན་རིན་ཆེན་དོ་ཤལ་གཡོ་བ་སྐལ་བཟང་འགྲམ་པར་འགོད་མཁས་པའི། །འཕགས་ཡུལ་པཎ་གྲུབ་རྒྱ་མཚོ་སྤྱི་དང་རྣལ་འབྱོར་དབང་ཕྱུག་བརྒྱུད་བཅས་ཀྱི། །ཞབས་སེན་དམར་པའི་འོད་རྡུལ་སྟུག་པོ་མཆོག་ཏུ་དྭངས་པའི་གཙུག་གིས་མཆོད། །ཕུལ་བྱུང་མཁྱེན་དང་བརྩེ་བའི་དཔལ་ནི་གདེངས་ཅན་བསྟི་གནས་ལྟ་བུར་གཡོ། །དེ་ཡིས་དམ་ཆོས་སྣང་བ་སྤྲོ་གང་ཤར་གྱི་ཐིག་ལེའི་རྗེས་སུ་བྱེད། །དེས་ཀྱང་དོན་གཉིས་སིམ་པ་སྟེར་ལ་ག་བུར་དོག་པས་ཉེར་མཚོན་པ། །གངས་ལྗོངས་རིས་མེད་མཁས་གྲུབ་ཚོགས་ཀུན་དད་པའི་ཕྱག་གིས་རྟག་ཏུ་བསྙེན། །ལྷག་པར་རྡོར་འཛིན་བྱེ་བའི་གཙུག་རྒྱན་པད་དཀར་འཆང་བ་སྙིང་པོའི་ཞབས། །ཡོངས་རྫོགས་བསྟན་པའི་དགོངས་དོན་འགྲེལ་མཁས་གྲུབ་པའི་ཁྱུ་མཆོག་བསོད་ནམས་རྩེ། །རྒྱལ་རྣམས་གསུང་གི་རྡོ་རྗེའི་རྒྱུད་མང་མགྲིན་པའི་རྩེ་དགའ་ལ་ཆགས་པས། །བསིལ་ལྡན་ངེས་གསང་དབྱངས་ཀྱིས་གཏམས་མཛད་གྲགས་པའི་མཚན་གྱི་ཡི་གེ་བརྗིད། །མཁས་ཀུན་དགའ་བའི་རྒྱལ་མཚན་གཅིག་གྱུར་འཇམ་དཔལ་མགོན་དངོས་པཎྜི་ཏ། །ཟླ་མེད་ཆོས་ཀྱི་འཁོར་ལོས་སྒྱུར་བ་འགྲོ་མགོན་འཕགས་པའི་མཚན་ཅན་སོགས། །སྲིད་དང་ཞི་བའི་གཙུག་ཏོར་རྩེར་མཛེས་ས་སྐྱ་པ་ཞེས་གྲགས་དཀར་གྱིས། །ཡིད་སྲུབས་དཔུང་བཅས་མཛེས་པ་ཟུམ་པའི་རྣམ་ཐར་ཚངས་པའི་བློ་ལས་འདས། །ཀུན་མཁྱེན་གསུང་གི་ཟིལ་དངར་གྱིས་རེག་ཁྱོད་ཞབས་དག་པའི་པདྨོ་ནི། །དགའ་བའི་གྲིབ་བསིལ་མངོན་པར་སྟུག་ལྡན་ཕྲིན་ལས་བཟང་པོའི་ངལ་འཚོའི་དཔྱིད། །རྡོ་རྗེ་འཆང་ཆེན་མི་ཡི་གཟུགས་ཅན་དཔག་བསམ་རྐང་འཐུང་ཨེ་ཝྃ་པ། །སློབ་མར་བཅས་པའི་ཡོན་ཏན་ཁུར་གྱིས་ནོར་འཛིན་བུ་མོའང་འདར་བ་བཞིན། །གཞན་ཡང་གསང་ཆེན་གདམས་པའི་གུར་གུམ་ཟབ་དོན་དྲི་བཟང་ཚོགས་ཀྱི་གཏེར། །བློ་གསལ་བུང་པའི་གསོས་སུ་འབྱེད་ལས་གྲུབ་གཉིས་ལང་ཚོ་དར་བབས་པའི། །སྙན་བརྒྱུད་རྒྱ་མཚོའི་བསྟན་པའི་སྲོག་ཤིང་ཚར་པ་ཆོས་རྗེ་ཡབ་སྲས་སོགས། །བསྔགས་པར་འོས་པའི་ཉིན་བྱེད་ཀུན་ལའང་མཆོག་ཏུ་གུས་པའི་ཨུཏྤལ་འཛུམ། །ཁྱད་པར་བྱམས་བརྩེའི་ཤར་རིའི་ཕྲག་པས་ཉེ་བར་དྲངས་པའི་ཟླ་ཤེལ་ནི། །རྡོ་རྗེ་ནམ་མཁའི་ཐིག་ལེ་ལས་འོངས་རྨད་བྱུང་ཡོན་ཏན་ཆས་རྫོགས་པར། །ཐུགས་རྗེའི་བསིལ་ཟེར་ཕྲག་བརྒྱས་སྒེག་ཁྱོད་བདག་རྒྱུད་འཆི་མེད་རྟག་པའི་གྲོང་། །དབུགས་འབྱིན་བྱེད་པོ་གཅིག་ཏུ་ངེས་སོ་བྱང་ཆུབ་བར་དུ་རྗེས་སུ་ཟུངས། །དེས་སོགས་སྨིན་གྲོལ་གདམས་པའི་འབིགས་བྱེད་རླུང་། །དལ་གྱིས་བབས་པས་སྲིད་པའི་འཐིབ་བུ་ཀུན། །བཅིལ་ནས་ཕན་བདེའི་ངལ་འཚོ་ལ་སྦྱར་བའི། །ཡོངས་འཛིན་བླ་མའི་ཚོགས་ལ་གུས་བཏུད་ནས། །གང་གི་དྲིན་ལས་ཟབ་དང་རྒྱ་ཆེ་བའི། །ཆོས་ཀྱི་ཀཏྤུར་རྡུལ་མང་འཛག་པ་ཅན། །ཐོབ་པའི་སྤྲིང་ཡིག་ངོ་མཚར་བདུད་རྩིའི་འོད། །རང་གཞན་དད་སྤྲོའི་ཆུ་གཏེར་འཕེལ་ཕྱིར་འོང་། །རྒྱུ་དེས་སྐལ་བཟང་འཆི་བ་མེད་པའི་གཞོན་ནུའི་ཚོགས། །སྙིང་ལ་སྤྲིན་སྔོན་ཆུན་པོ་གཡོ་བའི་ཏམྦུ་རས། །རེག་པ་རྨ་བྱའི་བུ་མོའི་ལང་ཚོ་ཇི་བཞིན་དུ། །ཀུན་དགའི་དུས་སྟོན་ཆེས་ཆེར་དར་བའི་ཤིས་པ་སྒྲུབས། །དེ་སླད་གཅིག་ཏུ་དོན་གཉེར་པའི། །དཔྱོད་ལྡན་རཿཡིག་གཉིས་པའི་ཚོགས། །ཚིག་དོན་མཚར་སྡུག་མ་སྨད་པའི། །སྐྱེད་མོས་ཚལ་འདིར་གར་རྩེན་ཤིག ། ༈ རྡོ་རྗེ་འཆང་དབང་ཡེ་ཤེས་ཆུ་གཏེར་བྱམས་པའི་བསྲུབས་ཐག་གིས་བསྐུལ་བས། །ནམ་མཁའི་མཐས་ཀྱང་མཚོན་པར་མི་ནུས་ཕན་བདེའི་འདོད་དགུ་འཇོ་བའི་དཔྱིད། །འཆི་མེད་སྐུ་བཞིའི་ངལ་འཚོ་སྟེར་མཁས་རྣམ་འདྲེན་བླ་མ་དཔག་བསམ་དབང་། །གང་དེའི་ཞབས་སེན་རྙེད་དཀའི་མེ་ཏོག་དད་པའི་ཕྱག་གིས་ལེགས་བསྙེན་ནས། །ཟབ་ཅིང་རྒྱ་ཆེའི་དམ་པའི་ཆོས། །ཅུང་ཟད་ཐོབ་ཚུལ་བརྗོད་འདི་ཡིས། །བདག་སོགས་འགྲོ་ཀུན་བྱང་ཆུབ་བར། །ཁྱོད་ཞབས་པདྨོས་སྐྱོང་གྱུར་ཅིག ༡ །ཀུན་དགའི་མཚན་དཔེའི་མཚར་སྡུག་རབ་གཡོ་ལྷར་བཅས་གཙུག་ན་མཛེས་པའི་སྐུ། །མཁས་གྲུབ་རྒྱ་མཚོའི་རྣ་བའི་དཔྱིད་གྱུར་ཞི་བསིལ་ཆོས་ཕུང་རྒྱ་མཚོའི་གསུང་། །ཇི་ལྟ་ཇི་སྙེད་གཟིགས་པའི་ཡེ་ཤེས་སྤྲོས་པའི་ཕ་རོལ་ལས་བརྒལ་ཐུགས། །ཁྱབ་བདག་བླ་མ་སྲིད་ཞིའི་དབང་པོས་ཤིས་པའི་མེ་ཏོག་ཆར་དུ་བསྙིལ། །གང་དེའི་བཀའ་དྲིན་རྨད་བྱུང་ལས། །དམ་ཆོས་དགའ་སྟོན་ཐོབ་པའི་ཚུལ། །བརྗོད་འདོད་ཡིད་ཀྱི་དཔྱིད་དཔལ་མོས། །ངག་ཚིག་ཨུཏྤལ་ཅིར་ཡང་དགོད། །ཇི་ལྟ་ཇི་སྙེད་ཆོས་ཀུན་གཟིགས་པའི་མཁྱེན་རབ་འཇམ་དཔལ་གཞོན་ནུའི་སྤུན། །ལྷར་བཅས་དགའ་བའི་ཕན་བདེའི་མཛད་བཟང་བརྩེ་ཆེན་པད་དཀར་འཆང་བ་དངོས། །ནུས་པས་ཡིད་སྲུབས་དཔུང་པ་འཆིང་མཛད་གསང་བ་འཛིན་པའི་བདག་པོའི་གཟུགས། །རིགས་གསུམ་འདུས་ཞལ་མཁས་གྲུབ་དབང་པོའི་ཞབས་སེན་སྤྱི་བོར་ལེགས་བསྙེན་ནས། །སྲིད་འདིར་རྙེད་དཀའི་དམ་ཆོས་ཀྱི། །རྨད་བྱུང་དགའ་སྟོན་ཐོབ་པའི་ཚུལ། །གསལ་བར་བརྗོད་འདིའི་ལེགས་བྱས་ཀྱིས། །བདག་གཞན་བྱང་ཆུབ་མཆོག་བརྙེས་ཤོག ༢ །འཇམ་མགོན་རིགས་ཀྱི་ཐིག་ལེ་ལས་འོང་དབང་བཅུ་མངའ་བའི་ཡེ་ཤེས་ཀྱི། །པུཎྜ་རཱི་ཀའི་ལང་ཚོ་གསར་པས་སྲིད་ཞིའི་དགེ་མཚན་བུང་བའི་ཚོགས། །གཅིག་ཅར་སྡུད་པའི་ངོ་མཚར་རོལ་མོས་ལྷར་བཅས་ཀུན་དགའི་མཆོག་སྦྱིན་ཕྱིར། །སྐྱབས་ཀུན་འདུས་པའི་སྙིང་པོར་མོས་བཅས་གུས་པའི་ཕྱག་གིས་ལེགས་བསྙེན་ནས། །གང་དེའི་ཞབས་སེན་འདབ་མ་དང་། །འགྲོགས་པའི་དད་གསུམ་བྷྲ་མ་རས། །དམ་ཆོས་སྦྲང་རྩི་ཅུང་ཟད་ཀྱིས། །སྐལ་བཟང་བྱས་གང་གཏམ་དུ་གླེང་། །སྲས་བཅས་རྣམ་འདྲེན་ཡོངས་ཀྱི་ཡབ་གཅིག་རྗེ་བཙུན་འཇམ་དཔལ་དཔའ་བོ་ཡི། །རིགས་ཀྱི་དགེ་མཚན་རྣམ་པ་མང་ལྡན་གྲུབ་པའི་ཐིག་ལེར་ཉེར་འཁྲུངས་ཏེ། །ཟབ་གསང་ཆོས་ཀྱི་རྒྱལ་ཐབས་སྐྱོང་ལ་འཛམ་གླིང་འདི་ན་གྲགས་འབར་བའི། །ཞབས་སེན་ཡིད་བཞིན་ནོར་བུའི་མེ་ལོང་སྤྱི་བོའི་རྒྱན་དུ་ལེགས་བསྙེན་ནས། །བྱིན་རླབས་ཁ་བས་རེག་པ་ཡི། །དམ་ཆོས་གདྒཱའི་དཔལ་མོའི་འཛུམ། །ཅུང་ཟད་ཐོབ་ཚུལ་བརྗོད་འདི་ཡིས། །གྲུབ་གཉིས་དགའ་སྟོན་རྒྱས་གྱུར་ཅིག ༣ །སྲིད་ཞིའི་དཔ༷ལ་གྱི་མངོན་པར་མཐོ་བའི་ཁ་སྦྱོར་བདུན་ལྡ༷ན་ཆུ་གཏེར་ལས། །སྣ་ཚོགས་སྤྲུལ་པའི་རྣམ་རོལ་རྨད་བྱུང་རི༷ན་ཆེ༷ན་དོ་ཤལ་གཡོ་བ་ཡིས། །ཟབ་རྒྱས་ཆོ༷ས་ཀྱི་གན་མཛོ༷ད་གཅིག་གྱུར་སྐལ་བཟང་འདོད་པ་འཇོ་བའི་གཏེར། །ཁྱབ་བདག་བླ་མའི་ཞབས་སེན་པདྨོར་གུས་པའི་ཕྱག་གིས་བཏུད་བྱས་ནས། །གང་དེའི་བཀའ་དྲིན་ཟླ་མེད་པ། །ཤར་གྱི་ཐིག་ལེའི་རྩེ་དགའ་ཡིས། །བདག་བློའི་ཀུནྡཱ་སྐྱོང་བའི་ཚུལ། །དད་པའི་ཡིད་ཀྱིས་བསྙད་ལ་ཕྱོགས། །དཔལ་ལྡན་ཡོན་ཏན་ཀུན་གྱི་དཔྱིད་གྱུར་དཔག་བསམ་དབང་པོའི་ལྗོན་པ་ནི། །རིན་ཆེན་དམ་པའི་ཆོས་ཀྱི་མཛོད་ཅེས་གཟུར་གནས་འཆི་མེད་དགའ་ཚལ་དུ། །གྲགས་པའི་སྤྲིང་ཡིག་དལ་གྱིས་སྒྲོགས་པས་སྐལ་བཟང་ལེགས་བྲིས་གཞོན་ནུའི་ཚོགས། །མགྲོན་དུ་གཉེར་བའི་འདོད་པ་མཆོག་སྦྱིན་གང་དེར་གུས་པས་ཉེར་བསྙེན་ནས། །ཟབ་གསང་བདུད་རྩིའི་ཐིག་པ་འགའ། །མགྲིན་པར་ཐོབ་པའི་རྟོགས་བརྗོད་ནི། །ཇི་བཞིན་སྨྲས་འདིས་བདག་གཞན་ཀུན། །ཕན་བདེའི་ངལ་འཚོ་རྒྱས་པར་ཤོག ༤ །བསོད་ནམས་ཡེ་ཤེས་བ་གམ་ལྷུན་སྟུག་བྱང་ཆུབ་སྤྱོད་པའི་ཟླ་ཤེལ་གྱིས། །ཉེ་བར་བརྟེན་བྱས་གྲུབ་གཉིས་རིང་པར་ཚུར་མཐོང་འགྲོ་བའི་གདུང་སེལ་སླད། །ཚུལ་ཁྲིམས་ཏིང་འཛིན་ཤེས་རབ་རྨད་བྱུང་ཆུ་གཏེར་ཆེན་པོའི་རྦ་རླབས་ཀྱི། །གདེངས་ཀས་མངོན་པར་བཏུད་པའི་དཔལ་ཅན་གང་དེར་གུས་པས་ཕྱག་བྱས་ནས། །རྗེ་བཙུན་རྡོ་རྗེ་བཙུན་མོ་ཡི། །གྲུབ་པའི་དགེ་མཚན་སྦྱིན་གྱུར་པ། །འཇིགས་མེད་འབྱུང་གནས་སྦས་པའི་སྡེས། །ལེགས་བཀྲལ་སྨིན་བྱེད་ཐོབ་ཚུལ་བརྗོད། །ཚུལ་གནས་ཁྲིམས་ཀྱི་དགའ་ཚལ་ལྷུན་སྟུག་བསོད་ནམས་བརླན་གྱིས་གྲུབ་པ་ལས། །རྣམ་དག་ཏིང་འཛིན་མེ་ཏོག་རབ་འབར་ཤེས་རབ་གསུམ་གྱི་འབྲས་བུས་གཏམས། །བསྔགས་འོས་ཕྲིན་ལས་བདུད་རྩིའི་ཟིལ་དངར་ཡིད་ཅན་ཀུན་གྱི་གདུང་སེལ་བ། །བཤེས་གཉེན་ལེགས་བྲིས་ལྗོན་པའི་སྤུན་ཟླར་དད་གསུམ་ཕྱག་གིས་ལེགས་བསྙེན་ནས། །རྡོ་རྗེ་ཐེག་པའི་རྒྱུད་སྡེ་བཞིའི། །སྒྲུབ་དཀྱིལ་ཕྲེང་བར་ལེགས་སྤེལ་བའི། །དབང་བསྐུར་ཐོབ་ཚུལ་བརྗོད་འདི་ཡིས། །གྲུབ་པའི་ལམ་བཟང་རྒྱས་གྱུར་ཅིག ༥ །ཟབ་གསང་ཆོས་ཚུལ་རྒྱ་མཚོའི་མངའ་བདག་རྗེ་བཙུན་བརྩེ་བ་ཆེན་པོ་ཡི། །རིང་ལུགས་རིན་ཆེན་ཕྲག་བརྒྱའི་གན་མཛོད་མཁྱེན་དཔྱོད་དཔུང་པས་བཟུང་ནས་སླར། །སྐལ་བཟང་འགྲོ་ལ་ཅི་དགར་སྩོལ་པའི་རྣམ་ཐར་རྨད་དུ་བྱུང་བའི་དཔྱིད། །གྲགས་པ་གསལ་ལྡན་ཁྱབ་བདག་བླ་མ་ཡོན་ཏན་དྲན་པས་བཏུད་བྱས་ནས། །གང་དེའི་བཀའ་དྲིན་ཉི་གཞོན་གྱིས། །བདག་བློའི་བནྡྷཱུ་ཛཱི་པ་ཀ །རྗེས་སུ་སྐྱོང་བའི་གཏམ་གྱི་སྒོ། །སྦྲང་རྩིའི་ཐིགས་པ་བཞིན་དུ་སྤྲོ། །རྣམ་མང་རིན་ཆེན་ཕྲག་བརྒྱས་གཏམས་པའི་ཆུ་གཏེར་ཆེན་པོའི་རྦ་རླབས་དང་། །རྩ་བརྟན་འབྲས་བུ་ཁུར་གྱིས་མངོན་མཐོ་དཔག་བསམ་དབང་པོའི་གྲགས་དཀར་གྱིས། །མཚོན་མིན་གང་གིས་རེག་པ་ཙམ་ནས་མཆོག་དང་ཐུན་མོང་དངོས་གྲུབ་ཀྱི། །འདོད་དགུ་གཅིག་ཅར་སྦྱིན་པའི་དཔལ་ཅན་བླ་མ་མཆོག་གི་ཞབས་བསྙེན་ནས། །དམ་པའི་ཆོས་ཀྱི་མེ་ཏོག་གི །ཕྲེང་བས་མགུལ་པ་མཛེས་བྱས་ཚུལ། །བརྗོད་འདིས་བདག་གཞན་ཀུན་མཁྱེན་གྱི། །ཐེམ་སྐས་མཆོག་ལ་འཛེགས་པར་ཤོག ༦ །སངས་རྒྱས་གཉིས་པ་པདྨ༷་ཀ་རའི་རིང་ལུགས་བདུད་རྩིའི་བཅུད་ལེན་གྱིས། །གྲུབ་གཉིས་ལང་ཚོ་དར་ལ་བབས་པས་བདུད་ཚོགས་འདུལ་བའི་མཐུ་སྟོབས་དང་། །བཤད་སྒྲུབ་བསྟན་པའི་རྒྱལ་མཚན་བསྒྲེང་མཁས་ཐུགས་རྗེའི་གཏེར་ཆེན་རྗེ་བླ་མའི། །ཞབས་མཐིལ་བནྡྷཱུ་ཛཱི་པའི་འཁྲི་ཤིང་བདག་བློའི་བུང་བས་གུས་བསྙེན་ནས། །གསང་ཆེན་གཏམ་གྱི་ལི་ཁྲིའི་རྡུལ། །ཅུང་ཟད་འཐུང་པ་ལས་བརྩམས་པའི། །བརྗོད་པ་དབྱངས་ཀྱི་ཡན་ལག་གིས། །མ་སྨད་རྒྱུད་མང་ལྟ་བུར་བསྒྲེངས། །མཁྱེན་པའི་པདྨོ་ཅིར་ཡང་དགོད་ཅིང་བརྩེ་བའི་མཚར་སྡུག་མཚུངས་པ་མེད། །ནུས་པས་བདུད་དཔུང་འདུལ་བའི་མཐུ་སྟོབས་རྡོ་རྗེའི་མེ་ཆར་རབ་གཡོ་བའི། །སྲིད་དང་ཞི་བའི་མིག་འཕྲུལ་གཅིག་པུ་སྔ་འགྱུར་བསྟན་པའི་རྒྱལ་མཚན་ཆེ། །གང་གི་ཞལ་གྱི་ཆུ་སྐྱེས་གཞོན་ནུ་འཛུམ་བཅས་རོལ་པས་རྗེས་བཟུང་ནས། །གསུང་གི་བདུད་རྩི་ཅུང་ཟད་ཙམ། །ཐོབ་ཚུལ་བརྗོད་འདིའི་ལེགས་བྱས་ཀྱིས། །གྲུབ་པ་མཆོག་གི་ལམ་བཟང་ལ། །དད་པའི་དབང་པོ་རྒྱས་གྱུར་ཅིག ༧ །དཔལ་ལྡན་བརྩེ་ཆེན་སྙིང་པོའི་བསྟན་འཛིན་འཆི་བ་མེད་པའི་དགའ་ཚལ་དུ། །མཁས་པའི་རྣམ་དཔྱོད་ཡལ་ག་རབ་གཡོ་གྲུབ་གཉིས་བདུད་རྩིའི་བརླན་ཆགས་པས། །འདི་དང་གཏན་གྱི་ཕུན་ཚོགས་འཇོ་ལ་ལྗོན་པ་མཆོག་གི་རྗེས་འགྲོ་བའི། །བསྔགས་འོས་མཛད་བཟང་དྲན་པའི་མོད་ནས་ཐལ་མོའི་ཨུཏྤལ་ཟུམ་བྱས་ཏེ། །གང་དེའི་བཀའ་དྲིན་ཟླ་ཤེལ་གྱིས། །བརླན་ལྡན་མཱ་ལཱ་ཡ་ཡི་ཤིང་། །དད་སྤྲོའི་འབིགས་བྱེད་རླུང་གཞོན་གྱིས། །བསྐུལ་བས་གཏམ་གྱི་བསུང་ཞིམ་སྤྲོ། །རིས་མེད་བསྟན་པའི་པད་ཚལ་ཡངས་པར་བློ་གྲོས་བུང་པས་ཉུལ་བ་ལས། །ཟབ་དོན་སྦྲང་རྩིའི་བཅུད་ལེན་འཛིན་བཟོད་གསང་ཆེན་གཏམ་གྱི་གླུ་དབྱངས་ཀྱིས། །འགྲོ་མང་ཕན་བདེའི་ངལ་འཚོར་འགོད་མཁས་རྣམ་ཐར་ཕུན་སུམ་ཚོགས་པའི་དཔྱིད། །གང་གི་ཐུགས་རྗེའི་ཆར་སྤྲིན་རོལ་པས་བདག་ཡིད་ཨུཏྤལ་རྗེས་བཟུང་ནས། །ཞི་བསིལ་བདུད་རྩིའི་ཟེགས་མ་ནི། །ཅུང་ཟད་བཏུང་པའི་ངང་ཚུལ་ལས། །བརྩམས་ཏེ་ཡི་གེའི་དོ་ཤལ་གསར། །སྦྱིན་འདིས་ཀུན་ཏུ་སྨིན་གྱུར་ཅིག ༨ །ངག་གི་དབང་ཕྱུག་ཡེ་ཤེས་ཉི་མ་ཚུར་མཐོང་སྐྱེ་རྒུའི་འཆི་མེད་ལམ། །ཤར་བའི་མོད་ནས་ས་གསུམ་མུན་སེལ་བརྩེ་ཆེན་སྙིང་པོ་ཡབ་སྲས་ཀྱིས། །ཆོས་ཀྱི་རྒྱལ་ཐབས་མཆོག་ལ་དབང་འབྱོར་རྡོ་རྗེ་འཛིན་པའི་གཙུག་རྒྱན་ཆེའི། །ཟླ་མེད་བཀའ་དྲིན་རྨད་བྱུང་དྲན་པས་གུས་པའི་མེ་ཏོག་འཐོར་དང་བཅས། །གང་དེའི་ཞལ་གྱི་བུམ་བཟང་ལས། །རྡོ་རྗེ་ནག་པོ་ཆེན་པོ་དང་། །ཞིང་སྐྱོང་སྟོབས་འཕྲོག་དབང་པོ་ཡི། །རྗེས་གནང་འགའ་ཞིག་ཐོབ་ཚུལ་འབྲི། །རིང་ནས་གོམས་པའི་རྣམ་ཐར་བ་དན་བརྩོན་པའི་རླུང་གིས་བསྐུལ་བའི་མཐུས། །ཟབ་གསང་སྙན་བརྒྱུད་མན་ངག་རྒྱ་མཚོ་རྣམ་དཔྱོད་རིན་ཆེན་གྲུ་བོ་ཡིས། །ཕ་མཐར་བརྒལ་བའི་བརྟུལ་ཞུགས་གྲུབ་པས་མཆོག་ཐུན་ནོར་བུའི་དགའ་སྟོན་ལ། །དབང་བསྒྱུར་ཆོས་ཀྱི་འབྱོར་པས་མངོན་མཛེས་གང་དེའི་བཀའ་དྲིན་ལ་བརྟེན་ནས། །རྒྱལ་བསྟན་སྐྱོང་བའི་སྲུང་མ་ཆེ། །རྣམ་པ་གཉིས་ཀྱི་རྗེས་གནང་བ། །བཀྲ་ཤིས་གྲངས་ཀྱིས་འབྱོར་པའི་གཏམས། །འདིས་ཀྱང་རང་གཞན་ཉེར་འཚོར་ཤོག ༩ །བགྲང་ཡས་གྲུབ་པ་མཆོག་གི་དེད་དཔོན་ངག་དབང་འཇམ་དཔལ་གཞོན་ནུའི་གར། །ཡོངས་རྫོགས་བསྟན་པའི་མངའ་བདག་གཅིག་གྱུར་རྣལ་འབྱོར་དབང་ཕྱུག་ས་སྐྱ་པ། །སློབ་མར་བཅས་པའི་སྙན་བརྒྱུད་རིན་ཆེན་ཐོས་བསམ་སྒོམ་པའི་དཔུང་པ་ཡིས། །འཛིན་མཁས་ཁྱབ་བདག་བླ་མ་མཆོག་དེར་མི་ཕྱེད་གུས་པའི་ཐལ་མོ་སྦྱོར། །གང་དེའི་གསུང་གསང་མཱ་ལཱ་ཡར། །ལེགས་འཁྲུངས་ཟབ་དོན་དཔལ་གྱི་དུམ། །ཆ་ཤས་ཙམ་ཞིག་གདུང་སེལ་གྱི། །ཉེར་འཚོར་ཐོབ་ཚུལ་འདི་ན་བརྗོད། །མཁས་དང་གྲུབ་པའི་ཡོངས་འཛིན་རྣམས་ལས་ཟབ་རྒྱས་ཆོས་ཚུལ་བདུད་རྩི་ཡིས། །བློ་གྲོས་ཞིང་ས་མཆོག་ཏུ་དགེ་བྱས་རིམ་གཉིས་ཏིང་འཛིན་དྲོད་གཤེར་གྱིས། །ཉམས་དང་རྟོགས་པའི་འཁྲི་ཤིང་གཡུར་ཟ་ངག་གི་དབང་ཕྱུག་ས་སྐྱ་པའི། །ངེས་གསང་སྙན་བརྒྱུད་རིན་ཆེན་འཛིན་བཟོད་སྔོན་མེད་དཔག་བསམ་ལྗོན་པ་དེར། །མཆོག་ཏུ་དྭང་བའི་བློ་གྲོས་ཀྱིས། །བསྙེན་ནས་ཆོས་ཚུལ་ཅུང་ཟད་ཙམ། །ཐོབ་པའི་རྟོགས་པ་བརྗོད་འདི་ཡིས། །གྲུབ་གཉིས་ལང་ཚོ་རྒྱས་གྱུར་ཅིག ༡༠ །ངག་གི་དབང་ཕྱུག་ཡེ་ཤེས་ཆུ་གཏེར་སྙིང་རྗེའི་བསྲུབས་ཐག་གིས་བསྐུལ་བས། །ལྷར་བཅས་ཀུན་དགའི་ཆ་ཤས་ཡོངས་གང་བཀྲ་ཤིས་མཚན་པའི་རི་མོ་ཅན། །ཡིད་སྲུབས་མུན་པའི་དཔུང་ཚོགས་འཇིལ་ལ་མཐུ་སྟོབས་རྨད་དུ་བྱུང་བའི་འོད། །སྤྲོ་མཁས་བསྟ༷ན་འཛི༷ན་སྨྲ་བའི་ཟླ་བ་ཕྲིན་ལས་བཟང་པོར་གུས་བཏུད་ནས། །གང་གི་གསུང་གསང་ནཱ་དའི་སྒྲ། །ལེགས་བཤད་རྒྱུད་དུ་འཕོས་པའི་དབྱངས། །ཐོབ་འདི་སྐལ་བཟང་ཆེ་ལྡན་ཕྱིར། །དད་སྤྲོའི་ཡི་གེའི་ཕྲེང་བར་སྤེལ། །སྲིད་དང་ཞི་བའི་དཔལ་གྱིས་མངོན་མཐོ་ནོར་བུའི་ཁྲི་འཕང་མཐོན་པོ་རུ། །མཁས་ཤིང་གྲུབ་པ་ཆེན་པོའི་རིགས་འཁྲུངས་ཁྱོད་ཞབས་པདྨ་བཞད་ཙམ་གྱིས། །བདུད་ཚོགས་འདུལ་བའི་ཕྲིན་ལས་རྨད་བྱུང་ཡོངས་རྫོགས་བསྟན་འགྲོའི་སྨན་གཅིག་པུ། །དབང་ཕྱུག་བརྒྱད་ལྡན་རྣམ་འདྲེན་མཆོག་གི་ཞབས་སེན་གཙུག་ཏུ་ཐོབ་པ་ལས། །དྲི་མེད་དམ་ཆོས་བཻ་ཌཱུཪྻའི། །ཕྲེང་བས་མགུལ་པ་མཛེས་བྱས་ཚུལ། །ཉུང་གསལ་ངག་གིས་བརྗོད་འདི་ཡིས། །ཕན་བདེའི་དཔལ་གྱིས་རོལ་པར་ཤོག ༡༡ །ངག་ལ་དབང་འབྱོར་ཆོས་ཕུང་རྒྱ་མཚོ་འཆད་རྩོད་རྩོམ་པའི་གྲགས་དཀར་གྱིས། །མཁས་ཀུན་དགའ་བའི་རྒྱལ་མཚན་གཅིག་གྱུར་རིན་ཆེན་ཚུལ་གནས་ཁྲིམས་ཀྱི་གཞིར། །གཞན་ཕན་ཨུཏྤལ་སྙེ་མ་གཡུར་ཟ་དབང་ཕྱུག་བརྒྱད་ཀྱི་ཟིལ་དངར་ཅན། །འགྲོ་འདུལ་ཕྲིན་ལས་བཟང་པོའི་མཆོག་སྦྱིན་དཔལ་ལྡན་བླ་མར་གུས་བཏུད་ནས། །དྭང་བའི་ཡིད་ཀྱི་ཆུ་གཏེར་ལ། །གང་གི་བཀའ་དྲིན་ཟླ་ཟེར་གྱིས། །རེག་པས་དད་སྤྲོའི་རྦ་རླབས་བཅས། །གཏམ་གྱི་བདུད་རྩི་ཅུང་ཟད་སྤྲོ། །གང་གི་རྣམ་ཐར་དཔག་པར་དཀའ་བ་བྱིས་པའི་ངག་གིས་བརྗོད་མི་བཟོད། །ཆ་ཤས་ཙམ་ཞིག་རྣ་བར་ལྷུང་ཀྱང་དད་སྤྲོའི་དབང་པོ་རྒྱས་གྱུར་པའི། །ཡོན་ཏན་མཚུངས་མེད་གྲགས་དཀར་ཡི་གེས་ལྷར་བཅས་ཀུན་དགའི་དཔལ་སྟེར་བ། །གསང་ཆེན་བསྟན་པའི་རྒྱལ་མཚན་གཅིག་པུའི་ཞབས་སེན་སྤྱི་བོར་ལེགས་བསྙེན་ནས། །དམ་པའི་ཆོས་ཀྱི་བཀའ་དྲིན་མཆོག །ཅུང་ཟད་ཐོབ་ཚུལ་བརྗོད་འདི་ཡི། །རྣམ་དཀར་འབིགས་བྱེད་རླུང་གཞོན་གྱིས། །སྒྲིབ་གཉིས་ཚ་གདུང་བཅིལ་གྱུར་ཅིག ༡༢ །ངག་གི་དབང་ཕྱུག་རིགས་ཀྱི་ཐིག་ལེར་མཚན་དཔེའི་ངོ་མཚར་སྣང་བའི་མོད། །ཀུན་དགའི་དགེ་མཚན་རྣམ་པ་མང་ལྡན་སྲིད་ཞིའི་ཕ་མཐར་སོང་བའི་གཏམ། །རིན་ཆེན་འབྱུང་གནས་གཏིང་མཐའ་ལས་བརྒལ་གྲུབ་གཉིས་དཔལ་གྱིས་མངོན་མཐོ་བའི། །ཞབས་མཐིལ་བཀྲ་ཤིས་འཁོར་ལོའི་རི་མོར་གུས་པའི་ཕྱག་གིས་མཆོད་བྱས་ནས། །གང་དེའི་ཞལ་གྱི་པདྨོ་ལས། །ལེགས་གསུངས་སྦྲང་རྩིའི་དོ་ཤལ་གྱིས། །སྐལ་བཟང་བྱས་པའི་གཏམ་གྱི་སྒོ། །དད་སྤྲོའི་བུང་བས་དབྱངས་སུ་ལེན། །གསང་སྔགས་རྒྱ་མཚོའི་གན་མཛོད་འཆང་བ་རྡོ་རྗེ་འཛིན་པའི་ཡེ་ཤེས་ཀྱི། །སྒྱུ་འཕྲུལ་དྲྭ་བའི་རོལ་རྩེད་གཅིག་པུས་ལྷར་བཅས་ཀུན་དགའི་མཆོག་སྦྱིན་ཕྱིར། །སྔོན་མེད་གྲུབ་པའི་རིན་ཆེན་ཉིད་ཅེས་ཕྱོགས་ཀྱི་བུ་མོའི་རྣ་ལུང་དུ། །བརྗོད་པ་སྙན་པའི་ཡི་གེས་མཛེས་བྱས་དཔལ་ལྡན་བླ་མའི་ཞབས་བསྙེན་ནས། །ཉིན་མོར་བྱེད་པའི་ཐིག་ཕྲེང་ནི། །པུཎྜ་རཱི་ཀས་བཏུང་པ་བཞིན། །ཞི་བསིལ་བདུད་རྩི་ཐོབ་པའི་ཚུལ། །བརྗོད་འདིས་དོན་གཉིས་འཇོ་བར་ཤོག ༡༣ །ངག་གི་དབང་ཕྱུག་རིགས་ཀུན་བདག་པོའི་ཡེ་ཤེས་སྐུ་ཡི་རོལ་རྩེད་ནི། །རྡོ་རྗེ་གསུམ་གྱི་སྣང་ཆར་ཤར་ལས་ཕན་བདེའི་འདོད་པ་འཇོ་བའི་ཚུལ། །རིན་ཆེན་བྱེ་བ་ཕྲག་བརྒྱས་མངོན་གཏམས་ཆུ་གཏེར་ཆེན་པོས་མཚོན་མིན་པའི། །རྣམ་འདྲེན་བླ་མའི་ཞབས་ཀྱི་པདྨོས་ཤིས་པའི་དགེ་མཚན་སྦྱིན་གྱུར་ཅིག །གང་གསུང་དཔྱིད་ཀས་བཟུང་བ་ལས། །དད་སྤྲོའི་མེ་ཏོག་འཛུམ་དང་བཅས། །དེ་ཚུལ་བརྗོད་པའི་ཏམྦུ་རཿ བློ་གྲོས་སོར་རྩེས་བསྒྲེང་བར་བྱ། །ངག་ལ་དབང་འབྱོར་རྣམ་པར་ཐར་པས་གསུང་གི་རྡོ་རྗེར་རྣམ་བརྟགས་ཤིང་། །རིན་ཆེན་བྱང་ཆུབ་སེམས་ལ་དབང་འབྱོར་ཕྱག་ན་པདྨོའི་སྤུན་ཟླ་ཅན། །ཐུགས་རྗེས་ཡིད་སྲུབས་དཔུང་ཚོགས་འཆིབ་མཛད་གསང་བ་འཛིན་པའི་བདག་པོ་ཞེས། །སྲས་བཅས་རྒྱལ་བས་རྟག་ཏུ་བསྔགས་དེའི་ཞབས་སེན་ནོར་བུའི་རེག་པ་ལས། །སྲིད་ཞིའི་ཕུན་ཚོགས་ཀུན་འཇོ་བའི། །རྨད་བྱུང་དམ་ཆོས་དགའ་སྟོན་མཆོག །ཐོབ་ཚུལ་ཇི་བཞིན་བརྗོད་པའི་དགེས། །ཕན་བདེའི་འབྱོར་པ་རྒྱས་གྱུར་ཅིག ༡༤ །རྒྱལ་བ་ཀུན་གྱི་མཁྱེན་རབ་ཕུང་པོ་ངག་དབང་ལྷ་ཡི་ཡེ་ཤེས་གར། །མཐའ་ཀླས་སྐལ་བཟང་གདུལ་བྱའི་ཚོགས་ལ་ཐེག་ཆེན་ཆོས་ཀྱི་དགའ་སྟོན་གྱིས། །སྲིད་དང་ཞི་བའི་བཀྲ་ཤིས་དགེ་མཚན་ཅིར་ཡང་སྦྱིན་པའི་དཔལ་མངའ་བ། །སྐྱབས་གནས་རིན་ཆེན་ཀུན་གྱི་ངོ་བོ་ཁྱབ་བདག་བླ་མས་ཤིས་པར་མཛོད། །གང་དེའི་གསུང་གསང་འབིགས་བྱེད་ཀྱི། །རླུང་གཞོན་དལ་བུར་རྒྱུ་བ་ཡིས། །སྲིད་པའི་རིམས་ནད་འཇིལ་མཛད་ཕྱིར། །དེ་ཚུལ་ཡི་གེའི་ཕྲེང་བ་སྤེལ། །ངག་གི་དབང་ཕྱུག་ཡེ་ཤེས་མཆོག་ནི་པདྨོ་ལྟ་བུར་དགོད་པ་ལས། །ཐེག་ཆེན་རིགས་ཀྱི་ལང་ཚོ་དར་བབས་མཚན་དཔེའི་དགེ་མཚན་བཀྲ་བའི་དཔྱིད། །ཕུན་ཚོགས་ཤིས་དགུའི་དངོས་པོ་བཏུད་བྱས་འཛམ་གླིང་བསྟན་འགྲོའི་རིན་ཆེན་མཆོག །གང་དེའི་ཞབས་མཐིལ་འཁོར་ལོའི་རི་མོ་གུས་པའི་ཕྱག་གིས་མཆོད་བྱས་ནས། །ཟབ་གསང་གདམས་པའི་བཀའ་དྲིན་གྱིས། །རྗེས་སུ་བཟུང་ཚུལ་བརྗོད་འདི་ཡིས། །སྐྱེ་ཀུན་དྲི་མེད་བསྟན་པ་ལ། །དད་གསུམ་བློ་གྲོས་རྒྱས་པར་ཤོག ༡༥ །མཐའ་ཀླས་ཡོན་ཏན་ཀུན་གྱི་དཔལ་གྱུར་ཚུལ་ཁྲིམས་དག་པའི་དཔག་བསམ་ནི། །གཞན་ཕྱིར་སྨོན་འཇུག་བྱང་སེམས་བརླན་ལྡན་མེ་ཏོག་དཀར་པོའི་དོ་ཤལ་ཅན། །རིམ་གཉིས་བཅུད་ལེན་གྲུབ་པའི་འཕྲིན་ཡིག་གཟུར་གནས་ཕྱོགས་ཀྱི་བུ་མོ་ཡི། །བརྗོད་པ་སྙན་པའི་ངག་ལས་ལེགས་འོངས་འདི་ན་དད་པའི་མིག་ངོར་སྣང་། །གང་དེའི་མཁྱེན་དང་བརྩེ་བ་ཡི། །ཛམྦུའི་སྙེ་མ་སྨིན་པ་ལས། །ལེགས་གསུངས་རིན་ཆེན་མཆོག་གི་དཔྱིད། ཅུང་ཟད་ཐོབ་ཚུལ་ཡི་གེར་འབྲི། །རྣམ་གྲོལ་བསླབ་གསུམ་ནོར་བུའི་དཔལ་ལྡན་མཁས་པའི་ངང་པ་འདུ་པའི་གཞི། །གྲུབ་གཉིས་གདེངས་ཅན་དུ་མས་མངོན་རྩེན་ཆུ་གཏེར་ཆེན་པོའི་ངང་ཚུལ་ཅན། །གཞན་ཕན་རྣམ་པར་དཀར་བའི་ཕྲིན་ལས་རྦ་རླབས་ཆལ་ཆིལ་དགོད་པ་ཡིས། །སྐལ་བཟང་དོན་གཉེར་ཚོགས་རྣམས་དགའ་བསྐྱེད་གང་དེ་ཉེ་བར་བསྙེན་བྱས་ནས། །གསང་ཆེན་སྨིན་པར་བྱེད་པའི་རྒྱུན། །རིག་བྱེད་གྲངས་ཀྱིས་སྒེག་པའི་གཏམ། །གཟུར་གནས་རྣ་བའི་བཅུད་ལེན་དུ། །སྨྲོས་འདིས་ཀུན་ཏུ་སྨན་གྱུར་ཅིག ༡༦ །རྣམ་མང་དགེ་མཚན་བྱེ་བ་ཕྲག་བརྒྱའི་ནོར་བུའི་རྦ་རླབས་རབ་གཡོ་བས། །སྐལ་བཟང་དོན་གཉེར་ཚོགས་རྣམས་འདུན་པའི་རྣམ་ཐར་རྨད་དུ་བྱུང་བའི་ཕྱིར། །སྨིན་གྲོལ་ཆོས་ཀྱི་རྒྱ་མཚོ་གཅིག་གྱུར་གང་དེར་དང་བའི་ཐལ་མོ་ཡིས། །བསྔགས་བརྗོད་མེ་ཏོག་དཀར་པོའི་གྲུ་ཆར་ཅུང་ཟད་འཐོར་བས་བསྙེན་བཀུར་ནས། །ཐུགས་བརྩེའི་ཡལ་ག་ཕྱོགས་འདི་རུ། །བསྐྱངས་པའི་ལེགས་བྱས་ཁོ་ན་ལས། །དམ་ཆོས་འབྲས་བཟང་རོ་བརྒྱ་པ། །ཐོབ་ཚུལ་གཏམ་གྱི་ཕྲེང་བར་སྤེལ། །མཁས་གྲུབ་རྒྱ་མཚོའི་བླ་མར་བསྔགས་འོས་བརྩེ་ཆེན་སྙིང་པོ་བརྒྱུད་བཅས་ཀྱི། །བཤད་སྒྲུབ་དམ་པའི་གྲིབ་བསིལ་སྣུམ་པོས་རིས་མེད་གདུལ་བྱ་དབུགས་འབྱིན་ཞིང་། །རྣམ་དཀར་དགེ་བའི་མེ་ཏོག་རབ་བཀྲ་སྐལ་བཟང་དོན་གཉེར་འདུན་པའི་གཞི། །དཔྱོད་ལྡན་རྒྱ་མཚོས་བསྔགས་འོས་གཅིག་གྱུར་ཡོངས་འཛིན་ལེགས་བྲིས་ལྗོན་པ་ཆེ། །གང་དེའི་ཐུགས་བརྩེས་སྐྱོང་བ་ལས། །དམ་ཆོས་ཐོབ་ཚུལ་ཏམྦུ་རཿ བློ་གྲོས་སོར་རྩེས་བསྒྲེང་པའི་མཐུས། །སྲིད་ཞིའི་ཕ་མཐར་སོན་པར་ཤོག ༡༧ །བགྲང་ཡས་བསྟན་སྲུང་རྒྱ་མཚོའི་དེད་དཔོན་ཞིང་སྐྱོང་སྟོབས་འཕྲོག་དབང་པོ་ཡི། །ཟབ་རྒྱས་གདམས་པའི་དགའ་སྟོན་སྩོལ་མཁས་རྡོ་རྗེ་འཛིན་པའི་གཙུག་རྒྱན་ཆེ། །ངག་ལ་དབང་འབྱོར་སྨིན་གྲོལ་རྒྱ་མཚོས་རིས་མེད་གདུལ་བྱའི་ཚོགས་རྣམས་ཀུན། །ཐར་པ་མཆོག་གི་ངལ་འཚོ་ལ་སྦྱར་རྣམ་འདྲེན་རྗེ་དེར་གུས་བཏུད་ནས། །གང་གི་བཀའ་དྲིན་དཔག་བསམ་ལས། །ཟབ་གསང་ཟིལ་དངར་ཐོབ་པའི་ཚུལ། །གསལ་བར་བརྗོད་པའི་ཏམྦུ་རཿ མིང་ཚིག་ཡི་གེའི་གཟུགས་ཀྱིས་རྒྱུ། །ངག་གི་དབང་ཕྱུག་སྨྲ་བའི་ཉི་མས་བློ་གྲོས་པད་དཀར་དགེ་བྱས་པས། །གསར་རྙིང་སྨིན་གྲོལ་གདམས་པའི་བདུད་རྩིའི་གཟུར་གནས་བུང་པའི་ཚོགས་རྣམས་ལ། །ཀུན་ཏུ་དགའ་བའི་སིམ་པ་སྟེར་མཁས་གྲགས་དཀར་རྒྱ་མཚོའི་རྦ་རླབས་ཅན། །སྔོན་མེད་ལེགས་བྲིས་ལྗོན་བཟང་མཆོག་དེར་སྒོ་གསུམ་གུས་པས་བསྙེན་བྱས་ནས། །ཞིང་སྐྱོང་དབང་པོ་ཞལ་བཞི་པའི། །ཟབ་རྒྱས་གདམས་པ་ཐོབ་པའི་ཚུལ། །བརྗོད་འདིས་ཡིད་སྲུབས་སྡེར་བཅས་ཀྱི། །སྙིང་གི་བརྟན་པ་འཕྲོག་པར་ཤོག ༡༨ །རྩོད་པའི་དུས་ཀྱི་ཐམས་ཅད་མཁྱེན་པ་རིན་ཆེན་གྲུབ་ཅེས་གྲགས་འབར་བའི། །ཆོས་ཀྱི་རྒྱལ་ཐབས་མཆོག་ལ་དབང་བསྒྱུར་འཆད་རྩོད་རྩོམ་པའི་འཛུམ་དཀར་གྱིས། །རིས་མེད་གཟུར་གནས་བློ་གསལ་རྒྱ་མཚོ་ཀུན་དགའི་སིམ་པ་སྟེར་མཁས་ཤིང་། །ཡོངས་རྫོགས་བསྟན་པའི་པད་ཚལ་སྐྱོང་མཛད་སྨྲ་བའི་ཉི་མ་མཆོག་དེར་འདུད། །གང་གི་ཐུགས་རྗེའི་སྤྲིན་དཀར་གྱི། །གོམ་སྟབས་མཛེས་པར་བསྒྱུར་བ་ལས། །དམ་ཆོས་སྦྲང་རྩིའི་གྲུ་ཆར་གྱིས། །དད་སྤྲོའི་ཨུཏྤལ་ཅིར་ཡང་དར། །རི༷ན་ཆེ༷ན་ཚུལ་གནས་ཁྲིམས་ཀྱི་རྩ་བརྟན་མ༷ང་ཐོ༷ས་ཡལ་འདབ་རབ་གཡོ་ཞིང་། །བློ༷་གས༷ལ་རྒྱ་མཚོའི་བརྟན་པ་འཕྲོག་མཁས་བསམ་བྱུང་པད་དཀར་ཅིར་ཡང་འཛུམ། །རྩེ་གཅིག་བསྒོམ་པའི་འབྲས་བུས་རབ་མཛེས་ཡོངས་རྫོགས་བསྟན་པའི་བཤད་སྒྲུབ་ཀྱི། །འཆི་མེད་གཞོན་ནུའི་ཚོགས་རྣམས་སྐྱོང་མཛད་དཔལ་ལྡན་རྡོ་རྗེ་འཛིན་དབང་དེའི། །ཞབས་ཀྱི་ཨུཏྤལ་དང་འགྲོགས་པས། །ཞི་བསིལ་སྦྲང་རྩི་ཐོབ་པའི་ཚུལ། །བརྗོད་འདིས་དོན་གཉེར་བྷྲ་མ་རའི། །སྙིང་ལ་ངལ་འཚོ་སྦྱིན་གྱུར་ཅིག ༡༩།རིགས་ཅན་གསུམ་གྱི་མོས་པའི་རྗེས་འགྲོ་མདོ་སྔགས་ཆོས་ཚུལ་རྒྱ་མཚོའི་བཅུད། །ཆེས་དཀོན་མཆོག་གི་རིན་ཆེན་སྩོལ་ལ་གདེངས་ཅན་དབང་པོའི་སྤུན་ཟླ་ཡིས། །ཡོངས་རྫོགས་བསྟན་པའི་རྫོགས་ལྡན་གསར་པ་རབ་ཏུ་རྒྱས་མཛད་དེ་ཡི་ཚེ། །མཁས་དང་གྲུབ་པའི་གཙུག་ཏོར་རྩེར་འཛེགས་དཔལ་ལྡན་བླ་མས་ཤིས་པར་མཛོད། །གང་དེའི་ཞལ་གྱི་སྤྲིན་མཛེས་ལས། །དམ་ཆོས་བདུད་རྩིའི་གྲུ་ཆར་གྱིས། །བདག་བློའི་པདྨོར་བྲན་པའི་ཚུལ། །ཅུང་ཟད་གསལ་བར་བརྗོད་འདིའོ། །སྐྱབས་གནས་རྨད་བྱུང་དཀོན་མཆོག་རྒྱ་མཚོའི་ཡེ་ཤེས་སྒྱུ་མའི་རོལ་རྩེད་ནི། །ཚུར་མཐོང་བསྟན་དང་འགྲོ་ལ་སྨན་སླད་རྡོ་རྗེ་སློབ་དཔོན་མཆོག་གི་ཟོལ། །མཁས་དང་གྲུབ་པའི་རྣམ་ཐར་རབ་གསལ་ཡི་གེས་ཉིན་མོར་བྱེད་པའི་གཟིས། །དགེ་ལེགས་རྟག་པའི་པདྨོ་རྒྱས་མཛད་གང་དེས་ཉེ་བར་རྗེས་བཟུང་ནས། །མདོ་སྔགས་ཆོས་ཚུལ་རྣམ་མང་གིས། །སྐལ་བཟང་བྱས་ཚུལ་བརྗོད་པའི་དགེས། །སྐྱེ་བ་ཀུན་ཏུ་རིས་མེད་པའི། །བསྟན་ལ་བྱ་བ་བྱེད་པར་ཤོག ༢༠ །ཤིན་ཏུ་ཞི་བ་དམ་པའི་ཆུ་གཏེར་སྤྲོས་པའི་ཕ་རོལ་ལས་བརྒལ་བར། །འཇུག་དང་ལྡང་བའི་མཚན་རྟོག་བྲལ་ཡང་རྣམ་ཀུན་མཆོག་ལྡན་ཡེ་ཤེས་ནི། །ཚད་མེད་སྙིང་རྗེའི་སྒྱུ་ཐབས་དང་འགྲོགས་སྲིད་པའི་ཁམས་འདིར་སྣང་བའི་མོད། །འགྲོ་ཀུན་ཕན་བདེའི་ངལ་འཚོ་ལ་སྦྱར་ཡོངས་འཛིན་ཚོགས་ལ་གུས་བཏུད་ནས། །དམིགས་པ་མེད་པའི་ཐུགས་རྗེ་དང་། །མཁྱེན་རབ་ཕ་མཐའ་ཡས་པ་ཡི། །དཔལ་ལྡན་བླ་མའི་ཚོགས་རྣམས་ཀྱིས། །རྗེས་སུ་བཟུང་ཚུལ་གསལ་བར་བརྗོད། །ཐུགས་ཀྱི་གསང་བ་རྣམ་པ་ཀུན་ལྡན་བདེར་གཤེགས་རྣམས་དང་རོ་གཅིག་ཀྱང་། །ཚུར་མཐོང་འགྲོ་བའི་སྙིང་རྗེས་བསྒྲལ་སླད་སུམ་ལྡན་རྡོ་རྗེ་འཛིན་པའི་ཟོལ། །དཔལ་ལྡན་བླ་མ་མཆོག་རྣམས་ཞབས་སེན་ཕན་བདེའི་དངོས་པོ་ཀུན་སྟེར་པའི། །ངོ་མཚར་ཨུཏྤལ་འདབ་བརྒྱ་གཡོ་བ་སྤྱི་བོའི་རྒྱན་དུ་ལེགས་བསྙེན་ནས། །དམ་པ་ཆོས་ཀྱི་དགའ་སྟོན་དཔྱིད། །ཐོབ་ཚུལ་གསལ་བར་བརྗོད་འདི་ཡིས། །སྲིད་དང་ཞི་བའི་དགེ་མཚན་གྱིས། །བཀྲ་ཤིས་སྣང་བ་འབར་གྱུར་ཅིག། ༢༡ །། ༈

[edit]

dpal ldan bla ma'i zhabs pad du bsnyen pas chos kyi bdud rtsi thob pa las byung ba'i gtam ngo mtshar dpyid kyi dga' ston/_ dpal ldan bla ma'i zhabs pad du bsnyen pas chos kyi bdud rtsi thob pa las byung ba'i gtam ngo mtshar dpyid kyi dga' ston ces bya ba/_/ A di prA pany+tsa par mi tas dAshAn+ta yod+harmakAyaHmAdway+YaM sap+tAtsubikab+habanadz+nyAnasaMb+hogakAyaMHbyan+tadamyAnAtsitanugabahuMrUpikaMnirmakAXyaXHpAlan+tushrImAMgurutsakulishaMd+hr-it+nab+hedaMtraMkAXyaXH_gzod nas spros pa'i pha rol las brgal shin tu zhi ba chos kyi sku/_/gnyis su med pa'i ye shes las byung kha sbyor bdun ldan longs spyod rdzogs/_/mtha' klas gdul bya'i mos pa'i rjes 'gro sna tshogs gzugs can sprul pa'i sku/_/sku gsum dbyer med dpal ldan bla ma rdo rje snyems ma'i bdag pos skyongs/_/bral smin yon tan bye ba'i gzhir gyur mtshan dpe'i mtshar sdug rdzogs pa'i sku/_/yan lag drug cu'i dbyangs snyan dang 'grogs lung rtogs chos phung rgya mtsho'i gsung /_/ji lta ji snyed gzigs pa'i ye shes rnam pa kun gyi mchog ldan thugs/_/mi zad rgyan gyi 'khor lor bsngags 'os rdzogs sangs rgyas des shis par mdzod/_/gang gis phan dgongs brtse ba'i rol mtsho cir yang 'phyur ba'i rba rlabs las/_/rmad byung zhi bsil bdud rtsi'i sprin phung rgyas par dkrigs pa'i 'jo sgeg gis/_/bslab gsum nor bu'i gru char 'bebs pas rigs can gsum gyi 'gro ba kun/_/thar pa mchog gi ngal 'tsho sbyin mdzad dam pa'i chos kyis dge legs stsol/_/bag med 'gog pa'i sa bon las 'khrungs mang thos rtsa ba rab brtan par/_/bsam byung rig lam pad+mo 'dzum zhing bsgom spang 'bras bu'i khur lci bas/_/sngon med yongs 'du sa brtol nyid ces grags pa'i yi ges mdzes 'bar ba/_/byang chub sems dpa'i dge 'dun tshogs kyis shis pa'i me tog char du bsnyil/_/mtha' klas sde snod rgyud sde'i chu gter mkhyen dpyod dpung pas bsrubs pa las/_/rgyal bstan rin chen do shal g.yo ba skal bzang 'gram par 'god mkhas pa'i/_/'phags yul paN grub rgya mtsho spyi dang rnal 'byor dbang phyug brgyud bcas kyi/_/zhabs sen dmar pa'i 'od rdul stug po mchog tu dwangs pa'i gtsug gis mchod/_/phul byung mkhyen dang brtse ba'i dpal ni gdengs can bsti gnas lta bur g.yo/_/de yis dam chos snang ba spro gang shar gyi thig le'i rjes su byed/_/des kyang don gnyis sim pa ster la ga bur dog pas nyer mtshon pa/_/gangs ljongs ris med mkhas grub tshogs kun dad pa'i phyag gis rtag tu bsnyen/_/lhag par rdor 'dzin bye ba'i gtsug rgyan pad dkar 'chang ba snying po'i zhabs/_/yongs rdzogs bstan pa'i dgongs don 'grel mkhas grub pa'i khyu mchog bsod nams rtse/_/rgyal rnams gsung gi rdo rje'i rgyud mang mgrin pa'i rtse dga' la chags pas/_/bsil ldan nges gsang dbyangs kyis gtams mdzad grags pa'i mtshan gyi yi ge brjid/_/mkhas kun dga' ba'i rgyal mtshan gcig gyur 'jam dpal mgon dngos paN+Di ta/_/zla med chos kyi 'khor los sgyur ba 'gro mgon 'phags pa'i mtshan can sogs/_/srid dang zhi ba'i gtsug tor rtser mdzes sa skya pa zhes grags dkar gyis/_/yid srubs dpung bcas mdzes pa zum pa'i rnam thar tshangs pa'i blo las 'das/_/kun mkhyen gsung gi zil dngar gyis reg khyod zhabs dag pa'i pad+mo ni/_/dga' ba'i grib bsil mngon par stug ldan phrin las bzang po'i ngal 'tsho'i dpyid/_/rdo rje 'chang chen mi yi gzugs can dpag bsam rkang 'thung e wa~M pa/__/slob mar bcas pa'i yon tan khur gyis nor 'dzin bu mo'ang 'dar ba bzhin/_/gzhan yang gsang chen gdams pa'i gur gum zab don dri bzang tshogs kyi gter/_/blo gsal bung pa'i gsos su 'byed las grub gnyis lang tsho dar babs pa'i/_/snyan brgyud rgya mtsho'i bstan pa'i srog shing tshar pa chos rje yab sras sogs/_/bsngags par 'os pa'i nyin byed kun la'ang mchog tu gus pa'i ut+pal 'dzum/_/khyad par byams brtse'i shar ri'i phrag pas nye bar drangs pa'i zla shel ni/_/rdo rje nam mkha'i thig le las 'ongs rmad byung yon tan chas rdzogs par/_/thugs rje'i bsil zer phrag brgyas sgeg khyod bdag rgyud 'chi med rtag pa'i grong /_/dbugs 'byin byed po gcig tu nges so byang chub bar du rjes su zungs/_/des sogs smin grol gdams pa'i 'bigs byed rlung /_/dal gyis babs pas srid pa'i 'thib bu kun/_/bcil nas phan bde'i ngal 'tsho la sbyar ba'i/_/yongs 'dzin bla ma'i tshogs la gus btud nas/_/gang gi drin las zab dang rgya che ba'i/_/chos kyi kat+pur rdul mang 'dzag pa can/_/thob pa'i spring yig ngo mtshar bdud rtsi'i 'od/_/rang gzhan dad spro'i chu gter 'phel phyir 'ong /_/rgyu des skal bzang 'chi ba med pa'i gzhon nu'i tshogs/_/snying la sprin sngon chun po g.yo ba'i tam+bu ras/_/reg pa rma bya'i bu mo'i lang tsho ji bzhin du/_/kun dga'i dus ston ches cher dar ba'i shis pa sgrubs/_/de slad gcig tu don gnyer pa'i/_/dpyod ldan raHyig gnyis pa'i tshogs/_/tshig don mtshar sdug ma smad pa'i/_/skyed mos tshal 'dir gar rtsen shig__/_!_rdo rje 'chang dbang ye shes chu gter byams pa'i bsrubs thag gis bskul bas/_/nam mkha'i mthas kyang mtshon par mi nus phan bde'i 'dod dgu 'jo ba'i dpyid/_/'chi med sku bzhi'i ngal 'tsho ster mkhas rnam 'dren bla ma dpag bsam dbang /_/gang de'i zhabs sen rnyed dka'i me tog dad pa'i phyag gis legs bsnyen nas/_/zab cing rgya che'i dam pa'i chos/_/cung zad thob tshul brjod 'di yis/_/bdag sogs 'gro kun byang chub bar/_/khyod zhabs pad+mos skyong gyur cig__1_/kun dga'i mtshan dpe'i mtshar sdug rab g.yo lhar bcas gtsug na mdzes pa'i sku/_/mkhas grub rgya mtsho'i rna ba'i dpyid gyur zhi bsil chos phung rgya mtsho'i gsung /_/ji lta ji snyed gzigs pa'i ye shes spros pa'i pha rol las brgal thugs/_/khyab bdag bla ma srid zhi'i dbang pos shis pa'i me tog char du bsnyil/_/gang de'i bka' drin rmad byung las/_/dam chos dga' ston thob pa'i tshul/_/brjod 'dod yid kyi dpyid dpal mos/_/ngag tshig ut+pal cir yang dgod/_/ji lta ji snyed chos kun gzigs pa'i mkhyen rab 'jam dpal gzhon nu'i spun/_/lhar bcas dga' ba'i phan bde'i mdzad bzang brtse chen pad dkar 'chang ba dngos/_/nus pas yid srubs dpung pa 'ching mdzad gsang ba 'dzin pa'i bdag po'i gzugs/_/rigs gsum 'dus zhal mkhas grub dbang po'i zhabs sen spyi bor legs bsnyen nas/_/srid 'dir rnyed dka'i dam chos kyi/_/rmad byung dga' ston thob pa'i tshul/_/gsal bar brjod 'di'i legs byas kyis/_/bdag gzhan byang chub mchog brnyes shog__2__/'jam mgon rigs kyi thig le las 'ong dbang bcu mnga' ba'i ye shes kyi/_/puN+Da rI ka'i lang tsho gsar pas srid zhi'i dge mtshan bung ba'i tshogs/_/gcig car sdud pa'i ngo mtshar rol mos lhar bcas kun dga'i mchog sbyin phyir/_/skyabs kun 'dus pa'i snying por mos bcas gus pa'i phyag gis legs bsnyen nas/_/gang de'i zhabs sen 'dab ma dang /_/'grogs pa'i dad gsum b+h+ra ma ras/_/dam chos sbrang rtsi cung zad kyis/_/skal bzang byas gang gtam du gleng /_/sras bcas rnam 'dren yongs kyi yab gcig rje btsun 'jam dpal dpa' bo yi/_/rigs kyi dge mtshan rnam pa mang ldan grub pa'i thig ler nyer 'khrungs te/_/zab gsang chos kyi rgyal thabs skyong la 'dzam gling 'di na grags 'bar ba'i/_/zhabs sen yid bzhin nor bu'i me long spyi bo'i rgyan du legs bsnyen nas/_/byin rlabs kha bas reg pa yi/_/dam chos gad+gA'i dpal mo'i 'dzum/_/cung zad thob tshul brjod 'di yis/_/grub gnyis dga' ston rgyas gyur cig__3__/srid zhi'i dpaXl gyi mngon par mtho ba'i kha sbyor bdun ldaXn chu gter las/_/sna tshogs sprul pa'i rnam rol rmad byung riXn cheXn do shal g.yo ba yis/_/zab rgyas choXs kyi gan mdzoXd gcig gyur skal bzang 'dod pa 'jo ba'i gter/_/khyab bdag bla ma'i zhabs sen pad+mor gus pa'i phyag gis btud byas nas/_/gang de'i bka' drin zla med pa/_/shar gyi thig le'i rtse dga' yis/_/bdag blo'i kun+dA skyong ba'i tshul/_/dad pa'i yid kyis bsnyad la phyogs/_/dpal ldan yon tan kun gyi dpyid gyur dpag bsam dbang po'i ljon pa ni/_/rin chen dam pa'i chos kyi mdzod ces gzur gnas 'chi med dga' tshal du/_/grags pa'i spring yig dal gyis sgrogs pas skal bzang legs bris gzhon nu'i tshogs/_/mgron du gnyer ba'i 'dod pa mchog sbyin gang der gus pas nyer bsnyen nas/_/zab gsang bdud rtsi'i thig pa 'ga'/_/mgrin par thob pa'i rtogs brjod ni/_/ji bzhin smras 'dis bdag gzhan kun/_/phan bde'i ngal 'tsho rgyas par shog__4_/bsod nams ye shes ba gam lhun stug byang chub spyod pa'i zla shel gyis/_/nye bar brten byas grub gnyis ring par tshur mthong 'gro ba'i gdung sel slad/_/tshul khrims ting 'dzin shes rab rmad byung chu gter chen po'i rba rlabs kyi/_/gdengs kas mngon par btud pa'i dpal can gang der gus pas phyag byas nas/_/rje btsun rdo rje btsun mo yi/_/grub pa'i dge mtshan sbyin gyur pa/_/'jigs med 'byung gnas sbas pa'i sdes/_/legs bkral smin byed thob tshul brjod/_/tshul gnas khrims kyi dga' tshal lhun stug bsod nams brlan gyis grub pa las/_/rnam dag ting 'dzin me tog rab 'bar shes rab gsum gyi 'bras bus gtams/_/bsngags 'os phrin las bdud rtsi'i zil dngar yid can kun gyi gdung sel ba/_/bshes gnyen legs bris ljon pa'i spun zlar dad gsum phyag gis legs bsnyen nas/_/rdo rje theg pa'i rgyud sde bzhi'i/_/sgrub dkyil phreng bar legs spel ba'i/_/dbang bskur thob tshul brjod 'di yis/_/grub pa'i lam bzang rgyas gyur cig__5__/zab gsang chos tshul rgya mtsho'i mnga' bdag rje btsun brtse ba chen po yi/_/ring lugs rin chen phrag brgya'i gan mdzod mkhyen dpyod dpung pas bzung nas slar/_/skal bzang 'gro la ci dgar stsol pa'i rnam thar rmad du byung ba'i dpyid/_/grags pa gsal ldan khyab bdag bla ma yon tan dran pas btud byas nas/_/gang de'i bka' drin nyi gzhon gyis/_/bdag blo'i ban+d+hU dzI pa ka__/rjes su skyong ba'i gtam gyi sgo/_/sbrang rtsi'i thigs pa bzhin du spro/_/rnam mang rin chen phrag brgyas gtams pa'i chu gter chen po'i rba rlabs dang /_/rtsa brtan 'bras bu khur gyis mngon mtho dpag bsam dbang po'i grags dkar gyis/_/mtshon min gang gis reg pa tsam nas mchog dang thun mong dngos grub kyi/_/'dod dgu gcig car sbyin pa'i dpal can bla ma mchog gi zhabs bsnyen nas/_/dam pa'i chos kyi me tog gi__/phreng bas mgul pa mdzes byas tshul/_/brjod 'dis bdag gzhan kun mkhyen gyi/_/them skas mchog la 'dzegs par shog__6__/sangs rgyas gnyis pa pad+maX ka ra'i ring lugs bdud rtsi'i bcud len gyis/_/grub gnyis lang tsho dar la babs pas bdud tshogs 'dul ba'i mthu stobs dang /_/bshad sgrub bstan pa'i rgyal mtshan bsgreng mkhas thugs rje'i gter chen rje bla ma'i/_/zhabs mthil ban+d+hU dzI pa'i 'khri shing bdag blo'i bung bas gus bsnyen nas/_/gsang chen gtam gyi li khri'i rdul/_/cung zad 'thung pa las brtsams pa'i/_/brjod pa dbyangs kyi yan lag gis/_/ma smad rgyud mang lta bur bsgrengs/_/mkhyen pa'i pad+mo cir yang dgod cing brtse ba'i mtshar sdug mtshungs pa med/_/nus pas bdud dpung 'dul ba'i mthu stobs rdo rje'i me char rab g.yo ba'i/_/srid dang zhi ba'i mig 'phrul gcig pu snga 'gyur bstan pa'i rgyal mtshan che/_/gang gi zhal gyi chu skyes gzhon nu 'dzum bcas rol pas rjes bzung nas/_/gsung gi bdud rtsi cung zad tsam/_/thob tshul brjod 'di'i legs byas kyis/_/grub pa mchog gi lam bzang la/_/dad pa'i dbang po rgyas gyur cig__7__/dpal ldan brtse chen snying po'i bstan 'dzin 'chi ba med pa'i dga' tshal du/_/mkhas pa'i rnam dpyod yal ga rab g.yo grub gnyis bdud rtsi'i brlan chags pas/_/'di dang gtan gyi phun tshogs 'jo la ljon pa mchog gi rjes 'gro ba'i/_/bsngags 'os mdzad bzang dran pa'i mod nas thal mo'i ut+pal zum byas te/_/gang de'i bka' drin zla shel gyis/_/brlan ldan mA lA ya yi shing /_/dad spro'i 'bigs byed rlung gzhon gyis/_/bskul bas gtam gyi bsung zhim spro/_/ris med bstan pa'i pad tshal yangs par blo gros bung pas nyul ba las/_/zab don sbrang rtsi'i bcud len 'dzin bzod gsang chen gtam gyi glu dbyangs kyis/_/'gro mang phan bde'i ngal 'tshor 'god mkhas rnam thar phun sum tshogs pa'i dpyid/_/gang gi thugs rje'i char sprin rol pas bdag yid ut+pal rjes bzung nas/_/zhi bsil bdud rtsi'i zegs ma ni/_/cung zad btung pa'i ngang tshul las/_/brtsams te yi ge'i do shal gsar/_/sbyin 'dis kun tu smin gyur cig__8__/ngag gi dbang phyug ye shes nyi ma tshur mthong skye rgu'i 'chi med lam/_/shar ba'i mod nas sa gsum mun sel brtse chen snying po yab sras kyis/_/chos kyi rgyal thabs mchog la dbang 'byor rdo rje 'dzin pa'i gtsug rgyan che'i/_/zla med bka' drin rmad byung dran pas gus pa'i me tog 'thor dang bcas/_/gang de'i zhal gyi bum bzang las/_/rdo rje nag po chen po dang /_/zhing skyong stobs 'phrog dbang po yi/_/rjes gnang 'ga' zhig thob tshul 'bri/_/ring nas goms pa'i rnam thar ba dan brtson pa'i rlung gis bskul ba'i mthus/_/zab gsang snyan brgyud man ngag rgya mtsho rnam dpyod rin chen gru bo yis/_/pha mthar brgal ba'i brtul zhugs grub pas mchog thun nor bu'i dga' ston la/_/dbang bsgyur chos kyi 'byor pas mngon mdzes gang de'i bka' drin la brten nas/_/rgyal bstan skyong ba'i srung ma che/_/rnam pa gnyis kyi rjes gnang ba/_/bkra shis grangs kyis 'byor pa'i gtams/_/'dis kyang rang gzhan nyer 'tshor shog__9_/bgrang yas grub pa mchog gi ded dpon ngag dbang 'jam dpal gzhon nu'i gar/_/yongs rdzogs bstan pa'i mnga' bdag gcig gyur rnal 'byor dbang phyug sa skya pa/_/slob mar bcas pa'i snyan brgyud rin chen thos bsam sgom pa'i dpung pa yis/_/'dzin mkhas khyab bdag bla ma mchog der mi phyed gus pa'i thal mo sbyor/_/gang de'i gsung gsang mA lA yar/_/legs 'khrungs zab don dpal gyi dum/_/cha shas tsam zhig gdung sel gyi/_/nyer 'tshor thob tshul 'di na brjod/_/mkhas dang grub pa'i yongs 'dzin rnams las zab rgyas chos tshul bdud rtsi yis/_/blo gros zhing sa mchog tu dge byas rim gnyis ting 'dzin drod gsher gyis/_/nyams dang rtogs pa'i 'khri shing g.yur za ngag gi dbang phyug sa skya pa'i/_/nges gsang snyan brgyud rin chen 'dzin bzod sngon med dpag bsam ljon pa der/_/mchog tu dwang ba'i blo gros kyis/_/bsnyen nas chos tshul cung zad tsam/_/thob pa'i rtogs pa brjod 'di yis/_/grub gnyis lang tsho rgyas gyur cig__10__/ngag gi dbang phyug ye shes chu gter snying rje'i bsrubs thag gis bskul bas/_/lhar bcas kun dga'i cha shas yongs gang bkra shis mtshan pa'i ri mo can/_/yid srubs mun pa'i dpung tshogs 'jil la mthu stobs rmad du byung ba'i 'od/_/spro mkhas bstaXn 'dziXn smra ba'i zla ba phrin las bzang por gus btud nas/_/gang gi gsung gsang nA da'i sgra/_/legs bshad rgyud du 'phos pa'i dbyangs/_/thob 'di skal bzang che ldan phyir/_/dad spro'i yi ge'i phreng bar spel/_/srid dang zhi ba'i dpal gyis mngon mtho nor bu'i khri 'phang mthon po ru/_/mkhas shing grub pa chen po'i rigs 'khrungs khyod zhabs pad+ma bzhad tsam gyis/_/bdud tshogs 'dul ba'i phrin las rmad byung yongs rdzogs bstan 'gro'i sman gcig pu/_/dbang phyug brgyad ldan rnam 'dren mchog gi zhabs sen gtsug tu thob pa las/_/dri med dam chos bai DUR+Ya'i/_/phreng bas mgul pa mdzes byas tshul/_/nyung gsal ngag gis brjod 'di yis/_/phan bde'i dpal gyis rol par shog__11__/ngag la dbang 'byor chos phung rgya mtsho 'chad rtsod rtsom pa'i grags dkar gyis/_/mkhas kun dga' ba'i rgyal mtshan gcig gyur rin chen tshul gnas khrims kyi gzhir/_/gzhan phan ut+pal snye ma g.yur za dbang phyug brgyad kyi zil dngar can/_/'gro 'dul phrin las bzang po'i mchog sbyin dpal ldan bla mar gus btud nas/_/dwang ba'i yid kyi chu gter la/_/gang gi bka' drin zla zer gyis/_/reg pas dad spro'i rba rlabs bcas/_/gtam gyi bdud rtsi cung zad spro/_/gang gi rnam thar dpag par dka' ba byis pa'i ngag gis brjod mi bzod/_/cha shas tsam zhig rna bar lhung kyang dad spro'i dbang po rgyas gyur pa'i/_/yon tan mtshungs med grags dkar yi ges lhar bcas kun dga'i dpal ster ba/_/gsang chen bstan pa'i rgyal mtshan gcig pu'i zhabs sen spyi bor legs bsnyen nas/_/dam pa'i chos kyi bka' drin mchog__/cung zad thob tshul brjod 'di yi/_/rnam dkar 'bigs byed rlung gzhon gyis/_/sgrib gnyis tsha gdung bcil gyur cig__12__/ngag gi dbang phyug rigs kyi thig ler mtshan dpe'i ngo mtshar snang ba'i mod/_/kun dga'i dge mtshan rnam pa mang ldan srid zhi'i pha mthar song ba'i gtam/_/rin chen 'byung gnas gting mtha' las brgal grub gnyis dpal gyis mngon mtho ba'i/_/zhabs mthil bkra shis 'khor lo'i ri mor gus pa'i phyag gis mchod byas nas/_/gang de'i zhal gyi pad+mo las/_/legs gsungs sbrang rtsi'i do shal gyis/_/skal bzang byas pa'i gtam gyi sgo/_/dad spro'i bung bas dbyangs su len/_/gsang sngags rgya mtsho'i gan mdzod 'chang ba rdo rje 'dzin pa'i ye shes kyi/_/sgyu 'phrul drwa ba'i rol rtsed gcig pus lhar bcas kun dga'i mchog sbyin phyir/_/sngon med grub pa'i rin chen nyid ces phyogs kyi bu mo'i rna lung du/_/brjod pa snyan pa'i yi ges mdzes byas dpal ldan bla ma'i zhabs bsnyen nas/_/nyin mor byed pa'i thig phreng ni/_/puN+Da rI kas btung pa bzhin/_/zhi bsil bdud rtsi thob pa'i tshul/_/brjod 'dis don gnyis 'jo bar shog__13__/ngag gi dbang phyug rigs kun bdag po'i ye shes sku yi rol rtsed ni/_/rdo rje gsum gyi snang char shar las phan bde'i 'dod pa 'jo ba'i tshul/_/rin chen bye ba phrag brgyas mngon gtams chu gter chen pos mtshon min pa'i/_/rnam 'dren bla ma'i zhabs kyi pad+mos shis pa'i dge mtshan sbyin gyur cig__/gang gsung dpyid kas bzung ba las/_/dad spro'i me tog 'dzum dang bcas/_/de tshul brjod pa'i tam+bu raH__blo gros sor rtses bsgreng bar bya/_/ngag la dbang 'byor rnam par thar pas gsung gi rdo rjer rnam brtags shing /_/rin chen byang chub sems la dbang 'byor phyag na pad+mo'i spun zla can/_/thugs rjes yid srubs dpung tshogs 'chib mdzad gsang ba 'dzin pa'i bdag po zhes/_/sras bcas rgyal bas rtag tu bsngags de'i zhabs sen nor bu'i reg pa las/_/srid zhi'i phun tshogs kun 'jo ba'i/_/rmad byung dam chos dga' ston mchog__/thob tshul ji bzhin brjod pa'i dges/_/phan bde'i 'byor pa rgyas gyur cig__14__/rgyal ba kun gyi mkhyen rab phung po ngag dbang lha yi ye shes gar/_/mtha' klas skal bzang gdul bya'i tshogs la theg chen chos kyi dga' ston gyis/_/srid dang zhi ba'i bkra shis dge mtshan cir yang sbyin pa'i dpal mnga' ba/_/skyabs gnas rin chen kun gyi ngo bo khyab bdag bla mas shis par mdzod/_/gang de'i gsung gsang 'bigs byed kyi/_/rlung gzhon dal bur rgyu ba yis/_/srid pa'i rims nad 'jil mdzad phyir/_/de tshul yi ge'i phreng ba spel/_/ngag gi dbang phyug ye shes mchog ni pad+mo lta bur dgod pa las/_/theg chen rigs kyi lang tsho dar babs mtshan dpe'i dge mtshan bkra ba'i dpyid/_/phun tshogs shis dgu'i dngos po btud byas 'dzam gling bstan 'gro'i rin chen mchog__/gang de'i zhabs mthil 'khor lo'i ri mo gus pa'i phyag gis mchod byas nas/_/zab gsang gdams pa'i bka' drin gyis/_/rjes su bzung tshul brjod 'di yis/_/skye kun dri med bstan pa la/_/dad gsum blo gros rgyas par shog__15_/mtha' klas yon tan kun gyi dpal gyur tshul khrims dag pa'i dpag bsam ni/_/gzhan phyir smon 'jug byang sems brlan ldan me tog dkar po'i do shal can/_/rim gnyis bcud len grub pa'i 'phrin yig gzur gnas phyogs kyi bu mo yi/_/brjod pa snyan pa'i ngag las legs 'ongs 'di na dad pa'i mig ngor snang /_/gang de'i mkhyen dang brtse ba yi/_/dzam+bu'i snye ma smin pa las/_/legs gsungs rin chen mchog gi dpyid/_cung zad thob tshul yi ger 'bri/_/rnam grol bslab gsum nor bu'i dpal ldan mkhas pa'i ngang pa 'du pa'i gzhi/_/grub gnyis gdengs can du mas mngon rtsen chu gter chen po'i ngang tshul can/_/gzhan phan rnam par dkar ba'i phrin las rba rlabs chal chil dgod pa yis/_/skal bzang don gnyer tshogs rnams dga' bskyed gang de nye bar bsnyen byas nas/_/gsang chen smin par byed pa'i rgyun/_/rig byed grangs kyis sgeg pa'i gtam/_/gzur gnas rna ba'i bcud len du/_/smros 'dis kun tu sman gyur cig__16__/rnam mang dge mtshan bye ba phrag brgya'i nor bu'i rba rlabs rab g.yo bas/_/skal bzang don gnyer tshogs rnams 'dun pa'i rnam thar rmad du byung ba'i phyir/_/smin grol chos kyi rgya mtsho gcig gyur gang der dang ba'i thal mo yis/_/bsngags brjod me tog dkar po'i gru char cung zad 'thor bas bsnyen bkur nas/_/thugs brtse'i yal ga phyogs 'di ru/_/bskyangs pa'i legs byas kho na las/_/dam chos 'bras bzang ro brgya pa/_/thob tshul gtam gyi phreng bar spel/_/mkhas grub rgya mtsho'i bla mar bsngags 'os brtse chen snying po brgyud bcas kyi/_/bshad sgrub dam pa'i grib bsil snum pos ris med gdul bya dbugs 'byin zhing /_/rnam dkar dge ba'i me tog rab bkra skal bzang don gnyer 'dun pa'i gzhi/_/dpyod ldan rgya mtshos bsngags 'os gcig gyur yongs 'dzin legs bris ljon pa che/_/gang de'i thugs brtses skyong ba las/_/dam chos thob tshul tam+bu raH__blo gros sor rtses bsgreng pa'i mthus/_/srid zhi'i pha mthar son par shog__17_/bgrang yas bstan srung rgya mtsho'i ded dpon zhing skyong stobs 'phrog dbang po yi/_/zab rgyas gdams pa'i dga' ston stsol mkhas rdo rje 'dzin pa'i gtsug rgyan che/_/ngag la dbang 'byor smin grol rgya mtshos ris med gdul bya'i tshogs rnams kun/_/thar pa mchog gi ngal 'tsho la sbyar rnam 'dren rje der gus btud nas/_/gang gi bka' drin dpag bsam las/_/zab gsang zil dngar thob pa'i tshul/_/gsal bar brjod pa'i tam+bu raH__ming tshig yi ge'i gzugs kyis rgyu/_/ngag gi dbang phyug smra ba'i nyi mas blo gros pad dkar dge byas pas/_/gsar rnying smin grol gdams pa'i bdud rtsi'i gzur gnas bung pa'i tshogs rnams la/_/kun tu dga' ba'i sim pa ster mkhas grags dkar rgya mtsho'i rba rlabs can/_/sngon med legs bris ljon bzang mchog der sgo gsum gus pas bsnyen byas nas/_/zhing skyong dbang po zhal bzhi pa'i/_/zab rgyas gdams pa thob pa'i tshul/_/brjod 'dis yid srubs sder bcas kyi/_/snying gi brtan pa 'phrog par shog__18__/rtsod pa'i dus kyi thams cad mkhyen pa rin chen grub ces grags 'bar ba'i/_/chos kyi rgyal thabs mchog la dbang bsgyur 'chad rtsod rtsom pa'i 'dzum dkar gyis/_/ris med gzur gnas blo gsal rgya mtsho kun dga'i sim pa ster mkhas shing /_/yongs rdzogs bstan pa'i pad tshal skyong mdzad smra ba'i nyi ma mchog der 'dud/_/gang gi thugs rje'i sprin dkar gyi/_/gom stabs mdzes par bsgyur ba las/_/dam chos sbrang rtsi'i gru char gyis/_/dad spro'i ut+pal cir yang dar/_/riXn cheXn tshul gnas khrims kyi rtsa brtan maXng thoXs yal 'dab rab g.yo zhing /_/bloX gsaXl rgya mtsho'i brtan pa 'phrog mkhas bsam byung pad dkar cir yang 'dzum/_/rtse gcig bsgom pa'i 'bras bus rab mdzes yongs rdzogs bstan pa'i bshad sgrub kyi/_/'chi med gzhon nu'i tshogs rnams skyong mdzad dpal ldan rdo rje 'dzin dbang de'i/_/zhabs kyi ut+pal dang 'grogs pas/_/zhi bsil sbrang rtsi thob pa'i tshul/_/brjod 'dis don gnyer b+h+ra ma ra'i/_/snying la ngal 'tsho sbyin gyur cig__19/rigs can gsum gyi mos pa'i rjes 'gro mdo sngags chos tshul rgya mtsho'i bcud/_/ches dkon mchog gi rin chen stsol la gdengs can dbang po'i spun zla yis/_/yongs rdzogs bstan pa'i rdzogs ldan gsar pa rab tu rgyas mdzad de yi tshe/_/mkhas dang grub pa'i gtsug tor rtser 'dzegs dpal ldan bla mas shis par mdzod/_/gang de'i zhal gyi sprin mdzes las/_/dam chos bdud rtsi'i gru char gyis/_/bdag blo'i pad+mor bran pa'i tshul/_/cung zad gsal bar brjod 'di'o/_/skyabs gnas rmad byung dkon mchog rgya mtsho'i ye shes sgyu ma'i rol rtsed ni/_/tshur mthong bstan dang 'gro la sman slad rdo rje slob dpon mchog gi zol/_/mkhas dang grub pa'i rnam thar rab gsal yi ges nyin mor byed pa'i gzis/_/dge legs rtag pa'i pad+mo rgyas mdzad gang des nye bar rjes bzung nas/_/mdo sngags chos tshul rnam mang gis/_/skal bzang byas tshul brjod pa'i dges/_/skye ba kun tu ris med pa'i/_/bstan la bya ba byed par shog__20_/shin tu zhi ba dam pa'i chu gter spros pa'i pha rol las brgal bar/_/'jug dang ldang ba'i mtshan rtog bral yang rnam kun mchog ldan ye shes ni/_/tshad med snying rje'i sgyu thabs dang 'grogs srid pa'i khams 'dir snang ba'i mod/_/'gro kun phan bde'i ngal 'tsho la sbyar yongs 'dzin tshogs la gus btud nas/_/dmigs pa med pa'i thugs rje dang /_/mkhyen rab pha mtha' yas pa yi/_/dpal ldan bla ma'i tshogs rnams kyis/_/rjes su bzung tshul gsal bar brjod/_/thugs kyi gsang ba rnam pa kun ldan bder gshegs rnams dang ro gcig kyang /_/tshur mthong 'gro ba'i snying rjes bsgral slad sum ldan rdo rje 'dzin pa'i zol/_/dpal ldan bla ma mchog rnams zhabs sen phan bde'i dngos po kun ster pa'i/_/ngo mtshar ut+pal 'dab brgya g.yo ba spyi bo'i rgyan du legs bsnyen nas/_/dam pa chos kyi dga' ston dpyid/_/thob tshul gsal bar brjod 'di yis/_/srid dang zhi ba'i dge mtshan gyis/_/bkra shis snang ba 'bar gyur cig/_21__//_!