JKW-KABUM-20-WA-001-053

First section in volume. Back to Volume PageLast section in volume.

Wylie title		page=1
Location	mkhyen brtse'i bka' 'bum Volume 1, sde tshan 53, Pages (Folios to )
Author	འཇམ་དབྱངས་མཁྱེན་བརྩེའི་དབང་པོ་
Less details More details
Citation
Genre	Collected Works - Selected - bka' 'bum

Tibetan Text

Wylie

[edit]

སྲིད་སྐྱོང་རྭ་བསྒྲེང་ནོ་མི་ཧན་ཆེན་པོར་ལེགས་འབུལ་གྱི་ཡི་གེ། སྲིད་སྐྱོང་རྭ་བསྒྲེང་ནོ་མི་ཧན་ཆེན་པོར་ལེགས་འབུལ་གྱི་ཡི་གེ་སྙན་པའི་རྒྱུད་མང་ཞེས་བྱ་བ། རྫྙཱནཀལྤམཉྫརཱིཙསཱཧཻཿ། བཱརདཧིཏཾསུཁཏྲིལོཀེ པཱདཔདྨཀལྤམཔྡྷིཛཱིབྱཱཏ྄། །བསོད་ནམས་དམ་པའི་ཆུ་གཏེར་རྨད་བྱུང་བ། །ཡེ་ཤེས་དཔག་བསམ་སྙེ་མ་དང་འགྲོགས་པས། །འཇིག་རྟེན་གསུམ་ན་ཕན་བདེའི་མཆོག་སྦྱིན་པའི། །ཞབས་པད་བསྐལ་པ་རྒྱ་མཚོར་འཚོ་གཞེས་གསོལ། ༡ །མི་ཕྱེད་གུས་པའི་ཕྱག་དང་བཅས་ཏེ་གསོལ་བ། །ཨེ་མ་འོད་གསལ་རྣམ་པ་ཀུན་ལྡན་ལས། །ཟུང་འཇུག་རྡོ་རྗེའི་སྣང་བརྙན་སྲིད་པ་ན། །རྒྱལ་བའི་མྱུ་གུ་གཞོན་ནུའི་ངང་ཚུལ་གྱིས། །ཡིད་ཅན་ཕན་བདེ་སྒྲུབ་པའི་སླད་དུ་འཆར། ༢། དེ་ཚེ་རིག་དང་བརྩེ་སོགས་བསྔགས་འོས་ཀྱི། །ཡོན་ཏན་མཐའ་དག་རྫོགས་པའི་ག་བུར་འཛིན། །གྲགས་སྙན་བདུད་རྩིའི་རླབས་ཀྱིས་འཁྱུད་པའི་མོད། །ཁོར་ཡུག་རི་བོའི་ལྗོངས་ཀུན་དཀར་པོར་གྱུར། ༣ །མཁས་པའི་ཚོགས་རབ་བྱེ་བས་ཕྱག་བྱས་ཤིང་། །གྲུབ་པའི་ཁྱུ་མཆོག་རྣམས་ཀྱི་བསྟེན་བཞིན་དུ། །སྲས་བཅས་རྒྱལ་བ་དགྱེས་པའི་ཤིས་བརྗོད་ཀྱིས། །ཁམས་གསུམ་ཆོས་ཀྱི་རྒྱལ་པོར་མངའ་དབང་བསྐུར། ༤ །ལྷག་པར་རྒྱལ་མཆོག་ཕྱག་ན་པདྨོ་ཡི། །ཆོས་སྲིད་ཕྲིན་ལས་གདུགས་དཀར་སྲིད་པའི་རྩེར། །བསྒྲེངས་པས་ཡོངས་རྫོགས་བསྟན་དང་འགྲོ་བ་ལ། །ཀུན་དགའི་ངལ་འཚོ་གསར་པ་ཅིར་ཡང་བྱིན། ༥ །དེ་ལྟའི་རྟོགས་པ་བརྗོད་པའི་ཟིལ་དངར་ནི། །ཡང་ཡང་དད་གསུམ་པདྨོས་བཏུང་བ་ལས། །མི་ཕྱེད་གུས་སྤྲོའི་མཚར་སྡུག་རྫོགས་པའི་མོད། །གསོལ་འདེབས་སྦྲང་རྩིའི་བསུང་ཞིམ་འཐུལ་དང་བཅས། ༦ །རྡུལ་སྙེད་ལུས་ཀྱི་འཁྲི་ཤིང་རབ་གཡོ་བར། །ཐལ་མོའི་མེ་ཏོག་ཟུམ་པའི་འཇོ་སྒེག་གིས། །ནོར་བུའི་རྡུལ་མང་བརྩེགས་པའི་ཞབས་བསྟེན་ལ། །སྒོ་གསུམ་གུས་པའི་དད་ཕྱག་ཉིན་བཞིན་སྟོབ། ༧ །དངོས་འབྱོར་བདོག་པ་ཉུང་ངུས་ཐོག་དྲངས་ཏེ། །སྲིད་ཞིའི་ཁམས་ཀུན་རྒྱས་པར་འགེངས་བཟོད་པའི། །ཀུན་བཟང་མཆོད་སྤྲིན་རྒྱ་མཚོའི་སྣང་བ་ཡིས། །ཡེ་ཤེས་གཟིགས་པའི་གཡར་ལམ་མཛེས་པར་བྱ། ༨ །སྡིག་དང་ལྟུང་བའི་ཚོན་རིས་རྣམ་མང་པོས། །སེམས་ཀྱི་ཟླ་ཤེས་ཁ་དོག་བསྒྱུར་བའི་དྲི། །སྟོབས་བཞིའི་གངྒཱའི་རྒྱུན་གྱིས་དག་བྱས་པས། །འཕགས་རྣམས་དགྱེས་པའི་སྤྱན་ཟུར་ཕྱོགས་དེར་ལྷུང་། ༩ །འཇིག་རྟེན་འཇིག་རྟེན་འདས་པའི་ལེགས་སྤྱད་ཀྱི། །བསོད་ནམས་ཡེ་ཤེས་དམ་པའི་ཉིན་མོར་བྱེད། །ལན་གཅིག་དྲན་པའི་འདུན་སར་འཆར་བ་ན། །རྗེས་སུ་ཡི་རང་ཨུཏྤལ་འཛུམ་རྒྱ་གྲོལ། ༡༠ །རྒྱལ་ཀུན་གསུང་གི་རྡོ་རྗེ་མགྲིན་པའི་མཚོར། །རྟག་པར་རྩེན་པའི་སྨྲ་དབང་ཟླ་གཞོན་གྱིས། །ཐེག་གསུམ་བདུད་རྩིའི་ཆར་གྱིས་ཡིད་ཅན་རྣམས། །ཐར་པ་དམ་པའི་ལང་ཚོ་བསྐྱེད་བསྲིངས་མཛོད། ༡༡ །གང་དུ་མཚན་གྱི་སྤྲིང་ཡིག་གསལ་ཙམ་ནས། །ཐུབ་བསྟན་བཤད་སྒྲུབ་སྣང་བ་དར་བབས་པ། །སྲིད་ན་མཚུངས་ཟླས་དབེན་པའི་སྐྱབས་ཀྱི་མཆོག །གསང་གསུམ་རྡོ་རྗེའི་ངོ་བོར་བརྟན་གྱུར་ཅིག ༡༢ །དེ་ལྟར་བསོད་ནམས་ཕུང་པོ་འདུ་བགྱིས་ཀུན། །འཇམ་དཔལ་གཞོན་ནུའི་མཁྱེན་པའི་ཡོངས་བསྔོ་དང་། །མི་ཕྱེད་སྨོན་པའི་འབྲས་བུས་འཇིག་རྟེན་ན། །དོན་གཉིས་དགའ་སྟོན་རྟག་ཏུ་རྒྱས་པར་ཤོག ༡༣ །ཅེས་ཚིགས་སུ་བཅད་པའི་མེ་ཏོག་ཉུང་ངུས་མདུན་བདར་ཏེ་སོགས། སླར་ཡང་གསོལ་བ། ཕུན་ཚོགས་བསོད་ནམས་བྱེ་བའི་གཟི་འབར་ཞིང་། །མཚན་དཔེའི་ཉམས་བརྒྱས་རོལ་པའི་རྡོ་རྗེའི་སྐུ། །ངེས་པར་གངས་ཅན་རི་བོའི་སྐྱབས་གཅིག་པུར། །འཚོ་གཞེས་རྟག་པའི་དགེ་མཚན་བརྙེས་གྱུར་ཅིག ༡ །རིག་པའི་ལམ་དང་མཛའ་བ་མི་ཕྱེད་ཅིང་། །ཟབ་མོའི་དོན་ལ་འཇིགས་མེད་སེང་གེའི་སྒྲ། །ཆོས་ཕུང་རྒྱ་མཚོའི་གདང་དུ་འཆར་བའི་གསུང་། །སྐལ་བཟང་རྣ་བར་རྟག་ཏུ་སྒྲོགས་མཛད་གསོལ། ༢ །གང་དུ་ཆོས་དང་སྲིད་ཀྱི་གཙུག་ལག་གི །ཉམས་འགྱུར་མཐའ་དག་གཅིག་ཅར་འཆང་བཟོད་པ། །ཡེ་ཤེས་ནོར་བུའི་མེ་ལོང་དྭངས་པའི་ཐུགས། །ཕྱོགས་འདིར་ལྷག་པར་དགྱེས་པའི་ངང་ཚུལ་སྟོན། ༣ །མདོར་ན་བསམ་གྱིས་མི་ཁྱབ་ཡོན་ཏན་དང་། །ཕྲིན་ལས་ས་གསུམ་འགྲོ་བའི་གདུང་སེལ་དུ། །ནམ་ཡང་ནུབ་པ་མེད་པའི་ངོ་མཚར་གྱིས། །རྫོགས་ལྡན་དུས་སྟོན་འབྱོར་པས་རབ་མཛེས་ཤིང་། ༤ །བདག་ཅག་རྣམས་ཀྱང་བྱང་ཆུབ་སྙིང་པོའི་བར། །མཁྱེན་བརྩེའི་གདུགས་དཀར་གྲིབ་མར་ངལ་འཚོ་ལས། །འདི་དང་གཏན་དུ་བདེ་བའི་ཕུན་ཚོགས་ཀྱི། །བཀྲ་ཤིས་རྟག་པ་དམ་པ་ཉིད་གྱུར་ཅིག །སརྦ་དཱ་ཤྲེ་ཡོ་བྷ་བ་ཏུ།། །། ༈

[edit]

srid skyong rwa bsgreng no mi han chen por legs 'bul gyi yi ge/ srid skyong rwa bsgreng no mi han chen por legs 'bul gyi yi ge snyan pa'i rgyud mang zhes bya ba/__r+dz+nyAnakalpamany+dzarItsasAhaiH/_bAradahitaMsukhatriloke_pAdapad+makalpamap+d+hidzIbyAta?/_/bsod nams dam pa'i chu gter rmad byung ba/_/ye shes dpag bsam snye ma dang 'grogs pas/_/'jig rten gsum na phan bde'i mchog sbyin pa'i/_/zhabs pad bskal pa rgya mtshor 'tsho gzhes gsol/_1_/mi phyed gus pa'i phyag dang bcas te gsol ba/_/e ma 'od gsal rnam pa kun ldan las/_/zung 'jug rdo rje'i snang brnyan srid pa na/_/rgyal ba'i myu gu gzhon nu'i ngang tshul gyis/_/yid can phan bde sgrub pa'i slad du 'char/_2/_de tshe rig dang brtse sogs bsngags 'os kyi/_/yon tan mtha' dag rdzogs pa'i ga bur 'dzin/_/grags snyan bdud rtsi'i rlabs kyis 'khyud pa'i mod/_/khor yug ri bo'i ljongs kun dkar por gyur/_3_/mkhas pa'i tshogs rab bye bas phyag byas shing /_/grub pa'i khyu mchog rnams kyi bsten bzhin du/_/sras bcas rgyal ba dgyes pa'i shis brjod kyis/_/khams gsum chos kyi rgyal por mnga' dbang bskur/_4_/lhag par rgyal mchog phyag na pad+mo yi/_/chos srid phrin las gdugs dkar srid pa'i rtser/_/bsgrengs pas yongs rdzogs bstan dang 'gro ba la/_/kun dga'i ngal 'tsho gsar pa cir yang byin/_5_/de lta'i rtogs pa brjod pa'i zil dngar ni/_/yang yang dad gsum pad+mos btung ba las/_/mi phyed gus spro'i mtshar sdug rdzogs pa'i mod/_/gsol 'debs sbrang rtsi'i bsung zhim 'thul dang bcas/_6_/rdul snyed lus kyi 'khri shing rab g.yo bar/_/thal mo'i me tog zum pa'i 'jo sgeg gis/_/nor bu'i rdul mang brtsegs pa'i zhabs bsten la/_/sgo gsum gus pa'i dad phyag nyin bzhin stob/_7_/dngos 'byor bdog pa nyung ngus thog drangs te/_/srid zhi'i khams kun rgyas par 'gengs bzod pa'i/_/kun bzang mchod sprin rgya mtsho'i snang ba yis/_/ye shes gzigs pa'i g.yar lam mdzes par bya/_8_/sdig dang ltung ba'i tshon ris rnam mang pos/_/sems kyi zla shes kha dog bsgyur ba'i dri/_/stobs bzhi'i gang+gA'i rgyun gyis dag byas pas/_/'phags rnams dgyes pa'i spyan zur phyogs der lhung /_9_/'jig rten 'jig rten 'das pa'i legs spyad kyi/_/bsod nams ye shes dam pa'i nyin mor byed/_/lan gcig dran pa'i 'dun sar 'char ba na/_/rjes su yi rang ut+pal 'dzum rgya grol/_10_/rgyal kun gsung gi rdo rje mgrin pa'i mtshor/_/rtag par rtsen pa'i smra dbang zla gzhon gyis/_/theg gsum bdud rtsi'i char gyis yid can rnams/_/thar pa dam pa'i lang tsho bskyed bsrings mdzod/_11_/gang du mtshan gyi spring yig gsal tsam nas/_/thub bstan bshad sgrub snang ba dar babs pa/_/srid na mtshungs zlas dben pa'i skyabs kyi mchog_/gsang gsum rdo rje'i ngo bor brtan gyur cig_12_/de ltar bsod nams phung po 'du bgyis kun/_/'jam dpal gzhon nu'i mkhyen pa'i yongs bsngo dang /_/mi phyed smon pa'i 'bras bus 'jig rten na/_/don gnyis dga' ston rtag tu rgyas par shog_13_/ces tshigs su bcad pa'i me tog nyung ngus mdun bdar te sogs/__slar yang gsol ba/__phun tshogs bsod nams bye ba'i gzi 'bar zhing /_/mtshan dpe'i nyams brgyas rol pa'i rdo rje'i sku/_/nges par gangs can ri bo'i skyabs gcig pur/_/'tsho gzhes rtag pa'i dge mtshan brnyes gyur cig_1_/rig pa'i lam dang mdza' ba mi phyed cing /_/zab mo'i don la 'jigs med seng ge'i sgra/_/chos phung rgya mtsho'i gdang du 'char ba'i gsung /_/skal bzang rna bar rtag tu sgrogs mdzad gsol/_2_/gang du chos dang srid kyi gtsug lag gi_/nyams 'gyur mtha' dag gcig car 'chang bzod pa/_/ye shes nor bu'i me long dwangs pa'i thugs/_/phyogs 'dir lhag par dgyes pa'i ngang tshul ston/_3_/mdor na bsam gyis mi khyab yon tan dang /_/phrin las sa gsum 'gro ba'i gdung sel du/_/nam yang nub pa med pa'i ngo mtshar gyis/_/rdzogs ldan dus ston 'byor pas rab mdzes shing /_4_/bdag cag rnams kyang byang chub snying po'i bar/_/mkhyen brtse'i gdugs dkar grib mar ngal 'tsho las/_/'di dang gtan du bde ba'i phun tshogs kyi/_/bkra shis rtag pa dam pa nyid gyur cig__/sarba dA shre yo b+ha ba tu//__//_!_