JKW-KABUM-22-ZA-012-087-wylie
<div class="wylie-content"
spros bral shes rab kyi pha rol tu phyin pa'i rdo rje'i thol glu 'od gsal dbu ma'i sgra dbyangs/__ spros bral shes rab kyi pha rol tu phyin pa'i rdo rje'i thol glu 'od gsal dbu ma'i sgra dbyangs zhes bya ba/__a ho/__mtha' bral mi gnas ye shes zhal/__/zung 'jug rnam thar sgo gsum dbyings/__/'du 'bral spangs pa'i chos nyid che/__/shes rab pha rol phyin la 'dud/__/rgyal bas gsungs pa'i dam chos kun/__/bden pa gnyis la yang dag brten/__/ji ltar rab rib mthus bskyed pas/__/skra shad sogs su snang ba ltar/__/'khrul ngor snang ba'i chos ji snyed/_/'jig rten kun rdzob bden par grags/__/gzung dang 'dzin las rnam grol zhing /__/spros pa kun bral chos kyi dbyings/__/rnam par rtog med zung 'jug don/__/'gyur med don dam bden par bstan/__/de yang gzugs sogs phung lnga yi/__/'khrul rgyun zad pa'i 'od gsal don/__/bdag dang bdag gir 'dzin pa las/__/rnam par grol ba'i stong pa nyid/__/rtog ge'i blo yis ma rig cing /__/rang bzhin ngang gis grol ba'i chos/_/khas len dmigs gtad mtshan ma las/__/rab 'das gdod ma'i gshis lugs la/__/sgro btags skur 'debs las grol zhing /__/sangs rgyas spyod yul lhun grub chos/__/rang bzhin 'byung phyir smon pa yi/__/dngos po kun las ldog pa'i don/__/lta ba'i gnas lugs rab shes nas/__/sbyor ba byang chub sems bskyed pa'i/__/tshul la bsten goms byas nas kyang /__/dngos gzhi chos rnams thams cad kun/__/slob dpon nA ga rdzu na yis/__/gang gis rten cing 'brel bar 'byung /__/'gag pa med pa skye med pa/__/rtag pa med pa chad med pa/__/'ong ba med pa 'gro med pa/__/tha dad don min don gcig min/_/spros pa nyer zhi'i chos bstan pa/__/zhes pa'i don ltar thag bcad de/__/sems dang sems byung spro bsdu las/__/'das pa'i ngang der mnyam bzhag bya/__/de skad du yang zhi ba lhas/__/gang tshe dngos dang dngos med pa/__/blo yi mdun na mi gnas pa/__/de tshe rnam pa gzhan med pas/__/dmigs pa med par rab tu zhi/__/zhes gsungs tshul der gnas kyi bar/__/bsgoms nas rjes thob dge ba bsngo/__/de nyid don dam bden pa che/_/nyams su blang ba'i tshul yin no/__/mnyam bzhag de las ldang ma thag__/rmi lam sgyu ma chu zla dang /__/dri za'i grong khyer brag ca'i sgra/__/smrig rgyu 'ja' tshon lta bu ru/__/bden med dag tu rtog bya ba/__/kun rdzob nyams su blang tshul te/__/mdor na gzhi dus dbu ma ni/__/bden gnyis zung du 'jug pa ste/__/lam dus tshogs gnyis zung 'jug dang /__/'brel ba'i spyod pa spyad byas nas/__/mthar thug sku gnyis zung 'jug pa'i/__/'bras bu dbu ma chen po 'thob/__/rnam thar sgo gsum rab ston pa'i/__/'khor lo bar ba'i sde snod don/__/klu sgrub yab sras kyis bkral zhing /__/gangs can ljongs 'dir kun mkhyen mchog__/rgyal sras dri med 'od zer sogs/__/mkhas grub kun gyi dgongs pa'i don/__/nyams su len tshul cung zad tsam/__/blo gsal thar pa 'dod pa ni/__/rang ngam gzhan dag yin yang rung /__/de don dmigs te gang shar du/__/rdo rje'i glu ru blangs pa 'dis/__/'gro rnams ma lus sgrol bar shog__/__!_