JKW-KABUM-23-'A-001-002

🚧 This website is under continued development. We appreciate your patience!

Previous Text Back to Volume PageNext Text

Wylie title
Location	mkhyen brtse'i bka' 'bum Volume 23, sde tshan 1, Text 2, Pages 6- (Folios 3b2 to )
Author	འཇམ་དབྱངས་མཁྱེན་བརྩེའི་དབང་པོ་
Less details More details
Citation	'jam dbyangs mkhyen brtse'i dbang po. '. In jam dbyangs mkhyen brtse'i dbang po'i bka' 'bum, Vol. 23: 6-. Khams sde dge rdzong sar dgon: Rdzong sar blo gros phun tshogs, 2020.
Genre	Vajra Songs - rdo rje'i glu

Tibetan Text

Wylie

[edit]

ལྟ་རིམ་མདོར་བསྡུས་པའི་རྡོ་རྗེའི་གླུ་ཟབ་དོན་སྙིང་པོ། ལྟ་བའི་རིམ་པ་མདོར་བསྡུས་པའི་རྡོ་རྗེའི་གླུ་ཟབ་དོན་སྙིང་པོ་ཞེས་བྱ་བ། ཨ་ཧོ། རྟག་པ་མ་ཡིན་སྤྲོས་བྲལ་གྱི་ཡེ་ཤེས། །ཆད་པ་མ་ཡིན་འོད་གསལ་གྱི་རང་གདངས། །གཉིས་དང་གཉིས་མིན་ཕ་མཐའ་ལས་འདས་པའི། །སེམས་ཀྱི་རྡོ་རྗེའི་རང་ཞལ་ལ་འདུད་དོ། །ཕྱི་དོན་རྫས་གྲུབ་བྱེ་སྨྲ་བའི་གཞུང་དང་། །བཏགས་ཡོད་ཁས་ལེན་མདོ་སྡེ་པའི་ལྟ་བ། །སེམས་ཙམ་བདེན་གྲུབ་རྣམ་བདེན་དང་རྣམ་རྫུན། །བདེན་གཉིས་ཡ་བྲལ་རྟག་ཆད་ལས་མ་འདས། །ཀུན་རྫོབ་རྒྱུ་རྐྱེན་རྟེན་འབྲེལ་ལས་སྐྱེས་ཤིང་། །སྐྱེས་ཙམ་ཉིད་ནས་སྟོང་ཉིད་དུ་ཤར་བའི། །བདེན་གཉིས་ཟུང་འཇུག་ཁས་ལེན་དང་བྲལ་བ། །ངེས་དོན་མཐར་ཐུག་ཐལ་འགྱུར་བའི་གྲུབ་མཐའ། །གསལ་སྟོང་དབྱེར་མེད་གཞི་དུས་ཀྱི་དགེས་རྡོར། །ཉམས་སུ་མྱོང་ཡང་བསམ་བརྗོད་ལས་འདས་ཤིང་། །རྟོག་ཚོགས་རང་གསལ་རྗེན་པ་རུ་ནུབ་པའི། །འོད་གསལ་སེམས་ཀྱི་གནས་ལུགས་ལ་གཟིགས་དང་། །དེ་གའི་ངང་དུ་ཡིད་བྱེད་ཀྱི་བློ་དང་། །གཉིས་སྣང་ཐམས་ཅད་རིག་ངོ་རུ་གྲོལ་བའི། །ཉམས་མྱོང་ཆུ་བོའི་རྒྱུན་འབབས་ལྟར་གོམས་པས། །མཆོག་དངོས་འགྲུབ་པའི་ངལ་འཚོ་ལ་སྦྱར་རོ། །ཨ་ཧོ་རིས་མེད་མཁས་གྲུབ་ཀྱི་ཞལ་ལུང་། །མང་དུ་ཐོས་པའི་རྒྱལ་ཁམས་ཀྱི་བྱ་བྲལ། །རྣལ་འབྱོར་གཞོན་ནུའི་གང་ཤར་གྱི་གླུ་དབྱངས། །བཤེས་གཉེན་མཆོག་གི་གཟིགས་མོ་རུ་ཕུལ་ལོ། །དགེ་བ་དེ་ཡིས་སྲིད་ཞི་ཡི་ཆོས་ཀུན། །འཁོར་འདས་དབྱེར་མེད་ཕྱག་རྒྱ་རུ་བསྡམས་པའི། །ངེས་གསང་སྙིང་པོ་འགྲོ་ཀུན་གྱིས་རྟོགས་ནས། །དོན་གཉིས་འགྲུབ་པའི་སྨོན་ལམ་ཞིག་ཞུའོ། །ཞེས་པའང་འཇམ་དབྱངས་མཁྱེན་བརྩེའི་དབང་པོས་སོ། ། ༈

[edit]

lta rim mdor bsdus pa'i rdo rje'i glu zab don snying po/__ lta ba'i rim pa mdor bsdus pa'i rdo rje'i glu zab don snying po zhes bya ba/__a ho/__rtag pa ma yin spros bral gyi ye shes/__/chad pa ma yin 'od gsal gyi rang gdangs/__/gnyis dang gnyis min pha mtha' las 'das pa'i/__/sems kyi rdo rje'i rang zhal la 'dud do/__/phyi don rdzas grub bye smra ba'i gzhung dang /__/btags yod khas len mdo sde pa'i lta ba/__/sems tsam bden grub rnam bden dang rnam rdzun/__/bden gnyis ya bral rtag chad las ma 'das/__/kun rdzob rgyu rkyen rten 'brel las skyes shing /__/skyes tsam nyid nas stong nyid du shar ba'i/__/bden gnyis zung 'jug khas len dang bral ba/__/nges don mthar thug thal 'gyur ba'i grub mtha'/__/gsal stong dbyer med gzhi dus kyi dges rdor/__/nyams su myong yang bsam brjod las 'das shing /__/rtog tshogs rang gsal rjen pa ru nub pa'i/__/'od gsal sems kyi gnas lugs la gzigs dang /__/de ga'i ngang du yid byed kyi blo dang /__/gnyis snang thams cad rig ngo ru grol ba'i/__/nyams myong chu bo'i rgyun 'babs ltar goms pas/__/mchog dngos 'grub pa'i ngal 'tsho la sbyar ro/__/a ho ris med mkhas grub kyi zhal lung /__/mang du thos pa'i rgyal khams kyi bya bral/__/rnal 'byor gzhon nu'i gang shar gyi glu dbyangs/__/bshes gnyen mchog gi gzigs mo ru phul lo/__/dge ba de yis srid zhi yi chos kun/__/'khor 'das dbyer med phyag rgya ru bsdams pa'i/___/nges gsang snying po 'gro kun gyis rtogs nas/__/don gnyis 'grub pa'i smon lam zhig zhu'o/__/zhes pa'ang 'jam dbyangs mkhyen brtse'i dbang pos so/___/__!__