JKW-KABUM-11-DA-001-002-wylie
<div class="wylie-content"
sum pa lo tsA ba'i snyan brgyud kyi blo sbyong gzhung khrid yig dang bcas pa/ @#/_/sum pa lo tsA ba'i snyan brgyud kyi blo sbyong gzhung khrid yig dang bcas pa bzhugs so//__// gu ru na mo/__grub thob sum pa lo tsA ba rgya gar du byon/__gsang sngags phal cher la thos pa mdzad/__bod du 'byon khar gser lhag ma khyer nas rdo rje gdan du byang chub chen po la 'bul du byon/__gan d+ho la la bskor ba mdzad cing bzhugs pas bud med dmar mo gcig dang sngon mo gcig gnyis res 'ga' bar snang la bskor ba mdzad/__re 'ga' sa la goms pa 'dor ba'i tshul du bskor ba mdzad cing gda' skad/__der bud med sngon mo des dmar mo de la/__mo de mdangs zhag nga blo yang ma bde/__'gro snying gcig 'dod 'chi ba min na drag ste/__lar 'chi ba 'di ka la 'chor zer nas dri ba rnam pa bzhi byed kyin gda' skad/__der bud med dmar mo des lo tsA ba la spyan gyis zur mig ce re ba gcig gzigs nas sngon mo de la/__mo de gang byung gis chog na ci byas kyang bde ste khyod kyi blo de gang byung gis ma chog pas lan pa yin no/__/mo de sems bzhag par sdod na phyin kyang chog ste/__khyed kyi sems de bzhag par ma sdod pas lan no/__/mo de blo chos su song na shi yang sla ba la khyod kyi blo rgyun chos su ma song bas lan no/__/mo de rang sems skye med du rtogs na 'chi rgyu yang med de khyed kyi sems de skye med du ma rtogs pas lan zer nas lan rnam pa bzhi 'debs kyin gda' skad/__de nas lo tsA ba'i thugs skyo ba sangs/__sngar bslab pa'i chos gnad du song /__thugs rgyud kyi steng du yang rtogs pa khyad par can skyes pa yin gsung ngo /__/de la ngo sprod 'di ltar du yin/__gang byung gis chog na bya ba/__rang gi bsags pa dang bstun pa'i longs spyod gang byung gis chog shes/__gzhan gyi phun sum tshogs pa la phrag mi dog__/rkyen bde sdug gi khong zhums su mi 'gyur ba la sogs pa dgos gsung ngo /__/sems bzhag par sdod par bya ba/__bla ma'i byin rlabs dang thabs khyad par can la brten nas sems rang ngo shes/__rang sa zin/__rang dbang thob pa la sogs pa dgos/__sems chos dang 'dres pa ni/__sems ni rig rig po 'di yin/__chos de'i rang bzhin rtogs pa gcig dgos/__sems skye med du rtogs pa ni/__skye ba rtogs pas 'chi ba 'gag pa yin/__sems skye 'gag gnas gsum dang bral bar rtogs pa'i rtogs pa rjes med pa ni 'chi rgyu med pa lags so/__/chos 'di'i brgyud pa ni/__rje btsun ma rdo rje phag mo dang sgrol ma gnyis kyis sum pa lo tsA ba la gsungs/__des sa paN/__des grub thob chen po mtsho 'phrang ba/__des mkhas grub chos rje/__des ri khrod ras chen/__des pra dz+nyA b+ho d+hi/__des don zhags pa bud+d+ha rat+na la/__des kit+ti shI la la/__des chos rje rgyal ba bzang po la/__des chos rje bsod nams la gnang /__des dkon mchog 'bangs la gnang ba'o/___/_!
