JKW-KABAB-13-PA-033-wylie
<div class="wylie-content"
'chi med 'phags ma'i snying thig gi bsnyen sgrub las gsum gyi bzlas dmigs la dang po bsnyen pa'i dmigs pa ni/__rang nyid rje btsun 'phags ma'i skur gsal ba'i thugs kar ye shes sems dpa' tshe dpag med dkar gsal yab rkyang longs sku'i rgyan chas can gyi thugs kar pad+ma dkar po'i steng nyi ma 'og zla ba ste kha sbyor gyi khog stong du thugs srog sa bon tAM gyi mthar rdo rje'i yi ge bcu pa g.yas bskor du 'khod pa la sems gtad nas bzlas pas thugs rgyud bskul te thugs srog tAM dang sngags phreng las 'od zer gyi snang ba bsam gyis mi khyab pa mtha' yas pa gtso bo'i dbu'i gtsug tor gyi nor bu las thon te 'od de'i klong du sprul pa'i sems dpa' gtsug tor rnam par rgyal ma sku mdog dkar gsal g.yas skyabs sbyin pus mo g.yas pa'i steng du brkyang ste sdig mdzub kyis lcags kyu 'gugs thabs su bsnams pa/__g.yon pas thugs ka'i thad du mchog sbyin gyi phyag rgyas tshe'i bum pa bdud rtsi'i rgyun 'bebs bzhin pa bsnams pa/__zhabs sems ma'i skyil krung gis pad zla la bzhugs pa/__'od dang 'od zer 'bar bzhin pa grangs med pa nyi zer gyi rdul bzhin du steng 'og phyogs mtshams kun tu bar med pa spros pas rtsa ba'i dkyil 'khor sgrol ma rigs bzhi/__sgo ma rnams dang*/__phyogs dus rgyal ba sras bcas/__rgyud sde drug gi yi dam/__gnas yul gyi dpa' bo mkha' 'gro'i tshogs dang rdo rje'i chos srung rgya mtshor bcas pa'i mkhyen brtse nus gsum gyi yon tan bsam las 'das pa'i byin rlabs nus stobs dang phyi brtan pa snod kyi 'jig rten gyi 'byung ba lnga yi dwangs bcud/__nang g.yo ba bcud kyi sems can gyi tshe bsod dpal 'byor dbang thang chos srid kyi dge mtshan rmad du byung ba'i dwangs bcud yon tan thams cad kun 'dus pa'i dngul chu zhes bcud len gyi rdzas grub pa ste ston zla ltar dkar ba/__nyi ma lta bu'i 'od zer can/__g.yas bskor du 'khyil zhing*/__grub pa'i rtags g.yung drung dang dga' ba 'khyil ba sogs bkra shis pa'i ri mo sna tshogs pas bkra ba/__nus pa gang la reg pa tsam gyis glang po che'i stobs/__nyi zla'i tshe/__rdo rje'i lus bcu drug gi lang tsho can du bsgyur nus shing*/__lcags la reg pa tsam gyis gser du 'gyur ba/__shing skam la gtor ba tsam gyi lo 'bras me tog phun sum tshogs pa skad cig gis 'byung ba zhig ste/__de lta bu'i rnam pa bde ba chen po'i gzi byin 'bar ba bsdus ste bdag gi phung khams skye mched dang*/__sgrub pa'i rdzas ril bu sman raka gtor mchod thams cad la thim pas me tog la char gyis bran pa bzhin byin rlabs gzi brjid nus mthu rnams dpal du 'bar bar bsam la rdo rje'i yi ge bcu pa 'ba' zhig bzla/__dril sgrub kyi skabs de'i mjug tu sngags de la mthud nas gsal gdab/__ye shes sems dpar de'i dmigs pa bzhag nas thugs srog tAM hrIHra bsgyur ba'i mthar rang sngags bkod sprul par thugs kar nyi zla'i gwa 'u'i dbus su b+h+rU~M mthar sngags phreng bkod pa yin/__gnyis pa bsgrub pa'i dmigs pa ni/__dkyil 'khor lha tshogs rnams kyi sku las 'od zer spro bsdu sngar ltar byas pas brtan g.yo'i dwangs bcud grub pa'i dngul chu lta bu lha gtso 'khor thams cad la thim pas kun kyang sku zag med bde chen gyi nyams rab tu rgyas/__gsung gzhom med rdo rje'i sngags kyi sgra gdangs snyan brjid chags khro'i tshul gyis bung ba tshang zhig pa bzhin bsgrags/__thugs zhi rgyas dbang drag mchog gi dgongs pa mi 'gyur ba'i ting nge 'dzin la snyoms par zhugs pas 'khor chos phung po lnga dang 'byung lnga skye mched dbang yul dang bcas pa sgrol ma rigs lnga'i rdo rje gdan gsum tshang ba'i dkyil 'khor du sad pa'i dag chen ye shes chen po'i rol pa sku gsung thugs yon tan phrin las dbyer med pa mi zad rgyan gyi 'khor lor sad par bsam la sgrol ma rigs bzhi'i thugs srog pad+ma nyi zla'i gwa'u'i sbubs tAM b+h+rUM hrIHhU~M gsal ba la dmigs pa gtad de gtso mo gsum dang rigs bzhi'i sngags so sor bzla ba'o/__/gsum pa las sbyor gyi dmigs bzlas ni/__gtso mo gsum gyi thugs rje'i 'od zer gyis sgrol ma rigs bzhi las bzhi'i dgongs pa la snyoms par zhugs par bskul/__rigs bzhi'i sgrol ma'i zhi rgyas dbang drag gi ting 'dzin gyi 'od zer phrin las bzhi sgrub sgo bzhi'i pho nya bzhi bskul bas de dag gi sprul pa'i pho nya dkar ser dmar nag nam mkha' gang ba nyi zer gyi rdul bzhin spros te las bzhi gang 'dul gyi mdzad pa mtha' yas pas nad gdon zhi/__tshe bsod rgyas/__khams gsum mos pa bzhi'i dbang du 'dus/__dgra bgegs tshar gcod pa/__thun mong gi las bzhi/__sdig sgrib zhi/__rig rtsal rgyas/__rlung sems dbang du 'dus/__gzung 'dzin tshar bcad pa mchog gi phrin las bzhi mthar phyin par bsam la tho rangs zhi ba/__nyi shar rgyas pa/__dgong mo dbang*/__srod drag por bzla bar gsungs so/__