JKW-KABUM-23-'A-004-020

🚧 This website is under continued development. We appreciate your patience!

First section in volume. Back to Volume PageLast section in volume.

Wylie title		page=1
Location	mkhyen brtse'i bka' 'bum Volume 4, sde tshan 20, Pages (Folios to )
Author	འཇམ་དབྱངས་མཁྱེན་བརྩེའི་དབང་པོ་
Less details More details
Citation
Genre	Collected Works - Selected - bka' 'bum

Tibetan Text

Wylie

[edit]

རྫོང་སར་དགོན་གྱི་བཅའ་ཡིག། ༄༅། །དེ་སྔ་ཕན་གྱི་གླེང་གཞི་བརྗོད་པའི་ཡི་གེ །རྫོང་སར་དགོན་གསར་རྙིང་བླ་ཆོས་སྤྱི་གསར་རྙིང་བཅས་ཐམས་ཅད་ནས་ངེས་རྒྱུར། རྫོང་སར་དགོན་འདི། བདག་པོའི་མངའ་འོག་ས་དགོན་སུམ་ཅུ་སོ་དགུའི་ནང་ནས་ཨངྒི་གཉིས་པ། དགེ་འདུན་ཞལ་གྲངས་ཉིས་བརྒྱ་ཡོད་རྒྱུའི་བཀའ་དེབས་ཅན་མཁར་མདོའི་མཚན་མ་དེ་ཡིན་འདུག་པ་ལྟར། ངེད་རང་ནས་ཀྱང་ས་ངོར་གྱི་བསྟན་པའི་མཛེས་རྒྱན་དང་། བདག་པོའི་ཞབས་བརྟན་རང་གཞན་ཚོགས་རྫོགས་ལ་དམིགས་པའི་བསམ་པ་བཟང་པོ་ཟོལ་མེད་པས་ཐུབ་དབང་གནས་བཅུ་ལྷ་ཁང་ངོ་མཚར་ཀུན་ཏུ་གཟིགས་ཀྱི་ཞིང་ཁམས་ཆེན་པོ་སྟེང་ཤོད་རྟེན་དང་བརྟེན་པར་བཅས་པ་རྒྱ་དངུལ་རྡོ་ཚད་སུམ་ཅུ་ལྷག་གི་རྒྱུ་རྩས་བསྐྲུན་པ་དང་། ལམ་འབྲས་ལྷ་ཁང་། དེ་དག་གི་མཆོད་རྒྱུན། ཁྱད་པར་རྒྱལ་བའི་བཀའ་འགྱུར་རིན་པོ་ཆེ་གཙོས་རང་དང་གཞན་བསྐུལ་གྱིས་དབང་ལུང་ཁྲིད་གསུམ་འཆད་སྤེལ། དགེ་འདུན་གྱི་སྡེ་ལ་བསྙེན་བཀུར་སོགས་ཆོས་དང་ཟང་ཟིང་སྒོ་དུ་མས་ཅི་ནུས་སུ་བསྐྱང་། དགེ་འདུན་རྣམས་དགོན་པར་སྡོད་ཚུགས་པས་གཞི་བཟུང་། མོ་ཁྲིམས་སོགས་དམ་པར་བསྡམ། བློ་ཆེ་བ་རྣམས་ཀྱིས་ཕྱི་ནང་གི་རིག་གནས། ཆུང་བ་རྣམས་ཀྱིས་ཀྱང་ཆོ་ག་ཕྱག་ལེན་བསླབ་སྦྱང་། གྲྭ་སར་འགྲོ་རྒྱུ། མཚམས་བསྙེན་སྒྲུབ་སོགས་དལ་འབྱོར་ལན་གཅིག་ཐོབ་པ་སྟོང་ལོག་མ་སོང་ཙམ་གྱི་ཚེ་འདི་ཕྱི་གཉིས་ཀའི་དོན་དུ་རང་གིས་རང་ལ་ཤ་ཚ་སྙིང་རྗེས་རང་དྲིན་རང་ལ་ཆེ་བ་ཞིག་དགོས་རྒྱུ་རེད་ཅེས་ལྕེ་མ་བྱང་། རྣ་བ་མ་སུན་བར་སྔ་ཕྱིར་ལོ་གྲངས་བཅོ་ལྔ་ལྷག་ཏུ་བཤད་བཤད། ཉན་ཉན་པ་ཡིན་མོད་ཀྱང་། དུས་དབང་གིས་ཡིན་ནམ་ལོ་རེ་ལས་ལོ་རེ་ཇེ་ཞན་གྱིས་ཆོས་དམ་ཚིག །འདི་ཕྱི་ལས་འབྲས་ཁྲེལ་ཁྲིམས་ངོ་ཚ་སོགས་སྟོན་ཀའི་ཐན་སྤྲིན་བཞིན་དུ་དེངས་པ་ཞིག་ཕྱོགས་སྤྱི་དང་བྱེ་བྲག་ཕལ་ཆེར་ཐམས་ཅད་དུ་བྱུང་ནས། བསོད་ནམས་ཀྱི་མཐས་གཏུགས་པའི་ཡུལ་དུས་གང་ཟག་གི་ཉེ་བར་ལེན་པའི་རང་གཟུགས་ལས། བོད་ཕུང་དམ་སྲིའི་གཙོ་བོ་ཉག་རོང་པས་ཉེན་བསླངས་ཏེ་ཕྱི་ནང་གི་སྒོ་དུ་མ་ནས་རྐྱེན་སྦྱར་བས་དུས་ངན་ཆུ་ཕག་ལོའི་ཟླ་༣ཚེས་༡༤ལ་ཆུ་ཚོད་བཅུ་དྲུག་གི་ཡུན་གྱིས་བསྟན་དགོན་གྱང་རོལ་ཆེན་པོ་འཇིགས་སུ་རུང་བའི་དམ་གྲོག་མེ་ལྕེའུ་རུ་རུ་འབར་ཞིང་ཐལ་ཕུང་ཕྱུ་རེ་བ་བལྟ་བས་མི་བཟོད་པའི་སྐབས་ཀྱང་ཞུམ་པ་མེད་པའི་སྙིང་སྟོབས་བསྐྱེད། དཀོན་མཆོག་ལ་བདེན་པར་གསོལ་ཏེ་ཕྱི་གཙུག་ལག་ཁང་མེའི་འཇིགས་པ་ལས་བསྲུངས། ཉག་རོང་མགོ་བྱེད་བི་ན་ཡ་ཀ་ཆེན་པོ་དག་བདེན་པའི་ཚིག་དང་། ཀ་ཅའི་ཡས་སྟགས་ཀྱིས་ཚིམ་པར་བྱས་ཏེ་ནང་རྟེན་གསུམ་མཆོད་ཆ་ཙམ་དུ་མ་ཟད། སྤྱི་ཁང་ཞེས་མིང་དོན་མཐུན་པ་དགོན་ཡུལ་ཐམས་ཅད་ཀྱི་སྤྱི་མཛོད་ཆེན་པོ་དེ་གྲ་མ་ཆག་གྲུ་མ་ཉམས་པར་བྱས། དམ་སྲིས་བརླམས་པ་ཁ་ཅིག་ན་རེ། ཁྱེད་རང་འདིར་བསྡད་ན་ད་དུང་ཉག་རོང་གིས་ཁྲི་མུན་དུ་བཅུག་སྟེ་མཐར་ཆུ་ལ་བསྐྱུར་སྐད་ཀྱི་འཇིགས་འཇིགས་རྔམ་རྔམ་ཅི་ཟེར་རུང་རྣ་བའི་ཕྱིར་ཕྱོགས་ལ་མ་ཉན་པར་འཇིགས་པ་མེད་པའི་དཔའ་བསྐྱེད་དེ། ཆོས་ཁྲིམས་བློ་གྲོས་གྲགས་པས་ཅི་ཟེར་ཉན་པ་ལྟར་བསླབ་བྱ་བཀོད་འདོམས་ཀྱིས། དེ་འཕྲལ་ཟླ་༤ཚེས་༡༣ལ་ངེད་རང་ནས་ཤིང་སློང་བའི་ཆོ་ག་བགྱིས་པས་ནག་ཕྱོགས་པའི་འཚུབས་འགྱུར་ཆེན་པོས་ལག་པར་སྐྱ་ལྷོག་ཟིན་ཏེ་འཆི་ལ་ཐུག་པ་བྱུང་ཡང་ཇི་མི་སྙམ་པའི་བརྟུལ་ཞུགས་ཀྱིས། །ཆོས་རྗེ་རྣམ་གཉིས་མན་ལ་ཞུ་རྟེན་དང་བཅས་ཞུ་བ་ཕུལ་ཏེ། སྔ་ཕྱིར་ཉག་རོང་ལ་འཇིགས་སྐྱོབ་ཞུ་རྟེན་ཨ་མ་ཞིག་ཡིན་རྩིས་དོན་མེད་དང་། དགོན་པ་གསར་ཆགས་ཀྱི་དོན་དང་། འཚོ་རྟེན་དུ་དམིགས་མ་ཎི་འདོན་ཡོན་ཡན་ཆད་ཀྱི་དོན་ཡོད་པ་བཅས་གང་ལྟར་ཡང་དངོས་ཇ་འཁོར་དྲུག་བཞི་བརྒྱ་ཐམ་པའི་རྒྱུ་ཚོགས་བཏང་ནས་ལོ་དེར་བླ་བྲང་གཉིས་ཀྱིས་གཙོ་བྱས་གྲ་གཤག་བཞི་བཅུ་ཙམ་གྲུབ། ཕྱི་ལོ་ཤིང་བྱི་ལོར་ངེད་ན་བ་དང་། ཉག་བོད་ཀྱི་དུས་གཟེངས་གསར་པས་ཐམས་ཅད་སྒྱིད་ལུག་སྟེ་ལུས། ཤིང་གླང་ལོར་འཕྲོ་མཐུད་དེ་ཟླ་བ་ལྔ་པ་ནས་ལྕགས་རི་བཅས་ཆེ་ལམ་གྲུབ། དེ་ནས་རིམ་པར་མདའ་དཔོན་པད་ཚལ་བ། བཀའ་བློན་ཆེན་པོ་ཕུ་ལུང་བ། ཞོལ་གཉེར་བྲག་དཀར་པོ་སོགས་ཀྱི་བཀའ་བཀོད་རིམ་ཅན་དང་། བདག་པོ་རིན་པོ་ཆེ་ཡར་ཕེབས་འཕྲལ་ཡར་ལམ་བཀའ་ཤོག་དང་གཉེར་བཀྲ་དོན་ནས་ཞིབ་བསེད་ཀྱི་བཀོད་པ། དེ་རྗེས་མེ་སྟག་ལོར་གཞུང་ས་ཆེན་པོའི་སྐུ་ངོ་ཞབས་པད་ས་དབང་རིན་པོ་ཆེ། གོང་མ་ཆེན་པོའི་བཀས་མངགས་རྒྱ་དཔོན་རྨ་ཏཱ་ལོ་ཡེ། སྤྲུལ་པའི་ཆོས་རྒྱལ་སྡེ་དགེ་བཅས་ཀྱི་བཀའ་ཁྲ་གཏན་ཚིག་ཆེན་མོ་རྒྱབ་གནོན་དང་བཅས་ངེད་ཀྱི་ལག་ཏུ་སྩལ་བ་གུས་པས་སྤྱི་བོར་མཆོད་དེ། ཞིབ་མོའི་བརྡ་སྤྲད་པ་ཡང་ནས་ཡང་དུ་མོལ་བར་མ་ཟད། མེ་སྟག་ཟླ་༩ཚེས་༡༤་ས་མཆོད་ཆེན་མོའི་ཉིན། འཇམ་དཔལ་དམར་སེར་གྱི་རྗེས་གནང་སྔོན་དུ་འགྲོ་བས་བཀའ་ཁྲ་བཅའ་ཡིག་ཞིབ་ཀློག་གིས་དེ་དག་གི་དགོངས་དོན་རང་ནས་གང་ཤེས་ཚིག་དོན་རེ་རེ་བཞིན་གལ་པོ་ཆེ་ཐང་དགུའི་དཔེ་ལྟར་ལན་གྲངས་མང་དུ་བསྐྱར་ཏེ། སྐྱ་འདུ་སེར་ཚོགས་སུམ་བརྒྱ་ལས་མི་ཉུང་བར་བཤད་བཤད་པ་དེ་རྣ་བ་དྲུག་བརྒྱ་སུན་སུན་དུ་གོ་རྒྱུ་དེ་རེད། དེའི་འགགས་དོན་གཙོ་བོ་ནི། མོ་ཁྲིམས་དམ་པར་བསྡམ་པ་དང་། ༡ གྲྭ་ཁྲལ་གསར་རྙིང་ཞིབ་སྡུད་དང་། ༢ གྲྭ་ཁང་ཉམས་གསོ་གསར་བཞེངས་མཐའ་བསྡུ་རྒྱུ་བཅས་དང་། ༣ དཔེ་ཆ་བསླབ་གཉེར་གདངས་དབྱངས་རོལ་མོ་སོགས་སྦྱང་རྩོལ་དང་། ༤ ལོ་ཚོད་སླེབས་པ་ཐམས་ཅད་གྲྭ་སར་རྡེལ་བཀོད་བྱེད་ནས་མངག་རྒྱུ་དང་། ༥ མར་སླེབས་ནས་བསྙེན་པ་ཆེ་ཆུང་སྡོད་རྒྱུ་དང་། ༦ གཞན་དགོན་ནང་དུ་སྡོད་ཚུགས་པ་དང་བསྒྲིག་ལམ་ཀུན་སྤྱོད་ཐ་ན་སྐ་རག་འཆིང་ལུགས་ཀྱིས་མཐའ་རྟེན་པ་ཚུན། ༈ ཕོ་ཚོག་ལབ་ཡམ་ཙམ་གྱི་ཧེ་རུ་ཀའི་ཆེ་བསྒོས་མ་ཡིན་པར་ལས་བྱེད་རྣམས་ནས་རེ་རེ་བཞིན་ཞིབ་ཅ་དགོས་རྒྱུ་དེ་རེད་ཀྱང་། དེ་ནས་བཟུང་སྟེ་དེ་སྔ་ལོ་ཧྲིལ་པོ་གསུམ་རེད་སོང་སྟེ་འདི་བྱས་ཆེན་པོ་ཅི་ཡོད་ངས་ནི་ཆེར་མ་ཤེས། ཕར་ཟེར་ཚུར་གཏམ་ཚིག་གཅིག་ཀྱང་མ་བྱུང་། ཐ་ན་མོ་ཁྲིམས་གཅིག་པོའི་ཐད་ནས་ཀྱང་། ཡུལ་པའི་ཁ་རྒྱགས་རྣམས། རྫོང་སར་དགོན་པའི་མོ་ཁྲིམས་དང་འདྲ། དགུན་ཁ་བསྡམ། དབྱར་ཁ་བཤིག །ཇོ་མོའི་ཁྲིམས་ལུག་ཐུག་ཁེབས་རྒྱེབ་སྟངས་བྲེམ་རྒྱུ་དེ་རེད། ཞག་སྡོད་ཚུན་ཆོད་བྱེད། དགོངས་པ་ཨམ་ཞིག་ཀྱང་ཞུ་ཞུ་གནང་གནང་ངོ་། དེ་འདྲ་ལ་དགོངས་པ་གནང་ཆོག་མཁན་དེ་ཤཱཀྱ་ཐུབ་པའི་གྲལ་མགོར་སྡོད་མཁན་ཞིག་ལོས་ཡིན། ན་ཉིན་ངོར་གྱི་གདན་ས་ཆེན་པོ་ནས་བླ་ཁག་སྤྱིའི་བཀའ་བགྲོས་ཆེན་མོས། བདག་པོའི་མདུན་དུའང་སྤྱིར་བཏང་གི་ཞུ་རྒྱ་ནན་ཏན་དང་། རྫོང་སར་དགོན་པར་དམིགས་བསལ་གྱི་གྲ་རྒྱུན་མངགས་དགོས་སོགས་བཀའ་ཤོག་ཞིབ་ནན་རྟེན་བཅས་སྩལ་བ་ལའང་ཞུ་ལན་ཙམ་ཡང་ཕུལ་སྐད་མ་ཐོས་པ། གཞན་ཕར་ཞོག །རང་གི་རྩ་བའི་གྲ་ས་དེའི་བཀོད་པ་རྣ་རྒྱབ་ཀྱི་རླུང་ལྟར་བྱེད་པ་ཆོས་དམ་ལའང་ཨེ་བཏུབ་ན་སྙམ་སྟེ། ཡིན་པའི་ནི་ལོས་ཡོད། དེ་ལྟར་ཡན་གྱི་ལོ་རྒྱུས་འདི་རྣམས་ངས་བྱས་ངས་རྒོད་ཀྱི་ཡུས་ཆེ་འཚང་བ་ནི་མིན་ཡང་། ངེད་རང་ལྟ་བུ་ཕུ་འབྲོག་མདའ་ཞིང་། འཁོར་སྒེར་དུད་སོགས་ལྟ་ཅི། ས་ཆ་སྦར་མཐིལ་ཙམ་ཡང་མེད་པའི་རྒྱལ་ཁམས་ཀྱི་བྱ་བྲལ་གྲ་རྐྱང་ཉམ་ཆུང་ཞིག་གིས་ལྷག་བསམ་དེ་ཙམ་བྱས་པའང་དཔལ་ལྡན་ས་ངོར་གྱི་ཆོས་དམ་ཚིག་དང་། བདག་པོའི་མཚན་དབུ་རྣ་སོགས་འདི་ཕྱི་བསྟན་དོན་ཁོ་ན་ལ་བསམ་པ་ལས། ངེད་རང་རང་ངོས་ནས་ནི་ཁྱེད་རྫོང་སར་དགོན་པའི་མངའ་ཐང་ལ་དེ་སྔའང་རེ་བ་ཕྲ་མོ་ཞིག་བྱས་པ་མེད། ད་ནི་དེ་ལས་ག་ན་ཡོད། བན་རྒན་ནད་པ་འཆི་རན་པ་ཞིག་གིས་ཕ་རྒན་ཞེན་ཆགས་ཆེན་པོས་བུ་ཚ་ལ་ཁ་ཆེམས་ཀྱི་དཔེ་ལྟར་འདི་ཙམ་བྱས་དུས་མི་ཚེ་ལ་དཀོར་ཟན་དམར་ཧྲིལ་ལེགས་ཉེས་ཅུང་ཟད་དཔྱོད་ཤེས་མཁན་རྣམས་ཀྱིས་བསམ་མནོ་རེ་རེ་ཙམ་བཏང་ཨི་སྲིད་སྙམ་དུ། མ་བྱས་བྱས་སྐད་ཀྱི་ཁ་ཧམ་མིན་པར་གཟུ་བོའི་བློས་དྲང་པོའི་ཚིག་རྒྱས་ཙམ་སྨྲས་པ་ལས། ཚིག་ངན་བརྡུང་བ་ནི་མིན་ཡང་། གལ་ཏེ་མ་བཟོད་ན། སེམས་ཅན་ལས་ངན་སྤྱོད་པ་ལ། །སངས་རྒྱས་ཀྱིས་ཀྱང་ཅི་བྱར་ཡོད། །ཅེས་པ་དེ་གདའ་བས་མ་ཎི་འདོན་པ་ལས་འོས་ཅི་ཡོད། དེ་ཡན་གྱིས་སྔོན་གྱི་བྱུང་བ་བརྗོད་པའི་གླེང་གཞི་དེ་ཐལ། ད་དགོས་ཀྱི་དོན་ཧྲིལ་གྱིས་དྲིལ་བའི་ཡིག་ཆུང་ཟུར་ན་ཡོད་པ་དེ་ལྟོས་ཤིག །ཨོཾ་མ་ཎི་པདྨེ་ཧཱུྃ།། །། ༈

[edit]

rdzong sar dgon gyi bca' yig/__ @#/_/de snga phan gyi gleng gzhi brjod pa'i yi ge_/rdzong sar dgon gsar rnying bla chos spyi gsar rnying bcas thams cad nas nges rgyur/__rdzong sar dgon 'di/__bdag po'i mnga' 'og sa dgon sum cu so dgu'i nang nas ang+gi gnyis pa/__dge 'dun zhal grangs nyis brgya yod rgyu'i bka' debs can mkhar mdo'i mtshan ma de yin 'dug pa ltar/__nged rang nas kyang sa ngor gyi bstan pa'i mdzes rgyan dang /__bdag po'i zhabs brtan rang gzhan tshogs rdzogs la dmigs pa'i bsam pa bzang po zol med pas thub dbang gnas bcu lha khang ngo mtshar kun tu gzigs kyi zhing khams chen po steng shod rten dang brten par bcas pa rgya dngul rdo tshad sum cu lhag gi rgyu rtsas bskrun pa dang /__lam 'bras lha khang /__de dag gi mchod rgyun/__khyad par rgyal ba'i bka' 'gyur rin po che gtsos rang dang gzhan bskul gyis dbang lung khrid gsum 'chad spel/__dge 'dun gyi sde la bsnyen bkur sogs chos dang zang zing sgo du mas ci nus su bskyang /__dge 'dun rnams dgon par sdod tshugs pas gzhi bzung /__mo khrims sogs dam par bsdam/__blo che ba rnams kyis phyi nang gi rig gnas/__chung ba rnams kyis kyang cho ga phyag len bslab sbyang /__grwa sar 'gro rgyu/__mtshams bsnyen sgrub sogs dal 'byor lan gcig thob pa stong log ma song tsam gyi tshe 'di phyi gnyis ka'i don du rang gis rang la sha tsha snying rjes rang drin rang la che ba zhig dgos rgyu red ces lce ma byang /__rna ba ma sun bar snga phyir lo grangs bco lnga lhag tu bshad bshad/__nyan nyan pa yin mod kyang /__dus dbang gis yin nam lo re las lo re je zhan gyis chos dam tshig__/'di phyi las 'bras khrel khrims ngo tsha sogs ston ka'i than sprin bzhin du dengs pa zhig phyogs spyi dang bye brag phal cher thams cad du byung nas/__bsod nams kyi mthas gtugs pa'i yul dus gang zag gi nye bar len pa'i rang gzugs las/__bod phung dam sri'i gtso bo nyag rong pas nyen bslangs te phyi nang gi sgo du ma nas rkyen sbyar bas dus ngan chu phag lo'i zla 3tshes 14la chu tshod bcu drug gi yun gyis bstan dgon gyang rol chen po 'jigs su rung ba'i dam grog me lce'u ru ru 'bar zhing thal phung phyu re ba blta bas mi bzod pa'i skabs kyang zhum pa med pa'i snying stobs bskyed/__dkon mchog la bden par gsol te phyi gtsug lag khang me'i 'jigs pa las bsrungs/__nyag rong mgo byed bi na ya ka chen po dag bden pa'i tshig dang /__ka ca'i yas stags kyis tshim par byas te nang rten gsum mchod cha tsam du ma zad/__spyi khang zhes ming don mthun pa dgon yul thams cad kyi spyi mdzod chen po de gra ma chag gru ma nyams par byas/__dam sris brlams pa kha cig na re/__khyed rang 'dir bsdad na da dung nyag rong gis khri mun du bcug ste mthar chu la bskyur skad kyi 'jigs 'jigs rngam rngam ci zer rung rna ba'i phyir phyogs la ma nyan par 'jigs pa med pa'i dpa' bskyed de/__chos khrims blo gros grags pas ci zer nyan pa ltar bslab bya bkod 'doms kyis/__de 'phral zla 4tshes 13la nged rang nas shing slong ba'i cho ga bgyis pas nag phyogs pa'i 'tshubs 'gyur chen pos lag par skya lhog zin te 'chi la thug pa byung yang ji mi snyam pa'i brtul zhugs kyis/__/chos rje rnam gnyis man la zhu rten dang bcas zhu ba phul te/__snga phyir nyag rong la 'jigs skyob zhu rten a ma zhig yin rtsis don med dang /__dgon pa gsar chags kyi don dang /__'tsho rten du dmigs ma Ni 'don yon yan chad kyi don yod pa bcas gang ltar yang dngos ja 'khor drug bzhi brgya tham pa'i rgyu tshogs btang nas lo der bla brang gnyis kyis gtso byas gra gshag bzhi bcu tsam grub/__phyi lo shing byi lor nged na ba dang /__nyag bod kyi dus gzengs gsar pas thams cad sgyid lug ste lus/__shing glang lor 'phro mthud de zla ba lnga pa nas lcags ri bcas che lam grub/__de nas rim par mda' dpon pad tshal ba/__bka' blon chen po phu lung ba/__zhol gnyer brag dkar po sogs kyi bka' bkod rim can dang /__bdag po rin po che yar phebs 'phral yar lam bka' shog dang gnyer bkra don nas zhib bsed kyi bkod pa/__de rjes me stag lor gzhung sa chen po'i sku ngo zhabs pad sa dbang rin po che/__gong ma chen po'i bkas mngags rgya dpon rma tA lo ye/__sprul pa'i chos rgyal sde dge bcas kyi bka' khra gtan tshig chen mo rgyab gnon dang bcas nged kyi lag tu stsal ba gus pas spyi bor mchod de/__zhib mo'i brda sprad pa yang nas yang du mol bar ma zad/__me stag zla 9tshes 14 sa mchod chen mo'i nyin/__'jam dpal dmar ser gyi rjes gnang sngon du 'gro bas bka' khra bca' yig zhib klog gis de dag gi dgongs don rang nas gang shes tshig don re re bzhin gal po che thang dgu'i dpe ltar lan grangs mang du bskyar te/__skya 'du ser tshogs sum brgya las mi nyung bar bshad bshad pa de rna ba drug brgya sun sun du go rgyu de red/__de'i 'gags don gtso bo ni/__mo khrims dam par bsdam pa dang /__1__grwa khral gsar rnying zhib sdud dang /__2__grwa khang nyams gso gsar bzhengs mtha' bsdu rgyu bcas dang /__3__dpe cha bslab gnyer gdangs dbyangs rol mo sogs sbyang rtsol dang /__4__lo tshod slebs pa thams cad grwa sar rdel bkod byed nas mngag rgyu dang /__5__mar slebs nas bsnyen pa che chung sdod rgyu dang /__6__gzhan dgon nang du sdod tshugs pa dang bsgrig lam kun spyod tha na ska rag 'ching lugs kyis mtha' rten pa tshun/_!__pho tshog lab yam tsam gyi he ru ka'i che bsgos ma yin par las byed rnams nas re re bzhin zhib ca dgos rgyu de red kyang /__de nas bzung ste de snga lo hril po gsum red song ste 'di byas chen po ci yod ngas ni cher ma shes/__phar zer tshur gtam tshig gcig kyang ma byung /__tha na mo khrims gcig po'i thad nas kyang /__yul pa'i kha rgyags rnams/__rdzong sar dgon pa'i mo khrims dang 'dra/__dgun kha bsdam/__dbyar kha bshig__/jo mo'i khrims lug thug khebs rgyeb stangs brem rgyu de red/__zhag sdod tshun chod byed/__dgongs pa am zhig kyang zhu zhu gnang gnang ngo /__de 'dra la dgongs pa gnang chog mkhan de shAkya thub pa'i gral mgor sdod mkhan zhig los yin/__na nyin ngor gyi gdan sa chen po nas bla khag spyi'i bka' bgros chen mos/__bdag po'i mdun du'ang spyir btang gi zhu rgya nan tan dang /__rdzong sar dgon par dmigs bsal gyi gra rgyun mngags dgos sogs bka' shog zhib nan rten bcas stsal ba la'ang zhu lan tsam yang phul skad ma thos pa/__gzhan phar zhog__/rang gi rtsa ba'i gra sa de'i bkod pa rna rgyab kyi rlung ltar byed pa chos dam la'ang e btub na snyam ste/__yin pa'i ni los yod/__de ltar yan gyi lo rgyus 'di rnams ngas byas ngas rgod kyi yus che 'tshang ba ni min yang /__nged rang lta bu phu 'brog mda' zhing /__'khor sger dud sogs lta ci/__sa cha sbar mthil tsam yang med pa'i rgyal khams kyi bya bral gra rkyang nyam chung zhig gis lhag bsam de tsam byas pa'ang dpal ldan sa ngor gyi chos dam tshig dang /__bdag po'i mtshan dbu rna sogs 'di phyi bstan don kho na la bsam pa las/__nged rang rang ngos nas ni khyed rdzong sar dgon pa'i mnga' thang la de snga'ang re ba phra mo zhig byas pa med/__da ni de las ga na yod/__ban rgan nad pa 'chi ran pa zhig gis pha rgan zhen chags chen pos bu tsha la kha chems kyi dpe ltar 'di tsam byas dus mi tshe la dkor zan dmar hril legs nyes cung zad dpyod shes mkhan rnams kyis bsam mno re re tsam btang i srid snyam du/__ma byas byas skad kyi kha ham min par gzu bo'i blos drang po'i tshig rgyas tsam smras pa las/__tshig ngan brdung ba ni min yang /__gal te ma bzod na/__sems can las ngan spyod pa la/__/sangs rgyas kyis kyang ci byar yod/__/ces pa de gda' bas ma Ni 'don pa las 'os ci yod/__de yan gyis sngon gyi byung ba brjod pa'i gleng gzhi de thal/__da dgos kyi don hril gyis dril ba'i yig chung zur na yod pa de ltos shig__/oM ma Ni pad+me hU~M//___//___!_