JKW-KABUM-11-DA-008

🚧 This website is under continued development. We appreciate your patience!

Previous Section Back to Volume PageNext Section

Wylie title
Location	mkhyen brtse'i bka' 'bum Volume 11, sde tshan 8, Pages (Folios to )
Author	འཇམ་དབྱངས་མཁྱེན་བརྩེའི་དབང་པོ་
Less details More details
Citation	'jam dbyangs mkhyen brtse'i dbang po. '. In jam dbyangs mkhyen brtse'i dbang po'i bka' 'bum, Vol. 11: 241-. Khams sde dge rdzong sar dgon: Rdzong sar blo gros phun tshogs, 2020.
Genre

1 Texts in this Section (sde tshan or chos tshan)

281-288	སྨན་བླའི་མདོ་ཆོག་གི་སྙིང་པོ་ཤིན་ཏུ་བསྡུས་པ་ཕན་བདེའི་དཔལ་སྟེར། sman bla'i mdo chog gi snying po shin tu bsdus pa phan bde'i dpal ster Ritual and Liturgical Texts - cho ga phyag len   ·   Homage - phyag 'tshal   ·   Offering Rituals - mchod sbyin	Text page View PDF
	[[|འཇམ་དབྱངས་མཁྱེན་བརྩེའི་དབང་པོ་ ()]]

Tibetan Text

Wylie

[edit]

སྨན་བླའི་མདོ་ཆོག་གི་སྙིང་པོ་ཤིན་ཏུ་བསྡུས་པ་ཕན་བདེའི་དཔལ་སྟེར།

༄༅། །སྨན་བླའི་མདོ་ཆོག་གི་སྙིང་པོ་ཤིན་ཏུ་བསྡུས་པ་ཕན་བདེའི་དཔལ་སྟེར་ཞེས་བྱ་བ་བཞུགས་སོ།། ན་མོ་གུ་རུ་བྷཻཥ་རཱ་ཛཱ་ཡ། དེ་ལ་འདིར་སྨན་བླའི་མདོ་ཆོག་གི་སྙིང་པོ་ཕྱག་མཆོད་སྨོན་ལམ་ཤིན་ཏུ་མདོར་བསྡུས་པ་བྱ་བའི་ཚུལ་ནི། རྟེན་གྱི་དྲུང་དུ་ཅི་འབྱོར་པའི་མཆོད་པ་བཤམས་ལ། ངེས་འབྱུང་དང་སྙིང་རྗེ་ཆེན་པོ་སྔོན་དུ་འགྲོ་བས། སངས་རྒྱས་ཆོས་ཚོགས་ཀྱིས་སྐྱབས་སེམས་ལན་གསུམ་དང་། སེམས་ཅན་ཐམས་ཅད་བདེ་བ་དང་སོགས་ཚད་མེད་བཞི་བསྒོམ། མཆོག་བདེན་རྒྱལ་བ་སྲས་བཅས་བྱིན་རླབས་དང་། །ཚོགས་གཉིས་མངའ་ཐང་ཆོས་དབྱིངས་དག་པའི་མཐུས། །སྣོད་བཅུད་བདེ་ཆེན་ཞིང་གི་བཀོད་པའི་གཞིར། །ཡིད་འཕྲོག་རིན་ཆེན་ལས་གྲུབ་གཞལ་མེད་ཁང་། །དེ་དབུས་སེང་ཁྲི་པད་ཟླའི་གདན་གྱི་སྟེང་། །བདེ་གཤེགས་འཁོར་བཅས་གདན་འཛོམ་བཞུགས་ནས་ཀྱང་། །ཀུན་ཏུ་བཟང་པོའི་རྣམ་ཐར་ལས་བྱུང་བའི། །མཆོད་སྤྲིན་རྒྱ་མཚོས་གང་ཞིང་སྤྱོད་གྱུར་ཅིག །ཅེས་པས་ས་གཞི་སོགས་བྱིན་གྱིས་བརླབ། སྤྲོ་ན་མཆོད་པའི་སྤྲིན་གྱི་གཟུངས་ཀྱང་འདོན། དེ་ནས་འདུན་པ་རྩེ་གཅིག་པས། མ་ལུས་སེམས་ཅན་ཀུན་གྱི་མགོན་གྱུར་ཅིང་། །བདུད་སྡེ་དཔུང་བཅས་མི་བཟད་འཇོམས་མཛད་ལྷ། །དངོས་རྣམས་མ་ལུས་ཇི་བཞིན་མཁྱེན་གྱུར་པའི། །བཅོམ་ལྡན་འཁོར་བཅས་གནས་འདིར་གཤེགས་སུ་གསོལ། །ཅེས་གསོལ་བས་མངོན་སུམ་ལྟ་བུར་བྱོན་ཞིང་བཞུགས་པར་བསམས་ལ། འབྱོན་ལེགས་སོགས་རྒྱས་པར་བྱ་བའམ། ཡན་ལག་བརྒྱད་ལྡན་མཆོད་ཡོན་རྒྱ་མཚོས་མཆོད། །འཆི་མེད་བདུད་རྩིའི་རྒྱུན་གྱིས་ཁྲུས་གསོལ་ཞིང་། །སྲབ་འཇམ་ལྷ་ཡི་རེག་བྱས་བསྙེན་བཀུར་བགྱི། །བསོད་ནམས་ཞིང་དུ་བཞུགས་པར་གསོལ་བ་འདེབས། །ཞེས་པའི་མཐར་ཕྱག་མཆོད་དངོས་ནི། ཡིད་འོང་རྫིང་བུའི་ནང་ན་གནས་པ་ཡི། །འཆར་ཀའི་པདྨ་ཁ་འབུས་བྱེ་འདྲ་བའི། །ལག་གཉིས་སྤྱི་བོར་ཐལ་སྦྱར་བསྟོད་དབྱངས་བཅས། །ལུས་དཔག་མེད་པར་སྤྲུལ་ནས་གུས་ཕྱག་འཚལ། །བདེ་བར་གཤེགས་པ་བརྒྱད་ཀྱི་མདོ་ཆོག་གི །ལམ་བཟང་གསལ་མཛད་དངོས་བརྒྱུད་བླ་མ་དང་། །ཕྱོགས་བཅུའི་སངས་རྒྱས་དེས་གསུངས་དམ་པའི་ཆོས། །དེང་འཛིན་དགེ་འདུན་བཅས་ལ་ཕྱག་འཚལ་ལོ། །མཚན་ལེགས་རིན་ཆེན་གསེར་བཟང་མྱ་ངན་མེད། །ཆོས་གྲགས་མངོན་མཁྱེན་སྨན་བླ་ཤཱཀྱ་ཐུབ། །རྒྱ་ཆེན་སྨོན་ལམ་ཡོངས་སུ་རྫོགས་པ་ཡི། །བདེ་བར་གཤེགས་པ་བརྒྱད་ལ་ཕྱག་འཚལ་ལོ། །མཚན་གྱི་མེ་ཏོག་རྒྱས་ཤིང་དག་པ་ལ། །དཔེ་བྱད་བཟང་པོའི་འབྲུ་ཆགས་མཛེས་པའི་སྐུ། །གང་གིས་མཐོང་ཐོས་དྲན་པའི་དཔལ་གྱུར་པའི། །སྟོན་པ་མཚན་ལེགས་དཔལ་ལ་ཕྱག་འཚལ་ལོ། །རིན་ཆེན་ཟླ་དང་པདྨས་རབ་བརྒྱན་ཅིང་། །ཤེས་བྱ་ཀུན་ལ་མཁས་ཤིང་མཁྱེན་པ་རྒྱས། །རྒྱ་མཚོ་ལྟ་བུར་ཟབ་པའི་གསུང་མངའ་བའི། །སྒྲ་དབྱངས་རྒྱལ་པོ་ཁྱེད་ལ་ཕྱག་འཚལ་ལོ། །ཛམྦུ་ཆུ་བོའི་གསེར་ལྟར་ལྷང་ངེ་བ། །ཉི་མ་སྟོང་བས་ལྷག་པའི་གཟི་བརྗིད་འབར། །དྲི་མེད་གསེར་གྱི་མཆོད་སྡོང་ལྟ་བུའི་སྐུ། །གསེར་བཟང་དྲི་མེད་སྣང་ལ་ཕྱག་འཚལ་ལོ། །མྱ་ངན་འདས་ཤིང་བདེ་བའི་མཆོག་བརྙེས་པ། །འགྲོ་བའི་སྡུག་བསྔལ་གདུང་བ་སེལ་མཛད་ཅིང་། །འགྲོ་དྲུག་མགོན་དང་དཔལ་དུ་གྱུར་པ་ཡི། །མྱ་ངན་མེད་མཆོག་དཔལ་ལ་ཕྱག་འཚལ་ལོ། །ཆོས་སྒྲ་ཆེན་པོས་ཕ་རོལ་རྒོལ་བ་འཇོམས། །རྒྱ་མཚོ་ལྟ་བུར་ཟབ་པའི་གསུང་མངའ་ཞིང་། །འགྲོ་བའི་དུག་གསུམ་མ་ལུས་ཞི་མཛད་པའི། །ཆོས་བསྒྲགས་རྒྱ་མཚོའི་དཔལ་ལ་ཕྱག་འཚལ་ལོ། །ཆོས་ཀྱི་བློ་གྲོས་གཏིང་དཔག་དཀའ་བའི་ཚུལ། །རྣམ་དག་ཆོས་ཀྱི་དབྱིངས་ལས་རོལ་མཛད་ཅིང་། །ཤེས་བྱ་མ་ལུས་མངོན་སུམ་གཟིགས་པ་པོ། །མངོན་མཁྱེན་རྒྱལ་པོ་ཁྱེད་ལ་ཕྱག་འཚལ་ལོ། །ཐུགས་རྗེས་ཀུན་ལ་སྙོམས་པའི་བཅོམ་ལྡན་འདས། །མཚན་ཙམ་ཐོས་པས་ངན་འགྲོའི་སྡུག་བསྔལ་སེལ། །དུག་གསུམ་ནད་སེལ་སངས་རྒྱས་སྨན་གྱི་བླ། །བཻཌཱུཪྻ་ཡི་འོད་ལ་ཕྱག་འཚལ་ལོ། །ཐབས་མཁས་ཐུགས་རྗེས་ཤཱཀྱའི་རིགས་འཁྲུངས་ཤིང་། །གཞན་གྱིས་མི་ཐུབ་བདུད་ཀྱི་དཔུང་འཇོམས་པ། །གསེར་གྱི་ལྷུན་པོ་ལྟ་བུར་བརྗིད་པའི་སྐུ། །ཤཱཀྱའི་རྒྱལ་པོ་ཁྱེད་ལ་ཕྱག་འཚལ་ལོ། །ཀུན་འབྱུང་མུན་པའི་ས་བོན་མཐར་མཛད་ཅིང་། །སྡུག་བསྔལ་ཟུག་རྔུའི་རྩ་བ་དྲུང་ནས་འབྱིན། །རྒྱལ་ཡུམ་ཤེས་རབ་ཕ་རོལ་ཕྱིན་ལ་སོགས། །ཐེག་གསུམ་དམ་པའི་ཆོས་ལ་ཕྱག་འཚལ་ལོ། །འཇམ་དཔལ་གཞོན་ནུ་སྐྱབས་གྲོལ་གསང་བའི་བདག །ཚངས་དང་བརྒྱ་བྱིན་འཇིག་རྟེན་སྐྱོང་བ་བཞི། །གནོད་སྦྱིན་སྡེ་དཔོན་ཆེན་པོ་བཅུ་གཉིས་སོགས། །འཕགས་པའི་དགེ་འདུན་རྣམས་ལ་ཕྱག་འཚལ་ལོ། །བསྐལ་པ་གྲངས་མེད་འདས་པའི་དུས་ཀྱི་ཚེ། །ཕོངས་གྱུར་འགྲོ་བ་མཐའ་དག་སྐྱོབ་པའི་ཕྱིར། །སྨོན་ལམ་ཁྱད་པར་ཅན་རྣམས་བཏབ་གྱུར་པའི། །བདེ་གཤེགས་འཁོར་དང་བཅས་ལ་སྐྱབས་སུ་མཆི། །དངོས་སུ་བཤམས་དང་གཟུངས་དང་རིག་པ་དང་། །མོས་པའི་སྟོབས་ཀྱིས་བསྐྱེད་པའི་མཆོད་སྤྲིན་ནི། །ཀུན་ཏུ་བཟང་པོའི་སྨོན་ལམ་ལས་བྱུང་བ། །ནམ་མཁའི་ཕ་མཐར་ཁྱབ་པས་རྟག་ཏུ་མཆོད། །ཐོག་མེད་ནས་བསགས་སྡིག་ལྟུང་ཐམས་ཅད་བཤགས། །དུས་གསུམ་དགེ་བ་ཀུན་ལ་རྗེས་ཡི་རངས། །ཆོས་འཁོར་བསྐོར་ཞིང་ཡུན་དུ་བཞུགས་པར་གསོལ། །བསོད་ནམས་བླ་མེད་བྱང་ཆུབ་ཆེན་པོར་བསྔོ། །བདེ་གཤེགས་བརྒྱད་དང་རིགས་གསུམ་སེམས་དཔའ་སོགས། །བཅོམ་ལྡན་གདན་འཛོམ་ཆེན་པོ་འཁོར་བཅས་ཀྱིས། །བདག་དང་སྙིགས་མའི་འགྲོ་བ་མཐའ་དག་ལ། །ཐུགས་རྗེ་ཆེན་པོས་ལྷག་པར་ཉེར་དགོངས་ཏེ། །ཇི་ལྟར་སྔོན་ཚེ་སྨོན་ལམ་དམ་བཅས་བཞིན། །བདེན་པའི་འབྲས་བུ་མངོན་སུམ་སྣང་མཛད་ནས། །གནས་སྐབས་ནད་གདོན་སྡིག་སྒྲིབ་ཉེས་ལྟུང་སོགས། །དམ་ཆོས་སྒྲུབ་པའི་འགལ་རྐྱེན་ཀུན་ཞི་ཞིང་། །ཚེ་བསོད་དཔལ་འབྱོར་དད་བརྩོན་ཤེས་རབ་སོགས། །མཐུན་རྐྱེན་ལེགས་ཚོགས་མཐའ་དག་རྒྱས་པ་དང་། །བསྟན་འཛིན་ཞབས་བརྟན་བཤད་སྒྲུབ་བསྟན་པ་དར། །འགྲོ་ཀུན་བདེ་སྐྱིད་འཕེལ་བར་བྱིན་གྱིས་རློབས། །ཚེ་ཡི་མཐར་ཡང་བཅོམ་ལྡན་སྲས་བཅས་ཀྱིས། །དག་པའི་ཞིང་དུ་མངོན་སུམ་འཁྲིད་པ་དང་། །མྱུར་དུ་བྱང་ཆུབ་སྙིང་པོར་ལུང་བསྟན་ནས། །དོན་གཉིས་ལྷུན་གྱིས་གྲུབ་པར་མཛད་དུ་གསོལ། །ཅེས་ཕྱག་དང་བཅས་ཏེ་ལན་ཇི་ལྟར་རིགས་པ་དང་། སྤྲོ་ན་གཟུངས་རིང་ཐུང་གང་འོས་བཟླས་མཐར། རྟེན་ཡོད་ན་ནོངས་བཤགས། བརྟན་བཞུགས་སོགས་སྤྱི་ལྟར་དང་། མེད་ན། མཆོད་པའི་ཡོ་བྱད་མ་འབྱོར་ཉམས་པ་སོགས། །ནོངས་པ་གང་མཆིས་བཟོད་པར་བཞེས་ནས་ཀྱང་། །བཅོམ་ལྡན་འཁོར་བཅས་རང་རང་ཞིང་ཁམས་སུ། །གཤེགས་ཏེ་སླར་ཡང་འབྱོན་པར་མཛད་དུ་གསོལ། །བདག་གཞན་དགེ་བའི་རྩ་བ་འདི་ཡི་མཐུས། །ཕན་བདེའི་འབྱུང་གནས་བསྟན་པ་འཕེལ་གྱུར་ཅིག །སྡུག་བསྔལ་ཀུན་འབྱུང་མ་ལུས་རབ་སྤངས་ནས། །སྲིད་པའི་རྒྱ་མཚོ་མྱུར་དུ་སྐེམ་པར་ཤོག །བདེ་གཤེགས་བརྒྱད་དང་དེས་གསུངས་དམ་པའི་ཆོས། །དེ་འཛིན་འཕགས་པའི་དགེ་འདུན་བཅས་པ་ལ། །རྨད་བྱུང་དགེ་མཚན་ཇི་སྙེད་མཆིས་པ་དེས། །སྲིད་ཞིའི་ལེགས་ཚོགས་རྒྱས་པའི་བཀྲ་ཤིས་ཤོག །ཅེས་བསྔོ་སྨོན་ཤིས་བརྗོད་ཇི་ལྟར་རིགས་པར་བྱའོ། །ཞེས་པའང་ཀུན་མཁྱེན་བོ་དོང་པ་ཆེན་པོའི་རིང་ལུགས་འཛིན་པའི་རབ་འབྱམས་སྨྲ་བ་ངག་དབང་བསྟན་འཛིན་གྱིས་ལྷ་རྫས་ཀྱི་མེ་ཏོག་དང་བཅས་ཏེ་གསུང་གིས་བསྐུལ་བའི་ངོར། སྙོམ་ལས་པ་འཇམ་དབྱངས་མཁྱེན་བརྩེའི་དབང་པོས་དཔལ་ལྡན་བསམ་འགྲུབ་ཆོས་ལྡིངས་ཀྱི་ཆོས་གྲྭར་སྦྱར་བའི་དགེ་བས་འགྲོ་ཀུན་དོན་གཉིས་ཡིད་བཞིན་ཏུ་འགྲུབ་པའི་རྒྱུར་གྱུར་ཅིག ། ༈ སྨན་བླའི་གཟུངས་རིང་ནི། ཏདྱ་ཐཱ། གྷུ་མེ་གྷུ་མེ། ཨི་མེ་ནི་མི་ཧི། མ་ཏི་མ་ཏི། སཔྟ་ཏ་ཐཱ་ག་ཏ་ས་མ་དྷྱཱ་དྷིཥྛི་ཏེ། ཨ་ཏི་མ་ཏེ། པཱ་ལེ། པཱ་པཾ་ཤོ་དྷ་ནི། སརྦ་པཱ་པཾ་ནཱ་ཤ་ཡ། མ་མ་བུདྡྷ། བུདྡྷོཏྟ་མེ། ཨུ་མེ་ཀུ་མེ། བུདྡྷ་ཀྵེ་ཏྲ་པ་རི་ཤོ་དྷ་ནི། དྷ་མེ་ནི་དྷ་མེ། མེ་རུ་མེ་རུ། མེ་རུ་ཤི་ཁ་རེ། སརྦ་ཨ་ཀཱ་ལ་མྲྀ་ཏྱུ་ནི་པཱ་ར་ཎི། བུདྡྷེ་སུ་བུདྡྷེ་བུདྡྷ་དྷིཥྛ་ན། རཀྵནྟུ་མེ། སརྦ་དེ་བཱ་ས་མེ་ཨ་ས་མེ་ས་མ་ནྭཱ་ཧ་རནྟུ་མེ། སརྦ་བུདྡྷ་བོ་དྷི་ས ཏྭཱ་ནཱཾ། ཤ་མེ་ཤ་མེ། པྲ་ཤ་མནྟུ་མེ། སརྦ་ཨི་ཏྱུ་པ་དྲ་བ་བྱཱ་དྷ་ཡ། པཱུ་ར་ཎི་པཱུ་ར་ཎི། པཱུ་ར་ཡ་མེ། སརྦ་ཨཱ་ཀཱ་ཤཱ་ཡ་བཻ་ཌཱུཪྻ་པྲ་ཏི་བྷཱ་སེ། སརྦ་པཱ་པཾ་ཀྵ་ཡཾ་ཀ་རི་སྭཱ་ཧཱ། །གཟུངས་ཐུང་ནི། ཏདྱ་ཐཱ། བྷེ་ཥ་ཛྱཻ་བྷེ་ཥ་ཛྱཻ་མ་ཧཱ་བྷེ་ཥ་ཛྱཻ་རཱ་ཛ་ས་མུངྒ་ཏེ་སྭཱ་ཧཱ།། །།

�

[edit]

sman bla'i mdo chog gi snying po shin tu bsdus pa phan bde'i dpal ster/ @#/__/sman bla'i mdo chog gi snying po shin tu bsdus pa phan bde'i dpal ster zhes bya ba bzhugs so// na mo gu ru b+haiSha rA dzA ya/__de la 'dir sman bla'i mdo chog gi snying po phyag mchod smon lam shin tu mdor bsdus pa bya ba'i tshul ni/__rten gyi drung du ci 'byor pa'i mchod pa bshams la/__nges 'byung dang snying rje chen po sngon du 'gro bas/__sangs rgyas chos tshogs kyis skyabs sems lan gsum dang /__sems can thams cad bde ba dang sogs tshad med bzhi bsgom/__mchog bden rgyal ba sras bcas byin rlabs dang /__/tshogs gnyis mnga' thang chos dbyings dag pa'i mthus/__/snod bcud bde chen zhing gi bkod pa'i gzhir/__/yid 'phrog rin chen las grub gzhal med khang /__/de dbus seng khri pad zla'i gdan gyi steng /__/bde gshegs 'khor bcas gdan 'dzom bzhugs nas kyang /__/kun tu bzang po'i rnam thar las byung ba'i/__/mchod sprin rgya mtshos gang zhing spyod gyur cig__/ces pas sa gzhi sogs byin gyis brlab/__spro na mchod pa'i sprin gyi gzungs kyang 'don/__de nas 'dun pa rtse gcig pas/__ma lus sems can kun gyi mgon gyur cing /__/bdud sde dpung bcas mi bzad 'joms mdzad lha/__/dngos rnams ma lus ji bzhin mkhyen gyur pa'i/__/bcom ldan 'khor bcas gnas 'dir gshegs su gsol/___/ces gsol bas mngon sum lta bur byon zhing bzhugs par bsams la/__'byon legs sogs rgyas par bya ba'am/__yan lag brgyad ldan mchod yon rgya mtshos mchod/__/'chi med bdud rtsi'i rgyun gyis khrus gsol zhing /__/srab 'jam lha yi reg byas bsnyen bkur bgyi/__/bsod nams zhing du bzhugs par gsol ba 'debs/__/zhes pa'i mthar phyag mchod dngos ni/__yid 'ong rdzing bu'i nang na gnas pa yi/__/'char ka'i pad+ma kha 'bus bye 'dra ba'i/__/lag gnyis spyi bor thal sbyar bstod dbyangs bcas/__/lus dpag med par sprul nas gus phyag 'tshal/__/bde bar gshegs pa brgyad kyi mdo chog gi__/lam bzang gsal mdzad dngos brgyud bla ma dang /__/phyogs bcu'i sangs rgyas des gsungs dam pa'i chos/__/deng 'dzin dge 'dun bcas la phyag 'tshal lo/__/mtshan legs rin chen gser bzang mya ngan med/__/chos grags mngon mkhyen sman bla shAkya thub/__/rgya chen smon lam yongs su rdzogs pa yi/__/bde bar gshegs pa brgyad la phyag 'tshal lo/__/mtshan gyi me tog rgyas shing dag pa la/__/dpe byad bzang po'i 'bru chags mdzes pa'i sku/__/gang gis mthong thos dran pa'i dpal gyur pa'i/__/ston pa mtshan legs dpal la phyag 'tshal lo/__/rin chen zla dang pad+mas rab brgyan cing /__/shes bya kun la mkhas shing mkhyen pa rgyas/__/rgya mtsho lta bur zab pa'i gsung mnga' ba'i/__/sgra dbyangs rgyal po khyed la phyag 'tshal lo/__/dzam+bu chu bo'i gser ltar lhang nge ba/__/nyi ma stong bas lhag pa'i gzi brjid 'bar/__/dri med gser gyi mchod sdong lta bu'i sku/__/gser bzang dri med snang la phyag 'tshal lo/__/mya ngan 'das shing bde ba'i mchog brnyes pa/__/'gro ba'i sdug bsngal gdung ba sel mdzad cing /__/'gro drug mgon dang dpal du gyur pa yi/__/mya ngan med mchog dpal la phyag 'tshal lo/__/chos sgra chen pos pha rol rgol ba 'joms/__/rgya mtsho lta bur zab pa'i gsung mnga' zhing /__/'gro ba'i dug gsum ma lus zhi mdzad pa'i/__/chos bsgrags rgya mtsho'i dpal la phyag 'tshal lo/__/chos kyi blo gros gting dpag dka' ba'i tshul/__/rnam dag chos kyi dbyings las rol mdzad cing /__/shes bya ma lus mngon sum gzigs pa po/__/mngon mkhyen rgyal po khyed la phyag 'tshal lo/__/thugs rjes kun la snyoms pa'i bcom ldan 'das/__/mtshan tsam thos pas ngan 'gro'i sdug bsngal sel/__/dug gsum nad sel sangs rgyas sman gyi bla/__/baiDUR+Ya yi 'od la phyag 'tshal lo/__/thabs mkhas thugs rjes shAkya'i rigs 'khrungs shing /__/gzhan gyis mi thub bdud kyi dpung 'joms pa/__/gser gyi lhun po lta bur brjid pa'i sku/__/shAkya'i rgyal po khyed la phyag 'tshal lo/__/kun 'byung mun pa'i sa bon mthar mdzad cing /__/sdug bsngal zug rngu'i rtsa ba drung nas 'byin/__/rgyal yum shes rab pha rol phyin la sogs/__/theg gsum dam pa'i chos la phyag 'tshal lo/__/'jam dpal gzhon nu skyabs grol gsang ba'i bdag__/tshangs dang brgya byin 'jig rten skyong ba bzhi/__/gnod sbyin sde dpon chen po bcu gnyis sogs/__/'phags pa'i dge 'dun rnams la phyag 'tshal lo/__/bskal pa grangs med 'das pa'i dus kyi tshe/__/phongs gyur 'gro ba mtha' dag skyob pa'i phyir/__/smon lam khyad par can rnams btab gyur pa'i/__/bde gshegs 'khor dang bcas la skyabs su mchi/__/dngos su bshams dang gzungs dang rig pa dang /__/mos pa'i stobs kyis bskyed pa'i mchod sprin ni/__/kun tu bzang po'i smon lam las byung ba/__/nam mkha'i pha mthar khyab pas rtag tu mchod/__/thog med nas bsags sdig ltung thams cad bshags/__/dus gsum dge ba kun la rjes yi rangs/__/chos 'khor bskor zhing yun du bzhugs par gsol/__/bsod nams bla med byang chub chen por bsngo/__/bde gshegs brgyad dang rigs gsum sems dpa' sogs/__/bcom ldan gdan 'dzom chen po 'khor bcas kyis/__/bdag dang snyigs ma'i 'gro ba mtha' dag la/__/thugs rje chen pos lhag par nyer dgongs te/__/ji ltar sngon tshe smon lam dam bcas bzhin/__/bden pa'i 'bras bu mngon sum snang mdzad nas/__/gnas skabs nad gdon sdig sgrib nyes ltung sogs/__/dam chos sgrub pa'i 'gal rkyen kun zhi zhing /__/tshe bsod dpal 'byor dad brtson shes rab sogs/__/mthun rkyen legs tshogs mtha' dag rgyas pa dang /__/bstan 'dzin zhabs brtan bshad sgrub bstan pa dar/__/'gro kun bde skyid 'phel bar byin gyis rlobs/__/tshe yi mthar yang bcom ldan sras bcas kyis/__/dag pa'i zhing du mngon sum 'khrid pa dang /__/myur du byang chub snying por lung bstan nas/__/don gnyis lhun gyis grub par mdzad du gsol/__/ces phyag dang bcas te lan ji ltar rigs pa dang /__spro na gzungs ring thung gang 'os bzlas mthar/__rten yod na nongs bshags/__brtan bzhugs sogs spyi ltar dang /__med na/__mchod pa'i yo byad ma 'byor nyams pa sogs/__/nongs pa gang mchis bzod par bzhes nas kyang /__/bcom ldan 'khor bcas rang rang zhing khams su/__/gshegs te slar yang 'byon par mdzad du gsol/__/bdag gzhan dge ba'i rtsa ba 'di yi mthus/__/phan bde'i 'byung gnas bstan pa 'phel gyur cig__/sdug bsngal kun 'byung ma lus rab spangs nas/__/srid pa'i rgya mtsho myur du skem par shog__/bde gshegs brgyad dang des gsungs dam pa'i chos/__/de 'dzin 'phags pa'i dge 'dun bcas pa la/__/rmad byung dge mtshan ji snyed mchis pa des/__/srid zhi'i legs tshogs rgyas pa'i bkra shis shog__/ces bsngo smon shis brjod ji ltar rigs par bya'o/__/zhes pa'ang kun mkhyen bo dong pa chen po'i ring lugs 'dzin pa'i rab 'byams smra ba ngag dbang bstan 'dzin gyis lha rdzas kyi me tog dang bcas te gsung gis bskul ba'i ngor/__snyom las pa 'jam dbyangs mkhyen brtse'i dbang pos dpal ldan bsam 'grub chos ldings kyi chos grwar sbyar ba'i dge bas 'gro kun don gnyis yid bzhin tu 'grub pa'i rgyur gyur cig____/_!__ sman bla'i gzungs ring ni/__tad+ya thA/__g+hu me g+hu me/__i me ni mi hi/__ma ti ma ti/__sap+ta ta thA ga ta sa ma d+h+yA d+hiSh+Thi te/__a ti ma te/__pA le/__pA paM sho d+ha ni/__sarba pA paM nA sha ya/__ma ma bud+d+ha/__bud+d+hot+ta me/__u me ku me/__bud+d+ha k+She tra pa ri sho d+ha ni/__d+ha me ni d+ha me/__me ru me ru/__me ru shi kha re/__sarba a kA la mr-i t+yu ni pA ra Ni/__bud+d+he su bud+d+he bud+d+ha d+hiSh+Tha na/__rak+Shan+tu me/__sarba de bA sa me a sa me sa ma n+wA ha ran+tu me/__sarba bud+d+ha bo d+hi sa_twA nAM/__sha me sha me/__pra sha man+tu me/__sarba i t+yu pa dra ba byA d+ha ya/__pU ra Ni pU ra Ni/__pU ra ya me/__sarba A kA shA ya bai DUR+Ya pra ti b+hA se/__sarba pA paM k+Sha yaM ka ri swA hA/__/gzungs thung ni/__tad+ya thA/__b+he Sha dz+yai b+he Sha dz+yai ma hA b+he Sha dz+yai rA dza sa mung+ga te swA hA//__// [�]