འབུལ་ཡིག་ལེའུ་ཚན་དང་སྤྲིངས་ཡིག་སྐོར།

🚧 This website is under continued development. We appreciate your patience!

Previous Text Back to Volume Page Next Text

Wylie title	'bul yig le'u tshan dang springs yig skor
Location	dpal sprul bka' 'bum Volume 1, Text 20, Pages (Folios to )
Author	དཔལ་སྤྲུལ་རིན་པོ་ཆེ་
Less details More details
Citation
Genre	Records - tho

[edit]

༄༅། །འབུལ་ཡིག་ལེའུ་ཚན་དང་སྤྲིངས་ཡིག་སྐོར་བཞུགས་སོ། །

ཤེས་རབ་མཆོག་གི་སྣང་བ་ཡིས། །རྨོངས་པའི་མུན་པ་རབ་བསལ་ནས། །ཐར་བའི་ལམ་བཟང་སྟོན་མཛད་པ། །བླ་མེད་བླ་མ་རྒྱལ་གྱུར་ཅིག །ཡང་དག་ཡེ་ཤེས་སྒྱུ་མའི་རྟེནའབྲེལ་ལས། །མཚན་དཔེའི་རི་མོ་བཀྲ་བ་གཟུགས་ཀྱི་སྐུ། །སྲིད་པའི་གདུང་བ་སེལ་བའི་འོད་དཀར་ཅན། །བསོད་ནམས་བྱེ་བའི་འབྱུང་གནས་གང་དྲུང་དུ། །སོར་བཅུའི་པདྨོ་འཛུམ་པའི་རྣམ་འགྱུར་ལས། །དད་བརྒྱའི་ཀུ་མུད་དགོད་པའི་དཔལ་རྟོགས་པའི། །དགེ་མཚན་གསར་དུ་ངོམ་དང་ཆབ་གཅིག་པར། །ཞུ་མཆིད་རྒྱུ་སྐར་ལྷ་མོའི་མགྲིན་གླུ་སྒྲོགས། །གཅིག་དང་དུ་མའི་མཐའ་ལ་གནས་མིན་པའི། །རྒྱལ་བའི་ཡེ་ཤེས་གཅིག་གི་ཆོ་འཕྲུལ་ལས། །འགྲོ་ཁམས་མོས་པའི་བྱེ་བྲག་ཅི་སྙེད་དུ། །རྣམ་རོལ་སྤྲུལ་པའི་ཟླ་བ་བགྲངས་ཡས་འཆར། །གང་ཡང་རང་བཞིན་མེད་པར་རོ་གཅིག་པས། །ངང་ཚུལ་ཅིར་ཡང་འཆར་བ་ཆོས་ཉིད་ཕྱིར། །སྟོང་དང་རྟེན་འབྲེལ་འགལ་བ་མེད་ཚུལ་ལས། །སྲིད་དང་ཞི་བའི་ཆོས་ཁམས་གང་ཞིག་གདའ། །དེ་ཕྱིར་ཆོས་ཉིད་དག་པའི་ཆོས་སྐུ་ལས། །རྟེན་འབྱུང་ཡེ་ཤེས་འཁོར་ལོའི་སྒྱུ་འཕྲུལ་སྤྲིན། །སིནྡྷུའི་དྭངས་མཚོར་སྨིན་པ་མཚོ་སྐྱེས་རྗེ། །སྙིགས་འགྲོའི་མགོན་དུ་གྱུར་པ་ཁྱོད་མིན་ནམ། །སྣང་བའི་བདེན་ཞེན་ཟད་པའི་རིག་ངོ་ན། །རྙེད་བཀུར་མཚན་མར་འཛིན་པའི་བློ་ཟད་ཀྱང་། །སྙིང་རྗེའི་རྩ་བ་བརྟན་པའི་བྱང་སེམས་ཀྱིས། །ཕང་ཕུང་སྲིད་པའི་གདུང་སེལ་ལྷག་པར་རྒྱས། །གང་གི་བྱིན་རླབས་ཐུགས་རྗེའི་གྲིབ་བསིལ་དུ། །བསྟི་བའི་ངལ་བསོ་ཐོབ་པའི་སྐལ་བཟང་ཡང་། །མཐོ་རིས་ཡོན་ཏན་དུ་མའི་དགའ་བ་ལས། །རོལ་པའི་དཔལ་འབྱོར་གསར་དུ་བསྐྱེད་མིན་ནམ། །དེ་སླད་བརྩེ་བའི་མ་ལ་བུས་བོས་བཞིན། །རབ་དགའི་མིག་དཀྱུས་གཡོ་དང་ཆབ་གཅིག་པར། །དངོས་འབྱོར་མཆོད་པའི་མེ་ཏོག་ཆུང་ངུ་ཡང་། །ཞུམ་མེད་སྟོབས་པའི་ཚུལ་ལ་སྤྲོ་བ་འཕེལ། །གང་ཞིག་དུས་གསུམ་གྱི་རྒྱལ་བ་ཐམས་ཅད་ཀྱི་ཕྲིན་ལས་གཅིག་ཏུ་བསྡུས་པའི་བདག་ཉིད་དཔལ་མགོན་གྱི་སློབ་དཔོན་པདྨ་འབྱུང་གནས་ཉིད་གདུལ་དཀའ་སྙིགས་མའི་འགྲོ་ངོར་སླར་ཡང་སྤྲུལ་པའི་རོལ་གར་གཉིས་པར་བསྟན་པ། ཟབ་མོ་གཏེར་གྱི་འཁོར་ལོས་བསྒྱུར་བ་ཆེན་པོ་གང་ཉིད་སྔོན་སྨོན་ལམ་ཟབ་མོའི་རྟེན་འབྲེལ་དང་། ཐུགས་བསྐྱེད་བླ་ན་མེད་པའི་མཚམས་སྦྱོར་ལས། མདོ་ཁམས་སའི་ལྟེ་བ། རུ་དམ་འཛིན་མའི་ལྗོངས་འདིར། ཞབས་ཀྱི་འཁོར་ལོ་ལེགས་པར་བཀོད་དེ། ཁོ་བོ་ཅག་གང་དུ་བསྟི་བའི་གཙུག་ལག་ཁང་ཆེན་པོ་འདིར་ཡང་། བཀྲ་ཤིས་པའི་དགེ་མཚན་བརྒྱ་ཕྲག་གི་བྱེད་པོ། ཞལ་དཀྱིལ་ཟླ་བ་གང་པའི་ལང་ཚོ། སྐལ་བཟང་མིག་གི་བདུད་རྩིར་སྣང་བར་མཛད་ནས། སྨིན་གྲོལ་ཟབ་མོའི་དགའ་སྟོན་གྱིས་རིགས་མཆོག་རྡོ་རྗེ་འཆང་གི་རྒྱལ་སར་དབང་བསྐུར་བ་དང་། མཐོང་ཐོས་དྲན་རེག་གིས་འབྲེལ་པའི་སྐལ་མེད་ཐར་བའི་ས་བོན་འདེབས་པ་དང་། རྟེན་འབྲེལ་ཟབ་མོའི་ཚོགས་སྣོད་བཅུད་དགེ་ལེགས་སུ་བྱེད་པའི་ཐབས་མཁས་ངོམ་པ་སོགས་གང་ལ་གང་འདུལ་གྱི་མཛད་པ་དཔག་དཀའ་བའི་ཐུགས་རྗེ་གཞལ་དུ་མེད་པའི་བཀའ་དྲིན་གྱིས་སྐྱོང་བར་མཛད་པའི་སྐུ་དྲིན་ནམ་མཁའི་མཐའ་བཞིན་གཞལ་བར་ནུས་པ་མ་ཡིན་མོད་ཀྱི། རང་བློས་བྱས་ཤིང་དྲིན་བཟོའི་སྲོལ་ཀ་མི་ནུབ་པའི་བརྡ་ཙམ་དུ། ཐོག་མར་བཀྲ་ཤིས་ལྷ་གོས་ཟླ་བའི་མདངས་ཅན་བཀྲ་ཤིས་པའི་རི་མོ་བཀྲ་བ་སོགས། བརྒྱ་ཕྲག་གསུམ་གྱི་འབུལ་ལམ་ཞུ་ཞིང་། དེ་ལྟར་དངོས་འབྱོར་ཟང་ཟིང་གི་མཆོད་པ་ཕྲ་མོའི་མཚོན་པའི་རྟེན་དུ་བྱས་ཏེ་ཡིད་སྤྲུལ་ཀུན་ཏུ་བཟང་པོའི་མཆོད་སྤྲིན་གྱི་རྗེས་སུ་སློབ་པའི་མོས་འདུན་རྣམ་པར་དག་པ་དང་བཅས་དགེ་ཚོགས་བྱང་ཆེན་དུ་བསྔོ་བའི་ཚིགས་སུ་བཅད་པའི་དབྱངས་ལ་འཁོར་གསུམ་བདེན་ཞེན་དག་པའི་ཟག་མེད་ཐུགས་ཀྱི་དགོངས་པས་རྗེས་སུ་དགོངས་ཤིང་། ཚངས་དབྱངས་གསུང་གི་བརྗོད་པའི་མཐུན་གྱུར་ཀྱང་བཀའ་དྲིན་དུ་ཞུ་ལགས། གང་ཞིག་བྱང་ཆེན་རྒྱ་མཚོར་རོ་གཅིག་པའི། །སེམས་མཆོག་སྙིང་རྗེས་ཤུགས་ཀྱིས་སྲིད་འགྲོ་སྤྱིའི། །རྣམ་མཁྱེན་ཡེ་ཤེས་རྒྱ་མཚོའི་ཚོང་ཟོང་དུ། །སྦྱར་ལ་ཡིད་འོང་འབྲས་བུ་ཅིས་མི་སྨོན། །གནས་སྐབས་བྱང་ཆུབ་སྤྱོད་པ་བླ་ན་མེད། །ཀུན་བཟང་འཇམ་དཔལ་དཔའ་བོའི་རྗེས་སློབ་པའི། །ཐབས་ཚུལ་ནམ་མཁའི་ཕྱོགས་དུས་ལ་འགྲན་ལ། །མིང་ལ་བརྩོན་པའི་ཁུར་དུ་ཐོབ་པར་སྨོན། །དེ་འབྲས་མ་རྒན་འགྲོ་བའི་དགའ་སྟོན་དུ། །གྱུར་ནས་སྲིད་པའི་དུཿཁ་ཀུན་ཞི་ཞིང་། །ལམ་དང་ལམ་གྱི་སྟེགས་པ་བདེར་འཛེགས་པའི། །བགྲོད་པ་ནོར་བུས་ཐེམ་སྐས་རྟེན་གྱུར་ཅིག །ཁྱད་པར་སྙིགས་མའི་སྐྱབས་མགོན་ཨོ་རྒྱན༵་རྗེ། །ཕྲིན་ལས་ནམ་མཁའི་མཐས་ཀྱང་གཞལ་དཀའ་བར། །གསལ་བྱེད་སྤྲུལ་བའི་རོལ་གར་འབུམ་ཕྲག་འབུམ། །མཐོང་བའི་སྐལ་བཟང་དགའ་བ་རྟག་འཆར་ཤོག །གང་ལ་མཆོག་གི་མཛད་པ་མཆོག༵་གྱུར༵་བ། །གང་ཡང་བདེ༵་ཆེ༵ན་བདེ་བར་སྡོམ་པའི་མགོན། །གང་དུ་གདུལ་བྱའི་གླིང་བཞི་གླེང༵་གྱུར༵་བ༵། །གང་གི་ཞབས་པད་བསྐལ་བརྒྱའི་བསྐལ་མཐའ་བརྟན། །ཞལ་མཇལ་གསུང་གི་བདུད་རྩི་ལེགས་བཏབ་པའི། །བདག་ཅག་ལྟོས་བཅས་སློབ་མའི་འཁོར་ཚོགས་ཀྱང་། །སྨིན་གྲོལ་ལམ་གྱི་སྦྱངས་བརྩོན་མི་དམན་ཞིང་། །ཀུན་ཤེས་མཐོང་སྒོམ་འབྲས་བུ་དར་གྱུར་ཅིག །ས་ཕྱོགས་འདིའི་མཚོན་ཡངས་པའི་རྒྱལ་ཁམས་ཀུན། །སྙིགས་མའི་རྒུད་པ་མིང་གི་མཐར་བྱས་ཏེ། །རྫོགས་ལྡན་གསར་དུ་མཐོང་བའི་ངོ་མཚར་གྱིས། །སྣོད་བཅུད་གསུམ་རྩེན་གནས་ལ་འགྲན་པར་སྨོན། །སྨོན་འོས་ལེགས་ལམ་སྟོང་གི་རྒྱུད་གཅིག་ཏུ། །ཟབ་གཏེར་བདུད་རྩི་གསར་བའི་རྒྱུན་བཟང་པོར། །བཤད་སྒྲུབ་སྦུ་ཕྲེང་བྱེ་བའི་གར་རོལ་བ། །སྲིད་པའི་མཐའ་རྒྱ་འགེབ་ལ་རྒྱལ་གྱུར་ཅིག །རྙིང་བསྟན་ལྷ་ལམ་ཡངས་པའི་དོ་ར་ན། །བཀའ་གཏེར་ཉི་ཟླའི་བགྲོད་པ་ཕྱོགས་མཐུན་པའི། །དགེ་ལེགས་ངེས་པ་ལྔ་ལྡན་ཞིང་བཞིན་དུ། །འཛམ་གླིང་ཡངས་པའི་ཁམས་ཀུན་འགེངས་གྱུར་ཅིག །སྔོན་བྱོན་ཆོས་རྒྱལ་ཡབ་སྲས་ཐུགས་བསྐྱེད་རྒྱུན། །ཕྱིས་འབྱུང་གདུལ་བྱ་འདུལ་བའི་ཐབས་མང་པོར། །གེགས་མེད་རྟེན་འབྲེལ་སྒོ་འཕར་བརྒྱ་ཕྱེ་ཞིང་། །བསྟན་འགྲོའི་ལེགས་ལམ་སྣང་བ་རྒྱས་པར་སྨོན། །བཀྲ་ཤིས་གང་ཞིག་སྲིད་དང་ཞི་བའི་གདུང་སེལ་བ། །རིན་ཆེན་སེམས་དང་གཉིས་སུ་དབྱེ་བ་མེད་གྱུར་གང་། །དམིགས་བྲལ་ཆོས་ཉིད་མངོན་སུམ་གཟིགས་པའི་དགེ་བ་དེས། །ས་གསུམ་ཡང་དག་ཡེ་ཤེས་སྣང་བ་འབར་གྱུར་ཅིག །གཏེར་ཆེན་མཆོག་གྱུར་བདེ་ཆེན་གླིང་པ་རུ་དམ་ཨོ་རྒྱན་བསམ་གཏན་ཆོས་གླིང་དུ་ཕེབས་སྐབས་རྫོགས་ཆེན་བླ་བྲང་གི་འབུལ་ཡིག་དཔལ་སྤྲུལ་པས་སོ། ། ༈ རྒྱལ་ཀུན་ཡེ་ཤེས་ཐུགས་རྗེ་ཕྲིན་ལས་ཁམས། །གདུལ་བྱའི་སྣང་ངོར་མཚན་དཔེའི་སྐུར་སྣང་བ། །རྡུལ་སྙེད་སྤྲུལ་བའི་གར་རོལ་ཨོ་རྒྱན་རྗེ། །ཐུགས་སྲས་རྗེ་འབངས་བརྒྱུད་བཅས་རྒྱལ་གྱུར་ཅིག །གང་ཐུགས་ཡེ་ཤེས་གཅིག་གི་རྣམ་རོལ་ལས། །འགྲོ་ཁམས་མོས་པའི་བྱེ་བྲག་ཇི་སྙེད་པར། །གདུལ་བྱེད་སྟོན་པའི་རྣམ་གྲངས་བརྗོད་འདས་ལ། །དད་བརྒྱའི་གུས་ཕྱག་གློག་གི་གར་བཞིན་རྩེན། །ཁྱད་པར་སྙིགས་འགྲོའི་གདུལ་དཀའི་རྒྱུད་ཐ་བར། །ལམ་བཟང་བདུད་རྩིའི་རླན་སྦྱིན་ཟབ་གཏེར་ཆོས། །སྦས་པའི་རྒྱ་བཀྲོལ་ཐང་མར་བརྡལ་མཛད་པའི། །བཀའ་དྲིན་ནམ་མཁའི་མཐས་ཀྱང་གཞལ་དཀའ་ཤེས། །ལྷག་པར་ཐུགས་རྗེ་མཆོག་གིས་སྤྱན་རས་གཟིགས། །མཆོག་དམན་སྐལ་བར་འཇུག་པའི་ཕྲིན་ལས་རྒྱུན། །རང་རྒྱུད་བསོད་ནམས་ཟོང་གིས་ཁུག་པའི་རིན། །སྟོང་ཆེན་གསེར་གྱིས་བཀང་ཡང་ཆུང་མཐར་ངེས། །དེ་ལྟ་ནའང་འཕགས་ཆེན་དམ་པའི་ཐུགས། །མ་ལ་བུ་བཞིན་གདུལ་འགྲོར་རྗེས་བརྩེ་བས། །ཆོས་བརྒྱད་ཟང་ཟིང་འདོད་པ་ཟད་པའི་གཤིས། །དམ་པའི་སྐུ་དྲིན་དྲན་ནས་མཇལ་བློ་སྐྱེས། །སྐྲ་རྩེས་བླང་བའི་ཆུ་ཐིག་རྒྱ་མཚོར་བཞིན། །དགེ་ཚོགས་ཆོས་དབྱིངས་དག་པའི་ཀློང་སྟོབས་པའི། །ཐུགས་བསྐྱེད་མཁའ་ཁྱོན་འགེངས་བའི་ཆ་ཤས་སུ། །དངོས་འབྱོར་མཆོད་པའི་རྡུལ་ཕྲན་གཤིབ་ལ་བྲེལ། ཞེས་ཤིས་བརྗོད་ཕྱག་དང་མཆོད་པའི་ཚིགས་སུ་བཅད་པ་ཅུང་ཟད་ཀྱིས་མདུན་བསུས་ཏེ། །སྐབས་སུ་བབས་པའི་ཞུ་གསོལ། དེང་བླ་ན་མེད་པའི་ཐུགས་བསྐྱེད་མཆོག་གི་སྐྱ་རེངས་ཀྱི་སྣང་བས་མངོན་པར་དྲངས་པའི་གཟུགས་སྐུ་རྟ་ལྗང་གི་དཀྱིལ་འཁོར་ཨོ་རྒྱན་སངས་རྒྱས་གཉིས་པའི་རྒྱལ་ཚབ་མཆོག་གི་ཕྲིན་ལས་ཀྱི་ཁུར་ཆེན་པོ་བསྣམས་ཏེ། ཟབ་མོ་གཏེར་གྱི་འཁོར་ལོས་ཐུབ་བསྟན་གླིང་བཞིའི་ཁྱོན་ལ་དབང་བསྒྱུར་ནས་སྐལ་བཟང་རྗེས་སུ་འཛིན་པའི་རྟེན་འབྲེལ་གྱི་སྒོ་འཕར་བརྒྱ་ཕྲག་ཅིག་ཆར་དུ་འབྱེད་པའི་ཕྲིན་ལས་བླ་ན་མེད་པ་ལས། རང་རྒྱུད་སྐལ་བའི་དཔལ་དུ་ཐུགས་རྗེས་ཆར་རྒྱུན་ལྷག་པར་བབས་པའི་སྐུ་དྲིན་གསོ་བྱེད། དངོས་འབྱོར་མནྜལ་གྱི་མཆོད་པ་ཕྲན་བུ་སྤྲོ་བ་ལ། ཐོག་མར་སོགས་ཞུ་ཞིང་། གང་ཞིག་གསེར་དང་བོང་བ་མཉམ་གཟིགས་པའི། །སྤྱན་སྔར་དངོས་རྫས་མཆོད་པ་མཉེས་བྱེད་དུ། །འོས་པ་མིན་ཡང་བདག་ལྟའི་མདུད་པའི་རྒྱ། །ལྷོད་པར་རེ་བའི་ཐབས་ལ་དགའ་བ་སྐྱེས། །ལུས་དང་ལོངས་སྤྱོད་དུས་གསུམ་དགེ་བའི་རྒྱུན། །ཡིད་སྤྲུལ་རང་བློས་གང་དཔོག་མཆོད་པའི་སྤྲིན། །ཀུན་ཏུ་བཟང་པོའི་རྣམ་རོལ་རྗེས་སློབ་པའི། །ཚུལ་ལ་འཇུག་པའི་རྣམ་རྟོག་ཟད་པར་གྱུར། །གཡོ་བའི་ཀུན་རྟོག་རླབས་ཀྱིས་དཀྲུགས་ཡིད་མཚོར། །ཉེས་སྤྱོད་རྙོག་མ་བཀྲུ་བའི་ཀེ་ཏ་ཀ །སྟོབས་བཞིའི་ཡན་ལག་རྫོགས་པའི་ཀུན་སློང་འབུལ། །དག་བྱེད་གངྒའི་རྒྱུན་བཟང་གཉིས་པར་ཆས། །སྲས་བཅས་རྒྱལ་བའི་ཕྲིན་ལས་དཔག་དཀའི་ཁུར། །ཐུགས་བསྐྱེད་དཔུང་བ་གཅིག་གིས་བཏེགས་པའི་རྗེས། །ཡི་རང་མེ་ཏོག་སིལ་མ་འགམ་པ་ལ། །ལྷ་ཡུལ་ནམ་མཁའི་དྲི་བཞོན་ཁེངས་པ་འཕྲོག །ཟབ་དོན་མཁའ་འགྲོའི་ཞལ་ཆབ་བཞུས་པའི་གསེར། །ཐབས་མཆོག་རྩིབ་སྟོང་བཀྲ་བའི་བཤད་སྒྲུབ་འགྲོས། །སྐལ་ལྡན་ཡིད་མཁར་ཐོགས་པ་མེད་རྒྱུ་བས། །ཀུན་སྦྱོར་འཆིང་བ་གཅོད་ལ་རྟག་ཏུ་རེ། །དབང་བཅུའི་དབང་གིས་ཆེས་ཕྱུག་ཨོ་རྒྱན་རྗེའི། །རྒྱལ་ཚབ་རྒྱལ་བར་མཉམ་པའི་འཚོ་གཞེས་རྒྱུན། །བསྐལ་བརྒྱའི་བསྐལ་མཐར་བསྲིང་བའི་ངོ་མཚར་ལ། །དད་གསུམ་དད་ཕྱག་དང་བཅས་ལན་བརྒྱར་གསོལ། །དེ་དགེ་དྲི་མེད་ཟླ་བའི་མདངས་འཕྲོག་པ། །འཁོར་གསུམ་ར་རི་ཕྱིས་པའི་དཀར་ཕྱོགས་ཆ། །ཀུན་མཁྱེན་ཡེ་ཤེས་ཕུང་པོར་ཡོངས་རྫོགས་ནས། །སྲིད་པའི་སྣང་བྱེད་གཅིག་པུར་འབར་གྱུར་ཅིག །གནས་སྐབས་སུ་ཡང་སྲིད་པའི་འགྲོ་རྒྱུད་ཁམས། །བདེ་དགེའི་དཔལ་བརྒྱས་ཆེས་ཆེར་གང་བའི་རླབས། །ཐུབ༵་བསྟན༵་ལྗོན་པའི་རྐང་གིས་ལྷབ་ལྷུབ་དུ། །བརྒྱན་པའི་རྒྱ༵ལ་མཚ༵ན་མཐོ་རིས་རྒྱལ་གྱུར་སྨོན། །བཅུ་དྲུག་དགའ་བས་བཞུས་པའི་བདེ༵་ཆེ༵ན་གསེར། །གླིང༵་བཞིའི་མཁའ་མཐར་མཐོ་བའི་ཏོག་བཟང་དུ། །སྤྲས་ལས་ཟབ་གཏེར་འོད་བརྒྱའི་དཔལ་འབར༵་བ། །དར་རྒྱས་རྟག་བརྟན་རྡོ་རྗེའི་ཁམས་སུ་གྱུར། །བཀྲ་ཤིས་སྙིང་གི་ཉིན་བྱེད་འོད་པོ་ཆེ། །སྲིད་ཁམས་མ་རིག་མུན་པ་སེལ་བའི་འོད། །ཡང་དག་ཡེ་ཤེས་སྣང་བས་འཛམ་གླིང་ཁྱོན། །ངོ་མཚར་དགེ་ལེགས་མཆོག་གིས་ཁྱབ་གྱུར་ཅིག །ཅེས་པ་འབུལ་ཡིག་འདི་གཏེར་ཆེན་རིན་པོ་ཆེ་གླིང་སྤྲུལ་ཚང་གིས་གདན་འདྲེན་སྐབས་སུ་དཔལ་སྤྲུལ་རིན་པོ་ཆེས་ལྗགས་རྩོམ་མོ། ། ༈ རྡོ་བླ་སྤྲུལ་སྐུ་ཚང་ལ་བླ་མ་རོག་གྲ་མ་དཔལ་དགེའི་མདུན་ནས་རྩ་རླུང་ཞུ་བསྐུལ་རྩེད་མོའི་ཚུལ་དུ་ཞུ་གསུངས་པ། བླ་སྤྲུལ་དཔོན་བཅས་ཞབས་དྲུང་དུ། །སྡེ་མཐའི་རྒན་མོས་རུ་ཆུས་བཞིན། །བས་མཐའི་རྒན་པོས་གུས་ཞུ་བ། །ཀློང་ཆེན་སྙིང་ཐིག་རྩ་རླུང་འདི། །དར་དུས་ཧ་ཅང་དར་ཆེ་སྟེ། །རས་པ་ཁྲ་རས་ས་སྟེང་ཁྱབ། །ད་ནི་ཧ་ཅང་དཀོན་ཆེ་སྟེ། །བླ་རྒན་དཔལ་དགེ་མ་གཏོགས་པ། །བརྒྱུད་འཛིན་གཅིག་ཀྱང་བོད་ན་མེད། །ད་ནི་རྒྱུད་པ་ཆད་ལ་ཐུགས། །ཨི་ཐུག་མི་ཐུག་ཐུགས་བསམ་གཞིག །རྡོ་གསེར་དགོན་པ་ཐམས་ཅད་ན། །ཆོས་ཐུན་གསུམ་པོ་ཆག་པ་མེད། །ཨུ་བུ་ཚང་ལ་གཅིག་ལས་མེད། །ད་ནི་གྲྭ་བ་ཐམས་ཅད་པོ། །རྩ་རླུང་རྫོགས་ཆེན་ཞུ་ཕྱིར་དུ། །དཔལ་སྤྲུལ་ཡུལ་ལ་འཆོར་རེས་རེད། །མ་ཤོར་གསུམ་ལ་རྡོག་པ་གཏོད། །བསྟན་པ་རྒྱས་པའི་བཀྲ་ཤིས་ཤོག ། ༈ རྣམ་རྟོག་སྤན་སྤུའི་དམག་ཚོགས་ལང་བ་ན། །ཁ་བོ་ཆེ་བའི་རྫོགས་ཆེན་དཔའ་བོ་ཡང་། །གར་སོང་མེད་པར་ཆ་མེད་ཡུལ་དུ་བྲོས། །ཟང་ཐལ་རིག་པའི་མདུང་ཐུང་རྣོན་པོ་ཡང་། །གཡུགས་ལུང་མ་བྱུང་མདུང་ཡུ་ཆགས་ལ་ལྟོས། །སྒོམ་ཆེན་མཉམ་པར་བཞག་པའི་གདན་འོག་ནས། །རྣམ་རྟོག་སྤན་སྤུའི་བྱི་ལོང་འབུར་བ་ན། །སྡོད་དུ་མ་ཚུགས་འཕར་འདར་ལིང་ལིང་ལངས། །ཆགས་སྡང་འཁྲུགས་ལོང་རླུང་ཚུབ་ལངས་བ་ན། །ཆོས་དབྱིངས་མཛོད་ཀྱང་ནུས་པ་མེད་པར་གཏོར། །ད་ནི་ཅི་ཡང་བྱེད་ཐབས་མི་འདུག་པས། །སྤྱོད་འཇུག་བཟོད་ལེའི་ཁྲབ་སྒོག་འཐོར་བོ་དེ། །གྱོན་མོས་མེད་ཀྱང་མི་གྱོན་ཁ་མེད་ཡིན། །ཇི་སྐད་དུ། ས་སྟེང་འདི་དག་ཀོས་གཡོག་ཏུ། །དེ་སྙེད་ཀོ་བས་ག་ལ་ལང་། །དེ་བཞིན་ཕྱི་རོལ་དངོས་པོ་ཡང་། །བདག་གིས་ཕྱིར་བཟློག་མི་ལང་གིས། །རང་གི་སེམས་འདི་ཕྱིར་བཟློག་བྱའི། །གཞན་རྣམས་བཟློག་ཀོ་ཅི་ཞིག་དགོས། །ཞེས་དང་། །དེ་བས་ང་ལ་བསམ་བསྒྲུབ་པས། །ཁྱིམ་དུ་གཏེར་ནི་བྱུང་བ་ལྟར། །བྱང་ཆུབ་སྤྱོད་པའི་གྲོགས་གྱུར་བའི། །བདག་གི་དགྲ་ལ་དགའ་བར་བྱ། །ཞེས་སོ། །འདི་ན་སྒོམ་ཆེན་མང་པོ་ཞིག །གཉེན་པོའི་གོ་མཚོན་མང་ཡོད་ཀྱང་། །ཁོང་ཁྲོའི་འཐབ་ཡུལ་མ་རྙེད་ནས། །ཞི་གནས་ངང་ལ་གཉིད་དུ་ལོག །བསོད་ནམས་ཅན་གྱི་གང་ཟག་ལ། །ཆགས་སྡང་རྐུན་པོ་འཇབ་པ་དེ། །གཉེན་པོའི་གོ་ཆ་སྲ་མི་སྲ། །ལྟ་བསྒོམ་རལ་གྲི་རྣོ་མི་རྣོ། །རྣལ་འབྱོར་དཔའ་སྙིང་ཡོད་མེད་བལྟ། །ཨོ་ཧོ་ཧོ། །གང་ཚེ་རང་ཡིད་ཆགས་པ་དང་། །ཁྲོ་བར་འདོད་པའི་སེམས་བྱུང་ངམ། །སྨྲ་བར་འདོད་པའི་སེམས་བྱུང་ན། །དེ་ཚེ་ཤིང་བཞིན་བཞུགས་སུ་གསོལ། །བཛྲ་ས་མ་ཡ་ཏིཥྛ་ལྷན། རིག་འཛིན་འཇིགས་མེད་གླིང་པའི་ཞལ་ནས། ཆེ་དགུ་དུ་མའི་སྙིང་ལ་གནས་བཅས་ནས། །མཛད་སྤྱོད་ལོག་པར་བསྒྱུར་དང་ཆབ་གཅིག་པར། །ནད་མཚོན་མུ་གེའི་སྣ་འདྲེན་བྱེད་པ་ཡི། །རྒྱལ་འགོང་སོགས། ཞེས་སོ། །དེ་ཡང་། རྔ་ལ་རྔ་ཡི་དབྱུ་གུ་དང་། །རོལ་མོ་ཀུན་ལ་ཁ་ཡ་བཞིན། །གྲོགས་མེད་གཅིག་པུར་གནས་པ་ལ། །གཏམ་དང་སྨྲ་བརྗོད་འབྱུང་མི་སྲིད། །དེ་ཕྱིར་བླ་མ་གྲྭ་བ་དང་། །དབུ་ཆོས་དཔོན་གཟུ་ལ་སོགས་པའི། །ཁ་སེམས་གཉིས་པོ་འདྲེས་དཀྲུགས་ནས། །འཁྲུགས་ལོངས་བཤད་གཏམ་འཐབ་རྩོད་སློང་། །དེ་ལས་ནད་མཚོན་མུ་གེ་སོགས། །འཇིག་རྟེན་མི་བདེ་ཐམས་ཅད་འབྱུང་། །དེ་དག་ཀུན་གྱི་རྩ་བ་ནི། །གཅིག་པུར་སྡོད་དུ་མ་ཚུག་པའི། །རྣམ་རྟོག་ངན་པ་གཅིག་ལ་ཐུག །དེའི་ཕྱིར་མི་བློ་འདྲེས་བརྒུལ་བའི། །རྣམ་རྟོག་འཕྲོ་འདུ་མང་པོ་འདི། །རྫོགས་པ་ཆེ་དང་བཟོད་པ་དང་། །ཐ་ན་སྡུག་བསྲན་མུག་བསྲན་ཡན། །ཐབས་ཚུལ་གང་དང་གང་དྲག་གིས། །ཡང་དག་ལམ་དུ་སློང་ནུས་ན། །དེ་ཚེ་བདུད་ཀྱི་གཡུལ་ལས་རྒྱལ། །ཕྱིན་ཆད་ལྷ་ཆོས་ཅི་སྤྱོད་ཀྱང་། །བར་ཆད་མེད་ཅིང་ལམ་དུ་འགྲོ། །བདུད་དབང་རྣམ་རྟོག་ངན་པ་འདི། །ལམ་དུ་མ་སློང་རྗེས་འབྲང་ན། །བླ་མའི་ཐུགས་དཀྲུགས་མཆེད་གྲོགས་ཀྱི། །ཐུགས་དཀྲུགས་ཐར་བ་ནག་པོ་བཞིན། །ཕྱིན་ཆད་ཆོས་ཀྱི་སྐལ་བ་ཆད། །དེ་ཕྱིར་རྟོག་ངན་ཅི་སྐྱེས་ཀྱང་། །སྤང་བླངས་མི་བྱ་རང་སོར་གློད། །ཀུན་བཟང་སྨོན་ལམ་བཏོན་ན་གོ །དྲན་པས་ཟིན་པའི་རྣམ་རྟོག་གིས། །ལས་མི་གསོགས་ཞེས་བླ་མས་གསུངས། །དེ་ཕྱིར་ཁོང་ནས་སྐྱེས་ཙམ་གྱི། །རྟོག་ངན་ཅི་ཙམ་འཕྲོ་ན་ཡང་། །དེ་ཡིས་ངན་འགྲོར་འཕེན་མི་ནུས། །གཉེན་པོ་ལྡན་པའི་རྣལ་འབྱོར་ལ། །རྟོག་ངན་ཅི་ཙམ་སྐྱེས་ན་ཡང་། །ཤར་གྲོལ་ངང་དུ་གློད་ཤེས་ན། །གྲོལ་ལུགས་བཞི་ཡི་ལྟད་མོ་དང་། །རྣམ་གྲོལ་འབྲས་བུའི་སྟོན་མོ་ཡོད། །ལྟད་མོ་སྟོན་མོ་ལ་རོལ་ནས། །མཁའ་འགྲོའི་ལུང་བསྟན་གནས་མཆོག་ཏུ། །སྡོད་པའི་མི་དེ་སྐལ་བ་བཟང་། །ཞེས་པ་འདི་ཁྲོམ་ཟ་ཀུན་བཟང་བསྟན་འཛིན་ཁྲ་མ་ལུང་རི་ཁྲོད་ལ་སྡོད་སྐབས་རྣམ་རྟོག་གི་རྐྱེན་མང་གཡོས་ཚེ། སྐྱབས་རྗེ་དཔལ་སྤྲུལ་པས་སྤྲིངས་པ་ཡིན་ནོ། ། ༈ རྫ་རྒྱལ་རྒྱབ་རི་རྨ་རྒྱལ་མདུན་རི་ཅན། །བླ་མ་མཁའ་འགྲོས་ལུང་བསྟན་གནས་མཆོག་ཏུ། །རྩེ་གཅིག་སྒྲུབ་ལ་བརྩོན་པར་མི་ནུས་པར། །སྔར་རྙེད་བརླག་དོགས་ཕྱི་རྙེད་མེད་དོགས་སྐྲག །སྟོང་འུར་གཏམ་ལ་ཉན་ནས་ཤིན་ཏུ་སྐྲག །རི་བོང་ཅལ་འགྲོགས་དགོན་པ་གཤེགས་སུ་གསོལ། །རེ་དོགས་རྟ་ལ་ཆིབ་ནས་གཤེགས་སུ་གསོལ། །ཞེན་ཆགས་སྒྲོག་གིས་བཅིང་ནས་གཤེགས་སུ་གསོལ། །ལྷག་ལྷོག་འཛད་མེད་བཀལ་ནས་གཤེགས་སུ་གསོལ། །ཆབ་ཆོབ་གཡག་རྒྱབ་ནོན་ནས་གཤེགས་སུ་གསོལ། །རྟ་ཆད་གཡག་ཆད་སྐྱོང་ཞིང་གཤེགས་སུ་གསོལ། །སྨིན་དྲུག་རྔ་ཚུབ་ནང་འདིར་གཤེགས་སུ་གསོལ། །བཛྲ་ས་མ་ཛཿ ཞེས་པ་འདི་རྫ་རྒྱལ་དགོན་པ་ཁྲ་མ་ལུང་ནས་ཕྱིར་ཁྲི་འགབ་མར་སྤོ་སྐབས་ཞལ་རྩེད་ཚུལ་དུ་སྤྲིངས་པའི་ཡི་གེ་དཔལ་སྤྲུལ་པས་མཛད་དོ། ། ༈ དལ་འབྱོར་དང་ལྡན་པའི་བླ་སེར་དཔོན་ཁག་རྣམས་ཀྱི་གཙོས་པའི་མགོ་ལོག་ཁག་གསུམ། རྡོ་སྙི་གསེར་གསུམ། ཡུལ་འབྲོག་སྤྱིའི་ཡིད་ལ་ངེས་རྒྱུར། སྤྱིར་ད་ལྟའི་དུས་འདིར་མི་བློ་འདྲེས་བསྒྱུར། ནད་མཚོན་མུ་གེའི་བསྐལ་པ་དར། བླ་མ་ཆོས་ཡོད། དཔོན་པོ་ཁྲིམ་ཡོད་དགོན་སྡེ་གྲྭ་ཚང་ཐམས་ཅད་མེད་པར་སོང་། ཁྲམ་པ་རྐུན་མ། མནའ་ཟན་གཡོ་ཅན་ཐམས་ཅད་མགོ་འཕང་མཐོ། སངས་རྒྱས་ཀྱི་བསྟན་པ་ནུབ་ལ་ཐུག །བསྟན་པ་ཉམས་པས་འགྲོ་བའི་བདེ་སྐྱིད་ཐམས་ཅད་ཟད། རྒྱལ་ཁམས་མི་བདེ་ལང་ངེ་སོང་བའི་སྐབས་འདིར་བསམ་པ་བཟང་པོས་ཆོས་བཞིན་སྤྱོད་པ་རེ་གཉིས་ཡོད་ཀྱང་ཕན་པ་ཆུང་། བདག་དཔལ་དགེ་སྤྲུལ་སྐུ་ཡང་རྒྱལ་ཁམས་སྤྱི་ལ་ཕན་པའི་བསམ་པ་བཟང་པོ་ཡོད་ཀྱང་བྱ་ཐབས་བྲལ། སྔ་སོར་རྒྱུ་འབྲས་ཀྱི་ཆོས་བཤད་ཕྲན་བུ་བྱས་པའི་དོན་དགོས་ཇག་ཁྲིམས་བཤས་ཁྲིམས། སྡིག་བཅད་སོགས་གང་བྱས་དེ་སྔ་ཕན་ཚིག་ཐོག་དོན་གནས་བྱུང་བ་བསམ་པ་དགའ། ད་ལོ་མི་བློ་འདྲེས་བསྒྱུར་གྱི་བྱ་བས་རང་གཞན་གཉིས་ཕུང་གི་ལས་ངན་ཚབས་ཆེན་བསགས། ད་དུང་ཡང་དམག་ཆེན་ཡོ་ལང་བྱས་ནས་བླ་མ་ཞེ་རྫོགས་གཙོས་འདི་ཕྱོགས་ཐམས་ཅད་མེད་པ་བྱེད་རྒྱུ་རེད་ཟེར་བའི་སྟོང་སྐད་འུར་སྒྲ་ཆེ་ཡང་། བདེན་ཐབས་ག་ལ་ཡོད། ཚིག་པ་གཡག་ལ་ཟོས། ལོང་ལྕག་རྟ་ལ་བརྒྱབ་པའི་དཔེ་བཞིན་ཉག་རོང་གི་དམག་ལ་སྐྲག་ནས་དོན་མེད་ཀྱི་སྡེ་དགོན་མང་པོ་བརླག་པས། ཉག་སྐེད་ལ་སྤུ་ཙམ་ཡང་མི་ཐུབ་པར་མ་ཟད། སྡེ་འཐོར་ཐམས་ཅད་ཁོ་རང་གིས་བསྡུས་ཏེ་ཕན་པའི་གྲོགས་སུ་སོང་། རྒྱལ་ཁམས་སྤྲང་པོས་གང་། མིག་གིས་མཐོང་མི་དགོས། རྣ་བས་ཐོས་ཀྱང་མཆི་མ་འཆོར་བའི་བྱེད་ངན་དེ་འདྲ། དཔོན་ཁག་སོགས་བསམ་ཡོད་རྣམས་ནས་དྲན་ཐབས་དང་བྱེད་ཐབས་ག་ལ་ཡོད་ཀྱང་། ཁྲམ་པ་སྡེ་བཤིགས་རྣམས་ཀྱི་ཟ་འདོད་རྫུན་ཁྲམ་གྱི་ལས་ཀ་ལ་ནམ་ཕུགས་ཐུབ་པ་ཞིག་མེད་ངེས་ཡིན། ད་དུང་ཀྱང་དེ་འདྲའི་བྱེད་ངན་མུ་མཐུད་དེ་དགོན་སྡེ་གྲྭ་ཚང་གཏོར་བ་དང་སྡེ་གླིང་གི་སྡེ་བ་བརླག་པ་སོགས་ཚབ་ཆེན་བྱས་ན། མགོ་ལོག་གི་ཡུལ་ཁམས་སོགས་ཐམས་ཅད་དུ་འདི་ཕྱི་གཉིས་ཀར་ཕུང་ཞིང་། འཕྲལ་དུ་མཐུ་རྟགས་ཆོ་འཕྲུལ་སོགས་མ་བྱུང་ཀྱང་། ཕུགས་སུ་བསོད་ནམས་ཐམས་ཅད་ཟད། ཁ་རྗེ་དབང་ཐང་ཐམས་ཅད་ཉི་མ་ནུབ་པ་ལྟར་འགྱུར་བར་མ་ཟད། སང་ཕོད་གནང་ཕོད་ཙམ་ད་ལོའི་རྫ་ཆུ་ཁ་ལྟ་བུ་ཞིག་འོང་ངེས་ཡིན་འདུག་པས་དེ་ལུགས་ཤེས་པར་གྱིས་ལ། རབ་རྐུན་རྒྱ་ཇག་ཁྲིམས་བྱས་ནས་རང་སའི་སྟེང་ནས་རང་སྒོ་བསྲུང་རྒྱུ་བྱུང་ན་དང་། དེ་ལྟར་མ་ནུས་ཀྱང་དགོན་པ་ལྷ་སྡེ་མི་བརླག་རྒྱུའི་བཅའ་ཁྲིམས་ཕྱི་མཐའ་ཐུབ་པ་རེ་རང་ཤོག་སོ་སོའི་བླ་སེར་དཔོན་ཁག་རྣམས་ནས་བྱེད་ཐུབ་པ་ཅི་ནས་གལ་ཆེ་བས་ཤེས་པར་གྱིས་ལ་ཁོ་བོ་བསམ་བཟང་གི་ཁ་ལ་ཉན་ན་ཕྱིན་ཆད་ཀྱང་རང་རེ་བླ་སློབ་ཀྱི་འབྲེལ་བ་མི་ཆད་པར་མ་ཟད། ཚེ་འདི་དང་ཕྱི་མ་ཀུན་ཏུ་དགེ་ཞིང་། རྒྱལ་ཁམས་བདེ་སྐྱིད་ལ་སྤྱོད་པའི་སྨོན་ལམ་སྙིང་ཐག་པ་ནས་བྱེད་པས་ངེས་པར་གྱིས། ཞེས་རང་འདོད་མེད་པའི་ཡི་གེ་གླིང་ཚང་ཕོ་བྲང་གི་ཉེ་གམ་ནས་རྫོགས་ཆེན་དཔལ་དགེ་སྤྲུལ་སྐུས་སྤྲིངས་པ་དགེ་ཞིང་བཀྲ་ཤིས་པར་གྱུར་ཅིག །

༈ ཀུན་ནེ་ཕུར་ལི་སོགས་ལ་ཕུལ་འབྲས། ཇི་སྐད་དུ། འཁོར་གྱི་དཀྱིལ་འཁོར་རྣམས་སུ་ཡང་། །བྱང་ཆུབ་སེམས་དཔའ་མང་པོ་དག །རང་གི་ལེགས་པས་ས་སྟེང་དག །བརྒྱན་པར་མཛད་ཅིང་བཞུགས་གྱུར་ཅིག ། །ཞེས་པ་ལྟར། རྩ་བའི་བླ་མ་རིན་པོ་ཆེ་ཞལ་བཞུགས་དུས་རྒྱལ་ཁམས་སྤྱི་དང་ཡུལ་ཕྱོགས་འདི་དག་ཏུ་ཆར་ཆུ་དུས་སུ་བབས། ལོ་ཕྱུག་རྟག་ཏུ་ལེགས། ནད་ཡམས་མུ་གེ་དམགས་འཁྲུགས་སོགས་མེད་པར་ཐམས་ཅད་བདེ་སྐྱིད་ཀྱི་དཔལ་ལ་སྤྱོད་ཅིང་། གནས་པ་ལ། ད་ལྟ་ཆེ་དགུར་རློམ་པ་ཀུན་གྱི་སྙིང་ལ་རྒྱལ་འགོང་གིས་གནས་མལ་བཅས་ཤིང་ཅུང་ཟད་དབང་ཡོད་དུ་གྱུར་པ་རྣམས་ཀྱང་དེ་མ་ཐག་ཏུ་རྒྱལ་འགོང་གིས་དབང་དུ་བྱས་ནས་རྒྱལ་ཁམས་མི་བདེ་བའི་ཐབས་ལ་འབད། དེའི་མཐུས་ད་ནི་དབྱར་ཟླ་བ་གསུམ་ལ་བསིལ་དྲོད་སྙོམས་པ་དང་མེ་ཏོག་བཀྲ་བ་སོགས་ཅུང་ཟད་སྐྱིད་པར་སྣང་བ་སྐྱིད་པ་ཙམ་ཡོད་པ་དེ་ཡང་ཐབས་སྣ་ཚོགས་ཀྱིས་མེད་པར་བྱེད། དེ་ཙ་ན་བདུད་དང་རྒྱལ་འགོང་གིས་གྲོགས་བྱས་པའི་མཐུ་དང་ཚར་གཅོད་སོགས་བྱེད་མཁན་རྣམས་ནུས་པ་ཆེ། ཆོས་བཞིན་དུ་བསྲུང་སྐྱོབ་རིམ་གྲོ་རྒྱལ་ཁམས་བདེ་ཐབས་སོགས་བྱེད་མཁན་རྣམས་ནུས་པ་ཆུང་ཞིང་སྐྱེ་བོས་འཕྱ་སྨོད་གཞིར་གྱུར་པ། འདི་དག་ལ་སོམ་ལ་གར་འགྲོ་རྒྱུ་ཡིན་ན་མྱུར་དུ་སོང་། མིན་ན་དབྱར་ངོ་ཞག་གྲངས་ཆ་ཤས་འདི་དགུན་དཔྱིད་ལྟ་བུ་ཞིག་ཏུ་བསྒྱུར་དུ་མ་འཇུག་པར། འབྱུང་བའི་འཕོ་འགྱུར་དུས་བཞིའི་རྒྱལ་མོ་ལ་བྱེད་དུ་ཆུག །ཁ་དྲོ་ལོ་བརྒྱ། སྐུ་ཚེ་རིང་། རྩ་བའི་བླ་མ་ཡིད་བཞིན་ནོར་བུ་དེའི་ཞབས་དྲུང་ནས་བླ་བཙོང་ཡུལ་འབྲོག་ཀུན་ལ་གནོད་ཚབས་ཆེ་ཞིང་། ཉ་སྦལ་ལྕང་གསུམ་ཡན་ཆད་ཁ་བཏགས་པའི་སྡིག་ལས་ཚབས་པོ་ཆེ་དེ་འདྲ་མ་བྱེད་སྐུ་ཚེ་རིང་། གཞེས་ཉིན་ལོར་ཡང་སེར་མོ་ཁ་ཤས་འགོ་ལོག་ཏུ་འགྲོ་དགོས་ཟེར་ནས་དབྱར་གྱི་ཆར་ཆུ་ཐན་པར་བསྒྱུར། ད་ལོ་ཡང་དེ་ལྟ་མཛད་ན་རྒྱལ་ཁམས་ཀུན་ལ་གནོད་ཚབས་དེ་བས་ཆེ་བ་མི་འདུག་པས་དགོངས་མཛོད། ལར་ཡུལ་གང་ན་དགོན་གནས་ཁང་བ་ཕུབ་པ། རུ་བའི་འགྲོ་སྡོད་སོགས་རང་རང་གི་བྱ་བ་ཕྲན་བུ་ཞིག་གི་དོན་དུ་དབྱར་གྱི་ཆར་ཆུ་ཐན་པར་བསྒྱུར་བ་ལོ་རེ་བཞིན་དེ་ལྟ་མཛད་ན་རྒྱལ་ཁམས་ཀུན་ལ་གནོད་ཚབ་དེ་བས་ཆེ་བ་མི་འདུག་པས་ཀུན་གྱིས་དགོངས་མཛོད།