PJCW-KABUM-05-CA-003

🚧 This website is under continued development. We appreciate your patience!

Previous Text Back to Volume PageLast text in volume.

Wylie title
Location	dpal sprul bka' 'bum Volume 5, Text 3, Pages (Folios to )
Author	དཔལ་སྤྲུལ་རིན་པོ་ཆེ་
Less details More details
Citation
Genre

Tibetan Text

[edit]

༄༅། །མྱོས་བྱེད་ཀྱི་བཏུང་བའི་ཉེས་དམིགས་མདོ་རྒྱུད་བསྟན་བཅོས་རྣམས་ལས་བཏུས་པ་ཉེས་པའི་འཕྲང་སྒྲོལ་ཞེས་བྱ་བ་བཞུགས་སོ། །

བག་ཡོད་བསླབ་པས་རྒྱུད་གྲོལ་ཞིང་། །བག་མེད་ངན་འགྲོའི་གཡང་ལས་སྐྱོབ། ། ཐམས་ཅད་མཁྱེན་ལ་ཕྱག་འཚལ་ནས། །འདི་བྲིས་གཞན་ལ་ཕན་བྱིན་རློབས། །དེའང་ངོར་ཆེན་ཐམས་ཅད་མཁྱེན་པ་རྡོ་རྗེ་འཆང་ཀུན་དགའ་བཟང་པོའི་ཞལ་ནས། དེ་ལ་དམ་པའི་ཆོས་སྒྲུབ་པའི་རྟེན་ཁྱད་པར་ཅན་དལ་འབྱོར་གྱི་ལུས་རྣམ་པར་དག་པ་ཐོབ་པའི་དུས་འདིར། བླ་ན་མེད་པའི་བྱང་ཆུབ་རིན་པོ་ཆེ་བསྒྲུབ་པའི་དོན་དུ། ཡང་དག་པའི་ལྟ་བ་དང་སྤྱོད་པ་རྣམ་པར་དག་པ་ལ་ཚུལ་བཞིན་དུ་གནས་ཏེ། དལ་འབྱོར་རྟེན་ཆོས་དང་མཐུན་པའི་འཚོ་བ་རྣམ་པར་དག་པས་ཡུན་རིང་དུ་འཚོ་བར་བྱ་དགོས་པ་ལ། སྐྱེས་བུ་མི་མཁས་པའི་ངང་ཚུལ་ཅན་རྣམས་ནི་བག་མེད་པའི་ཆང་དང་། སེམས་ཅན་བསད་པའི་ཤ་ཁྲག་གིས་དལ་འབྱོར་འཚོ་བར་བྱེད་ཅིང་། འདི་དག་ཀྱང་དམ་པའི་ཆོས་འདུལ་བ་དང་། རྡོ་རྗེ་ཐེག་པ་ལས་ལོངས་སྤྱོད་པར་གསུངས་སོ་ཞེས་གཏན་ཚིགས་ཀྱང་འགོད་པར་བྱེད་དོ། །འདི་ལྟ་བུ་ནི་ཚུལ་བཞིན་མ་ཡིན་པ་ལ་རང་ཉིད་ཞུགས་ཤིང་། གཞན་དག་ཀྱང་དེ་ལ་སྦྱོར་བ། སྦལ་དོང་ནང་གི་སྦལ་བ་རྨ་ཅན་ལྟ་བུ། རྒྱལ་བ་དགྱེས་པའི་སྤྱོད་པ་ལས་ཉམས་པ། མི་དགེ་བའི་བཤེས་གཉེན་གྱིས་ཡོངས་སུ་བཟུང་བ་རང་ཉིད་ལ་ཕུང་ཁྲོལ་ཆེན་པོ་སྐྱེད་པར་བྱེད་པའི་སྤྱོད་ལམ་དང་གྲུབ་པའི་མཐའ་ངན་པ་ཡིན་པས་འདི་དགག་པར་བྱ་ཞེས་གསུངས་པ་ལྟར། གྲུབ་པ་བརྙེས་པ་མ་གཏོགས་པའི་སྐྱེ་བོ་མཆོག་དམན་ཐམས་ཅད་དྲན་པ་ཉམས་པར་བྱེད་ཅིང་འདི་ཕྱི་ཀུན་ཏུ་མི་དགེ་བའི་ཕུང་ཁྲོལ་ཆེན་པོ་སྐྱེད་པ་བདུད་དང་ལྷ་མིན་གྱི་སྒྱུ་ཐབས་མྱོས་བྱེད་ཆང་གི་བཏུང་བའི་ཉེས་དམིགས་བཤད་པ་ལ་ལྔ། ཆང་གི་ཉེས་པ་སྤྱིར་བསྟན་པ། བྱེ་བྲག་སོ་ཐར་གྱི་སྡོམ་པ། བྱང་སེམས་ཀྱི་བསླབ་པ། གསང་སྔགས་ཀྱི་དམ་ཚིག་རྣམས་དང་འགལ་བའི་ཚུལ་སྨོས་པ། ཆང་སྤངས་པའི་ཕན་ཡོན་བཤད་པའོ། །དང་པོ་ཉེས་པ་སྤྱིར་བསྟན་པ་ལའང་། །ཆང་འཐུང་བ་པོ་ལ་ཉེས་པ་འབྱུང་ཚུལ། །ཆང་བླུད་པ་པོ་ལ་ཉེས་པ་འབྱུང་ཚུལ་གཉིས་ལས། དང་པོ་ནི། དགའ་བ་ཅན་གྱིས་ཞུས་པའི་མདོ་ལས། ཆང་འཐུང་བ་ལ་མངོན་པར་དགའ་བའི་མི། །རང་ལ་ཕན་དང་གཞན་ལ་བདེ་མི་ནུས། །རྨོངས་དང་མདོག་ངན་བྱེད་པ་ཆང་ཡིན་ཏེ། །ཇི་ལྟར་ཧ་ལའི་དུག་བཞིན་དེ་མི་བཏུང་། །ཞེས་ཆང་ནི་དུག་ཧ་ལའི་ཁ་ཟས་དང་མཚུངས་ཏེ་འཐུང་བ་ཙམ་ནས་རང་ལ་ཕན་པའི་བྱ་བ་དང་གཞན་ལ་བདེ་བའི་བསམ་སྦྱོར་གང་ཡང་སྒྲུབ་མི་ནུས་ཤིང་། བློ་རྨོངས་ཤིང་ཁ་དོག་ངན་པར་བྱེད་པ་ཡིན་པས་མིའི་འགྲོ་བར་གཏོགས་པས་གཏན་ནས་འཐུང་དུ་མི་རུང་བར་གསུངས་ལ། བྱེ་བྲག་ཏུ་མདོ་དེ་ཉིད་ལས། བཅོམ་ལྡན་འདས་ཀྱིས་གསུངས་པ། དགའ་བ་ཅན། འབྲུའི་ཆང་དང་། བཅོས་པའི་ཆང་བག་མེད་པའི་གནས་ཀྱི་ཉེས་དམིགས་སུམ་ཅུ་རྩ་ལྔ་ནི་འདི་དག་ཡིན་པར་རིགས་པར་བྱ་སྟེ། སུམ་ཅུ་རྩ་ལྔ་པོ་དེ་དག་གང་ཞེ་ན། ཚེ་འདི་ལ་ནོར་ཟད་པ་དང་། ནད་རྣམས་རྒྱས་པར་བྱེད་པ་དང་། འཐབ་པ་དང་། རྩོད་པ་རྙེད་པ་དང་། དོན་མེད་པ་ལ་བལྟ་བ་དང་། གྲགས་པ་མ་ཡིན་པ་ཀུན་ཏུ་འབྱུང་བར་བྱེད་པ་དང་། ཤེས་རབ་ཉམས་ཆུང་བར་བྱེད་པ་དང་། ལོངས་སྤྱོད་མ་ཐོབ་པ་མི་ཐོབ་པར་འགྱུར་བ་དང་། ལོངས་སྤྱོད་ཐོབ་པ་ཡོངས་སུ་ཟད་ཅིང་ཡོངས་སུ་གཏུག་པར་འགྱུར་བ་དང་། གསང་མི་ཐུབ་པར་འགྱུར་བ་དང་། དེའི་ལས་ཀྱི་མཐའ་ཡོངས་སུ་འགྲིབ་པ་དང་། མཐུ་སྟོབས་ཆུང་ངུར་བྱེད་པར་འགྱུར་བ་དང་། མར་མི་འཛིན་པར་འགྱུར་བ་དང་། ཕར་མི་འཛིན་པར་འགྱུར་བ་དང་། དགེ་སྦྱོང་དུ་མི་འཛིན་པར་འགྱུར་བ་དང་། བྲམ་ཟེར་མི་འཛིན་པར་འགྱུར་བ་དང་། རིགས་ཀྱི་གཙོ་བོ་ལ་བསྙེན་བཀུར་མི་བྱེད་པར་འགྱུར་བ་དང་། སངས་རྒྱས་ལ་མ་གུས་པར་འགྱུར་བ་དང་། ཆོས་ལ་མ་གུས་པར་འགྱུར་བ་དང་། དགེ་འདུན་ལ་མ་གུས་པར་འགྱུར་བ་དང་། བསླབ་པ་ཡང་དག་པར་བླངས་པ་ལ་མ་གུས་པར་འགྱུར་བ་དང་། ཚུལ་ཁྲིམས་འཆལ་བར་འགྱུར་བ་དང་། དབང་པོའི་སྒོ་མ་བསྡམ་པར་འགྱུར་བ་དང་། བག་མེད་པས་བུད་མེད་དོན་དུ་གཉེར་བར་འགྱུར་བ་དང་། ཉེ་དུ་དང་སྣག་གི་གཉེན་ཚན་དང་མཛའ་བཤེས་དང་བློན་པོ་དག་གིས་སྤོང་བར་འགྱུར་བ་དང་། སྐྱེ་བོ་མང་པོ་དག་གི་ཡིད་དུ་མི་འོང་བར་འགྱུར་བ་དང་། སྐྱེ་བོ་མང་པོ་དག་དང་མི་མཐུན་པར་འགྱུར་བ་དང་། ཆོས་མ་ཡིན་པ་སྤྱོད་པར་འགྱུར་བ་དང་། ཆོས་མ་ཡིན་པ་ཡོངས་སུ་འཛིན་པར་འགྱུར་བ་དང་། དམ་པའི་ཆོས་ཡོངས་སུ་སྤོང་པར་འགྱུར་བ་དང་། ངོ་ཚ་ཤེས་པ་དང་ཁྲེལ་ཡོད་པ་སྤོང་བར་འགྱུར་བ་དང་། དེ་མི་མཛའ་བ་དག་དང་གནས་ཀྱང་མཁས་པ་རྣམས་ལ་ཡོངས་སུ་འདྲི་བར་མི་སེམས་པ་དང་། བག་མེད་པ་རྟག་ཏུ་སྤྱོད་པར་འགྱུར་བ་དང་། དམ་པའི་གསུང་རབ་ལ་ཀུན་ནས་མི་གནས་པ་དང་། མྱ་ངན་ལས་འདས་པ་ལ་ཐག་རིང་དུ་འགྱུར་བ་དང་། སྨྱོན་པར་འགྱུར་བའི་ལས་བྱས་ཤིང་བསགས་པས་ལུས་ཞིག་ནས་ངན་སོང་ངན་འགྲོ་ལོག་པར་ལྟུང་བ་སེམས་ཅན་དམྱལ་བ་དག་ཏུ་སྐྱེ་ཞིང་གལ་ཏེ་དེ་ནས་ཤི་འཕོས་ཏེ་འདིར་མི་རྣམས་དང་སྐལ་བ་མཉམ་པར་སྐྱེས་ནས་ཡང་དེ་གང་དང་གང་དུ་སྐྱེས་པ་དེ་དང་དེར་སྨྱོན་པར་འགྱུར་ཞིང་དྲན་པ་མི་གསལ་བར་འགྱུར་ཏེ། དགའ་བ་ཅན་འབྲུའི་ཆང་དང་། བཅོས་པའི་ཆང་བག་མེད་པའི་གནས་ཀྱི་ཉེས་དམིགས་ནི་སུམ་ཅུ་རྩ་ལྔ་པོ་འདི་དག་ཡིན་པར་རིག་པར་བྱའོ། །ཞེས་གསུངས་སོ། །འདི་དང་དོན་གཅིག་པ་མདོ་སྡེ་ལས་རྣམ་འབྱེད་དང་། ལས་རྣམ་པར་འགྱུར་བ་རྣམས་ལས་ཀྱང་གསུངས་ཏེ། དེ་དག་གི་དོན་གོ་བདེར་བཀྲོལ་ན། ཆང་འཐུང་བའི་མི་དེ་ཕྱུག་པོ་ཞིག་ཡིན་ཡང་དཀར་པོ་དགེ་བའི་ཕྱོགས་དང་རང་ལ་ཤིན་ཏུ་གལ་ཆེ་བ་ཕ་མ་ཉེ་དུ་ལྟ་བུའི་ཕྱོགས་སུའང་ཅུང་ཟད་ཙམ་ཡང་མི་འགྲོ་བར་རྒྱུ་ནོར་ཐམས་ཅད་ཆང་རག་གི་དོན་དུ་བཏང་། ནམ་ཡང་ངོམས་པ་དང་ཚིམས་པ་མེད་པས་མཐར་ནོར་རྫས་ཟད་ཅིང་མེད་པར་འགྱུར་བ་དང་། ནད་མེད་པ་ལ་མཁྲིས་ཁམས་དང་། མིག་ནད་དང་། ཁྲག་གྲིབ་དང་། ཆུ་གཞི་དང་། མཆིན་པ་ཟད་པ་སོགས་ནད་གཞི་གསར་དུ་སྐྱེད། ནད་ཡོད་པ་རྣམས་ལ་སྨན་དཔྱད་ཇི་ཙམ་བྱས་ཀྱང་བཅོས་སུ་མེད་པར་འཆི་བ་ལ་གཏུགས། ཆང་གིས་མྱོས་པ་རྟ་གྲི། གཡང་གྲི། ཨག་གྲི་སོགས་ཀྱིས་ཤི་ཉེས་སྣ་ཚོགས་སུ་འགྱུར་བས་མི་རབས་མང་པོར་དེ་ཤི་བའི་ས་རེད་ཅེས་དོགས་འཛེམ་བྱེད་དགོས་པ་དང་། ཤི་ནས་ཀྱང་ཁོང་པ་སྐྱུར་དྲིས་གང་། དོན་སྣོད་རུལ་ནས་ཐ་ན་རོ་ཁུར་ཡན་ཆད་ཀྱིས་བཙོག་ལྟས་བྱེད་ཅིང་ཞེ་ཁྲེལ་འཇོག་པ་དང་། མི་གཞི་བཟང་པོ་ཞིག་ཡིན་ཡང་ཆང་གིས་མྱོས་ནས་གཤིས་འགྱུར་ཏེ་འགའ་ཞིག་ཁ་ལ་བབས་ནས་གསང་གཏམ་དགྲ་ལ་འཆད་ངོ་ཚ་མ་སྲིང་ལ་ལབ། དོན་མེད་ཀྱི་ངག་འཁྱལ་རི་བོ་ཙམ་གསོག །འགའ་ཞིག་སྙིང་ལ་ཕོག་ནས་རྒྱུ་རྐྱེན་མེད་པར་ཚིག་པ་ཟོས། སྨྱོ་འབོག་དུ་ལབ་ཀྱིས་ཡུལ་མི་སྐྲོག །ཕ་མ་སྙིང་གྲོགས་ལ་གྲི་མཚོན་རྡེག་པ་ལའང་ཐེ་ཚོམ་མེད། འགའ་ཞིག་རྐང་ལག་ལ་ཕོག་ནས་མི་གཙང་བའི་རྐྱག་འདམ་ཡང་འབོག་ནས་རྒྱུག ། སྤྱད་པ་ནམ་ཆེན་ཡོད་ཀྱང་གཅག་དཀྲུག་བྱེད། དེ་དག་གི་རྐྱེན་གྱིས་སྔོན་སེམས་འཁོན་མེད་པའི་མཛའ་བོ་ཞིག་ཡིན་ཡང་གློ་བུར་དུ་འཐབ་འཛིང་བྱེད། སེམས་འཁོན་ཅན་ལ་འཁོན་གཞི་བསླངས་ནས་ཆེ་ན་གསོད་རེས་བྱེད། ཆུང་ན་གྱོད་ཆེན་བསླང་། མི་སྡེ་དོན་མེད་ལའང་འཐབ་རྩོད་དང་གྱོད་གཞི་བཞག་ནས་ཆང་གིས་བཟི་ཐེངས་གཅིག་གིས་མི་ཚེ་གཅིག་ལ་མི་བདེ་བའི་གཞི་བཞག་པ་མང་། མི་དགེ་བའི་བཤེས་འདྲིས་བསྟེན་ཞིང་དོན་མེད་པའི་བྱ་སྤྱོད་ལ་འཇུག ། བན་དེ་ཆང་འཐུང་བ་ལ་ལྷ་དང་བཅས་པའི་འཇིག་རྟེན་ཀུན་གྱིས་ཁྲེལ་ཞིང་ལྷ་རྣམས་ཀྱིས་སྡོང་གྲོགས་དང་སྲུང་སྐྱོབ་མི་བྱེད་པས་བྱིན་བརླབས་དང་ནུས་པ་མེད། མི་རྣམས་ཀྱི་བརྩི་བཀུར་ཆུང་བས་བསོད་སྙོམས་རྙེད་བཀུར་མི་འབྱུང་། སྐྱེ་བོ་ཆང་འཐུང་རྣམས་ཀྱང་ཡ་རབས་ཀྱི་གྲལ་ནས་བུད་པས་བློ་གཏོད་པའི་མི་ཉུང་། མདོར་ན་ཆང་འཐུང་བ་ལེགས་སོ་ཞེས་པའི་བསྟོད་བསྔགས་བྱེད་མཁན་གཅིག་ཀྱང་མི་སྲིད། ཆོས་འཇིག་རྟེན་གཉིས་ག་ནས་སྨད་ར་བརྗོད་མཁན་ཁོ་ན་མང་བས་མི་སྙན་པ་དུས་རྟག་ཏུ་འབྱུང་། བློ་ཤེས་རབ་ཀྱང་ཉམས་ཏེ་ཆང་གིས་མྱོས་པས་སེམས་འཁྲུལ་ནས་རང་ཉིད་སྐྱོན་མེད་པར་བསམས་ཀྱང་གཞན་གྱིས་བལྟས་ན་དྲན་ཚད་དོན་མེད་དྲན། ཁའི་ཚིག་ལྡབ་ལྡིབ་ཏུ་སོང་། རིག་པའི་གནས་ལྔ་ལ་མཁས་པ་ཞིག་ཡིན་ཡང་འཆད་རྩོད་རྩོམ་གསུམ་མི་ཕེར། སྐྱེ་བོ་ཤེས་རྒྱ་ཅན་ཞིག་ཡིན་ཡང་དགྲ་འདུལ་གཉེན་སྐྱོང་ཚོང་ཁེ་སོ་ནམ་གྱི་བྱ་བཞག་ལ་བློ་ནོར་ཞིང་གྲོས་འཆུག །བཟི་དངས་ཙ་ན་ཅི་བྱས་ཅི་སྨྲས་ཐམས་ཅད་བརྗེད་ནས་མི་དྲན། རྒྱུ་རྫས་ལོངས་སྤྱོད་སྔར་མེད་གསར་དུ་སྙེད་པའི་བློ་དང་དབང་ཐང་ཟད། སྔར་ཡོད་རྣམས་ཀྱང་མྱུར་དུ་ཟད་ནས་ཕལ་ཆེར་མུ་གེས་འཆི་དགོས་པའང་འབྱུང་བ་དང་། ཁའི་མཆུ་སྒོར་བཏོན་མི་རུང་བའི་གསང་བྱ་ཞིག་ཡིན་ཡང་ཕྱི་ནང་མེད་པ་ལ་ཁོག་པ་ཕྱི་ནང་བསྒྱུར་ནས་བསྟན་པ་ལྟར་བསྒྲག །དམ་ལྡན་ཡིན་ན་དམ་ཚིག་ཉམས། ཕལ་བ་ཡིན་ན་མཚང་རྒྱུས་ཐམས་ཅད་དགྲ་བོས་ཀྱང་ལོན། ཐ་ན་ལུས་ཀྱི་ངོ་ཚའི་གནས་ཀྱང་སྦེད་མི་ཤེས་པར་སྟོན་པ་དང་། སྔོན་བརྫུན་མི་སྨྲ་བ་ཞིག་ཡིན་ཡང་ཆང་གིས་མྱོས་ནས་བརྫུན་མང་པོ་དབང་མེད་དུ་ཤོར་བས་མཚོན་དགེ་བ་སྤྱོད་པའི་ལས་མཐའ་མི་དགེ་བར་འགྱུར་བ་སོགས། སྐྱེ་བོ་རང་རང་གི་ལས་སྤྱོད་བྱེད་འཕྲོ་ཐེན་གྱིས་ལུས་པའམ། བསམ་སྦྱོར་གཞན་དུ་འགྱུར་བས་སྔ་མའི་བྱ་བ་མི་འགྲུབ་ཅིང་ཕྱི་མའི་བྱ་བཞག་ཀྱང་མཐར་མི་ཕྱིན་པ་དང་། གཟི་བརྗིད་སྟོབས་ཤུགས་ཆེན་པོ་ཅན་ཡིན་ཡང་མདངས་དང་གཟི་བརྗིད་ཉམས་ནས་སྤྲང་རོ་ལམ་མདོ་ན་བསྐྱུར་བ་བཞིན་དུ་སོང་། རྐང་པས་ལུས་དང་ལག་པས་ཕོར་བ་མི་ཐེག་པར་བྱིས་པ་ཉམས་ཆུང་བཞིན་དུ་སོང་ནས་དགྲ་བོ་ཡོད་ཀྱང་གླགས་རྙེད། མི་མ་ཡིན་གྱིས་མདངས་འཕྲོག ། ཁྱེའུ་བུ་མོས་བཞད་གད་ཀྱི་རྟེན་དུ་བྱེད་པ་དང་། ཕ་དང་མ་དང་མཆོད་གནས་ཞིང་དམ་པ་རྣམས་ལའང་ལོག་ལྟ་དང་བརྙས་བཅོས་ཁོང་ནས་སྐྱེས་ཏེ་དེ་དག་གི་ཐུགས་སེམས་དཀྲུགས། ཚེ་རབས་མང་པོའི་དགེ་རྩ་སྐད་ཅིག་གིས་བརླག་པར་བྱེད་པ་དང་། རྒྱལ་པོ་བློན་པོ་སོགས་རིགས་ཀྱི་གཙོ་བོར་བརྩི་བཀུར་མ་བྱས་ན་ཉེས་ཆད་འབྱུང་བས་ལྟ་ཉེས་ཙམ་ཡང་མི་ཕོད་པ་ཞིག་ཡིན་ཡང་སྐྲག་ངོ་དང་འཇིགས་ངོ་མི་ཤེས་པར་ཁྱད་དུ་གསོད་པས་རྒྱུ་ནོར་སྟོང་ཞིང་ལུས་སྲོག་ལ་ཐུག་པའི་ཆད་ལས་ཕོག་པ་དང་། རབ་བྱུང་ཡིན་ན་ཆང་འཐུང་བ་ཙམ་གྱིས་སངས་རྒྱས་ཀྱི་བཅས་པ་ལས་འདས། དམ་པའི་ཆོས་ལ་ཁྱད་དུ་གསོད། དགེ་འདུན་འཕགས་པའི་རྗེས་སུ་མ་ཞུགས། བསླབ་སྡོམ་རྩིས་མེད་དུ་དོར་ནས་དཀོན་མཆོག་གསུམ་བསླབ་པ་དང་བཅས་པ་ལ་མ་གུས་པར་གྱུར་ཅིང་། ལྟུང་བ་ཐམས་ཅད་ཀྱི་རྩ་བ་ཡིན་པས་ཚུལ་ཁྲིམས་འཆལ་ཏེ་སྡིག་པའི་ཕུང་པོ་ཚད་མེད་པར་གསོག་པ་དང་། བལྟ་བར་མི་འོས་པ་ལ་ལྟ་ཞིང་སྨྲ་བར་མི་འོས་པའི་གྱ་ཚོམ་སྣ་ཚོགས་སུ་སྨྲ་བ་སོགས་དབང་པོའི་སྒོ་བསྡམས་མི་ཤེས་པས་ཤེས་པ་རྣལ་དུ་གནས་པ་ཐམས་ཅད་ཆང་བཟིའི་རྩ་བར་འགྲོ་བའམ་གཏམ་འདྲི་བ་ཙམ་ཡང་བྱེད་དུ་མི་འདོད་པ་དང་། སྔར་བག་ཡོད་པ་ཞིག་ཀྱང་བག་མེད་པར་གྱུར་ཏེ་ཁྲེལ་འཛེམ་མེད་པར་དངོས་དང་བརྒྱུད་ནས་བུད་མེད་སོགས་འཁྲིག་པའི་ཡུལ་དོན་དུ་གཉེར་ཞིང་རབ་བྱུང་ཡིན་ན་སྡོམ་པ་ཤོར། ཁྱིམ་པ་ཡིན་ན་ངོ་ཚ་ཤོར་བ་དང་། དུས་རྒྱུན་དུ་སྐྱོན་ཅན་གྱི་མི་དེ་ལ་ཡ་རབ་མཁས་པ་རྣམས་ལྟ་ཅི་སྨོས། རང་གི་ཉེ་དུ་མཛའ་བཤེས་རྣམས་ཀྱིས་ཀྱང་དོན་ཅིའང་མི་ལོ་བའི་སྐྱོན་ཅན་དུ་མཐོང་ནས་ཐབས་ཀྱིས་སྤངས་ཏེ་མཐར་རང་ཁོ་ནའམ་རང་དང་འདྲ་བའི་གྲོགས་ངན་པ་དང་ལྷན་ཅིག་ཏུ་ཚོགས་ནས་མི་ཚེར་སྡུག་ལ་སྦྱོར་དགོས་པ་དང་། ཆང་སྐྱོན་ཅན་དེ་མཆོག་དམན་སུའི་སྔོན་དུ་ཕྱིན་ཡང་ཡིད་དུ་མི་འོང་ཞིང་སྐྱོན་བརྗོད་ཟད་པ་མེད་པ་དང་མཐར་སུ་དང་ཡང་མི་མཐུན་པས་མི་གྲལ་ནས་བུད་པ་དང་། སེམས་འཁྲུལ་བའི་དབང་དུ་སོང་ནས་རྣལ་དུ་མི་གནས་པས་རབ་བྱུང་ཡིན་ན་རྩ་བཞི་ཉམས། ཁྱིམ་པ་ཡིན་ཡང་འཐབ་རྩོད་གསོད་གཅོད་རྐུན་རྫུན་སོགས་ཕུང་ཁྲོལ་མང་པོའི་རྒྱུ་བྱེད་པས་ཆོས་མ་ཡིན་པའི་མི་དགེའི་ལས་ལམ་སྣ་ཚོགས་བྱེད་པ་ལ་དབང་མེད་དུ་སྤྱོད། ཆང་ལ་ཉེས་པའི་རྣམ་གྲངས་འདི་ཙམ་གསུངས་ཀྱང་ཅུང་ཟད་མི་གོ་བར་མ་ཟད་སངས་རྒྱས་དང་དེའི་བསྟན་ལ་ལོག་པར་བལྟས་ཏེ། སྐྱོན་ཡོན་ཏན་དུ་བཟུང་། ལྟས་ངན་ངོ་སོར་བརླམས་ནས་དེ་འཐུང་བ་ལ་ཡོན་ཏན་དུ་ལྟ་བ་སོགས་དམ་པའི་ཆོས་སྤངས་ནས་ཆོས་མ་ཡིན་པ་ལ་ཆོས་སུ་འཛིན་པ་དང་། རང་ལ་ལྟོས་པའི་ངོ་ཚ་དང་གཞན་ལ་ལྟོས་པའི་ཁྲེལ་འཛེམ་ཐམས་ཅད་ཤོར་ནས་ལྷ་ཆོས་པས་སྡོམ་པ་དམ་ཚིག་ཉམས་ཀྱང་འགྱོད་སེམས་མེད་པའི་ཁར་ཧམ་པ་དང་ང་རྒྱལ་ཆེ། མི་ཆོས་པས་གཞུང་ཕྱི་ཐག་མནའ་ཚིག་ཚུན་ལ་རྩི་འཇོག་མེད་ཅིང་དེ་རིང་གི་དགྲ་བོ་སང་ཉིན་གྱི་མཛའ་བོ་དང་། དེ་རིང་མཛའ་བོའི་དྭངས་མ་སང་ཉིན་ནས་འཁོན་གཞིའི་དགྲ་གཅིག་མར་འགྱུར་བར་བྱས་ནས་འདི་ཕྱི་རྒྱུ་འབྲས་གང་ཡང་རྩི་མི་ཤེས་པའི་ཁྲེལ་མེད་ཟེར་བ་སྐྱུགས་བྲོ་ལྟ་བའི་གནས་དེར་འགྱུར། རང་གསོད་པའི་དགྲ་བོ་དང་ལྷན་ཅིག་གནས་ཀྱང་དེ་ལ་ཡིད་གཏོད་ཅིང་རང་ལ་ཕན་འདོགས་པའི་མཁས་པ་བློ་གྲོས་ཅན་རྣམས་ལ་གྲོས་འདྲི་བའི་བསམ་པ་མི་འཆར་པར་མ་ཟད། དེ་དག་གིས་བསླབ་པའི་ཚིག་ལ་མི་ཉན་པས་མཐར་རང་ཉིད་འདི་ཕྱི་གཉིས་ཀར་ཕུང་ལ་སྦྱོར་བ་དང་། སྨྱོན་པ་བཞིན་དུ་ལུས་གཅེར་བུར་བུད་ཀྱང་ངོ་མི་ཚ་ཞིང་ངག་ཅལ་ཅོལ་ལ་ཟད་པ་མེད་ཀྱང་ཉན་འདོད་པ་གཅིག་ཀྱང་མེད་པ་དང་། སེམས་ཀྱིས་བླང་དོར་མི་ཤེས་པས་སྤྱོད་པ་ཅི་ཐོད་དུ་བྱེད། ད་ལྟ་འཆི་བའི་གཡང་ས་དང་མེ་ཆུ་གཅན་གཟན་སོགས་ལའང་འཛེམ་བག་མི་ཤེས། ཁ་ནས་སྐྱུགས་པ་དང་རྐུབ་ནས་གཅིན་སྟུག་ལུད་བཞིན་མི་མང་འགྲོ་བའི་ལམ་མདོར་གན་རྐྱལ་དུ་ཉལ་ཡང་རོ་ལྟར་བསམ་དྲན་མེད། དེ་རིང་བྱ་རྒྱུ་སང་ཉིན་དང་དེའང་གནངས་གཞེས་སོགས་རིམ་གྱིས་ལུས། ཐོས་བསམ་སྒོམ་པས་མཚོན་ཆོས་འཇིག་རྟེན་གྱི་བྱ་བཞག་ཐམས་ཅད་ཤོལ་ནས་སྒོ་གསུམ་བག་མེད་པ་ཁོ་ནའི་དབང་དུ་ཤོར་བ་དང་། སངས་རྒྱས་ཀྱི་གསུང་རབ་མདོ་རྒྱུད་དྲི་མ་མེད་པ་གང་དང་ཡང་མི་མཐུན་པས་རང་ཉིད་ཐར་པའི་ལམ་ལས་ཕྱིར་ཕྱོགས་པ་མ་ཟད་འབྲེལ་ཚད་རྣམས་ཀྱང་འདི་ཕྱིར་ཕུང་ལ་སྦྱོར་བ་དང་། ཤི་མ་ཐག་ངན་འགྲོའི་སྐྱེ་གནས་སུ་ལྷུང་སྟེ་སྡུག་བསྔལ་ཚད་མེད་གྲངས་མེད་པ་མྱོང་ཞིང་ནམ་ཞིག་མིར་སྐྱེས་ནའང་སྨྱོན་པ་དང་དྲན་པ་ཉམས་པ་ཁོ་ནར་སྐྱེ་བར་འགྱུར་བ་ཡིན་ལ། སྐྱེས་རབས་ལས་ཀྱང་ཆང་འཐུང་བ་ལ་ཚེ་འདིར་ཉེས་པ་བཅུ་གཅིག་འབྱུང་བར་གསུངས་ཏེ། ལུས་ཉམས་པས་གོམ་པ་གྱ་ཚོམ་དུ་འདོར་ཞིང་མ་འདྲིས་པའི་སར་ཡང་འཁྱམས་ཤིང་རྡེག་འཆོས་པ་དང་། དྲན་པ་ཉམས་པས་བཟའ་རུང་མི་རུང་ལ་དཔྱད་པ་མེད་པར་བཟའ་བ་དང་གཅིག །རང་གི་སེམས་ལ་དབང་མེད་ཅིང་བློ་གྲོས་ཉམས་པས་དུད་འགྲོ་ལྟར་བླུན་ཞིང་དགྲ་བོས་ཀྱང་འཕྱ་བས་དགེ་ལེགས་ཐམས་ཅད་ཉམས་ཀྱང་དོགས་པ་མེད་པར་ལུས་ཀྱི་རྣམ་འགྱུར་ཅི་ཐོད་བྱེད་ཅིང་ངག་ནས་ཅི་ཐོད་སྨྲ་བ་དང་གཉིས། ངོ་ཚ་ཐམས་ཅད་དོར་ནས་གཅེར་བུར་གྲོང་དུ་རྒྱུ་ཡང་དོགས་པ་མེད་ཅིང་ཁྲེལ་ཡོད་ལས་ཉམས་ཏེ་ཁྲེལ་མེད་ཁོ་ནར་སྤྱོད་པ་དང་གསུམ། ཁྱི་དང་མཚུངས་པར་སྐྱུག་པས་གོས་ཤིང་རྒྱ་ལམ་དུ་ཉལ་ནས་ཁྱི་ཡིས་ཁར་བལྡགས་ཀྱང་དོགས་འཛེམ་མི་ཤེས་པ་དང་བཞི། ཕ་མ་ལའང་ཚིག་རྩུབ་དང་རྡེག་བརྡུང་བྱེད་ཅིང་རང་ལ་ཆང་སོགས་ཟང་ཟིང་སྦྱིན་པའི་བདག་པོ་ལའང་ཁྲོ་བས་འགྲས་པར་བྱེད་པ་དང་ལྔ། ཤིན་ཏུ་མཛའ་བའི་མི་ལའང་འཐབ་མོ་བྱས་ཏེ་དམེ་དང་དེའི་རྐྱེན་གྱིས་བསད་བཅད་མང་པོ་འབྱུང་བ་དང་དྲུག །རིགས་མཐོན་པོ་ཡིན་ཡང་མ་རབས་ཀྱི་སྤྱོད་པ་བྱེད་པས་རིགས་ཉམས་པ་དང་། ནོར་དང་ལོངས་སྤྱོད་ཐམས་ཅད་ཟད་ཅིང་ཉམས་པར་འགྱུར་བ་དང་བརྒྱད། གློ་བུར་དུ་དགོད་ཅིང་གློ་བུར་དུ་ངུ་བ་དང་གཏམ་མ་ངེས་པ་སྨྱོན་པ་བཞིན་སྨྲ་བ་དང་བཞིན་འགྱུར་ཞིང་། མིག་མཆི་མས་གང་ལ་གཏམ་ངན་གྱི་གཞིར་གྱུར་ཞིང་སྨད་ཅིང་བརྙས་པའི་གནས་སུ་འགྱུར་བ་དང་བརྒྱད། རང་ཉིད་ཕན་པའི་ལམ་དུ་མི་འཇུག་ཅིང་མ་བརྟགས་པར་མང་དུ་སྨྲ་བའི་ངག་འཁྱལ་འབྱུང་ཞིང་ན་ཚོད་རྒན་པོ་བྱ་བ་ཐམས་ཅད་ལ་གོམས་པའི་དབང་གིས་ལེགས་ཉེས་ཀྱི་བྱ་བ་ཐམས་ཅད་ཤེས་པ་ཞིག་ཀྱང་ཆང་གིས་མྱོས་ན་རང་གཞན་ཕུང་བའི་བྱ་བ་ལ་སྦྱོར་བ་དང་དགུ། སྔོན་ལྷ་འགའ་ཞིག་གིས་རི་རབ་ཀྱི་རྩེ་མོར་ཆང་འཐུང་བའི་རྒྱུས་འཐབ་རྩོད་བྱས་པས་སྤྱོད་པ་ངན་པ་རྣམས་ལྷ་རྣམས་ཀྱིས་བསྐྲད་པ་སའི་འོག་ཏུ་གབ་པ་ལ་ལྷ་མིན་ཞེས་གྲགས་པ་ལྟར་ཆང་འཐུང་ན་ལྷའི་དཔལ་ཡང་ཉམས་པ་དང་བཅུ། མི་བདེན་པ་ཡང་བདེན་པ་ལྟར་སྨྲ་ཞིང་བྱ་བ་མ་ཡིན་པའང་དགའ་བཞིན་སྤྱོད་པ་སོགས་བསམ་སྦྱོར་ཕྱིན་ཅི་ལོག་ཏུ་སྤྱོད་པས་སྨྱོན་པ་དང་མཚུངས་པ་དང་བཅུ་གཅིག་གོ །མདོར་ན་སེམས་མྱོས་པར་བྱེད་པ་དྲང་སྲོང་གི་རིག་སྔགས་ལྟ་བུ། སྡིག་པ་ཐམས་ཅད་ཀྱི་འབྱུང་ཁུངས། སྡུག་བསྔལ་གྱི་གཞི་དང་རྩ་བ། གཏམ་ངན་དང་མི་འདོད་པ་ཀུན་གྱི་གཞི་བྱུར་ངན་མངོན་སུམ་དུ་འོང་བ་ལྟ་བུ། འཐབ་རྩོད་ཀྱི་ལམ་དང་སྙིང་གི་མུན་པ་མི་བཟད་པ་ཡིན་པར་གསུངས་སོ། །རབ་བྱུང་རྣམས་ལ་ཉེས་པ་ལྗི་ཡང་སྐྱེ་བོ་ཕལ་བ་ལ་ཕྱི་མར་ཉེས་པ་ཆུང་ངམ་སྙམ་ན་ཆང་འཐུང་པ་རང་བཞིན་གྱིས་ཁ་ན་མ་ཐོ་བར་བཤད་པས་འདི་ཕྱི་གཉིས་ཀར་ཉེས་པ་འདྲ་བ་ཡིན་ནོ། །གསོ་རིག་བཤད་རྒྱུད་ལས་ཀྱང་ཆང་གིས་མྱོས་པའི་ཉེས་པ་འདི་ལྟར་གསུངས་ཏེ། ཐལ་དྲགས་སེམས་བསྒྱུར་བག་མེད་ངོ་ཚ་འཇིག ། ར་རོ་དང་པོ་བག་མེད་གནས་ལ་གནས། །རྣམ་རྟོག་ངན་བཅོམ་བདེ་བ་ཡིན་སྙམ་སེམས། །ར་རོ་གཉིས་པ་གླང་ཆེན་སྨྱོན་པ་ལྟར། །ཁ་ན་མ་ཐོ་ཚུལ་ཁྲིམས་འཆལ་བའི་གནས། །ར་རོ་ཐ་མ་སེམས་མེད་རོ་ལྟར་ཉལ། །གང་ཡང་མི་ཤེས་མུན་པའི་གནས་སུ་འགྱུར། །ཞེས་དང་པོ་བག་མེད་དགའ་བའི་གནས་སྐབས། བར་དུ་སྨྱོན་པ་ཚུལ་འཆལ་གྱི་གནས་སྐབས། ཐ་མ་སེམས་མེད་རོའི་གནས་སྐབས་གསུམ་སྐྱེད་པ་སོགས་བཤད་དོ། །ཕྱི་མར་ངན་འགྲོའི་སྡུག་བསྔལ་ཇི་ལྟར་འབྱུང་པའི་ཚུལ་ཡང་། དགེ་སྡིག་རྣམ་པར་འབྱེད་པའི་མདོ་ལས། ཚེ་འདི་ལ་ཆང་འཐུང་ཞིང་མྱོས་པར་བྱེད་པ་ནི་ཟངས་ཁུ་འཐུང་བའི་དམྱལ་བར་སྐྱེའོ། །ཞེས་དང་། མདོ་དྲན་པ་ཉེར་བཞག་ལས། ཆང་དང་སྦྱར་བའི་ཆང་ཀུན་ཏུ་བསྟེན་ཞིང་བསྒོམས་ཏེ་མང་དུ་བྱས་པ་ནི་སེམས་ཅན་དམྱལ་བ་ངུ་འབོད་དུ་སྐྱེ་བར་འགྱུར་རོ། །ཞེས་དང་། ཚུལ་ཁྲིམས་ལྔའི་ཕན་ཡོན་བསྟན་པའི་མདོ་ལས། ཆང་འཐུང་པ་ནི་ཚ་བའི་དམྱལ་བར་ལྟུང་ཞིང་སྐྱེ་བར་འགྱུར་རོ། །དེར་ལྷུང་བའི་སེམས་ཅན་ནི་ལོ་སྟོང་ཕྲག་མང་པོར་འཚེད་པར་འགྱུར་རོ། །དེ་ནས་ཕྱིར་ཕྱུང་ནས་ཆུ་བོ་རབ་མེད་ཀྱི་ངོགས་སུ་སྐྱལ་བར་བྱེད་དོ། །གང་དུ་ཡང་འགྲོ་ས་མེད་པར་ཡང་དང་ཡང་དུ་སྐྱལ་བར་བྱེད་དོ། །དེར་དམྱལ་བའི་སྲུང་མ་རྣམས་ཀྱིས་མཆིལ་པས་ཉ་འདོན་པ་ལྟར། །ལྕགས་བསྲེགས་ཀྱི་ས་གཞི་ལ་རྡེབ་པར་བྱེད་དོ། །འདི་ལྟར་སྒྲོགས་ཏེ། ཀྱེ་སྐྱེས་བུ་ཁྱོད་ཅི་འདོད། ཇོ་བོ་སྐོམ་མོ། །དམྱལ་བའི་སྲུང་མ་དེས་ལྕགས་འབར་བའི་ལྕགས་ཀྱུས་ཁ་ཕྱེ་སྟེ་ལྕགས་བཞུ་བའི་ཁུ་བ་བླུད་པར་བྱེད་དོ། །དེ་ལ་དེ་ཡི་མཆུ་སྲེག་གོ །མགྲིན་པ་ཡང་སྲེག་གོ །བྲང་སྲེག་གོ ། རྒྱུ་མ་སྲེག་གོ །སྙིང་ཡང་སྲེག་གོ །བཤང་ལམ་ན་མར་འཐོན་པར་བྱེད་དོ། །དེ་རྣམས་ཀྱིས་སྡུག་བསྔལ་མྱོང་བར་བྱེད་ཅིང་། ངུ་ལ་འགྲེ་བར་བྱེད་དོ། །དེའི་དུས་སུ་ཡང་འཆི་བར་ནི་མི་འགྱུར་ཏེ། ཇི་སྲིད་ཀྱི་བར་དུ་སྡིག་པའི་ལས་ཀྱི་འབྲས་བུ་མྱོང་བར་བྱེད་དོ། །དེ་སྲིད་དུ་དེ་རྣམས་ཀྱིས་རྣམ་པར་སྨིན་པའི་ཚོར་བ་མྱོང་བར་བྱེད་དོ། །དེའི་ཕྱིར་བཅོམ་ལྡན་འདས་ཀྱིས་བཀའ་སྩལ་པ། ཚ་ཞིང་རྩུབ་པའི་ཆུ་བོ་ནི། །རབ་མེད་ཤིན་ཏུ་བགྲོད་པར་དཀའ། །ལྕགས་ཀྱི་པདྨའི་འདབ་མ་རྣམས། །འདབ་མ་རྣོ་བའི་སྟེང་དུ་འགྲེ། །ཆུ་བོ་རབ་མེད་གཞི་མེད་པར། ། ཆོས་མིན་ཇི་ལྟར་སྤྱོད་པར་འགྱུར། །གང་ཞིག་ཆང་འཐུང་བ་དེ་ནི་སྡིག་པ་ཆུང་བ་མ་ཡིན་ནོ། ། དེ་མིར་གྱུར་ཡང་རྟག་ཏུ་བརྗེད་ངེས་པ་དང་། ལུག་ལྟར་ལྐུགས་པ་དང་། ཤེས་རབ་འཆལ་བ་དང་། རིག་པ་མི་ཤེས་པ་དང་། རྟག་ཏུ་གཉིད་དུ་འགྲོ་བ་དང་། བློ་གྲོས་དམན་པ་དང་། གཏི་མུག་ཆེ་བ་དང་། འཇིགས་པ་དང་། སྐྲག་པར་འགྱུར་བ་དང་། དོགས་པར་འགྱུར་བ་དང་། ཕྲ་མ་ཅན་དང་། ཚིག་མི་བརྟན་པ་དང་། སེར་སྣ་ཅན་དང་། ཕྲག་དོག་ཅན་དང་། ངེས་པར་མི་འབྱུང་བ་དང་། ངོ་ཚ་མེད་པ་དང་། ཁྲེལ་མེད་པ་དང་། ཤེས་རབ་ཆུང་བ་དང་། དགེ་བའི་ཆོས་རྣམས་མི་རིག་པ་སྟེ། སྐྱེ་བ་ལྔ་བརྒྱར་གནོད་སྦྱིན་སྐྱེ། སྐྱེ་བ་ལྔ་བརྒྱར་ཁྱི་དང་ནི། མཐའ་ཡས་སྨྱོན་པར་སྐྱེ་བར་འགྱུར། ཆང་འཐུང་པ་ཡི་ཉེས་པའོ། །མྱོས་པར་འགྱུར་བའི་ཆང་གི་བཏུང་བའི་རྣམ་པར་སྨིན་པའོ། །ཞེས་གསུངས། །སྐྱེས་རབས་ལས་ཀྱང་། གང་ཞིག་བསྟེན་ན་ངན་པར་སྤྱོད་པར་འགྱུར། །རབ་ཏུ་འཇིགས་པའི་སེམས་ཅན་དམྱལ་བར་ལྟུང་། །དུད་འགྲོའི་གནས་དང་ཡི་དྭགས་དབུལ་འགྱུར་བ། །མཐོང་བར་འདོད་པའམ་དེ་ནི་སུ་ཞིག་ཡོད། །ཆང་དེ་ཉུང་ངུ་འཐུངས་ཀྱང་རྣམ་པར་སྨིན་པ་ནི། །མི་ཡི་གནས་སུ་སྐྱེས་ཀྱང་ཚུལ་ཁྲིམས་ལྟ་བ་ཉམས། ། གང་གིས་ཕྱིས་ཀྱང་མནར་མེད་འབར་བས་བསྲེགས་པར་འགྲོ། །ཡི་དྭགས་ཡུལ་དང་དུད་འགྲོ་དམན་པར་གནས་པར་འགྱུར། །ཚུལ་ཁྲིམས་ཉམས་པར་འགྱུར་ཞིང་གཏམ་ངན་མངོན་དུ་འབྱུང་། །ངོ་ཚ་མེད་ཅིང་བློ་གྲོས་དྲི་མ་ཅན་དུ་འགྱུར། །ཞེས་སོ། །གཉིས་པ་ཆང་སྦྱོར་བ་དང་བླུད་པ་པོ་ལ་ཉེས་པ་འབྱུང་བའི་ཚུལ་ནི། མདོ་དྲན་པ་ཉེར་བཞག་ལས་རྒྱ་ཆེར་གསུངས་པའི་དོན་བསྡུས་ཏེ་བཤད་ན། དགེ་འདུན་དག་གི་འཁོར་དུ་ཆང་བྲིམས་པས་ན། ཤི་ནས་དམྱལ་བར་སྡུག་བསྔལ་གྱི་ཚོར་བ་མྱོང་བའི་འདི་ལྟ་སྟེ། ཁ་ནང་དུ་ཟངས་ཞུན་ཁོལ་མ་བླུགས་པས་མཆུ་རྐན་ལྕེ་སོགས་ནས་ཕོ་བ་དང་ལོང་ཀའི་བར་བསྲེགས་ནས་རོ་སྨད་དུ་འབྱུང་བར་འགྱུར་ལ། དེ་ལྟར་ཆང་འཐུང་བ་དེ་འོ་དོད་འབོད་དེ་སྨྲེ་སྔགས་འདོན་པ་ལ་གཤིན་རྗེའི་མི་དེ་དག་གིས་ཚིགས་སུ་བཅད་དེ་སྨྲས་པ། སྡིག་པ་དག་ནི་བྱེད་པ་ནི། །འབྲས་བུ་ཚ་བ་ཤེས་པར་གྱིས། ། རྨོངས་པ་གང་ཞིག་བདག་མི་ཤེས། །ཕྱི་ནས་དེ་ཡིས་ཡོངས་གདུང་འགྱུར། །ཞེས་སོགས་རྗེས་སུ་བསྟན་པ་ཚིགས་སུ་བཅད་པ་མང་པོས་ཡང་ཡང་བཤད་ཅིང་བསྒོ་ལ་གནོད་པ་རྣམ་པ་སྣ་ཚོགས་བྱེད་པ་འདི་ལྟ་སྟེ། མདོ་དེ་ཉིད་ལས། རི་རབ་ཏུ་འབར་ལ་ཀུན་ཏུ་འབར་ཞིང་མཁྲེགས་པ་གཉིས་ཤུགས་ཀྱི་རྒྱུག་སྟེ། ཕན་ཚུན་འདུས་པ་དེ་གཉིས་ཀྱི་བར་དུ་སེམས་ཅན་དམྱལ་བ་པ་དེ་དག་འཇུག་སྟེ། འདི་ལྟ་སྟེ། རི་དེ་གཉིས་ཀྱིས་འཐག་པ་ནི་ཇི་ལྟར་མཐོང་བ་མེད་པ་དེ་ལྟར་ཤིན་ཏུ་འཐག་གོ །ཡང་འབྱུང་བར་འགྱུར་ཏེ། བྱུང་ནས་ཀྱང་ཡང་རི་དེ་གཉིས་ཀྱི་དབུས་སུ་བཅུག་ནས་འཐག་གོ །དེའི་སྡིག་པའི་ལས་ཟད་པར་མ་གྱུར་གྱི་བར་དུ་ལོ་འབུམ་ཕྲག་དུ་མའི་བར་དུ་བྱུང་ཞིང་འཐག་གོ །སེམས་ཅན་དམྱལ་བའི་ཕྱོགས་དེ་ནས་ཐར་ནས་སྐྱབས་འདོད་པ་མགོན་འདོད་པ་དཔུང་གཉེན་འདོད་པ་དག་གཞན་དུ་རྒྱུག་པ་དང་། དེ་དག་གཤིན་རྗེའི་མི་གཞན་རྣམས་དང་ཕྲད་ནས་ལྕགས་ཀྱི་རྫ་མའི་ནང་དུ་ཁ་བུབ་ཏུ་བཅུག་གོ །ཇི་སྲིད་དུ་དེའི་སྡིག་པའི་ལས་བཅོམ་ཞིང་སྤངས་ལ་ཟད་པར་མ་གྱུར་པ་དེ་སྲིད་དུ་དེ་དག་དེར་ལོ་འབུམ་སྙེད་དུ་སྲེག་པར་འགྱུར་རོ། །དེ་ལས་ཐར་ནས་བྲོས་པས་ལྕགས་ཀྱི་ཁ་རབ་ཏུ་འབར་བ་དག་གིས་བཟུང་ནས་ཡན་ལག་དང་གནད་དང་ཚིགས་སུ་བརྒྱའམ་སྟོང་དུ་ཟའོ། །དེ་ལས་ཐར་ནས་བྲོས་པས་བཀྲེས་སྐོམ་གྱིས་གདུངས་པ་དེ་དག་གིས་མཚོའི་ཆུ་རབ་ཏུ་དྭངས་པ་ཞིག་རྒྱང་རིང་པོ་ནས་མཐོང་སྟེ་དེར་བརྒྱུགས་པ་དང་། དེ་དག་ཀྱང་རོ་ཉེ་རབ་ཏུ་བསྐོལ་བས་གང་བ་ཡིན་ཏེ། དེར་ཁྲུས་བྱ་བའི་ཕྱིར་ཞུགས་པ་དང་། དེར་ལས་ཀྱིས་བྱས་པའི་ཆུ་སྲིན་རྣམས་ཀྱིས་བཟུང་ནས་ཁ་བུབ་ཏུ་དྲངས་ཏེ་སྡིག་པའི་ལས་མ་ཟད་ཀྱི་བར་དུ་རོ་ཉེ་དེའི་ནང་དུ་བསྐོལ་ལ། དེ་ལས་ཐར་ནས་བྲོས་པས་གཤིན་རྗེའི་མི་རྣམས་ཀྱིས་བཟུང་སྟེ་མདུང་རྩེ་རབ་ཏུ་འབར་བ་དག་གིས་འབིག་པར་བྱེད་དོ། །དེ་དག་ལ་མདུང་རྩེ་དེ་དག་རེས་འགའ་རྒྱབ་ཏུ་ཕྱུང་ནས་འབྱུང་། རེས་འགའ་གློར་ཕུག་ནས་འབྱུང་། རེས་འགའ་མགྲིན་པར་ཕུག་ནས་འབྱུང་སྟེ། སེམས་ཅན་དམྱལ་བ་པ་ཚོར་བས་ཉེན་པ་དེ་དག་གི་སྒྲ་དེ་སེམས་ཅན་དམྱལ་བ་པ་གཞན་དག་གིས་ཕྱོགས་དེ་ནས་གླུ་དབྱངས་ཀྱི་སྒྲར་ཐོས་སོ། །དེའང་ངུ་བའི་སྒྲ་ཡིན་ཡང་ལས་ཀྱི་དབང་གིས་སྙན་པར་ཐོས་ཏེ་དེ་དག་གནས་དེར་འགྲོའོ། །དེ་དག་ཀྱང་ལས་མ་ཟད་ཀྱི་བར་དུ་གཤིན་རྗེའི་མི་རྣམས་ཀྱིས་བཟུང་ནས་མདའ་བོ་ཆེ་དང་མདུང་རབ་ཏུ་འབར་བ་དག་གིས་འབིགས་པར་བྱེད་དོ། །དེ་ལས་ཐར་ནས་གར་བབ་བབ་ཏུ་བྲོས་པས། གྲོང་དང་ཁྱིམ་དང་ཆུ་བོ་དང་ལྟེང་ཀ་ཕུན་སུམ་ཚོགས་པ་མཐོང་སྟེ། དེ་ཕྱོགས་སུ་རྒྱུག་ཅིང་གྲོང་དེར་ཞུགས་པ་དང་ཁྱིམ་དེའི་སྒོ་གཅོད་པར་འགྱུར་རོ། །གྲོང་དེ་ཐམས་ཅད་ཀྱང་རབ་ཏུ་བསྐོར་ཞིང་འབར་བ་ཡིན་ལ། ནང་ནའང་སྲོག་ཆགས་མར་ཀོ་ཏ་ཀ་ཁ་དང་མཆེ་བ་རྣོ་ལ་རབ་ཏུ་འབར་བ་རྣམས་ཀྱིས་ལོ་འབུམ་ཕྲག་དུ་མར་ཟ་བར་བྱེད་དོ། །དེ་ལས་ཐར་ནས་གལ་ཏེ་ཡི་དྭགས་དང་དུད་འགྲོ་དག་ཏུ་མ་སྐྱེས་ལ། མིར་སྐྱེས་ན་ཆང་བཏུང་བ་བླུད་པ་གང་ཡིན་པ་དེའི་རྒྱུ་མཐུན་གྱིས། དེ་སེམས་འཁྲུལ་པར་འགྱུར་ཞིང་དབུལ་བ་དང་། ལམ་པོ་ཆེ་དང་བཞི་མདོའི་ཚོང་པ་དང་། བྱིས་པ་ཐམས་ཅད་ཀྱིས་བཞད་གད་པར་འགྱུར་ཞིང་བཞིན་གྱི་མདོག་ངན་པ་དང་། སོ་འབའ་ཞིག་སྣང་བ་དང་། རྐང་པ་ཤིན་ཏུ་རྡོལ་བ་དང་། རྟག་ཏུ་བཀྲེས་སྐོམ་གྱིས་གདུང་བ་དང་། བཤེས་གཉེན་རྣམས་ཀྱིས་བཏང་བར་འགྱུར་རོ། །གཞན་ཡང་ཆང་འཐུང་བ་ཀུན་ཏུ་བསྟེན་ཞིང་བསྒོམས་ཏེ་མང་དུ་བྱས་པ་དང་ཆང་སྦྱར་ཞིང་བླུད་པ་པོ་རྣམས་ནི་ངུ་འབོད་ཀྱི་འཁོར་བཅུ་དྲུག་ཏུ་སྐྱེ་བར་གསུངས་ཏེ་གང་གིས་གསོ་སྦྱོང་བ་རྣམས་ལ་ཆང་བླུད་ན་དེས་ནི་དམྱལ་བ་ངུ་འབོད་ཀྱི་འཁོར་དང་པོ་སྒྲ་ཆེན་པོར་སྐྱེ་བར་འགྱུར་ཏེ། དེར་ནི་རོ་ཉེ་རབ་ཏུ་བཞུགས་པ་ཁར་བླུགས་སོ། །དེ་བླུགས་པ་ན་སྙིང་རྗེ་བའི་སྒྲ་ནམ་མཁའ་གང་བར་སྒྲོགས་སོ། །དེ་ལྟར་ཆང་བཏུང་བས་སེམས་རྣམ་པར་འཁྲུགས་ཏེ་བྱ་བ་དང་བྱ་བ་མ་ཡིན་པ་མི་ཤེས་པས་མི་དགེ་བའི་ཚོགས་ཐམས་ཅད་སློང་བར་འགྱུར་རོ། །དམྱལ་གནས་དེ་ལས་ཐར་ནས་མིར་སྐྱེས་ན། རྒྱུ་མཐུན་གྱི་འབྲས་བུས་དེ་ཡིད་མི་གཞུང་པར་འགྱུར་ཞིང་དེ་དུས་ཐུང་ངུས་ཀྱང་བརྗེད་པར་འགྱུར་ཞིང་ཡིད་མི་གཞུང་བས་དབུལ་ཞིང་སྐྱེ་བོ་ཀུན་དགའ་བར་མི་འགྱུར། ནད་ཆུང་ངུས་ཀྱང་འཆི་བར་འགྱུར་རོ། །སྡོམ་པ་བླངས་མ་ཐག་ལ་ཆང་བླུད་ན་དམྱལ་བ་ངུ་འབོད་ཀྱི་འཁོར་གསུམ་པ་སྐྲ་མེ་འབར་དུ་སྐྱེ་བར་འགྱུར་ཏེ། དེར་མེའི་ཆར་གྱིས་དེའི་སྐྲ་ནས་རྐང་པའི་བར་དུ་སྲེག་ཅིང་། དེའི་རྐང་པར་ཁྱི་དང་། དབུས་སུ་ཝ། ཀླད་པར་བྱ་རྒོད་མཆུ་རབ་ཏུ་འབར་བ་དག་གིས་ཟ་ཞིང་ངུ་བཞིན་དུ་གཤིན་རྗེའི་མི་རྣམས་ལ་འདི་སྐད་དུ། །བདག་ཅག་སྙིང་རྗེའི་གནས་སུ་གྱུར། །ཁྱོད་ལ་སྙིང་རྗེ་མེད་དམ་ཅི། །ཁྱོད་ལ་ཞི་བ་མེད་དམ་ཅི། །བདག་ལ་ཁྱེད་ཅག་སྙིང་མི་རྗེ། །སྨྲས་པ་དང་། དེ་དག་ན་རེ། ཇི་ལྟར་ཁྱེད་ཅག་གཏི་མུག་གིས། །བསྒྲིབས་པའི་སྡིག་ལས་མང་པོ་བྱས། ། མི་བཟད་པ་ཡིས་ཁྱེད་ཅག་བདས། །དེ་ནི་ངེད་ཀྱིས་རྒྱུ་མ་ཡིན། །ཞེས་དང་། ཆང་ནི་དུག་གི་མཆོག་ཡིན་ཏེ། །ཆང་འཐུངས་པ་ལ་བསྟེན་མི་བྱ། །ཆང་འཐུངས་པ་ལ་བསྟེན་པ་ནི། །དགེ་བའི་ཆོས་རྣམས་ཉམས་པར་འགྱུར། །གང་གིས་རྟག་ཏུ་ཆང་བསྟེན་པ། །དེ་ཡི་བློ་ནི་མི་བརྟན་ཞིང་། །བློ་ཡོ་བ་ལ་ཆོས་མེད་དེ། །དེ་ལྟ་བས་ན་ཆང་སྤོངས་ཤིག །ཉམས་བྱེད་ནང་ན་ཉམས་མཆོག་ནི། །ཆང་ཞེས་མཁས་པ་རྣམས་ཀྱིས་བཤད། མི་ལས་ཉམས་པས་ཉམས་བྱེད་པ། །དེ་ལྟ་བས་ན་ཆང་མི་བསྟེན། །ཆང་འཐུངས་པ་ལ་བསྟེན་བྱེད་པ། །མི་སྡུག་སྡིག་པའི་ཆོས་ཡིན་ཏེ། །དེ་ལྟ་བས་ན་དུག་ལྟ་བུའི། །ཆང་འཐུང་བ་ནི་རྣམ་པར་སྤོངས། །ཆང་འཐུང་བ་ལ་གནས་པའི་སྐྱོན། །ནོར་ཟད་ངན་པར་རྗོད་བྱེད་ཅིང་། །ལེ་ལོ་ཤིན་ཏུ་སྐྱེད་བྱེད་པས། །དེ་ལྟ་བས་ན་དེ་སྤོངས་ཤིག །ཆང་གིས་འདོད་ཆགས་སྐྱེད་བྱེད་ཅིང་། །དེ་བཞིན་ཁྲོ་དང་གཏི་མུག་དག ། ཡང་དང་ཡང་དུ་སྐྱེད་བྱེད་པས། །དེ་ལྟ་བས་ན་ཆང་སྤོངས་ཤིག །ཅེས་སྨྲའོ། །དེ་ལས་ཐར་ཏེ་གལ་ཏེ་མིར་སྐྱེས་ན་ཆུ་མེད་པའི་ཡུལ་དུ་སྐྱེ་ཞིང་གཟུགས་དང་རོ་མངོན་པར་ཤེས་པར་མི་འགྱུར་རོ། །ཆང་འཚོང་པ་ནི་ཆུ་མང་བར་བྱེད་ལ་རིན་ཐང་གཞན་ཡིན་ན་གཞན་དུ་འཚོང་བར་བྱེད་པ་ནི་དམྱལ་བ་ངུ་འབོད་ཀྱི་འཁོར་བཞི་པ་མེའི་ཕྱེ་མ་སྲིན་བུར་སྐྱེ་བར་འགྱུར་ཏེ། དེར་ནི་སེམས་ཅན་དམྱལ་བ་པ་རང་གི་ལུས་དེ་དག་ལ་སྲིན་བུ་དག་འབྱུང་བར་འགྱུར་ཏེ། ཤ་ལྤགས་རུས་རྐང་རྣམས་ལ་ཕུག་ཅིང་ཕུག་ཅིང་འཐུང་ངོ་། །གཞན་ཡང་ལུས་ལ་ནད་བཞི་བརྒྱ་རྩ་བཞིས་གདུང་བ་དང་དམྱལ་མེས་སྲེག་ཅིང་བཙོ་བའོ། །དེ་ལས་ཐར་ཏེ་གལ་ཏེ་མིར་སྐྱེས་ན་སྡུག་བསྔལ་བ་དང་དབུལ་བར་འགྱུར་རོ། །རི་དྭགས་སོགས་ཆང་གིས་བྲིད་དེ་བསད་ན་དམྱལ་བ་ངུ་འབོད་ཀྱི་འཁོར་ལྔ་བ་ལྕགས་ཀྱི་མེ་འབར་བའི་གཏུན་ཤིང་དུ་སྐྱེ་བར་འགྱུར་ཏེ། དེར་ནི་ལྕགས་ཀྱི་གཏུན་ཤིང་འབར་བས་ཕྱེ་མར་རློག་ཅིང་སྨྲེ་སྔགས་འདོན་པ་དེ་དག་གཤིན་རྗེའི་མི་རྣམས་ཀྱི་སྤུ་གྲིས་ཡན་ལག་སོགས་གཤེགས་ཤིང་འདྲལ་ལོ། །དེ་ལས་ཐར་ཏེ་མིར་སྐྱེས་ན་དབུལ་ཞིང་སྨན་པ་སོགས་དང་བྲལ་བའི་ཡུལ་དང་། མྱ་ངན་དང་། མེས་ཚིག་པས་འཇིགས་པ་མང་བའི་ཡུལ་ངན་དག་ཏུ་སྐྱེ་བར་འགྱུར་རོ། །གཡུལ་གྱི་ཆེད་དུ་གླང་པོ་ཆེར་ཆང་བླུད་ན་དམྱལ་བ་ངུ་འབོད་ཀྱི་འཁོར་དྲུག་པ་རྡོ་མེ་འབར་བ་ཆར་ལྟར་འབབ་པར་སྐྱེ་བར་འགྱུར་ཏེ། དེར་ནི་མེ་འབར་བའི་གླང་ཆེན་གྱིས་ཡན་ལག་སོགས་ཕུག་ཅིང་ཕྱེ་མར་རློག་པར་བྱེད་ཅིང་། དེ་ལས་ཐར་ཡང་གཤིན་རྗེའི་མི་རྣམས་ཀྱིས་ཟངས་དམར་བསྐོལ་བའི་ནང་དུ་བཅུག་སྟེ་བསྲེག་ཅིང་འཚེད་དོ། །དེ་ལས་ཐར་ཏེ་མིར་སྐྱེས་ན་གླང་པོ་ཆེས་གསོད་པ་དང་། དབུལ་ཞིང་བྱད་བཞིན་ངན་ལ་རྐང་ལག་བོང་བུ་ལྟར་འགྱུར་ཞིང་ལུས་རྩུབ་པར་འགྱུར་རོ། ། བུད་མེད་ལ་ཆང་བླུད་ནས་དེ་ལ་མི་གཙང་བ་སྤྱད་ན་དམྱལ་བ་ངུ་འབོད་ཀྱི་འཁོར་བདུན་པ་འཆི་མེད་དུ་སྐྱེ་བར་འགྱུར་ཏེ། དེར་ནི་ཁྱི་མེ་རབ་ཏུ་འབར་བས་དེའི་རླིག་པ་ཡང་ཡང་འབྱིན་ཞིང་ཡང་ཡང་ཕྱེ་སྟེ་ངུ་བཞིན་བྲོས་པའི་མདུན་ན་བྱ་ལྕགས་ཀྱི་མཆུ་དང་སེན་མོ་འབར་བ་རྣམས་ཀྱིས་གང་བའི་ངམ་གྲོག་ཏུ་ལྟུང་བ་དང་དེ་དག་གིས་ཡན་ལག་སོགས་སོ་སོར་ཕྱེ་སྟེ་ཟའོ། །དེ་ལས་ཐར་ཏེ་མིར་སྐྱེས་ན་རྒྱལ་པོས་བཟུང་ཞིང་ལུས་དང་བཞིན་མདོག་ངན་ཞིང་དེར་འཆི་བར་འགྱུར་རོ། །དུག་དང་སྦྱར་བའི་ཆང་བླུད་ན་དམྱལ་བ་ངུ་འབོད་ཀྱི་འཁོར་བརྒྱད་པ་ལྕགས་ཚལ་དགོན་པར་སྐྱེས་པར་འགྱུར་རོ། །དེར་ནི་དམྱལ་བ་པ་དེ་ལྕགས་ཀྱི་ཐག་པས་བཅིངས་ནས་ལྕགས་ཀྱི་འཁོར་ལོ་སྐོར་བར་བྱེད་དོ། །གཤིན་རྗེའི་མི་རྣམས་ཀྱིས་མཚོན་ཆས་བཏབ་སྟེ་ཤ་མ་ལུས་པར་བྱས་ཀྱང་འཆི་བར་མི་འགྱུར་རོ། །དེ་ལས་ཐར་ཏེ་བྲོས་པས་ལྕགས་ཀྱི་སྤྲུལ་རྣམས་ཀྱིས་བཟུང་ནས་ལོ་འབུམ་ཕྲག་དུ་མར་ཟ་བར་བྱེད་དོ། །དེ་ལས་ཐར་ཏེ་མིར་སྐྱེས་ནས་སྦྲུལ་རྣམས་ཀྱིས་གསོད་པར་འགྱུར་རོ། །སེམས་ཅན་སོ་སོ་འཚོ་བར་བྱ་བའི་ཕྱིར་ཆང་འཐུང་བའི་ཟོང་ངམ་རིན་བྱིན་ན་དེ་ཤི་ནས་དམྱལ་བ་ངུ་འབོད་ཀྱི་འཁོར་དགུ་པ་རབ་རིབ་ཀུན་བསགས་སུ་སྐྱེ་བར་འགྱུར་ཏེ། དམྱལ་གནས་དེར་མུན་གནག་ལས་བྱུང་བའི་མེ་འོད་ཀྱང་མི་གསལ་བའི་ནང་དུ་སྲེག་ཅིང་ངུ་སྐད་འབྱིན་པ་ན་གཤིན་རྗེས་མི་མཐོང་བར་མགོ་ནས་རྐང་བའི་བར་ཕྱེད་མར་གཤོག་གོ །དེ་ལས་ཐར་ཏེ་གལ་ཏེ་མིར་སྐྱེས་ན་རྟག་ཏུ་བཀྲེས་སྐོམ་གྱིས་གདུངས་ཤིང་ནོར་རྫས་དང་འབྲལ་བར་འགྱུར་ལ་བཟའ་བཏུང་ཉུང་པའི་གླིང་དུ་སྐྱེ་བར་འགྱུར་རོ། །སྦྱིན་པ་པོ་གང་གིས་ནད་མི་བཟད་པས་ཐེབས་པ་དང་། བུ་བཙས་པ་དག་ལ་ཆང་འཐུང་བའི་ཟོང་དང་རིན་གྱི་དོན་དུ་གོས་དང་ཟས་ཀྱི་རྒྱུ་བྱིན་ན་དམྱལ་བ་ངུ་འབོད་ཀྱི་འཁོར་བཅུ་པ་གཤིན་རྗེ་མཚམས་ཀྱི་དགོན་པར་སྐྱེ་བར་འགྱུར་རོ། །དེར་ནི་རྐང་པ་དང་སེན་མོ་ལ་སོགས་པ་གཤིན་རྗེའི་མི་ཁ་རབ་ཏུ་འབར་བ་དག་གིས་ཟ་བར་བྱེད། མདུང་ཐུང་གི་རྩེ་མོར་རབ་ཏུ་འབར་བས་ལོ་འབུམ་ཕྲག་སྲེག་ཅིང་གཤོག་གོ །དེ་ལས་ཐར་ཏེ་གལ་ཏེ་མིར་སྐྱེས་ན། ཡུལ་དང་གནས་དང་རི་བྲག་ངན་པ་དག་ཏུ་ཕག་འཚོ་བ་དང་ལོང་བར་འགྱུར་རོ། །ཆང་གིས་མྱོས་པར་བྱས་ཏེ་བསད་ན་དམྱལ་བ་ངུ་འབོད་ཀྱི་འཁོར་བཅུ་གཅིག་པ་ཤིང་ཤཱལྨ་ལིའི་ཚལ་དུ་སྐྱེ་བར་འགྱུར་ཏེ། དེར་ནི་མེ་འབར་བའི་རྡོ་ཆར་གྱིས་སྲེག་ཅིང་གཅོད་དོ། །ཟངས་དང་རོ་ཉེ་བསྐོལ་བའི་ཆུར་ལོ་འབུམ་ཕྲག་དུ་མར་སྲེག་ཅིང་གཤིན་རྗེའི་མི་རྣམས་ཀྱིས་རལ་གྲི་སོགས་ཀྱིས་འདེབས་པར་བྱེད་དོ། །དེ་ལས་ཐར་ཏེ་མིར་སྐྱེས་ཀྱང་མིག་གི་མདོག་ནག་ཅིང་རྟག་ཏུ་ཁྲོ་ལ་ཕྲག་དོག་ཆེ་བར་འགྱུར་རོ། །ཆང་གི་དབང་དུ་བྱས་ནས་སིང་པོ་ལྟར་བཅོས་ཏེ། དགོན་པའི་སྐྱེ་བོ་ལ་བླུད་ན་དམྱལ་བ་ངུ་འབོད་ཀྱི་འཁོར་བཅུ་གཉིས་པ་ཤིང་ཤཱལྨ་ལི་ཆེན་པོར་སྐྱེ་བར་གསུངས་ཏེ། དེར་ནི་ཤིང་ཤཱལྨ་ལི་འདབ་མ་སྤུ་གྲི་ཡལ་ག་མེ་འབར་བ་ལྟ་བུ། དུད་པ་བདུག་ཅིང་རླུང་དུག་ལྟ་བུས་གནོད་པར་བྱེད་པའི་ཚལ་དུ་དམྱལ་བ་པ་དག་གཤིན་རྗེའི་མི་རྣམས་ཀྱིས་འཇིགས་པར་བྱས་པ་ཆུད་པ་ན་ཤིང་རྣམས་ལས་སྤུ་གྲི་ལྟ་བུའི་ཆར་འབབ་སྟེ། གང་ལག་ན་རལ་གྲི་སོགས་མཚོན་ཆ་མང་པོ་ཐོགས་པ་དག་གིས་ཡན་ལག་སོགས་གཤེག་ཅིང་དུམ་བུར་བྱེད་དོ། །གཤིན་རྗེའི་མིས་སྐྲག་པ་དག་ནགས་ཁྲོད་དེར་ཁ་ཅིག་གྲིབ་མའི་ནང་ན་ཞུམ་ཞུམ་པོར་འཁོད་ལ་དེ་དག་གི་མིག་ཀྱང་འབྱིན་ལ་ཁུ་བའང་ཐུང་ངོ་། །ཁ་ཅིག་ཤིང་ཁར་འཛེག་པ་ཡལ་ག་ལྷུང་བས་དུམ་བུ་བརྒྱའམ་སྟོང་དུ་ཕྱེ་མར་རློག །གང་དག་ཚལ་དེའི་རྩེ་མོ་ལ་འཛེག་པ་དེ་དག་བ་ཚྭའི་ཆུ་བོ་བཞུས་པར་འཇུག་སྟེ་ལོ་འབུམ་ཕྲག་དུ་མར་ལུས་ཉིད་ཀྱིས་གནོད་པ་མྱོང་བར་འགྱུར་ཏེ། འདི་ནི་དེའི་ཕྱོགས་འགའ་ཞིག་བསྟན་པ་ཡིན་གྱི། སྡུག་བསྔལ་ཐམས་ཅད་ནི་བསྟན་པ་མ་ཡིན་ནོ། །དེ་ལས་ཐར་ཏེ་མིར་སྐྱེས་ན་དེ་ཡིད་རྣམ་པར་གཡེངས་ཤིང་། ནད་དྲག་པོའམ། ཡང་ན་སྙིང་ནད་དམ། ཡང་ན་ངལ་སྐྱེན་པར་འགྱུར་བའམ། ཡང་ན་རྐང་འབམ་གྱིས་འདེབས་པར་འགྱུར་ཞིང་། ཡང་ན་མིག་ལོང་བས་ཉམ་ཐག་པར་འགྱུར་རོ། །བུད་མེད་ཡོན་ཏན་ཅན་ལ་ཆང་བླུད་ན་དམྱལ་བ་ངུ་འབོད་ཀྱི་འཁོར་བཅུ་གསུམ་པ་ཆུ་ཤིང་བསྲེགས་པའི་དུད་པའི་ཚལ་དུ་སྐྱེ་བར་འགྱུར་ཏེ། དེར་ནི་ཀུན་ནས་དཔག་ཚད་ལྔ་ཡོད་པ་དེའི་ནང་དུད་པས་འཁྲིགས་ཞིང་རྒྱ་མཚོའི་ཀློང་གི་མེའི་མུན་ནག་གིས་གཏིབས་པ། ཟབས་སུ་ཀུན་ནས་རྒྱང་གྲགས་གསུམ་དུ་ས་བརྐོས་པ་དེར་མེ་མདག་ཁྲོལ་བུ་རབ་ཏུ་འབར་བས་ཤིན་ཏུ་གང་བའི་སའི་བུ་ག་དེར་སེམས་ཅན་དམྱལ་བ་པ་དེ་དག་ཉིན་གཅིག་བཞིན་དུ་འཇུག་སྟེ་ངུ་སྐད་འབྱིན་པར་ཡང་མི་ནུས་ཤིང་དེ་བཞིན་དུ་དབང་པོའི་སྒོ་ཐམས་ཅད་ཀྱང་མེས་གང་བར་འགྱུར་རོ། །དེ་ལས་ཐར་ནས་ཆུ་ཤིང་གི་དུད་པ་དེས་དེ་ལྟར་ཡང་དང་ཡང་དུ་དབང་པོའི་སྒོ་ཐམས་ཅད་གང་བར་འགྱུར་ལ། འདི་ལྟར་མེ་དེ་ལ་བདེ་བར་སེམས་ཏེ། དུ་བ་དེའི་མཐུ་ནི་དེ་ལྟར་ཤིན་ཏུ་རྣོ་བ་ཉིད་ཡིན་ནོ། །དེ་ལས་ཐར་ནས་བྱ་དུ་བའི་མདོག་གི་ཕྲེང་བ་ཞེས་བྱ་བས་རུས་པ་ཕུག་ནས་རྐང་དག་ལ་ཟ་བར་བྱེད་དོ། །དེ་ལས་ཐར་ནས་མིར་སྐྱེས་ན། གློ་དང་མཇུག་ཏོ་དག་ལ་གདོན་གྱི་ནད་ཀྱིས་ཐེབས་ཤིང་དབུལ་ཞིང་ཚེ་ཐུང་བར་འགྱུར་རོ། །དགྲ་སོགས་གསོད་པའི་ཕྱིར་ཆང་བླུད་ན་དེ་ཤི་ནས་དམྱལ་བ་ངུ་འབོད་ཀྱི་འཁོར་བཅུ་བཞི་པ་མེད་མདག་དུད་པའི་ཚལ་དུ་སྐྱེ་བར་འགྱུར་རོ། །དེར་མེ་མདག་སྤུ་གྲི་ལྟ་བུའི་རླུང་གིས་སེམས་ཅན་དམྱལ་བ་པ་དེ་དག་གི་ཕན་ཚུན་གྱི་ཤུགས་ཀྱིས་ཐུག་ཅིང་ཤིན་ཏུ་ཐུག་གོ །དེ་དག་གི་ལུས་ཕན་ཚུན་ཐུག་པ་ན་ཇི་ལྟར་བྱེ་མ་ཆང་པ་ནས་གཏོར་བ་བཞིན་དུ་དེ་ལྟར་ལུས་དེ་དག་ཕྱེ་མར་རློག་གོ །ཡང་སྐྱེ་བར་འགྱུར་ཏེ། སྤུ་གྲིས་གཤོག་ཅིང་། མེ་དང་། ནད་དང་། མཚོན་ཆ་དང་། བ་ཚྭའི་ཚོར་བ་སྟེ་ཚོར་བ་མཆོག་ཏུ་ཚ་བ་དང་འཇིགས་པ་ལོ་འབུམ་ཕྲག་དུ་མར་མྱོང་བར་འགྱུར་རོ། །དེ་ལས་ཐར་ནས་མིར་སྐྱེས་ན་གཞང་འབྲུམ་རིམ་གསུམ་པས་ཐེབས་པར་འགྱུར་ཞིང་། རྟག་ཏུ་གྲང་བའི་རིམས་ཀྱིས་ཐེབས་པར་འགྱུར་རོ། །གཞན་བསླུ་སེམས་ཀྱིས་ཆང་བླུད་ན་དམྱལ་བ་ངུ་འབོད་ཀྱི་འཁོར་བཅོ་ལྔ་པ་གློག་གི་ན་བུན་ཚལ་དུ་སྐྱེ་བར་འགྱུར་ཏེ། དེར་ནི་སེམས་ཅན་དམྱལ་བ་པ་དེ་ཁྲུ་ཉིས་བརྒྱར་མེས་གང་བ་དེར་དེ་དག་གཤིན་རྗེའི་མི་རྣམས་ཀྱིས་བཟུང་ནས་འཇུག་སྟེ་རྐང་པ་ནས་མགོ་ལ་སོགས་པའི་བར་བཏེག་ཅིང་བཞུས་སོ། །ལས་ཀྱི་རླུང་གིས་ཡང་སྐྱེ་བར་འགྱུར་ལ་མེ་དེ་ནི་ལོ་མ་སྡུད་པ་ལྟ་བུ་ཡིན་ཏེ། ཇི་ཙམ་དུ་ཕྱོགས་བཅུར་ཐག་པས་དཀྲིས་པ་ལྟར་དམྱལ་བ་པ་དེ་དག་དཀྲིས་ནས་ཐལ་བ་ཡང་མི་མཐོང་བར་སྲེག་གོ །ཡང་སྐྱེ་བར་འགྱུར་ཞིང་། ཇི་སྲིད་སྡིག་པའི་ལས་མ་ཟད་པར་ལོ་འབུམ་ཕྲག་དུ་མར་སྲེག་གོ །དེ་ལས་ཐར་ཏེ་གལ་ཏེ་མིར་སྐྱེས་ན་བཀོལ་བས་ཉམས་པར་འགྱུར་རོ། །ལམ་དུ་འཇུག་པའི་ཚེ་མགྱོགས་པ་དང་ངལ་བར་མི་འགྱུར་བའི་ཕྱིར་ཆང་བླུད་ན་དེ་ལུས་དང་བྲལ་ནས་དམྱལ་བ་ངུ་འབོད་ཀྱི་འཁོར་བཅུ་དྲུག་པ་ཀུན་ཏུ་རྟོག་བྱེད་དུ་སྐྱེ་བར་འགྱུར་རོ། །དེ་དག་ལ་གནོད་པ་འབྱུང་བ་འདི་ལྟ་སྟེ། འདོད་པ་གང་དང་གང་ཉིད་དུ་ཀུན་ཏུ་སེམས་པ་དེ་དང་དེ་ཉིད་གཤིན་རྗེའི་མི་དག་གིས་གནོད་པ་བརྒྱའམ་སྟོང་ངམ་བྱེ་བ་བརྒྱ་སྟོང་དུ་བྱེད་དོ། །སེམས་ཅན་དམྱལ་བའི་འཁོར་གཞན་དང་གཞན་དུ་གནོད་པ་གང་དང་གང་འབྱུང་བ་དེ་ཐམས་ཅད་ཀྱི་བཞི་འགྱུར་དུ་དེར་འབྱུང་ངོ་། ། དམྱལ་བ་པ་དེ་རྣམས་ལ་གཤིན་རྗེའི་མི་དག་གིས་ཚིགས་སུ་བཅད་དེ་སྨྲས་པ། དེ་ཡི་ལས་ནི་རྣམ་གསུམ་གྱིས། །གནས་སྐབས་དགུར་ནི་འཚེད་བྱེད་ཅིང་། །རྣམ་པར་སྨིན་པ་བཞི་བཅུ་ཐམ། །དྲག་པོ་རབ་ཏུ་གཡོས་པར་འགྱུར། །དོན་མེད་གཞི་ནི་ཆང་ཡིན་ཏེ། །སེམས་ཅན་དམྱལ་བའི་བཞད་གད་པ། །དབང་པོ་ཐམས་ཅད་རྣམ་ཉམས་ཤིང་། །དོན་མེད་པ་ཡི་རྒྱུ་འགྱུར་ཏོ། །ཚིག་ལ་ཤིན་ཏུ་དགའ་བ་དང་། །ཆགས་པ་དང་ནི་འཇིག་པ་དང་། །ངག་གི་སྐྱོན་དང་རློམ་པ་དང་། །ཚིག་རྩུབ་གཞི་ནི་དེ་ཡིན་ནོ། །ཆང་གིས་ཀུན་ཏུ་གཡེངས་པའི་ཡིད། །བྱ་དང་མི་བྱ་མི་ཤེས་པ། །མི་དེ་ཕྱུགས་དང་མཚུངས་པ་ཡིན། དེ་ལྟ་བས་ན་ཆང་སྤོངས་ཤིག །ཆང་གིས་གཡེངས་པའི་མི་དག་ནི། །གསོན་ཡང་ཤི་བ་དག་དང་མཚུངས། །གང་ཞིག་རྟག་ཏུ་གསོན་འདོད་པས། །རྟག་པར་ཆང་ནི་རྣམ་པར་སྤོངས། །ཆང་ནི་ཉེས་པ་ཀུན་གྱི་གཞི། །རྟག་པར་དོན་ཀུན་མེད་པ་བྱེད། །ངན་སོང་གསུམ་གྱི་ཐེམ་སྐས་ཏེ། །མུན་ནག་གནས་ནི་ཆེན་པོ་ཡིན། ། ཆང་གིས་སེམས་ཅན་དམྱལ་བར་འགྲོ། །དེ་བཞིན་ཡི་དྭགས་འཇིག་རྟེན་དང་། །ཆང་གི་སྐྱོན་གྱིས་བསླུས་པ་ཡི། །མི་དག་དུད་འགྲོ་རྣམས་སུ་འགྲོ། །དུག་གི་ནང་དུ་དུག་ནི་ཆང་། །དེ་བཞིན་དམྱལ་བའི་ནང་ན་དམྱལ། །ནད་ཀྱི་ནང་ན་ནད་མཆོག་ནི། །ཆང་ཞེས་མཁས་པ་རྣམས་ཀྱིས་བཤད། །བློ་དང་དབང་པོ་ཉམས་བྱེད་ཅིང་། །རིན་ཆེན་ཆོས་ནི་ཟད་བྱེད་ལ། །ཚངས་པར་སྤྱོད་པ་འཇིག་བྱེད་པ། །མི་བཟད་ཆང་ནི་སྐྱེ་གནས་གཅིག །རྒྱལ་པོ་དང་ནི་བསྟན་བཅོས་མཁས། །ཆང་གིས་ཡང་བར་བྱེད་འགྱུར་ན། །ཐ་མལ་མི་དག་ཆང་འཐུང་བ། །བསླུས་པར་འགྱུར་བ་ཅི་ཞིག་སྨོས། །ཆང་ལ་བསྟེན་པའི་མི་དག་ནི། །ཆོས་རྣམས་ཀུན་གྱི་སྟ་རེ་ཡིན། ། ངོ་ཚ་མེད་པར་བྱེད་པའི་མཆོག །ཡང་པ་དག་ཏུ་ཉེ་བར་བསྟན། །ཆང་གིས་འཕྲོགས་པར་གྱུར་པའི་སེམས། །བྱ་བ་དང་ནི་མི་བྱ་བ། །མི་ཤེས་རྣམ་པར་མི་ཤེས་ཤིང་། །ཐམས་ཅད་མི་ཡིས་ མི་ཤེས་སོ། །གང་ཞིག་ཆང་ལ་བསྟེན་བྱེད་པ། །སྐྱེ་བོ་རེས་འགའ་དགའ་བྱེད་ཅིང་། ། རེས་འགའ་ཡོངས་སུ་གདུང་བྱེད་ལ། །རེས་འགའ་སྡིག་པ་བྱེད་པ་ཡིན། །བློ་ནི་ཤིན་ཏུ་རྨོངས་སྐྱེད་ཅིང་། །འཇིག་རྟེན་གཉིས་ནི་རྣམ་འཇིགས་བྱེད། །ཐར་བའི་ཆོས་ལ་མེ་ལྟ་བུར། །སྲེག་བྱེད་ཁོ་ན་ཆང་ཡིན་ན། །མི་གང་དག་ནི་ཆང་སྤོང་པ། །ཆོས་ཀྱི་ངང་ཚུལ་མཉམ་པར་བཞག ། གང་ན་འཆི་བ་མེད་པ་ཡི། །གནས་མཆོག་དག་ཏུ་དེ་འགྲོའོ། །ཆང་འཐུང་བ་ཡི་བསླུས་པ་དག ། དེ་ནི་བྱེད་པ་དམན་པ་ཡིན། །མི་བཟད་སེམས་ཅན་དམྱལ་བར་ལྷུང་། །དོན་མེད་ཅི་ཞིག་ཡོངས་སུ་གདུང་། །འཐུང་པའི་ཚེ་ན་ཆང་ཞིམ་སྟེ། །རྣམ་སྨིན་ཚེ་ན་མཆོག་ཏུ་ཚ། །ཀིམ་པ་ཀ་ནང་ཀིམ་པ་ཀ། ཆང་ཞེས་མཁས་པ་རྣམས་ཀྱིས་བཤད། །བདག་ལ་འདི་དག་མི་གནོད་ཅེས། ། བློ་ལྡན་ཆང་ལ་ཡིད་མ་རྟོན། །མྱོང་ན་བསིལ་ཡང་རྣམ་སྨིན་ཚ། །ཆང་ནི་དམྱལ་བར་འགྲོ་བར་བྱེད། །སྡིག་པའི་ཆོས་རྣམས་བྱེད་པ་ལ། །སེམས་གཡེང་བ་དག་དགའ་བར་བྱེད། །ཕྱི་ནས་རྣམ་སྨིན་ཚ་བ་རུ། །བློ་ངན་ཡོངས་སུ་གདུང་བར་འགྱུར། །འདོད་པ་རྣམས་ལ་བློ་མི་གཏོང་། ། འདོད་པ་མཆོག་ཏུ་བསླུ་བ་ཡིན། །འཁོར་བའི་འཆིང་བ་དྲག་པོ་སྟེ། །སེམས་ཅན་དམྱལ་བ་ཀུན་གྱི་རྒྱུ། །གང་ཞིག་འདོད་པ་རྣམས་ལ་དགའ། །དེ་ཡི་སྡུག་བསྔལ་མཐའ་མེད་དོ། །འདོད་པའི་སྦྲུལ་གྱིས་ཟིན་པ་ལ། །བདེ་བ་ནམ་ཡང་ག་ལ་ཡོད། །ཁྱེད་ཅག་འདོད་པ་མི་བཟད་ཅིང་། ། དྲག་པོ་སེམས་ཅན་དམྱལ་བར་འོང་། །གནོད་པ་ཤིན་ཏུ་མི་བཟད་པས། །དོན་མེད་ཅི་ཞིག་ཡོངས་སུ་གདུང་། །གང་ཚེ་འདོད་པ་བསླུས་པ་ཡི། །ཁྱེད་ཅག་གིས་ནི་སྡིག་བྱས་པ། །དེ་ཚེ་ཅི་ཕྱིར་ཁྲོ་མི་བྱེད། །དེ་རིང་ཅི་ཞིག་ཡོངས་སུ་གདུང་། །བྱས་ལ་བསགས་པ་བརྟེན་པ་ཡི། །ལས་དག་གི་ནི་འབྲས་བུ་སྣང་། །སྡིག་པའི་ཚོར་བ་མི་བཟད་པ། །དེ་ལྟ་བས་ན་སྡིག་མི་བྱེད། །སྡིག་པ་སྡིག་པའི་རྣམ་སྨིན་ཏེ། །རྟག་ཏུ་སྡིག་པ་རྣམས་སུ་སྨིན། །སྡིག་མི་བྱེད་ལ་སྡིག་མེད་དོ། །དེ་ལྟ་བས་ན་སྡིག་པ་སྤོངས། །སྡིག་པ་ཡོངས་སུ་སྤངས་པ་ལ། །སྡིག་པའི་འཇིགས་པ་མེད་པ་ཡིན། །སྡིག་པ་རང་གིས་བྱས་པ་གནོད། །གཞན་གྱིས་སྤྱོད་པར་མི་འགྱུར་རོ། །ཞེས་གཤིན་རྗེའི་མི་རྣམས་ཀྱིས་དམྱལ་བ་རྣམས་ལ་རྗེས་སུ་བསྟན་ནས་ཇི་སྲིད་སྡིག་པའི་ལས་སྤངས་ལ་ཟད་པར་མ་བྱས་པར་དེ་སྲིད་དུ་གནོད་པ་སྣ་ཚོགས་བྱེད་དུ་འཇུག་གོ །ཕྱིས་དེ་ལས་ཐར་ནས་གལ་ཏེ་ཡི་དྭགས་དང་དུད་འགྲོ་དག་ཏུ་མ་སྐྱེས་ལ་མིར་སྐྱེས་ན་ལས་དེ་དང་རྒྱུ་མཐུན་པའི་འབྲས་བུས་དེ་མཆོག་ཏུ་ཁྲོ་བས་ཁྲོ་བར་འགྱུར་ཞིང་། བཀའ་བློ་མི་བདེ་བར་འགྱུར་བར་གསུངས་པ་དང་། སེང་གེས་ཞུས་པ་ལས། ཆང་བྱིན་ན་སྐྱེ་བ་ལྔ་བརྒྱར་ལག་རྡུམ་དུ་སྐྱེའོ་ཞེས་དང་། དྲང་སྲོང་རྒྱས་པས་ཞུས་པའི་མདོ་ལས། ཆང་དང་། དུག་དང་། མཚོན་ཆ་དང་། བསད་ཤ་སྟེར་བ་རྣམས་མ་དག་པའི་སྦྱིན་པར་གསུངས་པས་གཞན་ལ་ཆང་བཙོང་པ་དང་སྦྱིན་པ་ལའང་ཉེས་དམིགས་ཤིན་ཏུ་ཆེ་བས་སྤང་ཞིང་བག་ཡོད་པར་བྱ་བ་གལ་ཆེའོ། །གཉིས་པ་སོ་ཐར་གྱི་སྡོམ་པ་དང་འགལ་བའི་ཚུལ་ནི། དགེ་ཚུལ་སློང་ལྟ་ཅི་སྨོས། དགེ་བསྙེན་གྱི་བསླབ་པ་ལ་ཞུགས་པ་ཙམ་ནས་མྱོས་བྱེད་ཀྱི་བཏུང་བ་སྐྲའི་རྩེ་མོས་བླངས་པའི་ཐིག་པ་གཅིག་ཙམ་ཡང་གནང་བའི་སྐབས་མེད་དེ། སོ་སོ་ཐར་པའི་མདོར། འབྲུའི་ཆང་དང་། བཅོས་པའི་ཆང་དང་། མྱོས་པར་འགྱུར་བ་འཐུང་ན་ལྟུང་བྱེད་དོ། །ཞེས་དང་། ཀཱ་རི་ཀཱར་ཡང་། འབྲུ་བཏགས་ཕབ་དང་སྦྱར་བ་ཡི། །བཏུང་བའི་བྱེ་བྲག་འབྲུ་ཡི་ཆང་། །སྡོང་བུ་མེ་ཏོག་འབྲས་བུ་ལས། །སྦྱར་བའི་ཁུ་བ་བཅོས་པའི་ཆང་། །དེས་ནི་མྱོས་པར་འགྱུར་རིགས་དང་། །སྡོམ་བརྩོན་ཕན་འདོད་མི་བཏུང་ངོ་། །དེ་འཐུངས་ནས་ནི་དྲན་ཉམས་ཤིང་། །བརྟུལ་ཞུགས་ལྡན་པ་བག་མེད་འགྱུར། ། བག་མེད་པ་ལས་བརྟུལ་ཞུགས་ཉམས། །དེ་བས་སྟོན་པའི་བཀའ་དྲན་བྱ། །མྱོས་འགྱུར་ཉེས་པ་འཕེལ་འགྱུར་བས། །རྩ་མཆོག་གིས་ཀྱང་མི་བཏུང་ངོ་། །ཞེས་དང་། མདོ་རྩ་བ་ལས། ནད་པས་ཆང་ནི་རྩ་མཆོག་གིས་མི་བཏུང་ངོ་། །ཞེས་དང་། སློབ་དཔོན་ཤཱཀྱ་འོད་ཀྱིས། སྟོན་པས་ང་ལ་ལུང་ནོད་པས་རྩ་མཆོག་གིས་ཀྱང་མི་སྤྱིན་མི་བཏུང་ངོ་ཞེས་བསྟན་པར་བཤད་ཅིང་། ཆང་བསྐོལ་བ་འཐུང་ན་ཉེས་པ་མེད་དམ་སྙམ་ན། ཆང་གི་རོ་དང་ནུས་པ་གཉིས་མེད་ན་ནད་པས་བསྟེན་དུ་རུང་ལ། ཡོད་ན་མི་རུང་བར་གསུངས་སོ། །དེས་ན་སོ་ཐར་གྱི་སྐབས་སུ། ཆང་ནི་ཉེས་པ་ཀུན་གྱི་རྩ་བ་སྟེ། །རྩ་རྩེ་ཙམ་ཡང་བཏུང་བར་མི་བྱའོ། །ཞེས་པ་ལྟར། རྣམ་པ་ཐམས་ཅད་དུ་བཀག་པ་ཡིན་ལ། དེའི་རྒྱུ་མཚན་ཡང་། འཕགས་པ་ཉེས་སྦས་ཀྱིས། མཚམས་མེད་པ་ལྔ་དང་། ལྟུང་བ་རིགས་ལྔ་དང་། ཉེས་པ་ཐམས་ཅད་ཀྱི་འབྱུང་གནས་ཡིན་པའི་ཕྱིར་རོ། ། ཞེས་བཤད་པ་དང་། རྒྱ་ཆེ་འགྲེལ་ལས། བྱེ་བྲག་ཏུ་སྨྲ་བ་ཁ་ཅིག་ན་རེ། རང་བཞིན་གྱིས་ཁ་ན་མ་ཐོ་བ་ཡིན་ཏེ། སྲོག་གཅོད་པ་ལ་སོགས་པ་བཞིན་དུ་ཉེས་པར་སྤྱོད་པའོ་ཞེས་གསུངས་པའི་ཕྱིར་དང་། ངན་སོང་གི་རྒྱུར་བསྟན་པའི་ཕྱིར་དང་། བག་མེད་པའི་གནས་ཀྱི་གཞི་ཡིན་པའི་ཕྱིར་དང་། གཅིག་ཏུ་ངེས་པར་མ་གནང་བ་ཡིན་པའི་ཕྱིར་རོ། །ཞེས་བཤད་པས་སོ། །གསུམ་པ་བྱང་སེམས་ཀྱི་བསླབ་པ་དང་འགལ་བའི་ཚུལ་ནི། འཕགས་པ་སོར་ཕྲེང་ཅན་གྱིས་ཞུས་པའི་མདོ་ལས། གང་བྱི་བོ་དང་། མ་ནིང་དུ་གྱུར་པ་དེ་བཞིན་གཤེགས་པའི་སྙིང་པོ་ལས་ཕྱིར་ཕྱོགས་པའི་སེམས་ཅན་དེ་དག་ནི་ད་དུང་ཡང་ཆང་འཐུང་ཞིང་བྱི་བོ་དང་མ་ནིང་འགྱུར་ཏེ། ཤིན་ཏུ་མི་གཙང་བ་འཐུང་པ་ཡིན་ནོ། །ཞེས་སོགས་རྣམ་པ་དུ་མས་སྨད་ཅིང་། ཐེག་ཆེན་གསོ་སྦྱོང་ལས། སྐྱོན་ནི་མང་པོ་ཉེར་བརྟེན་པ། །ཆང་ནི་ཡོངས་སུ་སྤང་བར་བྱ། །ཞེས་གསུངས་པ་ལྟར་ཆང་ལས་སྐྱོན་བྱུང་བའི་ཚུལ་ཡང་། མདོ་དྲིན་ལན་བསལ་པ་ལས། སངས་རྒྱས་འོད་སྲུང་གི་བསྟན་པའི་གཞུག་ཏུ། དགེ་བསྙེན་ཞིག་གིས་ཆང་འཐུངས་པའི་སྐྱོན་གྱིས་གཞན་གྱི་ཆུང་མ་ལ་འདོད་པས་ལོག་པར་གཡེམ་པ་ཡང་བྱས། ཕ་རོལ་པོའི་བྱ་ཕོ་བརྐུས་ནས་བསད་པ་དང་། གཞན་དག་གིས་ཁྱོད་དེ་ལྟ་བུ་བྱས་ནས་ཅི་བྱེད་བྱས་པས་མ་བྱས་ཟེར་ནས་བརྫུན་ཡང་སྨྲས་པས་རྩ་བ་བཞི་ཀའང་ཆང་ཁོ་ནས་བརླག་པར་བྱས་པར་གསུངས་ཤིང་། གཞན་ཡང་མདོ་དེ་ཉིད་དུ། མདོ་སྡེ་བཀླག་པ་དང་། ཁ་ཏོན་ཏུ་བྱ་བ་ལ་སོགས་པ་ཐམས་ཅད་རེ་ཞིག་འདོར་བར་བྱེད་པས་ཆང་སྤང་བར་བྱའོ། །ཞེས་གསུངས་པ་སོགས་ལུང་རིག་མཐའ་ཡས་པ་སྣང་ཞིང་། མདོར་ན་ཆང་འཐུང་བ་ལ་བརྟེན་ནས་སེམས་ཅན་བློས་སྤངས་པའི་རྩ་ལྟུང་དང་། མཆོད་འོས་དང་སེམས་ཅན་བསླུ་བ་སོགས་ནག་པོའི་ཆོས་བཞིའང་འབད་མེད་དུ་འབྱུང་བའི་ཕྱིར་རྟག་ཏུ་སྤང་བར་བྱ་དགོས་ཏེ། བྱང་ཆུབ་སེམས་དཔའི་སྤྱོད་ཡུལ་རྣམ་པར་འཕྲུལ་པ་བསྟན་པའི་མདོར་ཡང་། ཆང་དགའ་དགོངས་པ་ཐམས་ཅད་ལ། །རྟག་ཏུ་བག་མེད་སྤྱོད་པར་འགྱུར། ། མཁས་པ་རྣམས་ཀྱིས་སྨད་འགྱུར་ཞིང་། །འདི་དང་གཞན་དུ་རྣམ་པར་རྨོངས། །དེ་བས་སྐྱེས་བུ་མཁས་པ་ཡིས། །ཆང་ལ་དགའ་བ་སྤང་བར་བགྱི། །དེས་ནི་ཡོན་ཏན་འགྲུབ་པར་བགྱི། ། གཞན་དུའང་སྟོན་པར་བགྱིད་པ་ལགས། །ཞེས་དང་། ཡང་དེ་ཉིད་དུ། རྒྱལ་པོ་ཆེན་པོ་ཆང་གི་བཏུང་བ་ནི་དྲན་པ་ཡོངས་སུ་ཉམས་པར་འགྱུར་བའི་རྒྱུ་སྟེ་རྣམ་པ་ཀུན་ཏུ་སྤང་བྱར་གདམས་པ་དང་། གཞན་ཡང་མདོ་སྡེ་མྱང་འདས་སུ། དགེ་སློང་རྣམས་ལ་དངོས་པོ་ལྔ་བྱེད་དུ་མི་གནང་བར་འཆད་དེ། ལྔ་གང་ཞེ་ན། མི་དང་། མཚོན་དང་། ཆང་དང་། ཞོ་དང་། འབྲུ་མར་འཚོང་དུ་མི་གནང་སྟེ། ཞེས་དང་། གནས་ལྔར་འགྲོ་བར་མི་གནང་སྟེ། ལྔ་གང་ཞེ་ན། བཤན་པ་དང་། སྦྲང་འཚོང་མ་དང་། ཆང་འཚོང་མ་དང་། རྒྱལ་པོའི་ཕོ་བྲང་གི་ནང་དང་། རིགས་ངན་གྱི་ཁྱིམ་སྟེ་ལྔའོ། །ཞེས་ཉེས་པའི་རྒྱུར་འགྱུར་བ་ལ་དགོངས་ནས་འགྲོ་བ་ཙམ་ཡང་བཀག་པ་ཡིན་ནོ། ། གསུམ་པ་གསང་སྔགས་ཀྱི་དམ་ཚིག་དང་འགལ་བའི་ཚུལ་ནི། བྱ་རྒྱུད་དཔུང་བཟང་གིས་ཞུས་པ་ལས། ཤ་ཆང་སྒོག་ཙོང་སོགས་རྣམ་པ་ཀུན་ཏུ་སྤང་ཞིང་སྔགས་པས་དཀར་གསུམ་སོགས་ཁ་ཟས་གཙང་མ་ལ་བརྟེན་པར་བཤད་ལ། དོན་ཡོད་ཞགས་པའི་རྒྱུད་ལས། གལ་ཏེ་དེ་ཉིད་འགྲུབ་འདོད་ན། །ཆང་དང་ཤ་དང་ཀུན་དོང་དང་། །འདྲེས་དང་ཟ་འཕྲོ་སོགས་པ་སྤངས། ། ཞེས་དང་། སྤྱོད་རྒྱུད་ལས། ཆང་ནི་བཏུང་བར་མི་བྱ་ཞིང་། །ཤ་ལ་སོགས་པ་བཟའ་མི་བྱ། ། སེམས་ཅན་གནོད་པར་སྦྱོར་བ་ནི། །ནམ་ཡང་བྱ་བ་མ་ཡིན་ནོ། །ཞེས་དང་། དཀྱིལ་འཁོར་ཆེན་པོའི་རྒྱུད་ལས། མྱོས་པར་འགྱུར་བའི་བཏུང་བ་རྣམས། །སྦྱིན་པར་མི་བྱ་སྦྱིན་མི་གཞུག ། ཆང་ནི་ཉེས་པ་ཐམས་ཅད་ཀྱི། །རྩ་བ་ཡིན་པར་རྣམ་པར་བཤད། །ཅེས་གསུངས་སོ། །དེ་བཞིན་དུ་རྒྱུད་སྡེ་འོག་མ་གསུམ་ཆར་ལས། ཤ་ཆང་བསྟེན་དུ་མི་རུང་བའི་ཚུལ་མཐའ་ཡས་པ་ཞིག་གསུངས་ཤིང་། དེ་དག་གི་ཆོ་ག་ཉམས་སུ་ལེན་པའི་ཚེ་ཡང་ངེས་པར་གསོ་སྦྱོང་ལ་གནས་པར་བྱ་དགོས་པ་སོགས་སྤྱོད་པ་རྣམ་པར་དག་པ་བསྟེན་དགོས་པར་གསུངས་སོ། །དེར་མ་ཟད་རྣལ་འབྱོར་ཆེན་པོ་ལ་ཞུགས་པའི་གང་ཟག་རྣམས་ཀྱིས་ཤ་ཆང་བསྟེན་དུ་མི་རུང་སྟེ། བླ་མ་ལྔ་བཅུ་པར། སྙིང་རྗེ་མེད་ཅིང་ཁྲོ་ལ་གདུག །ཁེངས་ཤིང་ཆགས་ལ་མ་བསྡམས་དང་། ། རང་བསྟོད་བླ་མར་སློབ་མ་ནི། །བློ་བཟང་ལྡན་པས་མི་བྱའོ། །ཞེས་མཚན་ཉིད་འདི་རྣམས་དང་ལྡན་ན་བདུད་རིས་ཀྱི་སློབ་དཔོན་ཡིན་གྱི་གསང་སྔགས་ཀྱི་རྡོ་རྗེ་སློབ་དཔོན་མ་ཡིན་པས་བླ་མར་མི་བྱ་བར་གསུངས་པ། མཚན་ཉིད་དེ་དག་གི་དོན་ཡང་འཇམ་དཔལ་གྱི་རང་གི་ལྟ་བའི་འདོད་པ་མདོར་བསྟན་པ་ལས། བརྩེ་མེད་ཤ་ཟ་བ་ལ་གསུངས། །ཁྲོ་བ་དགའ་བར་སྣུན་བྱེད་དང་། །གདུག་པ་ལེགས་པའི་སྐྱེ་བོར་སྡང་། །ཁེངས་པ་ཡེ་ཤེས་སྤངས་པའོ། །ཆགས་པ་ལྷ་ཡི་དཀོར་ལ་སྤྱོད། །མ་བསྡམས་ཤིན་ཏུ་ཆང་འཐུང་བ། །རང་བསྟོད་སྟོང་པ་ཉིད་ལམ་ལ། ། སྨོད་ཅིང་གནོད་པ་བྱེད་པའོ། །ཞེས་སྙིང་རྗེ་མེད་པ་ནི་ཤ་ཟ་བ་དང་། མ་བསྡམས་པ་ནི་ཆང་འཐུང་བ་ལ་བཤད་པའི་ཕྱིར་མཚན་ཉིད་འདི་དག་དང་ལྡན་ན་རྡོ་རྗེ་སློབ་དཔོན་དུ་མི་འགྱུར་བ་ཡིན་ནོ། །དེ་བཞིན་དུ་རྒྱུད་རྡོ་རྗེ་རྩ་མོར། ཕུང་ཁྲོལ་ཀུན་གྱི་རྩ་བ་ནི། །ཆང་ནི་ཡོངས་སུ་སྤང་བར་བྱ། །ཞེས་དང་། མི་གཡོ་བ་གཏུམ་པོའི་རྒྱུད་དུ། སྲོག་ཆགས་བསད་པར་མི་བྱ་ཞིང་། །ཕ་རོལ་ནོར་ནི་འཕྲོག་མི་བྱ། །བརྫུན་གྱི་ཚིག་ཀྱང་སྨྲ་མི་བྱ། །བློ་ལྡན་ཆང་ནི་བཏུང་མི་བྱ། ། འཇིག་རྟེན་སྨོད་པ་སྤང་བར་བྱ། །རབ་གསལ་བསླབ་པའི་གནས་འདི་ནི། །གུས་པ་དང་བཅས་སྤྱད་པར་བྱ། ཞེས་དང་། ཡང་དེ་ཉིད་ལས། མྱོས་བྱེད་ཆང་གི་བཏུང་བ་ནི། །བདག་གིས་གང་དུའང་བཏུང་མི་བྱ། །ཞེས་གསུངས་པ་དང་། དུས་འཁོར་ལས་ཐོག་མའི་བརྟུལ་ཞུགས་ཉེར་ལྔའི་ཡ་གྱལ་གཅིག་ཆང་སྤང་བར་གསུངས་པ་དང་། བདེ་མཆོག་སྡོམ་འབྱུང་གི་རྒྱུད་ལས། སྔགས་པ་ཆང་གིས་ཉམས་འགྱུར་ཞིང་། །འདོད་པ་ལ་བརྐམ་འཁྲིག་པར་བྱེད། ། གར་བྱེད་དེ་བཞིན་དགོད་པ་དང་། །འཐབ་མོ་ལ་སྤྲོ་རྣམ་པར་འཁྲུལ། །སྨོད་ཅིང་ཉམས་པར་བྱེད་པས་ཀྱང་། །དམྱལ་བ་ངུ་འབོད་དུ་འཚེད་འགྱུར། །རྣལ་འབྱོར་མ་ཀུན་ཁྲོས་པ་དང་། ། སྡིག་པས་དམྱལ་བར་འགྲོ་འགྱུར་ཞིང་། །དེ་ལ་ནད་དང་མྱ་ངན་འཇིགས། །རྣམ་འཚེ་འཇིགས་སུ་རུང་བ་འབྱུང་། །བླ་མ་ལ་འཁུ་བླ་མར་སྨོད། །སེམས་ཅན་འཁུ་ལ་སྦྱིན་མི་བྱ། །བདུད་རྩི་དང་ནི་དུག་དེ་ཉིད། །དངོས་གྲུབ་སྒྲུབ་པ་འབྲས་བུ་མེད། །འདི་དག་སྔོན་གྱི་སངས་རྒྱས་ཀྱིས། ། སྔགས་པས་སྤང་བར་བྱ་བར་གསུངས། །ཞེས་གསུངས་པ་སོགས་བླ་མེད་ཀྱི་རྒྱུད་དགོངས་པ་ཅན་མ་ཡིན་པའི་སྒྲ་ཇི་བཞིན་པ་རྣམས་ལས་མྱོས་བྱེད་ཀྱི་བཏུང་བ་རྣམ་པ་ཐམས་ཅད་དུ་བཀག་པར་མཛད་དོ། །སྔགས་བླ་མེད་ཀྱི་རྒྱུད་སྡེ་རྣམས་སུ་གསང་དབང་བསྐུར་བ་དང་ཚོགས་ཀྱི་འཁོར་ལོའི་དུས་སུ་ཤ་ཆང་ལ་ལོངས་སྤྱོད་པར་བཤད་པ་ནི་གསང་བའི་གནས་སུ་ནུས་པ་ཐོབ་པའི་རྣལ་འབྱོར་པ་རྣམས་ཀྱིས་དམ་ཚིག་གི་སྤྱོད་པ་ཚུལ་བཞིན་དུ་སྤྱོད་པ་ལ་དགོངས་པ་ཡིན་ཏེ། དེའང་ཆང་བཏུང་པར་ནུས་པའི་རྣལ་འབྱོར་པ་ནི་བསྐྱེད་རྫོགས་གཉིས་ལ་བརྟན་པ་ཐོབ་པས་གང་འཐུང་ཐམས་ཅད་བདུད་རྩིར་བསྒྱུར་ནུས་པས་དུག་ཧ་ལ་ནག་པོས་ཀྱང་གནོད་པར་མི་ནུས་ཤིང་། སླར་བདུད་རྩིར་འགྱུར་བ་སྟེ། ནཱ་རོ་པ་ལ་མི་རྒོད་རྣམས་ཀྱིས་ཆུ་ཁྲི་ཕུལ་བ་བདུད་རྩིར་བསྒྱུར་ནས་གསོལ་བ་དང་། ཇི་ཙམ་བཏུང་ཡང་མྱོས་པར་མི་འགྱུར་བ་བིརྺ་པ་ལྟ་བུ་རྣམས་ཏེ། དེ་ལྟ་བུའི་གྲུབ་པ་ཐོབ་པའི་རྣམ་འབྱོར་པ་རྣམས་ཀྱིས་གནས་ཉི་ཤུ་རྩ་བཞི་ལ་སོགས་པ་ཕུན་སུམ་ཚོགས་པར་དུས་བཟང་པོ་ལ་དཔའ་བོ་དང་དཔའ་མོ་རྣམས་མཆོད་པའི་དོན་དུ་ཚོགས་ཀྱི་འཁོར་ལོ་ལ་བདུད་རྩི་ལྔ་དང་ཆང་དང་ཤ་ལྔ་ལ་སོགས་པའི་བཟའ་བ་རྣམས་སྦྱངས་རྟོགས་སྦར་གསུམ་གྱིས་བདུད་རྩིར་དངོས་སུ་བསྒྱུར་ནས་ལོངས་སྤྱད་པ་མ་གཏོགས་བསྐྱེད་རྫོགས་ལ་བརྟན་པ་ཐོབ་ནས་ཆང་བདུད་རྩིར་སྒྱུར་བའི་ནུས་པ་ཕྲ་མོ་ཙམ་ལྟ་ཅི། སེམས་སྐད་ཅིག་ཀྱང་མི་གནས་པར་རྣམ་རྟོག་གི་གཞན་དབང་དུ་ཤོར་ནས་ཆང་ཕོར་བ་གང་ཙམ་གྱིས་ལུས་སེམས་མྱོས་པར་འགྱུར་བ་དེ་དག་གིས་ནི་སྔགས་བླ་མེད་ལ་ཁག་བསྙད་ནས་ཆང་བཏུང་ན་ངེས་པར་དམྱལ་བར་འགྲོ་བ་ལས་ཐུན་མོང་གི་དངོས་གྲུབ་ཕྲ་མོ་ཙམ་ཡང་མི་ཐོབ་པོ། །དེས་ན་སྔགས་བླ་མེད་དུ་ཞུགས་པའི་རྣལ་འབྱོར་པ་ཡིན་ཡང་ནུས་པ་མ་ཐོབ་པར་ཆང་བག་མེད་དུ་སྤྱོད་པར་མ་གནང་ཞིང་། རབ་བྱུང་ལ་དབང་དང་ཚོགས་འཁོར་གྱི་དུས་བླ་མས་བྱིན་ན་བླ་མ་དམ་ཚིག་ཉམས་ཤིང་འཐུང་བ་པོ་སྡོམ་པ་ཉམས་པར་བདེ་མཆོག་སྟོད་འགྲེལ་ལས་གསུངས་སོ། །གལ་ཏེ་རབ་བྱུང་གི་བླ་སློབ་ཆང་ལ་སྤྱོད་པའི་ནུས་པ་ཐོབ་ན་རབ་བྱུང་གི་ཆས་མཐའ་དག་མཁན་སློབ་ལ་ཕུལ་ནས་རྣལ་འབྱོར་པའི་ཆས་སུ་ཞུགས་པར་བྱ་སྟེ། སློབ་དཔོན་ཞི་བ་ལྷས་ཆང་གསོལ་བ་དང་། བིརྺ་པ་ཆང་གསོལ་བའི་གཏམ་རྒྱུད་ལས་ཤེས་པར་བྱའོ། །དེས་ན་དེང་སང་རབ་བྱུང་གི་སྡོམ་པ་ནི་དངོས་སུ་འབོག་ཏུ་ཡོད་པས་སེར་མོ་བ་ཐམས་ཅད་སྡོམ་ལྡན་ཡིན་པ་གཞིར་བཞག་གི་ཐོག །སྔགས་བླ་མེད་ཀྱི་གསང་དབང་དང་ཚོགས་ཀྱི་འཁོར་ལོ་རྣམས་ནི་རྗེས་མཐུན་ལས་དངོས་སུ་ནུས་པ་སུའང་མེད་པས་དེ་དག་ལ་བསྙད་བཞག་ནས་ཤ་ཆང་བག་མེད་དུ་སྤྱོད་ན་སྡོམ་པ་དམ་ཚིག་ཉམས་པ་ལས་དངོས་གྲུབ་ཀྱི་རྒྱུར་མི་འགྲོ་བ་ལ་དགོངས་ནས་རྗེ་བཙུན་ས་སྐྱ་པཎ་ཆེན་སོགས་ཀྱིས་གསང་དབང་གི་རྫས་ཆང་ངམ་སྦྲང་ངམ་ཞོ་གང་རུང་གི་ཐིག་ལེ་ཙམ་ཞིག་ལྕེ་ལ་བཞག་པར་གསུངས་པ་དང་། ཚོགས་ཀྱི་འཁོར་ལོའི་དུས་སུ་ཤ་ཆང་ལ་སོགས་པ་གཏོར་མ་ལ་འབུལ། སྡོམ་བརྩོན་རྣམས་ཀྱིས་བདུད་རྩི་རིལ་བུ་བཟའ་བའི་དམ་ཚིག་ཏུ་བསྟེན་པའམ། ཚོགས་ཆང་ཐིག་པ་ལྕེ་ལ་མྱོང་བ་ཙམ་བྱ་བར་གསུངས་སོ། །མདོར་ན་སློབ་དཔོན་དཔའ་བོའི་ཞལ་ནས། ཆང་འཐུང་བ་ནི། ཉེས་པ་དུ་མ་འབྱུང་ཞིང་ཤིན་ཏུ་མ་རུང་བར་འགྱུར་བའི་ཕྱིར། དགེ་བ་རྣམས་ནི་གཞན་དག་ཀྱང་འདི་ལས་ཟློག་པར་བྱེད་ན། བདག་ཉིད་ལྟ་སྨོས་ཀྱང་ཅི་དགོས། ཞེས་དང་། ཆང་ཞིམ་དག་ལ་དགའ་བའི་མི། །ཤི་ནས་གནོད་སྦྱིན་མ་རུང་པ། །ཆེན་པོ་དག་ཏུ་སྐྱེ་པར་འགྱུར། །ཞེས་སོགས་གསུངས་པས་ད་ལྟ་མི་ལུས་རིན་པོ་ཆེ་ཐོབ་ཅིང་དམ་པའི་ཆོས་དང་མཇལ་བའི་སྐལ་པ་བཟང་པོ་དང་ལྡན་པ་ཞིག །ཤི་ནས་འདྲེ་གདོན་དོ་ཟླ་མེད་པ་ཞིག་ཏུ་སྐྱེས་ནས་སེམས་ཅན་མང་པོའི་སྲོག་དབུགས་བསྡུས་ཏེ་དེའི་ཚེ་འཕོས་ནས་ཐར་དུས་མེད་པའི་དམྱལ་བ་ངུ་འབོད་ལ་སོགས་པ་སྡུག་བསྔལ་དོས་དྲག་པ་མྱོང་བར་འགྱུར་ན་དེ་ལས་བྱ་བ་ཉེས་ཚབ་ཆེ་བ་ཅི་ཡོད་པས། ཁོང་པའི་ནང་དྲན་པ་ཡོད་པ་དག་གིས་གནས་སྐབས་མཐར་ཐུག་གི་ཉེས་པ་ཐམས་ཅད་ཀྱི་འབྱུང་གནས། ལྟུང་བའི་སྒོ་བཞི་གཅིག་ཆར་དུ་འབྱེད་པའི་ལྡེའི་མིག །འདི་ཕྱིའི་དགེ་ལེགས་ཐམས་ཅད་འཇོམས་པར་བྱེད་པའི་དགྲ་མ་རུང་པ་ལྟ་བུ་མྱོས་བྱེད་ཆང་གི་བཏུང་བ་སྤངས་ནས་སྡིག་མེད་ཀྱི་ཁ་ཟས་བཟང་པོས་ལུས་འཚོ་བར་བྱའོ། །ལྔ་པ་ཆང་འཐུང་བ་སྤངས་པའི་ཕན་ཡོན་ནི། གོང་གི་ཉེས་པ་རྣམས་ལས་ལྡོག་པའི་ཡོན་ཏན་མཐའ་དག་དང་ལྡན་པ་ཡིན་ལ། ཚུལ་ཁྲིམས་ལྔའི་ཕན་ཡོན་བསྟན་པའི་མདོ་ལས། ཆང་འཐུང་བ་ནི་སྤངས་པ་ཡིས། ། སྐྱེས་པའམ་ནི་བུད་མེད་ནི། །ཐོབ་སྟེ་དེ་ཡི་ཕན་ཡོན་ནི། སུམ་ཅུ་རྩ་དྲུག་མི་དམན་པར། །འདས་ དང་མ་འོངས་པ་ཡི་དུས། །ད་ལྟར་བྱུང་བ་ཅུང་ཟད་དུ། །མྱུར་དུ་ཤེས་པར་འགྱུར་བ་དང་། ། རྟག་ཏུ་དྲན་པ་གནས་པ་དང་། །དེ་ནི་སྨྱོ་བར་མི་འགྱུར་ཞིང་། །ཁྱད་པར་འཕགས་པའི་ཤེས་རབ་དང་། །མི་རྨོངས་པ་དང་བག་ཡོད་དང་། །ཚིག་ནི་ཤིན་ཏུ་གསལ་བ་དང་། །ངོ་ཚ་ཤེས་ཤིང་ཚིག་ནི་གསལ། །དེ་ནི་ལོག་པར་སྨྲ་མི་འགྱུར། །ཕྲ་མ་དང་ནི་ཚིག་རྩུབ་མེད། །དོན་མེད་པ་ལ་མི་སྨོད་ཅིང་། །ཉིན་དང་མཚན་དུ་དེ་བཞིན་དུ། །བྱས་པ་ཤེས་ཤིང་བྱས་པ་ཚོར། །འདོད་མེད་གཏོང་དང་ཚུལ་ཁྲིམས་ལྡན། །ཁྲོ་བ་མེད་ཅིང་ཚིག་ནི་དྲང་། །འཇིགས་པ་མེད་ཅིང་རྣམ་པར་མཁས། །ངོ་ཚ་ཁྲེལ་ཡོད་ཕུན་སུམ་ཚོགས། །འཇིགས་པ་དང་ནི་དོགས་པ་མེད། །ཡིད་གཞུང་ཐོས་པ་འཛིན་པ་དང་། །དོན་ཡོད་སྐྱེ་བོ་མང་ནང་མཁས། །ཆང་གི་བཏུང་བ་སྤངས་པ་ཡིས། །

སྐྱེས་པའམ་ནི་བུད་མེད་ཀྱིས། །ཕན་ཡོན་འདི་རྣམས་མྱོང་བར་འགྱུར། །ལྷ་རྣམས་དང་ནི་མི་རྣམས་སུ། །དེའི་ལུས་ཞིག་ནས་ཤི་བའི་ཕ་རོལ་ཏུ་བདེ་འགྲོ་མཐོ་རིས་ལྷའི་འཇིག་རྟེན་དང་མཐོ་རིས་སུ་སྐྱེའོ། །ཞེས་སྤྱིར་བཤད་ལ། བྱེ་བྲག་སྡོམ་པ་གསུམ་པོའི་བཅས་པ་ལས་མ་འདས་པས་སྡོམ་ལྡན་དང་དམ་ཚིག་ཅན་ཞེས་བྱ་བའི་གྲངས་སུ་འགྲོ་སྟེ་ས་དང་ལམ་གྱི་མངོན་རྟོགས་རིམ་གྱིས་རྫོགས་ནས་ཐར་པ་དང་ཐམས་ཅད་མཁྱེན་པའི་གོ་འཕང་བདེ་བླག་ཏུ་འཐོབ་པར་འགྱུར་རོ། །སྙིགས་མའི་དུས་འདིར་ཆོས་མིན་སྤྱོད་པ་མང་། །དེ་ཡིས་ཐུབ་བསྟན་མྱུར་དུ་འཇིག་པར་བྱེད། །བདུད་ཀྱིས་བྱིན་བརླབས་སྐྱོན་ལ་ཡོན་ཏན་བཟུང་། །རྒྱལ་བའི་བཀའ་ལ་བདེན་པར་འཛིན་པ་དཀོན། །དེས་ན་འདི་འདྲས་གཞན་ལ་ཕན་དཀའ་ཡང་། །དམ་པ་རྣམས་ཀྱི་གསུང་བཞིན་བསྒྲུབས་པའི་མཐུས། །སྐྱེ་བོ་དུ་མ་ངན་འགྲོའི་ལམ་ལས་ཟློག །ཐར་པའི་དགའ་ཚལ་མཆོག་ཏུ་འཁྲིད་ནུས་ཤོག །ཅེས་པ་འདིའང་གཞན་ཕན་ལྷག་པའི་ཐུགས་ལྡན་གྱི་དམ་པ། སྡེ་བཞི་དགེ་བཅུའི་ཆོས་སྲིད་ཀྱི་མདུན་ན་འདོན་ཆེན་པོ་གཉེར་པདྨ་ལེགས་གྲུབ་ནས་སྔོན་འགྲོའི་ཁྲིད་ཡིག་གི་ཆ་ལག་ཏུ་འདི་ལྟ་བུ་ཞིག་དགོས་ཞེས་གསུང་བསྐུལ་ནན་བསྐྱར་གནང་བ་ལྟར། ཤྲཱི་ཨ་བུ་ཧྲལ་པོས་བཀའ་དང་བསྟན་བཅོས་ཀྱི་གཞུང་བཟང་རྣམས་ལས་བཏུས་པའོ། །ཕྱི་མོའི་ཞུ་དག་ཀྱང་ཀུ་སཱ་ལི་བློ་གྲོས་མཐའ་ཡས་པའི་སྡེས་དཔལ་དེ་བཱི་ཀོ་ཊིའི་ཡང་ཁྲོད་དུ་བགྱིས་པ་དགེ་ལེགས་འཕེལ།