PJCW-KABUM-01-KA-014

🚧 This website is under continued development. We appreciate your patience!

Previous Text Back to Volume Page Next Text

Wylie title
Location	dpal sprul bka' 'bum Volume 1, Text 14, Pages (Folios to )
Author	དཔལ་སྤྲུལ་རིན་པོ་ཆེ་
Less details More details
Citation
Genre

[edit]

༄༅། །ཆོས་དང་འཇིག་རྟེན་ཤེས་པའི་བསྟན་བཅོས་གདོལ་བའི་དྲང་སྲོང་གི་གཏམ་ཐར་པའི་ཐེམ་སྐས་ཞེས་བྱ་བ་བཞུགས་སོ། །

ན་མོ་ལོ་ཀེ་ཤྭ་ར་ཡེ། གང་གིས་ཁམས་གསུམ་ཁམ་ཟས་སུ། །བྱེད་པ་འཇིགས་བྱེད་དུས་ཞེས་བྱ། །དུས་ཀྱང་འཇོམས་པ་འཇམ་པའི་དབྱངས། །སྒྲ་དང་ལྡན་པའི་ཕོ་བྲང་ནས། །གཏུམ་པོ་དུལ་བའི་ཚུལ་འཛིན་ཅིང་། །འབར་བ་ཞི་བའི་རྣམ་པ་ཅན། །གདོལ་བའི་དྲང་སྲོང་དེ་གནས་ཏེ། །དེ་ཡི་མིང་ནི་ཤྲཱི་ཞེས་གྲགས། །དེ་ལ་ལེགས་པར་སྤྱོད་པ་མེད་ན་ཡང་། །དེ་ལ་ལེགས་པར་སྨྲ་བ་ཡོད་པ་སྟེ། །དེ་ཕྱིར་དེ་ལ་ཀུན་གྱིས་དོན་འདྲི་ཞིང་། །དེས་ཀྱང་དེ་ལ་ཚུལ་བཞིན་འདོམས་པར་བྱེད། །དེ་ལ་ཁ་ཅིག་གིས་དྲིས་པ། ཀྱེ་དྲང་སྲོང་ཆེན་པོ། ཆོས་དང་ལུགས་ཞེས་བྱ་བ་ཅི། །ཆོས་དང་ལུགས་ཀྱི་དབྱེ་བ་གང་། །ཆོས་དང་ལུགས་ལ་གང་དག་སྤང་། །ཆོས་དང་ལུགས་ལ་གང་དག་བླང་། །སྨྲས་པ། ཆོས་ནི་ཤེས་བྱ་ཐམས་ཅད་དེ། །ལུགས་ནི་དེ་ཡི་མཚན་ཉིད་ཡིན། །ཆོས་ནི་བླང་དོར་བྱ་བའི་གནས། །ལུགས་ནི་དེ་ཡི་ལག་ལེན་ཡིན། །ཤེས་བྱའི་ཆོས་ལ་དབྱེ་བ་འཁོར་འདས་གཉིས། །བླང་དོར་ཆོས་ལ་དབྱེ་ན་དགེ་སྡིག་གཉིས། །དང་པོ་གཉིས་ནི་སྡུག་བསྔལ་ཞི་མ་ཞི། །ཕྱི་མ་གཉིས་ནི་སྡུག་བསྔལ་སྐྱེད་མི་སྐྱེད། །དེ་ལ་འཁོར་བ་སྤང་བྱ་སྟེ། །འཁོར་རྒྱུ་སྡིག་པ་མ་སྤངས་ན། །འཁོར་བ་སྤང་བར་མི་ནུས་པས། །དེ་ཕྱིར་དང་པོ་སྡིག་པ་སྤང་། །མྱ་ངན་འདས་པ་བླང་བྱ་སྟེ། །དེ་རྒྱུ་དགེ་བ་མ་བསྒྲུབ་ན། །མྱང་འདས་བླང་བར་མི་ནུས་པས། །དེ་ཕྱིར་དང་པོ་དགེ་བ་བླང་། །འཁོར་བ་སྤང་བར་བྱ་བ་ཡིན་ནའང་། །འཁོར་བའི་ཆོས་ལ་དང་པོར་མ་བརྟེན་ན། །མྱང་འདས་ལམ་ལ་འཇུག་པར་མི་ནུས་པས། །དང་པོ་འཁོར་བའི་རང་བཞིན་ཤེས་པ་གཅེས། །འཁོར་བ་འདི་ལ་ལམ་ཆེན་གཉིས་ཡོད་པ། །དེ་ནི་དྲང་པོ་དང་ནི་འཁྱོག་པོའོ། །དྲང་པོ་ནས་ནི་ལྷ་དང་མིར་འགྲོ་སྟེ། །འཁྱོག་པོའི་ལམ་ནས་ངན་སོང་དག་ཏུའོ། །ས་སྟེང་འདི་ན་དྲང་པོར་སྤྱོད་མང་ན། །ས་ཡི་བླ་ན་ལྷ་ཡུལ་རྒྱས་འགྱུར་ཏེ། ། ས་སྟེང་འདི་ན་འཁྱོག་པོར་སྤྱོད་མང་ན། །ས་ཡི་འོག་ན་ངན་སོང་རྣམ་པར་འཕེལ། །དྲང་པོ་མི་ཡི་ཆོས་ལུགས་ཞེས་བྱ་སྟེ། །ཤིན་ཏུ་དྲང་ན་ལྷ་ཡི་ཆོས་ལུགས་ཡིན། །འཁྱོག་པོ་སྙིགས་མའི་སྤྱོད་པའི་ཆོས་ལུགས་ཏེ། །ཤིན་ཏུ་འཁྱོག་པོ་དམྱལ་བའི་ཆོས་ལུགས་ཡིན། །དྲང་པོ་དེ་ཡང་གང་ཞེ་ན། །གཡོ་སྒྱུ་ཡོངས་སུ་སྤངས་ནས་ནི། །ཁ་དང་དོན་དུ་མཚུངས་པ་དང་། །ཕྱི་དང་ནང་དུ་མཚུངས་པའོ། །ཁ་ནི་བརྗོད་པའི་གཏམ་ཡིན་དོན་ནི་དེ་ཡི་ལག་ལེན་ཡིན། །ཕྱི་ནི་ལུས་དང་ངག་ཡིན་ནང་ནི་རང་གི་སེམས་ཡིན་ཏེ། །དོན་ནི་འཁྱོག་ལ་ཁ་ནི་དྲང་བ་ནང་འཁྱོག་ཕྱི་དྲང་བས། །དྲང་པོས་འཁྱོག་པོ་བསྒྲིབས་པ་དེ་ཡང་སྙིགས་མའི་ཆོས་ལུགས་ཡིན། སེམས་ལ་གཡོ་སྒྱུ་སྤངས་ནས་ནི། །དྲང་པོར་སྤྱོད་པ་འདི་ཁོ་ན། །མི་ཡི་ཆོས་ལུགས་མཆོག་ཡིན་ཏེ། །མི་ཆོས་ཐམས་ཅད་འདི་ལ་འདུས། །འདོད་པའི་རྣམ་རྟོག་འཁྱོག་པོ་སྟེ། །འདོད་པ་ཆུང་བ་དྲང་པོ་ཡིན། ། རང་འདོད་ཁོ་ནས་དོན་བསྒྲུབ་པ། །སྤངས་ན་ལྷ་ཡི་ཆོས་ལུགས་ཡིན། །སྙིགས་མའི་སྐྱེ་བོ་ཐམས་ཅད་ནི། །ལུས་འཁྱོག་ཚུལ་འཆོས་སྤྱོད་པ་ཅན། །ངག་འཁྱོག་གཡོ་སྒྱུའི་སྨྲ་བ་ཅན། ། ཡིད་འཁྱོག་བསླུ་བའི་བསམ་པ་ཅན། །འདི་ལ་མི་འདོད་ཀུན་འདུ་སྟེ། །འདི་ཡིས་འདོད་པ་འགྲུབ་མི་འགྱུར། །འདི་ལ་ལྷ་དང་དྲང་སྲོང་ཁྲེལ། །འདི་ལ་ངན་སོང་ཐག་མི་རིང་། །ཤིན་ཏུ་འཁྱོག་ཅིང་གཞན་ལ་གནོད་སྤྱོད་པ། །རང་འདོད་ཕུག་བཅུག་བསླུ་བའི་སེམས་པ་ཅན། །དེ་ནི་དགེ་བའི་ལས་ལམ་ཀུན་སྤངས་ནས། །ས་ཡི་འོག་ཏུ་དམྱལ་མེ་འབར་བས་འཚིག །དེ་ལྟར་འཁོར་བའི་ཆོས་ལ་སྤང་བླང་དག །ཤེས་ནས་དྲང་པོའི་སྤྱོད་ལ་གནས་པ་དེས། །ཡང་དག་མྱ་ངན་འདས་པ་ཐོབ་བྱ་བ། །དེ་རྒྱུ་རྒྱལ་བའི་བསྟན་པ་མཆོག་ཡིན་ནོ། །རྒྱལ་བའི་བསྟན་པ་ལུང་རྟོགས་གཉིས། །ལུང་ནི་བཤད་པའི་ཆོས་ཡིན་ལ། །རྟོགས་པ་དེ་དོན་སྒྲུབ་པ་སྟེ། །རིམ་བཞིན་སྡེ་སྣོད་བསླབ་གསུམ་མོ། །འདུལ་བ་མདོ་སྡེ་མངོན་པ་རིན་པོ་ཆེ། །ཡང་དག་ཐུབ་པའི་སྡེ་སྣོད་རྣམ་གསུམ་པོ། །འདི་ནི་ལུང་གི་ཆོས་ཡིན་བཤད་པའི་ཆོས། །འདི་ཡི་ཚིག་དོན་ཐོས་བསམ་ཡུལ་ཡིན་ནོ། །ཚུལ་ཁྲིམས་ཏིང་འཛིན་ཤེས་རབ་རིན་པོ་ཆེ། །ཡང་དག་རྒྱལ་བའི་སྲས་ཀྱི་བསླབ་པ་གསུམ། །འདི་ནི་རྟོགས་པའི་ཆོས་ཏེ་བསྒྲུབ་པའི་ཆོས། །འདི་གསུམ་ཉམས་སུ་བླངས་ཤིང་གོམས་པར་བྱ། །ཐུབ་པའི་སྡེ་སྣོད་རྣམ་པ་གསུམ། །ཐམས་ཅད་ཤེས་པ་ཡོད་མིན་ཡང་། །ཚིག་འབྲུ་གཅིག་གི་དོན་ཤེས་ན། །དེ་ཡང་ལུང་གི་བསྟན་པ་ཡིན། །རྒྱལ་བའི་སྲས་ཀྱི་བསླབ་པ་གསུམ། །ཐམས་ཅད་བསྒྲུབ་པ་དཀའ་ན་ཡང་། །དགེ་སེམས་སྐད་ཅིག་གཅིག་སྐྱེས་ཀྱང་། །དེ་ཡང་རྟོགས་པའི་བསྟན་པ་ཡིན། །དེ་ཕྱིར་རྒྱལ་བའི་བསྟན་པ་འཛིན་བཞེད་ན། ། བསྟན་པ་ཕྱི་རུ་མ་བཙལ་ནང་དུ་སྒྲུབས། །ནང་དུ་བསྒྲུབས་ན་སེམས་འདི་བསྟན་པས་འདུལ། ། སེམས་འདི་ཐུལ་ན་མྱ་ངན་འདས་པ་ཡིན། །དེ་ལྟར་འཁོར་འདས་ཆོས་ལ་སྤང་བླང་དུ། །བྱེད་པ་དགེ་སྡིག་བླང་དོར་ཡིན་མོད་ཀྱང་། །ད་དུང་ལག་ལེན་གནད་དུ་དྲིལ་བའི་ཕྱིར། །དགེ་སྡིག་སྤང་བླང་བཤད་ཀྱིས་ཉོན་ལ་སྒྲུབས། །དགེ་བ་སེམས་ཀྱི་རྣམ་རྟོག་སྟེ། །སྡིག་ཀྱང་སེམས་ཀྱི་རྣམ་རྟོག་ཡིན། །དགེ་སྡིག་ཕྱི་ན་མེད་ངེས་ཀྱི། །དགེ་སྡིག་སེམས་ཀྱི་སྟེང་དུ་ཚོལ། །སེམས་འདི་དགེ་ན་ལུས་དང་ངག་ཀྱང་དགེ། །སེམས་འདི་སྡིག་ན་ལུས་དང་ངག་ཀྱང་སྡིག །དེ་ཕྱིར་ཆོས་ཀུན་རྩ་བ་སེམས་ཡིན་ཞེས། །སེམས་ཀྱི་འདུལ་ཐབས་ཐུབ་པ་མཆོག་གིས་གསུངས། ། དུས་དང་དུས་སུ་རང་གི་སེམས་ལ་བལྟ། །ནམ་དང་ནམ་ཡང་རང་གི་སེམས་ལ་བལྟ། །སྐད་ཅིག་མི་གཡེང་རང་གི་སེམས་ལ་བལྟ། །འཕྲལ་དང་འཕྲལ་དུ་རང་གི་སེམས་ལ་བལྟ། །མང་པོ་འཚོགས་པའི་དུས་དང་གཅིག་པུར་གནས་པའི་དུས། །དུས་འདིར་འདི་ལྟར་བྱ་ཞེས་དགེ་བའི་དམ་བཅས་ནས། །དེ་ནས་དྲན་པའི་བྱ་ར་བཞག་སྟེ་མཐར་ཕྱིན་པར། །དུས་དང་དུས་སུ་རང་གི་སེམས་ལ་དེ་ལྟར་བལྟ། །ཟ་དང་ཉལ་དང་འགྲོ་དང་འཆག་དང་འདུག་པ་དང་། །སྤྱོད་ལམ་ཀུན་ཏུ་དྲན་པའི་བྱ་རས་ཡིད་བཟུང་སྟེ། །དོན་མེད་པ་དང་འདོད་ཆེན་སྤངས་ནས་བག་ཡོད་པས། །ནམ་དང་ནམ་ཡང་རང་གི་སེམས་ལ་དེ་ལྟར་བལྟ། །སེམས་ཀྱི་རྣམ་རྟོག་འདི་ནི་མུ་མཐའ་མེད་པ་སྟེ། །རྣམ་རྟོག་ཁ་ཡན་མི་བཏང་དྲན་པའི་ལྕག་ཀྱུས་བཟུང་། །དེ་ལ་སྤང་བླང་མེད་པར་རྟོག་ཚོགས་རང་གྲོལ་གཏོང་། །སྐད་ཅིག་མི་གཡེང་རང་གི་སེམས་ལ་དེ་ལྟར་བལྟ། ། འོན་ཀྱང་དང་པོའི་ལས་ཅན་རྣམ་གཡེང་མང་བས་ན། །སེམས་ལ་བལྟ་བའི་དྲན་པ་བསྒྲིམས་ནས་ཡང་དང་ཡང་། །རང་གི་སེམས་འདི་ཡེངས་འཁྲུལ་ཅིར་འགྱུར་བརྟགས་བྱ་སྟེ། །འཕྲལ་དང་འཕྲལ་དུ་རང་གི་སེམས་ལ་དེ་ལྟར་བལྟ། །སེམས་ལ་བལྟ་བ་གོམས་པ་ན། །སེམས་ཀྱི་གནད་གསང་ཤེས་འགྱུར་ཏེ། །སེམས་ཀྱི་གནད་གསང་ཤེས་གྱུར་ན། །ཆོས་རྣམས་ཀུན་གྱི་དེ་ཉིད་ཤེས། །ཆོས་རྣམས་ཀུན་གྱི་དེ་བཞིན་ཉིད། །སེམས་ཀྱི་རང་བཞིན་འདི་ལགས་ཏེ། །ཇི་བཞིན་བརྗོད་པར་མི་ནུས་ཏེ། །རང་གིས་བརྟགས་ན་ཤེས་པར་རུང་། །བརྟགས་བྱ་མེད་ལ་ཅི་ཞིག་རྟོགས། །རྟོགས་དང་བརྟགས་པ་ཐ་སྙད་ཙམ། །ཐ་སྙད་ལས་འདས་དམ་པའི་དོན། ། ཤེས་ན་མྱ་ངན་འདས་ཞེས་བྱ། །ཀྱེ་ཧོ་གྲོགས་དག་རང་གི་སེམས་ལ་ལྟོས། །དགེ་སྡིག་འཁོར་འདས་རང་གི་སེམས་ལ་ཚང་། །འདི་ལ་ལུས་ངག་བྱ་བ་ཅི་ཡང་མེད། །རང་སེམས་འདུལ་བ་སངས་རྒྱས་བསྟན་པ་ཡིན། །ཡང་ཁ་ཅིག་གིས་དྲིས་པ། སྐྱབས་གསུམ་དང་ནི་སྡོམ་པ་གསུམ། ། ཐེག་པ་གསུམ་གྱི་རྣམ་བཞག་གསུངས། །གསུམ་རེའང་གཅིག་ཏུ་བསྡུས་ལ་ཤོད། །གཅིག་པོའང་གནད་དུ་དྲིལ་ལ་སྟོན། །སྨྲས་པ། མ་འཁྲུལ་པ་ནི་སྟོན་པ་སྟེ། །འཁྲུལ་པ་མེད་པར་ལམ་བཟང་སྟོན། །འཁོར་བའི་དོང་ནས་འགྲོ་འདྲེན་པ། །སྟོན་པ་སངས་རྒྱས་གཏན་གྱི་སྐྱབས། །མི་བསླུ་པ་ནི་བསྟན་པ་སྟེ། །བཀའ་བཞིན་བསྒྲུབས་ན་བསླུ་བ་མེད། །ཡང་དག་ལམ་ལ་འགྲོ་འདྲེན་པའི། །སྐྱོབ་པ་དམ་ཆོས་གཏན་གྱི་སྐྱབས། །མི་འབྲལ་བ་ནི་བསྒྲུབ་པོ་སྟེ། །བསྟན་པའི་དོན་དང་དེ་མི་འབྲལ། །དེ་ལ་བསྟེན་ན་དེ་འདྲར་འགྱུར། །འདྲེན་པ་དགེ་འདུན་གཏན་གྱི་སྐྱབས། །སྟོན་པ་སངས་རྒྱས་དང་ནི་སྐྱོབས་པ་དམ་པའི་ཆོས། །འདྲེན་པ་དགེ་འདུན་ཆེ་སྟེ་ཐར་བ་འདོད་པའི་སྐྱབས། །འདི་ལ་སུ་བསྟེན་དུས་རྣམ་ཀུན་ཏུ་མི་བསླུ་བ། །ཡང་དག་སྐྱབས་གསུམ་རྣམ་པར་བཞག་པ་དེ་ལྟར་ཡིན། །འཁོར་བ་འདི་ནི་སྡུག་བསྔལ་ཁྱིམ། །འདིས་ནི་སྡུག་བསྔལ་མི་སྐྱེད་མེད། །འདི་ལས་ངེས་པར་ཐར་འདོད་པའི། །བློ་འདི་སོ་ཐར་སྡོམ་པ་ཡིན། ། ཁམས་གསུམ་འགྲོ་འདི་ཕ་དང་མ། །འདི་ལ་དྲིན་གྱིས་མ་བསྐྱངས་མེད། །འདི་ཀུན་སངས་རྒྱས་ཐོབ་འདོད་པའི། །བློ་འདི་བྱང་སེམས་སྡོམ་པ་ཡིན། །སྣོད་དང་བཅུད་འདི་དག་པའི་ཞིང་། ། འདི་ན་མ་དག་སྣང་བ་མེད། །སྣང་སྲིད་དཀྱིལ་འཁོར་འཁོར་ལོ་རུ། །ཤེས་པ་གསང་སྔགས་སྡོམ་པ་ཡིན། །ངེས་འབྱུང་སོ་ཐར་ཡིན་ཏེ་གཞན་ཕན་བྱང་སེམས་ཡིན། །དག་སྣང་གསང་སྔགས་ཡིན་ཏེ་གཞན་ལ་གནོད་པ་དང་། །རང་དོན་ཡིད་ལ་བྱེད་དང་མཚན་མའི་རྟོག་པ་སྡོམ། ། ཡང་དག་སྡོམ་གསུམ་རྣམ་པར་བཞག་པ་དེ་ལྟར་ཡིན། །འཁོར་བ་མེ་ཡི་འོབས་ལྟར་ལྟ། །རང་གི་དོན་ལ་གཙོ་བོར་འཛིན། །མྱ་ངན་འདས་པ་དོན་གཉེར་བ། །ཐེག་པ་དམན་པ་ཡིན་ཤེས་བྱ། ། འགྲོ་ཀུན་དྲིན་ཅན་ཕ་མར་ལྟ། །གཞན་གྱི་དོན་ལ་གཙོ་བོར་འཛིན། །ཐམས་ཅད་མཁྱེན་པ་དོན་གཉེར་བ། །ཐེག་པ་ཆེན་པོ་ཡིན་པར་བརྗོད། །འཁོར་འདས་མཉམ་པ་ཉིད་དུ་ལྟ། །རང་གཞན་དོན་གཉིས་མཉམ་དུ་བསྒྲུབ། །ལྷུན་གྱིས་གྲུབ་པ་མངོན་བྱེད་པ། །ཐེག་པ་བླ་ན་མེད་པ་ཡིན། །རང་དོན་གཞན་དོན་གཉིས་དོན་མཆོག་གང་ཡིན། །བློ་ཆུང་བློ་འབྲིང་བློ་སྟོབས་ཆེན་པོ་ཡིས། །འཁོར་བར་འཇིགས་བཅས་འཇིགས་མེད་འཇིགས་བྲལ་བས། །སྒྲུབ་པ་ཡང་དག་ཐེག་གསུམ་རྣམ་བཞག་ཡིན། །སྐྱབས་གསུམ་བླ་མ་རྗེ་ལ་འདུས། །སྡོམ་གསུམ་རྣམ་རྟོག་སྤང་ལ་འདུས། །ཐེག་གསུམ་རང་སེམས་འདུལ་ལ་འདུས། །ཐམས་ཅད་ཆོས་ཉིད་རྟོགས་ལ་འདུས། །ཡང་དག་བླ་མ་མཆོག་ནི་དཀོན་མཆོག་གསུམ་གྱི་ངོ་བོ་སྟེ། །རང་སེམས་རྣམ་རྟོག་ཞི་ན་སྡོམ་པ་གསུམ་པོ་དེ་ལ་ཚང་། །སེམས་འདི་ཆོས་ཀྱིས་ཐུལ་ན་ཐེག་གསུམ་གནད་དོན་དེ་ལས་མེད། །རང་སེམས་ཆོས་ཉིད་རྟོགས་ན་རྟོག་ཞི་རྒྱུད་ཐུལ་ཐུགས་ཡིད་འདྲེས། །ཆོས་སྐུའི་དབྱིངས་ན་དབྱེར་མེད་ཅིང་། །ལོངས་སྐུ་བསྐྱེད་རྫོགས་ཟུང་དུ་འཇུག །སྤྲུལ་སྐུའི་ཐུགས་རྗེས་འགྲོ་ལ་དགོངས། །བླ་མའི་ཐུགས་ནི་སངས་རྒྱས་ཡིན། །ཉོན་མོངས་འདུལ་བ་གཙོར་བྱས་ནས། །ཆོས་ཀུན་གནད་དོན་མདོ་རུ་བསྡུས། །ཆོས་ཉིད་གནས་ལུགས་མངོན་དུ་སྟོན། །བླ་མའི་གསུང་ནི་སྡེ་སྣོད་ཆོས། །ཉན་ཐོས་ཚུལ་དུ་ཞི་ཞིང་དུལ། །བྱང་སེམས་ཚུལ་དུ་གཞན་ཕན་སྤྱོད། །དཔའ་བོ་དཔའ་མོའི་གྲོང་ཁྱེར་ཕྱིར། །སྐུ་ནི་ཐེག་གསུམ་དགེ་འདུན་ནོ། །ཐུགས་ནི་སངས་རྒྱས་གསུང་ནི་དམ་ཆོས་སྐུ་དགེ་འདུན། །དེ་སླད་བླ་མ་ཉག་གཅིག་དཀོན་མཆོག་ཀུན་འདུས་པར། །ཤེས་ནས་མི་འབྲལ་གཙུག་གི་རྒྱན་དུ་རྟག་བསྟེན་པ། །དེ་ལ་སྐྱབས་གསུམ་བྱིན་རླབས་ཀུན་འཇུག་སྦྱར་སྨན་བཞིན། །གཙང་དང་བདེ་དང་བདག་རྟག་པར། །ལྟ་བ་ཚུལ་བཞིན་མིན་ཡིད་བྱེད། །འདི་ནི་ཉེས་ཀུན་རྩ་བ་སྟེ། །རྟོག་པ་འདི་སྤངས་སོ་སོར་ཐར། །རང་ལ་གཅེས་པར་ལྟ་བ་དང་། །གཞན་ལ་དེ་ལྟར་མ་ཡིན་པ། །འདི་ནི་རང་དོན་ཡིད་བྱེད་དེ། །རྣམ་རྟོག་དེ་སྤངས་བྱང་ཆུབ་སེམས། །ཐ་མལ་སྣང་བ་ལ་ཞེན་དང་། །གྱ་ནོམ་པ་ཡི་ལྷར་ཞེན་པ། ། འདི་ནི་མཚན་མ་ཡིད་བྱེད་དེ། །རྣམ་རྟོག་དེ་སྤངས་སྔགས་སྡོམ་ཡིན། །ཚུལ་བཞིན་མ་ཡིན་ཡིད་ལ་བྱེད་མིན་རང་དོན་ཡིད་ལ་བྱེད་མ་ཡིན། །མཚན་མའི་རྣམ་རྟོག་ཡིད་ལ་བྱེད་མིན་གང་ཡང་ཡིད་ལ་མི་བྱེད་པའི། །རྣམ་རྟོག་མེད་འདིར་སྡོམ་གསུམ་ཀུན་འདུས་རྣམ་པར་དག་ཅིང་འཇུག་པ་སྟེ། །རྒྱ་མཚོ་ཆེ་ལ་ཆུ་བོ་ཇི་བཞིན་རང་གི་ངང་གིས་དབྱེར་མེད་དོ། །ཁམས་གསུམ་གནས་ལ་མ་ཆགས་ཤིང་། །སྲེད་དང་ལེན་པ་དྲུང་ནས་འབྱིན། །གཙོ་བོར་འདོད་ཆགས་སེམས་འདུལ་བ། །ཐེག་པ་དམན་པ་ཉིད་ཡིན་ནོ། །སྙིང་རྗེས་འགྲོ་ལ་རྗེས་སུ་ཆགས། ། བྱམས་པ་ཆེན་པོའི་དགོངས་པ་ཡིན། །གཙོ་བོར་ཞེ་སྡང་སེམས་འདུལ་བ། །ཐེག་པ་ཆེན་པོ་ཡིན་ཞེས་བྱ། །ཐབས་མཁས་བསྐྱེད་རྫོགས་ཟུང་དུ་འཇུག །མཉམ་པ་ཆེན་པོའི་ཏིང་འཛིན་གྱིས། །རྣམ་རྟོག་གཏི་མུག་གཙོར་འདུལ་བ། །ཐེག་པ་བླ་ན་མེད་པ་ཉིད། །བདག་མེད་ཤེས་ན་སུ་ཞིག་ཆགས་སྟེ་བདག་གཞན་མཉམ་ན་སུ་ལ་སྡང་། །བདག་དང་གཞན་མེད་བློ་ཡི་ཆོས་དེ་བློ་འདས་ཀློང་ན་གཉིས་སུ་མེད། །དེ་འདྲ་གྱུར་ན་སེམས་ཐུལ་ཞེས་བྱ་ཆོས་རྣམས་ཀུན་ལ་རང་དབང་བསྒྱུར། །དེ་ཡི་ཕྱིར་ན་སེམས་འདུལ་བ་ལ་ཐེག་གསུམ་འདུ་སྟེ་ཐ་མི་དད། །སེམས་ཀྱི་ཆོས་ཉིད་ལེགས་རྟོགས་ན། །སྐྱབས་གསུམ་རང་གི་སེམས་སུ་ཤེས། །བླ་མ་མཆོག་དང་ཐུགས་ཡིད་འདྲེས། །དེ་ཕྱིར་འདི་ལ་འདུས་ཞེས་བྱ། །སེམས་ཀྱི་ཆོས་ཉིད་ལེགས་རྟོགས་ན། །རྣམ་རྟོག་རང་ཤར་རང་སར་ཞི། །རྣམ་རྟོག་ཡེ་ཤེས་རྒྱུན་མི་འཆད། །དེ་ཕྱིར་འདི་ལ་འདུས་ཞེས་བྱ། ། སེམས་ཀྱི་ཆོས་ཉིད་ལེགས་རྟོགས་ན། །སྣང་སེམས་གཉིས་ལ་རང་དབང་བསྒྱུར། །ཆོས་ཉིད་ཀློང་དུ་ཆོས་ཅན་ཐུལ། །དེ་ཕྱིར་འདི་ལ་འདུས་ཞེས་བྱ། །ཆོས་ཉིད་ཀློང་ན་བླ་མའི་ཐུགས་དང་རང་གི་སེམས་ཉིད་ཐ་མི་དད། །དེ་ལ་གནས་ན་རྣམ་རྟོག་ཀུན་ཞི་དུག་གསུམ་འཁྲུལ་བ་ལེགས་པར་ཐུལ། །སྤང་གཉེན་རོ་གཅིག་རྟོགས་པའི་ངང་ནས་སྙིང་རྗེས་འགྲོ་ལ་ལྷག་པར་བརྩེ། ། ཆོས་ཉིད་རྟོགས་ལ་ཆོས་ཀུན་འདུ་སྟེ་ནམ་མཁའི་ཀློང་ན་སྣོད་བཅུད་བཞིན། །ཇི་སྙེད་སངས་རྒྱས་ཐམས་ཅད་ཀྱང་། །ཆོས་སྐུའི་ཀློང་ན་ཐ་མི་དད། །ཇི་སྙེད་བླ་མ་ཐམས་ཅད་ཀྱང་། །སྤྲུལ་གཞིའི་ཀློང་ན་ཐ་མི་དད། །བླ་མ་ཐམས་ཅད་སངས་རྒྱས་ཏེ། །དགོངས་པ་ཆོས་སྐུ་འདུ་འབྲལ་མེད། །སངས་རྒྱས་ཐམས་ཅད་བླ་མ་སྟེ། །གང་འདུལ་གདུལ་བྱར་དེ་ལྟར་སྣང་། །ཆོས་ཀྱི་དབང་གི་ཟླ་བ་གཅིག །ཡང་ཡང་ཆེ་ཆུང་སྣ་ཚོགས་འཆར། །གདུལ་བྱའི་དབང་གིས་བླ་མ་གཅིག །ཡང་ཡང་རྣམ་རོལ་དུ་མས་བྱོན། །ཆུ་སྣོད་དབང་གིས་ཟླ་བ་གཅིག །དུས་གཅིག་ཟླ་གཟུགས་དུ་མར་སྣང་། །འགྲོ་བློའི་དབང་གིས་བླ་མ་གཅིག །དུས་མཉམ་བླ་མ་དུ་མར་སྣང་། ། སྤྲིན་གྱིས་དབང་གིས་ཟླ་བ་གཅིག །འོད་ཟེར་གསལ་འགྲིབ་དུ་མར་སྣང་། །རྣམ་རྟོག་དབང་གིས་བླ་མ་གཅིག །བཟང་ངན་སྐྱོན་ཡོན་དུ་མར་སྣང་། །ལས་ཀྱི་དབང་གིས་ཟླ་བ་གཅིག ། བསིལ་བྱེད་གདུང་བྱེད་སོ་སོར་སྣང་། །བསམ་པའི་དབང་གིས་བླ་མ་གཅིག །དད་དང་ལོག་ལྟའི་གཞི་རུ་སྣང་། །ཉིན་མཚན་དབང་གིས་ཟླ་བ་གཅིག །འཆར་དང་འགྲིབ་པ་ལྟ་བུ་སྣང་། ། འགྲོ་དོན་དབང་གིས་བླ་མ་གཅིག །གཤེགས་དང་བཞུགས་པ་ལྟ་བུར་སྣང་། །བླ་མ་ཀུན་གྱི་སྐུ་གཅིག་པོ། །རྩ་བའི་བླ་མ་སངས་རྒྱས་དངོས། །རང་སེམས་ཆོས་སྐུར་ངོ་སྤྲོད་པ། །བཀའ་དྲིན་སངས་རྒྱས་ཀུན་ལས་ལྷག །བརྒྱུད་གསུམ་བླ་མ་ཀུན་ཀྱང་ངོ་བོ་གཅིག །ཐ་དད་བླ་མ་ཀུན་ཀྱང་དབྱེ་བ་མེད། །མཛད་པ་ཐ་དད་མེད་ཅིང་གཤེགས་བཞུགས་མེད། །གང་ལས་བཀའ་དྲིན་ཐོབ་པ་དེ་རྩ་བ། །གཞན་དོན་མཛད་པ་བླ་མ་སྟེ། །རང་དོན་བསྒྲུབ་པ་བླ་མ་མིན། །ཐེག་གསུམ་ ཆོས་སྟོན་བླ་མ་སྟེ། །ཆོས་མིན་སྟོན་ན་བླ་མ་མིན། །སློབ་མའི་སེམས་འདུལ་བླ་མ་སྟེ། །སེམས་མི་འདུལ་ན་བླ་མ་མིན། །དགེ་ལ་སྦྱོར་ན་བླ་མ་སྟེ། །དགེ་ལ་མི་སྦྱོར་བླ་མ་མིན། །འབྲེལ་ཚད་དོན་ལྡན་བླ་མ་སྟེ། །དོན་དང་མི་ལྡན་བླ་མ་མིན། །སྙིང་ར文ྗེའི་ཐུགས་ལྡན་བླ་མ་སྟེ། །སྙིང་རྗེ་མེད་ན་བླ་མ་མིན། །ཡིན་པའི་བླ་མ་ཇི་སྙེད་པ། །མཚན་དང་རྣམ་འགྱུར་ཐ་དད་ཀྱང་། །ཆོས་སྐུ་མཉམ་ཞིང་ཕྲིན་ལས་མཉམ། །ཐུགས་བཞེད་མཉམ་ཞིང་འགྲོ་ཕན་མཉམ། །གཞན་དོན་ཆོས་སྟོན་སློབ་མའི་སེམས་རྒྱུད་འདུལ། །འབྲེལ་ཚད་ཡང་དག་དགེ་བའི་ལམ་དགོད་ཅིང་། །འདི་ཡིས་རྩ་བ་སྙིང་རྗེའི་ཐུགས་ལྡན་པ། །བླ་མ་ཡིན་ཏེ་ཇི་སྙེད་ཀུན་ཀྱང་མཉམ། །བླ་མ་བསྟེན་དང་བླ་མ་སྒྲུབ། །འདི་ལ་ཆོས་སྒོ་བརྒྱད་ཁྲི་འདུས། །འདི་ཡི་གནད་གཅིག་མཐར་ཐུག་པ། ། མོས་གུས་དཀར་པོ་གཅིག་ཐུབ་ཡིན། །ཆོས་རྣམས་ཀུན་གྱི་སྒོ་འབྱེད་ཅིང་། །ཉམས་ལེན་ཀུན་གྱི་གེགས་སེལ་ལ། །གདམས་ངག་ཀུན་གྱི་བོགས་འདོན་པ། །མོས་གུས་ཡིན་ཞེས་ཤེས་པར་བྱ། །ཐུགས་རྗེ་ཀུན་གྱི་ཐུགས་བསྐུལ་ཞིང་། །བྱིན་རླབས་ཀུན་གྱི་སྣོད་དུ་འགྱུར། །དངོས་གྲུབ་ཀུན་གྱི་བཅུད་བསྡུས་པ། །མོས་གུས་དཀར་པོ་གཅིག་ཐུབ་ཡིན། །བདུད་རྣམས་ཀུན་གྱིས་མི་ཐུབ་ཅིང་། །བར་ཆད་ཀུན་གྱིས་མི་ཚུགས་ལ། །སྒྲིབ་པ་ཐམས་ཅད་རང་འདག་པ། །མོས་གུས་ཡིན་ཞེས་ཤེས་པར་བྱ། །བསམ་པ་ལོག་པ་མི་སྐྱེ་ཞིང་། །འཆི་བའི་ཚེ་ན་གནད་གཅོད་མེད། ། བར་དོའི་འཁྲུལ་སྣང་ཞི་བྱེད་པ། །མོས་གུས་ཡིན་པར་ཤེས་པར་བྱ། །ཚེ་འདིར་དམ་པས་རྗེས་སུ་འཛིན། །འཆི་ཁ་བླ་མའི་སྣང་བ་འཆར། །ཕྱི་མ་དག་པའི་ཞིང་འགྲོ་བ། །མོས་གུས་ཡིན་པར་ཤེས་པར་བྱ། །སྐྱབས་གནས་ཀུན་དང་འདུ་འབྲལ་མེད། །ཅི་བསམ་དོན་རྣམས་ལྷུན་གྱིས་གྲུབ། །མཐར་ཐུག་རང་གཞན་དོན་གཉིས་འགྲུབ། །མོས་གུས་ཡིན་ཞེས་ཤེས་པར་བྱ། །དགེ་སེམས་རྣམ་རྟོག་གོང་དུ་འཕེལ། །ས་ལམ་རྟོགས་པ་ངང་གིས་སྐྱེ། །མཐར་ཐུག་ཐུགས་ཡིད་གཅིག་འདྲེས་པ། །མོས་གུས་ཡིན་ཞེས་ཤེས་པར་བྱ། །བླ་མའི་མོས་གུས་འདི་ཁོ་ན། །མི་འགྱུར་བླ་མ་བསྟེན་བསྒྲུབས་ན། །ཞེ་ས་བྱས་ཀྱང་མ་བྱས་ཀྱང་། །གསོལ་བ་བཏབ་ཀྱང་མ་བཏབ་ཀྱང་། །གདམས་ངག་གནད་འདུས་བྱིན་རླབས་ཀུན་འཇུག་བར་ཆད་སེལ། །སྐྱེ་འཆི་བར་དོའི་འཁྲུལ་སྣང་སེལ་ཞིང་འདི་ཕྱིར་བདེ། །བསམ་ཀུན་འགྲུབ་ཅིང་མཐར་ཐུག་སངས་རྒྱས་ཐོབ་འགྱུར་བ། །མོས་གུས་ཡིན་ཏེ་གདམས་ངག་སྟོང་གི་གནད་གཅིག་ཡིན། །བླ་མ་བསྟེན་ཐབས་མོས་གུས་ཡིན་ཏེ་ཞེ་ས་མིན། །བླ་མ་སྒྲུབ་ཐབས་མོས་གུས་ཡིན་ཏེ་གསོལ་འདེབས་མིན། །མོས་གུས་ཡོད་ན་ཇི་ལྟར་བྱས་ཀྱང་བྱིན་རླབས་འཇུག །མོས་གུས་མེད་ན་ཇི་ལྟར་བྱས་ཀྱང་ཕན་པ་མེད། །སྡོམ་པ་གསུམ་དང་ཐེག་པ་གསུམ། །མིང་དུ་ཐ་དད་དོན་དུ་གཅིག །རྣམ་རྟོག་སྤང་དང་རང་རྒྱུད་འདུལ། །མིང་དུ་ཐ་དད་དོན་དུ་གཅིག །དེ་ཕྱིར་གཅིག་ལ་ཀུན་འདུས་པ། །བླ་མའི་གདམས་པས་རང་རྒྱུད་འདུལ། །འདི་ན་ཆུ་བརྒྱ་ཟམ་གཅིག་འོག ། གཅིག་ཏུ་དྲུག་འདུས་དགུ་ཡང་འདུས། །རྒྱུད་ཅེས་བྱ་བ་རྣམ་རྟོག་སྟེ། །རྣམ་རྟོག་མིན་པའི་རྒྱུད་མི་རྙེད། །རྣམ་རྟོག་འདུལ་ལ་ཆོས་ཀྱི་སྒོ། །བརྒྱད་ཁྲི་དང་ནི་བཞི་སྟོང་འདུས། །འདི་ལྟར་འཁོར་བར་སྣང་བ་ཡང་། །རྣམ་པར་རྟོག་པས་བཏགས་པ་ཙམ། །འདི་ལྟར་མྱ་ངན་འདས་པ་ཡང་། །རྣམ་པར་རྟོག་པས་བཏགས་པ་ཙམ། །དེ་བཞིན་དགེ་སྡིག་རྣམ་རྟོག་སྟེ། །ལམ་དང་ལམ་མིན་རྣམ་པར་རྟོག །བདག་དང་བདག་མེད་རྣམ་རྟོག་ཙམ། །ལྟ་བ་གྲུབ་མཐའ་ཀུན་རྣམ་རྟོག །དེ་ཕྱིར་རྣམ་པར་རྟོག་འདུལ་བ། །འདི་ནི་སྔ་ཕྱི་ཀུན་གྱི་གནད། །སྔར་ཡང་བསྟན་ཏེ་ད་དུང་སྟོན། །དོན་ཆེའི་ཕྱིར་ན་བསྐྱལ་ཞིང་འཆད། །རྣམ་རྟོག་ཇི་ལྟར་འདུལ་ཞེ་ན། །དང་པོ་རྣམ་རྟོག་ཕྱེ་ཞིང་འདུལ། །བར་དུ་རྣམ་རྟོག་བལྟ་ཞིང་འདུལ། །ཐ་མ་རྣམ་རྟོག་བཞག་ཅིང་འདུལ། ། དང་པོ་རྣམ་རྟོག་དཀར་ནག་ཕྱེ། །དཀར་པོ་སྤེལ་ཞིང་ནག་པོ་བསལ། །དད་དང་བྱང་སེམས་ཤེས་རབ་དཀར། །ཆགས་དང་སྡང་དང་གཏི་མུག་ནག །དཀར་གསུམ་ཐར་བའི་ཕྱོགས་ཡིན་ཏེ། །གཅིག་ཏུ་དགེ་ཞིང་འཕྲལ་ཕུག་དགེ །ནག་གསུམ་སྡིག་པའི་ཕྱོགས་ཡིན་ཏེ། །གཅིག་ཏུ་སྡིག་ཅིང་འཕྲལ་ཕུག་སྡིག །དད་པས་དགེ་རྩ་ཀུན་སྡུད་ཅིང་། །བྱང་སེམས་ཐེག་ཆེན་ཀུན་གྱི་གཞི། །ཤེས་རབ་ཐར་ལམ་ཀུན་རྩ་བ། །དེ་ཕྱིར་གསུམ་པོ་བསྐྱེད་པར་བྱ། །ཆགས་པས་སྲིད་པ་ཀུན་འཛིན་ཏེ། །སྡང་བས་སྡུག་བསྔལ་ཐམས་ཅད་བསྐྱེད། །རྨོངས་པ་ཆགས་སྡང་འབྲས་བཅས་གཞི། །དེ་ཕྱིར་འདི་གསུམ་སྤང་བར་བྱ། །ཡང་དག་ཆོས་ལ་ཡིད་ཆེས་དད་པ་སྟེ། ། གཞན་དོན་སངས་རྒྱས་འདོད་པ་བྱང་ཆུབ་སེམས། །ཆོས་ཀུན་བདེན་མེད་རྟོགས་པ་ཤེས་རབ་མཆོག །འདི་གསུམ་དུག་གསུམ་སྦྱོང་ཞིང་སྒྲིབ་གཉིས་སེལ། །བར་དུ་རྣམ་རྟོག་བལྟ་ཞིང་འདུལ། །ཁ་ཡན་མི་བཏང་དྲན་པས་བཟུང་། །འོག་འགྱུ་མ་ཤོར་ཤེས་བཞིན་སྐྱོངས། །ངོས་ཟིན་དུས་ན་རང་ངོ་བལྟ། །འདི་ལ་བལྟས་པ་ཙམ་གྱིས་སྟོང་། །འདི་ལ་དཔྱོད་པ་འཇུག་མི་དགོས། ། འགྱུ་འཕྲིག་དངོས་མེད་ངོ་བོས་སྟོང་། །སྟོང་པའི་རང་བཞིན་རང་འོད་གསལ། །སེམས་ཀྱི་སྟོང་ཉིད་འདི་ཤེས་ན། །ཆོས་རྣམས་ཀུན་གྱི་སྟོང་ཉིད་ཤེས། །སྣ་ཚོགས་ཡུལ་ལ་དཔྱད་མི་དགོས། ། རྩ་བ་ཆོད་ན་ཡལ་ག་སྐམ། །སེམས་འདི་ཆོས་རྣམས་ཀུན་གྱི་གཞི་ཡིན་པས། །སེམས་ཀྱི་སྟོང་ཉིད་ཆོས་རྣམས་ཀུན་གྱི་ཡིན། །འདི་ནི་བལྟས་མ་ཐག་ཏུ་རང་སྟོང་སྟེ། །འདི་ལ་དཔྱད་པ་མང་པོའི་ལོང་མེད་དོ། །མཐར་ནི་སེམས་ཀྱི་རང་ཞལ་མཇལ། །བརྗོད་དུ་མེད་ཅིང་བསམ་དུ་མེད། ། གཏད་སོ་མེད་ཅིང་རྟོད་ཕུར་མེད། །འོད་གསལ་བ་ཞེས་དེ་ལ་བྱ། །འདི་ཡིན་མེད་པའི་དོན་རྟོགས་ན། །གཟའ་གཏད་མེད་པའི་ཉམས་མྱོང་འབྱུང་། །རྟོགས་དང་མ་རྟོགས་སུ་ཡིས་ཤེས། ། རྟོགས་བྱ་རྟོགས་བྱེད་གང་དུ་ཚོལ། །དེ་ཚེ་རྣམ་རྟོག་སྤོང་མི་དགོས། །སྦྱང་ཡང་མི་དགོས་སྒྱུར་མི་དགོས། །ལམ་དུ་མི་བྱེད་གྲོལ་མི་དགོས། །རང་སར་བཞག་ན་རང་སར་གྲོལ། །སྣང་དུས་སྟོང་ཞིང་སྟོང་དུས་སྣང་། །སྣང་སྟོང་དབྱེར་མེད་རང་འོད་གསལ། །གསལ་བའི་ཐུགས་རྗེ་འགགས་པ་མེད། །གཟུང་འཛིན་རང་གྲོལ་ཡེ་ཤེས་ངང་། །དྲི་མེད་སེམས་ཀྱི་རང་བཞིན་འོད་གསལ་བ། །གཟུང་འཛིན་གཉིས་མེད་ཆོས་ཉིད་བྱང་ཆུབ་སེམས། །ལྷན་སྐྱེས་བདེ་ཆེན་བདེན་པ་འདི་མཐོང་བ། །མོས་གུས་བླ་མའི་ལམ་གྱི་དངོས་འབྲས་ཡིན། །སེམས་ཀྱི་འདུལ་ཐབས་ཐམས་ཅད་ཀྱི། །རྩ་བ་དྲན་པ་ཁོ་ན་སྟེ། །དང་པོ་འཇུར་དྲན་བར་དུ་ཀློད། །ཐ་མ་དྲན་མེད་འོད་གསལ་ངང་། །དྲན་པ་ཁོ་ནས་སྡིག་ཀུན་སྤོང་། །དྲན་པ་ཁོ་ནས་དགེ་ཀུན་སྡུད། །དྲན་པ་ཁོ་ནས་རང་སེམས་འདུལ། །དྲན་པ་ཆོས་ཀུན་རྩ་བ་ཡིན། །མང་པོའི་ནང་དུ་དྲན་པ་བརྟེན། ། གཅིག་པུར་འདུག་ཀྱང་དྲན་པ་བརྟེན། །དུས་རྣམས་ཀུན་ཏུ་དྲན་པ་བརྟེན། །སྐད་ཅིག་མི་ཡེངས་དྲན་པ་བརྟེན། །མོས་གུས་སྣ་ཐག་བླ་མའི་ཕྱག་ཏུ་གཏོད། །དྲན་པའི་རྟོད་ཕུར་ཡེངས་མེད་གཞི་ལ་བཏབ། །སྣ་ཚོགས་ཐབས་ཀྱིས་རང་གི་སེམས་འདུལ་བ། །སྐྱེས་བུ་མཆོག་དེ་ཐེག་ཆེན་བཞོན་པས་འགྲོ། །རྣམ་པར་དབྱེ་བ་གཞུང་ཡིན་ཏེ། །གནད་དུ་བསྡུས་པ་མན་ངག་ཡིན། །གཞུང་དང་མན་ངག་ཀུན་བསྡུས་ནས། །འདི་ལྟར་སྨྲ་ཤེས་བླ་མའི་དྲིན། །འདི་སྨྲས་དགེ་བ་གང་ཡིན་ལ། །བསྐུལ་བ་པོ་ཡི་ཐུགས་རྒྱུད་དང་། །འདྲེས་ནས་རྣམ་པ་ཀུན་མཁྱེན་པའི། །

གོ་འཕང་བར་དུ་འབྲལ་མེད་ཤོག །ཅེས་མདོ་སྨད་ཀྱི་མཁས་པ་ཆེན་པོ་ཤུ་བྷཾ་ཤྲཱི་ཞེས་བྱ་བས་འཇམ་པའི་དབྱངས་ཀེང་རུས་མཆེ་བ་གཙིག་པའི་ཕོ་བྲང་དུ་སྦྱར་བ་རྫོགས་སོ།། །།