JKW-KABUM-09-TA-001-012

🚧 This website is under continued development. We appreciate your patience!

First section in volume. Back to Volume PageLast section in volume.

Wylie title		page=1
Location	mkhyen brtse'i bka' 'bum Volume 1, sde tshan 12, Pages (Folios to )
Author	འཇམ་དབྱངས་མཁྱེན་བརྩེའི་དབང་པོ་
Less details More details
Citation
Genre	Collected Works - Selected - bka' 'bum

Tibetan Text

Wylie

[edit]

གཙུག་ཏོར་རྣམ་པར་རྒྱལ་མ་ལྷ་དགུའི་སྒོམ་བཟླས་སྙིང་པོ་བསྡུས་པ་འཆི་མེད་གྲུབ་པའི་འཇུག་ངོགས། ༄༅། །གཙུག་ཏོར་རྣམ་པར་རྒྱལ་མ་ལྷ་དགུའི་སྒོམ་བཟླས་སྙིང་པོ་བསྡུས་པ་འཆི་མེད་གྲུབ་པའི་འཇུག་ངོགས་ཞེས་བྱ་བ་བཞུགས་སོ། །ན་མོ་གུ་རུ་བྷྱཿ བསྡུས་པའི་ཚུལ་གྱིས་གཙུག་ཏོར་རྣམ་རྒྱལ་བསྒོམ་པར་འདོད་པས། སྐྱབས་སེམས་ཚད་མེད་བཞི་སྤྱི་ལྟར་སྔོན་དུ་སོང་ནས། ཨོཾ་ཤཱུནྱ་ཏཱ་ཛྙཱ་ན་བཛྲ་སྭ་བྷཱ་བ་ཨཱཏྨ་ཀོ྅ཧཾ། སྟོང་པའི་ངང་ལས་པྃ་ལས་པདྨ་དང་། །ཨ་ལས་ཟླ་སྟེང་བྷྲཱུྃ་ཡིག་ཡོངས་གྱུར་ལས། །རྣམ་རྒྱལ་མཆོད་རྟེན་མཚན་ཉིད་ཡོངས་རྫོགས་པའི། །བུམ་པའི་ནང་དུ་པད་ཟླར་རང་སེམས་བྷྲཱུྃ། །དེ་ལས་སྣ་ཚོགས་རྡོ་རྗེའི་ལྟེ་བའི་དབུས། །བྷྲཱུྃ་ཡིག་དཀར་པོས་མཚན་ལས་འོད་ཟེར་འཕྲོས། །འཕགས་མཆོད་སེམས་ཅན་དོན་བྱས་ཚུར་འདུས་པས། །རང་ཉིད་གཙུག་ཏོར་རྣམ་རྒྱལ་སྟོན་ཟླའི་མདོག །དཀར་སེར་སྔོ་བའི་ཞལ་གསུམ་ཕྱག་བརྒྱད་མ། །ཞལ་རེར་རབ་ཏུ་རྒྱས་པའི་སྤྱན་གསུམ་མཛེས། །ཕྱག་གཡས་དང་པོས་སྣ་ཚོགས་རྡོ་རྗེ་དང་། །གཉིས་པས་པད་དཀར་ལ་གནས་འོད་དཔག་མེད། །གསུམ་པས་མདའ་དང་བཞི་པས་མཆོག་སྦྱིན་མཛད། །གཡོན་གྱི་དང་པོས་རྡོ་རྗེའི་ཞགས་པ་དང་། །གཉིས་པས་གཞུ་དང་གསུམ་པས་སྐྱབས་སྦྱིན་རྒྱ། །བཞི་པས་མཉམ་གཞག་བདུད་རྩིའི་བུམ་བཟང་བསྣམས། །དར་དང་རིན་ཆེན་རྒྱན་རྫོགས་སྐྱིལ་ཀྲུང་བཞུགས། །གཡས་སུ་ཟླ་བའི་སྟེང་དུ་སྤྱན་རས་གཟིགས། །སྐུ་མདོག་དཀར་པོ་ཕྱག་གཡོན་པདྨ་བསྣམས། །གཡོན་དུ་ཉི་མར་ཕྱག་ན་རྡོ་རྗེ་སྔོ། །ཕྱག་གཡོན་ཨུཏྤལ་ལ་གནས་རྡོ་རྗེ་འཛིན། །གཉིས་ཀས་གཡས་པས་རིན་ཆེན་རྔ་ཡབ་གཡོབ། །ཞི་ཚུལ་བཞེངས་སྟབས་དར་དང་རིན་ཆེན་བརྒྱན། །ཤར་དུ་མི་གཡོ་སྔོན་པོ་རལ་གྲི་དང་། །ལྷོ་རུ་འདོད་རྒྱལ་སྔོན་པོ་ལྕགས་ཀྱུ་གདེངས། །ནུབ་ཏུ་དབྱུག་སྔོན་སྔོན་པོ་དབྱུག་པ་དང་། །བྱང་དུ་སྟོབས་ཆེན་སྔོན་པོ་རྩེ་གསུམ་འཕྱར། །ཀུན་ཀྱང་གཡོན་པས་ཐུགས་ཀར་སྡིགས་མཛུབ་མཛད། །རིན་ཆེན་སྦྲུལ་རྒྱན་སྟག་ལྤགས་ཤམ་ཐབས་ཅན། །པད་ཉིའི་གདན་ལ་གཡོན་བརྐྱང་ཁྲོས་པའི་ཚུལ། །གཙོ་མོའི་སྟེང་གི་ཕྱོགས་གཉིས་ལྷ་ཡི་བུ། །བདུད་རྩིའི་བུམ་པ་འཛིན་པས་སྐུ་ཁྲུས་གསོལ། །ཀུན་ཀྱང་སྤྱི་མགྲིན་ཐུགས་ཀར་ཨོཾ་ཨཱཿཧཱུྃ། །དཔྲལ་བར་ཏྲཱྃ་སེར་ལྟེ་བར་ཧྲཱིཿདམར་པོ། །བརླ་གཉིས་ཨོཾ་ཨཱཿལྗང་གུས་མཚན་པར་གྱུར། །རང་གི་ཐུགས་ཀའི་བྷྲཱུྃ་ལས་འོད་འཕྲོས་པས། ཡེ་ཤེས་སེམས་དཔའ་བཛྲ་ས་མཱ་ཛཿ ཛཿཧཱུྃ་བྃ་ཧོཿགཉིས་སུ་མེད་པར་ཐིམ། །སླར་ཡང་དབང་ལྷ་རིགས་ལྔ་སྤྱན་དྲངས་ནས། །དབང་བསྐུར་སྒྲིབ་དག་གཙོ་མོར་རྣམ་སྣང་དང་། །སྤྱན་རས་གཟིགས་ལ་བཅོམ་ལྡན་འོད་དཔག་མེད། །ཕྱག་རྡོར་ཁྲོ་བོ་བཞི་ལ་མི་བསྐྱོད་པ། །ལྷ་བུ་གཉིས་ལ་རིན་ཆེན་འབྱུང་ལྡན་གྱིས། །དབུར་བརྒྱན་དབང་ལྷ་རྣམས་ཀྱང་རང་ལ་ཐིམ། །ཨོཾ་སརྦ་ཏ་ཐཱ་ག་ཏ་ཨུཥྞཱི་ཥ་བི་ཛ་ཡ་ས་པ་རི་ཝཱ་ར་ཨརྒྷཾ་པྲ་ཏཱི་ཙྪ་སྭཱ་ཧཱ་ནས། ཤབྡའི་བར་གྱིས་མཆོད། དཔལ་ལྡན་ལྷ་མོ་སྟོན་ཀའི་ཟླ་བའི་མདོག །ཞལ་གསུམ་ཕྱག་བརྒྱད་རབ་མཛེས་ཞི་བའི་སྐུ། །ཡེ་ཤེས་དཔག་ཡས་ཚེ་ཡི་མཆོག་སྩོལ་མ། །རྣམ་པར་རྒྱལ་མའི་ཞབས་ལ་ཕྱག་འཚལ་ལོ། །ཞེས་སོགས་ཅི་ཤེས་པས་བསྟོད། །གཙོ་མོའི་ཐུགས་ཀར་པད་ཟླར་བྷྲཱུྃ་ཡིག་ལས།། སྣ་ཚོགས་རྡོ་རྗེའི་ལྟེ་བ་སྔོན་པོར་བྷྲཱུྃ། །འདི་ལ་བསྲུང་བྱ་དམིགས་བསལ་ཡོད་ན། བྷྲཱུྃ་ཡིག་གི་སྟེང་དུ་བླ་མ། མདུན་དུ་ཕ་མ། གཡས་སུ་སློབ་མ། གཡོན་དུ་སྤུན་ཟླ། རྒྱབ་ཏུ་འཁོར་གཡོག་རྣམས་བསྒོམ་པར་གསུངས་སོ། །དཀར་གསལ་གཟུངས་སྔགས་ཕྲེང་བས་བསྐོར་བ་ལས། །འོད་འཕྲོས་འཕགས་མཆོད་འགྲོ་བའི་དོན་ཀུན་བསྒྲུབས། །སྲས་བཅས་རྒྱལ་བའི་ཐུགས་རྗེའི་བྱིན་རླབས་བསྡུས། །ཐུགས་སྲོག་ལ་ཐིམ་ཚེ་བསོད་དཔལ་འབྱོར་དང་། །ལུང་རྟོགས་ཡེ་ཤེས་མཐའ་དག་རྒྱས་པར་གྱུར། །ཅེས་བརྗོད་ཅིང་བསམས་ལ། ཐལ་མོ་སྦྱར་བའི་མཛུབ་མོའི་ཚིགས་བར་པ་བཅག་སྟེ་མཐེ་བོང་གཉིས་དང་རྩེ་སྦྱར་བ་ལེགས་སོ་སྟེར་བའི་ཕྱག་རྒྱ་དང་བཅས་ཏེ་གཟུངས་རིང་ཚར་གཅིག་བརྗོད། དེ་ནས་ཕྱག་རྒྱ་བཀྲོལ་ཏེ་གཟུངས་རིང་ཐུང་གསུམ་པོ་ཅི་ནུས་དང་། མཐར། ཨོཾ་ཨ་མི་ཏེ་སོགས་གཟུངས་འབྲིང་པོའང་ཇི་ལྟར་རིགས་པ་བཟླ། ཐུན་བསྡུ་བ་ན། ཨོཾ་ཨཱཿཧཱུྃ་ཏྲཱྃ་ཧྲཱིཿཨ་ཨཱཿམ་མ་སརྦ་ས་ཏྭཱཾ་ཤྩ་རཀྵ་རཀྵ་ཀུ་རུ་སྭཱ་ཧཱ། ལན་གསུམ། བདག་བསྐྱེད་ཀྱི་ཡེ་ཤེས་པ་མདུན་མཁར་བྱོན་པ་ལ། །གོང་ལྟར་མཆོད་བསྟོད་དང་། བཅོམ་ལྡན་གཙུག་ཏོར་རྣམ་པར་རྒྱལ་མ་ཡིས། །བདག་དང་མཐའ་ཡས་སེམས་ཅན་ཐམས་ཅད་ཀྱི། །དུས་མིན་འཆི་བའི་འཇིགས་པ་ཞི་བ་དང་། །ཚེ་དང་ཡེ་ཤེས་དངོས་གྲུབ་སྩལ་དུ་གསོལ། །ཞེས་གསོལ་བ་གདབ། ཡིག་བརྒྱ་ལན་གསུམ་གྱི་མཐར། མ་འབྱོར་པ་དང་སོགས་ཀྱིས་ནོངས་པ་བཤགས། ཨོཾ་བཛྲ་མུཿ ཡེ་ཤེས་འཁོར་ལོ་ཆོས་ཀྱི་དབྱིངས་སུ་གཤེགས། །དམ་ཚིག་འཁོར་དང་མཆོད་རྟེན་རང་ལ་ཐིམ། །དགེ་བ་འདི་ཡིས་བདག་སོགས་སེམས་ཅན་ཀུན། །འཆི་མེད་འཕགས་མའི་གོ་འཕང་མྱུར་ཐོབ་ཤོག །ཅེས་སོགས་བསྔོ་སྨོན་བྱས་ནས་སྤྱོད་ལམ་ལ་འཇུག །བསྙེན་པ་བྱེད་ན། ཁྲུས་དང་གཙང་སྦྲ་ལ་གནས་པས། ཐུན་རེ་བཞིན་གཟུངས་རིང་ཚར་གསུམ་སོགས་སྔོན་དུ་འགྲོ་བས་ཡི་གེ་བཅུ་པ་གཙོ་བོར་བཟླས་པས་འབུམ་ཕྲག་བཅུ་ཁ་སྐོང་དང་བཅས་པ་འགྲོ་བར་བྱ། སྔ་ཐུན་གྱི་མཇུག་ཏུ། བདག་བསྐྱེད་ཀྱི་ཡེ་ཤེས་པ་མདུན་མཁར་བྱོན་པ་ལ། བསང་སྦྱང་བྱིན་རླབས་སྤྱི་ལྟར་དང་། གཟུངས་ཀྱི་མཐར་ཨ་ཀཱ་རོ་ལན་གསུམ་བཏགས་པས་གཏོར་མ་འབུལ། མཆོད་བསྟོད་གསལ་བ་གདབ། ནོངས་པ་བཤགས། རྟེན་ཡོད་ན་བརྟན་བཞུགས་དང་། མེད་ན་གཤེགས་གསོལ་སོགས་བྱའོ། །ཞེས་པའང་འཇམ་དབྱངས་མཁྱེན་བརྩེའི་དབང་པོས་ཐམས་ཅད་མཁྱེན་པ་དཀོན་མཆོག་ལྷུན་གྲུབ་ཀྱི་གསུང་རབ་ལྟར་སྙིང་པོར་དྲིལ་ཏེ་སྦྱར་བའི་དགེ་བས་འགྲོ་ཀུན་འཆི་མེད་གྲུབ་པའི་རྒྱུར་ཅིག། །། ༈

[edit]

gtsug tor rnam par rgyal ma lha dgu'i sgom bzlas snying po bsdus pa 'chi med grub pa'i 'jug ngogs/ @#/_/gtsug tor rnam par rgyal ma lha dgu'i sgom bzlas snying po bsdus pa 'chi med grub pa'i 'jug ngogs zhes bya ba bzhugs so/__/na mo gu ru b+h+yaH__bsdus pa'i tshul gyis gtsug tor rnam rgyal bsgom par 'dod pas/__skyabs sems tshad med bzhi spyi ltar sngon du song nas/__oM shUn+ya tA dz+nyA na badz+ra swa b+hA ba At+ma ko\u0f85haM/__stong pa'i ngang las pa~M las pad+ma dang /__/a las zla steng b+h+rU~M yig yongs gyur las/__/rnam rgyal mchod rten mtshan nyid yongs rdzogs pa'i/__/bum pa'i nang du pad zlar rang sems b+h+rU~M/__/de las sna tshogs rdo rje'i lte ba'i dbus/__/b+h+rU~M yig dkar pos mtshan las 'od zer 'phros/__/'phags mchod sems can don byas tshur 'dus pas/__/rang nyid gtsug tor rnam rgyal ston zla'i mdog__/dkar ser sngo ba'i zhal gsum phyag brgyad ma/__/zhal rer rab tu rgyas pa'i spyan gsum mdzes/__/phyag g.yas dang pos sna tshogs rdo rje dang /__/gnyis pas pad dkar la gnas 'od dpag med/__/gsum pas mda' dang bzhi pas mchog sbyin mdzad/__/g.yon gyi dang pos rdo rje'i zhags pa dang /__/gnyis pas gzhu dang gsum pas skyabs sbyin rgya/__/bzhi pas mnyam gzhag bdud rtsi'i bum bzang bsnams/__/dar dang rin chen rgyan rdzogs skyil krung bzhugs/__/g.yas su zla ba'i steng du spyan ras gzigs/__/sku mdog dkar po phyag g.yon pad+ma bsnams/__/g.yon du nyi mar phyag na rdo rje sngo/__/phyag g.yon ut+pal la gnas rdo rje 'dzin/__/gnyis kas g.yas pas rin chen rnga yab g.yob/__/zhi tshul bzhengs stabs dar dang rin chen brgyan/__/shar du mi g.yo sngon po ral gri dang /__/lho ru 'dod rgyal sngon po lcags kyu gdengs/__/nub tu dbyug sngon sngon po dbyug pa dang /__/byang du stobs chen sngon po rtse gsum 'phyar/__/kun kyang g.yon pas thugs kar sdigs mdzub mdzad/__/rin chen sbrul rgyan stag lpags sham thabs can/__/pad nyi'i gdan la g.yon brkyang khros pa'i tshul/__/gtso mo'i steng gi phyogs gnyis lha yi bu/_/bdud rtsi'i bum pa 'dzin pas sku khrus gsol/__/kun kyang spyi mgrin thugs kar oM AHhU~M/__/dpral bar trA~M ser lte bar hrIHdmar po/__/brla gnyis oM AHljang gus mtshan par gyur/__/rang gi thugs ka'i b+h+rU~M las 'od 'phros pas/__ye shes sems dpa' badz+ra sa mA dzaH__dzaHhU~M ba~M hoHgnyis su med par thim/__/slar yang dbang lha rigs lnga spyan drangs nas/__/dbang bskur sgrib dag gtso mor rnam snang dang /__/spyan ras gzigs la bcom ldan 'od dpag med/__/phyag rdor khro bo bzhi la mi bskyod pa/__/lha bu gnyis la rin chen 'byung ldan gyis/__/dbur brgyan dbang lha rnams kyang rang la thim/__/oM sarba ta thA ga ta uSh+NI Sha bi dza ya sa pa ri wA ra ar+g+haM pra tI ts+tsha swA hA nas/__shab+da'i bar gyis mchod/__dpal ldan lha mo ston ka'i zla ba'i mdog__/zhal gsum phyag brgyad rab mdzes zhi ba'i sku/__/ye shes dpag yas tshe yi mchog stsol ma/__/rnam par rgyal ma'i zhabs la phyag 'tshal lo/__/zhes sogs ci shes pas bstod/__/gtso mo'i thugs kar pad zlar b+h+rU~M yig las//_sna tshogs rdo rje'i lte ba sngon por b+h+rU~M/__/'di la bsrung bya dmigs bsal yod na/__b+h+rU~M yig gi steng du bla ma/__mdun du pha ma/__g.yas su slob ma/__g.yon du spun zla/__rgyab tu 'khor g.yog rnams bsgom par gsungs so/__/dkar gsal gzungs sngags phreng bas bskor ba las/__/'od 'phros 'phags mchod 'gro ba'i don kun bsgrubs/__/sras bcas rgyal ba'i thugs rje'i byin rlabs bsdus/__/thugs srog la thim tshe bsod dpal 'byor dang /__/lung rtogs ye shes mtha' dag rgyas par gyur/__/ces brjod cing bsams la/__thal mo sbyar ba'i mdzub mo'i tshigs bar pa bcag ste mthe bong gnyis dang rtse sbyar ba legs so ster ba'i phyag rgya dang bcas te gzungs ring tshar gcig brjod/__de nas phyag rgya bkrol te gzungs ring thung gsum po ci nus dang /__mthar/__oM a mi te sogs gzungs 'bring po'ang ji ltar rigs pa bzla/__thun bsdu ba na/__oM AHhU~M trA~M hrIHa AHma ma sarba sa twAM sh+tsa rak+Sha rak+Sha ku ru swA hA/__lan gsum/__bdag bskyed kyi ye shes pa mdun mkhar byon pa la/__/gong ltar mchod bstod dang /__bcom ldan gtsug tor rnam par rgyal ma yis/__/bdag dang mtha' yas sems can thams cad kyi/__/dus min 'chi ba'i 'jigs pa zhi ba dang /__/tshe dang ye shes dngos grub stsal du gsol/__/zhes gsol ba gdab/__yig brgya lan gsum gyi mthar/__ma 'byor pa dang sogs kyis nongs pa bshags/__oM badz+ra muH__ye shes 'khor lo chos kyi dbyings su gshegs/__/dam tshig 'khor dang mchod rten rang la thim/__/dge ba 'di yis bdag sogs sems can kun/__/'chi med 'phags ma'i go 'phang myur thob shog__/ces sogs bsngo smon byas nas spyod lam la 'jug__/bsnyen pa byed na/__khrus dang gtsang sbra la gnas pas/__thun re bzhin gzungs ring tshar gsum sogs sngon du 'gro bas yi ge bcu pa gtso bor bzlas pas 'bum phrag bcu kha skong dang bcas pa 'gro bar bya/__snga thun gyi mjug tu/__bdag bskyed kyi ye shes pa mdun mkhar byon pa la/__bsang sbyang byin rlabs spyi ltar dang /__gzungs kyi mthar a kA ro lan gsum btags pas gtor ma 'bul/__mchod bstod gsal ba gdab/__nongs pa bshags/__rten yod na brtan bzhugs dang /__med na gshegs gsol sogs bya'o/__/zhes pa'ang 'jam dbyangs mkhyen brtse'i dbang pos thams cad mkhyen pa dkon mchog lhun grub kyi gsung rab ltar snying por dril te sbyar ba'i dge bas 'gro kun 'chi med grub pa'i rgyur cig/__//__!