རང་ལ་གྲོས་སུ་འདེབས་པ།

🚧 This website is under continued development. We appreciate your patience!

Previous Text Back to Volume PageNext Text

Wylie title	rang la gros su 'debs pa
Location	chos kyi blo gros bka' 'bum Volume 8, sde tshan 11, Text 2, Pages 300-302 (Folios 8b4 to 9b5)
Author	འཇམ་དབྱངས་མཁྱེན་བརྩེ་ཆོས་ཀྱི་བློ་གྲོས་
Less details More details
Citation	'jam dbyangs mkhyen brtse chos kyi blo gros. rang la gros su 'debs pa. In Rdzong sar mkhyen brtse 'jam dbyangs chos kyi blo gros kyi gsung 'bum, Vol. 8: 300-302. Bir, H.P.: Khyentse Labrang, 2012.
Genre	Advice - zhal gdams
Lotsawa House Link	https://www.lotsawahouse.org/bo/tibetan-masters/jamyang-khyentse-chokyi-lodro/advice-to-myself
Colophon	ཅེས་པའང་ལྷོ་རྒྱུད་བུར་ལྡོམ་ཐང་སེ་ཡི་གཡང་འབེས་ཀྱི་མདུན་ཆོས་ཁྲི་ཐང་དུ་ཆོས་ཀྱི་བློ་གྲོས་པས་སྨོན་པའོ།།
	ces pa'ang lho rgyud bur ldom thang se yi g.yang 'bes kyi mdun chos khri thang du chos kyi blo gros pas smon pa'o//

1 Texts in this Section (sde tshan or chos tshan)

2 300-302	རང་ལ་གྲོས་སུ་འདེབས་པ། rang la gros su 'debs pa Advice - zhal gdams	Text page View PDF
	འཇམ་དབྱངས་མཁྱེན་བརྩེ་ཆོས་ཀྱི་བློ་གྲོས་ ('jam dbyangs mkhyen brtse chos kyi blo gros)

Tibetan Text

Wylie

[edit]

༈ རང་ལ་གྲོས་སུ་འདེབས་པ་བཞུགས། ཀྱེ་ཧོ། མཚན་ཙམ་ཐོས་པས་སྲིད་པ་ཧྲུལ་པོར་བྱེད། །དྲན་པ་ཙམ་གྱིས་དགེ་ལེགས་མཆོག་སྟེར་བ། །གཏན་གྱི་སྐྱབས་གཅིག་དཔལ་ལྡན་བླ་མ་མཆོག། མི་འབྲལ་སྙིང་གི་ཟེ་འབྲུར་དགྱེས་པར་རོལ། །ཀ་ཡེ་གསོན་དང་བློ་གྲོས་ཅན། །ཁྱོད་ད་ལྟ་ན་ཚོད་གཞོན་སྙམ་ཡང་། །རང་ལེགས་པར་འདོད་པའི་བློ་ངན་དེས། །ཚེ་ཉི་མ་དགོང་ཁའི་གྲིབ་མས་ནོན། །མཚན་ལྡན་གྱི་བླ་མ་མང་མཇལ་ཞིང་། །བཀའ་མདོ་རྒྱུད་ཅུང་ཟད་ཐོས་གྱུར་ཀྱང་། །རང་རྒྱུད་འདི་སྲ་མཁྲེག་རྡོ་བ་བཞིན། །སེམས་རྒྱུད་ལ་མ་ཕན་མདོ་མེད་པོ། །སྡོམ་གསུམ་གྱི་བཅས་མཚམས་ངོ་ཤེས་ཀྱང་། །རང་ཕུང་རང་བརླག་གི་བསམ་སྦྱོར་གྱིས། །དམྱལ་བའི་སྡུག་བསྔལ་འབད་པས་བསྒྲུབ། །བསམ་མེད་ཁྱོད་ལག་པ་བྲང་ཐོག་ཞོག། ང་མི་འཆི་སྙམ་པའི་སྡོད་གྲབ་འདིས། །ཚེ་འདི་ཕྱིའི་དོན་རྣམས་ཐམས་ཅད་སྟོར། །དགྲ་འཆི་བདག་གི་ཞགས་པས་ཐེབས་རེ་རན། །འདིར་སྣང་གི་བསྐྱས་ཤིག་འདེགས་པ་ན། །སྡུག་བསྔལ་ལ་བཟོད་ཐབས་མ་མཆིས་ཀྱང་། །མིག་མཆི་མ་ཙ་རེ་ཉམས་སུ་མྱོང་། །དེ་དྲན་ན་སྙིང་རྩ་དབང་མེད་འདར། །རྟེན་དལ་འབྱོར་ཐོབ་པ་ད་རེས་ཙམ། །འགངས་ཆེན་འདི་ཆུད་ཟོས་མི་གཏོང་བར། །གཏན་བདེའི་འདུན་མ་བསྒྲུབ་རེ་རན། །ལུས་མཛེས་པའི་མེ་ཏོག་རྒ་བས་བཅོམ། །མི་འདོད་བཞིན་ནད་ཀྱི་ཚོར་བ་མྱོང་། །དབུགས་ཧག་གིས་ཆད་པའི་འཆི་བ་དེ། །དུས་ད་ལྟ་ཉེ་དྲུང་འདི་ན་མཆིས། །བུ་བློ་གྲོས་བསམ་བློ་ལེགས་པར་ཐོང་། །དཀོར་ནག་པོ་ལྕགས་སྲེག་ཐོ་ལུམ་འདིས། །ཐར་པའི་སྲོག་རྩ་གཅོད་རེ་རན། །ཁྲོ་ཆུ་ཡི་ཁོལ་མ་ཁར་བླུགས་དུས། །ཞིམ་པོ་ཞིག་ཨེ་ཡོད་བསམ་གཞིག་གྱིས། །རང་མ་སྨིན་གཞན་དོན་བྱེད་རློམ་དེ། །ལོང་བས་ལོང་བ་འཁྲིད་པ་འདྲ། །བདག་གཞན་གཉིས་མགོ་བསྐོར་མ་བྱེད་ཨང་། །ཕ་དྲན་ཆོག་རྒྱལ་པོ་བླ་མ་རྗེ། །བདག་མོས་གུས་གདུང་བས་གསོལ་འདེབས་ན། །བུའི་འདུན་མ་དམ་པའི་ཆོས་ལ་བསྒྱུར། །ལམ་སྣ་དེ་ཕ་གཅིག་བླ་མས་དྲོངས། །རྗེ་ཡེ་ཤེས་སྐུ་ཅན་བླ་མ་དེ། །དུས་ད་ལྟ་མཇལ་ན་དགའ་བ་ལ། །ང་རང་སྣང་མ་དག་ལས་ངན་པས། །ཕ་བླ་མ་མཇལ་བའི་སྐབས་མ་རྙེད། །བུ་ང་རང་ལས་སྣང་དག་གྱུར་ན། །ཤེས་རིག་མ་བཅོས་འདི་བླ་མ་ཡིན། །འདི་དང་རྣམ་ཀུན་འབྲལ་བ་མེད། །དེ་བསམ་ན་ང་ལ་དགའ་བདེ་རྙེད། །བུ་སྐྱོ་བསང་གི་བླ་མ་དེ་ན་བཞུགས། །ད་ང་ཡི་ཚེ་ལྷག་ཇི་གནས་ཀྱང་། །བློ་ཕུག་འདི་དམ་པའི་ཆོས་ལ་གཏོད། །སྒོ་གསུམ་བྱ་བ་ཅི་བྱས་ཀྱང་། །སེམས་ཅན་གྱི་དོན་དུ་སྤྱོད་པ་ལས། །རང་འདོད་ཀྱི་འཁྲི་བ་མེད་པར་ཤོག། ཐར་པའི་ལམ་སྣ་ཟིན་པར་ཤོག། བྱང་ཆུབ་སེམས་ཀྱི་རྟར་ཞོན་ནས། །སེམས་ཅན་བདེ་ལ་འགོད་པར་ཤོག །ཅེས་པའང་ལྷོ་རྒྱུད་བུར་ལྡོམ་ཐང་སེ་ཡི་གཡང་འབེས་ཀྱི་མདུན་ཆོས་ཁྲི་ཐང་དུ་ཆོས་ཀྱི་བློ་གྲོས་པས་སྨོན་པའོ།། །།

[edit]

!_rang la gros su 'debs pa bzhugs/__kye ho/__mtshan tsam thos pas srid pa hrul por byed/__/dran pa tsam gyis dge legs mchog ster ba/__/gtan gyi skyabs gcig dpal ldan bla ma mchog/__mi 'bral snying gi ze 'brur dgyes par rol/__/ka ye gson dang blo gros can/__/khyod da lta na tshod gzhon snyam yang /__/rang legs par 'dod pa'i blo ngan des/__/tshe nyi ma dgong kha'i grib mas non/__/mtshan ldan gyi bla ma mang mjal zhing /__/bka' mdo rgyud cung zad thos gyur kyang /__/rang rgyud 'di sra mkhreg rdo ba bzhin/__/sems rgyud la ma phan mdo med po/__/sdom gsum gyi bcas mtshams ngo shes kyang /__/rang phung rang brlag gi bsam sbyor gyis/__/dmyal ba'i sdug bsngal 'bad pas bsgrub/__/bsam med khyod lag pa brang thog zhog/__nga mi 'chi snyam pa'i sdod grab 'dis/__/tshe 'di phyi'i don rnams thams cad stor/__/dgra 'chi bdag gi zhags pas thebs re ran/__/'dir snang gi bskyas shig 'degs pa na/__/sdug bsngal la bzod thabs ma mchis kyang /__/mig mchi ma tsa re nyams su myong /__/de dran na snying rtsa dbang med 'dar/__/rten dal 'byor thob pa da res tsam/__/'gangs chen 'di chud zos mi gtong bar/__/gtan bde'i 'dun ma bsgrub re ran/__/lus mdzes pa'i me tog rga bas bcom/__/mi 'dod bzhin nad kyi tshor ba myong /__/dbugs hag gis chad pa'i 'chi ba de/__/dus da lta nye drung 'di na mchis/__/bu blo gros bsam blo legs par thong /__/dkor nag po lcags sreg tho lum 'dis/__/thar pa'i srog rtsa gcod re ran/__/khro chu yi khol ma khar blugs dus/__/zhim po zhig e yod bsam gzhig gyis/__/rang ma smin gzhan don byed rlom de/__/long bas long ba 'khrid pa 'dra/__/bdag gzhan gnyis mgo bskor ma byed ang /__/pha dran chog rgyal po bla ma rje/__/bdag mos gus gdung bas gsol 'debs na/__/bu'i 'dun ma dam pa'i chos la bsgyur/__/lam sna de pha gcig bla mas drongs/__/rje ye shes sku can bla ma de/__/dus da lta mjal na dga' ba la/__/nga rang snang ma dag las ngan pas/__/pha bla ma mjal ba'i skabs ma rnyed/__/bu nga rang las snang dag gyur na/__/shes rig ma bcos 'di bla ma yin/__/'di dang rnam kun 'bral ba med/__/de bsam na nga la dga' bde rnyed/__/bu skyo bsang gi bla ma de na bzhugs/__/da nga yi tshe lhag ji gnas kyang /__/blo phug 'di dam pa'i chos la gtod/__/sgo gsum bya ba ci byas kyang /__/sems can gyi don du spyod pa las/__/rang 'dod kyi 'khri ba med par shog/__thar pa'i lam sna zin par shog/__byang chub sems kyi rtar zhon nas/__/sems can bde la 'god par shog/__ces pa'ang lho rgyud bur ldom thang se yi g.yang 'bes kyi mdun chos khri thang du chos kyi blo gros pas smon pa'o//___//