JKCL-KABUM-04-NGA-008-wylie
@#/__/bla ma la gsol ba gdab pa'i rim pa nges don bde 'jug ces bya ba bzhugs so/__/
oM swa sti/__srid pa'i nyes che brgya phrag zhi ba la/__/bsil byed thugs rje'i gru char 'beb mdzad cing /__/dpal ldan bla ma mkhyen brtse nus ldan pa/__/snying gi pad+mo bzhad pa'i rtser bkod de/__/rang byung dbu ma'i khang bzang nyams dga' bar/__/rang rig ston pa kun tu bzang po yi/__/rang zhal mngon sum 'gugs pa'i thabs zab mo/__/byin rlabs bla ma'i rnal 'byor nyung ngur byed/__/de la 'dir khyab bdag dpal ldan bla ma rigs thams cad kyi bdag por gyur pa nyid sgrub pa'i thabs zab mo ni/__dkyil 'khor gang du dbang bzhi legs par thob cing /__rgyud sdom pa dang dam tshig rnam par dag pa lam gyi srog tu bzung ste dben pa'i gnas su bde ba'i stan la 'khod nas/__thog ma nyid du tshe 'dir snang gi zhen pa bzlog phyir nges 'byung gis blo bcos pa snying thag pa nas yang yang dran par bya/__rang 'dod kyi 'khri ba med par gzhan phan lhag bsam bzang po'i 'phen pa sngon du btang nas/__mdun gyi nam mkhar rtsa ba'i bla ma skyabs kun 'dus pa'i ngo bor gsal btab la/__bdag gzhan sems can thams cad kyis mgrin gcig tu dad mos brtan pos/__na mo/__bla ma dpal ldan khyab bdag rdo rje 'chang /__/mchog gsum rtsa gsum sku gsum 'dus pa la/__/dus 'di nas bzung byang chub snying po'i bar/__/sgo gsum rtse gcig gus pas skyabs su mchi/__/zhes lan ci nus dang /__sems bskyed pa la/__nam mkha'i mthas gtug pa'i pha ma sems can rnams phan bde bla na med pa la 'god par 'dod pa'i gzhan phan lhag pa'i bsam pa bzang po dang ldan pas/__hoHma gyur rigs drug sems can ma lus pa/__/byams dang snying rje dga' ba btang snyoms bzhis/__/blo sbyangs byang chub mchog la 'god pa'i phyir/__/smon dang 'jug pa'i sems mchog bskyed par bgyi/__/ces lan gsum sogs dmigs rnam rtse gcig pa dang /__thun mtshams su bdag gzhan brje ba'i blo sbyong yang bsgom/__de nas rten bskyed pa ni/__a/__tha mal snang ba dbyings su thim pa las/__/rang snang thams cad bde ba can gyi zhing /__/yid 'phrog ngo mtshar bkod pa 'byams klas dbus/__/rang nyid gzhi lus bde chen mtsho rgyal ni/__/dkar dmar mdangs ldan bod mo'i cha byad mdzes/__/rin chen pad+ma'i rgyan phreng do shal dpyangs/__/phyag gnyis mnyam bzhag bdud rtsi'i thod zhal bsnams/__/zhabs gnyis btsun mo rol pa'i stabs kyis bzhugs/__/spyi bo'i thad kyi mdun mkhar seng khri dang /__/pad nyi zla ba brtsegs pa'i gdan steng du/__/rtsa ba'i bla ma o rgyan rin po che/__/dkar dmar mdzes 'dzum rdo rje thod bum bsnams/__/sku la gsang gos phod ka chos gos dang /__/za 'og ber smug dbu la pad zhwa gsol/__/zhabs gnyis rgyal po rol pa'i stabs kyis 'gying /__/snang srid zil gyis gnon pa'i sku ru gsal/__/spyi bor chos sku tshe dpag med mgon dmar/__/mnyam bzhag phyag rgyas 'chi med tshe bum 'dzin/__/longs sku'i chas rdzogs pad zlar skyil krung bzhugs/__/bla ma'i mgrin par pad+ma dmar po'i steng /__/thugs chen dmar gsal zhi ma khro chags nyams/__/g.yas pas pad+ma dmar po'i phreng ba 'dzin/__/g.yon pas mnyam bzhag pad rag tshe bum bsnams/__/rin chen rus rgyan stod g.yogs smad sham bklubs/__/thugs kar pad+ma kun tu 'chang chen po/__/nam mkha'i mdangs ldan rdor dril thugs kar bsnol/__/man+d+ha ra ba dkar mo gri thod 'dzin/__/yab yum gnyis ka dar dang rus pas brgyan/__/pad zla nyi mar rdo rje skyil krung bzhugs/__/lte bar chos 'byung bsnol ma dmar skya'i steng /__/rnal 'byor dmar mo bde ba'i nyams ldan pa/__zhabs gnyis gar stabs gri gug thod khrag 'dzin/__/mchan g.yon he ru ka pa kha TA~M ga__/rus rgyan ut+pal dmar po'i do shal 'phyang /__/ye shes me dpung 'bar ba'i dbus na 'gying /__/de ltar rgyal ba kun 'dus gnas gsum du/__/oM dkar AHdmar hU~M mthing 'od zer 'bar/__/de las 'od 'phros ye shes sems dpa'i tshogs/__/dpag med spyan drangs dam ye gnyis med gyur/__/hU~M hrIHsngon gyi bskal pa dang po la/__/o rgyan yul gyi nub byang mtshams/__/pad+ma ge sar sdong po la/__/ya mtshan mchog gi dngos grub brnyes/__/pad+ma 'byung gnas zhes su grags/__/'khor du mkha' 'gro mang pos bskor/__/khyed kyi rjes su bdag bsgrub kyi/__/byin gyis rlobs phyir gshegs su gsol/__/gnas mchog 'di ru byin phob la/__/sgrub mchog bdag la dbang bzhi bskur/__/bgegs dang log 'dren bar chad sol/__/mchog dang thun mong dngos grub stsol/__/oM AHhU~M badz+ra gu ru pad+ma thod phreng rtsal badz+ra sa ma ya dzaHsid+d+hi pha la hU~M AHzhes pas spyan drangs/__dzaHhU~M ba~M hoHdbyer med du bya/__tshogs bsags yan lag bdun 'bul ba ni/__hU~M hrIHrang lus zhing rdul mnyam par rab sprul te/__/sgo gsum gus shing 'dud pas phyag 'tshal lo/__/dngos su 'byor dang yid kyis rnam sprul pa'i/__/kun tu bzang po bla na med pas mchod/__/dus gsum bsags pa'i bcas rang nyes pa'i tshogs/__/gnong 'gyod drag pos snying nas bshags par bgyi/__/slob dang mi slob dge ba'i tshogs mtha' dag__/rjes su yi rang phrag dog gzhom par bgyi/__/gdul bya'i blo dang 'tshams pa'i chos 'khor lo/__/rgyun mi chad par yongs su bskor bar bskul/__/mya ngan 'da' bzhed zhi bar gzhol rnams la/__/'pho 'gyur bral bar rtag par bzhugs gsol 'debs/__/zag bcas zag med dge tshogs ci mchis pa/__/sku bzhi'i go 'phang thob pa'i phyir du bsngo/__/bsod nams 'di yis mtha' yas 'gro ba rnams/__/sa bcu lam lnga'i bgrod pa mthar phyin shog__/maN+Dal ni/__srid zhi'i khams kyi legs spyad ci mchis pa/__/blo yis blang nas maN+Dal gcig tu bzlums/__/bla ma sku gsum lha la phul ba yis/__/'gro kun tshogs gnyis dpal la spyod gyur cig__/oM gu ru rat+na maN+Da la pU dza me g+ha sa mu dra s+pha ra Na sa ma ye hU~M/__ku sa li'i tshogs bsags pa ni/__rang rig ba~M yig dkar po dbyings mkhar thon/__/de nyid rnal 'byor dkar mo gri thod 'dzin/__/rang lus phung po tsho brjid snum bag ldan/__/mdun du mi mgo'i sgyed bu ri rab tsam/__/gsum steng thod pa breg nas gyen bkan bzhag__/gzugs phung gri gug gis ni dum bur bsil/__/thod pa'i nang blugs 'og nas rlung me sbar/__/steng nas 'bru gsum haM yig dang bcas gsal/__/de nas bdud rtsi'i rgyun 'dzag zhu zhing bskol/__/zag med ye shes bdud rtsi'i rgya mtshor gyur/__/oM AHhU~M ha ho hrIHmang du brjod/__thugs nas las byed lha mo thod pa thogs/__/mang po sprul nas mchod yul rnams la mchod/__/sgrib dag tshogs rdzogs byin rlabs dngos grub thob/__/mar sbyin gnod gdon bgegs tshim rigs drug gi/__sdug bsngal byang zhing bde ba thob gyur cig__/de nas gsol ba 'debs pa la/__bla ma sku gsum gyi gsol 'debs le'u bdun ma'i spros bral chos kyi dbyings dang /__/rdo rje'i tshig bdun pa'i gsol 'debs grangs mang mthar/__e ma hoHbde ldan zhing na chos sku snang mtha' yas/__/gru 'dzin ri bor 'phags mchog spyan ras gzigs/__/rnga yab dpal rir sprul sku pad+ma 'byung /__/stugs po bkod par pad+ma kun tu 'chang /__/lhan skyes zhing na rje btsun rnal 'byor ma/__/mdor na rab 'byams rtsa gsum rgya mtsho'i bdag__/o rgyan rdo rje 'chang la gsol ba 'debs/__/rkyen ngan bar chad thams cad zhi ba dang /__/bsam pa lhun gyis 'grub par byin gyis rlobs/__/zhes grangs ci nus gsogs/__thugs dam rgyud bskul gyi bzlas pa/__oM AHhU~M badz+ra gu ru pad+ma sid+d+hi hU~M/__zhes pa gtso bor bzla/__skabs su thod phreng rtsal gyi bzlas pa'ang ci rigs bya/__de ni gsol 'debs bsnyen pa'i rnal 'byor ro/__/nang ltar sgrub pa'i bzlas pa ni/__spyi bo'i tshe dpag med kyi thugs kar hrIH/__'od 'phros srid dang zhi ba'i tshe bcud bsdus/__/bum par bstim zhing bdud rtsi'i rgyun bab pas/__/lus kyi nang gang dus min 'chi ba sbyangs/__/gdon bgegs byad mas khyer ba thams cad bkug__/bla tshe nyams pa thams cad rang sor chud/__/'chi med tshe dang ye shes dngos grub thob/__/skye 'chi gzhom gzhig bral ba'i sku thob bsam/__oM pad+ma d+hA ri hU~M a ma ra Ni dzi wan+ti ye swA hA/__zhes bzla/__skabs su yang gsang hrIHgcig ni/__rlung dang sbyar ba'i rdor bzlas bya/__thugs rje chen po'i thugs kar pad 'dab drug__/lte bar hrIHdmar 'dab mar sngags kyis mtshan/__/'od 'phros don gnyis byas shing tshur 'dus pa/__/sku dang sngags las bdud rtsi yi ge'i phreng /__/dpag med thim pas rang lus mer gyis khengs/__/snod bcud pad+ma sems dpa'i zhing gyur bsam/__oM ma Ni pad+me hU~M hrIHces bzla/__kun tu 'chang chen thugs kar nyi zla'i bar/__/hU~M sngon gsal 'tsher gzi brjid 'bar ba las/__/'od 'phros brtan g.yo'i snang zhen kun sbyangs nas/__/thams cad mnyam yang dkyil 'khor lhun rdzogs bsam/__/oM AHbadz+ra gu ru ma hA su kha d+hA ra dz+nyA na sid+d+hi pha la hU~M/__zhes bzla/__phag mo'i thugs kar dga' 'khyil lte ba ru/__/ba~M yig dmar po sngags kyi phreng bas bskor/__/'od 'phros pho nya gsum gyi byin bsdus nas/__/mchog thun phrin las thams cad 'grub par bsam/__/oM ba~M badz+ra bai ro tsa ni ye ha ri ni sa sarba sid+d+hi hU~M/__zhes bzla ba rnams ni sgrub pa'o/__/slar yang spyi bo'i bla ma'i sku rnams las/__/rang 'dra chad de rang nyid mtsho rgyal gyi/__/sku yi gnas bzhir bzhugs shing 'od zer gyi/__/spro bsdus snod bcud rig 'dzin dkyil 'khor du/__/gsal zhing bde stong ye shes gzi brjid 'bar/__/kun kyang sngags kyi rang sgra sgrogs pa dang /__/dag mnyam dbyer med dgongs pa'i rtsal chen rdzogs/__/mi 'gyur bsam brjod bral ba'i ngang nas bzla/__/thod phreng rtsal gyi bzlas pa bya'o/__/de ni sgrub pa chen po'i bzlas pa'o/__/mthar ni gsol gdab dbang blang bya/__bla ma'i gnas gsum yi ge 'bru gsum las/__/'od zer bdud rtsi rim dang cig car byung /__/rang gi gnas gsum rim dang cig car du/__/zhugs shing thim pas sgrib pa bzhi dag cing /__/dbang bzhi thob cing lam bzhi bsgom la dbang /__/rig 'dzin bzhi thob las bzhi'i phrin las 'grub/__/sku bzhi'i go 'phang thob pa'i rten 'brel bsgrigs/__/mthar ni bla ma 'od zhu rang la thim/__/rang yang mi dmigs chos dbyings chen por thim/__/dmigs gtad mtshan ma rdul tsam med pa yi/__/ye bab ji bzhin rang gnas dgongs pa'i klong /__/btang bzhag 'gro 'ong bral ba'i ngang de ru/__/ma bcos so ma lhun mnyam chen por bzhag__/bzhag ces bya ba'ang tshig gi brjod pa tsam/__/ka dag phyogs yan chen po'i dgongs pa la/__/lhun grub 'od gsal tshom bu rnam par bkra/__/dbyings rig dbyer med khyab brdal kun tu bzang /__/kun bzang klong na 'pho 'gyur ye nas bral/__/rang snang rang byung rang shar rol pa che/__/spang blang bsal bzhag las 'das rdzogs pa che/__/'di yin 'di min dmigs gtad kun dang bral/__/kun grol yangs pa chen por lhun rdzogs so/__/zhes pa'i dgongs pa gsal 'debs pa ni/__don dam bla ma chos skur sgrub pa'i rim pa mchog gi las sbyor ro/__/slar yang stong chen dbyings las gzugs skur ldang /__rang nyid gu ru pad+ma 'byung gnas sku/__/mtsho rgyal dang 'khril bde chen zag med klong /__/dwangs pa'i 'ja' sku 'od gsal lam me ba/__/rang byung gsal ba'i thugs kar pad zla'i steng /__/gser gyi rdo rje rtse lnga'i lte bar hrIHsngags kyis bskor las 'od 'phros don gnyis byas/__/snang srid rdo rje gsum gyi ngo bor shar/__/badz+ra gu ru ci nus bzla/__de nas spyod lam la 'jug pa na dge bsngo dang zangs mdog dpal ri'i smon lam sogs gdab pa la brtson par bya zhing /__mtshan mo bla ma sku gsum snying dbus su bsgom pa dang 'od gsal bzung /__nam zhig 'chi ba'i tshe rang lus mtsho rgyal du gsal ba ba~M yig gi rnam par bsdus te bla ma'i thugs kar bstim par bya'o/__/'di dges mtha' yas sems can kun/__/bla ma'i lam gyis grol gyur te/__/sku gsum 'bras bu mngon gyur nas/__/srid gsum dong nas sprugs par shog__/tshul 'di bka' min gter ma'ang min/__/rigs ldan DA kis bskul ba las/__/sngon smon dag pas mtshams sbyar te/__/rig khams dwangs pa'i kun gsal ngogs/__/ji bzhin shar ba bcos med du/__/'bri ba'i byed po o rgyan rjer/__/mi phyed dad pa'i blo gros can/__/pad+ma ye shes rdo rje yis/__/'bras ljongs sgang thog gtsug lag tu/__/shar mar bris pa dge legs 'phel/__/sarba mang+ga laM//____//
