JKCL-KABUM-08-NYA-011-036

🚧 This website is under continued development. We appreciate your patience!

Previous Text Back to Volume PageNext Text

Wylie title
Location	chos kyi blo gros bka' 'bum Volume 8, sde tshan 11, Text 36, Pages (Folios to )
Author	འཇམ་དབྱངས་མཁྱེན་བརྩེ་ཆོས་ཀྱི་བློ་གྲོས་
Less details More details
Citation	'jam dbyangs mkhyen brtse chos kyi blo gros. '. In Rdzong sar mkhyen brtse 'jam dbyangs chos kyi blo gros kyi gsung 'bum, Vol. 8: . Bir, H.P.: Khyentse Labrang, 2012.
Genre	Advice - zhal gdams

1 Texts in this Section (sde tshan or chos tshan)

36 383-385	ལྟ་བ་སྐྱོང་ཐབས། lta ba skyong thabs Advice - zhal gdams	Text page View PDF
	[[|འཇམ་དབྱངས་མཁྱེན་བརྩེ་ཆོས་ཀྱི་བློ་གྲོས་ ()]]

Tibetan Text

Wylie

[edit]

༈ ལྟ་བ་སྐྱོང་ཐབས་བཞུགས་སོ། །དཔལ་ལྡན་བླ་མར་ཕྱག་བཅོལ་ནས། །མ་དག་སེམས་ཅན་ལས་ཉོན་གྱི། །སྦུབས་རྒྱར་འཐུམས་པའི་རང་བཞིན་ལ། །བསམ་ནས་ངེས་འབྱུང་བློ་མཆོག་བསྐྱེད། །འགྲོ་ཀུན་ཕ་མར་ཤེས་པ་ཡིས། །བྱམས་དང་སྙིང་རྗེ་བྱང་ཆུབ་སེམས། །རང་འདོད་ཕྱོགས་རིས་མེད་པར་བསྒོམས། །འཇིགས་དང་སྙིང་རྗེས་ཀུན་བསླངས་པའི། །སྐྱབས་སུ་འགྲོ་དང་སྡིག་སྒྲིབ་སྦྱངས། །ཚོགས་གཉིས་བསགས་ལ་ནན་ཏན་བྱ། །རྡོ་རྗེའི་ཡེ་ཤེས་འབེབ་པའི་ཕྱིར། །བྱིན་རླབས་བླ་མའི་རྣལ་འབྱོར་ལ། །མོས་གུས་གདུང་བས་གསོལ་བཏབ་ཅིང་། །དབང་བཞི་བླངས་ཏེ་ཐུགས་ཡིད་བསྲེ། །མ་དག་ཐ་མལ་སྣོད་བཅུད་ཀུན། །རྟེན་དང་བརྟེན་པའི་ལྷར་སྦྱངས་ཤིང་། །ཐ་མལ་སྣང་ཞེན་སྤང་བ་དང་། །གྱ་ནོམ་ལྷར་ཞེན་རྟོག་པ་ཡང་། །རྫོགས་རིམ་ཟབ་མོས་ལེགས་སྦྱངས་ནས། །ཞུ་བདེ་མི་རྟོག་ཡེ་ཤེས་བསྐྱེད། །དེ་ལྟར་རིམ་གཉིས་བསྒོམས་པ་ལས། །བྱུང་བའི་ཡེ་ཤེས་ཁྱད་པར་ཅན། །སྐྱེ་ཕྱིར་རྒྱུ་དུས་ལྟ་བ་ལ། །ཐོས་བསམ་སྒྲོ་འདོགས་བཅད་པར་བྱ། །དེ་ཡང་སྣང་གྲགས་ཆོས་རྣམས་ཀུན། །རང་སེམས་དག་དང་མ་དག་གི །རྣམ་འཕྲུལ་ཙམ་དུ་ཤེས་བྱས་ནས། །སེམས་སྣང་དེ་ཡང་སྒྱུ་མ་ལྟར། །རང་བཞིན་བདེན་མེད་གཏན་ལ་ཕབ། །མེད་ཅེས་བྱ་བའང་ཡོད་མིན་ཏེ། །སེམས་ཉིད་རང་བཞིན་གཉུག་མའི་གཤིས། །གསལ་སྟོང་ཟུང་འཇུག་ཚིག་ལས་འདས། །བསམ་བརྗོད་བྲལ་བའི་བློ་འདས་ཆེར། །བསམ་མི་ཁྱབ་པའི་ངང་དེར་བཞག། འཁོར་བ་དང་ནི་མྱ་ངན་འདས། །སོ་སོར་ཡོད་པ་མ་ཡིན་ཏེ། །གདོད་ནས་རང་བཞིན་མཉམ་པ་ཉིད། །ལྷན་སྐྱེས་ཡེ་ཤེས་ངང་དུ་གཅིག། དེ་ལྟའི་ལྟ་བ་མངོན་བྱས་ཏེ། །བསྐྱེད་རྫོགས་ལམ་གྱི་རིམ་པ་ཀུན། །འཁོར་འདས་དབྱེར་མེད་རྒྱ་ཡིས་གདབ། །དེ་ལྟར་བསྒོམས་པས་དཀྱིལ་འཁོར་བཞིར། །འགྲོས་བཞི་ཐིམ་ནས་སྐུ་བཞི་ཡི། །རྡོ་རྗེ་འཛིན་ས་རབ་བརྙེས་ཤིང་། །གཞན་དོན་ཕྲིན་ལས་མཁའ་ཁྱབ་འབྱུང་། །དེ་སྐད་གདམས་པའི་རིམ་པ་ནི། །རྡོར་འཛིན་སྦྱིན་པ་བློ་ལྡན་གྱིས། །བསྐུལ་ངོར་ཆོས་ཀྱི་བློ་གྲོས་པས། །བླ་མའི་གསུང་བཞིན་བརྗོད་པ་དགེ། །།

[edit]

!_lta ba skyong thabs bzhugs so/__/dpal ldan bla mar phyag bcol nas/__/ma dag sems can las nyon gyi/__/sbubs rgyar 'thums pa'i rang bzhin la/__/bsam nas nges 'byung blo mchog bskyed/__/'gro kun pha mar shes pa yis/__/byams dang snying rje byang chub sems/__/rang 'dod phyogs ris med par bsgoms/__/'jigs dang snying rjes kun bslangs pa'i/__/skyabs su 'gro dang sdig sgrib sbyangs/__/tshogs gnyis bsags la nan tan bya/__/rdo rje'i ye shes 'beb pa'i phyir/__/byin rlabs bla ma'i rnal 'byor la/__/mos gus gdung bas gsol btab cing /__/dbang bzhi blangs te thugs yid bsre/__/ma dag tha mal snod bcud kun/__/rten dang brten pa'i lhar sbyangs shing /__/tha mal snang zhen spang ba dang /__/gya nom lhar zhen rtog pa yang /__/rdzogs rim zab mos legs sbyangs nas/__/zhu bde mi rtog ye shes bskyed/__/de ltar rim gnyis bsgoms pa las/__/byung ba'i ye shes khyad par can/__/skye phyir rgyu dus lta ba la/__/thos bsam sgro 'dogs bcad par bya/__/de yang snang grags chos rnams kun/__/rang sems dag dang ma dag gi__/rnam 'phrul tsam du shes byas nas/__/sems snang de yang sgyu ma ltar/__/rang bzhin bden med gtan la phab/__/med ces bya ba'ang yod min te/__/sems nyid rang bzhin gnyug ma'i gshis/__/gsal stong zung 'jug tshig las 'das/__/bsam brjod bral ba'i blo 'das cher/__/bsam mi khyab pa'i ngang der bzhag/__'khor ba dang ni mya ngan 'das/__/so sor yod pa ma yin te/__/gdod nas rang bzhin mnyam pa nyid/__/lhan skyes ye shes ngang du gcig/__de lta'i lta ba mngon byas te/__/bskyed rdzogs lam gyi rim pa kun/__/'khor 'das dbyer med rgya yis gdab/__/de ltar bsgoms pas dkyil 'khor bzhir/__/'gros bzhi thim nas sku bzhi yi/__/rdo rje 'dzin sa rab brnyes shing /__/gzhan don phrin las mkha' khyab 'byung /__/de skad gdams pa'i rim pa ni/__/rdor 'dzin sbyin pa blo ldan gyis/__/bskul ngor chos kyi blo gros pas/__/bla ma'i gsung bzhin brjod pa dge/__//