JKCL-KABUM-03-GA-045-wylie
kun mkhyen bstan pa'i nyi ma bsod nams seng+ge la gsol ba 'debs pa ye shes snang gter zhes bya ba/__na mo gu ru puN+yai seng ha ya/__kun mkhyen 'jam dpal smra ba'i seng+ge mchog__/kun dga'i ring lugs nyin mor byed pa'i slad/____/kun tu bzang po'i smon lam rab grub pa/____/kun gzigs 'jam dbyangs bla mar gsol ba 'debs/____/gdod nas 'jam pa'i dpal dang dbyer mi phyed/____/'phags bod mkhas grub du ma'i skye ba bzhes/____/deng 'dir dge ba'i bshes kyi skur ston nas/____/sum ldan rdo rje 'dzin par=____/nges 'byung tshul khrims khang bzang nyams dga' bar/____/gzhan phan byang chub sems dpa'i thu bo che/____/gsang ba'i bdag po rdo rje'i snyems 'chang ba/____/rigs gsum 'dus zhal bla mar=____/zab dang rgya che'i shes bya thams cad mkhyen/____/'chad rtsod rtsom la chags thogs sgrib pa bral/____/gangs can mdzes pa'i rgyan mchog chen po ni/____/mtshungs zla med pa khyed la=____/yum don dgongs pa ji bzhin thugs su chud/____/dpal ldan chos kyi grags pa dngos su snang /____/dbyig gi gnyen po bzhin du brjod pa dag__/mkhas pa'i gtsug rgyan chen por=____/byams klu dgongs pa 'gal med cig tu sgrub/____/rtag chad spros pa'i mtha' la ma lhung zhing /____/zung 'jug dbu ma chen po ston mdzad pa/____/byang phyogs thub dbang gnyis par=____/'jigs bral stobs kyi mgon po biR+Wa pa'i/____/bzhed gzhung gsung ngag smin grol chu rgyun gyi/____/skal ldan sku bzhi'i lo thog rgyas mdzad pa/____/rje btsun rin po che la=____/nges pa'i don du rdo rje 'chang dbang dang /____/tha dad ma mchis dkyil 'khor kun gyi bdag__/gsang sngags rgyud don ma nor gsal mdzad pa/____/rnal 'byor dbang phyug chen por gsol ba 'debs/____/skye ba 'di dang skye ba gzhan dag tu/____/khyed kyi gsang ba gsum gyi byin brlabs zhugs/____/rgyal ba'i dgongs pa ji bzhin 'chad pa la/____/kun mkhyen bla ma nyid dang dbyer med shog__/bsod nams chen po'i dpal gyis legs gsung tshogs/____/'dzin 'chad spel la blo gros mthu ldan zhing /____/phyogs las rnam par rgyal ba'i seng+ge'i sgras/____/lta ngan ri dwags tshogs rnams 'joms gyur cig__/ces pa'ang chu 'brug zla tshes la rmi lam dge ba'i rkyen las 'jam dbyangs chos kyi blo gros pas gsol ba btab pa sid+d+hi rastu/__mang+ga laM//____//__
