JKW-KABUM-23- A-004-018-wylie
ru dam shrI siM ha'i bca' yig sde dge'i gsung tshab/__ @#/__/chos sde'i bca' yig__/oM swa sti sid+d+haM/__bkra shis mtshan gyi snang ba yis/__/phan bde'i lam bzang gsal mdzad pa/__/bla ma mchog gsum chos srung gis/__/dge legs me tog char du bsnyil/__/ces shis par bya ba'i tshig gis mdun bsus te/__deng gi char yang /__bod chen po'i ljongs 'dir 'bri rdza zal mo sgang gi nor 'dzin gyi thig ler sangs rgyas kyi phrin las ris med par 'jug pas thub bstan rin po che sgo du ma nas lhag par rgyas pa'i nang tshan/__kho bo cag gi yab mes gong ma sprul pa'i chos rgyal rim byon dang /__mdo khams rdzogs chen pa sku phreng rim byon yon mchod kyi rten 'byung rmad du byung ba'i thugs bskyed dang bka' drin la brten/__sbas pa'i gnas mchog ru dam gangs kyi ra ba'i 'dabs 'brel du snga 'gyur rdo rje theg pa'i bshad sgrub kyi chu gter chen po 'og min o rgyan bsam gtan chos gling zhes grags pa'i yi ges mdzes par gyur pa 'dir/__phyis su lo chen bai ro dngos byon rje rgyal ba'i sras po gzhan phan mtha' yas 'od zer thugs sras rnams dang bcas pa'i thugs rje dang bka' drin gyi shing rtas thub bstan yongs su rdzogs pa'i nyin byed chen po gsar du drangs pa'i shrI siM ha'i chos gra rig grol 'dus pa'i gling gi mgon du/__'dzam gling bstan 'gro'i gtsug rgyan dpal sa skya pa khri chen bkra shis rin chen/__gdung sras phyogs kyi glang po/__smin gling khri chen rin po che/__skyabs mgon rdzogs chen rnams kyis mgrin gcig tu lung bstan cing /__sprul pa'i gter chen o rgyan mchog gyur bde chen gling pa'i gter lung o rgyan dus gsum mkhyen pa'i rdo rje'i gsung gis kyang gsal bar bsngags pa ltar bla ma gong ma de nyid kyi sprul pa'i sku 'khrul med thar rtse rdo rje 'chang khu dbon gyi bka' drin la brten dbus gtsang dag pa'i zhing nas ljongs 'di'i bsod nams kyi mgron du byon pa 'di nyid/__lcags la sa dbang chen po dang /__kho bo cag zhang dbon thams cad dang bla ma gong ma de nyid chos dam 'brel zab che bar ma zad/__da lta'i sprul pa'i sku 'di nyid kyang bstan pa'i gsal byed chen por 'byung ba gdon mi za bas mnga' gsol gzengs bstod kyi 'os su gyur pa bzhin/__'di nas kyang rje rgyal ba'i sras po'i chos kyi khri 'phang mthon por dbang bskur zhing bstan 'gro'i dpal mgon mchog tu mnga' gsol ba yin pas mchog dman thams cad nas yid nges dang /__lhag par dam pa'i skyes bu rnams la rigs kyi yon tan lhun gyis grub pa chos nyid kyang /__yon tan de nyid sad par byed pa'i rkyen rgyal ba'i bstan pa la rim gyis zhugs shing yongs su rdzogs pa kho na la rag las pas na/__dge ba'i bshes gnyen mtshan nyid dang ldan pa la brten nas gzhi tshul khrims dag pa/__lam gsan bsam rdzogs pa/__'bras bu bsgoms byung gi shes rab la dbang 'byor bas mtshon/__mdor na thun mong gi gdul bya'i ngor yang bla ma gong ma de nyid dang spangs rtogs kyi yon tan mig mthong lag zin du mnyam pa zhig ma byung gi bar rang dbang 'dus par mdzad de dgon sde ri khrod gar dben du bslab pa gsum gyi yon tan mthar phyin du mdzad pa las/__rnam g.yeng 'du 'dzi dang /__grong chog__/rnyed 'tshol sogs chung ngu'i phyir du chen po gtong ba rang gzhan gang thad nas byas 'thus med pa dang /__rang don du mkhyen rtogs kyi yon tan yongs su rdzogs nas/__gdul bya gzhan don gyi phrin las rab 'byams phyogs bral du skyong ba dang /__nye char shrI siM ha'i chos grwa de nyid kyang rje bla ma gong ma'i thugs bzhed/__ngos rang mchod yon gyi bca' khra bka' bkod rim can du bstsal dang stsal mus ltar sgrig khrims rnam par dag pa dang /__rgyal bstan bshad sgrub kyi bya ba nyams pa sor chud/__ma nyams gong 'phel/__'phel ba brtan zhing srid mthar rgyas pa'i 'khor lo gsum gyi legs mdzad 'phral 'phral du 'thus shor med par mdzad nas/__'di byas 'di byed kyi snyan zhu yod pa dgos pa las g.yeng lus cung zad tsam yang mi chog pa dang /__'di nas kyang bstan don lar rgyar dgongs pa'i nyes pa tshar gcod dang /__legs pa gzengs bstod kyi rgyab gnyer tshul bzhin mdzad rgyu yin pa bcas mchog dman bar gsum thams cad kyi yid la nges par byas shing bsam sbyor gnyis ka'i sgo nas spang blang tshul bzhin du yong ba gyis/__/zhes rab byung bco lnga pa'i/__tshes dge bar bla ma gong ma rnams dang /__sprul pa'i chos rgyal rim byon gyis byin gyis brlabs pa'i gnas lcang ra lha klu 'chi med dga' tshal gyi pho brang nas spel ba sarba dA su shre yo bi dza yan+tu//___//___!_
