JKW-KABUM-01-KA-001-005-wylie
byams pa mgon po la bsngags pa dad pa'i me tog/
rje btsun byams pa mgon po la bsngags pa'i tshigs su bcad pa dad pa'i me tog ces bya ba bzhugs so/__/na mo b+haT+TAr ka mai tri nA thA ya/__sngon tshe gser bzang 'od kyi rgyal ba las/__/rmad byung byang chub sems gnyis yongs bzung nas/__/thabs mkhas 'jug pa bde ba'i lam kho nas/__/kun mkhyen rgyal sar 'dzegs mkhas ma pham pa/__/bde gshegs rin chen gdugs kyi bstan pa la/__/byams pa'i bdud rtsis yid can gdung sel bas/__/sngon med zla gzhon gsar pa khyod cig ces/__/sa gsum snyan par grags so ma pham pa/__/slad nas gnyis skyes gzhon nu'i rtse dga' las/__/byang chub spyod pa'i lang tsho rdzogs gyur tshe/__/phan bdes 'jig rten rgyas par 'gengs mdzad pa'i/__/ya mtshan nyin bzhin dran no ma pham pa/__/shes rab snying rje'i nus stobs rmad byung bas/___/dka' ba med par yid srubs mthar byas te/__/thar pa'i zil dngar bdag gir bzhes mdzad pa'i/__/rnam thar mtshungs pa med do ma pham pa/__/'di na nyi ma'i gnyen gyi bstan pa la/__/cung zad bya ba byas kyang phyi ma'i dus/__/khyod kyis dbugs dbyung mdzad ces gang gsungs pa'i/__/bden tshig snying nas bskul lo ma pham pa/__/shin tu sbyangs pa'i nor bu'i phung po ni/__/mtshan dpe'i nyams brgyas rol pa nyid dam zhes/__/som nyi'i pha mthar 'god pa'i ye shes sku/__/mngon sum mig sngar ston cig ma pham pa/__/yan lag drug cu'i rgyud mang dbyangs snyan po/__/zab rgyas theg pa mchog gi gzhung lugs la/__/sbyar bas mtha' gnyis gnyid las slong mdzad pas/__/rna ba bdud rtsir mdzod cig ma pham pa/__/'di zhes brjod pa'i spros pa brtul gyur kyang /__/mkhyen brtse'i gzigs pa bye ba phrag brgya yis/__/yid can kun gyi rjes su 'jug brtson pas/__/bdag rgyud byin gyis rlobs shig ma pham pa/__/mi phyed snying nas dad pa'i nga ro yis/__/rgyal ba'i sras kyi rnam thar bsngags pa dang /__/rjes su slob pa'i smon pas mdun bdar na/__/byang chub bar du skyongs shig ma pham pa/__/bdag dang bdag la bltos pa'i 'gro ba kun/__/srid dang zhi las nges par 'byung ba'i lam/__/rtse gcig bsnyen cing de las gzhan gyur pa'i/__/yid byed mtshan ma sol cig ma pham pa/__/tshul khrims dag cing thos bsam ting 'dzin dang /__/gzungs dang spobs pa'i rin chen grur zhugs te/__/nyon mongs shes bya snyoms 'jug chu gter las/__/brgal ba'i ded dpon mdzod cig ma pham pa/__/nam zhig tshe 'di'i spyod yul nub pa'i tshe/__/dga' ldan chos kyi mdun sa nyams dga' bar/__/'phags pa dgyes pa'i phyag gis yongs bzung nas/__/lung bstan dbugs dbyung mdzod cig ma pham pa/__/mdor na khyod bzhin byang chub mchog brnyes nas/__/mkha' mthas gtugs pa'i yid can rgya mtsho kun/__/phan bde'i lam bzang 'god pa'i phrin las kyi/__/bskal pa bzang por sbyor cig ma pham pa/__/zhes pa'ang rgyal khams nyul ba'i bya bral ba mkhyen brtse'i ming gis rang lo nyer gcig par byang chub sems dpa' chen po gzhon nu rgyal mchog pa'i phrin las las byung ba rong dga' ldan byams pa gling gi snang brnyan chen mo'i mdun sar ji ltar gsol ba btab pa bzhin/__slad nas kyang yang yang gsol ba btab pa de de bzhin du 'grub par gyur cig__/_sarba dA ka l+yA NaM b+ha ba tu//___//__!_
