JKW-KABUM-01-KA-003-004

🚧 This website is under continued development. We appreciate your patience!

Previous Text Back to Volume PageNext Text

འཕགས་མ་གཙུག་ཏོར་རྣམ་རྒྱལ་ལ་བསྟོད་པ་འཆི་མེད་གྲུབ་པ་སྤྲིན་གྱི་རོལ་མོ།

Wylie title	'phags ma gtsug tor rnam rgyal la bstod pa 'chi med grub pa sprin gyi rol mo
Location	mkhyen brtse'i bka' 'bum Volume 1, sde tshan 3, Text 4, Pages 462-469 (Folios 8b1 to 12a3)
Author	འཇམ་དབྱངས་མཁྱེན་བརྩེའི་དབང་པོ་
Less details More details
Citation	'jam dbyangs mkhyen brtse'i dbang po. phags ma gtsug tor rnam rgyal la bstod pa 'chi med grub pa sprin gyi rol mo. In jam dbyangs mkhyen brtse'i dbang po'i bka' 'bum, Vol. 1: 462-469. Khams sde dge rdzong sar dgon: Rdzong sar blo gros phun tshogs, 2020.
Genre	Verses of Praise - bstod pa
Deity	gtsug gtor rnam rgyal ma
Colophon	།དེ་ལྟར་འཕགས་མ་གཙུག་གཏོར་རྣམ་པར་ རྒྱལ་མ་ལ་བསྟོད་ཅིང་གསོལ་བ་གདབ་པའི་རིམ་པ་འཆི་མེད་གྲུབ་པ་སྤྲིན་གྱི་རོལ་མོ་འདི་ནི་རང་གཞན་གྱི་དོན་དུ་ཉེ་བར་དམིགས་ཏེ་བློ་གསལ་ཨ་བྷ་ཡས་རང་ལོ་བཅུ་བདུན་པར་རིག་གྲོལ་ཕུན་ཚོགས་གླིང་དུ་ལེགས་པར་སྦྱར་བ་འདིས་ཀྱང་བླ་ན་མེད་པའི་དགེ་མཚན་དམ་པ་རྨད་དུ་བྱུང་བ་འབྱུང་བར་གྱུར་ཅིག
	de ltar 'phags ma gtsug gtor rnam par _rgyal ma la bstod cing gsol ba gdab pa'i rim pa 'chi med grub pa sprin gyi rol mo 'di ni rang gzhan gyi don du nye bar dmigs te blo gsal a b+ha yas rang lo bcu bdun par rig grol phun tshogs gling du legs par sbyar ba 'dis kyang bla na med pa'i dge mtshan dam pa rmad du byung ba 'byung bar gyur cig

1 Texts in this Section (sde tshan or chos tshan)

4 462-469	འཕགས་མ་གཙུག་ཏོར་རྣམ་རྒྱལ་ལ་བསྟོད་པ་འཆི་མེད་གྲུབ་པ་སྤྲིན་གྱི་རོལ་མོ། 'phags ma gtsug tor rnam rgyal la bstod pa 'chi med grub pa sprin gyi rol mo Verses of Praise - bstod pa	Text page View PDF
	[[|འཇམ་དབྱངས་མཁྱེན་བརྩེའི་དབང་པོ་ ()]]

Tibetan Text

Wylie

[edit]

འཕགས་མ་གཙུག་ཏོར་རྣམ་རྒྱལ་ལ་བསྟོད་པ་འཆི་མེད་གྲུབ་པ་སྤྲིན་གྱི་རོལ་མོ་ཞེས་བྱ་བ་བཞུགས་སོ།། །།རྒྱ་གར་སྐད་དུ། །ཨཱཪྻཱ་ཨུཥྞཱི་ཥ་བི་ཛ་ཡཱི་སྟོ་ཏྲཾ་ནཱ་མ། བོད་སྐད་དུ། འཕགས་མ་གཙུག་ཏོར་རྣམ་རྒྱལ་ལ་བསྟོད་པ་ཞེས་བྱ་བ། །ཐམས་ཅད་མཁྱེན་པ་ལ་ཕྱག་འཚལ་ལོ། །བློ་ལྡན་གང་ཞིག་མཚན་ཙམ་འཛིན་ནམ་འོན་ཏེ་ཐོས་པ་དག་གིས་ཀྱང་། །སྣ་ཚོགས་འཇིགས་རྟེན་སྡུག་བསྔལ་ཚོགས་ཀུན་ཉེ་བར་བཅོམ་པའི་དེ་མ་ཐག །འཆི་མེད་ཚེ་དང་རྒ་ན་རྒུད་པའི་རྐྱེན་གྱིས་མི་འཕྲོག་ལང་ཚོའི་སྟོབས། །དད་དང་ཤེས་རབ་བསོད་ནམས་འབྱོར་པ་མངོན་དུ་སྩོལ་མཛད་དེ་བསྟོད་བྱ། །གཟོད་མ་ཉིད་ནས་བསྐལ་པ་དུ་མར་ཚོགས་གཉིས་ཆུ་གཏེར་བསྲུབས་པ་ལས། །ཐར་པ་མཆོག་གི་ཆ་ཤས་ཡོངས་གང་བྱང་ཆུབ་ཕྱོགས་ཀྱི་ཆོས་རྣམས་ཀྱི། །རི་དྭགས་གཞོན་ནུའི་རྟགས་ཀྱིས་མངོན་རོལ་བདེ་གཤེགས་ཆོས་སྐུའི་རྟེན་མཆོག་གི །གཞལ་ཡས་ཁང་ཆེན་མི་མཐུན་ཕྱོགས་ལས་རྣམ་པར་རྒྱལ་བ་དེ་ལ་འདུད། །དེ་དབུས་ཆར་སྤྲིན་དཀར་པོའི་བར་བར་ཨུཏྤལ་དམར་པོས་མདངས་པ་བཞིན། །སྲབ་འཇམ་མཉེན་ལྕུག་མཆོག་ཏུ་ཡིད་འོང་འདབ་སྟོང་རྒྱས་པའི་ཆུ་སྐྱེས་རྩེར། །བརྒྱད་གཉིས་ཆ་ལྡན་རྙོག་པའི་ར་རི་ཀུན་ནས་བྲལ་བའི་དཔལ་དེ་ཡིས། །ཁྱོད་ཞབས་འཁོར་བའི་རེ་ཁཱས་མཚན་པ་ཉེ་བར་བསྟེན་པ་དེ་ལ་འདུད། །གང་སྐུ་སྟོན་ཟླ་ཆ་རྫོགས་འོད་ཟེར་བརྒྱ་སྟོང་བརྩེགས་པའི་དཔལ་ལྟར་གསལ། །སྤྱན་གྱི་གེ་སར་རྣམ་པར་མཛེས་ལྡན་འགྲོ་ལ་རྗེས་སུ་བརྩེ་བའི་གཟུགས། །གནག་སྣུམ་རལ་པའི་ཆུན་པོ་གཡོ་བ་པུཎྜ་རཱི་ཀས་རྣམ་བཅིངས་རྩེར། །ཆོས་དབྱིངས་ཡེ་ཤེས་མཚན་དཔེའི་ཟློས་གར་རིགས་ཀྱི་བདག་པོ་འཛིན་དེར་འདུད། །རྩ་བའི་ཞལ་ནི་ཆུ་ཤེལ་ཇི་བཞིན་གཡས་པ་ཛམ་བུའི་གསེར་གྱི་མདོག །གཅིག་ཤོས་ཨིནྡྲ་ནཱི་ལའི་འོད་ལྟར་ཀུན་ཏུ་སྔོ་བའི་གཟི་བརྗིད་ཀྱིས། །ལོག་འདྲེན་ཚོགས་ཀུན་རྣམ་པར་འཆིང་བའི་ཞགས་པ་ཉིད་དོ་དེ་ལྡོག་པའི། །ཡོན་ཏན་མ་ལུས་མངོན་དུ་འགུགས་བྱེད་དབང་གི་མཆིལ་པ་རྣོན་པོའང་ལགས། །རྣམ་པར་ཐར་པ་གསུམ་དང་ལྡན་པའི་སྤྱན་གྱི་ཡེ་ཤེས་མེ་བོ་ཡིས། །སྡུག་བསྔལ་གསུམ་གྱི་གཅོང་རོང་གཏིང་ཟབ་འཁོར་བའི་ཚང་ཚིང་བསྲེགས་ནས་སླར། །དུས་གསུམ་ཀུན་ཏུ་ཇི་ལྟ་ཇི་སྙེད་མཁྱེན་པའི་ཡེ་ཤེས་སྣང་བ་དེས། །ཁམས་གསུམ་འཛིན་པའི་རབ་རྨོངས་མུན་པ་ཡོངས་སུ་བསལ་མཛད་དེ་ལ་འདུད། །ཕྱག་གི་དཀྱིལ་འཁོར་བརྒྱད་ཀྱི་གཡས་པར་ཕྲིན་ལས་བཞི་སྟེར་རྡོ་རྗེ་དང་། །པདྨ་དཀར་པོའི་ཞབས་མཐིལ་མངོན་བསྟེན་བཅོམ་ལྡན་འོད་སྣང་མཐའ་ཡས་ཆེ། །དུས་མ་ཡིན་པའི་ཉི་བུའི་སྙིང་འབིགས་མྱུར་དུ་འགྲོ་བའི་མཚོན་ཆའི་དཔལ། །ཐར་པའི་དཔལ་ཀུན་ཡོངས་སུ་སྟེར་བྱེད་མཆོག་སྦྱིན་ཕྱག་རྒྱས་མཛེས་དེར་འདུད། །གཅིག་ཤོས་དང་པོར་བགེགས་ཀྱི་ཚོགས་ཀུན་གཟིར་དང་འགུགས་པའི་སྡིགས་མཛུབ་ཞགས། །སྙིང་རྗེ་ཆེན་པོས་འགྲོ་ཀུན་སྡུད་མཛད་ཤེས་རབ་མཆོག་གི་རཏྣའི་གཞུ། །སྐྱེ་རྒ་ན་འཆིའི་སྡུག་བསྔལ་དབུགས་འབྱིན་ཐར་པའི་དཔལ་སྟེར་མི་འཇིགས་རྒྱ། །ལས་དང་ཉོན་མོངས་སྒྲིབ་གཉིས་འཁྲུད་མཛད་བདུད་རྩིའི་བུམ་བཟང་འཛིན་དེར་འདུད། །བརྟེན་པ་མེད་པར་མཁའ་དབྱིངས་ལ་ཤར་དབང་པོའི་གཞུ་ཡི་ཞུན་མ་ཡིས། །ཁ་དོག་བསྒྱུར་འདྲའི་ལྷ་རྫས་རེག་བྱ་ལྕིད་ཀྱིས་སྤངས་པའི་ཤམ་ཐབས་དང་། །ག་བུར་འཛིན་པའི་ཚོན་གྱིས་མངོན་བསྒྱུར་སྟོད་གཡོགས་སར་པས་མཛེས་བྱས་ཤིང་། །ཡན་ལག་འཁྲི་ཤིང་རིན་ཆེན་དྲྭ་བའི་རྒྱན་ཀྱིས་ཀུན་ཏུ་སྤྲས་ལ་འདུད། །འཁོར་གྱི་ཚོགས་ནི་སྙིང་རྗེའི་གཏེར་འཛིན་འཕགས་པ་མཆོག་དང་གསང་བའི་བདག །བསྡུ་དངོས་བཞི་ཡི་རང་བཞིན་ལས་སྐྱེས་ཉོན་མོངས་བདུད་དགྲ་ཀུན་བཅོམ་པའི། །མི་གཡོ་མགོན་དང་འདོད་པའི་རྒྱལ་པོ་དབྱུག་སྔོན་བཟུང་དང་སྟོབས་པོ་ཆེ། །མེ་ཏོག་ཕྲེང་འཛིན་གཙང་རིས་ལྷ་བུ་གཞོན་ནུ་གཉིས་བཅས་ཀུན་ལ་འདུད། །གང་ཞིག་ཀུན་ཏུ་ཉེ་བར་རབ་ཞི་གདོད་ནས་རྣམ་དག་ཡེ་ཤེས་ནི། །སྣ་ཚོགས་གཟུང་འཛིན་སྤྲོས་པ་ཀུན་བྲལ་འོད་གསལ་དབུ་མའི་ཆོས་ཉིད་ཅན། །འཕོ་འགྱུར་མེད་བཞིན་གང་འདུལ་མཛད་པ་ལྷུན་གྱིས་གྲུབ་པར་རྟག་འཇུག་པའི། །ཟག་བྲལ་མཆོག་གི་ཡོན་ཏན་གྱིས་དགྱེས་གཙུག་ཏོར་ཆོས་ཀྱི་སྐུ་ལ་འདུད། །སྨོན་ལམ་སྟོབས་ཀྱིས་མངོན་པ་སྐྱེད་བསྲིངས་དཔག་ཡས་དག་པའི་ཞིང་ཁམས་སུ། །རྨད་བྱུང་ཚོགས་གཉིས་བྱེད་པོས་རབ་བསྐྲུན་མཚན་དཔེའི་འོད་ཟེར་དྲྭ་བ་ཡིས། །ཁྲག་ཁྲིག་བདུད་ཀྱི་མུན་པ་ཕམ་བགྱིད་གདུལ་བྱའི་ཁམས་དབང་བསམ་པ་དང་། །རྗེས་སུ་མཐུན་པར་དགའ་བས་ཚིམས་མཛད་གཙུག་ཏོར་ལོངས་སྤྱོད་རྫོགས་ལ་འདུད། །འགྲོ་འདིའི་ཀུན་རྟོག་རྒྱ་མཚོའི་རླབས་བཞིན་ཐ་དད་བར་མེད་མངོན་འཕྱོ་བ། །རྒ་ན་འཆི་དང་སྐྱེ་བ་ལ་སོགས་སྡུག་བསྔལ་འཛིན་ཁྲིའི་གྲོང་ཁྱེར་ཅན། །དེ་ལས་སྣ་ཚོགས་ཐབས་ཚུལ་དུ་མའི་མཛད་པ་དཔག་ཡས་རིན་ཆེན་གྲུས། །ཞི་བདེ་ཐར་པའི་གླིང་དུ་འདྲེན་མཛད་གཙུག་ཏོར་སྤྲུལ་པའི་སྐུ་ལ་འདུད། །འོད་སྣང་མཐའ་ཡས་ཚེ་དཔག་མེད་མགོན་གཙུག་ཏོར་གདེངས་ཀའི་ཆུ་གཏེར་ལས། །ཐབས་དང་ཤེས་རབ་མི་ཕྱེད་འདྲེས་གྱུར་ཐུགས་རྗེ་ཆེན་པོའི་ཟླ་ཤེལ་དབང་། །མངོན་པར་འཐོན་གང་ཕན་དང་བདེ་བའི་འཛུམ་ཟེར་གསལ་པའི་འཇོ་སྒེག་གིས། །སྲིད་པའི་མུན་ནག་ཕུང་པོར་རྣམ་རྒྱལ་ཞི་བའི་ཀུ་མུད་བཞད་དེར་འདུད། །གང་གསུང་སྒྲ་དང་ཚིག་གིས་མི་མཚོན་ལུང་རྟོགས་ཆར་སྤྲིན་རོལ་མོ་ནི། །སྐལ་བཟང་གཉིས་སྐྱེས་རྣ་བའི་བཅུད་ལེན་རྟག་པར་སྦྱིན་པའི་དེ་མ་ཐག །བྱང་ཆུབ་སྤྱོད་པའི་སྒྲོ་གཤོག་ཟླུམ་པོས་གྲུབ་གཉིས་རོལ་གར་བསྒྱུར་བ་དང་། །ལྷན་ཅིག་རྣམ་གྲོལ་མཆོག་གི་མངལ་ཁུར་མངོན་པར་འཛིན་མཛད་དེ་ལ་འདུད། །ཁྱོད་ནི་འཇིག་རྟེན་གསུམ་གྱི་ཐོར་ཚུགས་རིན་ཆེན་དྲྭ་བས་སྤ་བ་དེར། །ཞབས་མཐིལ་བཀོད་ལ་ངོ་མཚར་ཅི་ཞིག་དེ་ཀུན་འདྲེན་པའི་རྒྱལ་བ་ཡིས། །ཐུགས་རྗེ་སྐུ་མཛད་ཡེ་ཤེས་རབ་སྐྱེད་ཡུམ་གྱུར་ཤེས་རབ་ཕར་ཕྱིན་དང་། །གཉིས་སུ་མ་ཡིན་མཉམ་པར་བཞུགས་པའི་ངོ་མཚར་མཆོག་དེར་བསྟོད་པར་བགྱི། །རྟག་ཏུ་མི་འབྲལ་ཏིང་འཛིན་བྱེད་པོས་ཁྱོད་སྐུ་རབ་མཛེས་ལྷུན་སྟུག་པ། །ཡིད་ཀྱི་ཐིག་ལེར་རོ་གཅིག་བཀོད་ཅིང་གྲགས་སྟོང་གསང་སྔགས་རོལ་མོ་ནི། །མགྲིན་པའི་རྒྱན་དུ་བར་མེད་འཁྲོལ་བས་དགྱེས་བའི་སྤྱན་ཟུར་གཡོ་བའི་འོད། །གུས་པ་ཆེན་པོའི་ཆུ་སྐྱེས་རྩེར་སོན་དགེ་མཚན་འདབ་བརྒྱ་དགོད་པར་ཤོག །བརྟན་གཡོའི་འབྱུང་ལྔའི་དངས་མ་ཀུན་དང་ཕུན་ཚོགས་རིང་འཚོའི་ཟིལ་དངར་གྱིས། །སྲོག་གི་མདུད་པ་དམ་པོར་བཅིངས་གྱུར་ལྷ་དང་དྲང་སྲོང་གྲུབ་པའི་སྡེ། །སྐྱེ་སོགས་བརྒལ་དཀའི་ཕ་མཐར་སོན་པའི་སྲས་བཅས་རྒྱལ་བའི་ཐུགས་རྗེའི་དཔལ། །ཀུན་ནས་བསྡུས་ཏེ་རྣལ་འབྱོར་ལ་བརྩོན་སྐལ་བཟང་འགྲོ་ལ་རྒྱ་ཆེར་སྩོལ། །དེ་མཐུས་མི་བགྲེས་ལང་ཚོའི་སྟོབས་ཀྱིས་གཉིས་འཐུང་དབང་པོ་ཟིལ་གནོན་ཞིང་། །བསྲུབས་སྐྱེས་བདུད་རྩིའི་བཅུད་ལེན་གྲུབ་བཞིན་བསྐལ་པར་མི་ཤིགས་རྡོ་རྗེའི་སྲོག །ཚེ་གྲངས་མེད་པར་ཀུན་ནས་ཐོབ་པའི་ལྷ་ཡི་ཚལ་སྐྱེས་གོ་བི་དཱ། །བསོད་ནམས་ཡེ་ཤེས་ལོ་འདབ་རབ་གཡོ་མཆོག་གི་འབྲས་བུ་འཛིན་པར་ཤོག །ཁྱད་པར་དུས་མིན་འཆི་བའི་འཇིགས་སྟེར་ཤ་ཟ་ཁྲོས་པའི་གདོང་པ་ལྟའི། །ནད་ཀྱིས་འཚེ་དང་རྒྱལ་པོའི་ཆད་པ་གཅན་གཟན་ཆུ་གཏེར་འཁྲུགས་པའི་རླབས། །ཆོམ་རྐུམ་བྲང་འགྲོ་སེང་གེ་ཁྲོས་དང་གཉིས་འཐུང་ལ་སོགས་གདུག་པའི་རྐྱེན། །ཐུགས་བརྩེའི་ཤུགས་ཀྱིས་མྱུར་དུ་བཅོམ་ནས་བདེ་བའི་གོ་སར་སོན་གྱུར་ཅིག །ལམ་གསུམ་འགྲོ་བས་རྟག་པར་བཀྲུས་ཀྱང་ཅུང་ཟད་དག་པའི་སྐབས་བྲལ་ཞིང་། །ལྷ་ཡི་དབང་པོའི་ལག་ན་ཉལ་བའི་རྡོ་རྗེའི་མཚོན་གྱིས་བརྡར་བས་མིན། །ཤིན་ཏུ་གནག་པའི་ལས་ཀྱི་མུན་པས་མཐའ་མེད་འཁོར་བར་འཕྱན་གྱུར་གང་། །ཁྱོད་ཞལ་དྲན་ཅིང་རིག་སྔགས་བཟླས་པའི་ཟླ་བའི་ཟེགས་མས་མྱུར་བཅོམ་མཛོད། །སྔོན་བྱུང་སྐབས་གསུམ་གྲོང་ཁྱེར་ལ་རྩེན་ཤིན་ཏུ་བརྟན་པ་དུས་མིན་གྱི། །འཆི་དང་ལས་ཀྱིས་སྡུག་བསྔལ་ཕུང་པོར་མངོན་པར་འཇུག་ཐོས་དེ་ཡི་ཚེ། །ཀུན་ནས་གདུང་བའི་སྤྲིན་བཞོན་བསྐུལ་ཏེ་བཅོམ་ལྡན་འདས་ལ་གསོལ་བའི་མོད། །ཁྱོད་ཀྱི་རིག་སྔགས་བསྟན་ནས་ཞི་བཞིན་བདག་ཀྱང་དེ་འདྲར་མཛད་དུ་གསོལ། །འདི་ན་པདྨ་གཞོན་ཤ་ཆགས་པ་འགྲམ་པའི་འཇོ་སྒེག་བསྟེན་བྱས་པའི། །རི་དྭགས་ཚོགས་རྣམས་ནགས་ན་རོལ་བཞིན་རྣལ་འབྱོར་ལ་བརྩོན་འཁོར་བཅས་ཀྱང་། །བས་མཐའི་གནས་མཆོག་ཤིན་ཏུ་ཉམས་དགར་ཤིང་ཤུན་འཇམ་པོའི་ཁང་བཟང་དབུས། །སྦྱོང་ཡོན་བཅུ་གཉིས་ཚུལ་བཞིན་སྤྱོད་ནས་སྲོག་གི་ལྷག་མ་དོན་ལྡན་ཤོག །སྟོང་ཉིད་སྙིང་རྗེའི་ཤིང་རྟའི་དབང་གྱུར་ཁྱོད་ཞབས་པདྨའི་རྩ་ལག་གིས། །བརྒྱད་གཉིས་འཇིགས་པའི་མུན་པ་རབ་ཞི་རིག་པའི་བློ་དང་བསོད་ནམས་དཔལ། །དད་ནོར་གཏོང་སོགས་ཡོན་ཏན་བདུན་ལྡན་ཨུཏྤལ་གཞོན་ནུ་ཉེར་རྒྱས་ཤིང་། །ལེགས་ཚོགས་དབང་གྱུར་ཚུལ་མིན་ཀུན་མུད་ཀུན་ནས་ཀུན་ཏུ་ཟུམ་པར་མཛོད། །ནམ་ཞིག་འདིར་སྣང་ནུབ་པར་གྱུར་ཚེ་གང་གི་ཐུགས་རྗེའི་ཕྱག་སོར་གྱིས། །དགྱེས་པར་བཟུང་ནས་ཉམ་ངའི་འཕྲང་ལས་དབུགས་འབྱིན་སྩོལ་བའི་དེ་མ་ཐག །ཆུ་སྐྱེས་གཞོན་ནུའི་མངལ་ལས་གྲོལ་བའི་དག་པའི་ལུས་མཆོག་འཛིན་པའི་མོད། །ཚེ་དང་ཡེ་ཤེས་འོད་ཟེར་དཔག་མེད་མགོན་པོ་དེ་ཡི་ཞལ་མཐོང་ཤོག །དེ་ལྟར་གུས་པས་གསོལ་བ་བཏབ་ཅིང་ལུས་ཀྱི་བ་སྤུའི་འཁྲི་ཤིང་གཡོ། །ངག་གི་གདུང་དབྱངས་མགྲིན་པར་བརྩེགས་ནས་ཡིད་ཀྱིས་ཉིན་མཚན་བར་མེད་དུ། །འཕགས་མ་གང་གི་ཡོན་ཏན་ལ་དད་བསྟོད་པའི་རྒྱལ་པོ་འདི་བཀླགས་པས། །ཇི་སྐད་གསུངས་པའི་དོན་རྣམས་གྲུབ་སྟེ་སྐལ་བ་བཟང་ལྡན་སྐྱེ་བོར་འགྱུར། །དེ་ལྟར་འཕགས་མ་གཙུག་གཏོར་རྣམ་པར་ རྒྱལ་མ་ལ་བསྟོད་ཅིང་གསོལ་བ་གདབ་པའི་རིམ་པ་འཆི་མེད་གྲུབ་པ་སྤྲིན་གྱི་རོལ་མོ་འདི་ནི་རང་གཞན་གྱི་དོན་དུ་ཉེ་བར་དམིགས་ཏེ་བློ་གསལ་ཨ་བྷ་ཡས་རང་ལོ་བཅུ་བདུན་པར་རིག་གྲོལ་ཕུན་ཚོགས་གླིང་དུ་ལེགས་པར་སྦྱར་བ་འདིས་ཀྱང་བླ་ན་མེད་པའི་དགེ་མཚན་དམ་པ་རྨད་དུ་བྱུང་བ་འབྱུང་བར་གྱུར་ཅིག ། ༈

[edit]

'phags ma gtsug tor rnam rgyal la bstod pa 'chi med grub pa sprin gyi rol mo zhes bya ba bzhugs so//__//rgya gar skad du/__/AR+YA uSh+NI Sha bi dza yI sto traM nA ma/__bod skad du/__'phags ma gtsug tor rnam rgyal la bstod pa zhes bya ba/__/thams cad mkhyen pa la phyag 'tshal lo/__/blo ldan gang zhig mtshan tsam 'dzin nam 'on te thos pa dag gis kyang /__/sna tshogs 'jigs rten sdug bsngal tshogs kun nye bar bcom pa'i de ma thag__/'chi med tshe dang rga na rgud pa'i rkyen gyis mi 'phrog lang tsho'i stobs/__/dad dang shes rab bsod nams 'byor pa mngon du stsol mdzad de bstod bya/__/gzod ma nyid nas bskal pa du mar tshogs gnyis chu gter bsrubs pa las/__/thar pa mchog gi cha shas yongs gang byang chub phyogs kyi chos rnams kyi/__/ri dwags gzhon nu'i rtags kyis mngon rol bde gshegs chos sku'i rten mchog gi__/gzhal yas khang chen mi mthun phyogs las rnam par rgyal ba de la 'dud/__/de dbus char sprin dkar po'i bar bar ut+pal dmar pos mdangs pa bzhin/__/srab 'jam mnyen lcug mchog tu yid 'ong 'dab stong rgyas pa'i chu skyes rtser/__/brgyad gnyis cha ldan rnyog pa'i ra ri kun nas bral ba'i dpal de yis/__/khyod zhabs 'khor ba'i re khAs mtshan pa nye bar bsten pa de la 'dud/__/gang sku ston zla cha rdzogs 'od zer brgya stong brtsegs pa'i dpal ltar gsal/__/spyan gyi ge sar rnam par mdzes ldan 'gro la rjes su brtse ba'i gzugs/__/gnag snum ral pa'i chun po g.yo ba puN+Da rI kas rnam bcings rtser/__/chos dbyings ye shes mtshan dpe'i zlos gar rigs kyi bdag po 'dzin der 'dud/__/rtsa ba'i zhal ni chu shel ji bzhin g.yas pa dzam bu'i gser gyi mdog__/gcig shos in+d+ra nI la'i 'od ltar kun tu sngo ba'i gzi brjid kyis/__/log 'dren tshogs kun rnam par 'ching ba'i zhags pa nyid do de ldog pa'i/__/yon tan ma lus mngon du 'gugs byed dbang gi mchil pa rnon po'ang lags/__/rnam par thar pa gsum dang ldan pa'i spyan gyi ye shes me bo yis/__/sdug bsngal gsum gyi gcong rong gting zab 'khor ba'i tshang tshing bsregs nas slar/__/dus gsum kun tu ji lta ji snyed mkhyen pa'i ye shes snang ba des/__/khams gsum 'dzin pa'i rab rmongs mun pa yongs su bsal mdzad de la 'dud/__/phyag gi dkyil 'khor brgyad kyi g.yas par phrin las bzhi ster rdo rje dang /__/pad+ma dkar po'i zhabs mthil mngon bsten bcom ldan 'od snang mtha' yas che/__/dus ma yin pa'i nyi bu'i snying 'bigs myur du 'gro ba'i mtshon cha'i dpal/__/thar pa'i dpal kun yongs su ster byed mchog sbyin phyag rgyas mdzes der 'dud/__/gcig shos dang por bgegs kyi tshogs kun gzir dang 'gugs pa'i sdigs mdzub zhags/__/snying rje chen pos 'gro kun sdud mdzad shes rab mchog gi rat+na'i gzhu/__/skye rga na 'chi'i sdug bsngal dbugs 'byin thar pa'i dpal ster mi 'jigs rgya/__/las dang nyon mongs sgrib gnyis 'khrud mdzad bdud rtsi'i bum bzang 'dzin der 'dud/__/brten pa med par mkha' dbyings la shar dbang po'i gzhu yi zhun ma yis/__/kha dog bsgyur 'dra'i lha rdzas reg bya lcid kyis spangs pa'i sham thabs dang /__/ga bur 'dzin pa'i tshon gyis mngon bsgyur stod g.yogs sar pas mdzes byas shing /__/yan lag 'khri shing rin chen drwa ba'i rgyan kyis kun tu spras la 'dud/__/'khor gyi tshogs ni snying rje'i gter 'dzin 'phags pa mchog dang gsang ba'i bdag__/bsdu dngos bzhi yi rang bzhin las skyes nyon mongs bdud dgra kun bcom pa'i/__/mi g.yo mgon dang 'dod pa'i rgyal po dbyug sngon bzung dang stobs po che/__/me tog phreng 'dzin gtsang ris lha bu gzhon nu gnyis bcas kun la 'dud/__/gang zhig kun tu nye bar rab zhi gdod nas rnam dag ye shes ni/__/sna tshogs gzung 'dzin spros pa kun bral 'od gsal dbu ma'i chos nyid can/__/'pho 'gyur med bzhin gang 'dul mdzad pa lhun gyis grub par rtag 'jug pa'i/__/zag bral mchog gi yon tan gyis dgyes gtsug tor chos kyi sku la 'dud/__/smon lam stobs kyis mngon pa skyed bsrings dpag yas dag pa'i zhing khams su/__/rmad byung tshogs gnyis byed pos rab bskrun mtshan dpe'i 'od zer drwa ba yis/__/khrag khrig bdud kyi mun pa pham bgyid gdul bya'i khams dbang bsam pa dang /__/rjes su mthun par dga' bas tshims mdzad gtsug tor longs spyod rdzogs la 'dud/__/'gro 'di'i kun rtog rgya mtsho'i rlabs bzhin tha dad bar med mngon 'phyo ba/__/rga na 'chi dang skye ba la sogs sdug bsngal 'dzin khri'i grong khyer can/__/de las sna tshogs thabs tshul du ma'i mdzad pa dpag yas rin chen grus/_/zhi bde thar pa'i gling du 'dren mdzad gtsug tor sprul pa'i sku la 'dud/__/'od snang mtha' yas tshe dpag med mgon gtsug tor gdengs ka'i chu gter las/__/thabs dang shes rab mi phyed 'dres gyur thugs rje chen po'i zla shel dbang /__/mngon par 'thon gang phan dang bde ba'i 'dzum zer gsal pa'i 'jo sgeg gis/__/srid pa'i mun nag phung por rnam rgyal zhi ba'i ku mud bzhad der 'dud/__/gang gsung sgra dang tshig gis mi mtshon lung rtogs char sprin rol mo ni/__/skal bzang gnyis skyes rna ba'i bcud len rtag par sbyin pa'i de ma thag__/byang chub spyod pa'i sgro gshog zlum pos grub gnyis rol gar bsgyur ba dang /__/lhan cig rnam grol mchog gi mngal khur mngon par 'dzin mdzad de la 'dud/__/khyod ni 'jig rten gsum gyi thor tshugs rin chen drwa bas spa ba der/__/zhabs mthil bkod la ngo mtshar ci zhig de kun 'dren pa'i rgyal ba yis/__/thugs rje sku mdzad ye shes rab skyed yum gyur shes rab phar phyin dang /__/gnyis su ma yin mnyam par bzhugs pa'i ngo mtshar mchog der bstod par bgyi/__/rtag tu mi 'bral ting 'dzin byed pos khyod sku rab mdzes lhun stug pa/__/yid kyi thig ler ro gcig bkod cing grags stong gsang sngags rol mo ni/__/mgrin pa'i rgyan du bar med 'khrol bas dgyes ba'i spyan zur g.yo ba'i 'od/__/gus pa chen po'i chu skyes rtser son dge mtshan 'dab brgya dgod par shog__/brtan g.yo'i 'byung lnga'i dngas ma kun dang phun tshogs ring 'tsho'i zil dngar gyis/___/srog gi mdud pa dam por bcings gyur lha dang drang srong grub pa'i sde/__/skye sogs brgal dka'i pha mthar son pa'i sras bcas rgyal ba'i thugs rje'i dpal/__/kun nas bsdus te rnal 'byor la brtson skal bzang 'gro la rgya cher stsol/__/de mthus mi bgres lang tsho'i stobs kyis gnyis 'thung dbang po zil gnon zhing /__/bsrubs skyes bdud rtsi'i bcud len grub bzhin bskal par mi shigs rdo rje'i srog__/tshe grangs med par kun nas thob pa'i lha yi tshal skyes go bi dA/__/bsod nams ye shes lo 'dab rab g.yo mchog gi 'bras bu 'dzin par shog__/khyad par dus min 'chi ba'i 'jigs ster sha za khros pa'i gdong pa lta'i/__/nad kyis 'tshe dang rgyal po'i chad pa gcan gzan chu gter 'khrugs pa'i rlabs/__/chom rkum brang 'gro seng ge khros dang gnyis 'thung la sogs gdug pa'i rkyen/__/thugs brtse'i shugs kyis myur du bcom nas bde ba'i go sar son gyur cig__/lam gsum 'gro bas rtag par bkrus kyang cung zad dag pa'i skabs bral zhing /__/lha yi dbang po'i lag na nyal ba'i rdo rje'i mtshon gyis brdar bas min/__/shin tu gnag pa'i las kyi mun pas mtha' med 'khor bar 'phyan gyur gang /__/khyod zhal dran cing rig sngags bzlas pa'i zla ba'i zegs mas myur bcom mdzod/__/sngon byung skabs gsum grong khyer la rtsen shin tu brtan pa dus min gyi/__/'chi dang las kyis sdug bsngal phung por mngon par 'jug thos de yi tshe/__/kun nas gdung ba'i sprin bzhon bskul te bcom ldan 'das la gsol ba'i mod/__/khyod kyi rig sngags bstan nas zhi bzhin bdag kyang de 'drar mdzad du gsol/__/'di na pad+ma gzhon sha chags pa 'gram pa'i 'jo sgeg bsten byas pa'i/__/ri dwags tshogs rnams nags na rol bzhin rnal 'byor la brtson 'khor bcas kyang /__/bas mtha'i gnas mchog shin tu nyams dgar shing shun 'jam po'i khang bzang dbus/__/sbyong yon bcu gnyis tshul bzhin spyod nas srog gi lhag ma don ldan shog__/stong nyid snying rje'i shing rta'i dbang gyur khyod zhabs pad+ma'i rtsa lag gis/__/brgyad gnyis 'jigs pa'i mun pa rab zhi rig pa'i blo dang bsod nams dpal/__/dad nor gtong sogs yon tan bdun ldan ut+pal gzhon nu nyer rgyas shing /__/legs tshogs dbang gyur tshul min kun mud kun nas kun tu zum par mdzod/__/nam zhig 'dir snang nub par gyur tshe gang gi thugs rje'i phyag sor gyis/__/dgyes par bzung nas nyam nga'i 'phrang las dbugs 'byin stsol ba'i de ma thag__/chu skyes gzhon nu'i mngal las grol ba'i dag pa'i lus mchog 'dzin pa'i mod/__/tshe dang ye shes 'od zer dpag med mgon po de yi zhal mthong shog__/de ltar gus pas gsol ba btab cing lus kyi ba spu'i 'khri shing g.yo/__/ngag gi gdung dbyangs mgrin par brtsegs nas yid kyis nyin mtshan bar med du/__/'phags ma gang gi yon tan la dad bstod pa'i rgyal po 'di bklags pas/__/ji skad gsungs pa'i don rnams grub ste skal ba bzang ldan skye bor 'gyur/__/de ltar 'phags ma gtsug gtor rnam par _rgyal ma la bstod cing gsol ba gdab pa'i rim pa 'chi med grub pa sprin gyi rol mo 'di ni rang gzhan gyi don du nye bar dmigs te blo gsal a b+ha yas rang lo bcu bdun par rig grol phun tshogs gling du legs par sbyar ba 'dis kyang bla na med pa'i dge mtshan dam pa rmad du byung ba 'byung bar gyur cig__/_!