JKW-KABUM-20-WA-001-052

🚧 This website is under continued development. We appreciate your patience!

Previous Text Back to Volume PageNext Text

Wylie title	sa sprel lor rgyal dbang phyag na pad+mo mkhas grub rgya mtsho'i mdun thar rtse mkhan rin po che rdo rje 'chang rnal 'byor 'jam dpal bzang po nas legs 'bul phul ba'i skabs kyi yi ge
Location	mkhyen brtse'i bka' 'bum Volume 20, sde tshan 1, Text 52, Pages 89-94 (Folios 45a5 to 47b3)
Author	འཇམ་དབྱངས་མཁྱེན་བརྩེའི་དབང་པོ་
Less details More details
Citation	'jam dbyangs mkhyen brtse'i dbang po. sa sprel lor rgyal dbang phyag na pad+mo mkhas grub rgya mtsho'i mdun thar rtse mkhan rin po che rdo rje 'chang rnal 'byor 'jam dpal bzang po nas legs 'bul phul ba'i skabs kyi yi ge. In 'jam dbyangs mkhyen brtse'i dbang po'i bka' 'bum, Vol. 20: 89-94. Khams sde dge rdzong sar dgon: Rdzong sar blo gros phun tshogs, 2020.
Genre	Official Letters - chab shog

1 Texts in this Section (sde tshan or chos tshan)

52 89-94	ས་སྤྲེལ་ལོར་རྒྱལ་དབང་ཕྱག་ན་པདྨོ་མཁས་གྲུབ་རྒྱ་མཚོའི་མདུན་ཐར་རྩེ་མཁན་རིན་པོ་ཆེ་རྡོ་རྗེ་འཆང་རྣལ་འབྱོར་འཇམ་དཔལ་བཟང་པོ་ནས་ལེགས་འབུལ་ཕུལ་བའི་སྐབས་ཀྱི་ཡི་གེ། sa sprel lor rgyal dbang phyag na pad+mo mkhas grub rgya mtsho'i mdun thar rtse mkhan rin po che rdo rje 'chang rnal 'byor 'jam dpal bzang po nas legs 'bul phul ba'i skabs kyi yi ge Official Letters - chab shog	Text page View PDF
	འཇམ་དབྱངས་མཁྱེན་བརྩེའི་དབང་པོ་ ('jam dbyangs mkhyen brtse'i dbang po)

Tibetan Text

Wylie

[edit]

ས་སྤྲེལ་ལོར་རྒྱལ་དབང་ཕྱག་ན་པདྨོ་མཁས་གྲུབ་རྒྱ་མཚོའི་མདུན་ཐར་རྩེ་མཁན་རིན་པོ་ཆེ་རྡོ་རྗེ་འཆང་རྣལ་འབྱོར་འཇམ་དཔལ་བཟང་པོ་ནས་ལེགས་འབུལ་ཕུལ་བའི་སྐབས་ཀྱི་ཡི་གེ་སྙན་པའི་ངང་མོ་ཞེས་བྱ་བ་བཞུགས། ༄། ། ཡེཥཱདཡྻཀྲྀཔཱཙཤཱུནྱཏཱ྅། བྷེཛྙཱནསུམཱཡམེགྷཡོ། དག་པའི་སྣང་བའོ། །སུཤྲེཡོམཎིབ྄ྀཥྚདཱཔཊུཾ ཏྲཻལོཀྱེཥུསདཱབིཛཱིཡཏཱཾ། གང་དུ་སྟོང་དང་སྙིང་རྗེ་དབྱེར་མེད་པའི། །ཟུང་འཇུག་ཡེ་ཤེས་སྒྱུ་འཕྲུལ་དྲྭ་བའི་སྤྲིན། །དགེ་ལེགས་ནོར་བུའི་གྲུ་ཆར་འབེབས་མཁས་པ། །འཇིག་རྟེན་གསུམ་ན་རྟག་ཏུ་རྒྱལ་གྱུར་ཅིག ༡ །གུས་པ་ཆེན་པོའི་ལྷ་ཕྱག་གྲངས་མེད་པ་བཙལ་ཏེ་ཞུ་གསོལ། ། སྨན་མཛད་གྲུ་འཛིན་རི་བོའི་དགའ་ཚལ་ན། །དགྱེས་བཞིན་རོལ་པའི་འཕགས་མཆོག་མིག་མི་འཛུམ། །སྙིང་རྗེའི་དགའ་བ་རྒྱས་པའི་སྤྱན་རས་ཀྱིས། །གངས་ཅན་རི་བོའི་ལྗོངས་འདིར་རྟག་ཏུ་གཟིགས། ༢། དེ་ཚེ་ཡེ་ཤེས་དམ་པའི་སྙེ་མ་ནི། །བསིལ་ལྡན་བསོད་ནམས་ས་གཞིར་བསྐྱེད་བསྲིངས་པས། །མཐའ་ཀླས་སྲས་བཅས་རྒྱལ་བས་ཕྱག་བྱས་པའི། །ཡོན་ཏན་ལྗོན་པ་མཆོག་གཅིག་འཁྲུངས་པའི་མོད། ༣ །ཡིད་ཅན་རྫོགས་ལྡན་དུས་སྟོན་ཚུགས་པ་དང་། །ཐུབ་བསྟན་བཤད་སྒྲུབ་ལང་ཚོ་དར་བ་དང་། །དེས་ཀྱང་མི་མཐུན་རྒུད་པ་ཀུན་བསྲུང་བའི། །དགེ་མཚན་གསུམ་པོ་འདི་ནི་ལྷན་ཅིག་དར། ༤ །རིགས་དང་བརྩེ་སོགས་འཕགས་བཞིའི་ངོ་མཚར་གཏམ། །མ་ཚང་མེད་པར་གཟོད་ནས་བརྙེས་བཞིན་དུ། །ཐབས་ལ་མཁས་པའི་རྣམ་ཐར་དཔག་ཡས་ཀྱིས། །ལྷར་བཅས་འཇིག་རྟེན་བསྔགས་པའི་དབྱངས་ཀྱིས་བཀང་། ༥ །མཚན་གྱི་ནོར་བུའི་རྔ་ཡབ་ཆ་རེས་ཀྱང་། །འདི་གཏན་ཕོངས་པའི་གདུང་བ་ཀུན་སེལ་ན། །གང་དུ་བསྙེན་པ་ཙམ་ནས་བྱང་ཆུབ་ཀྱི། །གོ་འཕང་དམ་པའང་སྩོལ་ལ་སོམ་ཉི་ཅི། ༦ །དེ་བས་ཚད་བཟུང་བྲལ་བའི་ཡོན་ཏན་ལ། །མཆོག་ཏུ་དད་པའི་པདྨོ་འཛུམ་པ་དང་། །ཐལ་མོའི་ཨུཏྤལ་ཟུམ་པའི་བསྟི་སྟང་གིས། །ཞབས་མཐིལ་འཁོར་ལོའི་རེ་ཁཱར་གུས་ཕྱག་འཚལ། ༧ །དངོས་འབྱོར་མེ་ཏོག་ཕྲ་མོས་མདུན་བདར་ཏེ། །ཀུན་ཏུ་བཟང་པོའི་སྨོན་ལམ་ལས་བྱུང་བའི། །བདག་པོས་བཟུང་དང་མ་བཟུང་མཆོད་སྤྲིན་གྱིས། །སྲིད་པ་མཐར་བྱས་བར་དུབསྙེན་བཀུར་བགྱི། ༨ །རང་བཞིན་ཉིད་དང་བཅས་པའི་སྡིག་ལྟུང་གིས། །སེམས་ཀྱི་ཡིད་བཞིན་རྙོག་མར་བྱས་པ་ཀུན། །སྟོབས་བཞིའི་སྦྱོང་བ་མཁས་པའི་བརྟུལ་ཞུགས་ཀྱིས། །བྲལ་སྨིན་ཡོན་ཏན་གཟུགས་བརྒྱ་སླར་ལ་རྔམས། ༩ །འཕགས་དང་སོ་སྐྱེའི་རྣམ་ཐར་ཇི་སྙེད་དང་། །ཁྱད་པར་མགོན་ཁྱོད་ཕྲིན་ལས་བདུད་རྩིའི་འོད། །དྭང་བའི་ཡིད་མཁར་སིམ་པའི་དེ་མ་ཐག །ཡི་རངས་པུཎྜ་རཱི་ཀའི་འཛུམ་རླབས་དགོད། ༡༠ །འགོགས་བདེན་ཞི་བ་དམ་པའི་ནཱ་དའི་སྒྲ། ། ཆོས་ཕུང་རྒྱ་མཚོའི་དཔྱིད་དུ་འབབས་པ་ཡིས། །འགྲོ་མང་མ་རིག་གཉིད་ལ་གཡུར་བ་རྣམས། །ཐར་པ་དམ་པའི་ངལ་འཚོར་དབུགས་འབྱིན་མཛོད། ༡༡ །མདོར་ན་སྲིད་དང་ཞི་བའི་ཕུན་ཚོགས་ཀུན། །གང་ལས་འབྱུང་བའི་མཚན་དཔེའི་དཔག་བསམ་དབང་། །ངེས་པར་ཞིང་ཁམས་འདི་ལས་ཡོལ་མེད་བཞིན། །ཕན་བདེའི་འདོད་དགུ་ལྷུག་པར་སྦྱིན་མཛད་གསོལ། ༡༢ །དེ་ལྟར་བསགས་དང་དུས་གསུམ་དགེ་བའི་རྒྱུན། །བྱང་ཆུབ་སྙིང་པོའི་རྒྱ་མཚོར་རོ་གཅིག་པས། །རྣམ་པ་ཐམས་ཅད་མཁྱེན་པའི་ཡེ་ཤེས་པ། །དབང་འབྱོར་དོན་གཉིས་ཡིད་བཞིན་འགྲུབ་གྱུར་ཅིག༡༣། ཅེས་ཡན་ལག་བདུན་གྱི་ཚིགས་སུ་བཅད་པའི་མེ་ཏོག་ཅུང་ཟད་འཐོར་བས་ལམ་ཡངས་པར་བྱས་ཏེ། དེང་འདིར་འགྲོ་བ་ལྷ་དང་བཅས་པའི་མ་འདྲིས་པའི་མཛའ་བཤེས་ཆེན་པོ། རིས་སུ་མ་ཆད་པའི་ཐུབ་བསྟན་རྒྱ་མཚོ་གསལ་བར་བྱེད་པའི་ཉི་མ། ཁམས་གསུམ་གྱི་གཙོ་བོས་ཕྱག་བྱས་པའི་རྒྱལ་དབང་ཐམས་ཅད་མཁྱེན་ཅིང་གཟིགས་པ་ཆེན་པོ་གང་གི་ཐུགས་རྗེའི་གདུགས་དཀར་སྲིད་ཞིའི་བླ་ན་མཐོ་བའི་གྲིབ་བསིལ་དུ་དབུགས་འབྱིན་ཐོབ་པའི་གུས་པ་ངོར་ཨེ་ཝྃ་ཐར་རྩེ་མཁན་མིང་པའང་། རང་རིགས་བླ་མ་གོང་མའི་ནས་ནས་སྐྱབས་མགོན་ཆེན་པོ་སྐུ་ཕྲེང་རིམ་བྱོན་གྱིས་ཐུགས་རྗེས་གཟིགས་བསྐྱངས་ལེགས་པར་མ་ཟད། གུས་ཕྲན་པ་མདོ་ཁམས་སྡེ་དགེའི་བླ་མཆོད་དུ་བགྲོད་སྐབས་མར་ལན་ཀྱང་ཞབས་པད་རིན་པོ་ཆེ་ཕྱག་གིས་བཏུད་ཅིང་བྱིན་རླབས་ཚད་མེད་པས་རྗེས་སུ་བཟུང་བའི་བཀའ་དྲིན་གྱིས་ཁམས་སུ་སྡོད་རིང་དང་། ལམ་བར་ཀུན་ཏུ་ཉེར་འཚེས་མ་གོས་པར། ད་ལན་མཐོང་བས་དོན་ལྡན་མཚན་དཔེའི་མཛེས་སྐུ་མངོན་སུམ་པར་མཇལ་ཞིང་། ཚད་མེད་པའི་ཐུགས་རྗེ་ཆེན་པོས་ལྷག་པར་ཁྱབ་པའི་བཀའ་དྲིན་ལ་བསམ་ན་སྟོང་གསུམ་ནོར་བུས་བཀང་ཡང་གཞལ་བྱ་མ་ཡིན་མོད། འོན་ཀྱང་ཡོ་བྱད་ཀྱི་ལག་སྣེ་ཕྲ་བས། ཡིད་སྤྲུལ་གྱི་མཎྜལ་རྒྱ་ཆེར་སྤྲུལ་ཏེ་ཕུལ་བའི་མཚོན་བྱེད་དུ་དངོས་བཤམས་ཟེག་མ་ཙམ་བསྟར་བར། ཐོག་མར་བཀྲ་ཤིས་པའི་ལྷ་གོས་རབ་དཀར་སོགས། མཐའ་རྟེན་རས་དཀར་ཡུག་བཅས་གུས་པ་ཆེན་པོས་འབུལ་ལམ་ཞུ་ན་དགྱེས་པའི་སྤྱན་རས་ཀྱིས་ཡུད་ཙམ་རོལ་པ་དང་། སླད་མའི་ཆར་ཡང་སྨོན་པའི་གནས་ཚིགས་སུ་བཅད་དེ་གསོལ་བ། དྲན་པའི་མདུན་སར་བཀོད་པའི་དེ་མ་ཐག །ཕུན་ཚོགས་འཆི་མེད་བདུད་རྩིའི་མཆོག་སྦྱིན་པ། །བཅོམ་ལྡན་ཚེ་མཐའ་ཡས་པའི་རྣམ་རོལ་ཏུ། །མཚན་དཔེའི་མཛེས་སྐུ་རྟག་བར་འཚོ་གཞེས་གསོལ། ༡ །གསུང་གི་གསང་བ་རྣམ་པ་ཀུན་ལྡན་པ། །ཡན་ལག་དྲུག་ཅུའི་རྒྱུད་མང་དང་འགྲོགས་པས། །ཟབ་རྒྱས་གདམས་པའི་དབྱངས་ཀྱི་རིགས་ཅན་གསུམ། །དོན་གཉིས་ངལ་འཚོར་མཛོད་ཅིག་མཁྱེན་པའི་གཏེར། ༢ །ཤེས་དང་ཤེས་བྱ་རོ་གཅིག་འོད་གསལ་ཐུགས། །གཟུང་འཛིན་སྤྲོས་པའི་མཚན་མ་ལས་འདས་བཞིན། །བརྟན་གཡོ་ཀུན་ལ་སྙོམས་འཇུག་སྒྱུ་མའི་འཕྲུལ། །མཁའ་ཁྱབ་མཁའ་ཡི་རྡོ་རྗེར་བརྟན་གྱུར་ཅིག༣། བྲལ་སྨིན་ཡོན་ཏན་བྱེ་བ་ཕྲག་བརྒྱ་དང་། །ཕྲིན་ལས་རྟག་པ་དམ་པའི་དགེ་མཚན་གྱིས། །ལྷར་བཅས་འཇིག་རྟེན་ཀུན་དགའི་དཔལ་སྟེར་བའི། །གསང་གསུམ་བསྐལ་པ་རྒྱ་མཚོར་ཞབས་བརྟན་གསོལ། ༤ །སྐྱབས་འོག་རྣམས་ཀྱང་འདི་ནས་བྱང་ཆུབ་བར། །ཡེ་ཤེས་གཟིགས་པའི་ཕྱག་གིས་རྗེས་བཟུང་ནས། །གནས་སྐབས་མཐར་ཐུག་ཕན་བདེའི་དགེ་མཚན་དང་། །རྣམ་ཀུན་ཤིས་པའི་སྣང་བ་འབར་གྱུར་ཅིག ༥ །སརྦ་དཱ་ཀ་ལྱཱ་ཎཾ་བྷ་བ་ཏུ།། །། ༈

[edit]

sa sprel lor rgyal dbang phyag na pad+mo mkhas grub rgya mtsho'i mdun thar rtse mkhan rin po che rdo rje 'chang rnal 'byor 'jam dpal bzang po nas legs 'bul phul ba'i skabs kyi yi ge/ sa sprel lor rgyal dbang phyag na pad+mo mkhas grub rgya mtsho'i mdun thar rtse mkhan rin po che rdo rje 'chang rnal 'byor 'jam dpal bzang po nas legs 'bul phul ba'i skabs kyi yi ge snyan pa'i ngang mo zhes bya ba bzhugs/_@/__/_yeShAday+Yakr-ipAtsashUn+yatA\u0f85/____b+hedz+nyAnasumAyameg+hayo/___dag pa'i snang ba'o/___/sushreyomaNib-i?Sh+TadApaTuM__trailokyeShusadAbidzIyatAM/____gang du stong dang snying rje dbyer med pa'i/_/zung 'jug ye shes sgyu 'phrul drwa ba'i sprin/_/dge legs nor bu'i gru char 'bebs mkhas pa/_/'jig rten gsum na rtag tu rgyal gyur cig_1_/gus pa chen po'i lha phyag grangs med pa btsal te zhu gsol/__/_sman mdzad gru 'dzin ri bo'i dga' tshal na/__/dgyes bzhin rol pa'i 'phags mchog mig mi 'dzum/_/snying rje'i dga' ba rgyas pa'i spyan ras kyis/__/gangs can ri bo'i ljongs 'dir rtag tu gzigs/_2/_de tshe ye shes dam pa'i snye ma ni/_/bsil ldan bsod nams sa gzhir bskyed bsrings pas/__/mtha' klas sras bcas rgyal bas phyag byas pa'i/_/yon tan ljon pa mchog gcig 'khrungs pa'i mod/_3_/yid can rdzogs ldan dus ston tshugs pa dang /_/thub bstan bshad sgrub lang tsho dar ba dang /_/des kyang mi mthun rgud pa kun bsrung ba'i/_/dge mtshan gsum po 'di ni lhan cig dar/_4_/rigs dang brtse sogs 'phags bzhi'i ngo mtshar gtam/_/ma tshang med par gzod nas brnyes bzhin du/_/thabs la mkhas pa'i rnam thar dpag yas kyis/_/lhar bcas 'jig rten bsngags pa'i dbyangs kyis bkang /_5_/mtshan gyi nor bu'i rnga yab cha res kyang /_/'di gtan phongs pa'i gdung ba kun sel na/_/gang du bsnyen pa tsam nas byang chub kyi/_/go 'phang dam pa'ang stsol la som nyi ci/_6_/de bas tshad bzung bral ba'i yon tan la/_/mchog tu dad pa'i pad+mo 'dzum pa dang /_/thal mo'i ut+pal zum pa'i bsti stang gis/_/zhabs mthil 'khor lo'i re khAr gus phyag 'tshal/_7_/dngos 'byor me tog phra mos mdun bdar te/_/kun tu bzang po'i smon lam las byung ba'i/_/bdag pos bzung dang ma bzung mchod sprin gyis/_/srid pa mthar byas bar dubasnyen bkur bgyi/_8_/rang bzhin nyid dang bcas pa'i sdig ltung gis/_/sems kyi yid bzhin rnyog mar byas pa kun/_/stobs bzhi'i sbyong ba mkhas pa'i brtul zhugs kyis/_/bral smin yon tan gzugs brgya slar la rngams/_9_/'phags dang so skye'i rnam thar ji snyed dang /_/khyad par mgon khyod phrin las bdud rtsi'i 'od/_/dwang ba'i yid mkhar sim pa'i de ma thag_/yi rangs puN+Da rI ka'i 'dzum rlabs dgod/_10_/'gogs bden zhi ba dam pa'i nA da'i sgra/__/_chos phung rgya mtsho'i dpyid du 'babs pa yis/_/'gro mang ma rig gnyid la g.yur ba rnams/_/thar pa dam pa'i ngal 'tshor dbugs 'byin mdzod/_11_/mdor na srid dang zhi ba'i phun tshogs kun/_/gang las 'byung ba'i mtshan dpe'i dpag bsam dbang /_/nges par zhing khams 'di las yol med bzhin/_/phan bde'i 'dod dgu lhug par sbyin mdzad gsol/_12_/de ltar bsags dang dus gsum dge ba'i rgyun/_/byang chub snying po'i rgya mtshor ro gcig pas/_/rnam pa thams cad mkhyen pa'i ye shes pa/_/dbang 'byor don gnyis yid bzhin 'grub gyur cig13/_ces yan lag bdun gyi tshigs su bcad pa'i me tog cung zad 'thor bas lam yangs par byas te/__deng 'dir 'gro ba lha dang bcas pa'i ma 'dris pa'i mdza' bshes chen po/_ris su ma chad pa'i thub bstan rgya mtsho gsal bar byed pa'i nyi ma/_khams gsum gyi gtso bos phyag byas pa'i rgyal dbang thams cad mkhyen cing gzigs pa chen po gang gi thugs rje'i gdugs dkar srid zhi'i bla na mtho ba'i grib bsil du dbugs 'byin thob pa'i gus pa ngor e wa~M thar rtse mkhan ming pa'ang /_rang rigs bla ma gong ma'i nas nas skyabs mgon chen po sku phreng rim byon gyis thugs rjes gzigs bskyangs legs par ma zad/_gus phran pa mdo khams sde dge'i bla mchod du bgrod skabs mar lan kyang zhabs pad rin po che phyag gis btud cing byin rlabs tshad med pas rjes su bzung ba'i bka' drin gyis khams su sdod ring dang /_lam bar kun tu nyer 'tshes ma gos par/_da lan mthong bas don ldan mtshan dpe'i mdzes sku mngon sum par mjal zhing /_tshad med pa'i thugs rje chen pos lhag par khyab pa'i bka' drin la bsam na stong gsum nor bus bkang yang gzhal bya ma yin mod/_'on kyang yo byad kyi lag sne phra bas/_yid sprul gyi maN+Dal rgya cher sprul te phul ba'i mtshon byed du dngos bshams zeg ma tsam bstar bar/_thog mar bkra shis pa'i lha gos rab dkar sogs/_mtha' rten ras dkar yug bcas gus pa chen pos 'bul lam zhu na dgyes pa'i spyan ras kyis yud tsam rol pa dang /_slad ma'i char yang smon pa'i gnas tshigs su bcad de gsol ba/_dran pa'i mdun sar bkod pa'i de ma thag_/phun tshogs 'chi med bdud rtsi'i mchog sbyin pa/_/bcom ldan tshe mtha' yas pa'i rnam rol tu/_/mtshan dpe'i mdzes sku rtag bar 'tsho gzhes gsol/_1_/gsung gi gsang ba rnam pa kun ldan pa/_/yan lag drug cu'i rgyud mang dang 'grogs pas/_/zab rgyas gdams pa'i dbyangs kyi rigs can gsum/_/don gnyis ngal 'tshor mdzod cig mkhyen pa'i gter/_2_/shes dang shes bya ro gcig 'od gsal thugs/_/gzung 'dzin spros pa'i mtshan ma las 'das bzhin/_/brtan g.yo kun la snyoms 'jug sgyu ma'i 'phrul/_/mkha' khyab mkha' yi rdo rjer brtan gyur cig3/_bral smin yon tan bye ba phrag brgya dang /_/phrin las rtag pa dam pa'i dge mtshan gyis/_/lhar bcas 'jig rten kun dga'i dpal ster ba'i/_/gsang gsum bskal pa rgya mtshor zhabs brtan gsol/_4_/skyabs 'og rnams kyang 'di nas byang chub bar/_/ye shes gzigs pa'i phyag gis rjes bzung nas/_/gnas skabs mthar thug phan bde'i dge mtshan dang /_/rnam kun shis pa'i snang ba 'bar gyur cig_5_/sarba dA ka l+yA NaM b+ha ba tu//____//_!_