JKW-KABUM-20-WA-001-011

🚧 This website is under continued development. We appreciate your patience!

Previous Text Back to Volume PageNext Text

Wylie title	ma hA paN+Di ta karma ngag dbang yon tan rgya mtsho'i spyan sngar phul ba'i zhu yig
Location	mkhyen brtse'i bka' 'bum Volume 20, sde tshan 1, Text 11, Pages 30-32 (Folios 15b1 to 16b6)
Author	འཇམ་དབྱངས་མཁྱེན་བརྩེའི་དབང་པོ་
Less details More details
Citation	'jam dbyangs mkhyen brtse'i dbang po. ma hA paN+Di ta karma ngag dbang yon tan rgya mtsho'i spyan sngar phul ba'i zhu yig. In 'jam dbyangs mkhyen brtse'i dbang po'i bka' 'bum, Vol. 20: 30-32. Khams sde dge rdzong sar dgon: Rdzong sar blo gros phun tshogs, 2020.
Genre	Official Letters - chab shog
Colophon	།ཞེས་པའང་ས་སྐྱོང་སེ་ནཱ་ཤུ་བྷའི་ལྷ་སྲས་རིན་པོ་ཆེ་མཆོག་གིས་བཀའ་གནང་ལྟར་བྲིས་པའོ།།
	zhes pa'ang sa skyong se nA shu b+ha'i lha sras rin po che mchog gis bka' gnang ltar bris pa'o

1 Texts in this Section (sde tshan or chos tshan)

11 30-32	མ་ཧཱ་པཎྜི་ཏ་ཀརྨ་ངག་དབང་ཡོན་ཏན་རྒྱ་མཚོའི་སྤྱན་སྔར་ཕུལ་བའི་ཞུ་ཡིག། ma hA paN+Di ta karma ngag dbang yon tan rgya mtsho'i spyan sngar phul ba'i zhu yig Official Letters - chab shog	Text page View PDF
	འཇམ་དབྱངས་མཁྱེན་བརྩེའི་དབང་པོ་ ('jam dbyangs mkhyen brtse'i dbang po)

Tibetan Text

Wylie

[edit]

མ་ཧཱ་པཎྜི་ཏ་ཀརྨ་ངག་དབང་ཡོན་ཏན་རྒྱ་མཚོའི་སྤྱན་སྔར་ཕུལ་བའི་ཞུ་ཡིག །ཤྲཱི་ཤྲཱི་ཤྲཱི་བི་ཛ་ཡནྟུ། །ང༷ག་གི་དབ༷ང་ཕྱུག་སྲིད་ལ་རྗེས་ཆགས་པའི། །ཡོ༷ན་ཏ༷ན་བློ་དང་ལྷན་ཅིག་མི་གནས་པས། །རྒྱ༷་མཚོ༷འི་ཐ་གྲུར་ཁྱབ་པའི་གྲགས་དཀར་གྱིས། །འཇིག་རྟེན་གསུམ་ན་ཀུན་ནས་མཛེས་པ་དེར། ༡ །ཉམས་བརྒྱད་བདུད་རྩིས་དག་པའི་རྦ་རླབས་ཅན། །རྣམ་དཔྱོད་འབིགས་བྱེད་རི་བོས་བསྲུབས་པ་ལས། །ཚིག་གི་ཟླ་རིས་གསར་པ་འདི་ཙམ་ཡང་། །མཁས་ཁྱོད་དགྱེས་པའི་ཡར་ངོའི་ཕང་པར་འཛེགས། ༢ །གང་ན་དཔལ་གྱི་དུམ་བུའི་ལྕུགས་ཕྲན་གསར། །དྲི་དང་ལྷན་ཅིག་སྐྱེས་པའི་སྐབས་མཐོང་བཞིན། །དམ་པའི་མྱུ་གུ་དང་པོར་བཟུང་བ་ནས། །བསྔགས་འོས་གཏམ་གྱི་ཡལ་ག་ཉིན་བཞིན་འཕེལ། ༣ །ཚུལ་གནས་ནོར་བུའི་ས་འཛིན་ཉམས་དགའ་བར། །ཐོས་བསམ་རི་མོ་བརྒྱ་ཕྲག་འབར་བའི་མོད། །འཇམ་མགོན་གཉིས་པའི་ངོ་མཚར་འདིའོ་ཞེས། །གཟུར་གནས་དགའ་བའི་མངལ་ཁུར་རིང་དུ་བཟུང་། ༤ །སླར་ཡང་ཤིན་ཏུ་ཞི་བའི་ནགས་ཀླུང་དུ། །སྤོང་པའི་བརྟུལ་ཞུགས་ཁོ་ནས་མཛེས་པ་དེར། །སྲས་བཅས་རྒྱལ་བ་དགྱེས་པའི་འཛུམ་དཀར་གྱིས། །ཤིས་བརྗོད་ཚིག་གི་མེ་ཏོག་གཅིག་ཏུ་འཐོར། ༥ །མཆོག་ཏུ་ཟབ་དང་དེ་ལས་གཅིག་ཤོས་ཀྱི། །ལམ་མང་འཆད་པའི་ངལ་འཚོས་རྣ་བ་ལ། །རིན་ཆེན་རིན་ཐང་མེད་པར་སྒྲུབ་པའི་ཚུལ། །དཔྱིད་ཀྱི་ཕོ་ཉ་གསར་པས་མཚོན་མ་གྱུར། ༦ །མངོན་སུམ་རྗེས་སུ་དཔག་པའི་ནོར་བུའི་ཆུས། །ཚུལ་མིན་སྨྲ་བའི་འདམ་རྫབ་ཡོངས་སྦྱངས་ཏེ། །གཞུང་ལུགས་ཇི་བཞིན་འཆར་བའི་ངོ་མཚར་ཕུལ། །རིག་པའི་དབང་ཕྱུག་ཉིད་དང་མཚུངས་ཞེས་སྨྲེངས། ༧ ། སྒྲ་དོན་དཔྱད་པས་གཙང་བའི་ལེགས་བཤད་རེར། །ཚིག་གི་བདུད་རྩི་འབུམ་ཕྲག་འཛག་པ་ཡིས། །བློ་ལྡན་བློ་ཡི་པདྨོ་རྒྱས་པ་དང་། །བཤད་སྒྲུབ་ལང་ཚོ་ཅིར་ཡང་དར་བར་བྱས། ༨ །མདོར་ན་མཁས་དང་གྲུབ་པའི་ཡོན་ཏན་དབྱིག །རྫོགས་པར་མངའ་བའི་སྔོན་མེད་གདེངས་ཅན་གང་། །འགྲོ་མང་མ་རིག་འཐིབ་བུས་གཡུར་བ་ལ། །སིམ་པ་སྟེར་པའི་བྱེད་པོ་གཅིག་ཏུ་གྱུར། ༩ །དེ་སླད་ཆོས་ཀྱི་འབྱོར་པས་མངོན་མཐོ་པའི། །འཚོ་གཞེས་རྡོ་རྗེའི་སྙིང་པོར་བརླིང་བ་དང་། །ཕྲིན་ལས་སྣང་བ་དཀར་པོའི་ཆ་ཤས་རེས། །འདིར་ཡང་ཀུན་དགའི་ཆུ་གཏེར་གསར་དུ་དགོད། ༡༠ །ལེགས་བྱས་དཔུང་པས་ཐོབ་བའི་གདུགས་དཀར་པོས། །ཡིད་ཅན་ངལ་འཚོར་བགྱིད་ལ་འདུན་པ་ཡང་། །རིག་པའི་ཚུལ་ལ་མཛའ་བ་མི་ལྷོད་པས། །གཏན་དུ་བདེ་བའི་སྣང་བར་ཆགས་བཞིན་མཆིས། ༡༡ །སླད་མའི་ཆར་ཡང་། །འབྲུག་སྒྲ་དལ་གྱིས་དགོད་པས་མདོངས་མཐའ་དང་། །འབྱོར་བས་དོན་མཐུན་ཚོགས་རྣམས་དགའ་བ་བསྐྱེད། །དམ་པའི་ཚུལ་ལ་རིང་ནས་བཤེས་པ་དག །ཡོན་ཏན་ཁོ་ནས་བསྔགས་པའི་དཔལ་སྟེར་ཕྱིར། ༡༢ །ངག་གི་དབང་ཕྱུག་གྲུབ་པས་སྲིད་པ་ན། །མཚུངས་མེད་སྨྲ་བའི་ཉི་མ་གཅིག་པུ་ཁྱོད། །ཟུང་འཇུག་བདུད་རྩིས་བཏུང་བས་བསྐལ་བརྒྱའི་བར། །རྟག་པ་དམ་པའི་གོ་འཕང་བརྙེས་ནས་ཀྱང་། ༡༣ །ཡིད་སྲུབས་སྡེར་བཅས་ཁེངས་པ་བསྙིལ་བ་ཡི། །ལྷར་བཅས་འཇིག་རྟེན་དགའ་བའི་དབྱངས་སྙན་པོས། །སྲིད་ཞིའི་འཇུག་པ་མཐའ་དག་བརྟུལ་བྱས་ནས། །བྱང་ཆུབ་དམ་པའི་ལམ་བཟང་སྣང་བར་མཛོད། ༡༤ །ལྷག་པར་འདི་ན་ཀུན་ཏུ་རྨོངས་པ་དང་། །ཡིད་གཉིས་མུན་པའི་དྲྭ་བ་རིང་བཅད་ཕྱིར། །ཞི་བསིལ་ལེགས་གསུང་སྣང་བ་དཀར་པོ་ཡིས། །རྣམ་པ་ཀུན་ཏུ་ཤིས་པ་སྒྲུབ་མཛད་གསོལ། ༡༥ །དྭང་བའི་བློ་གྲོས་ཡིད་ཀྱི་དུས་སྟོན་ལ། །དམ་པའི་རྣམ་ཐར་ས་བོན་ཆགས་པ་ལས། །ཚིག་གི་མེ་ཏོག་ཕྲ་མོའི་བསྙེན་བཀུར་འདིས། །མཁྱེན་གཉིས་འབབ་སྟེགས་ཅིར་ཡང་མཛེས་གྱུར་ཅིག །སརྦ་དཱ་ཀ་ལྱཱ་ཎཾ་བྷ་བ་ཏུ། །ཞེས་པའང་ས་སྐྱོང་སེ་ནཱ་ཤུ་བྷའི་ལྷ་སྲས་རིན་པོ་ཆེ་མཆོག་གིས་བཀའ་གནང་ལྟར་བྲིས་པའོ།། །། ༈

[edit]

ma hA paN+Di ta karma ngag dbang yon tan rgya mtsho'i spyan sngar phul ba'i zhu yig__/ ma hA paN+Di ta karma ngag dbang yon tan rgya mtsho'i spyan sngar phul ba'i zhu yig__/shrI shrI shrI bi dza yan+tu/___/ngaXg gi dbaXng phyug srid la rjes chags pa'i/___/yoXn taXn blo dang lhan cig mi gnas pas/___/rgyaX mtshoX'i tha grur khyab pa'i grags dkar gyis/___/'jig rten gsum na kun nas mdzes pa der/___1__/nyams brgyad bdud rtsis dag pa'i rba rlabs can/___/rnam dpyod 'bigs byed ri bos bsrubs pa las/___/tshig gi zla ris gsar pa 'di tsam yang /___/mkhas khyod dgyes pa'i yar ngo'i phang par 'dzegs/___2__/gang na dpal gyi dum bu'i lcugs phran gsar/___/dri dang lhan cig skyes pa'i skabs mthong bzhin/___/dam pa'i myu gu dang por bzung ba nas/___/bsngags 'os gtam gyi yal ga nyin bzhin 'phel/___3__/tshul gnas nor bu'i sa 'dzin nyams dga' bar/___/thos bsam ri mo brgya phrag 'bar ba'i mod/___/'jam mgon gnyis pa'i ngo mtshar 'di'o zhes/___/gzur gnas dga' ba'i mngal khur ring du bzung /___4__/slar yang shin tu zhi ba'i nags klung du/___/spong pa'i brtul zhugs kho nas mdzes pa der/___/sras bcas rgyal ba dgyes pa'i 'dzum dkar gyis/___/shis brjod tshig gi me tog gcig tu 'thor/___5__/mchog tu zab dang de las gcig shos kyi/___/lam mang 'chad pa'i ngal 'tshos rna ba la/___/rin chen rin thang med par sgrub pa'i tshul/___/dpyid kyi pho nya gsar pas mtshon ma gyur/___6__/mngon sum rjes su dpag pa'i nor bu'i chus/___/tshul min smra ba'i 'dam rdzab yongs sbyangs te/___/gzhung lugs ji bzhin 'char ba'i ngo mtshar phul/___/rig pa'i dbang phyug nyid dang mtshungs zhes smrengs/___7__/_sgra don dpyad pas gtsang ba'i legs bshad rer/___/tshig gi bdud rtsi 'bum phrag 'dzag pa yis/___/blo ldan blo yi pad+mo rgyas pa dang /___/bshad sgrub lang tsho cir yang dar bar byas/___8__/mdor na mkhas dang grub pa'i yon tan dbyig__/rdzogs par mnga' ba'i sngon med gdengs can gang /___/'gro mang ma rig 'thib bus g.yur ba la/___/sim pa ster pa'i byed po gcig tu gyur/___9__/de slad chos kyi 'byor pas mngon mtho pa'i/___/'tsho gzhes rdo rje'i snying por brling ba dang /___/phrin las snang ba dkar po'i cha shas res/___/'dir yang kun dga'i chu gter gsar du dgod/___10__/legs byas dpung pas thob ba'i gdugs dkar pos/___/yid can ngal 'tshor bgyid la 'dun pa yang /___/rig pa'i tshul la mdza' ba mi lhod pas/___/gtan du bde ba'i snang bar chags bzhin mchis/___11__/slad ma'i char yang /___/'brug sgra dal gyis dgod pas mdongs mtha' dang /___/'byor bas don mthun tshogs rnams dga' ba bskyed/___/dam pa'i tshul la ring nas bshes pa dag__/yon tan kho nas bsngags pa'i dpal ster phyir/___12__/ngag gi dbang phyug grub pas srid pa na/___/mtshungs med smra ba'i nyi ma gcig pu khyod/___/zung 'jug bdud rtsis btung bas bskal brgya'i bar/___/rtag pa dam pa'i go 'phang brnyes nas kyang /___13_/yid srubs sder bcas khengs pa bsnyil ba yi/___/lhar bcas 'jig rten dga' ba'i dbyangs snyan pos/___/srid zhi'i 'jug pa mtha' dag brtul byas nas/___/byang chub dam pa'i lam bzang snang bar mdzod/___14__/lhag par 'di na kun tu rmongs pa dang /___/yid gnyis mun pa'i drwa ba ring bcad phyir/___/zhi bsil legs gsung snang ba dkar po yis/___/rnam pa kun tu shis pa sgrub mdzad gsol/___15__/dwang ba'i blo gros yid kyi dus ston la/___/dam pa'i rnam thar sa bon chags pa las/___/tshig gi me tog phra mo'i bsnyen bkur 'dis/___/mkhyen gnyis 'bab stegs cir yang mdzes gyur cig__/sarba dA ka l+yA NaM b+ha ba tu/___/zhes pa'ang sa skyong se nA shu b+ha'i lha sras rin po che mchog gis bka' gnang ltar bris pa'o//__//__!