JKW-KABUM-02-KHA-001-026

🚧 This website is under continued development. We appreciate your patience!

Previous Text Back to Volume PageNext Text

Wylie title	'phags pa 'jam dpal
Location	mkhyen brtse'i bka' 'bum Volume 2, sde tshan 1, Text 26, Pages 107-108 (Folios 54a1 to 54b5)
Author	འཇམ་དབྱངས་མཁྱེན་བརྩེའི་དབང་པོ་
Less details More details
Citation	'jam dbyangs mkhyen brtse'i dbang po. phags pa 'jam dpal. In jam dbyangs mkhyen brtse'i dbang po'i bka' 'bum, Vol. 2: 107-108. Khams sde dge rdzong sar dgon: Rdzong sar blo gros phun tshogs, 2020.
Genre	Discourses - gtam

1 Texts in this Section (sde tshan or chos tshan)

26 107-108	འཕགས་པ་འཇམ་དཔལ། 'phags pa 'jam dpal Discourses - gtam	Text page View PDF
	འཇམ་དབྱངས་མཁྱེན་བརྩེའི་དབང་པོ་ ('jam dbyangs mkhyen brtse'i dbang po)

Tibetan Text

Wylie

[edit]

འཕགས་པ་འཇམ་དཔལ་ནི། དཀོན་མཆོག་བརྩེགས་པའི་ལེའུ་བཅོ་ལྔ་པ་ལས། འདི་ཉིད་འཁོར་ལོས་སྒྱུར་བའི་རྒྱལ་པོ་ནམ་མཁའ་ཞེས་པར་གྱུར་པའི་ཚེ་དེ་བཞིན་གཤེགས་པ་འབྲུག་སྒྲའི་རྒྱལ་པོའི་དྲུང་དུ་དང་པོར་ཐུགས་བསྐྱེད་ཅིང་། མ་འོངས་པ་ན་འཇིག་རྟེན་གྱི་ཁམས་རྡུལ་མེད་པ་བསགས་པ་ཞེས་བྱ་བར་དེ་བཞིན་གཤེགས་པ་ཀུན་ཏུ་གཟིགས་སུ་འཚང་རྒྱ་བར་ལུང་བསྟན་ཅིང་མི་སྐྱེ་བའི་ཆོས་ལ་བཟོད་པ་ཐོབ་ནས་སྟོབས་བཅུ་ཡོངས་སུ་རྫོགས་ཀྱང་རྣམ་པ་བྱང་ཆུབ་སེམས་དཔའི་ཚུལ་གྱིས། གང་གི་མཚན་ཐོས་པ་ཙམ་གྱིས་ཀྱང་མོས་པ་ཆུང་བ་རྣམས་མ་གཏོགས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཐོབ་པར་གསུངས་ལ། འཇམ་དཔལ་རྩ་བའི་རྒྱུད་ལས། བསྐལ་པ་གྲངས་མེད་པ་རྒྱ་མཚོའི་ཡང་ཆེས་ཕ་རོལ་གྱི་ཕ་རོལ་ན་འཇིག་རྟེན་གྱི་ཁམས་མཉམ་པ་ཞེས་བྱ་བ་ན། དེ་བཞིན་གཤེགས་པ་ཀླུའི་རིགས་མཆོག་ཏུ་སངས་རྒྱས་པར་གསུངས་པ་སོགས་སྒྱུ་འཕྲུལ་དྲྭ་བའི་མིག་འཕྲུལ་ཅིར་ཡང་སྟོན་པའི་རྣམ་པར་ཐར་པ་མཐའ་ཀླས་ཤིང་། དོན་དམ་པར་འཇམ་དཔལ་ཡེ་ཤེས་སེམས་དཔའི་མཚན་ཡང་དག་པར་བརྗོད་པ་ལས། ཡེ་ཤེས་ལུས་ཅན་འཇམ་དཔལ་གྱི། །ཞེས་སོགས་ཕྱོགས་བཅུ་དུས་བཞིའི་བདེ་གཤེགས་ཐམས་ཅད་ཀྱི་ཡེ་ཤེས་རྡོ་རྗེ་སྒྲིབ་བྲལ་གྱི་སྐུའི་ངོ་བོ་ཡིན་པར་ལན་མང་དུ་གསུངས་པ་དང་། དེ་ཉིད་གདུལ་དཀའ་འདུལ་བའི་ཕྱིར་ཁྲོ་བོའི་ཚུལ་དུ་སྟོན་པ་འཇམ་དཔལ་གཤིན་རྗེ་གཤེད་སོགས་མཐའ་ཀླས་པའི་སྐུ་གསུང་ཐུགས་ཀྱི་རྣམ་རོལ་གྱིས་དག་པ་དང་མ་དག་པའི་གདུལ་བྱ་བསམ་གྱིས་མི་ཁྱབ་པའི་དོན་མཛད་པར་མ་ཟད། འཕགས་བོད་ཀྱི་མཁས་ཤིང་གྲུབ་བརྙེས་ཐམས་ཅད་ཀྱང་འདི་ཉིད་ཀྱིས་རྗེས་སུ་མ་བཟུང་བ་དང་། ལྷག་པའི་ལྷར་མ་གྱུར་པ་མེད་པ་ལྟ་བུ་ཡིན་པའི་ཕྱིར་གསོལ་བ་བཏབ་ཚད་འཁོར་བ་ལས་སྒྲོལ་ཞིང་། དྲན་པ་ཙམ་གྱིས་སྒྲིབ་པའི་ཚོགས་རྒྱུ་དང་བཅས་པ་ཞི་བ་དང་། ཤེས་བྱ་ཐམས་ཅད་ལ་ཆགས་ཐོགས་མི་མངའ་བའི་སྤོབས་པའི་གཏེར་མཛོད་གྲོལ་བ་སོགས་ཕན་ཡོན་མཐའ་ཀླས་ཤིང་། རྒྱས་པར་ནི་དཀོན་མཆོག་བརྩེགས་པའི་འཇམ་དཔལ་ཞིང་གི་ཡོན་ཏན་བཀོད་པ་དང་། འཇམ་དཔལ་རྩ་བའི་རྒྱུད་སོགས་སུ་ཤེས་པར་བྱའོ།། །། ༈

[edit]

'phags pa 'jam dpal/ 'phags pa 'jam dpal ni/_dkon mchog brtsegs pa'i le'u bco lnga pa las/_'di nyid 'khor los sgyur ba'i rgyal po nam mkha' zhes par gyur pa'i tshe de bzhin gshegs pa 'brug sgra'i rgyal po'i drung du dang por thugs bskyed cing /_ma 'ongs pa na 'jig rten gyi khams rdul med pa bsags pa zhes bya bar de bzhin gshegs pa kun tu gzigs su 'tshang rgya bar lung bstan cing mi skye ba'i chos la bzod pa thob nas stobs bcu yongs su rdzogs kyang rnam pa byang chub sems dpa'i tshul gyis/_gang gi mtshan thos pa tsam gyis kyang mos pa chung ba rnams ma gtogs bla na med pa yang dag par rdzogs pa'i byang chub thob par gsungs la/_'jam dpal rtsa ba'i rgyud las/_bskal pa grangs med pa rgya mtsho'i yang ches pha rol gyi pha rol na 'jig rten gyi khams mnyam pa zhes bya ba na/_de bzhin gshegs pa klu'i rigs mchog tu sangs rgyas par gsungs pa sogs sgyu 'phrul drwa ba'i mig 'phrul cir yang ston pa'i rnam par thar pa mtha' klas shing /_don dam par 'jam dpal ye shes sems dpa'i mtshan yang dag par brjod pa las/_ye shes lus can 'jam dpal gyi/_/zhes sogs phyogs bcu dus bzhi'i bde gshegs thams cad kyi ye shes rdo rje sgrib bral gyi sku'i ngo bo yin par lan mang du gsungs pa dang /_de nyid gdul dka' 'dul ba'i phyir khro bo'i tshul du ston pa 'jam dpal gshin rje gshed sogs mtha' klas pa'i sku gsung thugs kyi rnam rol gyis dag pa dang ma dag pa'i gdul bya bsam gyis mi khyab pa'i don mdzad par ma zad/_'phags bod kyi mkhas shing grub brnyes thams cad kyang 'di nyid kyis rjes su ma bzung ba dang /_lhag pa'i lhar ma gyur pa med pa lta bu yin pa'i phyir gsol ba btab tshad 'khor ba las sgrol zhing /_dran pa tsam gyis sgrib pa'i tshogs rgyu dang bcas pa zhi ba dang /_shes bya thams cad la chags thogs mi mnga' ba'i spobs pa'i gter mdzod grol ba sogs phan yon mtha' klas shing /_rgyas par ni dkon mchog brtsegs pa'i 'jam dpal zhing gi yon tan bkod pa dang /_'jam dpal rtsa ba'i rgyud sogs su shes par bya'o//___//_!_