JKCL-KABUM-12-NA-082

🚧 This website is under continued development. We appreciate your patience!

Previous Text Back to Volume PageNext Text

Wylie title	phyogs bcu dus bzhi rgyal ba sras bcas dang sogs
Location	chos kyi blo gros bka' 'bum Volume 12, Text 82, Pages 361-362 (Folios 1a1 to 1b3)
Author	འཇམ་དབྱངས་མཁྱེན་བརྩེ་ཆོས་ཀྱི་བློ་གྲོས་
Less details More details
Citation	'jam dbyangs mkhyen brtse chos kyi blo gros. phyogs bcu dus bzhi rgyal ba sras bcas dang sogs. In Rdzong sar mkhyen brtse 'jam dbyangs chos kyi blo gros kyi gsung 'bum, Vol. 12: 361-362. Bir, H.P.: Khyentse Labrang, 2012.
Genre	Prayers - smon lam
Lotsawa House Link	https://www.lotsawahouse.org/tibetan-masters/jamyang-khyentse-chokyi-lodro/aspiration-for-land-of-great-bliss
Colophon	།ཅེས་པའང་ཆུ་སྦྲུལ་ཟླ་༡༠ཚེས་༦ལ་རང་ལ་ཡིད་སྐྱོ་བས་སྨོན་ལམ་དུ་བྲིས་པའོ།།
	/ces pa'ang chu sbrul zla 10tshes 6la rang la yid skyo bas smon lam du bris pa'o//

1 Texts in this Section (sde tshan or chos tshan)

361-362	ཕྱོགས་བཅུ་དུས་བཞི་རྒྱལ་བ་སྲས་བཅས་དང་སོགས། phyogs bcu dus bzhi rgyal ba sras bcas dang sogs Prayers - smon lam	Text page View PDF
	འཇམ་དབྱངས་མཁྱེན་བརྩེ་ཆོས་ཀྱི་བློ་གྲོས་ ('jam dbyangs mkhyen brtse chos kyi blo gros)

Tibetan Text

Wylie

[edit]

ཕྱོགས་བཅུ་དུས་བཞི་རྒྱལ་བ་སྲས་བཅས་དང་། །ཁྱད་པར་བླ་མ་ཨོ་རྒྱན་པདྨ་འབྱུང་། །ཨརྱ་ཏཱ་རེ་རྡོ་རྗེ་གཞོན་ནུ་ཡི། །ཐུགས་རྗེ་བདེན་པ་ཆེན་པོའི་རྩལ་ཕྱུངས་ལ། །བདག་གི་ཤེས་རྒྱུད་སྲེག་པར་བྱེད་པ་ཡི། །ཉོན་མོངས་དུག་ལྔའི་མེ་དབལ་དྲག་པོ་དང་། །ཁྱད་པར་འདོད་སྲེད་བརྐམ་པས་གདུང་བ་ཡི། །སྔར་ཡང་སྲིད་པར་ཡང་ཡང་འཁོར་ཞིང་མནར། །ད་དུང་འདི་འདྲའི་དབང་དུ་བདག་གྱུར་ན། །ངན་སོང་སྡུག་བསྔལ་དྲག་པོ་མྱོང་བར་ངེས། །དེས་ན་མགོན་པོ་ཁྱོད་རྣམས་ཐུགས་རྗེ་ཡིས། །གནས་ངན་ལེན་གྱི་རྣམ་རྟོག་ངན་པ་རྣམས། །མྱུར་བ་ཉིད་དུ་གཞོམ་པར་མཛད་དུ་གསོལ། །ཕྱིན་ཆད་སླར་མི་སྐྱེ་བར་བྱིན་གྱིས་རློབས། །བློ་སྣ་ཆོས་འགྲོ་དམ་ཆོས་ལམ་དུ་ལོངས། །ལམ་གྱི་འཁྲུལ་ཞི་འཁྲུལ་པ་ཡེ་ཤེས་སུ། །འཆར་བ་བླ་མ་ཡི་དམ་ཐུགས་རྗེས་སྐྱོབས། །སྲིད་པའི་མེ་ཚོགས་ཞི་བར་མཛད་དུ་གསོལ། །ཆོས་མཐུན་བསམ་སྦྱོར་ཡིད་བཞིན་འགྲུབ་པ་དང་། །བྱང་ཆུབ་ལམ་གྱི་བར་ཆད་ཞི་བར་མཛོད། །ཀྱེ་མ་ཀྱི་ཧུད་མགོན་པོ་ཐུགས་རྗེ་ཅན། །ལས་ངན་བདག་ལ་སྤྱན་གྱིས་གཟིགས་སུ་གསོལ། །གཟིགས་ནས་ལས་ངན་དབང་དུ་མི་གཏོང་བར། །ཡང་དག་ལྟ་དང་རྟོགས་པ་ཁྱད་པར་ཅན། །མྱུར་དུ་རྒྱུད་ལ་སྐྱེ་བར་བྱིན་གྱིས་རློབས། །འདི་ནས་ཚེ་འཕོས་ཉིད་དུ་བདེ་ལྡན་ཞིང་། །འདྲེན་མཆོག་འོད་དཔག་མེད་མགོན་ཞབས་དྲུང་དུ། །སྐྱེས་ནས་བྱང་ཆུབ་ལུང་བསྟན་ཐོབ་པར་ཤོག །བདག་ལ་འབྲེལ་དང་མིང་ཙམ་ཐོས་པ་རྣམས། །ངན་སོང་སྡུག་བསྔལ་མཐའ་དག་མི་མྱོང་ཞིང་། །ཞིང་མཆོག་བདེ་བ་ཅན་དུ་སྐྱེ་བར་ཤོག །མདོར་ན་བདག་གི་བྱ་བ་ཅི་བགྱིས་པ། །རང་དོན་རྨི་ལམ་ཙམ་དུའང་མི་སེམས་ཞིང་། །གཞན་ལ་ཕན་པ་ཁོ་ནར་འགྱུར་བ་ལ། །མགོན་པོ་འཇམ་དབྱངས་ཀུན་ཏུ་བཟང་སོགས་ཀྱིས། །ཇི་ལྟར་སྨོན་པ་བཞིན་དུ་འགྲུབ་གྱུར་ཅིག །ཅེས་པའང་ཆུ་སྦྲུལ་ཟླ་༡༠ཚེས་༦ལ་རང་ལ་ཡིད་སྐྱོ་བས་སྨོན་ལམ་དུ་བྲིས་པའོ།། །།

[edit]

phyogs bcu dus bzhi rgyal ba sras bcas dang /__/khyad par bla ma o rgyan pad+ma 'byung /__/ar+ya tA re rdo rje gzhon nu yi/__/thugs rje bden pa chen po'i rtsal phyungs la/__/bdag gi shes rgyud sreg par byed pa yi/__/nyon mongs dug lnga'i me dbal drag po dang /__/khyad par 'dod sred brkam pas gdung ba yi/__/sngar yang srid par yang yang 'khor zhing mnar/__/da dung 'di 'dra'i dbang du bdag gyur na/__/ngan song sdug bsngal drag po myong bar nges/__/des na mgon po khyod rnams thugs rje yis/__/gnas ngan len gyi rnam rtog ngan pa rnams/__/myur ba nyid du gzhom par mdzad du gsol/__/phyin chad slar mi skye bar byin gyis rlobs/__/blo sna chos 'gro dam chos lam du longs/__/lam gyi 'khrul zhi 'khrul pa ye shes su/__/'char ba bla ma yi dam thugs rjes skyobs/__/srid pa'i me tshogs zhi bar mdzad du gsol/__/chos mthun bsam sbyor yid bzhin 'grub pa dang /__/byang chub lam gyi bar chad zhi bar mdzod/__/kye ma kyi hud mgon po thugs rje can/__/las ngan bdag la spyan gyis gzigs su gsol/__/gzigs nas las ngan dbang du mi gtong bar/__/yang dag lta dang rtogs pa khyad par can/__/myur du rgyud la skye bar byin gyis rlobs/__/'di nas tshe 'phos nyid du bde ldan zhing /__/'dren mchog 'od dpag med mgon zhabs drung du/__/skyes nas byang chub lung bstan thob par shog__/bdag la 'brel dang ming tsam thos pa rnams/__/ngan song sdug bsngal mtha' dag mi myong zhing /__/zhing mchog bde ba can du skye bar shog__/mdor na bdag gi bya ba ci bgyis pa/__/rang don rmi lam tsam du'ang mi sems zhing /__/gzhan la phan pa kho nar 'gyur ba la/__/mgon po 'jam dbyangs kun tu bzang sogs kyis/__/ji ltar smon pa bzhin du 'grub gyur cig__/ces pa'ang chu sbrul zla 10tshes 6la rang la yid skyo bas smon lam du bris pa'o//___//