JKW-KABUM-23-'A-003-005

🚧 This website is under continued development. We appreciate your patience!

Previous Text Back to Volume PageNext Text

ཡང་ཞལ་གདམས་མཛད་འཕྲོ་ལུས་པ།

Wylie title	yang zhal gdams mdzad 'phro lus pa
Location	mkhyen brtse'i bka' 'bum Volume 23, sde tshan 3, Text 5, Pages 202-205 (Folios 5b6 to 7a5)
Author	འཇམ་དབྱངས་མཁྱེན་བརྩེའི་དབང་པོ་
Less details More details
Citation	'jam dbyangs mkhyen brtse'i dbang po. yang zhal gdams mdzad 'phro lus pa. In 'jam dbyangs mkhyen brtse'i dbang po'i bka' 'bum, Vol. 23: 202-205. Khams sde dge rdzong sar dgon: Rdzong sar blo gros phun tshogs, 2020.
Genre	Advice - zhal gdams

Tibetan Text

Wylie

[edit]

རྒྱལ་རྣམས་གཞན་དོན་སངས་རྒྱས་ཕྱིར། །བདག་ཅག་ཁོ་ནར་ཐུགས་བརྩེ་བས། །ལམ་སྟོན་དགེ་བའི་བཤེས་གཉེན་དུ། །སྣང་ལ་དངོས་པོ་ཀུན་གྱིས་འདུད། །ལུང་མ་བསྟན་ལས་ཀུན་བསླང་བའི། །སེམས་ནི་དགེ་ལ་མངོན་བཞག་ནས། །དེ་ནས་ཀུན་ཏུ་སྤྱོད་པ་ཀྱང་། །རྣམ་པར་དག་པའི་ཐབས་ལ་འབད། །བསམ་པ་ཕུན་སུམ་ཚོགས་པ་ཡིས། །སྦྱོར་བ་གང་ལ་འཇུག་གྱུར་ཡང་། །གསེར་འགྱུར་རྩི་ཡིས་ཐེབས་པ་ཡི། །དངོས་བཞིན་དོན་དང་བཅས་པར་འགྱུར། །རྣམ་པར་མ་གྱུར་ཀུན་འབྱུང་ལས། །རྣམ་འགྱུར་སྡུག་བསྔལ་ནད་ཆེན་འདི། །ཐབས་གང་གིས་ནི་བཟློག་འགྱུར་ཞེས། །ཉིན་མཚན་རྟག་ཏུ་བསམ་པ་ན། །དམ་པའི་ཆོས་ཀྱི་སྨན་ཆེན་ལས། །གཞན་མིན་དེ་ཡང་སྨན་པ་མཆོག །དགེ་བའི་བཤེས་ལ་རག་ལས་ཤིང་། །ངེས་པ་བརྟན་པོ་རྙེད་པའི་ཚེ། །ལྟ་དང་སྤྱོད་པ་རྣམ་དག་ཅིང་། །རྗེས་སུ་འཛིན་པའི་སྙིང་བརྩེ་ནས། །སྐྱེས་བུ་དམ་པ་ངེས་བཙལ་ནས། །མཉེས་པ་གསུམ་གྱིས་བསྟེན་པར་བྱ། །དེ་ནས་ཉེས་སྤྱོད་སྤོང་བ་ཡི། །ཚུལ་གནས་ཁྲིམས་ཀྱིས་གཞི་བཟུང་སྟེ། །དགེ་ཆོས་ཕུན་ཚོགས་སྡུད་མཁས་པ། །ཐོས་བསམ་ཤེས་རབ་བསྐྱེད་ནས་ཀྱང་། །ཇི་ལྟར་དཔྱད་པས་གྲུབ་པའི་དོན། །རང་རྒྱུད་འདུལ་བའི་ཐབས་ཁོ་ནར། །སྦྱར་ཏེ་ཞི་བའི་ནགས་ཀླུང་དུ། །བསྒོམ་པའི་བདུད་རྩི་མི་ཕྱེད་བཏུང་། །སྔོན་དུ་འགྲོ་བའི་རྩིག་ངོས་སུ། །དངོས་གཞིའི་རི་མོ་ལེགས་འབར་བ། །རྗེས་སུ་བསྐྱངས་པའི་ཐབས་མཁས་ཀྱིས། །འཇིག་རྟེན་གསུམ་གྱི་མཆོད་རང་གཞན་དོན་གཉིས་ཕུན་ཚོགས། སྡོང་འགྲུབ། །ཁྱད་གཞི་དང་ནི་ཁྱད་ཆོས་ཀྱི། །དལ་འབྱོར་རྙེད་དཀའི་ཚུལ་རྟོགས་ནས། །ཕྲ་བའི་མི་རྟག་ལེགས་བསམས་ན། །སྤྱོད་ཡུལ་དོན་མེད་ཇི་ལྟར་བཟོད། །ཀྱེ་མ་འཁོར་བ་སྡུག་བསྔལ་ཏེ། །ལྟར་སྣང་བདེ་བའང་བསླུ་བའི་རྒྱུ། །དེ་བས་འབད་པ་ཐམས་ཅད་ཀྱིས། །སྲིད་པའི་རྩ་བ་བཅད་པར་བྱ། །རང་དོན་མཐར་ཕྱིན་འགྲོ་ཀུན་ལ། །ཕན་བཞེད་ཐབས་དང་བཅས་པ་ཡི། །རྫོགས་སངས་རྒྱས་ལ་སྐྱབས་སོང་ནས། །ཆོས་དང་དགེ་འདུན་དག་ཀྱང་བསྙེན། །འབྱུང་རྔུབས་དབང་པོ་བློ་དག་གི །རིག་པས་སྔ་མའི་སྐྱེ་ཡོད་པར། །འགྲུབ་ཅིང་དེ་ཡང་ཐུག་མེད་ཕྱིར། །འགྲོ་ཀུན་ཕ་མར་ངེས་བྱས་ཏེ། །དྲིན་བཟོའི་ཚུལ་ལ་རྣམ་བརྟགས་ན། །བྱམས་དང་སྙིང་རྗེ་ལྷག་བསམ་དང་། །སྨོན་དང་འཇུག་པའི་བདག་ཉིད་ཀྱི། །བྱང་ཆུབ་སེམས་རྣམས་རིམ་བཞིན་སྐྱེས། །དེ་མཐར་འཁོར་རྩ་བདག་འཛིན་དང་། །དངོས་གཉེན་བདག་མེད་རྟོགས་པ་ཡི། །ཤེས་རབ་ཉིད་ལས་གཞན་མིན་ཕྱིར། །འདི་ཉིད་རྟོགས་པའི་ཐབས་ལ་འབད། །གང་ཚེ་ངར་འཛིན་ལྷན་སྐྱེས་ཉིད། །ཕུང་སོགས་རྟེན་དང་གཅིག་པའམ། །ཐ་དད་གང་ཡིན་དཔྱད་པ་ན། །གཅིག་ན་དངོས་ཀུན་གཅིག་ཏུ་འགྱུར། །ཐ་དད་ཉིད་ན་གདགས་གཞི་རྣམས། །བློ་ཡི་གུད་དུ་ཕྱེ་བ་ན། །བདག་འཛིན་རྫས་གཞན་མ་དམིགས་ཕྱིར། །གཞི་མེད་འཁྲུལ་པ་ཉིད་དུ་ཟད། །དེ་ནས་གདགས་གཞིའི་ཕུང་པོ་སོགས། །དོན་དང་སེམས་སུ་ལེགས་བསྡུས་ནས། །ཕྱོགས་དང་ཕྲད་པ་བརྟག་པ་སོགས། །བློ་གྲོས་ཞིབ་མོས་དཔྱད་པ་ན། །ཐག་ཁྲ་སྦྲུལ་དུ་འཛིན་པའི་ཚེ། །ཐག་པ་ཉིད་དང་སྐུད་པ་དང་། །རྡུལ་དང་ཆ་མེད་རིམ་པ་བཞིན། །བདག་མེད་རྣམ་གཉིས་མངོན་དུ་བྱེད། །དེ་ལྟར་ན་ཡང་ཆོས་རྣམས་ཀུན། །བརྟེན་ནས་གདགས་པ་ཙམ་ཉིད་དང་། །དེ་ཡང་དཔྱད་མཐར་མི་སོན་པའི། །བརྗོད་བྲལ་བློ་འདས་དགོངས་པར་འཇུག །གང་ཚེ་དོན་དམ་གྲུབ་ཚད་དང་། །ཉམས་སུ་མྱོང་བ་མི་ཕྱེད་པའི། །སྟོང་དང་རྟེན་འབྱུང་འགལ་མེད་པས། །རྨི་ལམ་ལྟ་བུའི་བསོད་ནམས་སྤྱད། །མཛད་འཕྲོ་ལུས།། །། ༈

[edit]

yang zhal gdams mdzad 'phro lus pa/__ rgyal rnams gzhan don sangs rgyas phyir/__/bdag cag kho nar thugs brtse bas/__/lam ston dge ba'i bshes gnyen du/__/snang la dngos po kun gyis 'dud/__/lung ma bstan las kun bslang ba'i/__/sems ni dge la mngon bzhag nas/__/de nas kun tu spyod pa kyang /__/rnam par dag pa'i thabs la 'bad/__/bsam pa phun sum tshogs pa yis/__/sbyor ba gang la 'jug gyur yang /__/gser 'gyur rtsi yis thebs pa yi/__/dngos bzhin don dang bcas par 'gyur/__/rnam par ma gyur kun 'byung las/__/rnam 'gyur sdug bsngal nad chen 'di/__/thabs gang gis ni bzlog 'gyur zhes/__/nyin mtshan rtag tu bsam pa na/__/dam pa'i chos kyi sman chen las/__/gzhan min de yang sman pa mchog__/dge ba'i bshes la rag las shing /__/nges pa brtan po rnyed pa'i tshe/__/lta dang spyod pa rnam dag cing /__/rjes su 'dzin pa'i snying brtse nas/__/skyes bu dam pa nges btsal nas/__/mnyes pa gsum gyis bsten par bya/__/de nas nyes spyod spong ba yi/__/tshul gnas khrims kyis gzhi bzung ste/__/dge chos phun tshogs sdud mkhas pa/__/thos bsam shes rab bskyed nas kyang /__/ji ltar dpyad pas grub pa'i don/__/rang rgyud 'dul ba'i thabs kho nar/__/sbyar te zhi ba'i nags klung du/__/bsgom pa'i bdud rtsi mi phyed btung /__/sngon du 'gro ba'i rtsig ngos su/__/dngos gzhi'i ri mo legs 'bar ba/__/rjes su bskyangs pa'i thabs mkhas kyis/__/'jig rten gsum gyi mchod rang gzhan don gnyis phun tshogs/__sdong 'grub/__/khyad gzhi dang ni khyad chos kyi/__/dal 'byor rnyed dka'i tshul rtogs nas/__/phra ba'i mi rtag legs bsams na/__/spyod yul don med ji ltar bzod/__/kye ma 'khor ba sdug bsngal te/__/ltar snang bde ba'ang bslu ba'i rgyu/__/de bas 'bad pa thams cad kyis/__/srid pa'i rtsa ba bcad par bya/__/rang don mthar phyin 'gro kun la/__/phan bzhed thabs dang bcas pa yi/__/rdzogs sangs rgyas la skyabs song nas/__/chos dang dge 'dun dag kyang bsnyen/__/'byung rngubs dbang po blo dag gi__/rig pas snga ma'i skye yod par/__/'grub cing de yang thug med phyir/__/'gro kun pha mar nges byas te/__/drin bzo'i tshul la rnam brtags na/__/byams dang snying rje lhag bsam dang /__/smon dang 'jug pa'i bdag nyid kyi/__/byang chub sems rnams rim bzhin skyes/__/de mthar 'khor rtsa bdag 'dzin dang /__/dngos gnyen bdag med rtogs pa yi/__/shes rab nyid las gzhan min phyir/__/'di nyid rtogs pa'i thabs la 'bad/__/gang tshe ngar 'dzin lhan skyes nyid/__/phung sogs rten dang gcig pa'am/__/tha dad gang yin dpyad pa na/__/gcig na dngos kun gcig tu 'gyur/__/tha dad nyid na gdags gzhi rnams/__/blo yi gud du phye ba na/__/bdag 'dzin rdzas gzhan ma dmigs phyir/__/gzhi med 'khrul pa nyid du zad/__/de nas gdags gzhi'i phung po sogs/__/don dang sems su legs bsdus nas/__/phyogs dang phrad pa brtag pa sogs/__/blo gros zhib mos dpyad pa na/__/thag khra sbrul du 'dzin pa'i tshe/__/thag pa nyid dang skud pa dang /__/rdul dang cha med rim pa bzhin/__/bdag med rnam gnyis mngon du byed/__/de ltar na yang chos rnams kun/__/brten nas gdags pa tsam nyid dang /__/de yang dpyad mthar mi son pa'i/__/brjod bral blo 'das dgongs par 'jug__/gang tshe don dam grub tshad dang /__/nyams su myong ba mi phyed pa'i/__/stong dang rten 'byung 'gal med pas/_/rmi lam lta bu'i bsod nams spyad/__/mdzad 'phro lus//___//___!_