JKW-KABUM-09-TA-001-007

🚧 This website is under continued development. We appreciate your patience!

First section in volume. Back to Volume PageLast section in volume.

Wylie title		page=1
Location	mkhyen brtse'i bka' 'bum Volume 1, sde tshan 7, Pages (Folios to )
Author	འཇམ་དབྱངས་མཁྱེན་བརྩེའི་དབང་པོ་
Less details More details
Citation
Genre	Collected Works - Selected - bka' 'bum

Tibetan Text

Wylie

[edit]

བླ་མ་ཡིད་བཞིན་འཁོར་ལོའི་ཐུགས་དམ་གནད་ནས་སྐུལ་བའི་གསོལ་འདེབས་འཆི་མེད་ཚེ་དང་ཡེ་ཤེས་གྲུབ་པའི་དབྱངས་སྙན། ༄༅། །བླ་མ་ཡིད་བཞིན་འཁོར་ལོའི་ཐུགས་དམ་གནད་ནས་སྐུལ་བའི་གསོལ་འདེབས་འཆི་མེད་ཚེ་དང་ཡེ་ཤེས་གྲུབ་པའི་དབྱངས་སྙན་ཞེས་བྱ་བ་བཞུགས་སོ། །ན་མོ་གུ་རུ་ཙིནྟཱ་ཙཀྲཱ་ཡ། སྲས་བཅས་རྒྱལ་བ་ཀུན་གྱི་ཡུམ་གྱུར་མ། །དྲན་པས་ཚེ་དང་ཡེ་ཤེས་མཆོག་སྩོལ་མ། །སྐྱབས་གནས་ཀུན་འདུས་བླ་མ་རྗེ་བཙུན་མ། །སྙིང་ནས་དྲན་ནོ་ཐུགས་རྗེའི་འཇུག་པས་སྐྱོངས། །བདག་ཅག་དེང་ནས་ཚེ་རབས་ཐམས་ཅད་དུ། །དལ་འབྱོར་མཆོག་ཐོབ་མཚན་ལྡན་དགེ་བའི་བཤེས། །དད་པས་བསྙེན་ལས་སྲིད་ཞིའི་ལེགས་ཚོགས་ཀུན། །འཕེལ་བའི་རྟེན་འབྲེལ་སྒྲིགས་ཤིག་རྗེ་བཙུན་མ། །མི་རྟག་ངན་སོང་སྡུག་བསྔལ་ལ་བརྟེན་ནས། །རྗེས་དྲན་དྲུག་དང་ལས་འབྲས་བླང་དོར་དང་། །བསམ་གཏན་གཟུགས་མེད་ཏིང་འཛིན་ཐེམ་སྐས་ནས། །མངོན་མཐོའི་གྲོང་དུ་འཁྲིད་ཅིག་རྗེ་བཙུན་མ། །ཁམས་གསུམ་འཁོར་བར་སྡུག་བསྔལ་འབྱུང་བའི་གཞི། །ལས་ཉོན་ཀུན་འབྱུང་འགོག་པའི་བསླབ་གསུམ་ལམ། །ཚུལ་བཞིན་བསྟེན་ལས་ཐར་པའི་ཁང་བཟང་དུ། །ཞི་བདེའི་དབུགས་འབྱིན་སྩོལ་ཅིག་རྗེ་བཙུན་མ། །ཁྱད་པར་འགྲོ་ཀུན་མར་ཤེས་དྲིན་དྲན་ཞིང་། །དྲིན་བཟོའི་སླད་དུ་བྱམས་དང་སྙིང་རྗེ་དང་། །བདག་གཞན་མཉམ་བརྗེའི་བྱང་ཆུབ་སྤྱོད་མཆོག་གིས། །ཀུན་མཁྱེན་ལམ་བཟང་སྟོན་ཅིག་རྗེ་བཙུན་མ། །དེ་ཚེ་རྣམ་དག་དབང་དང་རྗེས་གནང་གིས། །རྒྱུད་སྨིན་དམ་ཚིག་སྡོམ་པར་ལྡན་པ་དང་། །ཟབ་དོན་བསྒོམ་པའི་འགལ་རྐྱེན་ཀུན་ཞི་ཞིང་། །མཐུན་རྐྱེན་ལེགས་ཚོགས་སྤེལ་ཅིག་རྗེ་བཙུན་མ། །བླ་མ་མཆོག་གསུམ་གཙུག་གི་ནོར་བུར་ཐོབ། །སྨོན་དང་འཇུག་པའི་བྱང་སེམས་སྙིང་ལ་ཤར། །བསོད་ནམས་ཡེ་ཤེས་ཚོགས་གཉིས་མྱུར་རྫོགས་པས། །བདག་རྒྱུད་དག་པར་མཛོད་ཅིག་རྗེ་བཙུན་མ། །བསྙེན་གྲུབ་ཡན་ལག་བཞི་ཡི་རྣལ་འབྱོར་གྱིས། །རང་ལུས་འཕགས་མ་ཡིད་བཞིན་འཁོར་ལོའི་སྐུར། །གསལ་བ་རབ་ཀྱི་ཏིང་འཛིན་མཐར་ཕྱིན་པའི། །བསམ་གཏན་གྲུབ་པར་མཛོད་ཅིག་རྗེ་བཙུན་མ། །ཟབ་མོའི་བཟླས་པས་ཐུགས་རྒྱུད་བསྐུལ་བའི་མཐུས། །རིགས་བདག་འཆི་མེད་མགོན་པོར་ཡོངས་ཤར་ཞིང་། །ཟླ་ཤེལ་མདོག་ཅན་འབར་བའི་འཁོར་ལོ་ཡིས། །མི་མཐུན་ཕྱོགས་ལས་སྲུངས་ཤིག་རྗེ་བཙུན་མ། །རབ་དཀར་བདུད་རྩིའི་སྣང་བས་ས་གསུམ་གྱི། །རྒུད་ཅིང་ཕོངས་པའི་མུན་པ་ཀུན་ཞི་ནས། །གསེར་ཞུན་འོད་ཀྱི་ཕྲེང་བས་སྲིད་དང་ཞིའི། །ཕུན་ཚོགས་རྒྱས་པར་མཛོད་ཅིག་རྗེ་བཙུན་མ། །པདྨ་རཱ་གའི་མཆིལ་པ་རྣོན་པོ་ཡིས། །བརྟན་གཡོའི་དངོས་ཀུན་དབང་དུ་འདུ་བ་དང་། །དབང་སྔོན་འོད་ཀྱི་ཞགས་པས་གདུག་པ་ཅན། །མཐའ་དག་འཆིང་བར་མཛོད་ཅིག་རྗེ་བཙུན་མ། །མར་གད་ཞུན་མའི་སྣང་བས་རེག་པའི་མོད། །མཆོག་ཐུན་དངོས་གྲུབ་ཅིག་ཆར་འགྲུབ་དང་བཅས། །སླར་ཡང་འོད་ཟེར་མཆིན་ཁའི་དྲྭ་བ་ཡིས། །བརྟན་ཅིང་ནུས་ལྡན་མཛོད་ཅིག་རྗེ་བཙུན་མ། །རིགས་ཀྱི་བདག་པོའི་ཐུགས་རྗེའི་ཟིལ་དངར་གྱིས། །ཚེ་བསོད་དཔལ་འབྱོར་ལང་ཚོ་དར་བབས་པར། །ཐུགས་ཀའི་འཁོར་ལོའི་བདུད་རྩིའི་གསོས་བཏབ་པས། །འཆི་མེད་གྲུབ་པར་མཛོད་ཅིག་རྗེ་བཙུན་མ། །མདོར་ན་སྣང་གྲགས་རིག་གསུམ་འཕགས་མ་ཡི། །སྐུ་གསུང་ཐུགས་ཀྱི་གསང་བར་བྱིན་བརླབས་ནས། །འཇིག་རྟེན་འཇིག་རྟེན་འདས་པའི་དངོས་གྲུབ་ཀྱིས། །དོན་གཉིས་འགྲུབ་པར་མཛོད་ཅིག་རྗེ་བཙུན་མ། །གཞན་ཡང་སྣོད་བཅུད་རྒུད་པ་ཀུན་ཞི་ཞིང་། །བསྟན་འཛིན་ཞབས་བརྟན་བཤད་སྒྲུབ་བསྟན་པ་དར། །འགྲོ་ཀུན་རྫོགས་ལྡན་འབྱོར་པས་མངོན་མཐོ་བའི། །བཀྲ་ཤིས་སྣང་བ་སྩོལ་ཅིག་རྗེ་བཙུན་མ། །ཞེས་འཕགས་མ་ཡིད་བཞིན་འཁོར་ལོའི་ཐུགས་དམ་གནད་ནས་བསྐུལ་བའི་གསོལ་འདེབས། ཐུན་མོང་མ་ཡིན་པའི་ཟབ་ཁྲིད་ཀྱི་ལམ་རིམ་དང་འབྲེལ་བ་འདི་ཡང་ཤཱཀྱའི་བཙུན་པ་འཇམ་དབྱངས་མཁྱེན་བརྩེའི་དབང་པོས་བག་ཡོད་ཅེས་པ་ཆུ་མོ་གླང་གི་གནམ་ལོ་གསར་དུ་འཆར་བའི་དུས་ཀྱི་དགེ་མཚན་ཕུན་སུམ་ཚོགས་པའི་ཉིན་གསོལ་བ་བཏབ་པའི་ཡི་གེ་པ་ནི། གནས་ལྔ་རིག་པའི་པཎྜི་ཏ་ཆེན་པོ་འཇམ་དབྱངས་ལེགས་བཤད་རྒྱ་མཚོས་མཛད་པའི་དགེ་བས་འགྲོ་ཀུན་འཆི་མེད་གྲུབ་པའི་དགའ་སྟོན་ལ་ལོངས་སུ་སྤྱོད་པའི་རྒྱུར་གྱུར་ཅིག ། ༈

[edit]

bla ma yid bzhin 'khor lo'i thugs dam gnad nas skul ba'i gsol 'debs 'chi med tshe dang ye shes grub pa'i dbyangs snyan/ @#/_/bla ma yid bzhin 'khor lo'i thugs dam gnad nas skul ba'i gsol 'debs 'chi med tshe dang ye shes grub pa'i dbyangs snyan zhes bya ba bzhugs so/__/na mo gu ru tsin+tA tsakrA ya/__sras bcas rgyal ba kun gyi yum gyur ma/__/dran pas tshe dang ye shes mchog stsol ma/__/skyabs gnas kun 'dus bla ma rje btsun ma/__/snying nas dran no thugs rje'i 'jug pas skyongs/__/bdag cag deng nas tshe rabs thams cad du/__/dal 'byor mchog thob mtshan ldan dge ba'i bshes/__/dad pas bsnyen las srid zhi'i legs tshogs kun/__/'phel ba'i rten 'brel sgrigs shig rje btsun ma/__/mi rtag ngan song sdug bsngal la brten nas/__/rjes dran drug dang las 'bras blang dor dang /__/bsam gtan gzugs med ting 'dzin them skas nas/__/mngon mtho'i grong du 'khrid cig rje btsun ma/__/khams gsum 'khor bar sdug bsngal 'byung ba'i gzhi/__/las nyon kun 'byung 'gog pa'i bslab gsum lam/__/tshul bzhin bsten las thar pa'i khang bzang du/__/zhi bde'i dbugs 'byin stsol cig rje btsun ma/__/khyad par 'gro kun mar shes drin dran zhing /__/drin bzo'i slad du byams dang snying rje dang /__/bdag gzhan mnyam brje'i byang chub spyod mchog gis/__/kun mkhyen lam bzang ston cig rje btsun ma/__/de tshe rnam dag dbang dang rjes gnang gis/__/rgyud smin dam tshig sdom par ldan pa dang /__/zab don bsgom pa'i 'gal rkyen kun zhi zhing /__/mthun rkyen legs tshogs spel cig rje btsun ma/__/bla ma mchog gsum gtsug gi nor bur thob/__/smon dang 'jug pa'i byang sems snying la shar/__/bsod nams ye shes tshogs gnyis myur rdzogs pas/__/bdag rgyud dag par mdzod cig rje btsun ma/__/bsnyen grub yan lag bzhi yi rnal 'byor gyis/__/rang lus 'phags ma yid bzhin 'khor lo'i skur/__/gsal ba rab kyi ting 'dzin mthar phyin pa'i/__/bsam gtan grub par mdzod cig rje btsun ma/__/zab mo'i bzlas pas thugs rgyud bskul ba'i mthus/__/rigs bdag 'chi med mgon por yongs shar zhing /__/zla shel mdog can 'bar ba'i 'khor lo yis/__/mi mthun phyogs las srungs shig rje btsun ma/__/rab dkar bdud rtsi'i snang bas sa gsum gyi/__/rgud cing phongs pa'i mun pa kun zhi nas/__/gser zhun 'od kyi phreng bas srid dang zhi'i/__/phun tshogs rgyas par mdzod cig rje btsun ma/__/pad+ma rA ga'i mchil pa rnon po yis/__/brtan g.yo'i dngos kun dbang du 'du ba dang /__/dbang sngon 'od kyi zhags pas gdug pa can/__/mtha' dag 'ching bar mdzod cig rje btsun ma/__/mar gad zhun ma'i snang bas reg pa'i mod/__/mchog thun dngos grub cig char 'grub dang bcas/__/slar yang 'od zer mchin kha'i drwa ba yis/__/brtan cing nus ldan mdzod cig rje btsun ma/__/rigs kyi bdag po'i thugs rje'i zil dngar gyis/__/tshe bsod dpal 'byor lang tsho dar babs par/__/thugs ka'i 'khor lo'i bdud rtsi'i gsos btab pas/__/'chi med grub par mdzod cig rje btsun ma/__/mdor na snang grags rig gsum 'phags ma yi/__/sku gsung thugs kyi gsang bar byin brlabs nas/__/'jig rten 'jig rten 'das pa'i dngos grub kyis/__/don gnyis 'grub par mdzod cig rje btsun ma/__/gzhan yang snod bcud rgud pa kun zhi zhing /_/bstan 'dzin zhabs brtan bshad sgrub bstan pa dar/__/'gro kun rdzogs ldan 'byor pas mngon mtho ba'i/__/bkra shis snang ba stsol cig rje btsun ma/__/zhes 'phags ma yid bzhin 'khor lo'i thugs dam gnad nas bskul ba'i gsol 'debs/__thun mong ma yin pa'i zab khrid kyi lam rim dang 'brel ba 'di yang shAkya'i btsun pa 'jam dbyangs mkhyen brtse'i dbang pos bag yod ces pa chu mo glang gi gnam lo gsar du 'char ba'i dus kyi dge mtshan phun sum tshogs pa'i nyin gsol ba btab pa'i yi ge pa ni/__gnas lnga rig pa'i paN+Di ta chen po 'jam dbyangs legs bshad rgya mtshos mdzad pa'i dge bas 'gro kun 'chi med grub pa'i dga' ston la longs su spyod pa'i rgyur gyur cig_____/__!