JKW-KABUM-18-TSHA-001-016

🚧 This website is under continued development. We appreciate your patience!

Previous Text Back to Volume PageNext Text

ཡང་ཞབས་བརྟན་གྱི་ལེགས་འབུལ་ལྟ་བུའི་ཚེ་གསོལ་འདེབས་འདུན་སྨོན་གྱི་བརྗོད་པ་འདི་ལྟར་སྦྱར།

Wylie title	yang zhabs brtan gyi legs 'bul lta bu'i tshe gsol 'debs 'dun smon gyi brjod pa 'di ltar sbyar
Location	mkhyen brtse'i bka' 'bum Volume 18, sde tshan 1, Text 16, Pages 189-195 (Folios 95a2 to 98a6)
Author	འཇམ་དབྱངས་མཁྱེན་བརྩེའི་དབང་པོ་
Less details More details
Citation	'jam dbyangs mkhyen brtse'i dbang po. yang zhabs brtan gyi legs 'bul lta bu'i tshe gsol 'debs 'dun smon gyi brjod pa 'di ltar sbyar. In 'jam dbyangs mkhyen brtse'i dbang po'i bka' 'bum, Vol. 18: 189-195. Khams sde dge rdzong sar dgon: Rdzong sar blo gros phun tshogs, 2020.
Genre	Official Letters - chab shog

1 Texts in this Section (sde tshan or chos tshan)

16 189-195	ཡང་ཞབས་བརྟན་གྱི་ལེགས་འབུལ་ལྟ་བུའི་ཚེ་གསོལ་འདེབས་འདུན་སྨོན་གྱི་བརྗོད་པ་འདི་ལྟར་སྦྱར། yang zhabs brtan gyi legs 'bul lta bu'i tshe gsol 'debs 'dun smon gyi brjod pa 'di ltar sbyar Official Letters - chab shog	Text page View PDF
	[[|འཇམ་དབྱངས་མཁྱེན་བརྩེའི་དབང་པོ་ ()]]

Tibetan Text

Wylie

[edit]

ཡང་ཞབས་བརྟན་གྱི་ལེགས་འབུལ་ལྟ་བུའི་ཚེ་གསོལ་འདེབས་འདུན་སྨོན་གྱི་བརྗོད་པ་འདི་ལྟར་སྦྱར་སྟེ། །ཨོཾ་སྭསྟི་ཛཱི་བནྟུ། ལེགས་གསུང་སྡེ་སྣོད་བྱེ་བའི་གདུགས་དཀར་པོ། །ཐུགས་བསྐྱེད་དཔུང་པས་འཆེལ་བའི་གྲིབ་བསིལ་ཆེར། །སྐལ་བཟང་དབུགས་འབྱིན་མཛད་པའི་ཆོ་ག་མཁན། །གསང་གསུམ་བསྐལ་པ་རྒྱ་མཚོར་འཚོ་གཞེས་གསོལ། ༡ །ཤེས་བྱའི་ཆུ་གཏེར་གཏིང་མཐའ་བྲལ་བའི་ཀློང་། །མཁྱེན་གཉིས་གསེར་ཉ་གཡོ་བའི་ཟློས་གར་གྱིས། །མཐའ་ཀླས་ཡིད་ཅན་ཕན་བདེའི་དཔལ་སྟེར་བའི། །གསང་གསུམ་བསྐལ་པ་རྒྱ་མཚོར་འཚོ་གཞེས་གསོལ། ༢ །མཚན་བཟང་བུམ་པ་བཟང་པོའི་དགེ་མཚན་ནི། །རྨད་བྱུང་བསླབས་གཞིའི་གོས་ཀྱིས་ཉེར་བཀླུབས་ཅིང་། །རྣམ་གྲོལ་ཐར་པའི་བདུད་རྩིས་མངོན་གཏམས་པའི། །གསང་གསུམ་བསྐལ་པ་རྒྱ་མཚོར་འཚོ་གཞེས་གསོལ། ༣ གཞན་ཕན་ཉིན་མོའི་འོད་རིས་ཀྱིས་ཕྱེ་བའི། །སྨོན་འཇུག་བྱང་ཆུབ་སེམས་ཀྱི་པདྨ་དཀར། །ཡིད་ཅན་ཀུན་དགའི་ཉེར་འཚོར་གྱུར་པ་གང་། །གསང་གསུམ་བསྐལ་པ་རྒྱ་མཚོར་འཚོ་གཞེས་གསོལ། ༤ །གསང་རྒྱུད་ཡིད་བཞིན་མཚོ་ནས་བླངས་པ་ཡི། །སྨིན་གྲོལ་སྒྲ་དབྱངས་སྒྲོགས་པའི་གཡས་འཁྱིལ་དུང་། །སྒྲིབ་གཉིས་རིམས་ནད་རྒྱུ་བ་གཅོད་བྱེད་པའི། །གསང་གསུམ་བསྐལ་པ་རྒྱ་མཚོར་འཚོ་གཞེས་གསོལ། ༥ །བཟུང་འཛིན་སྤྲོས་པ་རྟུལ་བའི་ཡེ་ཤེས་ནི། །ཐུགས་ཀྱི་དཔལ་བེར་སིམ་པའི་དེ་མ་ཐག །སྐྱེ་དང་འཇིགས་པའི་ཕ་མཐའ་ལས་གྲོལ་བའི། །གསང་གསུམ་བསྐལ་པ་རྒྱ་མཚོར་འཚོ་གཞེས་གསོལ། ༦ །དེ་ལྟར་དུས་མིན་ཉི་བུའི་དཔུང་ཚོགས་ཀྱི། །ཕྱོགས་ལས་རྣམ་པར་རྒྱལ་བའི་རྒྱལ་མཚན་ནི། །སྲིད་རྩེར་བསྒྲེངས་པའི་གྲགས་དཀར་ཟླ་འོད་ཀྱིས། །སྐལ་བཟང་སྣང་བ་ནུབ་པ་མེད་པར་མཛོད། ༧ །མཁྱེན་གཉིས་གསེར་གྱི་འཁོར་ལོ་སྔོན་འགྲོ་བས། །ཐུབ་བསྟན་གླིང་བཞིའི་ལྗོངས་ཀུན་དབང་བསྒྱུར་ཏེ། །སྔོན་མེད་རྫོགས་ལྡན་གསར་པའི་དགེ་མཚན་གྱིས། །ལྷར་བཅས་དགའ་བའི་དགའ་སྟོན་སྦྱིན་གྱུར་ཅིག ༨ །ཅེས་ཕྱོགས་བཅུ་དུས་གསུམ་གྱི་དཔལ་ལྡན་སྟོབས་བཅུ་མངའ་བ་མཐའ་ཀླས་པ་ཀུན་གྱིས་བསྐལ་པ་རྒྱ་མཚོར་བསོད་ནམས་ཀྱི་ཕུང་པོ་ཡོངས་སུ་རྫོགས་པ་ལས་བྱུང་བའི་མཚན་དཔེའི་ཆ་ཤས་བཀྲ་ཤིས་པའི་རྟགས་ཀྱི་སྒྲ་ལས་ཉེ་བར་དྲངས་པའི་སྭ་སྟིའི་དབྱངས་སྙན་མཚོ་བྱུང་མའི་ཕྱག་གི་རྒྱུད་མངས་ལ་ཅུང་ཟད་རེག་པས་མདུན་བསུས་ཏེ། དེང་གི་ཆར་ཡང་། གང་ན་མ་ལུས་ཤིང་ལུས་པ་མེད་པའི་རྣམ་པར་འདྲེན་པ་སྲས་དང་སློབ་མར་བཅས་པས་ཀྱང་སོར་མོའི་ཆུ་སྐྱེས་དམར་པོའི་ཞབས་མཐིལ་གྱི་འཁོར་ལོ་ལ་ཉིན་རེ་བཞིན་དུ་བཏུད་པའི་རིགས་ཐམས་ཅད་ཀྱི་བདག་ཉིད། དཀྱིལ་འཁོར་ཐམས་ཅད་ཀྱི་གཙོ་བོ། སྐྱབས་གནས་ཀུན་གྱི་ཐུགས་རྗེ་དང་བྱིན་རླབས་ཀྱི་ཕུང་པོ་གཅིག་ཏུ་བསྡུས་པའི་རང་གཟུགས་རྗེ་བཙུན་བླ་མ་དམ་པ་ཁྱོད་ནི། གཟོད་མ་ནས་ཟད་དང་མི་སྐྱེ་ཤེས་པའི་ཡེ་ཤེས་མངོན་སུམ་དུ་བརྙེས་སུ་ཟིན་ཀྱང་། གཞན་ལ་ཕན་པར་མཛད་པའི་དམ་བཅའི་རི་མོ་གཞར་ཡང་ནུབ་པ་མེད་པས་ཆེས་ཆེར་སྙིགས་མར་གྱུར་པའི་དུས་འདིར་སུམ་ལྡན་རྡོ་རྗེ་འཛིན་པ་ཆེན་པོའི་རྣམ་རོལ་དུ་བཞེངས་ཏེ། མཐའ་ཡས་པའི་འགྲོ་བ་ཀུན་ལ་ལམ་བདེན་གྱི་བདུད་རྩི་མངོན་སུམ་དུ་བསྟན་ནས་མངོན་མཐོ་དང་ངེས་ལེགས་ཀྱི་གོ་འཕང་ལ་སྦྱོར་པའི་བཀའ་དྲིན་ནི་བྱང་ཆུབ་སྙིང་པོའི་བར་དུ་གཞལ་བར་སླ་བ་མ་ཡིན་ལ། ད་དུང་ཡང་བདག་སོགས་ལྟོས་བཅས་ཡོངས་ཀྱི་སྐྱབས་དང་། མགོན་དང་། དཔུང་གཉེན་གཅིག་པུར་འབྱུང་འགྱུར་གྱི་རྒྱལ་བ་ཡིད་སྲུབས་ཀྱི་ཕྱོགས་ལས་རྣམ་པར་རྒྱལ་ཏེ་མཐའ་ཀླས་སྡེ་སྣོད་ཀྱི་རྒྱལ་རྔ་སྲིད་རྩེར་བརྡུང་བའི་བར་དུ་མི་ཤིགས་རྡོ་རྗེའི་ཁྲི་འཕངས་མཐོན་པོར་འཆི་མེད་མགོན་པོ་ཚེ་མཐའ་ཡས་པའི་རང་གཟུགས་སུ་འཚོ་ཞིང་གཞེས་ལ་ཆོས་ཀྱང་སྟོན་པར་སྙིང་ཐག་པ་ནས་གསོལ་བ་འདེབས་པའི་རྟེན་དུ། རང་གཞན་གྱི་རྒྱུད་ཀྱིས་བསྡུས་པའི་བདོག་དགུ་སྤྱི་དང་ཁྱད་པར་རྣམ་པར་དཀར་བའི་ལེགས་བྱས་ཐམས་ཅད་ཕྱོགས་གཅིག་ཏུ་བསྡུས་ཏེ་འཕགས་པ་ཀུན་ཏུ་བཟང་པོའི་སྨོན་ལམ་ལས་བྱུང་བའི་མཆོད་སྤྲིན་དུ་བྱིན་གྱིས་རླབས་ནས་འབུལ་བ་དང་ཆབས་ཅིག །དེ་ཉིད་མཚོན་པའི་དངོས་པོའི་མཎྜལ་ཟེག་མར། ཐོག་མར་བཀྲ་ཤིས་པའི་རྟགས་ཀྱི་རྣ་ཆས་སྒེག་པའི་ལྷ་རྫས་ཀྱི་ཝ་སྟྲཾ་དཀྱུས་སུ་རིང་བ་སོགས་ནས། མཐའ་རྟེན་སྟན་དཀར་རྡོ་རྗེ་དང་གཡུང་དྲུང་གི་མཚན་མས་བརྒྱན་པ་སྟེ་རྣམ་གྲངས་འབུལ་ལམ་ཞུས་པ་བརྩེ་ཆེན་ཡེ་ཤེས་ཀྱི་གཟིགས་པས་བདག་གིར་མཛད་དེ། རེ་བའི་ཤིང་རྟ་མངོན་འདོད་ཀྱི་བདོག་པས་ཕྱུར་བུར་བགེངས་པར་མཛད་དུ་གསོལ། །སརྦ་མ་ནོར་ཐཾ་པ་རི་པཱུརྞྞཾ་ཀུརྦནྟུ། ཞེས་སམ། ཤྲཱི་ཛི་བ་ཏིཥྛནྟུ། གདོད་ནས་ཡོངས་གྲུབ་འཆི་མེད་རྟག་པའི་སྐུར། །གཟུང་འཛིན་འཕོ་བའི་བག་ཆགས་ཀུན་བཅོམས་པས། ཁ་སྦྱོར་རྡོ་རྗེའི་ལང་ཚོར་འབར་བཞིན་དུ། །རྟག་པ་རྒྱུན་གྱི་འཁོར་ལོར་འཚོ་གཞེས་གསོལ། །གཞན་ཕྱིར་རྨད་བྱུང་གཏོང་བའི་རིན་ཆེན་ནི། །དམ་ཆོས་བདུད་རྩིའི་ཆོ་གས་དགེ་བྱས་པ། །སྐལ་བཟང་འགྲོ་བའི་དཔྱིད་དུ་སྩོལ་བཞིན་དུ། །ངེས་པར་ཞིང་ཁམས་འདི་ལས་གཡོ་མེད་མཛོད། །དཔག་མེད་འགོགས་པའི་བརླན་གྱིས་ཕྱེ་བ་ཡི། །རྣམ་གྲོལ་ཚུལ་ཁྲིམས་ཕུང་པོའི་ཨུཏྤ་ལ། །ངོ་མཚར་དགེ་མཚན་ཕྲག་བརྒྱས་གཏམས་བཞིན་དུ། །འཆི་མེད་གྲུབ་པའི་ལང་ཚོ་འབར་གྱུར་ཅིག །མི་འཁྲུགས་བཟོད་པའི་གོ་ཆ་བརྟན་པོའི་ངོར། །ཡིད་སྲུབས་དཔུང་གིས་བཏེགས་པའི་མཚོན་རྣོན་ཀྱང་། །སྙིང་རྗེའི་མེ་ཏོག་གཞོན་ནུར་དཔྱངས་པ་ལས། །ཟླ་མེད་གྲགས་པའི་རྒྱལ་རྔ་སྙན་པར་ཤོག །བསྐལ་མང་གཞན་གྱི་དོན་ལ་བརྩོན་པ་ཡི། །ཚོགས་ཟུང་བྱེ་བས་བསྐྲུན་པའི་མཚན་དཔེའི་དཔྱིད། །ཆེ་དགུའི་རལ་པས་བཏེགས་པའི་ནོར་བུའི་ཁྲིར། །ཞབས་པད་སྲིད་མཐའི་བར་དུ་བརྟན་གྱུར་ཅིག །ཟབ་རྒྱས་གདམས་པའི་བདུད་རྩི་སིམ་པ་ལས། །ཤིན་ཏུ་ཞི་བ་དམ་པའི་ནགས་ཀླུངས་སུ། །འཇུག་དང་ལྡངས་བ་བྲལ་བའི་བསམ་གཏན་གྱིས། །སྐྱེ་འཇིག་མཚན་མའི་སྤྲོས་པ་རྟུལ་བར་མཛོད། །རྡུལ་བྲལ་སོ་སོར་རྟོག་པའི་ཤེས་རབ་ཀྱིས། །འགྱུར་བཅས་ཆོས་སུ་སྣང་བའི་ཁམས་ཇི་སྙེད། །འཆི་མེད་རྟག་པའི་བདེན་པར་གཟིགས་བཞིན་དུ། །བརྟན་པར་མཛོད་ཅིག་སྙིང་རྗེའི་ལུས་ཅན་ཀྱེ། །དེ་ལྟར་དུས་གསུམ་གྱི་རྒྱལ་བ་སྲས་དང་བཅས་པ་ཐམས་ཅད་གང་གིས་གཤེགས་པའི་ལམ་མཆོག་ཕ་རོལ་ཏུ་ཕྱིན་པ་དྲུག་གི་སྒྲ་ལས་དྲངས་པའི་དགེ་ལེགས་ཀྱི་དབྱངས་སྙན་ཅུང་ཟད་བརྗོད་པས་མདུན་བསུས་ཏེ། དེང་གི་ཆར་ཡང་། སོགས་སྔ་མ་བཞིན་ལ་བརྗོད་བྱེད་རྒྱས་བསྡུས་ཅི་རིགས་པར་སྐྱར་རོ། ཡང་ན། ཨོཾ་སྭསྟི་ཏིཥྛནྟུ། ཆོས་དབྱིངས་ཤིན་ཏུ་རྟག་པ་དམ་པ་ལས། །རྣམ་པ་ཀུན་གྱི་མཆོག་ལྡན་རྡོ་རྗེའི་སྐུ། །སྣ་ཚོགས་མོས་པའི་རྗེས་མཐུན་སྒྱུ་འཕྲུལ་ཅན། །ལོངས་སྤྱོད་ཡོངས་རྫོགས་འཁོར་ལོར་འཚོ་གཞེས་གསོལ། །རྡུལ་བྲལ་འོད་གསལ་སྟོང་པའི་དགའ་མ་ལ། །མི་འགྱུར་བདེ་བའི་སྒྱུ་ཐབས་གྱིས་སྦྲེལ་བས། །ཟུང་འཇུག་ཐིག་ལེ་གཅིག་ལས་མི་འདའ་བས། ཁ་སྦྱོར་མཚན་དཔེའི་ལང་ཚོར་འཚོ་གཞེས་གསོལ། །ཀུན་ཏུ་འཕོ་བའི་འགྲོ་འོང་རྒྱུར་བཅས་པ། །འཕོ་མེད་དབུ་མའི་སྲོག་ཏུ་འབར་བ་ལས། །ཆར་ཡང་ཟག་པ་སྤངས་པའི་ནཱ་དའི་གསུངས། །བདེ་ཆེན་ཡེ་ཤེས་ཆེན་པོར་འཚོ་གཞེས་གསོལ། །གཤིས་ལ་སྐྱེ་བའི་སྡང་པ་བྲལ་གྱུར་ན། །དེ་ལ་འཇིག་པའི་ཕ་མཐའ་མ་དམིགས་ཕྱིར། །གཞར་ཡང་སྤྲོས་པ་ཀུན་ལས་རངས་པའི་ཐུགས། །རང་བཞིན་མེད་པའི་དབྱིངས་སུ་འཚོ་གཞེས་གསོལ། །གཟོད་ནས་མཚན་མའི་རྟོག་པ་སྤངས་གྱུར་ཀྱང་། །གཞན་ཕྱིར་དམིགས་པའི་དམ་བཅས་མི་འདོར་བས། །སྙིགས་མའི་འགྱུར་བས་གཟིངས་པའི་སྐྱེ་དགུ་ལ། །སྙིང་རྗེས་ཡོངས་སུ་གང་ཁྱོད་འཚོ་གཞེས་གསོལ། །རྒྱལ་བའི་ཐུགས་རྗེ་རྟག་པ་དམ་པ་ནི། །ནམ་ཡང་འཆར་དང་ནུབ་པ་ལས་གྲོལ་ཕྱིར། །ཚུར་མཐོང་གདུལ་བྱའི་ངོར་ཡང་མི་སྦེད་པར། །ཕྲིན་ལས་རྒྱུན་མི་འཆད་པར་འཚོ་གཞེས་གསོལ། །གང་ལ་རེག་ན་ཕན་བདེའི་འབྱོར་པ་མཆོག །འབད་མེད་ལག་རྩེར་སྦྱིན་ལ་ནོར་གྱི་བུས། །མཚོན་མིན་གཏན་བདེའི་ངལ་བསོ་སྟེར་མཛད་པའི། །ཡོན་ཏན་འགོགས་པ་མེད་པར་འཚོ་གཞེས་གསོལ། །ཞེས་རྒྱལ་བ་རྣམས་ཀྱི་གང་ཞིག་བརྙེས་པའི་སྤངས་རྟོགས་ཀྱི་ཁྱད་པར་མཐར་ཐུག་པ་སྐུ་གསུམ་ཡན་ལག་བདུན་ལྡན་གྱི་སྒྲ་ལས་དྲངས་ཏེ་སྐུ་གསུངས་ཐུགས་ཡོན་ཏན་ཕྲིན་ལས་མི་ཟད་པ་རྒྱན་གྱི་འཁོར་ལོའི་རྣམ་རོལ་དུ་འཚོ་ཞིང་གཞེས་པར་གསོལ་བ་འདེབས་པའི་ཚིགས་སུ་བཅད་པ་མེ་ཏོག་མནྡཱ་རའི་དོ་ཤལ་ལྟ་བུར་གཡོ་བས་ལམ་ཡངས་པར་བྱས་ཏེ། དེང་གི་ཆར་ཡང་སོགས་ཐོག་མ་བཞིན་དུ་སྦྱར་རོ། །དེ་ལྟར་འཕྲོས་དོན་གྱི་ཁྱད་པར་སྣ་ཚོགས་པ་འདི་རྣམས་འཕྲིན་ཡིག་འབུལ་ཚུལ་ཁོ་ན་ལ་མ་ལྟོས་ཀྱང་། དོན་གཉེར་ཅན་དག་ལ་ཉེ་བར་མཁོ་བའི་འོས་སུ་གྱུར་པའི་རིགས་ཐམས་ཅད་ཀྱི་དཔེར་བརྗོད་པ་ཉུང་བསྡུས་ཤིག་རྟོགས་སླ་བ་ཕྱོགས་གཅིག་ཏུ་བཀོད་པ་སྟེ། གཞན་ཡང་ཁྲི་འདོན་དང་ཞབས་བརྟན་གྱི་སྐབས་སོགས་སུ་སྦྱོར་བར་འོས་པའི་ཕུན་སུམ་ཚོགས་པ་རྣམ་ལྔ་དང་། བཀྲ་ཤིས་རྫས་རྟགས་རྒྱལ་སྲིད་བདུན་སོགས་ཀྱི་རྣམ་བཤད་ཉུང་བསྡུས་ཤིག་ཀྱང་སྤྲོ་བར་འོས་མོད་ཀྱི་ཁོ་བོ་ཅག་གིས་གཞན་དུ་བརྗོད་ཟིན་པའི་ཕྱིར་དེར་བལྟ་བའི་དབང་དུ་བྱས་ནས་འདིར་རེ་ཞིག་དེ་ཙམ་དུ་ཉེ་བར་བསྡུས་སོ། ། ༈

[edit]

yang zhabs brtan gyi legs 'bul lta bu'i tshe gsol 'debs 'dun smon gyi brjod pa 'di ltar sbyar/ yang zhabs brtan gyi legs 'bul lta bu'i tshe gsol 'debs 'dun smon gyi brjod pa 'di ltar sbyar ste/__/oM swasti dzI ban+tu/__legs gsung sde snod bye ba'i gdugs dkar po/__/thugs bskyed dpung pas 'chel ba'i grib bsil cher/__/skal bzang dbugs 'byin mdzad pa'i cho ga mkhan/__/gsang gsum bskal pa rgya mtshor 'tsho gzhes gsol/__1__/shes bya'i chu gter gting mtha' bral ba'i klong /__/mkhyen gnyis gser nya g.yo ba'i zlos gar gyis/__/mtha' klas yid can phan bde'i dpal ster ba'i/__/gsang gsum bskal pa rgya mtshor 'tsho gzhes gsol/__2__/mtshan bzang bum pa bzang po'i dge mtshan ni/__/rmad byung bslabs gzhi'i gos kyis nyer bklubs cing /__/rnam grol thar pa'i bdud rtsis mngon gtams pa'i/__/gsang gsum bskal pa rgya mtshor 'tsho gzhes gsol/__3_gzhan phan nyin mo'i 'od ris kyis phye ba'i/__/smon 'jug byang chub sems kyi pad+ma dkar/__/yid can kun dga'i nyer 'tshor gyur pa gang /__/gsang gsum bskal pa rgya mtshor 'tsho gzhes gsol/__4__/gsang rgyud yid bzhin mtsho nas blangs pa yi/__/smin grol sgra dbyangs sgrogs pa'i g.yas 'khyil dung /__/sgrib gnyis rims nad rgyu ba gcod byed pa'i/__/gsang gsum bskal pa rgya mtshor 'tsho gzhes gsol/__5__/bzung 'dzin spros pa rtul ba'i ye shes ni/__/thugs kyi dpal ber sim pa'i de ma thag__/skye dang 'jigs pa'i pha mtha' las grol ba'i/__/gsang gsum bskal pa rgya mtshor 'tsho gzhes gsol/__6__/de ltar dus min nyi bu'i dpung tshogs kyi/__/phyogs las rnam par rgyal ba'i rgyal mtshan ni/__/srid rtser bsgrengs pa'i grags dkar zla 'od kyis/__/skal bzang snang ba nub pa med par mdzod/__7__/mkhyen gnyis gser gyi 'khor lo sngon 'gro bas/__/thub bstan gling bzhi'i ljongs kun dbang bsgyur te/__/sngon med rdzogs ldan gsar pa'i dge mtshan gyis/__/lhar bcas dga' ba'i dga' ston sbyin gyur cig__8__/ces phyogs bcu dus gsum gyi dpal ldan stobs bcu mnga' ba mtha' klas pa kun gyis bskal pa rgya mtshor bsod nams kyi phung po yongs su rdzogs pa las byung ba'i mtshan dpe'i cha shas bkra shis pa'i rtags kyi sgra las nye bar drangs pa'i swa sti'i dbyangs snyan mtsho byung ma'i phyag gi rgyud mangs la cung zad reg pas mdun bsus te/__deng gi char yang /__gang na ma lus shing lus pa med pa'i rnam par 'dren pa sras dang slob mar bcas pas kyang sor mo'i chu skyes dmar po'i zhabs mthil gyi 'khor lo la nyin re bzhin du btud pa'i rigs thams cad kyi bdag nyid/__dkyil 'khor thams cad kyi gtso bo/__skyabs gnas kun gyi thugs rje dang byin rlabs kyi phung po gcig tu bsdus pa'i rang gzugs rje btsun bla ma dam pa khyod ni/__gzod ma nas zad dang mi skye shes pa'i ye shes mngon sum du brnyes su zin kyang /__gzhan la phan par mdzad pa'i dam bca'i ri mo gzhar yang nub pa med pas ches cher snyigs mar gyur pa'i dus 'dir sum ldan rdo rje 'dzin pa chen po'i rnam rol du bzhengs te/__mtha' yas pa'i 'gro ba kun la lam bden gyi bdud rtsi mngon sum du bstan nas mngon mtho dang nges legs kyi go 'phang la sbyor pa'i bka' drin ni byang chub snying po'i bar du gzhal bar sla ba ma yin la/__da dung yang bdag sogs ltos bcas yongs kyi skyabs dang /__mgon dang /__dpung gnyen gcig pur 'byung 'gyur gyi rgyal ba yid srubs kyi phyogs las rnam par rgyal te mtha' klas sde snod kyi rgyal rnga srid rtser brdung ba'i bar du mi shigs rdo rje'i khri 'phangs mthon por 'chi med mgon po tshe mtha' yas pa'i rang gzugs su 'tsho zhing gzhes la chos kyang ston par snying thag pa nas gsol ba 'debs pa'i rten du/__rang gzhan gyi rgyud kyis bsdus pa'i bdog dgu spyi dang khyad par rnam par dkar ba'i legs byas thams cad phyogs gcig tu bsdus te 'phags pa kun tu bzang po'i smon lam las byung ba'i mchod sprin du byin gyis rlabs nas 'bul ba dang chabs cig__/de nyid mtshon pa'i dngos po'i maN+Dal zeg mar/__thog mar bkra shis pa'i rtags kyi rna chas sgeg pa'i lha rdzas kyi wa s+t+raM dkyus su ring ba sogs nas/__mtha' rten stan dkar rdo rje dang g.yung drung gi mtshan mas brgyan pa ste rnam grangs 'bul lam zhus pa brtse chen ye shes kyi gzigs pas bdag gir mdzad de/__re ba'i shing rta mngon 'dod kyi bdog pas phyur bur bgengs par mdzad du gsol/__/sarba ma nor thaM pa ri pUr+N+NaM kurban+tu/__zhes sam/__shrI dzi ba tiSh+Than+tu/__gdod nas yongs grub 'chi med rtag pa'i skur/__/gzung 'dzin 'pho ba'i bag chags kun bcoms pas/__kha sbyor rdo rje'i lang tshor 'bar bzhin du/__/rtag pa rgyun gyi 'khor lor 'tsho gzhes gsol/__/gzhan phyir rmad byung gtong ba'i rin chen ni/__/dam chos bdud rtsi'i cho gas dge byas pa/__/skal bzang 'gro ba'i dpyid du stsol bzhin du/__/nges par zhing khams 'di las g.yo med mdzod/__/dpag med 'gogs pa'i brlan gyis phye ba yi/__/rnam grol tshul khrims phung po'i ut+pa la/__/ngo mtshar dge mtshan phrag brgyas gtams bzhin du/__/'chi med grub pa'i lang tsho 'bar gyur cig__/mi 'khrugs bzod pa'i go cha brtan po'i ngor/__/yid srubs dpung gis btegs pa'i mtshon rnon kyang /__/snying rje'i me tog gzhon nur dpyangs pa las/__/zla med grags pa'i rgyal rnga snyan par shog__/bskal mang gzhan gyi don la brtson pa yi/__/tshogs zung bye bas bskrun pa'i mtshan dpe'i dpyid/__/che dgu'i ral pas btegs pa'i nor bu'i khrir/__/zhabs pad srid mtha'i bar du brtan gyur cig__/zab rgyas gdams pa'i bdud rtsi sim pa las/__/shin tu zhi ba dam pa'i nags klungs su/__/'jug dang ldangs ba bral ba'i bsam gtan gyis/__/skye 'jig mtshan ma'i spros pa rtul bar mdzod/__/rdul bral so sor rtog pa'i shes rab kyis/__/'gyur bcas chos su snang ba'i khams ji snyed/__/'chi med rtag pa'i bden par gzigs bzhin du/__/brtan par mdzod cig snying rje'i lus can kye/__/de ltar dus gsum gyi rgyal ba sras dang bcas pa thams cad gang gis gshegs pa'i lam mchog pha rol tu phyin pa drug gi sgra las drangs pa'i dge legs kyi dbyangs snyan cung zad brjod pas mdun bsus te/__deng gi char yang /__sogs snga ma bzhin la brjod byed rgyas bsdus ci rigs par skyar ro/__yang na/__oM swasti tiSh+Than+tu/__chos dbyings shin tu rtag pa dam pa las/__/rnam pa kun gyi mchog ldan rdo rje'i sku/__/sna tshogs mos pa'i rjes mthun sgyu 'phrul can/__/longs spyod yongs rdzogs 'khor lor 'tsho gzhes gsol/__/rdul bral 'od gsal stong pa'i dga' ma la/__/mi 'gyur bde ba'i sgyu thabs gyis sbrel bas/__/zung 'jug thig le gcig las mi 'da' bas/__kha sbyor mtshan dpe'i lang tshor 'tsho gzhes gsol/__/kun tu 'pho ba'i 'gro 'ong rgyur bcas pa/__/'pho med dbu ma'i srog tu 'bar ba las/__/char yang zag pa spangs pa'i nA da'i gsungs/__/bde chen ye shes chen por 'tsho gzhes gsol/__/gshis la skye ba'i sdang pa bral gyur na/__/de la 'jig pa'i pha mtha' ma dmigs phyir/__/gzhar yang spros pa kun las rangs pa'i thugs/__/rang bzhin med pa'i dbyings su 'tsho gzhes gsol/__/gzod nas mtshan ma'i rtog pa spangs gyur kyang /__/gzhan phyir dmigs pa'i dam bcas mi 'dor bas/__/snyigs ma'i 'gyur bas gzings pa'i skye dgu la/__/snying rjes yongs su gang khyod 'tsho gzhes gsol/__/rgyal ba'i thugs rje rtag pa dam pa ni/__/nam yang 'char dang nub pa las grol phyir/__/tshur mthong gdul bya'i ngor yang mi sbed par/__/phrin las rgyun mi 'chad par 'tsho gzhes gsol/__/gang la reg na phan bde'i 'byor pa mchog__/'bad med lag rtser sbyin la nor gyi bus/__/mtshon min gtan bde'i ngal bso ster mdzad pa'i/__/yon tan 'gogs pa med par 'tsho gzhes gsol/__/zhes rgyal ba rnams kyi gang zhig brnyes pa'i spangs rtogs kyi khyad par mthar thug pa sku gsum yan lag bdun ldan gyi sgra las drangs te sku gsungs thugs yon tan phrin las mi zad pa rgyan gyi 'khor lo'i rnam rol du 'tsho zhing gzhes par gsol ba 'debs pa'i tshigs su bcad pa me tog man+dA ra'i do shal lta bur g.yo bas lam yangs par byas te/__deng gi char yang sogs thog ma bzhin du sbyar ro/__/de ltar 'phros don gyi khyad par sna tshogs pa 'di rnams 'phrin yig 'bul tshul kho na la ma ltos kyang /__don gnyer can dag la nye bar mkho ba'i 'os su gyur pa'i rigs thams cad kyi dper brjod pa nyung bsdus shig rtogs sla ba phyogs gcig tu bkod pa ste/__gzhan yang khri 'don dang zhabs brtan gyi skabs sogs su sbyor bar 'os pa'i phun sum tshogs pa rnam lnga dang /__bkra shis rdzas rtags rgyal srid bdun sogs kyi rnam bshad nyung bsdus shig kyang spro bar 'os mod kyi kho bo cag gis gzhan du brjod zin pa'i phyir der blta ba'i dbang du byas nas 'dir re zhig de tsam du nye bar bsdus so/__/__!