JKW-KABUM-23-'A-003-009

🚧 This website is under continued development. We appreciate your patience!

Previous Text Back to Volume PageNext Text

རྫོགས་པ་ཆེན་པོའི་གཞི་ལམ་འབྲས་གསུམ་ལས་འཕྲོས་པའི་གཏམ་ཉུང་ངུ་།

Wylie title	rdzogs pa chen po'i gzhi lam 'bras gsum las 'phros pa'i gtam nyung ngu
Location	mkhyen brtse'i bka' 'bum Volume 23, sde tshan 3, Text 9, Pages 213-216 (Folios 11a5 to 12b6)
Author	འཇམ་དབྱངས་མཁྱེན་བརྩེའི་དབང་པོ་
Less details More details
Citation	'jam dbyangs mkhyen brtse'i dbang po. rdzogs pa chen po'i gzhi lam 'bras gsum las 'phros pa'i gtam nyung ngu. In 'jam dbyangs mkhyen brtse'i dbang po'i bka' 'bum, Vol. 23: 213-216. Khams sde dge rdzong sar dgon: Rdzong sar blo gros phun tshogs, 2020.
Genre	Dzogchen - rdzogs pa chen po  ·  Advice - zhal gdams
Colophon	།རང་བཞིན་རྫོགས་པ་ཆེན་པོ་གཞི་ལམ་འབྲས་གསུམ་གྱི་ཚུལ་ལས་འཕྲོས་པའི་གཏམ་ཉུང་ངུ་འདི་ཡང་དཔྱོད་ལྡན་པཏྱ་དྷརྨཱ་བྷ་དྲས་དགྱེས་པ་བསྐྱེད་པའི་ཕྱིར་དུ་ཐེག་རྩེ་ཤིན་ཏུ་རྣལ་འབྱོར་ལ་མོས་པ་བརྟན་པོས་ཆོས་འདིའི་རིགས་སུ་སད་པའི་སྐལ་བཟང་ཐོབ་ཀྱང་། སྙོམ་ལས་ཁོ་ནའི་བྲན་དུ་གྱུར་པ་སེར་གཟུགས་ཐ་ཤལ་ལས་ཀྱང་ཆེས་ཐ་ཤལ་བ་འཇིགས་མེད་མཁྱེན་བརྩེའི་ཟློས་གར་དུ་སྒྲོ་བཏགས་པས་སྣང་གསལ་ཞིག་གི་ངོགས་སུ་གང་ཤར་འདི་ཀ་ལྟར་བྲིས་ཏེ་ཕུལ་བ་སརྦ་སུ་ཛ་ག་ཏཱཾ།།
	rang bzhin rdzogs pa chen po gzhi lam 'bras gsum gyi tshul las 'phros pa'i gtam nyung ngu 'di yang dpyod ldan pat+ya d+harmA b+ha dras dgyes pa bskyed pa'i phyir du theg rtse shin tu rnal 'byor la mos pa brtan pos chos 'di'i rigs su sad pa'i skal bzang thob kyang /__snyom las kho na'i bran du gyur pa ser gzugs tha shal las kyang ches tha shal ba 'jigs med mkhyen brtse'i zlos gar du sgro btags pas snang gsal zhig gi ngogs su gang shar 'di ka ltar bris te phul ba sarba su dza ga tAM

Tibetan Text

Wylie

[edit]

རྫོགས་པ་ཆེན་པོ་གཞི་ལམ་འབྲས་གསུམ་ལས་འཕྲོས་པའི་གཏམ་ཉུང་ངུ་བཞུགས། །ན་མོ་གུ་ར་ཝེ། གང་གི་རང་བཞིན་གཟུང་འཛིན་སྤྲོས་པའི་ཚོགས། །མ་ལུས་ཤར་གྲོལ་དུས་མཉམ་དབྱིངས་སུ་ཐིམ། །ད་ལྟའི་ཤེས་པ་བསམ་བརྗོད་བྲལ་བའི་གཤིས། །འོད་གསལ་སེམས་ཀྱི་རྡོ་རྗེས་ཁྱོད་བྱིན་རློབས། །རྒྱལ་བས་གདུལ་བྱ་རྒྱ་མཚོའི་ཁམས་དབང་དང་། །བསམ་པའི་རྗེས་མཐུན་བགྲང་ཡས་ཐེག་པའི་རིམ། །བསྟན་ཀྱང་དབང་པོ་ཤིན་ཏུ་རྣོན་པོ་ལ། །ངེས་དོན་རྫོགས་པ་ཆེན་པོའི་ཆོས་ཆར་ཕབ། །དེ་ཕྱིར་ཐེག་བརྒྱད་བློ་ཡི་གྲུབ་མཐའི་ཕྱིར། །དེ་ལས་བསྟན་པའི་སྡོམ་པ་རྣམ་གསུམ་དང་། །ཕར་ཕྱིན་དྲུག་དང་ས་བཅུ་ལམ་ལྔ་སོགས། །ཀུན་ཀྱང་ཤིན་ཏུ་རྣལ་འབྱོར་རྐང་སྟེགས་ཡིན། །དེ་ལྟའི་ཐུན་མོང་མ་ཡིན་ཚུལ་འདིར་ཡང་། །གཞི་རྒྱུད་འཁོར་འདས་བསལ་བཞག་མ་གྲུབ་པའི། །ཀ་དག་ནང་གསལ་གཞོན་ནུ་བུམ་སྐུའི་གཤིས། །ཕྱིར་གསལ་ལྷུན་གྲུབ་སྒོ་བརྒྱད་སྤྲིན་དུ་ཤར། །དེ་ཉིད་རང་ངོ་རིག་པའི་སྐད་ཅིག་ཏུ། །གཞི་ལས་འཕགས་པའི་གཞི་སྣང་ཡེ་ཤེས་སུ། །ཁྱད་ཆོས་དྲུག་དང་ལྡན་པར་སངས་རྒྱས་པ། །ཐོག་མའི་མགོན་པོ་ཀུན་ཏུ་བཟང་པོའོ། །དེ་ལྟར་མ་རྟོགས་གཉིས་སུ་འཛིན་པའི་བློས། །མ་རིག་གསུམ་གྱིས་འཁོར་བའི་ཐོག་མ་བཀོད། །རྐྱེན་བཞིས་འཁོར་བའི་ལས་སྣང་འདུ་བྱས་པས། །མུ་མཐའ་མེད་པའི་སྲིད་ཁམས་རྒྱ་མཚོར་འཁྱམས། །ལམ་དུས་དཔལ་ལྡན་བླ་མའི་བཀའ་དྲིན་གྱིས། །རིག་སྟོང་རྗེན་པ་མངོན་སུམ་ངོ་འཕྲོད་ནས། །ཅོག་བཞག་བཞི་ཡི་ལྷུམས་སུ་ཞུགས་པ་ཡིས། །གྲོལ་བཞིའི་གདེང་ཐོབ་གཉིས་ཆོས་རིག་ངོར་ཡལ། ཁྱད་པར་སྟོང་ངོས་ཀ་དག་ཉམས་ལེན་ནི། །འཛིན་པའི་ཆོས་ཀུན་ཟད་པར་བྱེད་པ་སྟེ། །གཟོད་ནས་དག་པའི་མཚན་གྱིས་མོས་པས་ན། །འཁོར་ལོ་བར་ཉིད་ལྟ་བ་མཐར་ཐུག་ཡིན། །སྣང་ངོས་ལྷུན་གྲུབ་ཐོད་རྒལ་ལམ་གྱི་མཆོག །ཉམས་བླངས་གཟུང་བའི་ཡུལ་ཀུན་གྲོལ་བྱེད་དེ། །བདེ་གཤེགས་སྙིང་པོའི་རང་རྩལ་མངོན་མཐོང་ཕྱིར། །འཁོར་ལོ་ཐ་མའི་བཞེད་གཞུང་དྲི་བྲལ་ལགས། །དེས་ན་ཤིན་ཏུ་རྣལ་འབྱོར་གྲུབ་མཐའ་ནི། །ཀུན་དང་མཐུན་ལ་ཀུན་ལས་ཁྱད་འཕགས་ཤིང་། །ཀུན་གྱིས་ཕྱོགས་རེ་ཙམ་ལས་མ་མཐོང་ཕྱིར། །འདི་ཉིད་ཁོ་ནས་ངེས་དོན་མཆོག་ཏུ་གྲུབ། །འབྲས་དུས་ངོ་བོ་ཡེ་ནས་དག་པ་ལ། །གློ་བུར་དྲི་མའི་རང་བཞིན་རྟོགས་སྒོམ་གྱིས། །བསྐྱར་ནས་དག་སྟེ་ཆོས་སྐུ་དམ་པའི་གྲོང་། །ཟུང་འཇུག་རབ་ཏུ་མི་གནས་ཆེན་པོར་གྲོལ། །དེ་ལས་མ་འགག་རོལ་པའི་སྙིང་རྗེའི་སྤྲིན། ཁ་སྦྱོར་བདུན་ལྡན་ལོངས་སྤྱོད་རྫོགས་པ་དང་། །སྣ་ཚོགས་སྤྲུལ་པའི་རྣམ་གྲོལ་མཐའ་ཀླས་ཀྱིས། །མཁའ་ཁྱབ་འགྲོ་བའི་དོན་ལ་རྟག་པར་འཇུག །མདོར་ན་དེ་ལས་མང་དུ་སྨོས་ཅི་དགོས། །ལྟ་བ་བྱར་མེད་བསྒོམ་པ་བློ་དང་བྲལ། །འབྲས་བུ་མཉམ་རྗེས་ལས་འདས་ཆོས་ཉིད་ཀློང་། །འདུ་འབྲལ་མེད་པའི་ཚུལ་དུ་ངལ་བསོས་ཤིག །དེ་ལྟར་ཐེག་རྩེ་མན་ངག་སྡེ་པ་ཡི། །དགོངས་དོན་གཞི་ལམ་འབྲས་བུའི་ཆོས་ཀྱི་གཏམ། །བློ་དམན་དགའ་བ་བསྐྱེད་ཕྱིར་ཚིག་གི་ཕྲེང་། །ཅུང་ཟད་ཙམ་དུ་བསྡུས་ཏེ་རབ་སྤེལ་མདོ། །གཞན་དུ་བཅུ་བདུན་རྒྱུད་དང་དེའི་དགོངས་འགྲེལ། །ཤིང་རྟ་ཆེན་པོ་དྲི་མེད་འོད་ཟེར་དང་། །ཡེ་ཤེས་སྐུ་ཅན་འཇིགས་མེད་གླིང་པ་སོགས། །དམ་པའི་བཞེད་གཞུང་རྣམས་ལ་ཐོས་བསམ་མཛོད། །ཤིན་ཏུ་གླེང་བར་འོས་པའི་སྤྲིངས་ཡིག་འདིས། །ཡིད་ལ་གྲུབ་པའི་ལང་ཚོ་འཛིན་གྱུར་ཏེ། །བྱང་ཆུབ་མཆོག་གི་རྒྱལ་སར་རོ་གཅིག་པར། །མི་ཕྱེད་རྡོ་རྗེའི་རྣལ་འབྱོར་མཐར་ཕྱིན་ཤོག །རང་བཞིན་རྫོགས་པ་ཆེན་པོ་གཞི་ལམ་འབྲས་གསུམ་གྱི་ཚུལ་ལས་འཕྲོས་པའི་གཏམ་ཉུང་ངུ་འདི་ཡང་དཔྱོད་ལྡན་པཏྱ་དྷརྨཱ་བྷ་དྲས་དགྱེས་པ་བསྐྱེད་པའི་ཕྱིར་དུ་ཐེག་རྩེ་ཤིན་ཏུ་རྣལ་འབྱོར་ལ་མོས་པ་བརྟན་པོས་ཆོས་འདིའི་རིགས་སུ་སད་པའི་སྐལ་བཟང་ཐོབ་ཀྱང་། སྙོམ་ལས་ཁོ་ནའི་བྲན་དུ་གྱུར་པ་སེར་གཟུགས་ཐ་ཤལ་ལས་ཀྱང་ཆེས་ཐ་ཤལ་བ་འཇིགས་མེད་མཁྱེན་བརྩེའི་ཟློས་གར་དུ་སྒྲོ་བཏགས་པས་སྣང་གསལ་ཞིག་གི་ངོགས་སུ་གང་ཤར་འདི་ཀ་ལྟར་བྲིས་ཏེ་ཕུལ་བ་སརྦ་སུ་ཛ་ག་ཏཱཾ།། །། ༈

[edit]

rdzogs pa chen po'i gzhi lam 'bras gsum las 'phros pa'i gtam nyung ngu /__ rdzogs pa chen po gzhi lam 'bras gsum las 'phros pa'i gtam nyung ngu bzhugs/__/na mo gu ra we/__gang gi rang bzhin gzung 'dzin spros pa'i tshogs/__/ma lus shar grol dus mnyam dbyings su thim/__/da lta'i shes pa bsam brjod bral ba'i gshis/__/'od gsal sems kyi rdo rjes khyod byin rlobs/__/rgyal bas gdul bya rgya mtsho'i khams dbang dang /__/bsam pa'i rjes mthun bgrang yas theg pa'i rim/__/bstan kyang dbang po shin tu rnon po la/__/nges don rdzogs pa chen po'i chos char phab/__/de phyir theg brgyad blo yi grub mtha'i phyir/__/de las bstan pa'i sdom pa rnam gsum dang /__/phar phyin drug dang sa bcu lam lnga sogs/__/kun kyang shin tu rnal 'byor rkang stegs yin/__/de lta'i thun mong ma yin tshul 'dir yang /__/gzhi rgyud 'khor 'das bsal bzhag ma grub pa'i/__/ka dag nang gsal gzhon nu bum sku'i gshis/__/phyir gsal lhun grub sgo brgyad sprin du shar/__/de nyid rang ngo rig pa'i skad cig tu/__/gzhi las 'phags pa'i gzhi snang ye shes su/__/khyad chos drug dang ldan par sangs rgyas pa/__/thog ma'i mgon po kun tu bzang po'o/__/de ltar ma rtogs gnyis su 'dzin pa'i blos/__/ma rig gsum gyis 'khor ba'i thog ma bkod/__/rkyen bzhis 'khor ba'i las snang 'du byas pas/__/mu mtha' med pa'i srid khams rgya mtshor 'khyams/__/lam dus dpal ldan bla ma'i bka' drin gyis/__/rig stong rjen pa mngon sum ngo 'phrod nas/__/cog bzhag bzhi yi lhums su zhugs pa yis/__/grol bzhi'i gdeng thob gnyis chos rig ngor yal/__khyad par stong ngos ka dag nyams len ni/__/'dzin pa'i chos kun zad par byed pa ste/__/gzod nas dag pa'i mtshan gyis mos pas na/__/'khor lo bar nyid lta ba mthar thug yin/__/snang ngos lhun grub thod rgal lam gyi mchog__/nyams blangs gzung ba'i yul kun grol byed de/__/bde gshegs snying po'i rang rtsal mngon mthong phyir/__/'khor lo tha ma'i bzhed gzhung dri bral lags/__/des na shin tu rnal 'byor grub mtha' ni/__/kun dang mthun la kun las khyad 'phags shing /__/kun gyis phyogs re tsam las ma mthong phyir/__/'di nyid kho nas nges don mchog tu grub/__/'bras dus ngo bo ye nas dag pa la/__/glo bur dri ma'i rang bzhin rtogs sgom gyis/__/bskyar nas dag ste chos sku dam pa'i grong /__/zung 'jug rab tu mi gnas chen por grol/__/de las ma 'gag rol pa'i snying rje'i sprin/__kha sbyor bdun ldan longs spyod rdzogs pa dang /__/sna tshogs sprul pa'i rnam grol mtha' klas kyis/__/mkha' khyab 'gro ba'i don la rtag par 'jug__/mdor na de las mang du smos ci dgos/__/lta ba byar med bsgom pa blo dang bral/__/'bras bu mnyam rjes las 'das chos nyid klong /__/'du 'bral med pa'i tshul du ngal bsos shig__/de ltar theg rtse man ngag sde pa yi/__/dgongs don gzhi lam 'bras bu'i chos kyi gtam/__/blo dman dga' ba bskyed phyir tshig gi phreng /__/cung zad tsam du bsdus te rab spel mdo/__/gzhan du bcu bdun rgyud dang de'i dgongs 'grel/__/shing rta chen po dri med 'od zer dang /__/ye shes sku can 'jigs med gling pa sogs/__/dam pa'i bzhed gzhung rnams la thos bsam mdzod/__/shin tu gleng bar 'os pa'i springs yig 'dis/__/yid la grub pa'i lang tsho 'dzin gyur te/__/byang chub mchog gi rgyal sar ro gcig par/__/mi phyed rdo rje'i rnal 'byor mthar phyin shog__/rang bzhin rdzogs pa chen po gzhi lam 'bras gsum gyi tshul las 'phros pa'i gtam nyung ngu 'di yang dpyod ldan pat+ya d+harmA b+ha dras dgyes pa bskyed pa'i phyir du theg rtse shin tu rnal 'byor la mos pa brtan pos chos 'di'i rigs su sad pa'i skal bzang thob kyang /__snyom las kho na'i bran du gyur pa ser gzugs tha shal las kyang ches tha shal ba 'jigs med mkhyen brtse'i zlos gar du sgro btags pas snang gsal zhig gi ngogs su gang shar 'di ka ltar bris te phul ba sarba su dza ga tAM//___//___!_