JKW-KABUM-20-WA-001-075

🚧 This website is under continued development. We appreciate your patience!

Previous Text Back to Volume PageNext Text

ཕུན་ཚོགས་མཚན་གྱི་ཨུཏྤལ་ཆུན་པོ་ནི། ཞེས་སྡེ་དགེར་ཕུལ་བ།

Wylie title	phun tshogs mtshan gyi ut+pal chun po ni/ zhes sde dger phul ba
Location	mkhyen brtse'i bka' 'bum Volume 20, sde tshan 1, Text 75, Pages 143-145 (Folios 72a1 to 73a1)
Author	འཇམ་དབྱངས་མཁྱེན་བརྩེའི་དབང་པོ་
Less details More details
Citation	'jam dbyangs mkhyen brtse'i dbang po. phun tshogs mtshan gyi ut+pal chun po ni zhes sde dger phul ba. In 'jam dbyangs mkhyen brtse'i dbang po'i bka' 'bum, Vol. 20: 143-145. Khams sde dge rdzong sar dgon: Rdzong sar blo gros phun tshogs, 2020.
Genre	Invocation of Auspiciousness - bkra shis brjod pa  ·  Prayers - smon lam
Colophon	།ཞེས་ས་འབྲུག་དབོ་ཟླ་༢པའི་གྲལ་ཚེས་༢༡དགེ་བར་གུས་པས་ཕུལ་བ་སརྦ་དཱ་སུ་ཤྲེ་ཡོ་བྷ་བ་ཏུ།།
	zhes sa 'brug dbo zla 2 pa'i gral tshes 21dge bar gus pas phul ba sarba dA su shre yo b+ha ba tu

1 Texts in this Section (sde tshan or chos tshan)

75 143-145	ཕུན་ཚོགས་མཚན་གྱི་ཨུཏྤལ་ཆུན་པོ་ནི། ཞེས་སྡེ་དགེར་ཕུལ་བ། phun tshogs mtshan gyi ut+pal chun po ni/ zhes sde dger phul ba Invocation of Auspiciousness - bkra shis brjod pa   ·   Prayers - smon lam	Text page View PDF
	[[|འཇམ་དབྱངས་མཁྱེན་བརྩེའི་དབང་པོ་ ()]]

Tibetan Text

Wylie

[edit]

ཨོཾ་སྭསྟི་སིདྡྷཾ། ཕུན་ཚོགས་མཚན་གྱི་ཨུཏྤལ་ཆུན་པོ་ནི། །གང་གི་རྣ་ལུང་དཔྱངས་པའི་དེ་མ་ཐག །བརྒྱད་གཉིས་འཇིགས་པའི་གདུང་བ་ཀུན་བཅིལ་བའི། །ཡིད་བཞིན་འཁོར་ལོས་ཁྱེད་ལ་དགེ་ལེགས་མཛོད། །སྡེ་བཞིའི་དཔྱིད་ཀྱི་དཔལ་མོ་དར་བ་ན། །དགེ་བཅུའི་ཡལ་འདབ་རྫོགས་པའི་དཔག་བསམ་ལྗོན། །ཆོས་ཀྱི་རྒྱལ་པོའི་གྲགས་དཀར་རབ་འབར་བ། །ཕྱོགས་ལས་རྣམ་རྒྱལ་ཆེན་པོའི་ཞབས་སྟེགས་དྲུང་། །རིང་ནས་གུས་པའི་ཡིད་ཀྱིས་མདུན་བདར་ཏེ། །སྙན་ཚིག་དབྱངས་ཅན་ངག་གིས་བསྐུལ་བ་ལས། །ཞུ་གསོལ་མགྲིན་པའི་རྒྱུད་མང་ཅུང་ཟད་ཅིག །རབ་དྭངས་སོར་མོས་བརྡུང་ལ་མངོན་པར་ཕྱོགས། །གང་ཚེ་བསོད་ནམས་དམ་པའི་ས་བོན་ནི། །རིགས་ཀྱི་ལྡུམ་རར་སྨིན་པའི་དེ་མ་ཐག །རྒྱལ་སྲས་གཞོན་ནུའི་མཚན་གྱི་པདྨ་དཀར། །སྐྱེ་རྒུའི་གཙུག་ན་མཛེས་པའི་སྐལ་བཟང་དར། །དབང་ཕྱུག་དམ་པ་རྒྱ་མཚོའི་རོལ་སྒེག་དང་། །སྐྱེ་བས་ཐོབ་པའི་མཁྱེན་རབ་དྲི་མེད་དང་། །སྦྱོར་བྱུང་བརྩོན་འགྲུས་ཟབ་མོའི་རིགས་སད་པས། །མཁས་རྣམས་དགྱེས་པའི་རྣམ་ཐར་ལྷུན་གྱིས་གྲུབ། །འཇིག་རྟེན་མེས་པོར་རློམས་པའི་བློ་གྲོས་ཀྱང་། །གང་བློའི་གྲྭ་ཟུར་གཅིག་ན་བདེར་བཟུང་སྟེ། །ལུགས་གཉིས་ཀུན་ལ་འཇུག་པའི་སྒྱུ་རྩལ་བརྒྱས། །སྲིད་ཞིའི་ཕུན་ཚོགས་མཐའ་དག་ངང་གིས་འདུ། །དཀོན་མཆོག་གསུམ་ལ་བླ་མར་མཛད་པ་ནི། །ས་ཆེན་ཆོས་བཞིན་སྐྱོང་བའི་ཁྱད་པར་ཕྱིན། །འདིར་ཡང་རྣམ་ཀུན་མཉེས་ཤིང་གཤིམ་པ་ཡི། །ཐུགས་རྗེས་ལྷག་པར་དགོངས་དང་ཆབ་གཅིག་ཏུ། །བཀའ་གླེགས་མཚོ་བྱུང་དགྱེས་པའི་ཏམྦུ་ར། །རྣ་བའི་བདུད་རྩིར་སོན་པའི་དེ་མ་ཐག །དཔྱིད་ཀྱིས་བཟུང་བའི་པུཎྜ་རཱི་ཀ་བཞིན། །གུས་སྤྲོའི་ལང་ཚོ་ཕ་མཐའ་མེད་པར་བརྟས། །གང་གི་བཀའ་དྲིན་ལ་བརྟེན་པའི། །དགེ་སྦྱོང་ལྟར་སྣང་རྒན་པོ་ཡང་། །འདུ་ཤེས་གསུམ་གྱི་གཞན་དབང་ལ། །འཆེལ་བཞིན་བག་ཕེབས་ཚུལ་དུ་མཆིས། །མཚམས་ཞུས། སླད་མའི་ཆར་ཡང་མཐོ་རིས་ལྷ་དབང་དང་། །ས་ཡི་སྟེང་ན་འཁོར་ལོས་སྒྱུར་རྒྱལ་བཞིན། །སྐྱེ་རྒུ་ཀུན་གྱི་ཕན་བདེའི་ཉེར་འཚོ་ཆེར། །བསྐལ་བརྒྱར་ཞབས་བརྟན་ལེགས་མཛད་རྒྱས་གྱུར་ཅིག །རྣམ་པ་ཀུན་ཏུ་བདག་ཅག་ཀྱང་། །དགྱེས་པའི་ཕྱག་གིས་ཡོངས་བཟུང་ཞིང་། །མཉན་འོས་བཀའ་མཆིད་གངྒཱའི་རྒྱུན། །འཆད་མེད་རྟག་ཏུ་སྤྲིང་བར་གསོལ། །རབ་དྭང་ཡིད་ཀྱི་ནགས་ཀླུང་ལས། །བྱུང་བའི་ཞུ་གསོལ་ཀོ་ཀི་ལ། །བཀྲ་ཤིས་དགེ་བའི་གླུ་ལེན་བཞིན། །མཆོག་གི་མདུན་སར་མངོན་པར་ཆས། །ཞེས་ས་འབྲུག་དབོ་ཟླ་༢པའི་གྲལ་ཚེས་༢༡དགེ་བར་གུས་པས་ཕུལ་བ་སརྦ་དཱ་སུ་ཤྲེ་ཡོ་བྷ་བ་ཏུ།། །། ༈

[edit]

phun tshogs mtshan gyi ut+pal chun po ni/__zhes sde dger phul ba/ oM swasti sid+d+haM/_phun tshogs mtshan gyi ut+pal chun po ni/_/gang gi rna lung dpyangs pa'i de ma thag_/brgyad gnyis 'jigs pa'i gdung ba kun bcil ba'i/_/yid bzhin 'khor los khyed la dge legs mdzod/_/sde bzhi'i dpyid kyi dpal mo dar ba na/_/dge bcu'i yal 'dab rdzogs pa'i dpag bsam ljon/_/chos kyi rgyal po'i grags dkar rab 'bar ba/_/phyogs las rnam rgyal chen po'i zhabs stegs drung /_/ring nas gus pa'i yid kyis mdun bdar te/_/snyan tshig dbyangs can ngag gis bskul ba las/_/zhu gsol mgrin pa'i rgyud mang cung zad cig_/rab dwangs sor mos brdung la mngon par phyogs/_/gang tshe bsod nams dam pa'i sa bon ni/_/rigs kyi ldum rar smin pa'i de ma thag_/rgyal sras gzhon nu'i mtshan gyi pad+ma dkar/_/skye rgu'i gtsug na mdzes pa'i skal bzang dar/_/dbang phyug dam pa rgya mtsho'i rol sgeg dang /_/skye bas thob pa'i mkhyen rab dri med dang /_/sbyor byung brtson 'grus zab mo'i rigs sad pas/_/mkhas rnams dgyes pa'i rnam thar lhun gyis grub/_/'jig rten mes por rloms pa'i blo gros kyang /_/gang blo'i grwa zur gcig na bder bzung ste/_/lugs gnyis kun la 'jug pa'i sgyu rtsal brgyas/_/srid zhi'i phun tshogs mtha' dag ngang gis 'du/_/dkon mchog gsum la bla mar mdzad pa ni/_/sa chen chos bzhin skyong ba'i khyad par phyin/_/'dir yang rnam kun mnyes shing gshim pa yi/_/thugs rjes lhag par dgongs dang chab gcig tu/_/bka' glegs mtsho byung dgyes pa'i tam+bu ra/_/rna ba'i bdud rtsir son pa'i de ma thag_/dpyid kyis bzung ba'i puN+Da rI ka bzhin/_/gus spro'i lang tsho pha mtha' med par brtas/_/gang gi bka' drin la brten pa'i/_/dge sbyong ltar snang rgan po yang /_/'du shes gsum gyi gzhan dbang la/_/'chel bzhin bag phebs tshul du mchis/_/mtshams zhus/_slad ma'i char yang mtho ris lha dbang dang /_/sa yi steng na 'khor los sgyur rgyal bzhin/_/skye rgu kun gyi phan bde'i nyer 'tsho cher/_/bskal brgyar zhabs brtan legs mdzad rgyas gyur cig_/rnam pa kun tu bdag cag kyang /_/dgyes pa'i phyag gis yongs bzung zhing /_/mnyan 'os bka' mchid gang+gA'i rgyun/_/'chad med rtag tu spring bar gsol/_/rab dwang yid kyi nags klung las/_/byung ba'i zhu gsol ko ki la/_/bkra shis dge ba'i glu len bzhin/_/mchog gi mdun sar mngon par chas/_/zhes sa 'brug dbo zla 2pa'i gral tshes 21dge bar gus pas phul ba sarba dA su shre yo b+ha ba tu//__//__!_