JKW-KABUM-19-DZA-001-052

🚧 This website is under continued development. We appreciate your patience!

Previous Text Back to Volume PageNext Text

མཚུངས་མེད་བསྟན་འཛིན་ལྷུན་གྲུབ་ནི།

Wylie title	mtshungs med bstan 'dzin lhun grub ni
Location	mkhyen brtse'i bka' 'bum Volume 19, sde tshan 1, Text 52, Pages 403-409 (Folios 202a3 to 205a6)
Author	འཇམ་དབྱངས་མཁྱེན་བརྩེའི་དབང་པོ་
Less details More details
Citation	'jam dbyangs mkhyen brtse'i dbang po. mtshungs med bstan 'dzin lhun grub ni. In 'jam dbyangs mkhyen brtse'i dbang po'i bka' 'bum, Vol. 19: 403-409. Khams sde dge rdzong sar dgon: Rdzong sar blo gros phun tshogs, 2020.
Genre	History Texts - lo rgyus  ·  Religious History Texts - chos 'byung

1 Texts in this Section (sde tshan or chos tshan)

52 403-409	མཚུངས་མེད་བསྟན་འཛིན་ལྷུན་གྲུབ་ནི། mtshungs med bstan 'dzin lhun grub ni History Texts - lo rgyus   ·   Religious History Texts - chos 'byung	Text page View PDF
	[[|འཇམ་དབྱངས་མཁྱེན་བརྩེའི་དབང་པོ་ ()]]

Tibetan Text

Wylie

[edit]

མཚུངས་མེད་བསྟན་འཛིན་ལྷུན་གྲུབ་ནི། ཡབ་མཁན་ཆེན་དཔལ་ལྡན་ཆོས་སྐྱོང་པའི་མེས་པོ་ཛམ་ལྷ་དང་། ཡུམ་ཇ་དཔོན་ཟུར་ཁང་པའི་བུ་མོ་གནས་མོ་ཚེ་བརྟན་ཞེས་པའི་སྲས་སུ་འཁྲུངས། དམ་པའི་རིགས་གསལ་བར་སད་པས་སྐུ་གཞོན་ནུ་ནས་དཔལ་ཨེ་ཝྃ་ཆོས་ལྡན་གྱི་ཆོས་གྲྭར་དམ་པའི་ཆོས་ཀྱི་སྒོར་ཞུགས་ཏེ། ངེས་པ་དོན་གྱི་རྡོ་རྗེ་འཆང་ཆེན་པོ་མཁན་ཆེན་ལྷུན་གྲུབ་དཔལ་ལྡན་ལས་སྡོམ་པ་གསུམ་གྱི་བཀའ་དྲིན་ནོས། གཞན་ཡང་ཤར་ཆེན་ཡེ་ཤེས་བཟང་པོ། དཔལ་ས་སྐྱ་པ་ཀུན་དགའ་བཀྲ་ཤིས་ཡབ་སྲས། རྩེ་གདོང་ཞབས་དྲུང་རིན་པོ་ཆེ། འཇམ་མགོན་སངས་རྒྱས་ཕུན་ཚོགས། ཤར་ཆེན་སངས་རྒྱས་བསྟན་འཛིན། ཤར་མི་ཉག་གི་སྟོན་པ་ཆེན་པོ་བྱམས་པ་ཚུལ་ཁྲིམས་དཔལ་བཟང། འཇམ་དབྱངས་ཤེས་བྱ་བཟང་པོ། བྲང་ཏི་ཤེས་རབ་རྒྱ་མཚོ། སྡོམ་བརྩོན་ཕྲིན་ལས་རྒྱ་མཚོ། མུས་ཆེན་ཀུན་དགའ་རྒྱ་མཚོ། ཤར་ཆེན་བློ་གྲོས་གྲགས་པ། མཚུངས་མེད་བསོད་ནམས་དཔལ་ལྡན། བྱམས་པ་བསོད་ནམས་བཟང་པོ་སོགས་ཡོངས་འཛིན་དུ་མས་རིམ་བཞིན་བཀའ་དྲིན་གྱིས་རྗེས་སུ་བཟུང་བ་ལ་བརྟེན་ནས་ཐོས་བསམ་སྒོམ་གསུམ་མཐར་ཕྱིན་ཏེ། རྒྱུད་སྡེ་རྒྱ་མཚོའི་ཚོགས་རྣམས་ཀྱི་ཕ་རོལ་ཏུ་སོན་ནས། ཐོག་མར་ཤར་ཆེན་ཁུ་དབོན་དང་། འཇམ་མགོན་སངས་རྒྱས་ཕུན་ཚོགས་རྣམས་ཀྱི་གོ་རེ་ལེན་ཡུན་དུ་མཛད་ནས་དམ་པ་དེ་དག་གི་སྤྱན་རས་ཀྱི་འབྲས་བུ་ལྟར་འཚོ་བ་ཞིག་ཏུ་གྱུར་ཅིང་། དགུང་ལོ་སུམ་ཅུའི་སྐབས་སུ་ཤར་ཆེན་བློ་གྲོས་གྲགས་པའི་བཀའི་བདུད་རྩི་སྤྱི་བོར་ཕེབས་པ་ལ་བརྟེན་ནས། མདོ་ཁམས་སྟོད་ཀྱི་ཕུན་སུམ་ཚོགས་པའི་སའི་ཆ་སྒ་ལྡན་སྐྱུར་གསུམ་དུ་གྲགས་པའི་ནང་ནས་སྐྱུ་རའི་ཡུལ་དུ་གཏོགས་པ་དཔལ་ཐག་ལུང་དགོན་དུ་འབུལ་སྡུད་སར་ཕེབས་ཏེ། དྭའུ་བླ་དགོན་གྱིས་གཙོས་དད་ལྡན་རྣམས་ཀྱི་སྐྱབས་མགོན་དམ་པར་ལོ་བརྒྱད་ཙམ་བཞུགས། ཨེ་ཝྃ་དུ་འབུལ་སྐྱེལ་ལན་ལྔ་མཛད། སྒར་གཞིས་ཕུན་སུམ་ཚོགས་པ་གསར་དུ་བཙུགས་ཏེ། མཁན་ཆེན་བཀྲ་ཤིས་ལྷུན་གྲུབ་དེ་ཉིད་དེ་སྐབས་གནམ་ཕུ་རྣམ་རྒྱལ་གླིང་དུ་དབོན་པོ་བསྟན་འཛིན་གྱི་ཟླ་མཚན་དུ་ཕེབས་ཡོད་འདུག་པར། དབོན་པོ་བསྟན་འཛིན་གྱིས་བསམ་པ་བཟང་པོ་ཞིག་གིས་མཐུན་འགྱུར་ཡང་དག་པ་ཞིག་མ་མཛད་པར། རེ་ཞིག་ཅུང་ཟད་ཐུགས་སུན་པ་ལྟ་བུར་གྱུར་སྐབས། རྗེ་འདི་ཉིད་ཀྱི་ཐུགས་དགོངས་ལ་དམ་པ་དེ་ཉིད་གཞན་དང་མི་འདྲ་བའི་སྐྱེས་ཆེན་ཞིག་འོང་བར་གཟིགས་ཏེ། སྐུ་མཆེད་སེར་སྐྱ་གཉིས་ཆར་ཐག་ལུང་སྨོན་སྐྱིད་སྒར་དུ་བྱོན་ན་ལེགས་ཚུལ་ཞུས་ནས་ལོ་གསུམ་མཉམ་དུ་བཞུགས་ཏེ་ཟབ་ཆོས་ཀྱི་རིམ་པ་རྣམས་ཕུལ་ནས་སྒར་གྱི་གདན་ཚབ་མཛད་པས་སྐུ་བསོད་ཆེ་ཞིང་མཁས་གྲུབ་དམ་པར་གྱུར་ནས་བསྟན་པའི་རྒྱལ་མཚན་དམ་པར་གྱུར། དེ་ནས་རྗེ་རང་ཉིད་ཀྱི་དབུས་སུ་ཕེབས་ནས་ཤར་ཆེན་ཆོས་ཀྱི་རྒྱལ་པོ་དང་བྱམས་པ་ཚུལ་ཁྲིམས་དཔལ་བཟང་ལ་སོགས་པས་ཆོས་ཀྱི་བདག་པོར་མངའ་གསོལ་ཏེ། ཨེ་ཝྃ་པའི་ཟུར་འཆད་པར་མཛད་དེ། ཐོག་མར་ཀླུ་སྡིངས་ཀྱི་མི་འཁྲུགས་ཁང་དུ་མཁའ་འགྲོ་མ་རྡོ་རྗེ་གུར་གྱི་དཀྱིལ་འཁོར་གྱི་དབང་ཚོགས་ཆེན་ལ་ཕུལ་བ་སོགས་མཛད། རིམ་གྱིས་ཨེ་ཝྃ་གཟིམས་ཁང་འོག་ཏུ་ལོ་གྲངས་ཁ་ཤས་བཞུགས། དཀྱིལ་འཁོར་རྒྱ་མཚོའི་བདག་ཉིད་ཆེན་པོར་གྱུར་ནས་སླར་ཡང་ཨེ་ཝྃ་ཕན་བདེ་ཁང་གསར་དུ་བཞུགས་གནས་མཛད་དེ། བསྟན་པ་རིན་པོ་ཆེ་འཛིན་སྐྱོང་སྤེལ་གསུམ་དང་། ཞར་བྱུང་དུ་སྒྲུབ་པའི་རྒྱལ་མཚན་བཙུགས་ནས་དག་པ་མཁའ་སྤྱོད་ཀྱི་ཞིང་དུ་ཕེབས་པ་གདོན་མི་ཟ་བ་ཡིན་ནོ། །ཆོས་ཀྱི་སྲས་སུ་གྱུར་པ་ཡང་། རྡོ་རྗེ་འཆང་བྱམས་པ་བསོད་ནམས་དཔལ་ལྡན། བྱམས་པ་བསོད་ནམས་བཟང་པོ། འཇམ་མགོན་བཀྲ་ཤིས་ལྷུན་གྲུབ། བྲང་ཏི་ནམ་མཁའ་བསམ་འགྲུབ། ཤར་པ་དཔལ་ལྡན་བཟང་པོ། མཁན་ཆེན་སངས་རྒྱས་དཔལ་བཟང་། རྡོ་རྗེ་སློབ་དཔོན་བློ་གྲོས་ཕུན་ཚོགས། སངས་རྒྱས་ཚུལ་ཁྲིམས། རྗེ་དྲུང་དཔལ་ལྡན་ལྷུན་གྲུབ། སྤང་ཤར་བླ་མ་ཁུ་དབོན། མཚུངས་མེད་ཀུན་དགའ་རྣམ་རྒྱལ། དཀོན་མཆོག་རྒྱལ་མཚན་རྣམས་ཀྱིས་གཙོས་སྟོད་མངའ་རིས་སྐོར་གསུམ། དབུས་གཙང་ཁམས་གསུམ། ལྷོ་མོན་སོགས་ཀྱི་བསྟན་འཛིན་གྱི་བླ་མ། དཔོན་པོ། སྤྲུལ་སྐུ། རྡོ་རྗེ་སློབ་དཔོན་རྣམས་དང་། ཁྱད་པར་སྐུའི་དབོན་མཁན་ཆེན་དཔལ་ལྡན་ཆོས་སྐྱོང་གིས་གཙོས་སྐལ་ལྡན་གྱི་བུ་སློབ་སྟོང་ཕྲག་བཅུར་ལོངས་པ་སོགས་མཆིས་ཤིང་། ཐུགས་དམ་གྱི་རིམ་པ་ལའང་སྔ་ཐུན་གྱི་རིགས་ལ་སྒྲོལ་དཀར་ཡིད་བཞིན་འཁོར་ལོའི་འོད་ཟེར་དྲུག་སྦྲགས། བིཪྺ་པའི་སྲུང་བ་ཕྱི་ནང་སྦྲགས་མ། ལམ་ཟབ་ཕྱི་ནང་སྦྲགས་མ། ནཱ་རོ་མཁའ་སྤྱོད་ལ་ཨོཾ་གསུམ་མ་སུམ་བརྒྱ་བས་མི་ཉུང་བ། ཀྱེ་རྡོར་མངོན་རྟོགས་ལམ་དུས་སྦྲགས་མ་རླུང་སྦྱོར་དང་བཅས་པ། འཇམ་དཔལ་དཀར་པོ། འཕགས་པ་སྤྱན་རས་གཟིགས་མདོ་ཁམས་ཤར་ཕྱོགས་མ་དང་མ་ཎི་སྟོང་ཚར་རེ་ལས་མི་ཉུང་བ། རྡོ་རྗེ་བྲག་རྫོང་མ་ལ་ཡི་གེ་བདུན་མ་སྟོང་ཕྲག་རེ། གཏོར་མའི་རིམ་པ་ལ། དཀར་གཏོར་ཆ་བཞི། ཛམྦྷ་ལ་དཀར་པོ། སེར་པོ། ནག་པོ། དབྱུ་གུ་སྤུན་གསུམ། བརྒྱ་རྩའི་རིམ་པ། བྲུལ་གཏོར་ཆུ་སྦྱིན་བཅས་དང་། མཇུག་ཏུ་ཟ་བྱེད་མཁའ་འགྲོའི་སྦྱིན་སྲེག་བརྒྱ་ཚར་གསུམ། བར་སྐབས་ཀྱི་རིམ་པར་གྲགས་རྒྱལ་གྱི་བསྟོད་པ་ཆོས་རྣམས་མ་དང་། ཀུན་དགའ་བཟང་པོའི་བསྟོད་པ་མདོ་རྒྱུད་མ། བྱང་སེམས་ཟླ་བ་རྒྱལ་མཚན་གྱི་བསྟོད་པ་བཅས་ཤློ་ཀ་གསུམ་ལ་བརྒྱ་ཚར་རེ། ལྟུང་བཤགས་ནས་བཟུང་ཆོས་སྤྱོད་ཕྱི་ནང་ཚར་རེ། འཇམ་དཔལ་མཚན་བརྗོད་ཚར་གསུམ། སྨོན་ལམ་རྣམ་གསུམ་ཚར་གསུམ། རྣམ་རྒྱལ་གཟུངས་ཚར་བཅུ་གསུམ་རེ། རྣམ་འཇོམས་གཟུངས་ཚར་ལྔ་རེ། མཇུག་ཏུ་འགྲོ་ལ་བདེ་སྐྱིད་མ་བཅས་བཀྲ་ཤིས་ཀྱི་བར་དང་། གཟིམ་ཁང་ནང་དུ་ཞབས་བསྐོར་བརྒྱ་ཚར་རེ། དགོང་མོའི་སྐབས་སུ་ལམ་ཟབ་ཕྱི་ནང་། བིར་སྲུང་ཕྱི་ནང་། མཁའ་སྤྱོད་མ། ཀྱེ་རྡོར་ཕྱི་ནང་། སྔ་དགོང་གང་བདེ་ལ་རྡོ་རྗེ་འཇིགས་བྱེད་བསྐྱེད་རྫོགས་ཀྱི་ཉམས་ལེན་དང། རྩ་སྔགས་ཕྲེང་སྐོར་རེ། སྙིང་པོ་སྟོང་ཕྲག་རེ། ཉེ་སྙིང་ཕྲེང་སྐོར་རེ་མ་ཆག་པ། འབྱུང་འདུལ་སེང་གདོང་མ་སྔོན་མོ། གུ་རུ་དྲག་དམར་རྩ་སྔགས་སྟོང་ཚར་རེ། མགོན་པོ་བྲག་རྫོང་མ་ཕྱི་ནང་སྦྲགས་མ་དང་། ཡི་གེ་བདུན་མ་སྟོང་ཚར་རེ། ཤཱ་ས་ན་བརྒྱ་ཚར་རེ་མ་ཆགས་པ། གཏོར་བསྔོའི་རིམ་པར། ཀྱེ་རྡོར། འཇིགས་བྱེད། རྣལ་འབྱོར་མ། འབྱུང་འདུལ། གུར་ལྕམ་དྲལ། ཞལ་བཞི་པ། ཟངས་གྲི་ཅན། བྲན་བདུན། ལས་མགོན་མིང་སྲིང་། དུད་སོལ་ལྷ་མོ། དུར་ཁྲོད་བདག་པོ། མགོན་དཀར། སྟག་ཞོན། ཏྲཀྴད། ཕྱོགས་སྐྱོང་བཅུ། ལས་གཤིན། དམག་ཟོར་མ། མཁའ་འགྲོ་སྤྱི་གཏོར་བཅས་རྣམས་མ་ཆག་པ་ཉམས་སུ་ལེན་པ་དང་། དུས་རྒྱུན་ཐུགས་སྒམ་ཞིང་། བླ་མ་གོང་མའི་ཕྱག་ལེན་གྱི་རིམ་པ་གང་དགོས་པ་ཐམས་ཅད་ལ་ནོར་འཁྲུལ་མེད་པ་ཞིག་དང་། ཆོས་འཆད་པའི་བྱ་བ་གང་མཛད་པ་ཐམས་ཅད་སྦྱོར་དངོས་རྗེས་གསུམ་ཆ་ཚང་ཞིང་བརྗོད་པ་ཕུན་སུམ་ཚོགས་པས་སྐྱེས་བུ་དམ་པ་ཆོས་སྨྲ་བའི་ཁྱུ་མཆོག་གི་དཔེར་འོས་པ་ཞིག་ཡིན་ནོ། །དེ་ལྟར་སྐུ་ཚེ་དང་འཁོར་ལོ་གསུམ་གྱི་ལེགས་མཛད་མཐའ་ཕྱིན་ནས། སྐུ་དབོན་དམ་པ་དཔལ་ལྡན་ཆོས་སྐྱོང་དགུང་གྲངས་ཉེར་ལྔར་ཕེབས་པ་མེ་རྟ་ཟླ་བ་དང་པོའི་ནང་ཕྱི་མཐའ་གཟིགས་པའི་ལུང་བསྟན་དང་ཞལ་ཆེམས་ཤིན་ཏུ་ཞིབ་པར་སྩལ་ནས་ཟླ་བ་གཉིས་པའི་ཚེས་བཅུ་བཞི་ལ་སྐུ་དྲང་པོར་བསྲངས། དྲན་པ་མངོན་དུ་མཛད། ཐུགས་གཞན་དུ་མི་གཡོ་བར་འོད་གསལ་མཁའ་ཁྱབ་ཀྱི་ཏིང་ངེ་འཛིན་ལ་སྙོམས་པར་ཞུགས་པ་ནས་བཟུང་ནམ་མཁའི་དབྱིངས་ཀུན་འཇའ་སྤྲིན་གྱིས་གང་། ལྷག་པར་ཚེས་བཅོ་བརྒྱད་ལ་འཇའ་སྤྲིན་གྱི་རྣམ་པ་མི་འདྲ་བ་དུ་མ་འཁྲིགས་པ་དང་ལྷན་ཅིག་ཏུ་འོད་གསལ་ལས་ཟུང་འཇུག་གི་སྐུར་བཞེངས་ཏེ་དག་པའི་ཞིང་དུ་གཤེགས་པ་ན། སྐུ་གཟུགས་འགྱིང་བའི་ཚུལ་གྱིས་ཡོ་ཞིང་། ཤངས་བུག་ནས་བྱང་སེམས་དཀར་དམར་གྱི་རྒྱུན་ཤར་གྱིས་བབས་པ་སོགས་རྣལ་འབྱོར་མཆོག་གི་ལམ་རྟགས་མངོན་དུ་མཛད། ཉེར་ལྔའི་ཉིན་ཁང་གསར་མཁན་ཆེན་བྱམས་པ་བསོད་ནམས་བཟང་པོས་སྐུ་གདུང་ཞུགས་ལ་ཕུལ་བས། འཇའ་དང་། འོད་དང་། མེ་ཏོག་གི་ཆར་བབས་པ་སོགས་ངོ་མཚར་བའི་ལྟས་བསམ་གྱིས་མི་ཁྱབ་པ་བྱུང་ཞིང་། སྐུ་དབོན་དམ་པའི་མནལ་ལམ་དུའང་དཔལ་ལྡན་དམག་ཟོར་རྒྱལ་མོས་རྗེ་བཙུན་དམ་པ་དག་པའི་ཞིང་ཁམས་སུ་ཕེབས་པའི་ཞབས་འབྲིང་མཛད་པར་གཟིགས། རྗེས་ཀྱི་དགོངས་རྫོགས་སོགས་དབོན་རིན་པོ་ཆེ་དཔལ་ལྡན་ཆོས་སྐྱོང་གིས་ཤིན་ཏུ་རྒྱས་པར་མཛད་དོ། །

[edit]

mtshungs med bstan 'dzin lhun grub ni/ mtshungs med bstan 'dzin lhun grub ni/__yab mkhan chen dpal ldan chos skyong pa'i mes po dzam lha dang /__yum ja dpon zur khang pa'i bu mo gnas mo tshe brtan zhes pa'i sras su 'khrungs/__dam pa'i rigs gsal bar sad pas sku gzhon nu nas dpal e wa~M chos ldan gyi chos grwar dam pa'i chos kyi sgor zhugs te/__nges pa don gyi rdo rje 'chang chen po mkhan chen lhun grub dpal ldan las sdom pa gsum gyi bka' drin nos/__gzhan yang shar chen ye shes bzang po/__dpal sa skya pa kun dga' bkra shis yab sras/__rtse gdong zhabs drung rin po che/__'jam mgon sangs rgyas phun tshogs/__shar chen sangs rgyas bstan 'dzin/__shar mi nyag gi ston pa chen po byams pa tshul khrims dpal bzang/__'jam dbyangs shes bya bzang po/__brang ti shes rab rgya mtsho/__sdom brtson phrin las rgya mtsho/__mus chen kun dga' rgya mtsho/__shar chen blo gros grags pa/__mtshungs med bsod nams dpal ldan/__byams pa bsod nams bzang po sogs yongs 'dzin du mas rim bzhin bka' drin gyis rjes su bzung ba la brten nas thos bsam sgom gsum mthar phyin te/__rgyud sde rgya mtsho'i tshogs rnams kyi pha rol tu son nas/__thog mar shar chen khu dbon dang /__'jam mgon sangs rgyas phun tshogs rnams kyi go re len yun du mdzad nas dam pa de dag gi spyan ras kyi 'bras bu ltar 'tsho ba zhig tu gyur cing /__dgung lo sum cu'i skabs su shar chen blo gros grags pa'i bka'i bdud rtsi spyi bor phebs pa la brten nas/__mdo khams stod kyi phun sum tshogs pa'i sa'i cha sga ldan skyur gsum du grags pa'i nang nas skyu ra'i yul du gtogs pa dpal thag lung dgon du 'bul sdud sar phebs te/__dwa'u bla dgon gyis gtsos dad ldan rnams kyi skyabs mgon dam par lo brgyad tsam bzhugs/__e wa~M du 'bul skyel lan lnga mdzad/__sgar gzhis phun sum tshogs pa gsar du btsugs te/__mkhan chen bkra shis lhun grub de nyid de skabs gnam phu rnam rgyal gling du dbon po bstan 'dzin gyi zla mtshan du phebs yod 'dug par/__dbon po bstan 'dzin gyis bsam pa bzang po zhig gis mthun 'gyur yang dag pa zhig ma mdzad par/__re zhig cung zad thugs sun pa lta bur gyur skabs/__rje 'di nyid kyi thugs dgongs la dam pa de nyid gzhan dang mi 'dra ba'i skyes chen zhig 'ong bar gzigs te/__sku mched ser skya gnyis char thag lung smon skyid sgar du byon na legs tshul zhus nas lo gsum mnyam du bzhugs te zab chos kyi rim pa rnams phul nas sgar gyi gdan tshab mdzad pas sku bsod che zhing mkhas grub dam par gyur nas bstan pa'i rgyal mtshan dam par gyur/__de nas rje rang nyid kyi dbus su phebs nas shar chen chos kyi rgyal po dang byams pa tshul khrims dpal bzang la sogs pas chos kyi bdag por mnga' gsol te/__e wa~M pa'i zur 'chad par mdzad de/__thog mar klu sdings kyi mi 'khrugs khang du mkha' 'gro ma rdo rje gur gyi dkyil 'khor gyi dbang tshogs chen la phul ba sogs mdzad/__rim gyis e wa~M gzims khang 'og tu lo grangs kha shas bzhugs/__dkyil 'khor rgya mtsho'i bdag nyid chen por gyur nas slar yang e wa~M phan bde khang gsar du bzhugs gnas mdzad de/__bstan pa rin po che 'dzin skyong spel gsum dang /__zhar byung du sgrub pa'i rgyal mtshan btsugs nas dag pa mkha' spyod kyi zhing du phebs pa gdon mi za ba yin no/__/chos kyi sras su gyur pa yang /__rdo rje 'chang byams pa bsod nams dpal ldan/__byams pa bsod nams bzang po/__'jam mgon bkra shis lhun grub/__brang ti nam mkha' bsam 'grub/__shar pa dpal ldan bzang po/__mkhan chen sangs rgyas dpal bzang /__rdo rje slob dpon blo gros phun tshogs/__sangs rgyas tshul khrims/__rje drung dpal ldan lhun grub/__spang shar bla ma khu dbon/__mtshungs med kun dga' rnam rgyal/__dkon mchog rgyal mtshan rnams kyis gtsos stod mnga' ris skor gsum/__dbus gtsang khams gsum/__lho mon sogs kyi bstan 'dzin gyi bla ma/__dpon po/__sprul sku/__rdo rje slob dpon rnams dang /__khyad par sku'i dbon mkhan chen dpal ldan chos skyong gis gtsos skal ldan gyi bu slob stong phrag bcur longs pa sogs mchis shing /__thugs dam gyi rim pa la'ang snga thun gyi rigs la sgrol dkar yid bzhin 'khor lo'i 'od zer drug sbrags/__biR+Wa pa'i srung ba phyi nang sbrags ma/__lam zab phyi nang sbrags ma/__nA ro mkha' spyod la oM gsum ma sum brgya bas mi nyung ba/__kye rdor mngon rtogs lam dus sbrags ma rlung sbyor dang bcas pa/__'jam dpal dkar po/__'phags pa spyan ras gzigs mdo khams shar phyogs ma dang ma Ni stong tshar re las mi nyung ba/__rdo rje brag rdzong ma la yi ge bdun ma stong phrag re/__gtor ma'i rim pa la/__dkar gtor cha bzhi/__dzam+b+ha la dkar po/__ser po/__nag po/__dbyu gu spun gsum/__brgya rtsa'i rim pa/__brul gtor chu sbyin bcas dang /__mjug tu za byed mkha' 'gro'i sbyin sreg brgya tshar gsum/__bar skabs kyi rim par grags rgyal gyi bstod pa chos rnams ma dang /__kun dga' bzang po'i bstod pa mdo rgyud ma/__byang sems zla ba rgyal mtshan gyi bstod pa bcas sh+lo ka gsum la brgya tshar re/__ltung bshags nas bzung chos spyod phyi nang tshar re/__'jam dpal mtshan brjod tshar gsum/__smon lam rnam gsum tshar gsum/__rnam rgyal gzungs tshar bcu gsum re/__rnam 'joms gzungs tshar lnga re/__mjug tu 'gro la bde skyid ma bcas bkra shis kyi bar dang /__gzim khang nang du zhabs bskor brgya tshar re/__dgong mo'i skabs su lam zab phyi nang /__bir srung phyi nang /__mkha' spyod ma/__kye rdor phyi nang /__snga dgong gang bde la rdo rje 'jigs byed bskyed rdzogs kyi nyams len dang/__rtsa sngags phreng skor re/__snying po stong phrag re/__nye snying phreng skor re ma chag pa/__'byung 'dul seng gdong ma sngon mo/__gu ru drag dmar rtsa sngags stong tshar re/__mgon po brag rdzong ma phyi nang sbrags ma dang /__yi ge bdun ma stong tshar re/__shA sa na brgya tshar re ma chags pa/__gtor bsngo'i rim par/__kye rdor/__'jigs byed/__rnal 'byor ma/__'byung 'dul/__gur lcam dral/__zhal bzhi pa/__zangs gri can/__bran bdun/__las mgon ming sring /__dud sol lha mo/__dur khrod bdag po/__mgon dkar/__stag zhon/__trak+shad/__phyogs skyong bcu/__las gshin/__dmag zor ma/__mkha' 'gro spyi gtor bcas rnams ma chag pa nyams su len pa dang /__dus rgyun thugs sgam zhing /__bla ma gong ma'i phyag len gyi rim pa gang dgos pa thams cad la nor 'khrul med pa zhig dang /__chos 'chad pa'i bya ba gang mdzad pa thams cad sbyor dngos rjes gsum cha tshang zhing brjod pa phun sum tshogs pas skyes bu dam pa chos smra ba'i khyu mchog gi dper 'os pa zhig yin no/__/de ltar sku tshe dang 'khor lo gsum gyi legs mdzad mtha' phyin nas/__sku dbon dam pa dpal ldan chos skyong dgung grangs nyer lngar phebs pa me rta zla ba dang po'i nang phyi mtha' gzigs pa'i lung bstan dang zhal chems shin tu zhib par stsal nas zla ba gnyis pa'i tshes bcu bzhi la sku drang por bsrangs/__dran pa mngon du mdzad/__thugs gzhan du mi g.yo bar 'od gsal mkha' khyab kyi ting nge 'dzin la snyoms par zhugs pa nas bzung nam mkha'i dbyings kun 'ja' sprin gyis gang /__lhag par tshes bco brgyad la 'ja' sprin gyi rnam pa mi 'dra ba du ma 'khrigs pa dang lhan cig tu 'od gsal las zung 'jug gi skur bzhengs te dag pa'i zhing du gshegs pa na/__sku gzugs 'gying ba'i tshul gyis yo zhing /__shangs bug nas byang sems dkar dmar gyi rgyun shar gyis babs pa sogs rnal 'byor mchog gi lam rtags mngon du mdzad/__nyer lnga'i nyin khang gsar mkhan chen byams pa bsod nams bzang pos sku gdung zhugs la phul bas/__'ja' dang /__'od dang /__me tog gi char babs pa sogs ngo mtshar ba'i ltas bsam gyis mi khyab pa byung zhing /__sku dbon dam pa'i mnal lam du'ang dpal ldan dmag zor rgyal mos rje btsun dam pa dag pa'i zhing khams su phebs pa'i zhabs 'bring mdzad par gzigs/__rjes kyi dgongs rdzogs sogs dbon rin po che dpal ldan chos skyong gis shin tu rgyas par mdzad do/_/