JKW-KABUM-05-CA-002-018

🚧 This website is under continued development. We appreciate your patience!

Previous Text Back to Volume PageNext Text

དཔལ་དུས་ཀྱི་འཁོར་ལོའི་ཚིགས་བཅད་གཅིག་གི་འགྲེལ།

Wylie title	dpal dus kyi 'khor lo'i tshigs bcad gcig gi 'grel
Location	mkhyen brtse'i bka' 'bum Volume 5, sde tshan 2, Text 18, Pages 551-555 (Folios 242a2 to 244a4)
Author	འཇམ་དབྱངས་མཁྱེན་བརྩེའི་དབང་པོ་
Less details More details
Citation	'jam dbyangs mkhyen brtse'i dbang po. dpal dus kyi 'khor lo'i tshigs bcad gcig gi 'grel. In 'jam dbyangs mkhyen brtse'i dbang po'i bka' 'bum, Vol. 5: 551-555. Khams sde dge rdzong sar dgon: Rdzong sar blo gros phun tshogs, 2020.
Genre

1 Texts in this Section (sde tshan or chos tshan)

18 551-555	དཔལ་དུས་ཀྱི་འཁོར་ལོའི་ཚིགས་བཅད་གཅིག་གི་འགྲེལ། dpal dus kyi 'khor lo'i tshigs bcad gcig gi 'grel Commentaries - 'grel pa	Text page View PDF
	[[|འཇམ་དབྱངས་མཁྱེན་བརྩེའི་དབང་པོ་ ()]]

Tibetan Text

Wylie

[edit]

དཔལ་དུས་ཀྱི་འཁོར་ལོའི་བསྟོད་པ་ཚིགས་སུ་བཅད་པ་གཅིག་གི་འགྲེལ་པ་བཞུགས་སོ། །ན་མཿཤྲཱི་ཀཱ་ལ་ཙཀྲཱ་ཡ། མདོར་བསྡུས་དང་པོར་མཆོག་གི་འདོད་པའི་ལྷ་ལ་ཕྱག་འཚལ་བ། སྟོང་ཉིད་སྙིང་རྗེ་སོགས་ཀྱི་དོན་འཆད་པ་ལ། རྒྱལ་པོ་པད་དཀར་གྱིས་འགྲེལ་ཆེན་བརྩམས་པའི་ཐོག་མར་འདོད་པའི་ལྷ་ལ་ཕྱག་འཚལ་བའི་ཚུལ་ཡོད་དེ། ལུས་ཀྱི་ལག་པའི་ཐལ་མོ་སྤྱི་བོར་བཞག །པུས་མོའི་ལྷ་ང་ས་ལ་བཙུགས། ངག་གིས་བསྟོད་ཚིག་བརྗོད། ཡིད་ཀྱིས་དེའི་དོན་བསྒོམས་ཤིང་ཡེ་ཤེས་ཀྱི་དོན་རྟོགས་པའི་ཚུལ་གྱིས་གཉིས་སུ་མེད་པའི་ཡེ་ཤེས་ཀྱི་དཔལ་རང་གི་བདག་ཉིད་དུ་ལྡན་པ། ཕུང་སོགས་ཀྱི་འཁོར་ལོ་ཐམས་ཅད་དུས་མི་འགྱུར་བའི་བདེ་བས་སྒྲིབ་བྲལ་དུ་བྱས་པའི་དུས་འཁོར་ལ་ཕྱག་འཚལ་བ་ཡིན་པའི་ཕྱིར། ཕྱག་འཚལ་ཚུལ་དེ་ལ་ངེས་དོན་དུ་བཤད་ན། གཡས་གཡོན་དཀྱིལ་འཁོར་བཅུའི་རླུང་རྣམས་དབུ་མར་བཅིངས་པ་ནི་ལག་པ་ཐལ་མོ་སྦྱར་བའི་ངེས་དོན་དང་། དེ་ལས་རླུང་ཕྱིར་འཕོ་བ་བཀག་པ་ནི་བསྟོད་ཚིག་གི་ངེས་དོན་དང་། དེ་ལས་རྡོ་རྗེ་ནོར་བུ་དང་གསང་བའི་པདྨོར་བྱང་སེམས་བཟུང་བ་ནི་པུས་མོའི་ལྷ་ང་ས་ལ་བཙུགས་པའི་ངེས་དོན་དང་། དེ་ལྟར་བཟུང་བ་ལས་བྱང་སེམས་གྱེན་དུ་དྲངས་པ་ནི་དོན་བསྒོམ་པའི་ངེས་དོན་དང་། དེ་ལས་རླུང་བཅུ་སྤྱི་བོར་བཅིངས་པ་ནི་ཐལ་མོ་བཅུ་སྤྱི་བོར་བཅིངས་པའི་ངེས་དོན། དེ་ལས་དྲི་མ་མེད་པའི་དེ་ཉིད་ཐོབ་པ་ནི་ཡེ་ཤེས་ཀྱི་དོན་རྟོགས་པའི་ངེས་དོན་ཡིན་ཏེ། དབང་མདོར་བསྟན་ལས། སོར་མོ་རྣམས་ནི་ཕན་ཚུན་དུ། །དཀྱིལ་འཁོར་བཅུ་པོ་ཡང་དག་སྦྱོར། །སྤྱི་བོར་ལག་པའི་མཐིལ་སྦྱར་དག །རྩེ་གཅིག་དེ་ནི་གྲི་གུག་གོ །ཞེས་དང་། མཚན་བརྗོད་ལས། ཐལ་མོ་སྦྱར་བར་བྱས་ནས་ནི། །ཞེས་སོགས་གསུངས་པའི་ཕྱིར། ངག་དོན་ནི། རྒྱལ་པོ་པདྨ་དཀར་པོས་འགྲེལ་ཆེན་བརྩམས་པའི་ཐོག་མར་མཆོད་བརྗོད་མཛད་པ་ཆོས་ཅན། དགོས་པ་ཡོད་དེ། བདུད་དང་བགེགས་ཐམས་ཅད་ཉམས་པར་བྱེད་པ་དང་། དམ་པའི་ལམ་རྣམ་པར་ངེས་པར་འགྱུར་བའི་དགོས་པ་ཡོད་པའི་ཕྱིར། བསྟོད་ཕྱག་མཛད་པས་དམ་པའི་ལམ་རྣམ་པར་ངེས་པའི་ཚུལ་ཡོད་དེ། དེ་ལྟར་མཛད་པས་འབྲས་དུས་ཀྱི་ཡོན་ཏན་རྣམས་རྒྱས་པར་བརྗོད་པའི་སྒོ་ནས་དེ་དང་རྗེས་སུ་མཐུན་པའི་ལམ་དུས་ཀྱི་ཆོས་རྣམས་ངེས་པར་འགྱུར་བའི་ཕྱིར། འོ་ན་དུས་ཀྱི་འཁོར་ལོ་དེ་ཁྱད་ཆོས་ཇི་ལྟ་བུ་དང་ལྡན་ཞེ་ན། ཁྱད་ཆོས་གསུམ་དང་ལྡན་པ་ལས། དང་པོ་སྟོན་པ་ལ། སྟོང་ཉིད་སྙིང་རྗེའི་བདག་ཉིད་ཅན། །ཞེས་པ་འདི་བྱུང་། འདིའི་དོན་ནི། འབྲས་བུའི་དུས་ཀྱི་འཁོར་ལོ་ཆོས་ཅན། །ཁྱད་པར་དང་པོ་དང་ལྡན་པ་ཡིན་ཏེ། སྟོང་པ་ཉིད་དང་སྙིང་རྗེ་མི་འགྱུར་བའི་བདེ་བ་ཆེན་པོ་ངོ་བོ་དབྱེར་མི་ཕྱེད་པའི་བདག་ཉིད་ཅན་དུ་གྱུར་པའི་ཁྱད་པར་དང་ལྡན་པའི་ཕྱིར། འདིར་བསྟན་སྟོང་ཉིད་ལ་སྒྲས་བརྗོད་རིགས་ཀྱི་སྒོ་ནས་དབྱེ་ན། ཆོས་ཅན་སྟོང་གཟུགས་དང་ཆོས་ཉིད་དེ་བཞིན་ཉིད་གཉིས་སུ་ཡོད་ལ། སྙིང་རྗེ་དེ་ལ་སྒྲས་བརྗོད་རིགས་ཀྱི་སྒོ་ནས་དབྱེ་ན། ཐུན་མོང་དང་ཐུན་མོང་མ་ཡིན་པ་གཉིས་སུ་ཡོད་པའི་ཕྱི་མ་ནི་བདེ་བ་ཆེན་པོའི་ཡེ་ཤེས་སོ། །དེའང་སྙིང་རྗེའི་སྐད་དོད་ཀ་རུ་ཎ་ལ་ངེས་ཚིག་གིས་བཤད་ན། ཀ་ལ་ཐིག་ལེ་བྱིན་པས་ཀཾ །བདེ་བ་དང་། རུ་ཎ་འགོག་པ་ལ་འཇུག་པས་བདེ་འགོག་སྟེ། ཐུན་མོང་བའི་སྙིང་རྗེ་ལ་སྦྱར་ན། དེ་རང་རྒྱུད་ལ་སྐྱེས་པ་ན་སེམས་ཅན་གཞན་སྡུག་བསྔལ་གྱིས་མནར་བ་ལ་མི་བཟོད་པའི་རང་རྒྱུད་ཀྱི་ཞི་བདེ་འགོག་པའི་རྣམ་པ་ཅན་དུ་བྱེད་ལ། ཐུན་མོང་མ་ཡིན་པ་ལ་སྦྱར་ན་འགྱུར་བ་དེ་བཀག་པའི་མི་འགྱུར་བའི་བདེ་བ་ཆེན་པོའོ། །ཡང་ན་སློབ་དཔོན་མཚོ་སྐྱེས་ཀྱིས་རུ་ཎ་བསྡུས་པར་འཇུག་པར་བཤད་པ་ལྟར་ན། དགའ་བ་དང་པོ་གསུམ་གྱི་བདེ་བ་རྣམས་རིམ་གྱིས་བསྡུས་པའི་ལྷན་སྐྱེས་ཀྱི་བདེ་ཆེན་ཏེ་སྔ་མ་དང་ངོ་བོ་གཅིག་གོ །ཁྱད་པར་གཉིས་པ་སྟོན་པ་ལ། སྲིད་གསུམ་སྐྱེ་དང་འཇིག་པ་མེད། །ཅེས་བྱུང་། དོན་ནི་ཕྱིས་ཀྱི་མཁས་པ་དག་དོན་དམ་སྲིད་ཞིའི་མཐའ་ལ་མི་གནས་པར་བཤད་པ་ནི་མི་ལེགས་ཏེ། དེ་དུས་འཁོར་གྱི་ཐུན་མོང་མ་ཡིན་པའི་ཡོན་ཏན་དུ་མི་རུང་བའི་ཕྱིར། རང་ལུགས་ནི། བཤད་སྦྱར་སྙིང་པོ་སྣང་བ་ལས། དུས་འཁོར་ཆོས་ཅན། ཁྱད་པར་གཉིས་པ་དང་ལྡན་ཏེ། སྲིད་པ་ཁམས་གསུམ་དུ་ཉིང་མཚམས་སྦྱོར་བའི་སྐྱེ་བ་དང་། ལས་ཉོན་གཉིས་འཇིག་པ་སྟེ་ཟད་པ་ཙམ་ནི་ཞི་བ་ཕྱོགས་གཅིག་པའི་མཐའ་མེད་པའི་ཁྱད་པར་དང་ལྡན་པའི་ཕྱིར། དེར་ཐལ། ཐུགས་མི་འགྱུར་བའི་བདེ་ཆེན་ལ་རྟག་ཏུ་གནས་པས་སྲིད་མཐའ་དང་། སྐུ་སྟོང་གཟུགས་ཡབ་ཡུམ་གྱི་རྣམ་པ་ཅན་གྱིས་ནམ་མཁའ་ཇི་སྲིད་བར་དུ་འགྲོ་བའི་དོན་མཛད་པ་ཞི་མཐའ་སྤངས་པའི་ཕྱིར་ཏེ། དབང་མདོར་བསྟན་ལས། མྱ་ངན་འདས་པ་བྲལ་བ་གཟུགས། །འཁོར་བ་ལས་འདས་མི་འགྱུར་བ། །རྟག་དང་ཆད་ལས་ངེས་པར་གྲོལ། །དེ་དག་སྦྱོར་བ་གཉིས་མེད་མཆོག །ཅེས་གསུངས་པའི་ཕྱིར། ཁ་ཅིག་བཞིན་ལག་གི་རྣམ་པ་ཅན་གྱི་སྐྱེས་བུ་སྐྱེ་བ་བླངས་པ་སྲིད་པ་ཡིན་པས་སྟོང་གཟུགས་དེ་ཡང་སྲིད་མཐར་འགྱུར་རོ་ཞེ་ན། མི་འགྱུར་ཏེ། དེ་ཐུགས་མི་འགྱུར་བའི་བདེ་བས་ཟིན་པའི་ཕྱིར། དེ་ལ་རྟག་ཏུ་གནས་ཀྱང་ཞི་མཐར་མི་འགྱུར་ཏེ། དེ་རང་དང་ངོ་བོ་གཅིག་ཏུ་གྱུར་པའི་སྟོང་གཟུགས་ཀྱིས་ཟིན་པའི་ཕྱིར། དབང་མདོར་བསྟན་ལས། གཟུགས་ནི་སྲིད་པར་མི་འགྲོ་སྟེ། །འགྱུར་མེད་མྱ་ངན་འདས་མི་འགྲོ། །ཕན་ཚུན་འཁྱུད་པའི་ཞི་བ་ནི། །མ་ནིང་གི་ནི་གོ་འཕང་མཆོག །ཅེས་གསུངས་པའི་ཕྱིར། ཁྱད་པར་གསུམ་པ་སྟོན་པ་ལ། ཤེས་དང་ཤེས་བྱ་གཅིག་པའི་སྐུ། །ཞེས་བྱུང་། དོན་ནི། དུས་འཁོར་ཆོས་ཅན། ཁྱད་པར་གསུམ་པ་དང་ལྡན་ཏེ། ཤེས་པ་མི་འགྱུར་བའི་བདེ་བ་དང་། ཤེས་བྱ་སྟོང་གཟུགས་རྡོ་རྗེ་འཛིན་པའི་རྣམ་པ་ཅན་གྱི་སྐུ་གཉིས་དབྱེར་མི་ཕྱེད་པའི་ཁྱད་པར་དང་ལྡན་པའི་ཕྱིར་རོ། །སྟོང་ཉིད་སྙིང་རྗེའི་བདག་ཉིད་དེ་རྒྱས་པར་སྟོན་པ་ལ་ཚིགས་བཅད་ཕྱི་མ་རྣམས་བྱུང་སྟེ། འདིར་མ་སྤྲོས་སོ། །ཤུབྷཾ།། །། ༈

[edit]

dpal dus kyi 'khor lo'i tshigs bcad gcig gi 'grel/ dpal dus kyi 'khor lo'i bstod pa tshigs su bcad pa gcig gi 'grel pa bzhugs so/__/na maHshrI kA la tsakrA ya/__mdor bsdus dang por mchog gi 'dod pa'i lha la phyag 'tshal ba/__stong nyid snying rje sogs kyi don 'chad pa la/__rgyal po pad dkar gyis 'grel chen brtsams pa'i thog mar 'dod pa'i lha la phyag 'tshal ba'i tshul yod de/__lus kyi lag pa'i thal mo spyi bor bzhag__/pus mo'i lha nga sa la btsugs/__ngag gis bstod tshig brjod/__yid kyis de'i don bsgoms shing ye shes kyi don rtogs pa'i tshul gyis gnyis su med pa'i ye shes kyi dpal rang gi bdag nyid du ldan pa/__phung sogs kyi 'khor lo thams cad dus mi 'gyur ba'i bde bas sgrib bral du byas pa'i dus 'khor la phyag 'tshal ba yin pa'i phyir/__phyag 'tshal tshul de la nges don du bshad na/__g.yas g.yon dkyil 'khor bcu'i rlung rnams dbu mar bcings pa ni lag pa thal mo sbyar ba'i nges don dang /__de las rlung phyir 'pho ba bkag pa ni bstod tshig gi nges don dang /__de las rdo rje nor bu dang gsang ba'i pad+mor byang sems bzung ba ni pus mo'i lha nga sa la btsugs pa'i nges don dang /__de ltar bzung ba las byang sems gyen du drangs pa ni don bsgom pa'i nges don dang /__de las rlung bcu spyi bor bcings pa ni thal mo bcu spyi bor bcings pa'i nges don/__de las dri ma med pa'i de nyid thob pa ni ye shes kyi don rtogs pa'i nges don yin te/__dbang mdor bstan las/__sor mo rnams ni phan tshun du/__/dkyil 'khor bcu po yang dag sbyor/__/spyi bor lag pa'i mthil sbyar dag__/rtse gcig de ni gri gug go__/zhes dang /__mtshan brjod las/__thal mo sbyar bar byas nas ni/__/zhes sogs gsungs pa'i phyir/__ngag don ni/__rgyal po pad+ma dkar pos 'grel chen brtsams pa'i thog mar mchod brjod mdzad pa chos can/__dgos pa yod de/__bdud dang bgegs thams cad nyams par byed pa dang /__dam pa'i lam rnam par nges par 'gyur ba'i dgos pa yod pa'i phyir/__bstod phyag mdzad pas dam pa'i lam rnam par nges pa'i tshul yod de/__de ltar mdzad pas 'bras dus kyi yon tan rnams rgyas par brjod pa'i sgo nas de dang rjes su mthun pa'i lam dus kyi chos rnams nges par 'gyur ba'i phyir/__'o na dus kyi 'khor lo de khyad chos ji lta bu dang ldan zhe na/__khyad chos gsum dang ldan pa las/__dang po ston pa la/__stong nyid snying rje'i bdag nyid can/__/zhes pa 'di byung /__'di'i don ni/__'bras bu'i dus kyi 'khor lo chos can/__/khyad par dang po dang ldan pa yin te/__stong pa nyid dang snying rje mi 'gyur ba'i bde ba chen po ngo bo dbyer mi phyed pa'i bdag nyid can du gyur pa'i khyad par dang ldan pa'i phyir/__'dir bstan stong nyid la sgras brjod rigs kyi sgo nas dbye na/__chos can stong gzugs dang chos nyid de bzhin nyid gnyis su yod la/__snying rje de la sgras brjod rigs kyi sgo nas dbye na/__thun mong dang thun mong ma yin pa gnyis su yod pa'i phyi ma ni bde ba chen po'i ye shes so/__/de'ang snying rje'i skad dod ka ru Na la nges tshig gis bshad na/__ka la thig le byin pas kaM__/bde ba dang /__ru Na 'gog pa la 'jug pas bde 'gog ste/__thun mong ba'i snying rje la sbyar na/__de rang rgyud la skyes pa na sems can gzhan sdug bsngal gyis mnar ba la mi bzod pa'i rang rgyud kyi zhi bde 'gog pa'i rnam pa can du byed la/__thun mong ma yin pa la sbyar na 'gyur ba de bkag pa'i mi 'gyur ba'i bde ba chen po'o/__/yang na slob dpon mtsho skyes kyis ru Na bsdus par 'jug par bshad pa ltar na/__dga' ba dang po gsum gyi bde ba rnams rim gyis bsdus pa'i lhan skyes kyi bde chen te snga ma dang ngo bo gcig go__/khyad par gnyis pa ston pa la/__srid gsum skye dang 'jig pa med/__/ces byung /__don ni phyis kyi mkhas pa dag don dam srid zhi'i mtha' la mi gnas par bshad pa ni mi legs te/__de dus 'khor gyi thun mong ma yin pa'i yon tan du mi rung ba'i phyir/__rang lugs ni/__bshad sbyar snying po snang ba las/__dus 'khor chos can/__khyad par gnyis pa dang ldan te/__srid pa khams gsum du nying mtshams sbyor ba'i skye ba dang /__las nyon gnyis 'jig pa ste zad pa tsam ni zhi ba phyogs gcig pa'i mtha' med pa'i khyad par dang ldan pa'i phyir/__der thal/__thugs mi 'gyur ba'i bde chen la rtag tu gnas pas srid mtha' dang /__sku stong gzugs yab yum gyi rnam pa can gyis nam mkha' ji srid bar du 'gro ba'i don mdzad pa zhi mtha' spangs pa'i phyir te/__dbang mdor bstan las/__mya ngan 'das pa bral ba gzugs/__/'khor ba las 'das mi 'gyur ba/__/rtag dang chad las nges par grol/__/de dag sbyor ba gnyis med mchog__/ces gsungs pa'i phyir/__kha cig bzhin lag gi rnam pa can gyi skyes bu skye ba blangs pa srid pa yin pas stong gzugs de yang srid mthar 'gyur ro zhe na/__mi 'gyur te/__de thugs mi 'gyur ba'i bde bas zin pa'i phyir/__de la rtag tu gnas kyang zhi mthar mi 'gyur te/__de rang dang ngo bo gcig tu gyur pa'i stong gzugs kyis zin pa'i phyir/__dbang mdor bstan las/__gzugs ni srid par mi 'gro ste/__/'gyur med mya ngan 'das mi 'gro/__/phan tshun 'khyud pa'i zhi ba ni/__/ma ning gi ni go 'phang mchog__/ces gsungs pa'i phyir/__khyad par gsum pa ston pa la/__shes dang shes bya gcig pa'i sku/__/zhes byung /__don ni/__dus 'khor chos can/__khyad par gsum pa dang ldan te/__shes pa mi 'gyur ba'i bde ba dang /__shes bya stong gzugs rdo rje 'dzin pa'i rnam pa can gyi sku gnyis dbyer mi phyed pa'i khyad par dang ldan pa'i phyir ro/_/stong nyid snying rje'i bdag nyid de rgyas par ston pa la tshigs bcad phyi ma rnams byung ste/__'dir ma spros so/__/shub+haM//___//__!_