JKW-KABUM-03-GA-001-033

🚧 This website is under continued development. We appreciate your patience!

Previous Text Back to Volume PageNext Text

རྡོར་བྲག་ཞབས་དྲུང་གི་མདོ་དབང་ལས།

Wylie title	rdor brag zhabs drung gi mdo dbang las
Location	mkhyen brtse'i bka' 'bum Volume 3, sde tshan 1, Text 33, Pages 617-627 (Folios 309a3 to 314a6)
Author	འཇམ་དབྱངས་མཁྱེན་བརྩེའི་དབང་པོ་
Less details More details
Citation	'jam dbyangs mkhyen brtse'i dbang po. rdor brag zhabs drung gi mdo dbang las. In 'jam dbyangs mkhyen brtse'i dbang po'i bka' 'bum, Vol. 3: 617-627. Khams sde dge rdzong sar dgon: Rdzong sar blo gros phun tshogs, 2020.
Genre	Notes - zin bris

1 Texts in this Section (sde tshan or chos tshan)

33 617-627	རྡོར་བྲག་ཞབས་དྲུང་གི་མདོ་དབང་ལས། rdor brag zhabs drung gi mdo dbang las Notes - zin bris	Text page View PDF
	[[|འཇམ་དབྱངས་མཁྱེན་བརྩེའི་དབང་པོ་ ()]]

Tibetan Text

Wylie

[edit]

རྡོར་བྲག་ཞབས་དྲུང་གི་མདོ་དབང་ལས། དེ་ཡང་། དབང་གི་ངོ་བོ་ནི་གདུལ་བྱའི་རྒྱུད་བྱིན་གྱིས་རློབ་ནུས་པའོ། །ངེས་ཚིག་ནི་ཐེག་པ་རང་རང་གི་ལྟ་སྒོམ་སྤྱོད་པ་ལ་དབང་ངོ་། །དབྱེ་ན། ཡོངས་སུ་འཛིན་པ་དགེ་བའི་བཤེས་གཉེན་གྱི་དབང་། ཆོས་བཀའ་གཏད་པ་པུསྟི་གླེགས་བམ་གྱི་དབང་། ཡེ་ཤེས་ལྷའི་དབང་། རིག་པ་རྩལ་གྱི་དབང་ཞེས་བཞིར་ཕྱེ་ན། བྱང་སེམས་ཡན་ཆད་དབང་དང་པོ་སྦྱོར་ཏེ། སོ་སོར་ཐར་པའི་སྐབས། བཅོམ་ལྡན་འདས་ཀྱིས་ཚུར་ཤོག་བཀའ་སྩལ་པ། སྐྲ་བྱི་སྣམ་སྦྱར་གྱོན་པའི་ལུས་ལྡན་ཞིང་། །མོད་ལ་དབང་པོ་རབ་ཞི་གནས་གྱུར་ཏེ། །སངས་རྒྱས་དགོངས་པས་ལུས་གཟུགས་བཀབ་པར་གྱུར། །ཅེས་གསུངས་པ་ལྟར་སངས་རྒྱས་ཀྱི་དགོངས་པས་བྱིན་གྱིས་བརླབས་པས་དགེ་སློང་གི་དངོས་པོར་དབང་བསྐུར་བ་ལྟ་བུའོ། །ཁྱད་པར་གསང་སྔགས་བླ་ན་མེད་པའི་དབང་ལ། བུམ་པ་སོགས་བཞི་དང་། དེ་རེ་རེ་ལའང་དབང་ལམ་ལྟ་བ་གྲུབ་མཐའ་འདའ་ཁའི་རྣལ་འབྱོར་འབྲས་བུ་སྟེ་དོན་དྲུག་གིས་འཆད་པ་ནི། དང་པོ་བུམ་དབང་ལ་ཕྱི་ཕན་པའི་དབང་བཅུ་དང་། ནང་ནུས་པའི་དབང་ལྔའོ། །ལམ་ནི། བཤགས་རྒྱུད་ལས། བསྐྱེད་རིམ་དབྱིབས་ཀྱི་ལམ་དུ་མ་ཤེས་བཤགས། །ཞེས་པས་ཕུང་ཁམས་སྐྱེ་མཆེད་སྦྱོང་བྱེད་བསྐྱེད་རིམ་དབྱིབས་ཀྱི་ལམ་མོ། །གསུམ་པ་དེ་ལམ་དུ་འཁྱེར་བྱེད་ལྟ་བ་ནི། ངོ་བོ་ཉིད་གསུམ་ལྟ་བའི་ཀློང་དུ་བཤགས། །ཞེས་པས་སྣང་ཕྱོགས་ཀྱི་ངོ་བོ་ཉིད་གསུམ། སྟོང་ཕྱོགས་ཀྱི་ངོ་བོ་ཉིད་གསུམ། ཟུང་འཇུག་གི་ངོ་བོ་ཉིད་གསུམ། བཞི་པ་དེའི་གྲུབ་མཐའ་ནི། གྲུབ་མཐའ་འཁོར་འདས་དབྱེར་མེད་ཀློང་དུ་བཤགས། །ཞེས་སོ། །ལྔ་པ་འདའ་བ་ནི། སྣང་བ་བསྒྱུར་བ་དང་། འོད་ཀྱི་གོང་བུ་དང་། སྒྲའི་འཕོ་བ་སྟེ། མ་རྟོགས་འཆི་དུས་སྣང་བ་བསྒྱུར་བ་དང་། །འོད་ཀྱི་གོང་བུ་སྒྲ་ཡིས་འཕོ་མ་ཤེས། །ཞེས་སོ། །དྲུག་པ་འབྲས་བུ་ནི་སྤྲུལ་པའི་སྐུ་འགྲུབ་པར་བྱེད་དེ། ལུས་ཀྱི་རྩ་ཡི་གཙོ་བོ་ཕལ་བ་རྣམས། །ཡེ་ནས་སྤྲུལ་སྐུར་གནས་པ་མ་ཤེས་ཏེ། །དབྱིབས་ཀྱི་ལྷ་སྐུ་རང་གསལ་བསྒོམ་མ་ཤེས། །སྤྲུལ་སྐུ་རང་བཞིན་ལྷུན་གྲུབ་འབྲས་བུར་བཤགས། །ཞེས་སོ། །དེ་བཞིན་གསང་དབང་ལ་ཡང་། རྫས་བྱང་ཆུབ་སེམས་ཀྱི་དཀྱིལ་འཁོར་དུ་དབང་ནི། ཡབ་དང་ཡུམ་དང་གཉིས་ཀ་ལས་ཐོབ་པ་སོགས་དངོས་སམ་ཐབས་དང་བརྡས་བསྐུར། ལམ་བདག་བྱིན་རླབས་པའི་རིམ་པ་འཁོར་ལོ་ལ་བརྟེན་པ་དང་མ་བརྟེན་པའི་རྫོགས་རིམ་ཟབ་མོ་སྟེ། འཁོར་ལོ་བརྟེན་དང་མ་བརྟེན་མན་ངག་གནད། །བདེ་བ་ཉམས་སུ་ལེན་པའི་ལམ་མ་བསྒོམས། །བདག་ལ་བྱིན་རླབས་ལམ་གྱི་ངང་དུ་བཤགས། །ཞེས་སོ། །ལྟ་བ་ཉོན་མོངས་རང་བྱུང་། རྣམ་རྟོག་རང་བྱུང་། སྦྲེལ་བཞི་རང་བྱུང་། གསལ་ཞིང་ཡང་བའི་རང་བྱུང་སྟེ་རང་བྱུང་གི་ཡེ་ཤེས་བཞི། ཉོན་མོངས་དང་ནི་རྣམ་རྟོག་སྦྲེལ་བཞི་སྟེ། །གསལ་ཞིང་ཡངས་པའི་རང་བྱུང་ཡེ་ཤེས་གནས། །ལྟ་བ་རང་བྱུང་ཡེ་ཤེས། །ཞེས་སོགས་སོ། །གྲུབ་མཐའ་མ་འདྲེས་ཡོངས་རྫོགས་ངང་དུ་བཤགས། །ཞེས་སོ། །འདའ་ཁའི་རྣལ་འབྱོར་འོད་གསལ་ཏེ། །འདའ་ཁའི་གདམས་ངག་འོད་གསལ་ངང་དུ་བཤགས། །ཞེས་སོ། །འབྲས་བུ་ངག་གི་རྩ་ཡི་གེའི་དྲི་མ་དག་སྟེ་ལོངས་སྤྱོད་རྫོགས་པའི་སྐུ་འགྲུབ་པར་བྱེད་དེ། འབྲས་བུ་ལོངས་སྤྱོད་རྫོགས་སྐུའི་ངང་དུ་བཤགས། །ཞེས་སོ། །དབང་གསུམ་པ་ནི། དངོས་སམ་ཡེ་ཤེས་ཀྱི་ཕྱག་རྒྱ་བྷ་གའི་དཀྱིལ་འཁོར་དུ་ཤེས་རབ་ཡེ་ཤེས་ཀྱི་དབང་། ལམ་མྱུར་མགྱོགས་ཕོ་ཉའི་ལམ་སྟེ་ཐབས་ལམ་ལྷན་སྐྱེས་ཡེ་ཤེས་ཏེ། ཡུམ་བདག་འདོད་པའི་བྱིན་རླབས་མཉམ་པ་ལ། །འཁོར་ལོ་ཐབས་ཀྱི་ལམ་དུ༴ ཞེས་སོགས་ཀྱིས་ལྟ་བ་བསྟན། གྲུབ་མཐའ་བདེ་སྟོང་རྒྱ་ཆུང་བ་སྟེ། བདེ་སྟོང་རྒྱ་ཆུང་གྲུབ་མཐའ་མ་རྟོགས་པ། །ཞེས་སོགས་གྲུབ་མཐའ་དང་། འདའ་ཁ་རྡོ་རྗེ་སེམས་དཔའི་ངང་དུ་བཤགས། །ཞེས་ལམ་དང་། བདེན་བཞི་ལྟ་བ་ལྷན་སྐྱེས་ངང་དུ་བཤགས། །འཆི་ཁའི་རྣལ་འབྱོར་ནམ་འཆི་བའི་ཚེ་རྡོ་རྗེ་སེམས་དཔའ་འབྱོན་པར་འགྱུར་པ། བགྲོད་བྱེད་ཐབས་དེས་ཡིད་ཁམས་བདུད་རྩིའི་དྲི་མ་སྦྱངས་ཏེ་འབྲས་བུ་ཆོས་སྐུ་འགྲུབ་སྟེ། འབྲས་བུ་ཆོས་ཀྱི་སྐུ་ཡི་སོགས། དབང་བཞི་པ་ནི། དོན་དམ་བྱང་ཆུབ་སེམས་ཀྱི་དཀྱིལ་འཁོར་དུ་དབང་བཞི་པ་རིག་པ་རྩལ་གྱི་དབང་། དེའི་ལམ་རོ་རྐྱང་དབུ་གསུམ་རྡོ་རྗེའི་རྦ་རླབས་ཏེ། རྡོ་རྗེའི་རྦ་རླབས་ལམ་གསུམ་ངང་དུ་བཤགས། །ཞེས་སོ། །ལྟ་བ་ཆོས་ཐམས་ཅད་ཤིན་ཏུ་རྣམ་པར་དག་པ་སྟེ། ལྟ་བ་ཆོས་རྣམས་རྣམ་དག་ངང་དུ་བཤགས། །ཞེས་སོགས་སོ། །གྲུབ་མཐའ་བདེ་སྟོང་རྒྱ་ཆེ་བ་སྟེ། བདེ་སྟོང་རྒྱ་ཆེའི་གྲུབ་མཐའ། ཞེས་སོགས་སོ། །འདའ་ཁའི་རྣལ་འབྱོར་ཕྱག་རྒྱ་ཆེན་པོ་སྟེ། །འདའ་ཁ་ཕྱག་རྒྱ་ཆེན་པོའི་ངང་དུ་བཤགས། །ཞེས་སོ། །བགྲོད་བྱེད་ཀྱི་ཐབས་དེས་ཡེ་ཤེས་རླུང་གི་དྲི་མ་སྦྱངས་ཏེ། འབྲས་བུ་ངོ་བོ་ཉིད་སྐུ་ཐོབ་པར་འགྱུར་ཏེ། འབྲས་བུ་ངོ་བོ་ཉིད་ཀྱི་སྐུ་རུ༴ ཞེས་སོགས་སོ། །དེ་ལྟར་དབང་བཞི་པོ་དེ་སྐུར་བྱེད་ཀྱི་བླ་མ་ཡང་བཞིར་ངེས་ཏེ། བཤགས་རྒྱུད་གླེང་གཞིར། ལམ་ལ་གནས་པའི་བླ་མ་དམ་པ་ནི་བཞི་ཞིག་ཡོད་དེ། །ཞེས་སོགས་གསུངས་པ་ལྟར། སྒྲོ་འདོགས་གཅོད་བྱེད་ཀྱི་བླ་མས་བུམ་དབང་། ཡེ་ཤེས་སྟོན་བྱེད་ཀྱི་གསང་དབང་། ལྷན་སྐྱེས་སྟོན་བྱེད་ཀྱི་གསུམ་པ། དེ་ཉིད་སྟོན་བྱེད་ཀྱི་བཞི་པ་རྣམས་སོ། །དེ་ལྟ་བུའི་བླ་མ་དམ་པ་དེས་གདུལ་བྱའི་རྒྱུད་ལ་བརྟགས་ཏེ་སྡུག་བསྔལ་གསུམ་གྱི་མཚངས་བསྟན་པ་མ་དག་པའི་སྣང་བ། ལམ་སྒོམ་པའི་རྣལ་འབྱོར་གྱི་ཐབས་བསྟན་པ་ལས་བྱུང་བའི་ཉམས་ཀྱི་སྣང་བ། ལམ་དེས་འབྲས་བུ་གྲུབ་ཚུལ་ལ་སྤྲོ་བ་བསྐྱེད་པ་དག་པའི་སྣང་བ་གསུམ་གྱིས་རྒྱུད་སྦྱངས། ཀུན་གཞི་རྒྱུ་རྒྱུད་ཀྱིས་ལྟ་བ་གཏན་ལ་ཕབ། ལུས་ཐབས་ཀྱི་རྒྱུད་དབང་བཞིའི་ལམ་གྱིས་སྦྱངས། ཕྱག་རྒྱ་ཆེན་པོ་འབྲས་བུའི་རྒྱུད་རང་བྱུང་ལྷུན་གྲུབ་ཏུ་ངོ་སྤྲད། དེ་དག་ཀྱང་རྒྱུ་ལམ་འབྲས་བུའི་རྣལ་འབྱོར་གསུམ་གྱིས་བསྡུས་ཏེ། མདོར་ན་དེ་དག་ཀྱང་བླ་མའི་སྙན་བརྒྱུད་ཚད་མ་གདམས་ངག་ལ་སེལ་མེད་པ་དང་། དེ་ཉིད་ཉམས་མྱོང་ཚད་མས་གཏན་ལ་འབེབས་པ་དང་། དེ་ལ་ངེས་ཤེས་སྐྱེ་ཕྱིར་རྟོགས་བརྗོད་དང་ལོ་རྒྱུས་ཚད་མ་དང་སྦྱར་བ་དང་། རྒོལ་བ་ངན་པའི་ཀླན་ཀའི་དྲི་མ་མེད་པའི་ཕྱིར། མདོ་རྒྱུད་ཀྱི་བཀའི་ལུང་ཚད་མ་སྟེ་དབང་བཞིའི་ཆུ་བོ་མ་ནུབ་པའི་དབང་རིག་འཛིན་བརྒྱུད་པའི་བྱིན་རླབས་ཀྱི་བརྒྱུད་པ་མ་ཉམས་པ་དེ་ཉིད་གདམས་ངག་གི་སྣ་ཁ་མ་ལོག་པར་གདུལ་བྱའི་མོས་གུས་ཀྱིས་བསམ་པ་ཚིམ་པར་བྱས་ཏེ་ཕྱི་ནང་གསང་གསུམ་གྱི་རྟེན་འབྲེལ་ཡང་དག་པར་བསྒྲིགས་ལ། ལྟ་སྒོམ་སྤྱོད་གསུམ་གྱི་སྒོ་ནས་གསང་སྔགས་ཀྱི་ལམ་བཟང་པོར་འཇུག་པའི་ཚུལ་ལེགས་པར་འཆད་པ་ཤིན་ཏུ་འཐད་དེ། དྲི་མེད་བཤགས་རྒྱུད་ལས། ཁྱད་པར་དུ་ཡང་མ་དག་པའི་སྣང་བ་དང་། སོགས་ནས། སྤྱོད་པ་ལ་དོར་ནས་གསང་སྔགས་པའི་ལམ་ལ་ཞུགས། ཞེས་པའི་བར་གསུངས་པའི་ཕྱིར་རོ། །འདི་དག་ཧེ་རུ་ཀ་གལྤོའི་ཏནྟྲ་དང་བསྟུན་ཏེ་འཆད་ན་ལམ་འབྲས་བུ་དང་བཅས་པའི་གཞུང་ཡང་དག་པ་གཅིག་འབྱུང་ངོ་། ། ༈

ཐེག་དགུའི་དབང་ནི། ཇི་སྐད་དུ། ཡོ་ག་ལ་སོགས་ཐེག་དྲུག་ལ། །ཕྱི་རྒྱུད་དབང་ནི་ཆུ་བོས་བྱ། །བསྐྱེད་པ་མ་ཧཱ་ཡོ་ག་ལ། །ནང་དབང་འབྱུང་པའི་ཆུ་བོས་བྱ། །རྫོགས་པ་ཨ་ནུ་ཡོ་ག་ལ། །སྒྲུབ་དབང་གྲགས་པའི་ཆུ་བོས་བྱ། །རྫོགས་ཆེན་ཨ་ཏི་ཡོ་ག་ལ། །གསང་དབང་རྫོགས་པའི་ཆུ་བོས་བྱ། །ཞེས་སོ། དེ་དག་གི་ཚེ་བསྲུང་བྱའི་དམ་ཚིག་ནི། སྤྱིར་རྩ་བའི་ལྟུང་བ་བཅུ་གཉིས་དང་། ཡན་ལག་གི་དམ་ཚིག་སྦོམ་པོ་བརྒྱད། ཁྱད་པར་སྔ་འགྱུར་གྱི་རིང་སྲོལ་ལ། རྩ་བའི་བླ་མའི་སྐུ་གསུང་ཐུགས་ཀྱི་དམ་ཚིག་ལ་དགུར་ཕྱེ་བའི་ཉི་ཤུ་རྩ་བདུན། ཁྱད་པར་དུ་སྤྱད་པར་བྱ་བ། མི་སྤོང་བ། མི་འདོར་བ། ཤེས་པར་བྱ་བ། བསྒྲུབ་པར་བྱ་བ་སྟེ་རྩ་བ་ཡན་ལག་གི་དམ་ཚིག་ཉི་ཤུ་རྩ་ལྔ། དེ་དག་ཀྱང་བསྡུ་ན། མདོར་ན་རང་ལུས་རྡོ་རྗེ་གསུམ་ཤེས་ན། །སྔགས་ཀྱི་དམ་ཚིག་ས་ཡ་འབུམ་སྡེ་འདུས། །ཞེས་སོ། །ཁྱད་པར་དུ། ལམ་རིམ་ལས། མཉམ་རྗེས་བཟའ་བཅའ་བསྲུང་བའི་དམ་ལྔ་དཔོག །ཅེས་གསུངས་པ་ལྟར་དོན་ཚན་ཉི་ཤུ་དང་། དེ་དག་ཉམས་ཆག་འབྱུང་ཚུལ་ནི། ཐོས་བསམ་མ་བྱས་པའི་སྐྱོན་ལྟུང་མཚམས་མི་ཤེས་པ་དང་། བླ་མ་དང་ལྷ་སོགས་ལ་མི་གུས་པ་དང་། བག་མེད་པར་སྤྱོད་པ་དང་། ཉོན་མོངས་པ་རྣམས་ནི་ལྟུང་བ་འབྱུང་བའི་སྒོ་བཞི་ཞེས་བྱ་བ་ཡིན་ལ། དེ་དག་གི་གཉེན་པོར། མདོ་རྒྱུད་ལ་ཐོས་བསམ་གྱིས་སྒྲོ་འདོགས་བཅད་དེ་སློབ་ངོས་རྣམས་ལ་སློབ་པ་དང་། ཀུན་ལ་དག་སྣང་དང་གུས་པ་བསྐྱེས་པ་དང་། རྟག་པར་དྲན་པ་དང་ཤེས་བཞིན་གྱི་གཉེན་པོར་བསྟེན་པ་དང་། རང་རྒྱུད་ལ་ཉོན་མོངས་པ་གང་ཤུགས་ཆེ་བ་དེའི་གཉེན་པོར་འབད་པས་བསླབ་པའོ། །གོང་གི་བཞི་སྟེང་བརྗེད་ངས་ཆེ་བ་དང་། དྲན་པ་མི་གསལ་བ་གཉིས་བསྣན་པ་ལ་དམ་ཚིག་ཉམས་པའི་རྒྱུ་དྲུག་ཅེས་བཤད། རྒྱུ་དེ་དག་ལ་བརྟེན་ནས་དམ་ཚིག་ཉམས་མིན་ཉིན་མཚན་དུས་དྲུག་ཏུ་རང་རྒྱུད་ལ་ལེགས་པར་བརྟགས་པས་ཐུན་གྱི་དྲུག་ཆ་ལས་འདས་ན་ཐུན་ཚོད་ལས་འདས་པ་དང་། ཞག་གཅིག་ལས་འདས་ན་འགལ་བ། ཟླ་བ་གཅིག་ལས་འདས་ན་ཉམས་པ། ལོ་གཅིག་ལས་འདས་ན་འདས་པ། ལོ་གཉིས་ལས་འདས་ན་རལ་བ་རྣམས་སོ། །འོན་ཀྱང་དྲི་མེད་བཤགས་རྒྱུད་གླེང་གཞི་ལྟར་སྔགས་ཀྱི་དམ་ཚིག་གསེར་དངུལ་ཞོམ་པ་བཞིན་གསོར་རུང་བར་གསུངས་པས། དེ་ཡང་སྙིང་ཐག་པ་ནས་འགྱོད་སེམས་ཀྱིས་བཤགས་ན་གསོར་རུང་ཞིང་། ཐུན་ཞག་ཟླ་ལོ་སོགས་རིམ་གྱིས་ཉེས་པ་ལྕི་རུ་འགྲོ། ལོ་གསུམ་འདས་པར་གྱུར་ན་དེ་དག་ཀྱང་གསོར་མི་རུང་བས་ཚེ་འདིར་ཡིད་དུ་མི་འོང་བའི་སྡུག་བསྔལ་སྣ་ཚོགས་ཀྱིས་ཉམ་ཐག་པར་འགྱུར་ཏེ་ཚེ་འདིའི་སྣང་བ་ནུབ་མ་ཐག་རྡོ་རྗེའི་དམྱལ་བ་ཞེས་ནམ་ཡང་ཐོན་པར་མི་ནུས་ཤིང་སྡུག་བསྔལ་མི་ཟད་པ་མྱོང་བར་འགྱུར་རོ། །བྱེ་བྲག་ཏུ་ཐུན་ཚོད་ལས་འདས་ན་དེ་མ་ཐག་གསོར་རུང་ཞིང་། ཞག་ལས་འགལ་ན་ཚོགས་འཁོར་བརྒྱ་ཕྲག་གིས་གསོ། ཉམས་ན་རང་ལ་གང་ཡོད་ཀྱི་བདོག་པའི་དངོས་པོ་ཐམས་ཅད་ཀྱིས་བཀང་ལ་གསོ། ལོ་གཅིག་ལས་འདས་ན་བུ་དང་ཆུང་མ་ནོར་དབྱིག་སྟེ་གཅེས་པ་རྣམས་ཀྱང་གཏོང་ནས་གསོ། ལོ་གཉིས་འདས་ན་རང་གི་རང་སྲོག་ཀྱང་ཕོངས་མེད་དུ་གཏོང་། གཞན་ཡང་སྙིང་པོ་རྒྱན་ལས་གསུངས་པ་ལྟར་ཚོགས་ཞིང་ལ་བཤགས་པ་དང་། བཛྲ་བྷནྡྷ་ཏྲ་ཐ་སོགས་བྲལ་བའི་སྔགས་རྒྱ་དང་། ཁྲུས་དང་། གཏུམ་མོའི་མེས་བསྲེག་པ། མི་དམིགས་པར་བསྒོམ་པ། ལམ་དུས་སུ་ཐུན་བཞིའམ་དྲུག་ཏུ་བླང་པ། འདུས་ཐོགས་སུ་མི་འཐོལ་བར་ཞུ་བ། རྟེན་ཁྱད་འཕགས་དྲུང་དུ་སྐད་གསང་མཐོན་པོས་སྒྲེང་བ། མཎྜལ་འབུལ་བ། སྐུ་གསུང་ཐུགས་ཀྱི་མཆོད་རྟེན་བཞེངས་པ། ཟ་བྱེད་མཁའ་འགྲོའི་རྣལ་འབྱོར་གྱིས་མེ་ལ་སྦྱོང་བ། ཕྱི་ནང་གསང་བའི་གཏོར་མ་བཏང་བ། གསང་སྔགས་བཟླ་ཞིང་བསམ་གཏན་བསྒོམ་པ། མི་ཕྱུགས་ཀྱི་སྲོག་སྐྱོབ་པ། རྒྱལ་བའི་གསུང་རབས་ཀློག་པ། བླ་མའི་དྲུང་ངམ་རང་ཉིད་ཀྱིས་དཀྱིལ་འཁོར་བཞེངས་ལ་བདག་འཇུག་བླང་བ། ཡིག་བརྒྱ་དུས་བཟང་ལ་བཟླ་བ། ཕུང་པོ་གསུམ་པའི་མདོ་འདོན་པ། རྡོར་སེམས་སྒྱུ་དྲྭ་དང་བླ་མ་སོགས་ལས་གསུངས་པའི་ཕྲ་ཐིག་གི་རྣལ་འབྱོར་བསྒོམ་པ། གླང་ཆེན་རབ་འབོགས་ཀྱི་རྒྱུད་ལས་གསུངས་པའི་རྣལ་འབྱོར་སྤྱི་ཁྲུས་སམ། དོང་སྤྲུགས་རྒྱུན་འདོན་སོགས་བཤགས་པའི་ཐབས་སྣ་ཚོགས་ཀྱིས་ཉེས་ལྟུང་དང་ཞག་གཅིག་ཀྱང་མི་འགྲོགས་པ་གནད་དུ་ཆེ་ཞིང་། བཤགས་ནས་སླར་བསྲུང་ངོ་། །དེ་ལྟར་མཉམས་པ་ཁོ་ནས་ཚེ་འདི་འམ། འཆི་ཁ་བར་དོའམ། ཐ་ན་སྐྱེ་བ་བཅུ་དྲུག་ནས་ཕྱག་རྒྱ་ཆེན་པོ་མཆོག་གི་དངོས་གྲུབ་ཐོབ་ཅིང་གནས་སྐབས་སུའང་ཐུན་མོང་གི་དངོས་གྲུབ། གྲུབ་ཆེན་བརྒྱད། དབང་ཕྱུག་གི་ཡོན་ཏན་བརྒྱད་སོགས་ཐམས་ཅད་ལྷུན་གྱིས་གྲུབ་པར་འགྱུར་བ་ལགས་སོ། ། ༈ ས་ཉེར་གཅིག་ནི། དང་པོ་རབ་ཏུ་དགའ་བ། དྲི་མ་མེད་པ། འོད་བྱེད་པ། འོད་འཕྲོ་བ། སྦྱང་དཀའ་བ། མངོན་དུ་གྱུར་པ། རིང་དུ་སོང་བ། མི་གཡོ་བ། ལེགས་པའི་བློ་གྲོས། ཆོས་ཀྱི་སྤྲིན། ཀུན་ཏུ་འོད། རྡོ་རྗེ་འཛིན་པ། རྡོ་རྗེ་འཆང་། སྟུག་པོ་བཀོད། པདྨ་ཅན། འཁོར་ལོ་ཚོགས་ཆེན། ཀུན་བཟང་དབྱེར་མེད། རྫོགས་པ་བླ་མ། སྲིད་གསུམ་ངང་རྫོགས། ཡེ་ཤེས་བླ་མའོ། །དེ་དག་ཡེ་ཤེས་ཉེར་གཅིག་དང་སྦྱར་ཚུལ། སྒྲིབ་སྦྱོང་ཡེ་ཤེས། སྟོབས་ཆེན། སྐྱོན་མེད་ཡེ་ཤེས། ཁམས་གསུམ་རྣམ་རྒྱལ། བདུད་འཇོམས་ཡེ་ཤེས། བདུད་རྩི་འཁྱིལ་བ། རྟོགས་འཇོམས་ཡེ་ཤེས། འདོད་རྒྱལ། གཟིར་མནན་ཡེ་ཤེས། རྟ་མཆོག རྣམ་དག་ཡེ་ཤེས། མི་གཡོ། ཐབས་མཁས་ཡེ་ཤེས། གཤིན་རྗེའི་གཤེད། སྟོབས་ལྡན་ཡེ་ཤེས། དབྱུག་སྔོན། མཁྱེན་ལྡན་ཡེ་ཤེས། རྣམ་པར་རྒྱལ་བ། བརྗིད་གནོན་ཡེ་ཤེས། ཧཱུྃ་ཀཱ་ར། མངོན་ཤེས་ཡེ་ཤེས། ཡཀྴ་ཧེ་རུ་ཀ །ཀུན་མཁྱེན་ཡེ་ཤེས། གུ་ཧྱ་ཧེ་རུ་ཀ །བྱམས་མགོན་ཡེ་ཤེས། ས་ནུ་ཧེ་རུ་ཀ །རྔམས་བརྗིད་ཡེ་ཤེས། རཀྴ་ཧེ་རུ་ཀ །སྤྲུལ་པའི་ཡེ་ཤེས། ཀརྨ་ཧེ་རུ་ཀ །ཆགས་མེད་ཡེ་ཤེས། པདྨ་ཧེ་རུ་ཀ །ཡིད་བཞིན་ཡེ་ཤེས། རཏྣ་ཧེ་རུ་ཀ །འབར་འཕྲོ་ཡེ་ཤེས། བུདྡྷ་ཧེ་རུ་ཀ །སྟོབས་ལྡན་ཡེ་ཤེས། བཛྲ་ཧེ་རུ་ཀ ཁྱབ་བདལ་ཡེ་ཤེས། ཆེ་མཆོག་ཧེ་རུ་ཀ །བྱང་ཆུབ་ཡེ་ཤེས་དབུ་ནི་རྟ་སྐད་ནམ་མཁའ་སྒྲོགས། །ཞེས་སོ། །དེ་ཡང་རྟགས་བསྟོད་ལས་ཏེ། ཨེ་མ་ཧོ་ཆེ་མཆོག་ཧེ་རུ་ཀ །ཉི་ཤུ་རྩ་གཅིག་དབུ་ནི་རྣམ་པ་ལྷུན་གྱིས་གྲུབ། །སྒྲིབ་སྦྱོང་ཡེ་ཤེས་དབུ་ནི་ཁྲོ་ཆེན་སྟོབས་པོ་ཆེ། །དང་པོ་རབ་ཏུ་དགའ་བའི་ས་མནན་པའོ། །ཞེས་སོགས་གསུངས་སོ། །འདི་དོན་དམ་ལ་དཔྱད་ན་ས་བཅུ་གསུམ་ཡན་ཆད་ནི་ལྡོག་ཆས་ཕྱེ་བ་ལས་གུད་ན་ཐོབ་ཏུ་མེད་པར་བཞེད་དོ། ། ༈

ཞབས་དྲུང་རིན་པོ་ཆེས། དམ་པའི་ཆོས་དང་ཚེ་འདིའི་མདུན་ཐབས་གཉིས། །ཟོང་དུ་བཀྲམ་ན་ཚེ་འདིའི་དོན་གཉེར་བར། །གཅིག་སེམས་སློབ་མའི་རྒྱུད་རེངས་ཐ་རྒོད་ལ། །སྨིན་གྲོལ་གདམས་པའི་ཆར་གྱིས་ཅི་ཞིག་ཕན། །ཅེས་གསུངས་པ་འདི་ལོས་བདེན། རྒྱལ་དབང་ལྔ་པ་ཆེན་པོས། སྔོན་དུས་ཆོས་རྒྱལ་ལོ་པཎ་ཆོས་ཕྱིར་དུ། །དཀའ་སྤྱད་བསམ་ཚེ་གསར་རྙིང་བསྟན་འཛིན་དེང་། །ཕལ་ཆེར་ཆོས་བརྒྱད་འཁོལ་བོར་འགྲན་པའི་བང་། །ཡངས་པོའི་གོམ་སྟབས་བྲེལ་ལ་མཆི་མ་དཀུ། །ལ་ལ་མཁས་བཙུན་གྲགས་འདོད་སྒྲོ་གདུགས་བསྒྲེངས། །འགའ་ཞིག་སྒོམ་ལྡན་བཟང་རྫུའི་མངལ་ཁུར་འཛིན། །མང་དག་འཇིག་རྟེན་ཕལ་སྤྱོད་དུག་རླངས་བརྟེན། །ཀྱེ་རྒྱུད་སྙིགས་དུས་རྨ་བྱའི་ཚུལ་འདིས་ཅི། །ཞེས་དང་། མཁའ་ལ་རྡོ་རྗེའི་རྭ་བའི་གུར་མ་ཞིག །ས་ལ་དཀྱིལ་འཁོར་ཆེན་པོའི་བཀྲག་མ་ཉམས། །བར་དུ་སྨན་རག་མཆོད་གཏོར་ངད་མ་ཡལ། །ལྷ་སྔགས་ཡེ་ཤེས་དཔལ་འབར་བཀྲ་ཤིས་ཤོག །ཅེས་གསུངས་སོ། །དགེའོ། །དགེའོ། །དགེའོ།། །། ༈

[edit]

rdor brag zhabs drung gi mdo dbang las/ rdor brag zhabs drung gi mdo dbang las/__de yang /__dbang gi ngo bo ni gdul bya'i rgyud byin gyis rlob nus pa'o/__/nges tshig ni theg pa rang rang gi lta sgom spyod pa la dbang ngo /__/dbye na/__yongs su 'dzin pa dge ba'i bshes gnyen gyi dbang /__chos bka' gtad pa pusti glegs bam gyi dbang /__ye shes lha'i dbang /__rig pa rtsal gyi dbang zhes bzhir phye na/__byang sems yan chad dbang dang po sbyor te/__so sor thar pa'i skabs/__bcom ldan 'das kyis tshur shog bka' stsal pa/__skra byi snam sbyar gyon pa'i lus ldan zhing /__/mod la dbang po rab zhi gnas gyur te/__/sangs rgyas dgongs pas lus gzugs bkab par gyur/__/ces gsungs pa ltar sangs rgyas kyi dgongs pas byin gyis brlabs pas dge slong gi dngos por dbang bskur ba lta bu'o/__/khyad par gsang sngags bla na med pa'i dbang la/__bum pa sogs bzhi dang /__de re re la'ang dbang lam lta ba grub mtha' 'da' kha'i rnal 'byor 'bras bu ste don drug gis 'chad pa ni/__dang po bum dbang la phyi phan pa'i dbang bcu dang /__nang nus pa'i dbang lnga'o/__/lam ni/__bshags rgyud las/__bskyed rim dbyibs kyi lam du ma shes bshags/__/zhes pas phung khams skye mched sbyong byed bskyed rim dbyibs kyi lam mo/__/gsum pa de lam du 'khyer byed lta ba ni/__ngo bo nyid gsum lta ba'i klong du bshags/__/zhes pas snang phyogs kyi ngo bo nyid gsum/__stong phyogs kyi ngo bo nyid gsum/__zung 'jug gi ngo bo nyid gsum/__bzhi pa de'i grub mtha' ni/__grub mtha' 'khor 'das dbyer med klong du bshags/__/zhes so/__/lnga pa 'da' ba ni/__snang ba bsgyur ba dang /__'od kyi gong bu dang /__sgra'i 'pho ba ste/__ma rtogs 'chi dus snang ba bsgyur ba dang /__/'od kyi gong bu sgra yis 'pho ma shes/_/zhes so/__/drug pa 'bras bu ni sprul pa'i sku 'grub par byed de/__lus kyi rtsa yi gtso bo phal ba rnams/__/ye nas sprul skur gnas pa ma shes te/__/dbyibs kyi lha sku rang gsal bsgom ma shes/__/sprul sku rang bzhin lhun grub 'bras bur bshags/__/zhes so/__/de bzhin gsang dbang la yang /__rdzas byang chub sems kyi dkyil 'khor du dbang ni/__yab dang yum dang gnyis ka las thob pa sogs dngos sam thabs dang brdas bskur/__lam bdag byin rlabs pa'i rim pa 'khor lo la brten pa dang ma brten pa'i rdzogs rim zab mo ste/__'khor lo brten dang ma brten man ngag gnad/__/bde ba nyams su len pa'i lam ma bsgoms/__/bdag la byin rlabs lam gyi ngang du bshags/__/zhes so/__/lta ba nyon mongs rang byung /__rnam rtog rang byung /__sbrel bzhi rang byung /__gsal zhing yang ba'i rang byung ste rang byung gi ye shes bzhi/__nyon mongs dang ni rnam rtog sbrel bzhi ste/__/gsal zhing yangs pa'i rang byung ye shes gnas/__/lta ba rang byung ye shes/__/zhes sogs so/__/grub mtha' ma 'dres yongs rdzogs ngang du bshags/__/zhes so/__/'da' kha'i rnal 'byor 'od gsal te/__/'da' kha'i gdams ngag 'od gsal ngang du bshags/__/zhes so/__/'bras bu ngag gi rtsa yi ge'i dri ma dag ste longs spyod rdzogs pa'i sku 'grub par byed de/__'bras bu longs spyod rdzogs sku'i ngang du bshags/__/zhes so/__/dbang gsum pa ni/__dngos sam ye shes kyi phyag rgya b+ha ga'i dkyil 'khor du shes rab ye shes kyi dbang /__lam myur mgyogs pho nya'i lam ste thabs lam lhan skyes ye shes te/__yum bdag 'dod pa'i byin rlabs mnyam pa la/__/'khor lo thabs kyi lam du=__zhes sogs kyis lta ba bstan/__grub mtha' bde stong rgya chung ba ste/__bde stong rgya chung grub mtha' ma rtogs pa/___/zhes sogs grub mtha' dang /__'da' kha rdo rje sems dpa'i ngang du bshags/__/zhes lam dang /__bden bzhi lta ba lhan skyes ngang du bshags/__/'chi kha'i rnal 'byor nam 'chi ba'i tshe rdo rje sems dpa' 'byon par 'gyur pa/__bgrod byed thabs des yid khams bdud rtsi'i dri ma sbyangs te 'bras bu chos sku 'grub ste/__'bras bu chos kyi sku yi sogs/__dbang bzhi pa ni/__don dam byang chub sems kyi dkyil 'khor du dbang bzhi pa rig pa rtsal gyi dbang /__de'i lam ro rkyang dbu gsum rdo rje'i rba rlabs te/__rdo rje'i rba rlabs lam gsum ngang du bshags/__/zhes so/__/lta ba chos thams cad shin tu rnam par dag pa ste/__lta ba chos rnams rnam dag ngang du bshags/__/zhes sogs so/__/grub mtha' bde stong rgya che ba ste/__bde stong rgya che'i grub mtha'/__zhes sogs so/__/'da' kha'i rnal 'byor phyag rgya chen po ste/__/'da' kha phyag rgya chen po'i ngang du bshags/__/zhes so/__/bgrod byed kyi thabs des ye shes rlung gi dri ma sbyangs te/__'bras bu ngo bo nyid sku thob par 'gyur te/__'bras bu ngo bo nyid kyi sku ru=_zhes sogs so/__/de ltar dbang bzhi po de skur byed kyi bla ma yang bzhir nges te/__bshags rgyud gleng gzhir/__lam la gnas pa'i bla ma dam pa ni bzhi zhig yod de/__/zhes sogs gsungs pa ltar/__sgro 'dogs gcod byed kyi bla mas bum dbang /__ye shes ston byed kyi gsang dbang /__lhan skyes ston byed kyi gsum pa/__de nyid ston byed kyi bzhi pa rnams so/__/de lta bu'i bla ma dam pa des gdul bya'i rgyud la brtags te sdug bsngal gsum gyi mtshangs bstan pa ma dag pa'i snang ba/__lam sgom pa'i rnal 'byor gyi thabs bstan pa las byung ba'i nyams kyi snang ba/__lam des 'bras bu grub tshul la spro ba bskyed pa dag pa'i snang ba gsum gyis rgyud sbyangs/__kun gzhi rgyu rgyud kyis lta ba gtan la phab/__lus thabs kyi rgyud dbang bzhi'i lam gyis sbyangs/__phyag rgya chen po 'bras bu'i rgyud rang byung lhun grub tu ngo sprad/__de dag kyang rgyu lam 'bras bu'i rnal 'byor gsum gyis bsdus te/__mdor na de dag kyang bla ma'i snyan brgyud tshad ma gdams ngag la sel med pa dang /__de nyid nyams myong tshad mas gtan la 'bebs pa dang /__de la nges shes skye phyir rtogs brjod dang lo rgyus tshad ma dang sbyar ba dang /__rgol ba ngan pa'i klan ka'i dri ma med pa'i phyir/__mdo rgyud kyi bka'i lung tshad ma ste dbang bzhi'i chu bo ma nub pa'i dbang rig 'dzin brgyud pa'i byin rlabs kyi brgyud pa ma nyams pa de nyid gdams ngag gi sna kha ma log par gdul bya'i mos gus kyis bsam pa tshim par byas te phyi nang gsang gsum gyi rten 'brel yang dag par bsgrigs la/__lta sgom spyod gsum gyi sgo nas gsang sngags kyi lam bzang por 'jug pa'i tshul legs par 'chad pa shin tu 'thad de/__dri med bshags rgyud las/__khyad par du yang ma dag pa'i snang ba dang /__sogs nas/__spyod pa la dor nas gsang sngags pa'i lam la zhugs/__zhes pa'i bar gsungs pa'i phyir ro/__/'di dag he ru ka galpo'i tan+t+ra dang bstun te 'chad na lam 'bras bu dang bcas pa'i gzhung yang dag pa gcig 'byung ngo /___/__!_ theg dgu'i dbang ni/__ji skad du/__yo ga la sogs theg drug la/__/phyi rgyud dbang ni chu bos bya/___/bskyed pa ma hA yo ga la/__/nang dbang 'byung pa'i chu bos bya/__/rdzogs pa a nu yo ga la/__/sgrub dbang grags pa'i chu bos bya/__/rdzogs chen a ti yo ga la/__/gsang dbang rdzogs pa'i chu bos bya/__/zhes so/__de dag gi tshe bsrung bya'i dam tshig ni/__spyir rtsa ba'i ltung ba bcu gnyis dang /__yan lag gi dam tshig sbom po brgyad/__khyad par snga 'gyur gyi ring srol la/__rtsa ba'i bla ma'i sku gsung thugs kyi dam tshig la dgur phye ba'i nyi shu rtsa bdun/__khyad par du spyad par bya ba/__mi spong ba/__mi 'dor ba/__shes par bya ba/__bsgrub par bya ba ste rtsa ba yan lag gi dam tshig nyi shu rtsa lnga/__de dag kyang bsdu na/__mdor na rang lus rdo rje gsum shes na/__/sngags kyi dam tshig sa ya 'bum sde 'dus/__/zhes so/__/khyad par du/__lam rim las/__mnyam rjes bza' bca' bsrung ba'i dam lnga dpog__/ces gsungs pa ltar don tshan nyi shu dang /__de dag nyams chag 'byung tshul ni/__thos bsam ma byas pa'i skyon ltung mtshams mi shes pa dang /__bla ma dang lha sogs la mi gus pa dang /__bag med par spyod pa dang /__nyon mongs pa rnams ni ltung ba 'byung ba'i sgo bzhi zhes bya ba yin la/__de dag gi gnyen por/__mdo rgyud la thos bsam gyis sgro 'dogs bcad de slob ngos rnams la slob pa dang /__kun la dag snang dang gus pa bskyes pa dang /__rtag par dran pa dang shes bzhin gyi gnyen por bsten pa dang /__rang rgyud la nyon mongs pa gang shugs che ba de'i gnyen por 'bad pas bslab pa'o/__/gong gi bzhi steng brjed ngas che ba dang /__dran pa mi gsal ba gnyis bsnan pa la dam tshig nyams pa'i rgyu drug ces bshad/__rgyu de dag la brten nas dam tshig nyams min nyin mtshan dus drug tu rang rgyud la legs par brtags pas thun gyi drug cha las 'das na thun tshod las 'das pa dang /__zhag gcig las 'das na 'gal ba/__zla ba gcig las 'das na nyams pa/__lo gcig las 'das na 'das pa/__lo gnyis las 'das na ral ba rnams so/__/'on kyang dri med bshags rgyud gleng gzhi ltar sngags kyi dam tshig gser dngul zhom pa bzhin gsor rung bar gsungs pas/__de yang snying thag pa nas 'gyod sems kyis bshags na gsor rung zhing /__thun zhag zla lo sogs rim gyis nyes pa lci ru 'gro/__lo gsum 'das par gyur na de dag kyang gsor mi rung bas tshe 'dir yid du mi 'ong ba'i sdug bsngal sna tshogs kyis nyam thag par 'gyur te tshe 'di'i snang ba nub ma thag rdo rje'i dmyal ba zhes nam yang thon par mi nus shing sdug bsngal mi zad pa myong bar 'gyur ro/__/bye brag tu thun tshod las 'das na de ma thag gsor rung zhing /__zhag las 'gal na tshogs 'khor brgya phrag gis gso/__nyams na rang la gang yod kyi bdog pa'i dngos po thams cad kyis bkang la gso/__lo gcig las 'das na bu dang chung ma nor dbyig ste gces pa rnams kyang gtong nas gso/__lo gnyis 'das na rang gi rang srog kyang phongs med du gtong /__gzhan yang snying po rgyan las gsungs pa ltar tshogs zhing la bshags pa dang /__badz+ra b+han+d+ha tra tha sogs bral ba'i sngags rgya dang /__khrus dang /__gtum mo'i mes bsreg pa/__mi dmigs par bsgom pa/__lam dus su thun bzhi'am drug tu blang pa/__'dus thogs su mi 'thol bar zhu ba/__rten khyad 'phags drung du skad gsang mthon pos sgreng ba/__maN+Dal 'bul ba/__sku gsung thugs kyi mchod rten bzhengs pa/__za byed mkha' 'gro'i rnal 'byor gyis me la sbyong ba/__phyi nang gsang ba'i gtor ma btang ba/__gsang sngags bzla zhing bsam gtan bsgom pa/__mi phyugs kyi srog skyob pa/__rgyal ba'i gsung rabs klog pa/__bla ma'i drung ngam rang nyid kyis dkyil 'khor bzhengs la bdag 'jug blang ba/__yig brgya dus bzang la bzla ba/__phung po gsum pa'i mdo 'don pa/__rdor sems sgyu drwa dang bla ma sogs las gsungs pa'i phra thig gi rnal 'byor bsgom pa/__glang chen rab 'bogs kyi rgyud las gsungs pa'i rnal 'byor spyi khrus sam/__dong sprugs rgyun 'don sogs bshags pa'i thabs sna tshogs kyis nyes ltung dang zhag gcig kyang mi 'grogs pa gnad du che zhing /__bshags nas slar bsrung ngo /__/de ltar mnyams pa kho nas tshe 'di 'am/__'chi kha bar do'am/__tha na skye ba bcu drug nas phyag rgya chen po mchog gi dngos grub thob cing gnas skabs su'ang thun mong gi dngos grub/__grub chen brgyad/__dbang phyug gi yon tan brgyad sogs thams cad lhun gyis grub par 'gyur ba lags so/___/__!_ sa nyer gcig ni/__dang po rab tu dga' ba/__dri ma med pa/__'od byed pa/__'od 'phro ba/_____sbyang dka' ba/__mngon du gyur pa/__ring du song ba/__mi g.yo ba/__legs pa'i blo gros/__chos kyi sprin/__kun tu 'od/__rdo rje 'dzin pa/__rdo rje 'chang /__stug po bkod/__pad+ma can/__'khor lo tshogs chen/__kun bzang dbyer med/__rdzogs pa bla ma/__srid gsum ngang rdzogs/__ye shes bla ma'o/__/de dag ye shes nyer gcig dang sbyar tshul/__sgrib sbyong ye shes/__stobs chen/__skyon med ye shes/__khams gsum rnam rgyal/__bdud 'joms ye shes/__bdud rtsi 'khyil ba/__rtogs 'joms ye shes/__'dod rgyal/__gzir mnan ye shes/__rta mchog__rnam dag ye shes/__mi g.yo/__thabs mkhas ye shes/__gshin rje'i gshed/__stobs ldan ye shes/__dbyug sngon/__mkhyen ldan ye shes/__rnam par rgyal ba/__brjid gnon ye shes/__hU~M kA ra/__mngon shes ye shes/__yak+sha he ru ka__/kun mkhyen ye shes/__gu h+ya he ru ka__/byams mgon ye shes/__sa nu he ru ka__/rngams brjid ye shes/__rak+sha he ru ka__/sprul pa'i ye shes/__karma he ru ka__/chags med ye shes/__pad+ma he ru ka__/yid bzhin ye shes/__rat+na he ru ka__/'bar 'phro ye shes/__bud+d+ha he ru ka__/stobs ldan ye shes/__badz+ra he ru ka__khyab bdal ye shes/__che mchog he ru ka__/byang chub ye shes dbu ni rta skad nam mkha' sgrogs/__/zhes so/__/de yang rtags bstod las te/__e ma ho che mchog he ru ka__/nyi shu rtsa gcig dbu ni rnam pa lhun gyis grub/__/sgrib sbyong ye shes dbu ni khro chen stobs po che/__/dang po rab tu dga' ba'i sa mnan pa'o/__/zhes sogs gsungs so/__/'di don dam la dpyad na sa bcu gsum yan chad ni ldog chas phye ba las gud na thob tu med par bzhed do/___/__!_ zhabs drung rin po ches/__dam pa'i chos dang tshe 'di'i mdun thabs gnyis/__/zong du bkram na tshe 'di'i don gnyer bar/__/gcig sems slob ma'i rgyud rengs tha rgod la/__/smin grol gdams pa'i char gyis ci zhig phan/__/ces gsungs pa 'di los bden/__rgyal dbang lnga pa chen pos/__sngon dus chos rgyal lo paN chos phyir du/__/dka' spyad bsam tshe gsar rnying bstan 'dzin deng /__/phal cher chos brgyad 'khol bor 'gran pa'i bang /__/yangs po'i gom stabs brel la mchi ma dku/__/la la mkhas btsun grags 'dod sgro gdugs bsgrengs/__/'ga' zhig sgom ldan bzang rdzu'i mngal khur 'dzin/__/mang dag 'jig rten phal spyod dug rlangs brten/__/kye rgyud snyigs dus rma bya'i tshul 'dis ci/__/zhes dang /__mkha' la rdo rje'i rwa ba'i gur ma zhig__/sa la dkyil 'khor chen po'i bkrag ma nyams/__/bar du sman rag mchod gtor ngad ma yal/_/lha sngags ye shes dpal 'bar bkra shis shog_/ces gsungs so/__/dge'o/__/dge'o/__/dge'o//___//_!