JKCL-KABUM-08-NYA-011-030-wylie

!_zhal gdams nyung bsdus bzhugs/__bla ma'i zhabs la phyag 'tshal nas/__/gang zhig rnyed dka'i lus 'di ni/__/phyis nas yang yang thob pa dka'/__/nor bu lag tu rnyed pa nas/__/gyi nar bor rnams blo re 'khrul/__/de nas 'di nyid 'jig par sla/__/mi rtag tshul la nges shes bskyed/__/las 'bras blang dor la brtson zhing /__/'khor ba'i nyes dmigs dran par bya/__/gsum la skyabs su 'gro ba dang /__/gzhan phan bsam pa rtag tu bya/__/rtag tu rang gi sems la lta/__/sems dge 'gyur na nyes pa med/__/gal te bsam pa mi dge na/__/sbyor ba legs par ltar snang yang /__/rang gzhan thams cad bslu ba'i rgyu/__/de yis nyes pa dpag tu med/__/de phyir dran dang shes bzhin dang /__/bag yod ces pa gsum po des/__/rang sems 'dul ba shin tu gces/__/sbyin sogs byang chub spyod pa la/__/zhen pa med pa shin tu gces/__/gang dag dmigs pa'i 'du shes can/__/byang chub spyod las ring du gol/__/chos kun rang bzhin stong pa nyid/__/stong nyid spros dang bral ba la/__/yid dpyod mtshan mas ma bcos par/__/nam mkha' lta bu'i ngang la bzhag/__de yi rtsa ba bla ma la/__/mos gus gnad du bsnun pa dang /__/bsam sbyor rgya cher 'bad pa yi/__/dang po don spyi'i tshul mthong yang /__/de nas mngon sum rtogs par 'gyur/__/skabs su snying rje drag tu bsgom/__/snang ba'i bden zhen yang yang sbyong /__/sgyu ma lta bu'i spyod pa brtsams/__/des ni lam gyi bogs thon 'gyur/__/de skad gdams pa nyung ngu 'di/__/a ra pa tsas bskul ba'i ngor/__/'jam dbyangs blo gros rgya mtshos sbyar/__/dge bas kun mkhyen mchog thob shog/__/