JKCL-KABUM-08-NYA-011-035

🚧 This website is under continued development. We appreciate your patience!

Previous Text Back to Volume PageNext Text

ཞལ་གདམས་ལམ་རིམ་ཕན་བདེའི་སྙིང་པོ།

Wylie title	zhal gdams lam rim phan bde'i snying po
Location	chos kyi blo gros bka' 'bum Volume 8, sde tshan 11, Text 35, Pages 377-383 (Folios 47a5 to 50a6)
Author	འཇམ་དབྱངས་མཁྱེན་བརྩེ་ཆོས་ཀྱི་བློ་གྲོས་
Less details More details
Citation	'jam dbyangs mkhyen brtse chos kyi blo gros. zhal gdams lam rim phan bde'i snying po. In Rdzong sar mkhyen brtse 'jam dbyangs chos kyi blo gros kyi gsung 'bum, Vol. 8: 377-383. Bir, H.P.: Khyentse Labrang, 2012.
Genre	Advice - zhal gdams
Colophon	།དེ་སྐད་གདམས་པའི་རིམ་པ་ཉུང་ངུ་འདི། །རང་གིས་ཉམས་སུ་བླངས་པ་མ་ལགས་ཀྱང་། །དམ་པའི་དྲིན་གྱིས་ལེགས་པར་ཐོས་པ་ལས། །ཆ་ཤས་ཙམ་བླངས་ཡི་གེར་བཀོད་པ་འདི། །པདྨ་སྐལ་ལྡན་བསྐུལ་ངོ་མི་ལྕོགས་སླད། །ཆོས་ཀྱི་བློ་གྲོས་ཞེས་བྱའི་བན་ཧྲུལ་དེས། །སྨྲས་རིམ་བཞིན་དུ་ཡི་གེར་བཀོད་པ་པོ། །ཚེ་རིང་བཀྲ་ཤིས་ཞེས་བྱས་བྲིས་པའི་དགེས། །མ་གྱུར་འགྲོ་བ་སེམས་ཅན་མ་ལུས་ཀུན། །རྣས་གྲོལ་མཆོག་ལ་རིམ་གྱིས་འགོད་པ་དང་། །ཁམས་གསུམ་སྲིད་པའི་གྲོང་ཁྱེར་སྟོང་བྱས་ཏེ། །རྒྱལ་བའི་དབང་པོའི་གོ་འཕང་ཐོབ་པར་ཤོག། སརྦ་མངྒ་ལཾ།
	/de skad gdams pa'i rim pa nyung ngu 'di/__/rang gis nyams su blangs pa ma lags kyang /__/dam pa'i drin gyis legs par thos pa las/__/cha shas tsam blangs yi ger bkod pa 'di/__/pad+ma skal ldan bskul ngo mi lcogs slad/__/chos kyi blo gros zhes bya'i ban hrul des/__/smras rim bzhin du yi ger bkod pa po/__/tshe ring bkra shis zhes byas bris pa'i dges/__/ma gyur 'gro ba sems can ma lus kun/__/rnas grol mchog la rim gyis 'god pa dang /__/khams gsum srid pa'i grong khyer stong byas te/__/rgyal ba'i dbang po'i go 'phang thob par shog/__sarba mang+ga laM/

1 Texts in this Section (sde tshan or chos tshan)

35 377-383	ཞལ་གདམས་ལམ་རིམ་ཕན་བདེའི་སྙིང་པོ། zhal gdams lam rim phan bde'i snying po Advice - zhal gdams	Text page View PDF
	[[|འཇམ་དབྱངས་མཁྱེན་བརྩེ་ཆོས་ཀྱི་བློ་གྲོས་ ()]]

Tibetan Text

Wylie

[edit]

༈ ཞལ་གདམས་ལམ་རིམ་ཕན་བདེའི་སྙིང་པོ་ཞེས་བྱ་བ་བཞུགས་སོ། །ན་མོ་གུ་རུ། སྐྱབས་གནས་ཀུན་འདུས་དཔལ་ལྡན་བླ་མ་ནི། །དྲན་པ་ཙམ་གྱིས་སྲིད་ཞིའི་འཇིགས་འཕྲོག་པའི། །གསང་གསུམ་ཡིད་ཀྱི་ཟེའུ་འབྲུར་བཀོད་བྱས་ནས། །ཞལ་གདམས་ལམ་རིམ་ཕན་བདེའི་སྙིང་པོ་དབྱེ། །དལ་དང་འབྱོར་པའི་ལུས་འདི་རྙེད་དཀའ་ཞིང་། །རྙེད་ན་དོན་ཆེ་ཡིད་བཞིན་ནོར་དང་མཚུངས། །ད་རེས་སྟོང་ལོག་ཆུད་ཟོས་མི་བྱེད་པར། །མྱུར་བ་ཉིད་དུ་དམ་པའི་ལྷ་ཆོས་མཛོད། །སྣོད་ཀྱི་འཇིག་རྟེན་རི་གླིང་བཅས་པར་ཡང་། །ནམ་ཞིག་མི་རྟག་ཐལ་བ་རླུང་ཁྱེར་འདྲ། །ཚངས་དང་བརྒྱ་བྱིན་འཁོར་ལོས་བསྒྱུར་རྣམས་ཀྱང་། །སྐྱེ་འཆི་འཕོས་པའི་མཚང་ཆེན་དེ་ལ་སོམས། །རྡོ་རྗེའི་སྐུ་བརྙེས་སངས་རྒྱས་བྱང་སེམས་ཡང་། །སྒྱུ་མའི་གཟུགས་སྐུ་བཤིགས་པའི་ཚུལ་བསྟན་ན། །ཆུ་བུར་ལྟ་བུ་སྐྱེ་འགྲོའི་ལུས་ཅན་རྣམས། །མྱུར་དུ་མི་རྟག་འཆི་བས་འཇིགས་པར་ངེས། །བསགས་པའི་ལས་ནི་ནམ་ཡང་ཆུད་མི་ཟ། །མ་བྱས་པ་དང་འཕྲད་པར་མི་འགྱུར་ཞིང་། །རྒྱུ་འབྲས་མི་འཆོལ་རང་ཐོག་སྨིན་ངེས་པས། །དགེ་སྡིག་སྤང་བླང་བརྩོན་པ་ཤིན་ཏུ་གཅེས། །སྲིད་གསུམ་གྲངས་ཁྱེར་མེ་ཡི་འོབས་ཆེན་པོར། །ཤིན་ཏུ་བཟོད་དཀའི་སྡུག་བསྔལ་ཕུང་པོ་ལ། །བརྩོན་རར་ཆུད་པའི་འགྲོ་བ་ཇི་བཞིན་དུ། །ངེས་འབྱུང་སྐྱོ་ཤས་གཏིང་ནས་བསྒོམ་པར་མཛོད། །ཐར་པའི་གྲོང་ཁྱེར་འཆི་མེད་ཁང་བཟང་ནི། །ཉམས་དགའ་བཀོད་ལེགས་ཡིད་འོངས་ཕུན་སུམ་ཚོགས། །བྱང་ཆུབ་ཕྱོགས་ཆོས་རྒྱན་གྱིས་མཛེས་པ་དེ། །ཐོབ་ལ་དད་སྤྲོ་དགའ་བ་རྒྱ་ཆེན་བསྐྱེད། །དེ་ཉིད་ཐོབ་བྱེད་རང་གི་སྟོབས་མིན་ཏེ། །གཞན་རྐྱེན་དགེ་བའི་བཤེས་ལ་རག་ལས་པས། །བྱང་ཆུབ་སེམས་དང་རྟོགས་པའི་གདིང་ལྡན་ཅིང་། །མཁྱེན་གཉིས་ཡེ་ཤེས་ལྡན་ལ་བརྟེན་པར་གཅེས། །ཐར་པའི་འཇུག་སྒོ་བླ་མ་མཆོག་གསུམ་ལ། །དང་འདོད་ཡིད་ཆེས་དད་མོས་བརྟན་པོ་ཡི། །དད་གསུམ་གུས་པའི་མངོན་རྟགས་ངོམས་བཞིན་དུ། །ཡིད་ཆེས་བརྟན་པོས་སྐྱབས་སུ་འགྲོ་བར་བྱ། །ཐེག་ཆེན་ལམ་གྱི་རྩ་བ་བྱང་ཆུབ་སེམས། །འདི་ལ་བརྟེན་པས་མྱ་ངན་འདས་པ་ཐོབ། །རྒྱལ་བ་ཀུན་གྱི་བགྲོད་པ་གཅིག་པའི་ལམ། །རིན་ཆེན་བྱང་ཆུབ་སེམས་ལ་བློ་བརྟན་བྱ། །བྱམས་སོགས་ཚད་མེད་བཞི་ལ་བློ་སྦྱང་ཞིང་། །གཞན་ཕན་ལྷག་པའི་བསམ་པ་བཟང་པོ་ལ། །གཡོ་སྒྱུ་ཟོལ་ཟོག་རང་འདོད་མེད་པ་ཡིས། །ལུས་དང་ལོངས་སྤྱོད་དགེ་བའི་དངོས་རྣམས་སྦྱིན། །ཕ་རོལ་ཕྱིན་དྲུག་བསྡུ་དངོས་བཞི་ལ་སོགས། །བྱང་ཆུབ་སྤྱོད་པ་རྒྱ་མཚོར་བརྩོན་བྱས་ཤིང་། །བྱང་སའི་ཚུལ་ཁྲིམས་གསུམ་ལ་རབ་བརྩོན་ཏེ། །རང་གཞན་དོན་གཉིས་ལྷུན་གྱིས་གྲུབ་པར་མཛོད། །དྲི་མེད་སེམས་ཀྱི་རང་བཞིན་འོད་གསལ་བར། །སྒྲིབ་བྱེད་ཉེས་ལྟུང་དྲི་མའི་ཚོགས་རྣམས་ཀུན། །སྟོབས་བཞིའི་གངྒཱའི་ཆུ་རྒྱུན་གྱིས་འཁྲུད་པས། །སྒོ་གསུམ་ཤིན་ཏུ་རྣམ་པར་དག་པ་གཅེས། །ཚོགས་གཉིས་རིན་ཆེན་མ་དྲོས་རྒྱ་མཚོའི་རྡུལ། །རྣམ་པར་བསགས་ཏེ་དཔལ་གྱི་ལྷུན་པོར་བསྐྲུན། །རྣམ་གྲོལ་སྐུ་བཞིའི་བང་རིམ་མཛེས་པ་ཡི། །བྱང་ཆུབ་ཡོན་ཏན་སྤེལ་བའི་ཐབས་ལ་འབད། །དངོས་གྲུབ་ཀུན་གྱི་རྩ་བ་བླ་མ་རྗེ། །བྱིན་རླབས་རྒྱ་མཚོའི་འབྱུང་གནས་རིགས་བརྒྱའི་བདག། སྐུ་བཞིའི་དེད་དཔོན་སྲིད་ཞིའི་དཔལ་མགོན་ཆེ། །ཆོས་ཀྱི་རྒྱལ་པོའི་ཞབས་སེན་སྤྱི་བོས་བསྙེན། །བསྙེན་ན་བདེ་ཞིང་འབྲལ་བར་དཀའ་བ་ཡི། །དད་མོས་གདུང་བ་དྲག་པོ་ཕུར་ཚུགས་ཀྱི། །གསོལ་བ་སྙིང་གི་དཀྱིལ་ནས་བཏབ་བྱས་ན། །མཆོག་ཐུན་དངོས་གྲུབ་འབད་མེད་སྩོལ་བར་ངེས། །དད་དང་དམ་ཚིག་བརྟན་པོའི་ས་གཞི་ལ། །སྨིན་བྱེད་དབང་བཞིའི་ཆར་གྱིས་རླན་པ་ལས། །སྐུ་དང་ཡེ་ཤེས་གསེར་གྱི་སྙེ་མ་སྨིན། །སྲིད་ཞིར་མི་གནས་རྡོ་རྗེ་འཆང་ཐོབ་འགྱུར། །དེ་ཕྱིར་བླ་མ་ཡིད་བཞིན་ནོར་བུའི་ཞལ། །སྙིང་ག་སྤྱི་བོར་རྟག་ཏུ་བསྒོམ་བྱས་ཏེ། །གསོལ་བ་བཏབ་ཅིང་དབང་བཞི་བླང་བ་དང་། །ཐུགས་ཡིད་བསྲེ་བ་ཉམས་ལེན་སྙིང་པོ་ཡིན། །འཁོར་འདས་ཆོས་ཀུན་གདོད་ནས་རྣམ་པར་དག། ཅིར་ཡང་མ་ཡིན་ཅིར་ཡང་འབྱུང་བའི་གཞི། །འཁོར་དང་མྱ་ངན་འདས་པ་ཀུན་འཕྲོ་བས། །རིག་ཁམས་བདེ་བར་གཤེགས་པའི་སྙིང་པོ་ལ། །སྦྱོང་བྱེད་ལམ་གྱི་རིམ་པ་རྣམ་པ་བཞིས། །སྦྱང་བྱ་དཀྱིལ་འཁོར་བཞི་ཡི་དྲི་མ་འཁྲུད། །སྦྱངས་འབྲས་སྐུ་བཞི་མངོན་དུ་བྱེད་པ་འདི། །རྡོ་རྗེ་ཐེག་པའི་ལམ་གྱི་རིམ་པའོ། །མཚན་ཉིད་ཀུན་ལྡན་རྡོ་རྗེ་སློབ་དཔོན་ལས། །རྣམ་དག་དབང་གི་ཆུ་བོས་ལེགས་སྨིན་ཏེ། །རྒྱལ་བས་བསྔགས་པའི་དབེན་གནས་ཉམས་དགའ་བར། །བརྟེན་ནས་ལུས་སེམས་ཤིན་ཏུ་སྦྱང་བར་བྱ། །ཐ་མལ་སྣང་ཞེན་འཁྲུལ་པ་ཡུལ་དང་བཅས། །རང་གི་སེམས་ཀྱི་ཆོ་འཕྲུལ་ཤེས་བྱས་ཏེ། །མ་དག་ཐ་མལ་སྣང་བ་སྦྱོང་བྱེད་ཀྱི། །ལམ་བྱེད་རྣམ་བཞིའི་བསྐྱེད་རིམ་བསྒོམ་ལ་བརྩོན། །གཞི་གནས་རྩ་རླུང་ཐིག་ལེའི་སྙིགས་མ་རྣམས། །དག་བྱེད་རླུང་དང་གཏུམ་མོའི་རྣལ་འབྱོར་གྱིས། །དབུ་མའི་ཁ་དབྱེ་འབར་འཛགས་དྲངས་པ་ཡི། །ཞུ་བདེ་ལྷན་སྐྱེས་དཔེ་ཡི་ཡེ་ཤེས་ནི། །མངོན་སུམ་འདྲེན་པས་རང་ལུས་ཐབས་ལྡན་བསྒྲུབས། །དེ་ལ་གོམས་དང་ཡེ་ཤེས་དྲོད་སྐྱེ་བས། །བརྟུལ་ཞུགས་སྤྱོད་པས་བོགས་འདོན་བསྒྲུབ་པའི་སླད། །ཕྱག་རྒྱ་བཞི་ཡི་དམ་ཚིག་བརྟེན་པ་དང་། །ཁྱད་པར་དངོས་རིག་ཉེ་རྒྱུའི་གྲོགས་བྱས་ཏེ། །རྩ་ཡི་མདུད་གྲོལ་རླུང་སེམས་དབུ་མར་བསྡམས། །རྣམ་བཅས་བདེ་ཆེན་ཡེ་ཤེས་ཐིག་ལེ་ནི། །རབ་ཏུ་འཕེལ་བས་མཆོག་ཏུ་མི་འགྱུར་བའི། །ཡེ་ཤེས་དྭངས་མའི་ཐིག་ལེ་གཙུག་ཏོར་བརྟན། །རྣམ་མེད་ཏིང་འཛིན་དེ་ཉིད་སྤྲོས་དང་བྲལ། །དོན་གྱི་ལྷན་སྐྱེས་ཇི་བཞིན་རྒྱུད་ལ་སྐྱེ། །ཁྱབ་བདག་ནམ་མཁའ་རང་བྱུང་ཡེ་ཤེས་བདག། རྩ་རླུང་ཐིག་ལེའི་འགྲོས་རྣམས་ཐིམ་པ་དང་། །འོད་གསལ་དབུ་མའི་ཁང་བཟང་ཉམས་དགའ་བར། །སྣ་ཚོགས་ཆོས་ཀུན་རོ་གཅིག་ཆེན་པོར་སྡོམས། །བདེ་སྟོང་འགྱུར་མེད་རྡོ་རྗེའི་སྐུ་ཐོབ་འགྱུར། །ཤིན་ཏུ་རྣམ་པར་དག་པའི་ཡེ་ཤེས་ཆེ། །ཕོ་ཉའི་ལམ་ལ་བརྟེན་པ་མེད་པར་ཡང་། །རང་གནས་སྐུ་དང་ཡེ་ཤེས་མངོན་བྱེད་པ། །འོད་གསལ་རྫོགས་པ་ཆེན་པོའི་ལམ་འདི་མཆོག། ཡིད་དཔྱོད་སྒྲིབ་པའི་དྲི་མས་བསླད་མིན་པར། །རང་རིག་ཀ་དག་སྤྲོས་པ་བྲལ་བ་ལ། །བླ་མའི་དྲིན་གྱིས་ངོ་ཤེས་ཐག་ཆོད་ཅིང་། །རིག་སྟོང་གཉུག་མ་ཆུ་བོའི་རྒྱུན་བཞིན་བསྐྱངས། །དེ་ཡང་ཅི་ཤར་ཅི་སྣང་གཟུངས་འཛིན་གྱི། །རྟོག་པའི་ཆོས་རྣམས་རིག་པའི་རང་གཤིས་སུ། །ཤར་ཙམ་ཉིད་ནས་གྲོལ་བའི་གནད་དམ་པ། །འདི་ནི་སེམས་དོན་སྐྱོང་ལ་ཤིན་ཏུ་གཅེས། །ཡངས་བ་མེད་ཅིང་བསྒོམ་བྱ་སྒོམ་བྱེད་མེད། །ཐ་མལ་བློ་འདས་སྡོད་ཅིང་གུ་ཡངས་སུ། །ཆོས་ཀུན་ཀ་དག་ཀློང་ཡངས་ཆེན་པོའི་གཤིས། །གཏད་མེད་ཕྱམ་གདལ་ཆེན་པོར་ཐོངས་ལ་ཤོག། གང་དུའང་མ་སྤངས་གང་ཡང་མ་བསྒྱུར་ཞིང་། །ཆོས་ཀུན་ཀ་ནས་དག་པའི་ཀློང་ཆེན་པོར། །རང་བབས་དགོངས་པའི་བཙན་ས་ཟིན་པ་ན། །སངས་རྒྱས་ཆོས་སྐུ་རང་ལ་རྙེད་པར་འགྱུར། །དེ་ཡི་བོགས་འབྱིན་ལྷུན་གྲུབ་ཐོད་རྒལ་གྱི། །སྒྲོན་མ་བཞི་ཡི་གནད་དུ་བསྣུན་པ་ན། །སྐུ་གསུམ་ལམ་ལྷངས་ཡོན་ཏན་རྩལ་རྫོགས་ཏེ། །ཚེ་འདི་ཉིད་དམ་བར་དོར་གྲོལ་བར་ངེས། །མདོར་ན་དད་དང་དམ་ཚིག་རྣམ་པར་དག། མོས་གུས་ལམ་གྱི་སྲོག་ཏུ་བཟུང་བྱས་ཏེ། །བླ་མ་བསྒོམ་ཞིང་རིག་ངོ་སྐྱོང་བ་ཡིས། །ཐུན་དང་ཐུན་མཚམས་ཐམས་ཅད་འདའ་བར་མཛོད། །དེ་ལྟར་བརྩོན་པས་ལམ་གྱི་འབྲས་བུ་ནི། །གཞི་གནས་སྐུ་དང་ཡེ་ཤེས་རྒྱ་མཚོའི་ཚོགས། །དཀའ་བ་མེད་པར་མྱུར་དུ་ཐོབ་པ་དང་། །འགྲོ་སྒྲོལ་སླད་དུ་ཕྲིན་ལས་རྟག་ཁྱབ་འགྱུར། །དེ་སྐད་གདམས་པའི་རིམ་པ་ཉུང་ངུ་འདི། །རང་གིས་ཉམས་སུ་བླངས་པ་མ་ལགས་ཀྱང་། །དམ་པའི་དྲིན་གྱིས་ལེགས་པར་ཐོས་པ་ལས། །ཆ་ཤས་ཙམ་བླངས་ཡི་གེར་བཀོད་པ་འདི། །པདྨ་སྐལ་ལྡན་བསྐུལ་ངོ་མི་ལྕོགས་སླད། །ཆོས་ཀྱི་བློ་གྲོས་ཞེས་བྱའི་བན་ཧྲུལ་དེས། །སྨྲས་རིམ་བཞིན་དུ་ཡི་གེར་བཀོད་པ་པོ། །ཚེ་རིང་བཀྲ་ཤིས་ཞེས་བྱས་བྲིས་པའི་དགེས། །མ་གྱུར་འགྲོ་བ་སེམས་ཅན་མ་ལུས་ཀུན། །རྣས་གྲོལ་མཆོག་ལ་རིམ་གྱིས་འགོད་པ་དང་། །ཁམས་གསུམ་སྲིད་པའི་གྲོང་ཁྱེར་སྟོང་བྱས་ཏེ། །རྒྱལ་བའི་དབང་པོའི་གོ་འཕང་ཐོབ་པར་ཤོག། སརྦ་མངྒ་ལཾ། །

[edit]

!_zhal gdams lam rim phan bde'i snying po zhes bya ba bzhugs so/__/na mo gu ru/__skyabs gnas kun 'dus dpal ldan bla ma ni/__/dran pa tsam gyis srid zhi'i 'jigs 'phrog pa'i/__/gsang gsum yid kyi ze'u 'brur bkod byas nas/__/zhal gdams lam rim phan bde'i snying po dbye/__/dal dang 'byor pa'i lus 'di rnyed dka' zhing /__/rnyed na don che yid bzhin nor dang mtshungs/__/da res stong log chud zos mi byed par/__/myur ba nyid du dam pa'i lha chos mdzod/__/snod kyi 'jig rten ri gling bcas par yang /__/nam zhig mi rtag thal ba rlung khyer 'dra/__/tshangs dang brgya byin 'khor los bsgyur rnams kyang /__/skye 'chi 'phos pa'i mtshang chen de la soms/__/rdo rje'i sku brnyes sangs rgyas byang sems yang /__/sgyu ma'i gzugs sku bshigs pa'i tshul bstan na/__/chu bur lta bu skye 'gro'i lus can rnams/__/myur du mi rtag 'chi bas 'jigs par nges/__/bsags pa'i las ni nam yang chud mi za/__/ma byas pa dang 'phrad par mi 'gyur zhing /__/rgyu 'bras mi 'chol rang thog smin nges pas/__/dge sdig spang blang brtson pa shin tu gces/__/srid gsum grangs khyer me yi 'obs chen por/__/shin tu bzod dka'i sdug bsngal phung po la/__/brtson rar chud pa'i 'gro ba ji bzhin du/__/nges 'byung skyo shas gting nas bsgom par mdzod/__/thar pa'i grong khyer 'chi med khang bzang ni/__/nyams dga' bkod legs yid 'ongs phun sum tshogs/__/byang chub phyogs chos rgyan gyis mdzes pa de/__/thob la dad spro dga' ba rgya chen bskyed/__/de nyid thob byed rang gi stobs min te/__/gzhan rkyen dge ba'i bshes la rag las pas/__/byang chub sems dang rtogs pa'i gding ldan cing /__/mkhyen gnyis ye shes ldan la brten par gces/__/thar pa'i 'jug sgo bla ma mchog gsum la/__/dang 'dod yid ches dad mos brtan po yi/__/dad gsum gus pa'i mngon rtags ngoms bzhin du/__/yid ches brtan pos skyabs su 'gro bar bya/__/theg chen lam gyi rtsa ba byang chub sems/__/'di la brten pas mya ngan 'das pa thob/__/rgyal ba kun gyi bgrod pa gcig pa'i lam/__/rin chen byang chub sems la blo brtan bya/__/byams sogs tshad med bzhi la blo sbyang zhing /__/gzhan phan lhag pa'i bsam pa bzang po la/__/g.yo sgyu zol zog rang 'dod med pa yis/__/lus dang longs spyod dge ba'i dngos rnams sbyin/__/pha rol phyin drug bsdu dngos bzhi la sogs/__/byang chub spyod pa rgya mtshor brtson byas shing /__/byang sa'i tshul khrims gsum la rab brtson te/__/rang gzhan don gnyis lhun gyis grub par mdzod/__/dri med sems kyi rang bzhin 'od gsal bar/__/sgrib byed nyes ltung dri ma'i tshogs rnams kun/__/stobs bzhi'i gang+gA'i chu rgyun gyis 'khrud pas/__/sgo gsum shin tu rnam par dag pa gces/__/tshogs gnyis rin chen ma dros rgya mtsho'i rdul/__/rnam par bsags te dpal gyi lhun por bskrun/__/rnam grol sku bzhi'i bang rim mdzes pa yi/__/byang chub yon tan spel ba'i thabs la 'bad/__/dngos grub kun gyi rtsa ba bla ma rje/__/byin rlabs rgya mtsho'i 'byung gnas rigs brgya'i bdag/__sku bzhi'i ded dpon srid zhi'i dpal mgon che/__/chos kyi rgyal po'i zhabs sen spyi bos bsnyen/__/bsnyen na bde zhing 'bral bar dka' ba yi/__/dad mos gdung ba drag po phur tshugs kyi/__/gsol ba snying gi dkyil nas btab byas na/__/mchog thun dngos grub 'bad med stsol bar nges/__/dad dang dam tshig brtan po'i sa gzhi la/__/smin byed dbang bzhi'i char gyis rlan pa las/__/sku dang ye shes gser gyi snye ma smin/__/srid zhir mi gnas rdo rje 'chang thob 'gyur/__/de phyir bla ma yid bzhin nor bu'i zhal/__/snying ga spyi bor rtag tu bsgom byas te/__/gsol ba btab cing dbang bzhi blang ba dang /__/thugs yid bsre ba nyams len snying po yin/__/'khor 'das chos kun gdod nas rnam par dag/__cir yang ma yin cir yang 'byung ba'i gzhi/__/'khor dang mya ngan 'das pa kun 'phro bas/__/rig khams bde bar gshegs pa'i snying po la/__/sbyong byed lam gyi rim pa rnam pa bzhis/__/sbyang bya dkyil 'khor bzhi yi dri ma 'khrud/__/sbyangs 'bras sku bzhi mngon du byed pa 'di/__/rdo rje theg pa'i lam gyi rim pa'o/__/mtshan nyid kun ldan rdo rje slob dpon las/__/rnam dag dbang gi chu bos legs smin te/__/rgyal bas bsngags pa'i dben gnas nyams dga' bar/__/brten nas lus sems shin tu sbyang bar bya/__/tha mal snang zhen 'khrul pa yul dang bcas/__/rang gi sems kyi cho 'phrul shes byas te/__/ma dag tha mal snang ba sbyong byed kyi/__/lam byed rnam bzhi'i bskyed rim bsgom la brtson/__/gzhi gnas rtsa rlung thig le'i snyigs ma rnams/__/dag byed rlung dang gtum mo'i rnal 'byor gyis/__/dbu ma'i kha dbye 'bar 'dzags drangs pa yi/__/zhu bde lhan skyes dpe yi ye shes ni/__/mngon sum 'dren pas rang lus thabs ldan bsgrubs/__/de la goms dang ye shes drod skye bas/__/brtul zhugs spyod pas bogs 'don bsgrub pa'i slad/__/phyag rgya bzhi yi dam tshig brten pa dang /__/khyad par dngos rig nye rgyu'i grogs byas te/__/rtsa yi mdud grol rlung sems dbu mar bsdams/__/rnam bcas bde chen ye shes thig le ni/__/rab tu 'phel bas mchog tu mi 'gyur ba'i/__/ye shes dwangs ma'i thig le gtsug tor brtan/__/rnam med ting 'dzin de nyid spros dang bral/__/don gyi lhan skyes ji bzhin rgyud la skye/__/khyab bdag nam mkha' rang byung ye shes bdag/__rtsa rlung thig le'i 'gros rnams thim pa dang /__/'od gsal dbu ma'i khang bzang nyams dga' bar/__/sna tshogs chos kun ro gcig chen por sdoms/__/bde stong 'gyur med rdo rje'i sku thob 'gyur/__/shin tu rnam par dag pa'i ye shes che/__/pho nya'i lam la brten pa med par yang /__/rang gnas sku dang ye shes mngon byed pa/__/'od gsal rdzogs pa chen po'i lam 'di mchog/__yid dpyod sgrib pa'i dri mas bslad min par/__/rang rig ka dag spros pa bral ba la/__/bla ma'i drin gyis ngo shes thag chod cing /__/rig stong gnyug ma chu bo'i rgyun bzhin bskyangs/__/de yang ci shar ci snang gzungs 'dzin gyi/__/rtog pa'i chos rnams rig pa'i rang gshis su/__/shar tsam nyid nas grol ba'i gnad dam pa/__/'di ni sems don skyong la shin tu gces/__/yangs ba med cing bsgom bya sgom byed med/__/tha mal blo 'das sdod cing gu yangs su/__/chos kun ka dag klong yangs chen po'i gshis/__/gtad med phyam gdal chen por thongs la shog/__gang du'ang ma spangs gang yang ma bsgyur zhing /__/chos kun ka nas dag pa'i klong chen por/__/rang babs dgongs pa'i btsan sa zin pa na/__/sangs rgyas chos sku rang la rnyed par 'gyur/__/de yi bogs 'byin lhun grub thod rgal gyi/__/sgron ma bzhi yi gnad du bsnun pa na/__/sku gsum lam lhangs yon tan rtsal rdzogs te/__/tshe 'di nyid dam bar dor grol bar nges/__/mdor na dad dang dam tshig rnam par dag/__mos gus lam gyi srog tu bzung byas te/__/bla ma bsgom zhing rig ngo skyong ba yis/__/thun dang thun mtshams thams cad 'da' bar mdzod/__/de ltar brtson pas lam gyi 'bras bu ni/__/gzhi gnas sku dang ye shes rgya mtsho'i tshogs/__/dka' ba med par myur du thob pa dang /__/'gro sgrol slad du phrin las rtag khyab 'gyur/__/de skad gdams pa'i rim pa nyung ngu 'di/__/rang gis nyams su blangs pa ma lags kyang /__/dam pa'i drin gyis legs par thos pa las/__/cha shas tsam blangs yi ger bkod pa 'di/__/pad+ma skal ldan bskul ngo mi lcogs slad/__/chos kyi blo gros zhes bya'i ban hrul des/__/smras rim bzhin du yi ger bkod pa po/__/tshe ring bkra shis zhes byas bris pa'i dges/__/ma gyur 'gro ba sems can ma lus kun/__/rnas grol mchog la rim gyis 'god pa dang /__/khams gsum srid pa'i grong khyer stong byas te/__/rgyal ba'i dbang po'i go 'phang thob par shog/__sarba mang+ga laM/__/