JKW-KABUM-03-GA-001-008

🚧 This website is under continued development. We appreciate your patience!

First text in section. Back to Volume PageNext Text

གངས་ཅན་གྱི་སྒྲུབ་བརྒྱུད་ཤིང་རྟ་ཆེན་པོ་རྣམས་ཀྱི་རྒྱུད་སྡེ་དང་མན་ངག་ལས་འཕྲོས་པའི་ཟིན་བྲིས་ཅི་རིགས།

Wylie title	gangs can gyi sgrub brgyud shing rta chen po rnams kyi rgyud sde dang man ngag las 'phros pa'i zin bris ci rigs
Location	mkhyen brtse'i bka' 'bum Volume 3, sde tshan 1, Text 8, Pages 182-212 (Folios 91b2 to 106b1)
Author	འཇམ་དབྱངས་མཁྱེན་བརྩེའི་དབང་པོ་
Less details More details
Citation	'jam dbyangs mkhyen brtse'i dbang po. gangs can gyi sgrub brgyud shing rta chen po rnams kyi rgyud sde dang man ngag las 'phros pa'i zin bris ci rigs. In 'jam dbyangs mkhyen brtse'i dbang po'i bka' 'bum, Vol. 3: 182-212. Khams sde dge rdzong sar dgon: Rdzong sar blo gros phun tshogs, 2020.
Genre	History Texts - lo rgyus  ·  Notes - zin bris
Colophon	།ཞེས་པའང་ཟིན་བྲིས་ལས་བཏུས་སོ། །སརྦ་མངྒ་ལམ།།
	zhes pa'ang zin bris las btus so/__/sarba mang+ga lam/

1 Texts in this Section (sde tshan or chos tshan)

8 182-212	གངས་ཅན་གྱི་སྒྲུབ་བརྒྱུད་ཤིང་རྟ་ཆེན་པོ་རྣམས་ཀྱི་རྒྱུད་སྡེ་དང་མན་ངག་ལས་འཕྲོས་པའི་ཟིན་བྲིས་ཅི་རིགས། gangs can gyi sgrub brgyud shing rta chen po rnams kyi rgyud sde dang man ngag las 'phros pa'i zin bris ci rigs History Texts - lo rgyus   ·   Notes - zin bris	Text page View PDF
	[[|འཇམ་དབྱངས་མཁྱེན་བརྩེའི་དབང་པོ་ ()]]

Tibetan Text

Wylie

[edit]

འཇམ་དཔལ་དབྱངས་དངོས་ཁྲི་སྲོང་ལྡེའུ་བཙན་གྱིས་མཛད་པའི་བཀའ་ཡང་དག་པའི་ཚད་མ་ཞེས་ལེའུ་བཅོ་ལྔ་པ་ལས། ཆོས་སོ་ཅོག་དབང་དུ་བགྱིད་པ་རིག་པའི་རྣམ་པ་སྨོས་པས་འཇིག་རྟེན་ན་རྒྱལ་པོ་དག་བདག་གི་རིགས་སུ་ཅི་འདོད་པ་ངག་གི་དབང་གིས་འགྲུབ་པ་བཞིན་དུ། ཆོས་སོ་ཅོག་ལ་བདག་གི་ཕྱོགས་སུ་ཇི་ལྟར་བཟུང་བ་ཡང་རིག་པའི་དབང་གིས་འགྲུབ་སྟེ། ཆོས་ཐམས་ཅད་ཀྱི་རྒྱལ་པོ་ལྟ་བུ་རིག་པ་ཞེས་བྱ་བ་ཆོས་ཀྱི་རྗེས་གསུངས་པའི་རིག་པ་བཞི་བརྗོད་དོ། །དེ་གང་ཡིན་ཞེ་ན། འཕགས་པ་དགོངས་པ་ངེས་པར་འགྲེལ་པའི་མདོ་ལས་གསུངས་པ། རིག་པ་དེ་ཡང་རྣམ་པ་བཞི་སྟེ། བལྟོས་པའི་རིག་པ་དང་། བྱ་བ་བྱེད་པའི་རིག་པ་དང་། གཏན་ཚིགས་སྒྲུབ་པའི་རིག་པ་དང་། ཆོས་ཉིད་ཀྱི་རིག་པ་བཞི། ཞེས་གསུངས་སོ། །རིག་པ་བཞིའི་ཕྱོགས་ཙམ་ཞིག་མདོར་བརྗོད་ན། བལྟོས་པའི་རིག་པ་ཞེས་བྱ་བ་ནི་ཆོས་དང་འབྲས་བུའི་རིག་པ་བརྗོད་པ་ཡིན་ཏེ། འདུ་བྱེད་གང་དང་གང་ལ་ཐ་སྙད་དུ་གདགས་པ་དང་། གང་དང་གང་གི་འབྲས་བུ་སྐྱེ་བ་ཡང་དེ་དང་དེའི་རྒྱུ་རྐྱེན་ལ་བལྟོས་པར་བསྟན་པའོ། །བྱ་བ་བྱེད་པའི་རིག་པ་ཞེས་བྱ་བ་ནི་ལས་དང་རྒྱུའི་སྒོ་ནས་བརྗོད་པ་ཡིན་ཏེ། གང་དང་གང་གི་བྱ་བ་དེ་དང་དེ་ལ་བྱེད་པ་གང་གི་རྒྱུ་དང་རྐྱེན་དུ་ངེས་པ་ནི་དེ་དང་དེའི་འབྲས་བུའི་བྱ་བ་བྱེད་པར་བསྟན་པའོ། །གཏན་ཚིགས་སྒྲུབ་པའི་རིག་པ་ཞེས་བྱ་བ་ནི་ཀུན་ཏུ་འགྲོ་བ་ཡིན་ཏེ། གང་དང་གང་བསྒྲུབ་པའི་ཚད་མའི་མཚན་ཉིད་བསྟན་པའོ། །ཆོས་ཀྱི་རིག་པ་ཞེས་བྱ་བ་ནི་ཆོས་རྣམས་ཀྱི་རང་བཞིན་གྱི་སྒོ་ནས་བརྗོད་པ་ཡིན་ཏེ། ཆོས་རྣམས་ལ་ཀུན་རྫོབ་བདེན་པ་དང་དོན་དམ་པའི་བདེན་པ་གང་དང་གང་གི་རང་བཞིན་ཡོད་པ་དེ་དང་དེ་བསྟན་པའོ། །ཞེས་སོགས་དེ་དག་གི་དོན་ཞིབ་ཏུ་འཆད་པར་སྣང་ངོ་། །དེ་ཡང་གསུམ་པ་གཏན་ཚིགས་སྒྲུབ་པའི་རིག་པའི་སྐབས་སུ། ཡོངས་སུ་དག་པ་དང་། ཡོངས་སུ་མ་དག་པ་གཉིས། ཡོངས་སུ་དག་པ་ལ་རྣམ་པ་ལྔ་སྟེ། མངོན་སུམ། རྗེས་དཔག །དཔེ། གྲགས་པ། ལུང་སྟེ་ལྔར་བཤད། ལེའུ་དགུ་པར། ཚད་མའི་གྲངས་དང་མཚན་ཉིད་ཀྱི་བཀའ་ཐང་ལ། གཏན་ཚིགས་སྒྲུབ་པའི་རིག་པ་དེ་ཡང་། དེ་ལྟར་མངོན་སུམ་གྱི་ཚད་མ་དང་། རྗེས་སུ་དཔག་པའི་ཚད་མ་དང་། ཡིད་ཆེས་པ་ལུང་གི་ཚད་མ་དང་། མཚན་ཉིད་ལྔས་ཡོངས་སུ་དག་པའོ། །ཞེས་གསུངས་ཏེ། ཚད་མ་འདི་དག་ཅིའི་ཕྱིར་གསུངས་ཞེས་ལྟག་འོག་སྤུན་ཏེ་སྦྱར་ན་འཇིག་རྟེན་གསུམ་གྱི་སེམས་ཅན་དག་ཚད་མ་མ་ཡིན་པར་ཚད་མར་སྟོན་ཅིང་ཚད་མར་མི་རུང་བ་ལ་ཚད་མར་འཛིན་པར་བྱུང་བ་དང་། འབྱུང་བ་དང་། འབྱུང་བར་འགྱུར་བ་མཁྱེན་ནས། ལོག་པར་ལྟ་བའི་དྲྭ་བ་བསལ་པའི་ཕྱིར་ཚད་མ་འདི་གསུངས་པ་ཡིན་ནོ། །ཚད་མ་ཞེས་བྱ་བ་ནི་རིང་ཐུང་ལ་སོར་མོ་ལ་སོགས་པས་གཞལ་བ་དང་། མང་ཉུང་ལ་བྲེ་ལ་སོགས་པས་གཞལ་བ་དང་། ལྕི་ཡང་ལ་སྲང་ལ་སོགས་པས་གཞལ་བ་ལྟ་བུ་ཡིན་ཏེ། ཚད་མ་ནི་མངོན་སུམ་དང་རྗེས་སུ་དཔག་པ་དང་ཡིད་ཆེས་པའི་ལུང་དང་གསུམ་མོ། །ཚད་མ་གསུམ་ནི་དངོས་པོ་བསྒྲིབས་པ་དང་། མ་བསྒྲིབས་པ་དང་། དེ་དག་ལས་ཀྱང་ཤིན་ཏུ་བསྒྲིབས་པའི་ཆོས་དང་གསུམ་ཡོད་པས་ཚང་མ་ཡང་གསུམ་དུ་གསུངས་སོ། །དེ་ལྟ་བས་ན་མངོན་སུམ་གྱི་ཚད་མ་དང་། རྗེས་སུ་དཔག་པའི་ཚད་མ་དང་། ཡིད་ཆེས་པའི་ལུང་གི་ཚད་མ་ཡང་ཞེས་བྱའོ། །ཚད་མ་དེ་དག་གི་མཚན་ཉིད་ནི་དེ་གཅིག་ཀྱང་ལྔ་ལྔར་ཤེས་པར་བྱ་སྟེ། ཡོངས་སུ་དག་པའི་མཚན་ཉིད་ལྔ། །ཞེས་གསུངས་པ་རྣམས་ཡིན་ནོ། །དེ་ལྟ་བས་ན་མཚན་ཉིད་ལྔས་ཡོངས་སུ་དག་གོ །ཞེས་གསུངས་སོ། །ཇི་ལྟར་ཡོངས་སུ་དག་ཅེ་ན། མངོན་སུམ་དང་རྗེས་སུ་དཔག་པས་ནོར་རམ་མ་ནོར་གཏན་ལ་དབབ། རྗེས་སུ་དཔག་པ་ནི་མངོན་སུམ་མྱོང་བས་དོན་ལ་ངེས་པར་བཞག་སྟེ། མངོན་སུམ་དང་རྗེས་སུ་དཔག་པ་དེ་གཉིས་ལ་ཐེ་ཚོམ་ཡོད་པ་ནི་རང་གི་རིགས་ཀྱི་དཔེས་བསལ་བར་བྱེད་དོ། །དེ་གསུམ་ཚོགས་ནས་འགྲུབ་པ་ལ་གཅིག་ཏུ་ངེས་པས་ཡོངས་སུ་གྲགས་པ་ཡིན་ཏེ། འཇིག་རྟེན་གྱི་ཚད་མའི་གྲངས་སུ་ཆུད་དོ། །ལུང་ནི་མི་ལས་བླ་མར་གྱུར་པའི་ཆོས་ཡོད་པར་མི་ཤེས་པ་དེས་མཚོན་ཅིང་སྟོན། མཚན་ཉིད་འདི་ལྔས་ཡོངས་སུ་དག་པར་འགྱུར་རོ། །ཡང་ནི་འཇིག་རྟེན་གྱི་ཆོས་ཀྱང་རུང་། འཇིག་རྟེན་ལས་འདས་པའི་ཆོས་ཀྱང་རུང་། གང་ལ་དོན་རྟོགས་པར་བྱེད་དོ་ཅོག་ནི་ཡོངས་སུ་དག་པའི་མཚན་ཉིད་རྫོགས་པས་རྟོགས་པར་འགྱུར་ཏེ། འཇིག་རྟེན་ལས་འདས་པའི་ཆོས་དང་། ཤེས་པར་དཀའ་བ་རྣམས་ལ་ནི་མཚན་ཉིད་ལྔ་པོ་རེ་རེ་དང་མཐར་གྱིས་སྦྱར་ཞིངས་རྟགས་དགོས་པས་མཚན་ཉིད་ཀྱི་བྱེ་བྲག་གསལ་བར་མངོན་ནོ། །འཇིག་རྟེན་གྱི་ཆོས་དང་ཤེས་པར་སླ་བ་རྣམས་ནི་མཚན་ཉིད་བཞི་པོ་ཚད་མས་བརྟགས་པར་བྱེད་མོད་ཀྱི། དེ་དག་གི་གཞལ་བྱ་ཡང་འདྲིས་པའི་ཤས་ཆེ་སྟེ། ལན་དུ་མར་བསླབས་མི་དགོས་པས་མཚན་ཉིད་ཀྱི་བྱེ་བྲག་ཀྱང་མྱུར་ཞིང་ཕྲ་སྟེ་གསལ་བར་མི་མངོན་བཞིན་དུ་འབྱུང་ངོ་། །ཞེས་དང་། སྒྲུབ་ཚུལ་ཀྱང་། མངོན་སུམ་གྱི་ཚད་མ་མཚན་ཉིད་ལྔས་ཡོངས་སུ་དག་པས་མི་རྟག་པ་ལ་སོགས་པ་གཞལ་ཞིང་སྒྲུབ་པ་ནི་སྔར་བཤད་པ་བཞིན་དུ་གང་འདུ་བྱེད་དུ་རྟོགས་པ་ཐམས་ཅད་ཀྱི་འདྲ་བ་དང་མི་འདྲ་བའི་རྒྱུན་ཕྱི་མ་སྐྱེས་ནས་སྔ་མ་འགག་པར་མི་དམིགས་པ་དང་འདྲ་བ་དང་མི་འདྲ་བ་ཕྱི་མ་མེད་ཅིང་སྔ་མ་གཏོང་བར་དམིགས་པ་དེ་དག་སོ་སོ་རང་གིས་རིག་པ་ནི་མངོན་སུམ་གྱི་མཚན་ཉིད་དོ། །དེ་ལ་འདྲ་བ་དང་མི་འདྲ་བའི་རྒྱུན་གཞན་བྱུང་བའི་ཚེ། སྔ་མ་འགགས་པའི་ཕྱིར་མི་རྟག་པ་ཉིད་དུ་རྟོགས་པར་ཁོང་དུ་ཆུད་པ་ནི་ཉེ་བར་རྗེས་སུ་དཔག་པའི་མཚན་ཉིད་དོ། །འདུ་བྱེད་རྣམས་ནི་རྟག་པའི་མཚན་ཉིད་དང་ལྡན་པའི་ནང་ནས་ཀྱང་མི་རྟག་པ་མངོན་པ་མེ་ལྕེའི་རྒྱུན་ལ་མེ་ལྕེ་འགགས་ནས་མེ་དག་ལས་ཐལ་བ་དང་སོལ་བར་འགྱུར་བ་བཞིན་ནོ་ཞེས་བྱ་བའི་དཔེས་བསྟན་ཏེ། རིམ་གྱིས་སྲིད་པ་དང་སྦྱར་ཞིང་མི་རྟག་པར་བསྒྲུབས་པ་ནི་རང་གི་རིགས་ཀྱི་དཔེའི་མཚན་ཉིད་དོ། །མཚན་ཉིད་དེ་གསུམ་ཚོགས་པས་འགྲུབ་པ་ལ་གཅིག་ཏུ་ངེས་པ་ནི་ཡོངས་སུ་གྲགས་པའི་མཚན་ཉིད་དོ། །གང་ཐམས་ཅད་མཁྱེན་པས་གསུངས་པ་ཁོང་དུ་ཆུད་པ་ཉེ་བའི་རྗེས་སུ་དཔག་པའི་མཚན་ཉིད་དོ། །འདུ་བྱེད་ཐམས་ཅད་མི་རྟག་ཅེས་འབྱུང་བ་ནི་ལུང་གི་མཚན་ཉིད་དོ། །དེ་ལྟར་ན་མཚན་ཉིད་ལྔས་ཡོངས་སུ་དག་པའི་མངོན་སུམ་གྱིས་མི་རྟག་པར་ཡོངས་སུ་གྲུབ་པའོ། །ཞེས་སོགས་ནས་བདེན་པ་བཞི་ཀར་ཚད་མ་གསུམ་དང་སྦྱར་བའི་རིག་པ་ཞིབ་ཏུ་འབྱུང་ངོ་། །གཞན་ཡང་ཡོངས་སུ་མ་དག་པའི་མཚན་ཉིད་བདུན་གང་ཞེ་ན། དེ་ལས་གཞན་དང་མཐུན་པར་དམིགས་པའི་མཚན་ཉིད་དང་། དེ་ལས་གཞན་དང་མི་མཐུན་པར་དམིགས་པའི་མཚན་ཉིད་དང་། ཐམས་ཅད་མཐུན་པར་དམིགས་པའི་མཚན་ཉིད་དང་། ཐམས་ཅད་མི་མཐུན་པར་དམིགས་པའི་མཚན་ཉིད་དང་། རང་བཞིན་གྱི་རིགས་དང་མཐུན་པའི་དཔེའི་མཚན་ཉིད་དང་། ཡོངས་སུ་གྲགས་པའི་མཚན་ཉིད་དང་། ལུང་རྣམ་པར་མ་དག་པའི་མཚན་ཉིད་དོ། །ཞེས་དང་། དེ་རྣམས་རྒྱས་པར་བཤད་ཅིང་། མེའི་རྟགས་ནི་དུ་བའོ། །རང་བཞིན་ནི་དྲོ་བའོ། །ལས་ནི་འཚེད་བར་བྱེད་པའོ། །ཆོས་ནི་འབར་བའོ། །རྒྱུ་ནི་སེམས་ཅན་གྱིས་ཚ་བ་རྣམ་པར་རྟོགས་པའོ། །ཞེས་རྟགས་སོགས་དྲུག་གོ། །བཞི་པ་ཆོས་ཉིད་ཀྱི་རིག་པ་ལ་བདེན་པ་བཅུས་ཤེས་པར་བྱ་སྟེ། འཕགས་པ་ཆོས་ཀུན་འགྲོ་བའི་མདོ་ལས། དེ་ལ་བྱང་ཆུབ་སེམས་དཔའ་རྣམས་ཀྱི་བདེན་པ་བཅུ་གང་ཞེ་ན། འདི་ལྟ་སྟེ། ཀུན་རྫོབ་ཀྱི་བདེན་པ་དང་། དོན་དམ་པའི་བདེན་པ་དང་། མཚན་ཉིད་ཀྱི་བདེན་པ་དང་། རྣམ་པར་དབྱེ་བའི་བདེན་པ་དང་། །ངེས་པར་རྟོགས་པའི་བདེན་པ་དང་། དངོས་པོའི་བདེན་པ་དང་། ནུས་པའི་བདེན་པ་དང་། ཟད་པ་དང་མི་སྐྱེ་བ་ཤེས་པའི་བདེན་པ་དང་། ལམ་ལ་འཇུག་པའི་བདེན་པ་དང་། དེ་བཞིན་གཤེགས་པའི་ཡེ་ཤེས་ཀུན་འབྱུང་བའི་བདེན་པ་སྟེ། འདི་དག་ནི་བདེན་པ་བཅུའོ། །ཞེས་དང་། དེ་དག་གི་དོན་རྒྱས་པར་བཤད། ཡང་ལེའུ་བཅོ་ལྔ་པ་ཚད་མའི་ཡོན་ཏན་སུ་བཀོད་པར། མདོར་བསྡུ་ན་རྣམ་པ་གསུམ་སྟེ། ཡོངས་སུ་དག་པའི་ཡོན་ཏན་རྫོགས་པ་ཡིན། ཡོངས་སུ་མ་དག་པའི་སྐྱོན་གྱིས་མ་གོས་པ་ཡིན། ཕན་ཡོན་གྱི་ལེགས་པ་དང་ལྡན་པ་ཡིན་ནོ། །དེ་ལ་ཡོངས་སུ་དག་པའི་ཡོན་ཏན་རྫོགས་པ་གང་ཞེ་ན། རྣམ་པ་ལྔར་ཤེས་པར་བྱ་སྟེ། ཚད་མ་ཡོངས་སུ་དག་པས་འགྲུབ་པ་ལ་གཅིག་ཏུ་ངེས་པ་དང་། གཞལ་བྱ་ཕུན་སུམ་ཚོགས་པས་འཇིག་རྟེན་དང་འཇིག་རྟེན་ལས་འདས་པའི་ཆོས་ཆུབ་པ་དང་། སྒྲུབ་པ་ཡན་ལག་ཡོངས་སུ་རྫོགས་པ་དང་། ལྟ་བ་རྣམ་པར་དག་པ་དང་། ཚད་མའི་བྱེ་བྲག་རབ་ཏུ་ཤེས་པར་འགྱུར་བ་དང་ལྔའོ། །ཞེས་སོགས་དེའི་དོན་རྒྱས་པ་དང་། ཡོངས་སུ་མ་དག་པའི་སྐྱོན་གྱིས་མ་གོས་པ་གང་ཞེ་ན། རྣམ་པ་གསུམ་དུ་ཤེས་པར་བྱ་སྟེ། འགལ་བ་མེད་པ་ཡིན། མ་ངེས་པ་ཡིན། སོ་སོ་སྐྱེ་བོའི་ནོར་བ་མེད་པ་ཡིན་ནོ། །ཞེས་སོགས་དང་། ཕན་ཡོན་གྱི་ལེགས་པ་དང་ལྡན་པ་གང་ཞེ་ན། རྣམ་པ་གཉིས་ཏེ། ཐམས་ཅད་མཁྱེན་པས་གསུངས་པ་བཞིན་དུ་བྲིས་ཏེ་ཆོས་ལ་བརྟེན་པས་དེ་བཞིན་གཤེགས་པས་བྱིན་གྱིས་བརླབས་ཤིང་བསྒྲུབས་པ་ལ་མཐུ་ཆེན་པོ་ཡིན། དཔལ་གྱི་ཞལ་ནས་གསུངས་པ་ནང་གཅིག་གིས་གཅིག་བཀྲོལ་ཏེ། ལྷད་མ་ཞུགས་པའི་གསུང་རབས་ཉིད་ཡིན་པས་གང་གིས་བཀླགས་པ་དང་། ཐོས་པ་དང་། བསམ་པ་ཙམ་གྱིས་ཀྱང་སྡིག་པ་འབྱོང་ཞིང་བསོད་ནམས་འཕེལ་བ་ཡིན་ནོ། །ཞེས་སོགས་གསུངས་ཤིང་། མདོར་ན་བསྟན་བཅོས་འདི་ནི་རིག་པ་རྣམ་པ་བཞིའི་ཞར་ལ་ཚད་མ་ལྔས་དེ་བཞིན་གཤེགས་པའི་གསུང་ལེགས་པར་བསྒྲུབས་པ་ཁྱད་པར་ཅན་དུ་སྣང་བས་བློ་གསལ་ཞིང་དོན་དུ་གཉེར་བ་རྣམས་ཀྱིས་ནན་ཏན་དུ་རྟོགས་པར་བྱོས་ཤིག ། ༈

གཞན་ཡང་། མངོན་སུམ་ཡོངས་སུ་དག་པའི་མཚན་ཉིད་ལ། དེ་ལ་འདུ་བྱེད་ཐམས་ཅད་མི་རྟག་པ་ཉིད་དང་། འདུ་བྱེད་ཐམས་ཅད་སྡུག་བསྔལ་བ་ཉིད་དང་། ཆོས་ཐམས་ཅད་བདག་མེད་པ་ཉིད་དུ་གང་འཇིག་རྟེན་ན་མངོན་སུམ་དུ་དམིགས་པའི་མཚན་ཉིད་དོ། །ཞེས་གསུངས་པའི་མཚན་ཉིད་དུ་བཤད་དོ། །མངོན་སུམ་དུ་ཞེས་བྱ་བ་ནི་རྐྱེན་བཞིས་བསྐྱེད་པའི་རྣམ་པར་ཤེས་པའི་སྒྲིབ་པ་དག་གིས་མ་བསྒྲིབས་པས་ཡུལ་ལ་མངོན་སུམ་དུ་དམིགས་པ་ཡིན་ཏེ། ད་ལྟར་བྱུང་བའི་རྣམ་པར་ཤེས་པ་ལྔ་པོ་དག་དང་། དེས་དྲངས་པའི་ཡིད་ཀྱི་རྣམ་པར་ཤེས་པ་དང་བཅས་པས་དུས་གཅིག་སྤྱོད་ཡུལ་གཅིག་ཏུ་ད་ལྟར་བྱུང་པའི་ཡུལ་ཐད་ཀར་བབས་པ་ལ་དམིགས་ནས། ཡུལ་དེ་སོ་སོའི་དོན་རང་གིས་རིག་པ་ནི་མངོན་སུམ་པའི་མཚན་ཉིད་ཅེས་བྱའོ། །ཡིད་ཀྱི་རྣམ་པར་ཤེས་པ་འབའ་ཞིག་གིས་ཆོས་ཀྱི་ཁམས་ལ་དམིགས་པའང་ཆོས་ལ་དམིགས་པའི་མངོན་སུམ་ཞེས་བྱའོ། །ཞེས་དང་། རྗེས་སུ་དཔག་པ་ཡོངས་སུ་དག་པའི་མཚན་ཉིད་ལ། འདུ་བྱེད་ཐམས་ཅད་སྐད་ཅིག་པ་ཉིད་དང་། འཇིག་རྟེན་ཕ་རོལ་པོ་ཡོད་པ། དགེ་བ་དང་མི་དགེ་བའི་ལས་རྣམ་པར་ཆུད་མི་ཟ་བ་དང་། གང་དེ་ལ་གནས་པའི་མི་རྟག་པ་རགས་པ་མངོན་སུམ་དུ་དམིགས་པ་དང་། གང་སེམས་ཅན་སྣ་ཚོགས་ལ་གནས་པ་མངོན་སུམ་དུ་དམིགས་པ་དང་། གང་སེམས་ཅན་བདེ་བ་དང་སྡུག་བསྔལ་བ་དགེ་བ་དང་མི་དགེ་བ་ལ་གནས་པ་མངོན་སུམ་དུ་དམིགས་པ་ཡིན་ཏེ། གང་གིས་མངོན་སུམ་དུ་མ་གྱུར་པ་ལ་རྗེས་སུ་དཔག་པར་བྱ་བ་ཡིན་ནོ། །འདི་དང་ཚུལ་འདི་ལྟ་བུ་དག་ནི་དེ་ལ་གནས་པའི་མངོན་སུམ་ལ་དམིགས་པའི་མཚན་ཉིད་དོ་ཞེས་གསུངས་པའི་མཚན་ཉིད་བཤད་དོ། །དེ་ལ་གནས་པའི་མངོན་སུམ་གྱི་དམིགས་པ་ཞེས་བྱ་བ་ནི་གང་རྗེས་སུ་དཔག་པར་བྱ་བ་དེའི་རང་བཞིན་ལྐོག་ན་འདུག་སྟེ། མངོན་སུམ་གྱིས་མ་དམིགས་ཀྱང་དེ་ལ་གནས་པའི་རྟགས་སམ། ལས་སམ། ཆོས་སམ། རྒྱུའམ། འབྲས་བུའམ། དེ་རྣམས་ཀྱི་ནང་ནས་གང་མངོན་སུམ་གྱིས་དམིགས་པའི་རྗེས་སུ་འཇུག་པའི་བློས་རྗེས་སུ་དཔག་སྟེ། དེའི་གནས་དང་རང་བཞིན་ཤེས་པར་བྱའོ། །ཞེས་དང་། རང་གི་རིགས་ཀྱི་དཔེ་དང་སྦྱར་བའི་མཚན་ཉིད་ལ་ནང་དང་ཕྱིའི་འདུ་བྱེད་རྣམས་ཀྱི་འཇིག་པ་དང་། སྐྱེ་བར་དམིགས་པའི་འཇིག་རྟེན་ཐམས་ཅད་ལ་གྲགས་པ་ཉེ་བར་སྦྱར་བ་དང་། སྐྱེ་བ་ལ་སོགས་པའི་སྡུག་བསྔལ་དམིགས་པས་ཉེ་བར་སྦྱར་བ་དང་། རང་དབང་མེད་པར་དམིགས་པས་ཉེ་བར་སྦྱར་བ་དང་། ཕྱི་རོལ་གྱི་ཕུན་སུམ་ཚོགས་པ་དང་རྒུད་པ་ཉེ་བར་དམིགས་པས་འཇིག་རྟེན་ཐམས་ཅད་ལ་གྲགས་པ་ཉེ་བར་སྦྱར་བ་འདི་དང་། རྣམ་པ་འདི་ལྟ་བུ་དག་ནི་རང་གི་རིགས་ཀྱི་དཔེ་ཉེ་བར་སྦྱར་བའི་མཚན་ཉིད་དུ་ཤེས་པར་བྱའོ། །ཞེས་གསུངས་པ་དེའི་མཚན་ཉིད་བཤད་དོ། །སོ་སོ་སྐྱེ་བོ་རྣམས་ལ་ཐུབ་པ་དག་གིས་གཙུག་ལག་ཏུ་བསྟན་པ་ནི། གང་འཇིག་རྟེན་ལ་མ་གྲུབ་པ་སྒྲུབ་ཅིང་ཁོང་དུ་མ་ཆུད་པ་ཁོང་དུ་གཞུག་པའི་ཕྱིར་སྟོན་པས་ན། མངོན་སུམ་གྱི་དམིགས་པ་ཡང་རུང་། རྗེས་སུ་དཔག་པས་ཤེས་པར་བྱ་བ་ཡང་རུང་། ཐེ་ཚོམ་སེལ་བའི་གྲོགས་སུ་རང་གི་རིགས་ཀྱི་དཔེས་བསྟན་པར་བྱའོ། །ཞེས་དང་། ཡོངས་སུ་གྲགས་པ་ཡོངས་སུ་དག་པའི་མཚན་ཉིད་ལ། གང་འདི་དེ་མངོན་སུམ་དུ་དམིགས་པའི་མཚན་ཉིད་དང་། དེ་ལ་གནས་པ་མངོན་སུམ་དུ་དམིགས་པའི་མཚན་ཉིད་དང་། རང་གི་རིགས་ཀྱི་དཔེ་ཉེ་བར་སྦྱར་བའི་མཚན་ཉིད་ནི། དེ་འགྲུབ་པར་བྱ་བ་ལ་གཅིག་ཏུ་ངེས་པའི་ཕྱིར་ཡོངས་སུ་གྲགས་པའི་མཚན་ཉིད་དུ་རིག་པར་ཤེས་པར་བྱའོ། །ཞེས་གསུངས་པ་དེའི་མཚན་ཉིད་བཤད་དོ། །ཡོངས་སུ་གྲགས་པ་ཞེས་བྱ་བ་ནི་ཆོས་རྣམས་ལ་མངོན་སུམ་དུ་དམིགས་པ་དང་། རྗེས་སུ་དཔག་པས་རིག་པ་དང་། རང་གི་རིགས་གྱི་དཔེ་ཉེ་བར་སྦྱར་བ་གསུམ་འཚོགས་ནས་གཅིག་ཏུ་ངེས་པ་འདི་ནི་ཡོངས་སུ་གྲགས་པའི་མཚན་ཉིད་ཅེས་བྱ་སྟེ། མངོན་སུམ་ལ་སོགས་པ་གསུམ་སོ་སོར་སྨོས་པ་ནི་མཚན་ཉིད་ཀྱི་བྱེ་བྲག་གོ །ཞེས་དང་། ཤིན་ཏུ་རྣམ་པར་དག་པའི་ལུང་གཏན་ལ་དབབ་པར་བསྟན་པའི་མཚན་ཉིད་ལ། གང་ཐམས་ཅད་མཁྱེན་པས་བཤད་པ་འདི་ལྟ་སྟེ། མྱ་ངན་ལས་འདས་པ་ནི་ཞི་བའོ། །ཞེས་བྱ་བ་འདི་དང་། རྣམ་པ་འདི་ལྟ་བུ་དག་ནི་ཤིན་ཏུ་རྣམ་པར་དག་པའི་ལུང་གཏན་ལ་དབབ་པར་བསྟན་པའི་མཚན་ཉིད་དུ་ཤེས་པར་བྱའོ། །ཞེས་དང་། ཅིའི་ཕྱིར་ལུང་ཤིན་ཏུ་རྣམ་པར་དག་པ་ཡིན་ཞེ་ན། དུས་གསུམ་གྱི་སངས་རྒྱས་རྣམས་ཀྱང་ཆོས་དང་མཐུན་པར་སྟོན་པས་ན་ལུང་ཞེས་བྱའོ། །ཆོས་ཀྱིས་ཚད་མར་བྱས་པའི་མཚན་ཉིད་དང་ལྡན་ལ་རང་བཟོའི་ལྷད་མ་ཞུགས་པས་ན་ཤིན་ཏུ་རྣམ་པར་དག་པ་ཞེས་བྱའོ། །ཞེས་སོགས་རྒྱ་ཆེར་བསྟན་སྣང་ངོ་། །ཞེས་དང་། གཞོན་ནུ་གསེར་མདོག་གི་རྟོགས་པ་བརྗོད་པར། བུད་མེད་མཆོག་རྣམས་ལ་ཐུན་མོང་མ་ཡིན་པའི་ཆོས་རྣམ་པ་ལྔ་ཡོད་དེ། ལྔ་གང་ཞེ་ན། སྐྱེས་པ་ཆགས་པར་ཡང་ཤེས་ཤིང་མ་ཆགས་པར་ཡང་ཤེས་པ་དང་། དུས་ཤེས་ཤིང་ས་བོན་ཤེས་པ་དང་། གང་ལས་མངལ་དུ་འཇུག་པ་དེ་ཤེས་པ་དང་། ཁྱེའུར་གྱུར་པ་ཤེས་ཤིང་བུ་མོར་གྱུར་པ་ཤེས་ཏེ། གལ་ཏེ་ཁྱེའུར་གྱུར་ན་ནི་དཀུ་གཡས་པར་བརྟེན་ཅིང་གནས་ལ། གལ་ཏེ་བུ་མོར་གྱུར་ན་ནི་དཀུ་གཡོན་པར་བརྟེན་ཅིང་གནས་སོ། །ཞེས་དང་། ། ༈ འཕགས་པ་དགོངས་པ་ངེས་འགྲེལ་གྱི་ཊཱིཀ །ཅོ་ཇོ་མཛད་པ་པོ་གང་ཡིན་མི་གསལ་བར་ཕར་ཕྱིན་དྲུག་གི་དབྱེ་བ་བསྡུས་པ། ། ༈ ཆོས་ཀྱི་སྦྱིན་པ་ལའང་། གླེགས་བམ་སྦྱིན་པ། གཞུང་བཞིན་འཆད་པ། མཁན་པོར་སྟོན་པའོ། །ཟང་ཟིང་གི་སྦྱིན་པར། ཕྱིའི། ནང་གི །ཕྱི་ནང་གཉིས་ཀའི་ཟང་ཟིང་གི་སྦྱིན་པའོ། །མི་འཇིགས་པར་རྐྱེན་གྱི་སྡུག་བསྔལ། སྲོག་གི་བར་ཆད། འཁོར་བའི་རྒྱུད་ལས་བསྐྱབས་པའོ། །གསུམ་པོའི་འབྲས་བུའང་། འཇིག་རྟེན་ལས་འདས་པ། ལོངས་སྤྱོད་ཆེན་པོ་འཐོབ་པ། ཚེ་ལ་བར་ཆད་མེད་པར་འགྱུར་རོ། ། ༈ མི་དགེ་བ་ལས་ལྡོག་པའི་ཚུལ་ཁྲིམས་ཀྱང་རྣམ་པ་གསུམ་སྟེ། ལུས། ངག །ཡིད་མི་དགེ་བ་ལས་ལྡོག་པའོ། །དགེ་བ་ལ་འཇུག་པའི་ཚུལ་ཁྲིམས་ལ་ཡང་རྣམ་པ་གསུམ་སྟེ། དཀོན་མཆོག་གསུམ་ལ་སྐྱབས་སུ་རྟོན་པར་འཇུག་པ། བསོད་ནམས་ལ་ཡིད་རྟོན་པར་འཇུག་པ། ཆོས་ཀྱི་དབྱིངས་རྟོགས་པར་འཇུག་པའོ། །སེམས་ཅན་གྱི་དོན་ལ་འཇུག་པའི་ཚུལ་ཁྲིམས་ལའང་། ཡོངས་སུ་མ་སྨིན་པ་སྨིན་པར་བྱ་བ། རྣམ་པར་མ་གྲོལ་བར་གྲོལ་བར་བྱ་བ། ཡོངས་སུ་མྱ་ངན་ལས་མ་འདས་པ་མྱ་ངན་ལས་འདའ་བའོ། །དེ་དག་གི་འབྲས་བུའང་། མཐོ་རིས་སུ་སྐྱེ་བ། བྱང་ཆུབ་ཀྱི་ཚོགས་རྫོགས་པ། གཞན་དོན་ཕུན་སུམ་ཚོགས་པའོ། ། ༈ བཟོད་པ་ལའང་། གནོད་པ་མི་མཇེད་པའི་བཟོད་པར། གཤེ་ཡང་ཕྱིར་མི་གཤེ་བ། བརྡེག་ཀྱང་ཕྱིར་མི་བརྡེག་པ། སྨད་ཀྱང་ཕྱིར་མི་སྨད་པའོ། །སྡུག་བསྔལ་ལ་ཇི་མི་སྙམ་པའི་བཟོད་པར་ཀྱང་། མ་འོངས་པའི་དུས་ཀྱི་སེམས་ཅན་ཐམས་ཅད་ཀྱི་དོན་བྱ་བས་མི་སྐྱོ་བའི་བཟོད་པ་དང་། སྤྱོད་ལམ་དམ་ལོག་པར་སྒྲུབ་པའི་སྡུག་བསྔལ་གྱིས་སྤ་མི་བཀང་བའི་བཟོད་པ་དང་། འདོད་ཆགས་ལ་སོགས་པའི་ཉོན་མོངས་པ་ཞི་ཞིང་སྤང་བར་བཟོད་པའོ། །ཆོས་ལ་ངེས་པར་རྟོགས་པའི་བཟོད་པ་ལ་ཡང་རྣམ་པ་གསུམ་སྟེ། སྟོད་པས་མི་སྐྲག་པ་དང་། མཐའ་གཉིས་ལ་མི་ཆགས་པ་དང་། དཀའ་བ་སྤྱད་པ་ལ་བརྟན་པར་བཟོད་པའོ། །དེའི་ཡོན་ཏན་ཀྱང་འཁོར་ཕུན་སུམ་ཚོགས་པ། མ་རབས་ཀྱི་སེམས་སྤོང་བ། ཟག་མེད་ཀྱི་ཤེས་རབ་སྐྱེ་བའོ། ། ༈ བརྩོན་འགྲུས་ལ་གསུམ་ལས། གོ་ཆའི་བརྩོན་འགྲུས་ལའང་གསུམ་སྟེ། བྱམས་པ་ཆེན་པོའི་གོ་ཆ་བགོ་བ། སྙིང་རྗེ་ཆེན་པོའི་མཐུ་བརྟན་པ། བརྩོན་འགྲུས་ཆེན་པོའི་མཐུ་བརྟན་པའོ། །དགེ་བ་ལ་སྦྱོར་བའི་བརྩོན་འགྲུས་ཀྱང་རྣམ་པ་གསུམ་སྟེ། དད་པ་ཆེན་པོས་དོན་ལ་རྟོན་པ་དང་། སྤྱོད་པ་ཆེན་པོས་དགེ་བ་ལ་འཇུག་པ། བསྔོ་བ་ཆེན་པོས་སེམས་ཅན་ལ་ཁྱབ་པའོ། །སེམས་ཅན་གྱི་དོན་ལ་སྦྱོར་བའི་བརྩོན་འགྲུས་ཀྱང་རྣམ་པ་གསུམ་སྟེ། སྒོམ་པ་དང་ཚུལ་ཁྲིམས་ལ་ཁྱད་པར་མེད་བར་བརྩོན་པ་དང་། བསྡུ་བ་རྣམ་བཞིའི་ཐབས་ཀྱིས་ཆོས་ཀྱི་དོན་ལ་འཇོག་པར་བརྩོན་པ་དང་། གཉེན་པོ་ལ་མི་འགོང་བའི་ཤེས་རབ་ཀྱི་ཐབས་སུ་བརྩོན་པའོ། །དེས་བདུད་བཞི་ཐུལ་བ། ས་བཅུ་རྫོགས་པ། འདྲེན་པ་ཆེན་པོའི་ཐབས་དང་ལྡན་པར་འགྱུར་རོ། ། ༈ རྣམ་པར་མི་རྟོག་ཅིང་ཞི་ལ་རབ་ཏུ་ཞི་བས་ཉོན་མོངས་པ་དང་སྡུག་བསྔལ་གྱི་གཉེན་པོ་བདེ་བར་གནས་པའི་བསམ་གཏན་ལ་ཡང་རྣམ་པ་གསུམ་སྟེ། སེམས་ཆོས་ལ་མི་རྟོག་པ་དང་། ཆོས་སེམས་ལ་མི་རྟོག་པ་དང་། བཏང་སྙོམས་ཀྱི་སེམས་གཉི་གར་མི་རྟོག་པའོ། །ཡོན་ཏན་མངོན་པར་སྒྲུབ་པའི་བསམ་གཏན་ལ་ཡང་རྣམ་པ་གསུམ་སྟེ། སྐུའི་ཡོན་ཏན་མངོན་པར་སྒྲུབ་པ། ཡེ་ཤེས་ཀྱི་ཡོན་ཏན་མངོན་པར་སྒྲུབ་པ། སྟོབས་ལ་སོགས་པའི་ཡོན་ཏན་མངོན་པར་སྒྲུབ་པའོ། །སེམས་ཅན་གྱི་དོན་མངོན་པར་སྒྲུབ་པའི་བསམ་གཏན་ལ་ཡང་། བསྔོ་བའི་ཏིང་ངེ་འཛིན། ཁྱབ་པའི་ཏིང་ངེ་འཛིན། མི་འགྱུར་པའི་ཏིང་ངེ་འཛིན་ཏོ། །དེ་ལ་འབྲས་བུར། རྣམ་པར་མི་རྟོག་ཅིང་ཞི་ལ་རབ་ཏུ་ཞི་བས་ཉོན་མོངས་པ་དང་སྡུག་བསྔལ་གྱི་གཉེན་པོ་བདེ་བར་གནས་པའི་བསམ་གཏན་གྱིས་ནི་རྣམ་པར་མི་རྟོག་པ་ལྷུན་གྱིས་གྲུབ་པར་འགྱུར། ཡོན་ཏན་མངོན་པར་བསྒྲུབ་པའི་བསམ་གཏན་གྱིས་ནི་རྒྱུ་ཕུན་སུམ་ཚོགས་པ་འཐོབ་པར་འགྱུར། སེམས་ཅན་གྱི་དོན་སྒྲུབ་པའི་བསམ་གཏན་གྱིས་ནི་སྙིང་རྗེ་ཆེན་པོས་སེམས་ཅན་གྱི་དོན་ལ་སྦྱོར་བར་འགྱུར་རོ། ། ༈ ཀུན་རྫོབ་ཀྱི་བདེན་པར་དམིགས་པའི་ཤེས་རབ་ལའང་རྣམ་པ་གསུམ་སྟེ། འདུས་བྱས་ཀྱི་མཚན་ཉིད་དང་། འཁོར་བའི་རྒྱུད་དང་། འཁོར་བའི་རྒྱུད་ལས་ལྡོག་བ་ལ་མཁས་པའོ། །དོན་དམ་པའི་བདེན་པར་དམིགས་པ་ལ་ཡང་རྣམ་པ་གསུམ་སྟེ། སྟོང་པ་ཉིད་པས་མི་གནས་པ་དང་། མཚན་མ་མེད་པས་མི་རྟོག་པ་དང་། སྨོན་པ་མེད་པས་མི་ཆགས་པའོ། །སེམས་ཅན་གྱི་དོན་ལ་དམིགས་པ་ལ་ཡང་རྣམ་པ་གསུམ་སྟེ། རང་བཞིན་གྱི་སྡུག་བསྔལ་ལ་ཏིང་ངེ་འཛིན་གྱིས་སྦྱོར་བ་དང་། འདུ་བྱེད་ཀྱི་སྡུག་བསྔལ་ལ་གཉེན་པོས་གཅོད་པ་དང་། ཐེ་ཚོམ་གྱི་སྡུག་བསྔལ་ལ་རྒྱས་པར་འགྲེལ་བའི་ཤེས་རབ་བོ། །དེས་ཀྱང་འཁོར་བ་ལ་མི་ཆགས་པ་དང་། འཕགས་པའི་ཤེས་རབ་མངོན་པར་འཐོབ་པ་དང་། སྤྲུལ་པ་མངོན་པར་སྟོན་པར་འགྱུར་རོ། །ཞེས་སོགས་ཕྱིན་དྲུག་གི་རྣམ་དབྱེ་ཤིན་ཏུ་རྒྱས་པར་ཡོད།། །། ༈ ན་མོ་མཉྫུ་གྷོ་ཥཱ་ཡ། སྤྱིར་ཆོས་ཐམས་ཅད་འདུས་བྱས་དང་། འདུས་མ་བྱས་གཉིས་སུ་འདུ་བ་ལས། འདུས་བྱས་ཀྱི་ཆོས་ཐམས་ཅད་ཕུང་པོ་ལྔར་འདུ་སྟེ། རྒྱུད་ལས། གཟུགས་དང་ཚོར་བ་འདུ་ཤེས་དང་། །འདུ་བྱེད་རྣམ་པར་ཤེས་པ་ལ། །ཕུང་པོ་ལྔ་ཞེས་རབ་ཏུ་བརྗོད། །ཅེས་སོ། །དེ་ཡང་གཟུགས་ཞེས་ངོ་བོ་སྟེ། །གཟུགས་སུ་རུང་བ་གཟུགས་ཀྱི་མཚན་ཉིད། ཕུང་པོ་ཞེས་པ་ཁྱད་ཆོས་ཏེ་སྤུངས་བའི་མིང་། དུ་མ་སྤུངས་བ་ཕུང་པོའི་མཚན་ཉིད་དོ། །དེ་ལ་གཟུགས་སུ་རུང་ཞེས་པ་ནི། སྲ་ཞིང་མཁྲེགས་པ་སའོ་སོགས་རང་རང་གི་མཚན་ཉིད་འཛིན་པའོ། །དབྱེ་ན་བཅོ་ལྔ་ལས། རྒྱུའི་གཟུགས། ས་སྲ་མཁྲེགས། ཆུ་བརླན་གཤེར། མེ་ཚ་སྲེག །རླུང་ཡང་གཡོ་ཞེས་རྒྱུ་ས་བོན་ལྟ་བུ། འབྲས་བུའི་གཟུགས། མིག་དབང་ཟར་མའི་མེ་ཏོག །རྣ་དབང་གྲོ་ག་གཅུས་པ། སྣ་ཟངས་སྦུབས་གཤིབས་པ། ལྕེ་ཟླ་གམ། གཟུགས་རེག་ན་འཇམ་གྱི་པགས་པ་ལྟ་བུ་སྟེ། འབྲས་བུ་མྱུ་གུ་ལྟ་བུའོ། །དེ་ལྔ་བྱེ་བྲག་མཐོང་ཡུལ་དུ་མིན་པ་དང་། གཞན་ལས་དྭངས་པའི་ཁྱད་པར་རོ། །མིག་ཁྲ་བ། སྣ་དུང་བ་སོགས་ནི་དེ་ཡི་རྟེན་དང་། གཉིད་དང་། བརྒྱལ་བ་ལྟ་བུའི་ཚེ་རྟེན་བརྟེན་པ་མཚུངས་ཞེས་བཏགས་སོ། །སད་པའམ་བརྒྱལ་སངས་ཚེ་རྟེན་བཅས་སོ། །ཡུལ་ནི་ལྔ་སྟེ། གཟུགས་སོགས་སོ། །དབང་པོ་ཞེས་པའི་དོན། སོ་སོར་དབང་མཐོང་ཚོར་སོགས་སྤྱི་མིང་། དེས་ན་མིག་གི་རྣམ་ཤེས་ཡུལ་ཅན། གཟུགས་ནི་ཡུལ་ལམ་ཕྱི་དོན་ནམ་དམིགས་ཡུལ་ལོ། །དེ་ཡང་གཟུགས་༢༠ལ་སྤྱིར་རྣམ་པ་གཉིས། བྱེ་བྲག་ཏུ་ཉི་ཤུའོ། །དང་པོ་ནི། དབྱིབས་དང་ཁ་དོག་གོ །དབྱིབས་གཟུགས་ནི་བརྒྱད་དེ། རིང་ཐུང་། མཐོ་དམན། ཕྱལ་ལེ་བ་སྟེ་མཉམ་པ་དང་། ཕྱལ་ལེ་བ་མིན་པ། ཟླུམ་པ། ལྷྭམ་པ་སྟེ་གྲུ་བཞིའོ། །ཁ་དོག་གི་གཟུགས་ནི་རྩ་བ་དང་། ཡན་ལག་ནི་ཁ་དོག་གཉིས། རྩ་བ་ནི། སྔོ་སེར་དཀར་དམར་རོ། །ཡན་ལག་ནི། སྤྲིན། དུ་བ། རྡུལ། ཁུག་རྣ། སྣང་བ། མུན་པ། ཉི་འོད། གྲིབ་མ་བརྒྱད་དོ། །དེ་རྣམས་བསྡོམས་པས་བྱེ་བྲག་ཉི་ཤུའོ། །སྒྲ་བརྒྱད་ལ། ཟིན་པ་དང་། མ་ཟིན་པ་གཉིས། ཟིན་པ་ལ་ལུང་སྟོན་པ་དང་། མི་སྟོན་པ་གཉིས། སྔ་མ་ནི་འདིར་སོགས་ལྟ་བུ་སྤྱིར་སྨྲས་པ་དང་། ཕྱི་མ་ནི་དར་དིར་སོགས་དོན་མི་གསལ་བ། མ་ཟིན་པ་ལའང་དོན་སྟོན་པ་ལྷའི་རྔ་བོ་ཆེ་བརྡུངས་པས་ཆོས་ཀྱི་སྡོམ་བཞི་གོ་བ་ལྟ་བུ་ལུང་སྟོན་པ་དང་། འབྱུང་བ་བཞིའི་སྒྲ་ལྟ་བུ་ལུང་དུ་མི་སྟོན་པ་གཉིས། དེ་རེ་རེ་ལའང་སྙན་པ་དང་མི་སྙན་པ་གཉིས་རེར་ཕྱེ་བས་བརྒྱད་དོ། །དྲི་ལ་ཞིམ་པ་དང་། མི་ཞིམ་པ་གཉིས། དེ་ལའང་ལྷན་སྐྱེས་དང་། སྦྱར་བ་གཉིས་སུ་ཕྱེ་བས་བཞིའོ། །རོ་དྲུག་ལ། ཁ། སྐ། ཚ་བ། ལན་ཚ་བ། མངར། སྐྱུར་དྲུག །རེག་བྱ་༡༡ལ་དབྱེ་ན། རྒྱུ་འབྱུང་གི་རེག་བྱ། འཇམ་རྩུབ། ལྕི་ཡང་། བཀྲེས་སྐོམ། གྲང་བ་དང་བདུན། འབྲས་བུ་འབྱུང་བ་བཞིའི་རེག་བྱའོ། །རྣམ་པར་རིག་བྱེད་མ་ཡིན་པའི་གཟུགས་ནི་ལས་ཀྱི་ཤུགས་ཀྱིས་ལུས་སྤྱིར་ཁྱབ་པའོ། །སྡོམ་པ་ལ་དབྱེ་ན་སྡོམ་པ་སྡོམ་མིན། བར་མའི་རིག་མིན་གྱི་གཟུགས་སོ། །དེ་ལྟར་ན་རེ་ཞིག་གཟུགས་ཀྱི་རྣམ་གྲངས་བཅོ་ལྔའོ། ། ༈ གཉིས་པ་ཚོར་བའི་ཕུང་པོ་ནི། ཉམས་སུ་མྱོང་བའི་མཚན་ཉིད་ཅན་གྱི་ཚོར་བ་བདེ་སྡུག་བར་མ་གསུམ། དེ་ལའང་། མིག་གི་འདུས་ཏེ་རེག་པའི་ཚོར་བ་བདེ་བ་སོགས་ཚོགས་དྲུག་སོ་སོར་སྦྱར་བས་ཚོར་བ་དྲུག་གསུམ་བཅོ་བརྒྱད་དོ། ། ༈ གསུམ་པ་འདུ་ཤེས་ཀྱི་ཕུང་པོ་ནི། ཡུལ་ལ་མཚན་ཕོ་དང་མོ་ལྟ་བུ་རང་གི་རྟགས། མར་འཛིན་པའི་མཚན་ཉིད་ཅན་གྱི་འདུ་ཤེས་རྒྱ་ཆེ་ཆུང་བར་མ་གསུམ་སྟེ། རིམ་བཞིན་རྒྱ་ཆུང་བ་འདོད་ཁམས། ཆེ་བ་གཟུགས་ཁམས། ཚད་མེད་པ་ནི་གཟུགས་མེད་ཀྱི་ཁམས་ལ་དམིགས་པའོ། ། ༈ གསུམ་པ་འདུ་བྱེད་ཀྱི་ཕུང་པོ་ནི། མངོན་པར་འདུ་བྱེད་པའི་མཚན་ཉིད་ཅན་གྱི་སེམས་པ་སྟེ། སེམས་བྱུང་གིས་ལས་ཐམས་ཅད་ལ་སེམས་པ། དབྱེ་ན་སེམས་བྱུང་ལྔ་བཅུ་རྩ་གཅིག་ལས། སྡོམ་ནི། ཚོར་འདུ་སེམས་པ་རེག་ཡིད་བྱེད། །འདི་དག་ཀུན་འགྲོ་ལྔ་ཡིན་ནོ། །ཞེས་པས། རྣམ་ཤེས་ཀྱི་འཁོར་དུ་རྣམ་པ་ཀུན་ཏུ་འགྲོ་བའི་སེམས་བྱུང་ལྔ་སྟེ། ཡིད་བྱེད་ཀྱིས་ཤེས་པ་ཡུལ་ལ་གཏད། རེག་པས་ཡུལ་དབང་ཤེས་གསུམ་མཚམས་སྦྱར། འདུ་ཤེས་ཀྱིས་ཡུལ་ལ་མཚན་མར་འཛིན། ཚོར་བས་ཡུལ་ཉམས་སུ་མྱོང་། སེམས་པས་ནང་དུ་སེམས་པར་བྱེད་དོ། །འདུན་མོས་དྲན་ཏིང་ཤེས་རབ་སྟེ། །འདི་དག་ཡུལ་ངེས་ལྔ་ཡིན་ནོ། །ཞེས་པས། ཡུལ་སོ་སོར་ངེས་པར་བྱེད་པ་སྟེ། ཡིད་ཀྱི་རྣམ་ཤེས་ཀྱི་འཁོར་གཞན་དང་ཐུན་མོང་མ་ཡིན་པའོ། །འདུན་པ་ནི་བསམ་པའི་དངོས་པོ་འདོད་པ། མོས་པ་ནི་ངེས་པའི་དངོས་པོ་ལ་ངེས་པར་འཛིན་པ། དྲན་པ་ནི་འདྲིས་པའི་དངོས་པོ་མ་བརྗེད་པ། ཏིང་ངེ་འཛིན་ནི་དམིགས་པའི་དངོས་པོ་ལ་སེམས་རྩེ་གཅིག་པ། ཤེས་རབ་ནི་ཆོས་རབ་ཏུ་རྣམ་པར་འབྱེད་པའོ། །དད་དང་བག་ཡོད་ཤིན་ཏུ་སྦྱངས། །བཏང་སྙོམས་ངོ་ཚ་ཤེས་ཁྲེལ་ཡོད། །འདོད་ཆགས་ཞེ་སྡང་གཏི་མུག་མེད། །རྣམ་པར་མི་འཚེ་བརྩོན་འགྲུས་ཏེ། །འདི་དག་དགེ་བ་བཅུ་གཅིག་གོ །ཞེས་པས། དད་པ་ནི་སེམས་དྭངས་བ། ངོ་ཚ་ནི་བདག་དང་ཆོས་ཀྱི་དབང་དུ་བྱས་ནས་ཁ་ན་མ་ཐོ་བ་ལ་འཛེམས་པ། ཁྲེལ་ཡོད་པ་ནི་འཇིག་རྟེན་གྱི་དབང་དུ་བྱས་ནས་ཁ་ན་མ་ཐོ་བར་སེམས་པ། འདོད་ཆགས་མེད་པ་ཞེན་ལོག །ཞེ་སྡང་མེད་པ་སྙིང་རྗེ། གཏི་མུག་མེད་བ་སོ་སོར་ཤེས་པ་སྟེ་མདོར་ན་དུག་གསུམ་གྱི་གཉེན་པོའི་ཕྱོགས་སོ། །བརྩོན་འགྲུས་ནི་ལེ་ལོའི་གཉེན་པོ་སྟེ་འབྲས་བུ་ལ་མྱུར་དུ་སྦྱོར་འདོད་པ། བག་ཡོད་ནི་བག་མེད་ཀྱི་གཉེན་པོ་སྟེ་ཉེས་པ་ལ་བག་ཟོན་བྱེད་པ། ཤིན་ཏུ་སྦྱངས་བ་ནི་ལུས་སེམས་ལས་སུ་རུང་བ་སྟེ་རང་དབང་ཐོབ་པ། བཏང་སྙོམས་ནི་འདུ་བྱེད་རྩོལ་བ་ལྷོད་པ། རྣམ་པར་མི་འཚེ་བ་ནི་བྱམས་པའོ། །འདོད་ཆགས་ཁོང་ཁྲོ་ང་རྒྱལ་དང་། །མ་རིག་ཐེ་ཚོམ་ལྟ་བ་སྟེ། །འདི་དག་རྩ་ཉོན་དྲུག་ཡིན་ནོ། །འདོད་ཆགས་ནི་ལུས་དང་ལོངས་སྤྱོད་ལ་ཆགས་པ། ཁོང་ཁྲོ་ནི་ཕ་རོལ་མནར་སེམས་པ། ང་རྒྱལ་ནི་ཁེངས་པའི་རྣམ་པ་ཅན་ཏེ། དབྱེ་ན། ང་རྒྱལ། ལྷག་པའི་ང་རྒྱལ། ང་རྒྱལ་ལས་ཀྱང་ང་རྒྱལ། ངའོ་སྙམ་པའི་ང་རྒྱལ་ཏེ་བདག་འཛིན། ཡུལ་དེ་དང་ཁྱད་པར་ཆེ་རུང་ཅུང་ཟད་ལས་མེད་སྙམ་པའི་ང་རྒྱལ། ཡོན་ཏན་ལ་རྩིས་དེ་ཙམ་མ་འོས་ཀྱང་། རྩིས་ཆེར་བྱེད་པ་མངོན་པའི་ང་རྒྱལ། ལོག་པའི་ང་རྒྱལ་ཏེ་བདུན་རང་མཐོ་ནོ། །མ་རིག་པ་ནི། དཀོན་མཆོག་གསུམ་དང་། བདེན་པ་བཞི་དང་། ལས་འབྲས་ལ་རྨོངས་པའོ། །བདེན་པ་བཞི་ནི། སྡུག་བདེན་ཆར་ལྟ་བུ། ཀུན་འབྱུང་སྤྲིན་ལྟ་བུ། འགོག་བདེན་ནམ་མཁའ་ལྟ་བུ། ལམ་བདེན་རླུང་ལྟ་བུའོ། །ཐེ་ཚོམ་ནི་ཡིད་གཉིས་ཀྱི་རྣམ་པ་ཅན་ནོ། །ལྟ་བ་ནི། འཇིག་ཚོགས་ལ་ལྟ་བ་སྟེ་བདག་འཛིན། མཐར་འཛིན་གྱི་ལྟ་བ། ལོག་པར་ལྟ་བ། ལྟ་བ་ལ་མཆོག་ཏུ་འཛིན་པ། ཚུལ་ཁྲིམས་དང་བརྟུལ་ཞུགས་མཆོག་འཛིན་ཏེ་ལྔའོ། །དེ་ལ་འཇིག་བལྟ་ཉི་ཤུ་ནི། ཕུང་པོ་ལྔ་ལ་བདག་ཏུ་ལྟ་བ་སྟེ། གཟུགས་བདག་ཡིན་སྙམ་པ་སོགས། ལྡན་པར་ལྟ་བ་སྟེ། བདག་གཟུགས་དང་ལྡན་ནོ་སྙམ་པ་སོགས། ཕན་ཚུན་གནས་པར་ལྟ་བ་སྟེ། བདག་ལ་གཟུགས་གནས་སོ་སྙམ་པ་དང་། གཟུགས་ལ་བདག་གནས་སོ་སྙམ་པ་རྣམས་སོ། །མཐར་འཛིན་གྱི་ལྟ་བ་ནི། སྐྱེ་འགགས། རྟག་ཆད། འགྲོ་འོང་། གཅིག་དུ་མ་སྟེ་བརྒྱད་དམ་ཡོད་མེད་རྟག་ཆད་བཞིའོ། །ལྟ་བ་ལྔ་པོ་ལ། འདོད་ཁྲོ་སོགས་གོང་གི་ལྟ་མིན་ལྔ་བསྡོམས་པས་སྲིད་པའི་ཕྲ་རྒྱས་བཅུའོ། །སེམས་ཁྲོ་དང་སྔོན་མར་མཁོན་འཛིན་འཆབ་གསང་དང་འཚིག ཚིག་པ་ཟ། ཕྲག་དོག །ཕྲག་པ་ཡན་ལ་མི་ཤོར་བ་སེར་སྣ་སྒྱུ་དང་གཡོ། །རྒྱགས་ལོང་ཤོར། དང་འཕྱར་གཡེང་ངོ་བདག་དང་ཆོས་ཀྱི་ཚ་མེད། །ཁྲེལ་གཞན་གྱི། མེད་རྨུགས་རྒོད་འདོད་སྲེད། མ་དད་དང་། །ལེ་ལོ་བག་མེད་བརྗེད་ངས་དང་། །ཤེས་བཞིན་གཡང་སར་མཆོང་བ་ལྟ་བུ། མ་ཡིན་རྣམ་གཡེང་སྟེ། །འདི་དག་ཉེ་ཉོན་ཉི་ཤུའོ། །ཞེས་རང་ལ་ཉེ་བར་འོང་བའི་ཉེ་ཉོན་ཉི་ཤུ་དང་། གཉིད་འགྱོད་རྟོག་དཔྱོད་གཞན་འགྱུར་བཞི། །ཞེས་གཞན་དབང་ལས་གྱུར་པ་བཞིའོ། །དེ་ལྟར་ལྔ་བཅུ་རྩ་གཅིག་ལས་ཚོར་འདུ་གཉིས་འཕྲི་བའི་ལྷག་མ་ཞེ་དགུ་ནི་འདུ་བྱེད་ཀྱི་ཕུང་པོ་ཡིན་ལ། སེམས་དང་མཚུངས་པར་ལྡན་པ་ཉིད་དོ། །མཚུངས་པར་མི་ལྡན་པའི་འདུ་བྱེད་ནི་བཅུ་བཞི་ཡོད་དེ། ཐོབ་དང་མ་ཐོབ་སྐལ་མཉམ་དང་། །འདུ་ཤེས་མེད་དང་སྙོམས་འཇུག་གཉིས། །སྲོག་དང་སྐྱེ་རྒ་གནས་མི་རྟག །མིང་ཚིག་ཡི་གེའི་ཚོགས་རྣམས་སོ། །ཞེས་སོ། །དེ་ལྟར་ན་འདུ་བྱེད་ཀྱི་ཕུང་པོ་རེ་གསུམ་མོ། ། ༈ རྣམ་པར་ཤེས་པའི་ཕུང་པོ་ནི། ཡུལ་ལ་རྣམ་པར་རིག་པའི་མཚན་ཉིད་ཅན་ཏེ། དབྱེ་ན་ཚོགས་དྲུག་གོ །ཐེག་ཆེན་ལྟར་ན་ཚོགས་བརྒྱད་ནི། ཀུན་གཞི་རྒྱ་མཚོ་རླུང་གིས་མ་བསྐྱོད་པ་ལྟ་བུ། འཇུག་ཤེས་དྲུག་ནི་རྦ་རླབས་ལྟ་བུ། ཉོན་ཡིད་ནི་རང་གི་འཁོར་ཐུན་མོང་མ་ཡིན་པ་བཞི་དང་ལྷན་ཅིག་ཏུ་ཀུན་གཞི་ལ་དམིགས་ནས་ཁ་ནང་བསྟན་དུ་པའོ་སྙམ་དུ་འཛིན་པ། བདག་ཏུ་འཛིན་པའོ། །འཁོར་བཞི་ནི། བདག་ཏུ་རྨོངས་པ། བདག་ཅེས་པ་ལས་རྒྱུ་མཚན་ཅི་ཡང་མི་ཤེས་པ། བདག་ཏུ་ལྟ་བ། བདག་ཏུ་ང་རྒྱལ་བ། བདག་ལ་ཆགས་པ་སྟེ་བཞིའོ། །ཚོགས་བརྒྱད་པོ་བསྡུ་ན་སེམས་གསུམ་སྟེ། ཀུན་གཞི་རྣམ་ཤེས་དམིགས་རྣམ་རིས་སུ་མ་ཆད་པར་འཇུག་ཤེས་སྤྱིའི་རྣམ་པ་ཙམ་དུ་དམིགས་པ། ཉོན་ཡིད་ནི་ཡིད། འཇུག་ཤེས་དྲུག་ནི་རྣམ་ཤེས་སོ། ། ༈ འདུས་མ་བྱས་ནི་གསུམ་སྟེ། ནམ་མཁའ་དང་། སོ་སོར་བརྟག་འགོགས་དང་། སོ་སོར་བརྟག་མིན་འགོག་གོ །དེ་ལྟར་ཤེས་བྱ་སྤྱིར་གཏན་ལ་དབབས་ནས། མཁས་པར་བྱ་བའི་གནས་དྲུག་ལ་འཇུག་པར་བྱ་སྟེ། སྡོམ་ནི། ཕུང་ཁམས་སྐྱེ་མཆེད་རྟེན་འབྲེལ་དང་། །གནས་དང་གནས་མིན་རྣམ་པ་དྲུག །ཅེས་པས། ཕུང་པོ་ནི་ལྔའོ། །ཁམས་ནི། མིག་གི་ཁམས་དང་། གཟུགས་ཀྱི་ཁམས་དང་། མིག་གི་རྣམ་པར་ཤེས་པའི་ཁམས་སོགས་བཅོ་བརྒྱད་དོ། །སྐྱེ་མཆེད་ནི། མིག་གི་སྐྱེ་མཆེད་དང་། གཟུགས་ཀྱི་སྐྱེ་མཆེད་སོགས་བཅུ་གཉིས་སོ། །དེ་ཡང་མིག་གི་ཡུལ་དུ་གཟུགས་སྐྱེ་བ་སོགས་རང་རང་གི་མཚན་ཉིད་དོ། །རྟེན་འབྲེལ་ནི་བཅུ་གཉིས་སོ། །གནས་ནི་རྒྱུ་དགེ་བས་བསོད་ནམས་གནས་ཡིན་པ་དང་། གནས་མིན་ནི་སྡིག་པས་གནས་མ་ཡིན་པ་ལྟ་བའོ། །འདི་དག་གི་སྐབས་སུ་རྒྱུ་འབྲས་རྐྱེན་གསུམ་གྱི་རྣམ་གཞག་ཅུང་ཟད་བཤད་ན། རྒྱུ་ནི། མཛོད་ལས། བྱེད་རྒྱུ་ལྷན་ཅིག་འབྱུང་བ་དང་། བདག་རྐྱེན་དང་གཅིག །སྐལ་མཉམ་ནས་ལས་ནས་སྐྱེ་བ་ལྟ་བུ། མཚུངས་པར་ལྡན་པ་དང་། ཕན་ཚུན་གཅིག་ལ་གཅིག་བརྟེན་པ། །ཀུན་ཏུ་འགྲོ་དང་རྣམ་སྨིན་ཏེ། །རྒྱུ་ནི་རྣམ་པ་དྲུག་ཏུ་འདོད། །ཅེས་སོ། །འབྲས་བུ་ནི། རྣམ་སྨིན་རྒྱུ་མཐུན་རྗེས་རྟོགས། བདག་པོ་དང་། མཁྲིས་ནད་ཅན་གྱིས་དུང་སེར། སྐྱེས་བུ་རྩོལ་བ་བྱས་པ། བྱེད་དང་བྲལ་འབྲས་ལྔ། ཉི་མ་སྤྲིན་བྲལ་རྐྱེན་ནི་རླུང་ཡིན་པ་ལྟར་རྐྱེན་གྱི་འབྲས་བུའོ། །ཞེས་སོ། །རྐྱེན་ནི། དབུ་མ་རྩ་བ་ལས། རྐྱེན་ནི་རྣམ་བཞི་རྒྱུ་དང་ནི། །དམིགས་པ་དང་ནི་དེ་མ་ཐག །བདག་པོ་ཡང་ནི་དེ་བཞིན་ཏེ། །རྐྱེན་ལྔ་པ་ནི་ཡོད་མ་ཡིན། །ཅེས་སོ། །གཞན་ཡང་ཆོས་ཁམས་ནི་བདུན་ཏེ། ཚོར་བ་འདུ་ཤེས་འདུ་བྱེད་དང་། །འདུས་མ་བྱས་ནི་རིག་མིན་བདུན། །ཞེས་སོ། །རྟེན་འབྲེལ་བཅུ་གཉིས་ཀྱང་བསྡུ་ན་གསུམ་སྟེ། ཀླུ་སྒྲུབ་ཀྱིས། དང་པོ་མ་རིག བརྒྱད་པ་སྲེད་པ། དགུ་ལེན་པ། ཉོན་མོངས། །འདུ་བྱེད་སྲིད་པ་ལས་ཡིན་ཏེ། །ལྷག་མ་བདུན་ནི་རྣམ་སྨིན་ནོ། །རྣམ་ཤེས། མིང་གཟུགས། སྐྱེ་མཆེད། རེག་པ། ཚོར། སྐྱེ། རྒ་ཤི། ཞེས་ཉོན་ལས་རྣམ་སྨིན་གྱི་ལམ་གསུམ་མོ། །མཚུངས་པ་ལྔ་མཚུངས་ཀྱི་རྒྱུ་ནི་མཚུངས་ལྡན་གྱི་རྒྱུའི་མཚན་ཉིད་དེ། མཚུངས་པ་ལྔ་ནི། དམིགས་རྣམ་རྫས་རྟེན་དུས་མཚུངས་པའོ། ། ༈ དེ་ལྟར་སྡོམ་དྲུག་ཤེས་ནས། གྲུབ་མཐའ་བཞིའི་ལྟ་བ་ལ་བསླབ་པར་བྱ་སྟེ། དེ་ཡང་ཐེག་པ་ནི་གསུམ་སྟེ། ཉན་རང་བྱང་སེམས་ཀྱི་ཐེག་པ་གསུམ་མོ། །གྲུབ་མཐའ་བཞི་སྟེ། བྱེ་མདོ་དབུ་སེམས་བཞིའོ། །སྔ་མ་གཉིས་ནི་ཐེག་དམན་ཏེ་ཉན་རང་དང་། ཕྱི་མ་གཉིས་ནི་ཐེག་ཆེན་བྱང་ཆུབ་སེམས་ལམ་ཞེས་གཙོ་བོའི་དབང་གིས་བཞག་གོ །གཞན་དུ་གྲུབ་མཐའ་བཞི་ཀས་ཐེག་གསུམ་གྱི་ལམ་དང་འབྲས་བུ་འདོད་པར་མཚུངས་སོ། །བྱེ་མདོ་གཉིས་ཀྱིས་ཤེས་བྱ་ནི་བསྡུ་ན་གཞི་ལྔ་སྟེ། སྣང་བ་གཟུགས་དང་གཙོ་བོ་སེམས། །དེ་འཁོར་སེམས་བྱུང་མི་ལྡན་པའི། །འདུ་བྱེད་འདུས་མ་བྱས་པའོ། །ཞེས་སོ། །དེ་རྣམས་ཀྱི་གྲངས་དང་གོ་རིམ་མཚུངས་ཀྱང་། བྱེ་སྨྲ་བས་གཞི་ལྔ་ལ་བདེན་གྲུབ་འདོད། མདོ་སྡེ་པས། འདུས་མ་བྱས་གསུམ་རྒྱུ་རྐྱེན་ལས་གྲོལ་བའི་ཕྱིར་དང་། རྫས་སུ་མེད་པ། ལྡན་མིན་འདུ་བྱེད་ནི་གཟུགས་སེམས་སེམས་བྱུང་གི་གནས་སྐབས་ཀྱི་ཆོས་ལ་བཏགས་པའི་བཏགས་ཡོད་ཙམ་དང་། སེམས་བྱུང་རྣམས་གཙོ་སེམས་ལས་རྫས་ཐ་དད་པ་མ་ཡིན་པས། དེས་ན་རྫས་སུ་ཡོད་པ་ནི་གཟུགས་སེམས་ཁོ་ནའོ། །ཞེས་འདོད། འདི་གཉིས་ཀས་ཕྱི་དོན་ཁས་ལེན་པས་དོན་སྨྲ་སྡེ་གཉིས་དང་། སེམས་ཙམ་པས་ཕྱི་དོན་ཁས་མི་ལེན་ཀྱང་ཡོངས་གྲུབ་ཡོད་པར་འདོད་པས་དེ་གསུམ་ལ་དངོས་པོར་སྨྲ་བ་ཞེས་འཇོག །འདི་གཉིས་ཀྱི་བདེན་གཉིས་འདོད་ཚུལ་ལ། བྱེ་སྨྲ་བས། མཛོད་ལས། གང་ལ་བཅོམ་ཐོ་བ་ལྟ་བུས། དང་བློ་ཡིས་གཞན། །བསལ་ན་དེ་བློ་སྔ་མའི་གཟུགས་ཀྱི། མི་འཇུག་པ། །བུམ་ཆུ་འཐོར་བའི་ཐིགས་པ། བཞིན་དུ་ཀུན་རྫོབ་ཏུ། །ཡོད་དེ་དོན་དམ་ཡོད་གཞན་ནོ། །ཞེས་དང་། མདོ་སྡེ་པས། རྣམ་འགྲེལ་ལས། དོན་བྱེད་ནུས་པ་ཀ་བ་ལྟ་བུ། གང་ཡིན་པ། །དེ་འདིར་དོན་དམ་ཡོད་པ་ཡིན། ཕྲ་རབ་ཕུང་པོར། །གཞན་ནི་ཀ་བ་ཞེས་པའི་མཚན་ཉིད་ཆད་པའི་ཀུན་བརྟགས་སོ། །ཀུན་རྫོབ་ཡོད་པ་སྟེ། །དེ་དག་རྡུལ་ཕྲ་རབ་དོན་དམ། རང་དང་སྤྱིའི་ཕྲ་རབ་སྤུངས་པའི་ཀ་བ་ཞེས་ཀུན་རྫོབ་བརྟགས་ཡོད་ཀྱི་ཆོས་ནི། མཚན་ཉིད་དུ་བཤད། །ཅེས་སོ། ། ༈

འོན་ཀྱང་དེ་ནི་རིགས་པའི་རྗེས་འབྲངས་རྣམས་ཡིན་ལ། ལུང་གི་རྗེས་འབྲངས་རྣམས་ཀྱིས་ནི་བྱེ་སྨྲ་བའི་བདེན་གཉིས་འཇོག་ཚུལ་དང་ཁྱད་མེད་དོ། །སེམས་ཙམ་པའི་གྲུབ་མཐའ་ནི། ལངྐར་གཤེགས་པ་ལས། ཆོས་ལྔ་དང་ནི་རང་བཞིན་དང་། །རྣམ་ཤེས་བརྒྱད་པོ་ཉིད་དག་དང་། །བདག་མེད་གཉིས་ཀྱི་དངོས་པོར་ནི། །ཐེག་ཆེན་ཐམས་ཅད་འདུས་པ་ཡིན། །ཞེས་ཆོས་ཀྱི་སྡོམ་བཞིའི་བརྗོད་བྱས་བཅིངས་ཏེ། དེ་ལ་ཆོས་ལྔ་ནི། མིང་དང་རྒྱུ་མཚན་རྣམ་རྟོག་དང་། །ཡང་དག་ཡེ་ཤེས་དེ་བཞིན་ཉིད། །ཅེས་པས་མིང་དང་རྒྱུ་མཚན་ནི་ཀུན་བརྟག་གིས་བསྡུས། རྣམ་པར་རྟོག་པའི་གཟུང་འཛིན་གཉིས་བསྡུས་ཀྱི་ཆོས་ཏེ་གཞན་དབང་ཀུན་རྫོབ་བདེན་པ། ཡང་དག་པའི་ཡེ་ཤེས་དང་། དེ་བཞིན་ཉིད་ནི་གཟུང་འཛིན་གཉིས་མེད་རི་རྭ་ལྟ་བུ། ཀྱི་ཤེས་པ་རང་རིག་རང་གསལ་ཡོངས་གྲུབ་དོན་དམ་པའི་བདེན་པའོ། །མཚན་ཉིད་གསུམ་ནི། ཀུན་བརྟག་གཞན་དབང་། ཡོངས་གྲུབ་བོ། །དེ་ལའང་རྣམ་གྲངས་པ་དང་། མཚན་ཉིད་ཡོངས་སུ་ཆད་པའི་ཀུན་བརྟག་གཉིས། དག་མ་དག་གི་གཞན་དབང་གཉིས། འགྱུར་མེད་དང་ཕྱིན་ཅི་མ་ལོག་པའི་ཡོངས་གྲུབ་གཉིས་ཏེ་དྲུག་གོ །ཚོགས་བརྒྱད་ནི་སྔར་སྨོས་པ་ལྟར་རོ། །བདག་མེད་གཉིས་ནི་ཆོས་དང་གང་ཟག་གི་བདག་མེད་གཉིས་སོ། །གཅིག་གམ་ཐ་དད་པའི་ཚུལ་གྱིས་མ་རྙེད་ན་མེད་ངེས་པས་ཁྱབ། གཞི་གྲུབ་ན་གཅིག་དང་ཐ་དད་གང་རུང་ཡིན་པས་ཁྱབ་བོ། །ནང་པ་སངས་རྒྱས་པས་གང་ཟག་གི་བདག་མེད་པར་འདོད་ཀྱང་། ཆོས་ཀྱི་སྟེང་ནས་བདེན་གཉིས་འཇོག་པར་འདོད། དེ་ཡང་གྲུབ་མཐའ་ལ་བལྟོས་མཐུན་པའི་རགས་པ་ཀུན་རྫོབ་དང་ཕྲ་བ་དོན་དམ་དུ་འདོད། དེ་ཡང་བལྟོས་བཞག་ཡིན་པའི་ཕྱིར། རིམ་པ་བཞིན་ཐེག་པ་འོག་མ་རྣམས་ཀྱི་དོན་མཐར་ཐུག་ཏུ་བཞག་པའི་གྲུབ་མཐའ་དེ། གོང་མ་རྣམས་ཀྱི་རིག་པས་ཕྱིས་ནས་དེ་ལས་ཕྲ་བའི་དོན་དམ་གཞན་ཡོད་པར་འདོད་པའོ། །དབུ་མ་པའི་གྲུབ་མཐའ་ནི། གཏན་ཚིགས་ཆེན་པོ་ལྔས་ཆོས་ཐམས་ཅད་སྐྱེ་མེད་དུ་གཏན་ལ་འབེབས་པའི་ཚུལ་ལ། རྒྱུ་ལ་དཔྱོད་པ་རྡོ་རྗེ་གཟེར་རྣོན་པོ་མ་ནི། སྙེ་མ་རང་ལས་སྐྱེ་བ་མ་ཡིན་པ་སོགས་མུ་བཞི། འབྲས་བུ་ལ་དཔྱད་པ་ཡོད་མེད་སྐྱེ་བྲལ་ནི་ས་བོན་འབྲས་བུ་ཡོད་ནས་སྐྱེ་བ་མ་ཡིན་པ་སོགས་དང་། གཉིས་ཀ་ལ་དཔྱད་པ་མུ་བཞི་སྐྱེ་འགོག་ནི། རྒྱུ་གཅིག་ལས་འབྲས་བུ་དུ་མ་སྐྱེ་བ་མ་ཡིན་པ་སོགས་མུ་བཞི། ངོ་བོ་ལ་དཔྱོད་པ། གཅིག་དང་དུ་བྲལ་ནི། གཞི་གྲུབ་ན་གཅིག་དུ་གང་རུང་ཡིན་པས་ཁྱབ་ཅིང་དེ་རིགས་ལ་མེད་པར་གྲུབ་པའོ། །རྟེན་འབྲེལ་ཆེན་པོའི་གཏན་ཚིགས་ནི། རྒྱུ་རྐྱེན་གཞན་ལ་བརྟེན་ནས་བྱུང་བའི་ཕྱིར་རང་གི་ངོ་བོས་མ་སྐྱེས་པའོ། །མདོར་ན་ཕྱི་ནང་གཉིས་གང་ཟག་གི་བདག་ཡོད་མེད་ལ་རྩོད། བྱེ་མདོ་གཉིས་བཞི་གསུམ་བདེན་གྲུབ་ཡིན་མིན་ལ་རྩོད། ཐེག་པ་ཆེ་ཆུང་གཉིས་ཕྱི་དོན་བདེན་གྲུབ་ཡིན་མིན་ལ་རྩོད། དབུ་སེམས་གཉིས་ཡོངས་གྲུབ་བདེན་གྲུབ་ཡིན་མིན་ལ་རྩོད། དེས་ན་ནང་བ་སངས་རྒྱས་པ་ལ་གང་ཟག་གི་བདག་མེད་མི་འདོད་པ་མེད། ཐེག་ཆེན་པ་ཆོས་ཀྱི་བདག་མེད་མི་འདོད་པ་མེད། དབུ་མ་པ་སྤྲོས་བྲལ་མི་འདོད་པ་མེད་དོ། །ཁྱད་པར་ཤེས་རབ་ཀྱི་བསླབ་པའི་སྐབས་སུ། ཡུལ་མེད་པ་རིག་པས་མ་རྙེད་ན་འཛིན་པ་གཞིག་མི་ནུས་ཏེ། དཔེར་ན་ལ་རྒྱབ་ལ་རྐུན་མ་མེད་སྙམ་པས་ད་གཟོད་འཕྲད་ཡོང་དུས་བེབ་མེད་པ་བཞིན་ནོ། །དེས་ན་ལེགས་པར་རྩད་བཅད་ནས་མེད་པར་ཤེས་དགོས་སོ། །གང་ཟག་གི་བདག་མེད་ནི། ངའོ་སྙམ་པའི་བདག་འཛིན་དང་། དེས་ན་མུ་སྟེགས་བྱེད་ཀྱིས་གསར་དུ་བཏགས་པའི་ལོག་རྟོག་བསམ་གྱིས་མི་ཁྱབ་པ་དང་བཅས་པ་སྟེ་དེ་ནི་ཕུང་པོ་ལྔ་སོགས་གང་ལ་འབད་པས་བཙལ་ཀྱང་བཙལ་མཁན་ལས་ལོགས་སུ་མ་རྙེད། བཙལ་མཁན་གྱི་སེམས་ཁོ་རང་ཡང་དུས་ཀྱི་ཆ་སྐད་ཅིག་མར་ཡལ་བས་ང་མ་རྙེད། ལར་ཡང་ཕུང་པོ་ལྔ་ཚོགས་སྟེང་དུ་ང་ཞེས་མཚན་ཉིད་ཆད་པའི་ཀུན་བཏགས་མིང་ཙམ་ལས་སྒེར་ན་གྲུབ་པའི་ང་མེད་པར་ལ་བཟླའོ། །ཆོས་ཀྱི་བདག་མེད་ནི། རྡུལ་གཅིག་ལ་ཕྱོགས་བཞིའི་རྡུལ་བཀོད། ཡང་དབུས་རྡུལ་དུ་བསིལ་ན་ཆ་མེད་དང་། རྣམ་རྟོག་སྔ་ཕྱི་སྐད་ཅིག་མ་དེ་མ་ཕྲད་ན་སྔ་མས་ཅི་བསམ་རྗེས་མས་མི་ཤེས། ཕྲད་ན་རྣམ་རྟོག་པར་མ་ལ་སྔོན་རྗེས་ཆ་གཉིས་ཡོད་པར་ཐལ། དེ་ཡང་བར་མ་བསིལ་ན་སྐད་ཅིག་ཆ་མེད་པ་ལྟར། ཆོས་བདག་མེད་པས་སྟོང་ངོ་། །དེས་ན་ཤུལ་དུ་ཆོས་སྣང་བ་སོ་སོའི་ལས་ཀྱི་དབང་གི་རྟེན་ནོ། །ཆོས་ནི་ཀུན་རྫོབ་གཟུང་འཛིན་གྱི་སྣང་བ་དང་། དེའི་སྟེང་ན་བདག་མེད་པ་ནི་ཆོས་ཉིད་དོན་དམ་པའོ། །ཀུན་གཞིའི་རྒྱུན་ཡོད་པར་བག་ཆགས་བཞག་པས་དེ་ལས་ཚོགས་དྲུག་དང་། སེམས་སེམས་བྱུང་སོགས་སྐྱེས་པས་ན་སྣང་བ་སེམས་སུ་ངེས་པའོ། །མཉམ་གཞག་སྟེང་ན་རྣམ་རྟོག་རྩད་བཅད་བཞིན་བདག་མེད་དུ་བསིལ། དེ་ཡང་སྟོང་པར་སྟོང་བཞིན་ཤེས་ཙམ་དྲན་ནས་བཞག་པ་ནི་སེམས་སྟོང་པར་ངེས་པའོ། །དེ་ཡང་བློ་འདས་སྤྲོས་བྲལ་དུ་ཤེས་པ་ནི་སྟོང་པ་རིག་པར་ངེས་པའོ། །མན་ངག་གི་དབང་དུ་ན་སེམས་གནས་བཞིན་དུ་མ་འགགས་པའི་ངང་ནས་ཅི་ཡང་ཤེས་པ་དང་གོ་བ་སོགས་ལྷག་མཐོང་ངོ་མ་དང་། ཤེས་བཞིན་པའི་གསལ་ཆའི་ངང་དུ་ལྷམ་མེར་གནས་སེམས་གནས་ཀྱང་ཟེར། པ་ནི་ཞི་གནས་སོ། །ལམ་བསླབ་པ་གསུམ་གྱི་ཚུལ་ཁྲིམས་ནི་སོ་བྱང་སྔགས་ཀྱི་འདུལ་བ་ལས་ཇི་ལྟར་བཅས་པ་བཞིན་མི་འདའ་བའོ། །ཏིང་ངེ་འཛིན་གྱི་ཞི་གནས་ཏེ། དེ་ལ་སེམས་ཀྱི་འཇོག་ཚུལ་དགུ་ནི། འཇོག་དང་རྒྱུན་འཇོག་སླན་ཏེ་འཇོག །དྲན་པས་ཡེངས་མི་འཇུག་པ་རྟ་ཁ་བསྐོར་བ་ལྟ་བུ། ཉེར་ཡེངས་སོང་བ་བསྡུབ། འཇོག་དུལ་ཕན་ཡོན་དྲན་པས་སྤྲོ་བ། དང་ཞི་བྱིང་རྒོད། བར་བྱེད། །རྣམ་དུག་ལྔའི་རྟོག་པ་གཞན། པར་ཞི་བྱེད་རྩེ་རྩོལ་བས་སྒྲིམ་བཞིན་པ། གཅིག་བྱེད། །མཉམ་བསྒྲིམས་ནས་ལྷོད་པའོ། །པར་འཇོག་པ་རྣམ་དགུའོ། །ཞེས་སོ། ། ༈ དེའི་མི་མཐུན་ཕྱོགས་ཉེས་པ་ལྔ་ནི། སྒྱིད་ལུག་དང་བྱ་བ་ངན་ཞེན་ལེ་ལོ་དམིགས་རྟེན་གདམས་ངག་བརྗེད་པ་དང་། །འཛིན་སྟངས་ལྷོད་པ་བྱིང་རྒོད་འདོད་པའི་ཆང་རྒོད་པ་འདུ་མི་བྱེད་མི་བསྒྲིམ་པ། པ་དང་། ཧ་ཅང་བསྒྲིམ་ཆེས་པའོ། །འདུ་བྱེད་རྣམ་པ་ལྔ། ཞེས་སོ། །དེ་སྤོང་བའི་འདུ་བྱེད་བརྒྱད་ནི། ཏིང་འཛིན་ལ་དད་འདུན་མོས་པ། རྩོལ་དང་ཤིན་དགའ་བ་སྐྱེ་བ། སྦྱངས་དང་། །མ་བརྗེད་པ། དྲན་ཤེས་གཡང་སར་འཛེམ་པ་ལྟ་བུ། སེམས་དང་བཏང་སྙོམས་རྩོལ་བ་དོར་བ། སོ། ཞེས་སོ། །ཤེས་རབ་ཀྱི་བསླབ་པ་ནི་ཆོས་ཐམས་ཅད་རྟེན་འབྲེལ་ཙམ་དུ་ཤེས་པའོ། །དེ་ལ་རྟེན་འབྲེལ་ནི་བཅུ་གཉིས་ཏེ། མ་རིག་པ་ཀུན་ཏུ་རྨོངས་པ། འདུ་བྱེད་སྒོ་གསུམ་གྱི་གསུམ། རྣམ་ཤེས་ཚོགས་དྲུག་གམ་བརྒྱད། ཚོར་བ་བདེ་སྡུག་བར་གསུམ། སྲེད་པ་འདོད་གཟུགས་གཟུགས་མེད་ཀྱི་གསུམ། ལེན་པ་བཞི་སྟེ། འདོད་པ། ལྟ་བ། ཚུལ་ཁྲིམས་དང་བརྟུལ་ཞུགས། བདག་ཏུ་སྨྲ་བ་ཉེ་བར་ལེན་པའོ། །སྲིད་པ་འདོད་གཟུགས་གཟུགས་མེད་གསུམ། སྐྱེ་མཆེད་བཅུ་གཉིས། སྐྱེ་ལེན་གྱི་རིགས་ཕུང་སོ་སོར་ཐོབ་པ། ཁམས་སོ་སོར་ཐོབ་པ། སྐྱེ་མཆེད་སོ་སོར་ཐོབ་པ། མངོན་པར་གྲུབ་པ་སྲོག་གི་དབང་པོ་རབ་ཏུ་སྐྱེས་པའོ། །རྒ་ཤི། སྐྲ་དཀར། མཉེར་མ། སྐྱི་ཐེར་སོགས་ཤིན་ཏུ་རྙིང་པ་རྣམས་སོ། །འཆི་བ་སྲོག་གི་དབང་པོ་འགགས་པའོ། །མདོར་ན་ཆོས་ཅན་ཀུན་རྫོབ་ཀྱི་བདེན་པ་ཐམས་ཅད་རྒྱུ་རྐྱེན་ཚོགས་པ་ལས་བྱུང་བ་ཆུ་ཟླ་ལྟ་བུ་དང་། ཆོས་ཉིད་དམ་པའི་བདེན་པ་རྒྱུ་རྐྱེན་སྤྲོས་པ་ལས་གྲོལ་བ་བློ་འདས་ནམ་མཁའ་ལྟ་བུར་ཤེས་པའི་ངང་ནས། ཐ་མལ་གྱི་ཤེས་པ་བཟོ་བཅོས་དང་བྲལ་བའི་ངང་དུ་གཉེན་པོའི་བློ་དང་དྲན་པའི་ཐག་པས་མི་འཆིང་བ་ནི་བདེན་གཉིས་ཟུང་འཇུག་དབུ་མའི་ལམ་རྨད་དུ་བྱུང་བ་རྟོགས་པར་བྱའོ། །ཞེས་པའང་ཟིན་བྲིས་ལས་བཏུས་སོ། །སརྦ་མངྒ་ལམ།། །། ༈

[edit]

gangs can gyi sgrub brgyud shing rta chen po rnams kyi rgyud sde dang man ngag las 'phros pa'i zin bris ci rigs/__ 'jam dpal dbyangs dngos khri srong lde'u btsan gyis mdzad pa'i bka' yang dag pa'i tshad ma zhes le'u bco lnga pa las/__chos so cog dbang du bgyid pa rig pa'i rnam pa smos pas 'jig rten na rgyal po dag bdag gi rigs su ci 'dod pa ngag gi dbang gis 'grub pa bzhin du/__chos so cog la bdag gi phyogs su ji ltar bzung ba yang rig pa'i dbang gis 'grub ste/__chos thams cad kyi rgyal po lta bu rig pa zhes bya ba chos kyi rjes gsungs pa'i rig pa bzhi brjod do/__/de gang yin zhe na/__'phags pa dgongs pa nges par 'grel pa'i mdo las gsungs pa/__rig pa de yang rnam pa bzhi ste/__bltos pa'i rig pa dang /__bya ba byed pa'i rig pa dang /__gtan tshigs sgrub pa'i rig pa dang /__chos nyid kyi rig pa bzhi/__zhes gsungs so/__/rig pa bzhi'i phyogs tsam zhig mdor brjod na/__bltos pa'i rig pa zhes bya ba ni chos dang 'bras bu'i rig pa brjod pa yin te/__'du byed gang dang gang la tha snyad du gdags pa dang /__gang dang gang gi 'bras bu skye ba yang de dang de'i rgyu rkyen la bltos par bstan pa'o/__/bya ba byed pa'i rig pa zhes bya ba ni las dang rgyu'i sgo nas brjod pa yin te/__gang dang gang gi bya ba de dang de la byed pa gang gi rgyu dang rkyen du nges pa ni de dang de'i 'bras bu'i bya ba byed par bstan pa'o/__/gtan tshigs sgrub pa'i rig pa zhes bya ba ni kun tu 'gro ba yin te/__gang dang gang bsgrub pa'i tshad ma'i mtshan nyid bstan pa'o/__/chos kyi rig pa zhes bya ba ni chos rnams kyi rang bzhin gyi sgo nas brjod pa yin te/__chos rnams la kun rdzob bden pa dang don dam pa'i bden pa gang dang gang gi rang bzhin yod pa de dang de bstan pa'o/__/zhes sogs de dag gi don zhib tu 'chad par snang ngo /__/de yang gsum pa gtan tshigs sgrub pa'i rig pa'i skabs su/__yongs su dag pa dang /__yongs su ma dag pa gnyis/__yongs su dag pa la rnam pa lnga ste/__mngon sum/__rjes dpag__/dpe/__grags pa/__lung ste lngar bshad/__le'u dgu par/__tshad ma'i grangs dang mtshan nyid kyi bka' thang la/__gtan tshigs sgrub pa'i rig pa de yang /__de ltar mngon sum gyi tshad ma dang /__rjes su dpag pa'i tshad ma dang /__yid ches pa lung gi tshad ma dang /__mtshan nyid lngas yongs su dag pa'o/__/zhes gsungs te/__tshad ma 'di dag ci'i phyir gsungs zhes ltag 'og spun te sbyar na 'jig rten gsum gyi sems can dag tshad ma ma yin par tshad mar ston cing tshad mar mi rung ba la tshad mar 'dzin par byung ba dang /__'byung ba dang /__'byung bar 'gyur ba mkhyen nas/__log par lta ba'i drwa ba bsal pa'i phyir tshad ma 'di gsungs pa yin no/__/tshad ma zhes bya ba ni ring thung la sor mo la sogs pas gzhal ba dang /__mang nyung la bre la sogs pas gzhal ba dang /__lci yang la srang la sogs pas gzhal ba lta bu yin te/__tshad ma ni mngon sum dang rjes su dpag pa dang yid ches pa'i lung dang gsum mo/__/tshad ma gsum ni dngos po bsgribs pa dang /__ma bsgribs pa dang /__de dag las kyang shin tu bsgribs pa'i chos dang gsum yod pas tshang ma yang gsum du gsungs so/__/de lta bas na mngon sum gyi tshad ma dang /__rjes su dpag pa'i tshad ma dang /__yid ches pa'i lung gi tshad ma yang zhes bya'o/__/tshad ma de dag gi mtshan nyid ni de gcig kyang lnga lngar shes par bya ste/__yongs su dag pa'i mtshan nyid lnga/__/zhes gsungs pa rnams yin no/__/de lta bas na mtshan nyid lngas yongs su dag go__/zhes gsungs so/__/ji ltar yongs su dag ce na/__mngon sum dang rjes su dpag pas nor ram ma nor gtan la dbab/__rjes su dpag pa ni mngon sum myong bas don la nges par bzhag ste/__mngon sum dang rjes su dpag pa de gnyis la the tshom yod pa ni rang gi rigs kyi dpes bsal bar byed do/__/de gsum tshogs nas 'grub pa la gcig tu nges pas yongs su grags pa yin te/__'jig rten gyi tshad ma'i grangs su chud do/__/lung ni mi las bla mar gyur pa'i chos yod par mi shes pa des mtshon cing ston/__mtshan nyid 'di lngas yongs su dag par 'gyur ro/__/yang ni 'jig rten gyi chos kyang rung /__'jig rten las 'das pa'i chos kyang rung /__gang la don rtogs par byed do cog ni yongs su dag pa'i mtshan nyid rdzogs pas rtogs par 'gyur te/__'jig rten las 'das pa'i chos dang /__shes par dka' ba rnams la ni mtshan nyid lnga po re re dang mthar gyis sbyar zhings rtags dgos pas mtshan nyid kyi bye brag gsal bar mngon no/__/'jig rten gyi chos dang shes par sla ba rnams ni mtshan nyid bzhi po tshad mas brtags par byed mod kyi/__de dag gi gzhal bya yang 'dris pa'i shas che ste/__lan du mar bslabs mi dgos pas mtshan nyid kyi bye brag kyang myur zhing phra ste gsal bar mi mngon bzhin du 'byung ngo /__/zhes dang /__sgrub tshul kyang /__mngon sum gyi tshad ma mtshan nyid lngas yongs su dag pas mi rtag pa la sogs pa gzhal zhing sgrub pa ni sngar bshad pa bzhin du gang 'du byed du rtogs pa thams cad kyi 'dra ba dang mi 'dra ba'i rgyun phyi ma skyes nas snga ma 'gag par mi dmigs pa dang 'dra ba dang mi 'dra ba phyi ma med cing snga ma gtong bar dmigs pa de dag so so rang gis rig pa ni mngon sum gyi mtshan nyid do/__/de la 'dra ba dang mi 'dra ba'i rgyun gzhan byung ba'i tshe/__snga ma 'gags pa'i phyir mi rtag pa nyid du rtogs par khong du chud pa ni nye bar rjes su dpag pa'i mtshan nyid do/__/'du byed rnams ni rtag pa'i mtshan nyid dang ldan pa'i nang nas kyang mi rtag pa mngon pa me lce'i rgyun la me lce 'gags nas me dag las thal ba dang sol bar 'gyur ba bzhin no zhes bya ba'i dpes bstan te/__rim gyis srid pa dang sbyar zhing mi rtag par bsgrubs pa ni rang gi rigs kyi dpe'i mtshan nyid do/__/mtshan nyid de gsum tshogs pas 'grub pa la gcig tu nges pa ni yongs su grags pa'i mtshan nyid do/__/gang thams cad mkhyen pas gsungs pa khong du chud pa nye ba'i rjes su dpag pa'i mtshan nyid do/__/'du byed thams cad mi rtag ces 'byung ba ni lung gi mtshan nyid do/__/de ltar na mtshan nyid lngas yongs su dag pa'i mngon sum gyis mi rtag par yongs su grub pa'o/__/zhes sogs nas bden pa bzhi kar tshad ma gsum dang sbyar ba'i rig pa zhib tu 'byung ngo /__/gzhan yang yongs su ma dag pa'i mtshan nyid bdun gang zhe na/__de las gzhan dang mthun par dmigs pa'i mtshan nyid dang /__de las gzhan dang mi mthun par dmigs pa'i mtshan nyid dang /__thams cad mthun par dmigs pa'i mtshan nyid dang /__thams cad mi mthun par dmigs pa'i mtshan nyid dang /__rang bzhin gyi rigs dang mthun pa'i dpe'i mtshan nyid dang /__yongs su grags pa'i mtshan nyid dang /__lung rnam par ma dag pa'i mtshan nyid do/__/zhes dang /__de rnams rgyas par bshad cing /__me'i rtags ni du ba'o/__/rang bzhin ni dro ba'o/__/las ni 'tshed bar byed pa'o/__/chos ni 'bar ba'o/__/rgyu ni sems can gyis tsha ba rnam par rtogs pa'o/__/zhes rtags sogs drug go/__/bzhi pa chos nyid kyi rig pa la bden pa bcus shes par bya ste/__'phags pa chos kun 'gro ba'i mdo las/__de la byang chub sems dpa' rnams kyi bden pa bcu gang zhe na/__'di lta ste/__kun rdzob kyi bden pa dang /__don dam pa'i bden pa dang /__mtshan nyid kyi bden pa dang /__rnam par dbye ba'i bden pa dang /__/nges par rtogs pa'i bden pa dang /__dngos po'i bden pa dang /__nus pa'i bden pa dang /__zad pa dang mi skye ba shes pa'i bden pa dang /__lam la 'jug pa'i bden pa dang /__de bzhin gshegs pa'i ye shes kun 'byung ba'i bden pa ste/__'di dag ni bden pa bcu'o/__/zhes dang /__de dag gi don rgyas par bshad/__yang le'u bco lnga pa tshad ma'i yon tan su bkod par/__mdor bsdu na rnam pa gsum ste/__yongs su dag pa'i yon tan rdzogs pa yin/__yongs su ma dag pa'i skyon gyis ma gos pa yin/__phan yon gyi legs pa dang ldan pa yin no/__/de la yongs su dag pa'i yon tan rdzogs pa gang zhe na/__rnam pa lngar shes par bya ste/__tshad ma yongs su dag pas 'grub pa la gcig tu nges pa dang /__gzhal bya phun sum tshogs pas 'jig rten dang 'jig rten las 'das pa'i chos chub pa dang /__sgrub pa yan lag yongs su rdzogs pa dang /__lta ba rnam par dag pa dang /__tshad ma'i bye brag rab tu shes par 'gyur ba dang lnga'o/__/zhes sogs de'i don rgyas pa dang /__yongs su ma dag pa'i skyon gyis ma gos pa gang zhe na/__rnam pa gsum du shes par bya ste/__'gal ba med pa yin/__ma nges pa yin/__so so skye bo'i nor ba med pa yin no/__/zhes sogs dang /__phan yon gyi legs pa dang ldan pa gang zhe na/__rnam pa gnyis te/__thams cad mkhyen pas gsungs pa bzhin du bris te chos la brten pas de bzhin gshegs pas byin gyis brlabs shing bsgrubs pa la mthu chen po yin/__dpal gyi zhal nas gsungs pa nang gcig gis gcig bkrol te/__lhad ma zhugs pa'i gsung rabs nyid yin pas gang gis bklags pa dang /__thos pa dang /__bsam pa tsam gyis kyang sdig pa 'byong zhing bsod nams 'phel ba yin no/__/zhes sogs gsungs shing /__mdor na bstan bcos 'di ni rig pa rnam pa bzhi'i zhar la tshad ma lngas de bzhin gshegs pa'i gsung legs par bsgrubs pa khyad par can du snang bas blo gsal zhing don du gnyer ba rnams kyis nan tan du rtogs par byos shig___/__!_ gzhan yang /__mngon sum yongs su dag pa'i mtshan nyid la/__de la 'du byed thams cad mi rtag pa nyid dang /__'du byed thams cad sdug bsngal ba nyid dang /__chos thams cad bdag med pa nyid du gang 'jig rten na mngon sum du dmigs pa'i mtshan nyid do/__/zhes gsungs pa'i mtshan nyid du bshad do/__/mngon sum du zhes bya ba ni rkyen bzhis bskyed pa'i rnam par shes pa'i sgrib pa dag gis ma bsgribs pas yul la mngon sum du dmigs pa yin te/__da ltar byung ba'i rnam par shes pa lnga po dag dang /__des drangs pa'i yid kyi rnam par shes pa dang bcas pas dus gcig spyod yul gcig tu da ltar byung pa'i yul thad kar babs pa la dmigs nas/__yul de so so'i don rang gis rig pa ni mngon sum pa'i mtshan nyid ces bya'o/__/yid kyi rnam par shes pa 'ba' zhig gis chos kyi khams la dmigs pa'ang chos la dmigs pa'i mngon sum zhes bya'o/__/zhes dang /__rjes su dpag pa yongs su dag pa'i mtshan nyid la/__'du byed thams cad skad cig pa nyid dang /__'jig rten pha rol po yod pa/__dge ba dang mi dge ba'i las rnam par chud mi za ba dang /__gang de la gnas pa'i mi rtag pa rags pa mngon sum du dmigs pa dang /__gang sems can sna tshogs la gnas pa mngon sum du dmigs pa dang /__gang sems can bde ba dang sdug bsngal ba dge ba dang mi dge ba la gnas pa mngon sum du dmigs pa yin te/__gang gis mngon sum du ma gyur pa la rjes su dpag par bya ba yin no/__/'di dang tshul 'di lta bu dag ni de la gnas pa'i mngon sum la dmigs pa'i mtshan nyid do zhes gsungs pa'i mtshan nyid bshad do/__/de la gnas pa'i mngon sum gyi dmigs pa zhes bya ba ni gang rjes su dpag par bya ba de'i rang bzhin lkog na 'dug ste/__mngon sum gyis ma dmigs kyang de la gnas pa'i rtags sam/__las sam/__chos sam/__rgyu'am/__'bras bu'am/__de rnams kyi nang nas gang mngon sum gyis dmigs pa'i rjes su 'jug pa'i blos rjes su dpag ste/__de'i gnas dang rang bzhin shes par bya'o/__/zhes dang /__rang gi rigs kyi dpe dang sbyar ba'i mtshan nyid la nang dang phyi'i 'du byed rnams kyi 'jig pa dang /__skye bar dmigs pa'i 'jig rten thams cad la grags pa nye bar sbyar ba dang /__skye ba la sogs pa'i sdug bsngal dmigs pas nye bar sbyar ba dang /__rang dbang med par dmigs pas nye bar sbyar ba dang /__phyi rol gyi phun sum tshogs pa dang rgud pa nye bar dmigs pas 'jig rten thams cad la grags pa nye bar sbyar ba 'di dang /__rnam pa 'di lta bu dag ni rang gi rigs kyi dpe nye bar sbyar ba'i mtshan nyid du shes par bya'o/__/zhes gsungs pa de'i mtshan nyid bshad do/__/so so skye bo rnams la thub pa dag gis gtsug lag tu bstan pa ni/__gang 'jig rten la ma grub pa sgrub cing khong du ma chud pa khong du gzhug pa'i phyir ston pas na/__mngon sum gyi dmigs pa yang rung /__rjes su dpag pas shes par bya ba yang rung /__the tshom sel ba'i grogs su rang gi rigs kyi dpes bstan par bya'o/__/zhes dang /__yongs su grags pa yongs su dag pa'i mtshan nyid la/__gang 'di de mngon sum du dmigs pa'i mtshan nyid dang /__de la gnas pa mngon sum du dmigs pa'i mtshan nyid dang /__rang gi rigs kyi dpe nye bar sbyar ba'i mtshan nyid ni/__de 'grub par bya ba la gcig tu nges pa'i phyir yongs su grags pa'i mtshan nyid du rig par shes par bya'o/__/zhes gsungs pa de'i mtshan nyid bshad do/__/yongs su grags pa zhes bya ba ni chos rnams la mngon sum du dmigs pa dang /__rjes su dpag pas rig pa dang /__rang gi rigs gyi dpe nye bar sbyar ba gsum 'tshogs nas gcig tu nges pa 'di ni yongs su grags pa'i mtshan nyid ces bya ste/__mngon sum la sogs pa gsum so sor smos pa ni mtshan nyid kyi bye brag go__/zhes dang /__shin tu rnam par dag pa'i lung gtan la dbab par bstan pa'i mtshan nyid la/__gang thams cad mkhyen pas bshad pa 'di lta ste/__mya ngan las 'das pa ni zhi ba'o/__/zhes bya ba 'di dang /__rnam pa 'di lta bu dag ni shin tu rnam par dag pa'i lung gtan la dbab par bstan pa'i mtshan nyid du shes par bya'o/__/zhes dang /__ci'i phyir lung shin tu rnam par dag pa yin zhe na/__dus gsum gyi sangs rgyas rnams kyang chos dang mthun par ston pas na lung zhes bya'o/__/chos kyis tshad mar byas pa'i mtshan nyid dang ldan la rang bzo'i lhad ma zhugs pas na shin tu rnam par dag pa zhes bya'o/__/zhes sogs rgya cher bstan snang ngo /__/zhes dang /__gzhon nu gser mdog gi rtogs pa brjod par/__bud med mchog rnams la thun mong ma yin pa'i chos rnam pa lnga yod de/__lnga gang zhe na/__skyes pa chags par yang shes shing ma chags par yang shes pa dang /__dus shes shing sa bon shes pa dang /__gang las mngal du 'jug pa de shes pa dang /__khye'ur gyur pa shes shing bu mor gyur pa shes te/__gal te khye'ur gyur na ni dku g.yas par brten cing gnas la/__gal te bu mor gyur na ni dku g.yon par brten cing gnas so/__/zhes dang /___/__!_ 'phags pa dgongs pa nges 'grel gyi TIka__/co jo mdzad pa po gang yin mi gsal bar phar phyin drug gi dbye ba bsdus pa/___/__!_ chos kyi sbyin pa la'ang /__glegs bam sbyin pa/__gzhung bzhin 'chad pa/__mkhan por ston pa'o/__/zang zing gi sbyin par/__phyi'i/__nang gi__/phyi nang gnyis ka'i zang zing gi sbyin pa'o/__/mi 'jigs par rkyen gyi sdug bsngal/__srog gi bar chad/__'khor ba'i rgyud las bskyabs pa'o/__/gsum po'i 'bras bu'ang /__'jig rten las 'das pa/__longs spyod chen po 'thob pa/__tshe la bar chad med par 'gyur ro/__/_! mi dge ba las ldog pa'i tshul khrims kyang rnam pa gsum ste/__lus/__ngag__/yid mi dge ba las ldog pa'o/__/dge ba la 'jug pa'i tshul khrims la yang rnam pa gsum ste/__dkon mchog gsum la skyabs su rton par 'jug pa/__bsod nams la yid rton par 'jug pa/__chos kyi dbyings rtogs par 'jug pa'o/__/sems can gyi don la 'jug pa'i tshul khrims la'ang /__yongs su ma smin pa smin par bya ba/__rnam par ma grol bar grol bar bya ba/__yongs su mya ngan las ma 'das pa mya ngan las 'da' ba'o/__/de dag gi 'bras bu'ang /__mtho ris su skye ba/__byang chub kyi tshogs rdzogs pa/__gzhan don phun sum tshogs pa'o/___/__!_ bzod pa la'ang /__gnod pa mi mjed pa'i bzod par/__gshe yang phyir mi gshe ba/__brdeg kyang phyir mi brdeg pa/__smad kyang phyir mi smad pa'o/__/sdug bsngal la ji mi snyam pa'i bzod par kyang /__ma 'ongs pa'i dus kyi sems can thams cad kyi don bya bas mi skyo ba'i bzod pa dang /__spyod lam dam log par sgrub pa'i sdug bsngal gyis spa mi bkang ba'i bzod pa dang /__'dod chags la sogs pa'i nyon mongs pa zhi zhing spang bar bzod pa'o/__/chos la nges par rtogs pa'i bzod pa la yang rnam pa gsum ste/__stod pas mi skrag pa dang /__mtha' gnyis la mi chags pa dang /__dka' ba spyad pa la brtan par bzod pa'o/__/de'i yon tan kyang 'khor phun sum tshogs pa/__ma rabs kyi sems spong ba/__zag med kyi shes rab skye ba'o/___/__!_ brtson 'grus la gsum las/__go cha'i brtson 'grus la'ang gsum ste/__byams pa chen po'i go cha bgo ba/__snying rje chen po'i mthu brtan pa/__brtson 'grus chen po'i mthu brtan pa'o/__/dge ba la sbyor ba'i brtson 'grus kyang rnam pa gsum ste/__dad pa chen pos don la rton pa dang /__spyod pa chen pos dge ba la 'jug pa/__bsngo ba chen pos sems can la khyab pa'o/__/sems can gyi don la sbyor ba'i brtson 'grus kyang rnam pa gsum ste/__sgom pa dang tshul khrims la khyad par med bar brtson pa dang /__bsdu ba rnam bzhi'i thabs kyis chos kyi don la 'jog par brtson pa dang /__gnyen po la mi 'gong ba'i shes rab kyi thabs su brtson pa'o/__/des bdud bzhi thul ba/__sa bcu rdzogs pa/__'dren pa chen po'i thabs dang ldan par 'gyur ro/___/__!_ rnam par mi rtog cing zhi la rab tu zhi bas nyon mongs pa dang sdug bsngal gyi gnyen po bde bar gnas pa'i bsam gtan la yang rnam pa gsum ste/__sems chos la mi rtog pa dang /__chos sems la mi rtog pa dang /__btang snyoms kyi sems gnyi gar mi rtog pa'o/__/yon tan mngon par sgrub pa'i bsam gtan la yang rnam pa gsum ste/__sku'i yon tan mngon par sgrub pa/__ye shes kyi yon tan mngon par sgrub pa/__stobs la sogs pa'i yon tan mngon par sgrub pa'o/__/sems can gyi don mngon par sgrub pa'i bsam gtan la yang /__bsngo ba'i ting nge 'dzin/__khyab pa'i ting nge 'dzin/__mi 'gyur pa'i ting nge 'dzin to/__/de la 'bras bur/__rnam par mi rtog cing zhi la rab tu zhi bas nyon mongs pa dang sdug bsngal gyi gnyen po bde bar gnas pa'i bsam gtan gyis ni rnam par mi rtog pa lhun gyis grub par 'gyur/__yon tan mngon par bsgrub pa'i bsam gtan gyis ni rgyu phun sum tshogs pa 'thob par 'gyur/__sems can gyi don sgrub pa'i bsam gtan gyis ni snying rje chen pos sems can gyi don la sbyor bar 'gyur ro/___/_! kun rdzob kyi bden par dmigs pa'i shes rab la'ang rnam pa gsum ste/__'dus byas kyi mtshan nyid dang /__'khor ba'i rgyud dang /__'khor ba'i rgyud las ldog ba la mkhas pa'o/__/don dam pa'i bden par dmigs pa la yang rnam pa gsum ste/__stong pa nyid pas mi gnas pa dang /__mtshan ma med pas mi rtog pa dang /__smon pa med pas mi chags pa'o/__/sems can gyi don la dmigs pa la yang rnam pa gsum ste/__rang bzhin gyi sdug bsngal la ting nge 'dzin gyis sbyor ba dang /__'du byed kyi sdug bsngal la gnyen pos gcod pa dang /__the tshom gyi sdug bsngal la rgyas par 'grel ba'i shes rab bo/__/des kyang 'khor ba la mi chags pa dang /__'phags pa'i shes rab mngon par 'thob pa dang /__sprul pa mngon par ston par 'gyur ro/__/zhes sogs phyin drug gi rnam dbye shin tu rgyas par yod//___//_! na mo many+dzu g+ho ShA ya/__spyir chos thams cad 'dus byas dang /__'dus ma byas gnyis su 'du ba las/__'dus byas kyi chos thams cad phung po lngar 'du ste/__rgyud las/__gzugs dang tshor ba 'du shes dang /__/'du byed rnam par shes pa la/__/phung po lnga zhes rab tu brjod/__/ces so/__/de yang gzugs zhes ngo bo ste/__/gzugs su rung ba gzugs kyi mtshan nyid/__phung po zhes pa khyad chos te spungs ba'i ming /__du ma spungs ba phung po'i mtshan nyid do/__/de la gzugs su rung zhes pa ni/__sra zhing mkhregs pa sa'o sogs rang rang gi mtshan nyid 'dzin pa'o/__/dbye na bco lnga las/__rgyu'i gzugs/__sa sra mkhregs/__chu brlan gsher/__me tsha sreg__/rlung yang g.yo zhes rgyu sa bon lta bu/__'bras bu'i gzugs/__mig dbang zar ma'i me tog__/rna dbang gro ga gcus pa/__sna zangs sbubs gshibs pa/__lce zla gam/__gzugs reg na 'jam gyi pags pa lta bu ste/__'bras bu myu gu lta bu'o/__/de lnga bye brag mthong yul du min pa dang /__gzhan las dwangs pa'i khyad par ro/__/mig khra ba/__sna dung ba sogs ni de yi rten dang /__gnyid dang /__brgyal ba lta bu'i tshe rten brten pa mtshungs zhes btags so/__/sad pa'am brgyal sangs tshe rten bcas so/__/yul ni lnga ste/__gzugs sogs so/__/dbang po zhes pa'i don/__so sor dbang mthong tshor sogs spyi ming /__des na mig gi rnam shes yul can/__gzugs ni yul lam phyi don nam dmigs yul lo/__/de yang gzugs 20la spyir rnam pa gnyis/__bye brag tu nyi shu'o/__/dang po ni/__dbyibs dang kha dog go__/dbyibs gzugs ni brgyad de/__ring thung /__mtho dman/__phyal le ba ste mnyam pa dang /__phyal le ba min pa/__zlum pa/__l+h+wam pa ste gru bzhi'o/__/kha dog gi gzugs ni rtsa ba dang /__yan lag ni kha dog gnyis/__rtsa ba ni/__sngo ser dkar dmar ro/__/yan lag ni/__sprin/__du ba/__rdul/__khug rna/__snang ba/__mun pa/__nyi 'od/__grib ma brgyad do/__/de rnams bsdoms pas bye brag nyi shu'o/__/sgra brgyad la/__zin pa dang /__ma zin pa gnyis/__zin pa la lung ston pa dang /__mi ston pa gnyis/__snga ma ni 'dir sogs lta bu spyir smras pa dang /__phyi ma ni dar dir sogs don mi gsal ba/__ma zin pa la'ang don ston pa lha'i rnga bo che brdungs pas chos kyi sdom bzhi go ba lta bu lung ston pa dang /__'byung ba bzhi'i sgra lta bu lung du mi ston pa gnyis/__de re re la'ang snyan pa dang mi snyan pa gnyis rer phye bas brgyad do/__/dri la zhim pa dang /__mi zhim pa gnyis/__de la'ang lhan skyes dang /__sbyar ba gnyis su phye bas bzhi'o/__/ro drug la/__kha/__ska/__tsha ba/__lan tsha ba/__mngar/__skyur drug__/reg bya 11la dbye na/__rgyu 'byung gi reg bya/__'jam rtsub/__lci yang /__bkres skom/__grang ba dang bdun/__'bras bu 'byung ba bzhi'i reg bya'o/__/rnam par rig byed ma yin pa'i gzugs ni las kyi shugs kyis lus spyir khyab pa'o/__/sdom pa la dbye na sdom pa sdom min/__bar ma'i rig min gyi gzugs so/__/de ltar na re zhig gzugs kyi rnam grangs bco lnga'o/___/__!_ gnyis pa tshor ba'i phung po ni/__nyams su myong ba'i mtshan nyid can gyi tshor ba bde sdug bar ma gsum/__de la'ang /__mig gi 'dus te reg pa'i tshor ba bde ba sogs tshogs drug so sor sbyar bas tshor ba drug gsum bco brgyad do/___/__!_ gsum pa 'du shes kyi phung po ni/__yul la mtshan pho dang mo lta bu rang gi rtags/____mar 'dzin pa'i mtshan nyid can gyi 'du shes rgya che chung bar ma gsum ste/__rim bzhin rgya chung ba 'dod khams/__che ba gzugs khams/______tshad med pa ni gzugs med kyi khams la dmigs pa'o/___/__!_ gsum pa 'du byed kyi phung po ni/__mngon par 'du byed pa'i mtshan nyid can gyi sems pa ste/__sems byung gis las thams cad la sems pa/__dbye na sems byung lnga bcu rtsa gcig las/__sdom ni/__tshor 'du sems pa reg yid byed/__/'di dag kun 'gro lnga yin no/__/zhes pas/__rnam shes kyi 'khor du rnam pa kun tu 'gro ba'i sems byung lnga ste/__yid byed kyis shes pa yul la gtad/__reg pas yul dbang shes gsum mtshams sbyar/__'du shes kyis yul la mtshan mar 'dzin/__tshor bas yul nyams su myong /__sems pas nang du sems par byed do/__/'dun mos dran ting shes rab ste/__/'di dag yul nges lnga yin no/__/zhes pas/__yul so sor nges par byed pa ste/__yid kyi rnam shes kyi 'khor gzhan dang thun mong ma yin pa'o/__/'dun pa ni bsam pa'i dngos po 'dod pa/__mos pa ni nges pa'i dngos po la nges par 'dzin pa/__dran pa ni 'dris pa'i dngos po ma brjed pa/__ting nge 'dzin ni dmigs pa'i dngos po la sems rtse gcig pa/__shes rab ni chos rab tu rnam par 'byed pa'o/__/dad dang bag yod shin tu sbyangs/__/btang snyoms ngo tsha shes khrel yod/__/'dod chags zhe sdang gti mug med/__/rnam par mi 'tshe brtson 'grus te/__/'di dag dge ba bcu gcig go__/zhes pas/__dad pa ni sems dwangs ba/__ngo tsha ni bdag dang chos kyi dbang du byas nas kha na ma tho ba la 'dzems pa/__khrel yod pa ni 'jig rten gyi dbang du byas nas kha na ma tho bar sems pa/__'dod chags med pa zhen log__/zhe sdang med pa snying rje/__gti mug med ba so sor shes pa ste mdor na dug gsum gyi gnyen po'i phyogs so/__/brtson 'grus ni le lo'i gnyen po ste 'bras bu la myur du sbyor 'dod pa/__bag yod ni bag med kyi gnyen po ste nyes pa la bag zon byed pa/__shin tu sbyangs ba ni lus sems las su rung ba ste rang dbang thob pa/__btang snyoms ni 'du byed rtsol ba lhod pa/__rnam par mi 'tshe ba ni byams pa'o/__/'dod chags khong khro nga rgyal dang /__/ma rig the tshom lta ba ste/__/'di dag rtsa nyon drug yin no/__/'dod chags ni lus dang longs spyod la chags pa/__khong khro ni pha rol mnar sems pa/__nga rgyal ni khengs pa'i rnam pa can te/__dbye na/__nga rgyal/__lhag pa'i nga rgyal/__nga rgyal las kyang nga rgyal/__nga'o snyam pa'i nga rgyal te bdag 'dzin/__yul de dang khyad par che rung cung zad las med snyam pa'i nga rgyal/__yon tan la rtsis de tsam ma 'os kyang /__rtsis cher byed pa mngon pa'i nga rgyal/__log pa'i nga rgyal te bdun rang mtho no/__/ma rig pa ni/__dkon mchog gsum dang /__bden pa bzhi dang /__las 'bras la rmongs pa'o/__/bden pa bzhi ni/__sdug bden char lta bu/__kun 'byung sprin lta bu/__'gog bden nam mkha' lta bu/__lam bden rlung lta bu'o/__/the tshom ni yid gnyis kyi rnam pa can no/__/lta ba ni/__'jig tshogs la lta ba ste bdag 'dzin/__mthar 'dzin gyi lta ba/__log par lta ba/__lta ba la mchog tu 'dzin pa/__tshul khrims dang brtul zhugs mchog 'dzin te lnga'o/__/de la 'jig blta nyi shu ni/__phung po lnga la bdag tu lta ba ste/__gzugs bdag yin snyam pa sogs/__ldan par lta ba ste/__bdag gzugs dang ldan no snyam pa sogs/__phan tshun gnas par lta ba ste/__bdag la gzugs gnas so snyam pa dang /__gzugs la bdag gnas so snyam pa rnams so/__/mthar 'dzin gyi lta ba ni/__skye 'gags/__rtag chad/__'gro 'ong /__gcig du ma ste brgyad dam yod med rtag chad bzhi'o/__/lta ba lnga po la/__'dod khro sogs gong gi lta min lnga bsdoms pas srid pa'i phra rgyas bcu'o/__/sems khro dang sngon mar mkhon 'dzin 'chab gsang dang 'tshig__tshig pa za/__phrag dog__/phrag pa yan la mi shor ba ser sna sgyu dang g.yo/__/rgyags long shor/__dang 'phyar g.yeng ngo bdag dang chos kyi tsha med/__/khrel gzhan gyi/__med rmugs rgod 'dod sred/__ma dad dang /__/le lo bag med brjed ngas dang /__/shes bzhin g.yang sar mchong ba lta bu/__ma yin rnam g.yeng ste/__/'di dag nye nyon nyi shu'o/__/zhes rang la nye bar 'ong ba'i nye nyon nyi shu dang /__gnyid 'gyod rtog dpyod gzhan 'gyur bzhi/___/zhes gzhan dbang las gyur pa bzhi'o/__/de ltar lnga bcu rtsa gcig las tshor 'du gnyis 'phri ba'i lhag ma zhe dgu ni 'du byed kyi phung po yin la/__sems dang mtshungs par ldan pa nyid do/__/mtshungs par mi ldan pa'i 'du byed ni bcu bzhi yod de/__thob dang ma thob skal mnyam dang /__/'du shes med dang snyoms 'jug gnyis/__/srog dang skye rga gnas mi rtag__/ming tshig yi ge'i tshogs rnams so/__/zhes so/__/de ltar na 'du byed kyi phung po re gsum mo/___/__!_ rnam par shes pa'i phung po ni/__yul la rnam par rig pa'i mtshan nyid can te/__dbye na tshogs drug go__/theg chen ltar na tshogs brgyad ni/__kun gzhi rgya mtsho rlung gis ma bskyod pa lta bu/__'jug shes drug ni rba rlabs lta bu/__nyon yid ni rang gi 'khor thun mong ma yin pa bzhi dang lhan cig tu kun gzhi la dmigs nas kha nang bstan du pa'o snyam du 'dzin pa/__bdag tu 'dzin pa'o/__/'khor bzhi ni/__bdag tu rmongs pa/__bdag ces pa las rgyu mtshan ci yang mi shes pa/__bdag tu lta ba/__bdag tu nga rgyal ba/__bdag la chags pa ste bzhi'o/__/tshogs brgyad po bsdu na sems gsum ste/__kun gzhi rnam shes dmigs rnam ris su ma chad par 'jug shes spyi'i rnam pa tsam du dmigs pa/__nyon yid ni yid/__'jug shes drug ni rnam shes so/___/_! 'dus ma byas ni gsum ste/__nam mkha' dang /__so sor brtag 'gogs dang /__so sor brtag min 'gog go__/de ltar shes bya spyir gtan la dbabs nas/__mkhas par bya ba'i gnas drug la 'jug par bya ste/__sdom ni/__phung khams skye mched rten 'brel dang /__/gnas dang gnas min rnam pa drug__/ces pas/__phung po ni lnga'o/__/khams ni/__mig gi khams dang /__gzugs kyi khams dang /__mig gi rnam par shes pa'i khams sogs bco brgyad do/__/skye mched ni/__mig gi skye mched dang /__gzugs kyi skye mched sogs bcu gnyis so/__/de yang mig gi yul du gzugs skye ba sogs rang rang gi mtshan nyid do/__/rten 'brel ni bcu gnyis so/__/gnas ni rgyu dge bas bsod nams gnas yin pa dang /__gnas min ni sdig pas gnas ma yin pa lta ba'o/__/'di dag gi skabs su rgyu 'bras rkyen gsum gyi rnam gzhag cung zad bshad na/__rgyu ni/__mdzod las/__byed rgyu lhan cig 'byung ba dang /__bdag rkyen dang gcig__/skal mnyam nas las nas skye ba lta bu/__mtshungs par ldan pa dang /__phan tshun gcig la gcig brten pa/__/kun tu 'gro dang rnam smin te/__/rgyu ni rnam pa drug tu 'dod/__/ces so/__/'bras bu ni/__rnam smin rgyu mthun rjes rtogs/__bdag po dang /__mkhris nad can gyis dung ser/__skyes bu rtsol ba byas pa/__byed dang bral 'bras lnga/__nyi ma sprin bral rkyen ni rlung yin pa ltar rkyen gyi 'bras bu'o/__/zhes so/__/rkyen ni/__dbu ma rtsa ba las/__rkyen ni rnam bzhi rgyu dang ni/__/dmigs pa dang ni de ma thag__/bdag po yang ni de bzhin te/__/rkyen lnga pa ni yod ma yin/__/ces so/__/gzhan yang chos khams ni bdun te/__tshor ba 'du shes 'du byed dang /__/'dus ma byas ni rig min bdun/__/zhes so/__/rten 'brel bcu gnyis kyang bsdu na gsum ste/__klu sgrub kyis/__dang po ma rig__brgyad pa sred pa/__dgu len pa/__nyon mongs/__/'du byed srid pa las yin te/__/lhag ma bdun ni rnam smin no/__/rnam shes/__ming gzugs/__skye mched/__reg pa/__tshor/__skye/__rga shi/__zhes nyon las rnam smin gyi lam gsum mo/__/mtshungs pa lnga mtshungs kyi rgyu ni mtshungs ldan gyi rgyu'i mtshan nyid de/__mtshungs pa lnga ni/__dmigs rnam rdzas rten dus mtshungs pa'o/___/__!_ de ltar sdom drug shes nas/__grub mtha' bzhi'i lta ba la bslab par bya ste/__de yang theg pa ni gsum ste/__nyan rang byang sems kyi theg pa gsum mo/__/grub mtha' bzhi ste/__bye mdo dbu sems bzhi'o/__/snga ma gnyis ni theg dman te nyan rang dang /__phyi ma gnyis ni theg chen byang chub sems lam zhes gtso bo'i dbang gis bzhag go__/gzhan du grub mtha' bzhi kas theg gsum gyi lam dang 'bras bu 'dod par mtshungs so/__/bye mdo gnyis kyis shes bya ni bsdu na gzhi lnga ste/__snang ba gzugs dang gtso bo sems/__/de 'khor sems byung mi ldan pa'i/__/'du byed 'dus ma byas pa'o/__/zhes so/__/de rnams kyi grangs dang go rim mtshungs kyang /__bye smra bas gzhi lnga la bden grub 'dod/__mdo sde pas/__'dus ma byas gsum rgyu rkyen las grol ba'i phyir dang /__rdzas su med pa/__ldan min 'du byed ni gzugs sems sems byung gi gnas skabs kyi chos la btags pa'i btags yod tsam dang /__sems byung rnams gtso sems las rdzas tha dad pa ma yin pas/__des na rdzas su yod pa ni gzugs sems kho na'o/__/zhes 'dod/__'di gnyis kas phyi don khas len pas don smra sde gnyis dang /__sems tsam pas phyi don khas mi len kyang yongs grub yod par 'dod pas de gsum la dngos por smra ba zhes 'jog__/'di gnyis kyi bden gnyis 'dod tshul la/__bye smra bas/__mdzod las/__gang la bcom tho ba lta bus/__dang blo yis gzhan/__/bsal na de blo snga ma'i gzugs kyi/__mi 'jug pa/__/bum chu 'thor ba'i thigs pa/__bzhin du kun rdzob tu/__/yod de don dam yod gzhan no/__/zhes dang /__mdo sde pas/__rnam 'grel las/__don byed nus pa ka ba lta bu/__gang yin pa/__/de 'dir don dam yod pa yin/__phra rab phung por/__/gzhan ni ka ba zhes pa'i mtshan nyid chad pa'i kun brtags so/__/kun rdzob yod pa ste/__/de dag rdul phra rab don dam/__rang dang spyi'i phra rab spungs pa'i ka ba zhes kun rdzob brtags yod kyi chos ni/__mtshan nyid du bshad/__/ces so/___/__!_ 'on kyang de ni rigs pa'i rjes 'brangs rnams yin la/__lung gi rjes 'brangs rnams kyis ni bye smra ba'i bden gnyis 'jog tshul dang khyad med do/__/sems tsam pa'i grub mtha' ni/__lang+kar gshegs pa las/__chos lnga dang ni rang bzhin dang /__/rnam shes brgyad po nyid dag dang /__/bdag med gnyis kyi dngos por ni/__/theg chen thams cad 'dus pa yin/__/zhes chos kyi sdom bzhi'i brjod byas bcings te/__de la chos lnga ni/__ming dang rgyu mtshan rnam rtog dang /__/yang dag ye shes de bzhin nyid/__/ces pas ming dang rgyu mtshan ni kun brtag gis bsdus/__rnam par rtog pa'i gzung 'dzin gnyis bsdus kyi chos te gzhan dbang kun rdzob bden pa/__yang dag pa'i ye shes dang /__de bzhin nyid ni gzung 'dzin gnyis med ri rwa lta bu/__kyi shes pa rang rig rang gsal yongs grub don dam pa'i bden pa'o/__/mtshan nyid gsum ni/__kun brtag gzhan dbang /__yongs grub bo/__/de la'ang rnam grangs pa dang /__mtshan nyid yongs su chad pa'i kun brtag gnyis/__dag ma dag gi gzhan dbang gnyis/__'gyur med dang phyin ci ma log pa'i yongs grub gnyis te drug go__/tshogs brgyad ni sngar smos pa ltar ro/__/bdag med gnyis ni chos dang gang zag gi bdag med gnyis so/__/gcig gam tha dad pa'i tshul gyis ma rnyed na med nges pas khyab/__gzhi grub na gcig dang tha dad gang rung yin pas khyab bo/__/nang pa sangs rgyas pas gang zag gi bdag med par 'dod kyang /__chos kyi steng nas bden gnyis 'jog par 'dod/__de yang grub mtha' la bltos mthun pa'i rags pa kun rdzob dang phra ba don dam du 'dod/__de yang bltos bzhag yin pa'i phyir/__rim pa bzhin theg pa 'og ma rnams kyi don mthar thug tu bzhag pa'i grub mtha' de/__gong ma rnams kyi rig pas phyis nas de las phra ba'i don dam gzhan yod par 'dod pa'o/__/dbu ma pa'i grub mtha' ni/__gtan tshigs chen po lngas chos thams cad skye med du gtan la 'bebs pa'i tshul la/__rgyu la dpyod pa rdo rje gzer rnon po ma ni/__snye ma rang las skye ba ma yin pa sogs mu bzhi/__'bras bu la dpyad pa yod med skye bral ni sa bon 'bras bu yod nas skye ba ma yin pa sogs dang /__gnyis ka la dpyad pa mu bzhi skye 'gog ni/__rgyu gcig las 'bras bu du ma skye ba ma yin pa sogs mu bzhi/__ngo bo la dpyod pa/__gcig dang du bral ni/__gzhi grub na gcig du gang rung yin pas khyab cing de rigs la med par grub pa'o/__/rten 'brel chen po'i gtan tshigs ni/__rgyu rkyen gzhan la brten nas byung ba'i phyir rang gi ngo bos ma skyes pa'o/__/mdor na phyi nang gnyis gang zag gi bdag yod med la rtsod/__bye mdo gnyis bzhi gsum bden grub yin min la rtsod/__theg pa che chung gnyis phyi don bden grub yin min la rtsod/__dbu sems gnyis yongs grub bden grub yin min la rtsod/__des na nang ba sangs rgyas pa la gang zag gi bdag med mi 'dod pa med/__theg chen pa chos kyi bdag med mi 'dod pa med/__dbu ma pa spros bral mi 'dod pa med do/__/khyad par shes rab kyi bslab pa'i skabs su/__yul med pa rig pas ma rnyed na 'dzin pa gzhig mi nus te/__dper na la rgyab la rkun ma med snyam pas da gzod 'phrad yong dus beb med pa bzhin no/__/des na legs par rtsad bcad nas med par shes dgos so/__/gang zag gi bdag med ni/__nga'o snyam pa'i bdag 'dzin dang /__des na mu stegs byed kyis gsar du btags pa'i log rtog bsam gyis mi khyab pa dang bcas pa ste de ni phung po lnga sogs gang la 'bad pas btsal kyang btsal mkhan las logs su ma rnyed/__btsal mkhan gyi sems kho rang yang dus kyi cha skad cig mar yal bas nga ma rnyed/__lar yang phung po lnga tshogs steng du nga zhes mtshan nyid chad pa'i kun btags ming tsam las sger na grub pa'i nga med par la bzla'o/__/chos kyi bdag med ni/__rdul gcig la phyogs bzhi'i rdul bkod/__yang dbus rdul du bsil na cha med dang /__rnam rtog snga phyi skad cig ma de ma phrad na snga mas ci bsam rjes mas mi shes/__phrad na rnam rtog par ma la sngon rjes cha gnyis yod par thal/__de yang bar ma bsil na skad cig cha med pa ltar/__chos bdag med pas stong ngo /__/des na shul du chos snang ba so so'i las kyi dbang gi rten no/__/chos ni kun rdzob gzung 'dzin gyi snang ba dang /__de'i steng na bdag med pa ni chos nyid don dam pa'o/__/kun gzhi'i rgyun yod par bag chags bzhag pas de las tshogs drug dang /__sems sems byung sogs skyes pas na snang ba sems su nges pa'o/__/mnyam gzhag steng na rnam rtog rtsad bcad bzhin bdag med du bsil/__de yang stong par stong bzhin shes tsam dran nas bzhag pa ni sems stong par nges pa'o/__/de yang blo 'das spros bral du shes pa ni stong pa rig par nges pa'o/__/man ngag gi dbang du na sems gnas bzhin du ma 'gags pa'i ngang nas ci yang shes pa dang go ba sogs lhag mthong ngo ma dang /__shes bzhin pa'i gsal cha'i ngang du lham mer gnas sems gnas kyang zer/__pa ni zhi gnas so/__/lam bslab pa gsum gyi tshul khrims ni so byang sngags kyi 'dul ba las ji ltar bcas pa bzhin mi 'da' ba'o/__/ting nge 'dzin gyi zhi gnas te/__de la sems kyi 'jog tshul dgu ni/__'jog dang rgyun 'jog slan te 'jog__/dran pas yengs mi 'jug pa rta kha bskor ba lta bu/__nyer yengs song ba bsdub/__'jog dul phan yon dran pas spro ba/__dang zhi bying rgod/__bar byed/__/rnam dug lnga'i rtog pa gzhan/__par zhi byed rtse rtsol bas sgrim bzhin pa/__gcig byed/__/mnyam bsgrims nas lhod pa'o/__/par 'jog pa rnam dgu'o/__/zhes so/___/__!_de'i mi mthun phyogs nyes pa lnga ni/__sgyid lug dang bya ba ngan zhen le lo dmigs rten gdams ngag brjed pa dang /__/'dzin stangs lhod pa bying rgod 'dod pa'i chang rgod pa 'du mi byed mi bsgrim pa/__pa dang /__ha cang bsgrim ches pa'o/__/'du byed rnam pa lnga/__zhes so/__/de spong ba'i 'du byed brgyad ni/__ting 'dzin la dad 'dun mos pa/__rtsol dang shin dga' ba skye ba/__sbyangs dang /__/ma brjed pa/__dran shes g.yang sar 'dzem pa lta bu/__sems dang btang snyoms rtsol ba dor ba/__so/__zhes so/__/shes rab kyi bslab pa ni chos thams cad rten 'brel tsam du shes pa'o/__/de la rten 'brel ni bcu gnyis te/__ma rig pa kun tu rmongs pa/__'du byed sgo gsum gyi gsum/__rnam shes tshogs drug gam brgyad/__tshor ba bde sdug bar gsum/__sred pa 'dod gzugs gzugs med kyi gsum/__len pa bzhi ste/__'dod pa/__lta ba/__tshul khrims dang brtul zhugs/__bdag tu smra ba nye bar len pa'o/__/srid pa 'dod gzugs gzugs med gsum/__skye mched bcu gnyis/__skye len gyi rigs phung so sor thob pa/__khams so sor thob pa/__skye mched so sor thob pa/__mngon par grub pa srog gi dbang po rab tu skyes pa'o/__/rga shi/__skra dkar/__mnyer ma/__skyi ther sogs shin tu rnying pa rnams so/__/'chi ba srog gi dbang po 'gags pa'o/__/mdor na chos can kun rdzob kyi bden pa thams cad rgyu rkyen tshogs pa las byung ba chu zla lta bu dang /__chos nyid dam pa'i bden pa rgyu rkyen spros pa las grol ba blo 'das nam mkha' lta bur shes pa'i ngang nas/__tha mal gyi shes pa bzo bcos dang bral ba'i ngang du gnyen po'i blo dang dran pa'i thag pas mi 'ching ba ni bden gnyis zung 'jug dbu ma'i lam rmad du byung ba rtogs par bya'o/__/zhes pa'ang zin bris las btus so/__/sarba mang+ga lam//___//_!