JKCL-KABUM-12-NA-055

🚧 This website is under continued development. We appreciate your patience!

Previous Text Back to Volume PageNext Text

ཐེག་ཆེན་བློ་སྦྱོང་སྨོན་ལམ་ནོར་བུའི་སྙིང་པོ།

Wylie title	theg chen blo sbyong smon lam nor bu'i snying po
Location	chos kyi blo gros bka' 'bum Volume 12, Text 55, Pages 273-276 (Folios 1a1 to 2b6)
Author	འཇམ་དབྱངས་མཁྱེན་བརྩེ་ཆོས་ཀྱི་བློ་གྲོས་
Less details More details
Citation	'jam dbyangs mkhyen brtse chos kyi blo gros. theg chen blo sbyong smon lam nor bu'i snying po. In Rdzong sar mkhyen brtse 'jam dbyangs chos kyi blo gros kyi gsung 'bum, Vol. 12: 273-276. Bir, H.P.: Khyentse Labrang, 2012.
Genre	Mind Training Texts - blo sbyong  ·  Prayers - smon lam
Colophon	།ཅེས་པའང་སྦྲུལ་ཟླ་བ་བརྒྱད་པའི་ཚེས་བཅུ་གསུམ་ལ་བྱང་ཆུབ་སེམས་དཔའ་བློ་གྲོས་ལུང་རྟོགས་རྒྱ་མཚོ་གཞན་ཕན་དྲི་མ་མེད་པའི་འོད་ཀྱིས་སྙིང་ནས་སྨོན་ལམ་དུ་བཏབ་པ་ངེས་པར་འགྲུབ་པ་ཞིག་བླ་མ་རྒྱལ་བ་སྲས་བཅས་ཀྱི་བྱིན་གྱི་རླབས་ཏུ་གསོལ། འདི་ཁོ་ན་འགྲུབ་པར་གྱུར་ཅིག།
	/ces pa'ang sbrul zla ba brgyad pa'i tshes bcu gsum la byang chub sems dpa' blo gros lung rtogs rgya mtsho gzhan phan dri ma med pa'i 'od kyis snying nas smon lam du btab pa nges par 'grub pa zhig bla ma rgyal ba sras bcas kyi byin gyi rlabs tu gsol/__'di kho na 'grub par gyur cig/

1 Texts in this Section (sde tshan or chos tshan)

273-276	ཐེག་ཆེན་བློ་སྦྱོང་སྨོན་ལམ་ནོར་བུའི་སྙིང་པོ། theg chen blo sbyong smon lam nor bu'i snying po Prayers - smon lam   ·   Mind Training Texts - blo sbyong	Text page View PDF
	[[|འཇམ་དབྱངས་མཁྱེན་བརྩེ་ཆོས་ཀྱི་བློ་གྲོས་ ()]]

Tibetan Text

Wylie

[edit]

ཐེག་ཆེན་བློ་སྦྱོང་སྨོན་ལམ་ནོར་བུའི་སྙིང་པོ་ཞེས་བྱ་བ་བཞུགས་སོ། །ན་མོ་གུ་རུ། སྟོན་པ་མཉམ་མེད་ཤཱཀྱའི་རྒྱལ་པོ་དང་། །སྤྱན་རས་གཟིགས་དང་རྗེ་བཙུན་སྒྲོལ་མའི་ཞབས། །ཁྲོ་བོའི་རྒྱལ་པོ་མི་གཡོ་མགོན་པོ་དང་། །ལྷ་གཅིག་ཇོ་བོ་ཆེན་པོ་ཡབ་སྲས་རྣམས། །མི་ངན་བདག་གི་གཙུག་གི་རྒྱན་བཞུགས་ནས། །སྒོ་གསུམ་ཆོས་དང་འདྲེས་པར་བྱིན་གྱིས་རློབས། །རྟེན་གཞི་ཕུན་ཚོགས་དལ་དང་འབྱོར་པ་འདི། །དུས་བརྒྱ་ལན་གཅིག་ཐོབ་པ་ད་རེས་ཙམ། །མི་ཚེ་སོས་དལ་བསྐྱལ་བའི་མེ་ལོང་ཡིས། །བདུད་ཀྱིས་མ་བསླུས་ད་རེས་དོན་ཡོད་དུ། །དམ་པའི་ཆོས་ལ་འབད་པ་དྲག་པོས་བརྩོན། །སང་དང་འཇིག་རྟེན་ཕྱི་མའི་སྣང་བ་གཉིས། །སྔོན་ལ་གང་འབྱུང་ངེས་པར་ཆ་མི་འཚལ། །ཡུན་རིང་སྡོད་པའི་གྲབས་ཆུས་ངན་པ་འདིས། །གཏན་བདེའི་འདུན་མ་བརླག་པར་བྱེད་པས་ན། །མྱུར་བ་མྱུར་བར་ཆོས་ལ་འབད་པར་ཤོག །བརྩོན་འགྲུས་ནགས་ཀྱི་མེ་ཆེན་རབ་སྦར་ནས། །འཁོར་བའི་རྒྱ་མཚོ་སྐེམ་པར་བྱེད་པ་དང་། །དཀར་ནག་བསགས་པའི་ལས་ལ་གྲངས་མི་ཆོད། །གཞན་ལ་བགོ་སྐལ་བྱེད་དུ་མ་མཆིས་ཤིང་། །རང་བྱས་མཚོན་ཆ་ཐམས་ཅད་རང་ལ་འཁོར། །རང་གི་ཕུང་པོར་མྱོང་བ་གདོན་མི་ཟ། །དཀར་ནག་ལས་ཀྱི་འབྲས་བུ་མ་ནོར་བ། །སྨིན་ལ་བསླུ་བ་མེད་པའི་ངེས་རྙེད་ཤོག །ལས་ངན་བསགས་པའི་འབྲས་བུ་ཆེན་པོ་ནི། །འཁོར་བའི་གནས་ན་སྡུག་བསྔལ་རྒྱུན་ཆད་མེད། །ངན་སོང་གསུམ་གྱི་སྡུག་བསྔལ་བཟོད་དུ་མེད། །མཐོ་རིས་གསུམ་གྱི་བདེ་བ་འགྱུར་ནས་འགྲོ། །ཀུན་འབྱུང་རྒྱུས་བསྐྱེད་སྡུག་བསྔལ་གཟེབ་ཏུ་ཚུད། །སྡུག་བསྔལ་གསུམ་གྱིས་མ་ཁྱབ་རྡུལ་ཙམ་མེད། །གནས་ངན་ལེན་གྱིས་རྒྱུན་ཐག་གཅོད་པའི་ཕྱིར། །ཐར་པའི་ལམ་སྟོན་བཤེས་གཉེན་བསྟེན་པར་ཤོག །མ་ནོར་ལམ་བཟང་ཆོས་ཀྱི་ཉིང་ཁུ་ནི། །རིན་ཆེན་བྱང་ཆུབ་སེམས་དང་འཕྲད་པར་ཤོག །སྐྱབས་གནས་བླ་མ་མཆོག་གསུམ་དྲན་པ་དང་། །དད་དང་མོས་གུས་ལམ་གྱིས་གཞི་རྩ་ཚུགས། །བླ་མའི་གདམས་ངག་ཁོག་པའི་སྙིང་ལྟར་བཟུང་། །དུས་རྣམས་ཀུན་ཏུ་གསོལ་བ་དྲག་པོ་འདེབས། །དཔལ་མགོན་བླ་མའི་བྱིན་རླབས་འཇུག་པར་ཤོག །སེམས་ཅན་འདི་རྣམས་བདག་གི་དྲིན་ཆེན་ཡིན། །ཐོག་མ་མེད་ནས་བདག་གི་ཕ་མ་བྱས། །སྐུ་དྲིན་ཚད་མེད་བཏགས་པའི་དྲིན་ཅན་མ། །ད་ལྟ་སྡུག་བསྔལ་རྒྱ་མཚོའི་ཀློང་དུ་ཚུད། །སྡིག་དང་སྡུག་བསྔལ་ཆུ་སྲིན་གྱིས་བཟུང་རྣམས། །ལེགས་པར་བསམ་ན་སྲན་པའི་གོ་སྐབས་བྲལ། །མིག་གི་མཆི་མ་དྲག་ཏུ་འཁྲུགས་པ་དང་། །ཤས་མི་བཟོད་པའི་བྱམས་དང་སྙིང་རྗེ་སྒོམ། །རང་གི་བདེ་བ་མ་རྒན་རྣམས་ལ་བྱིན། །དེ་རྣམས་སྡུག་བསྔལ་རྒྱུ་འབྲས་རང་ལ་བླངས། །ལུས་འདི་ཡང་ནི་གྲངས་མེད་སྦྱིན་བྱས་ནས། །བདག་ཏུ་འཛིན་པའི་འདྲེ་ཆེན་བརླག་པར་ཤོག །ཉེས་པ་ཐམས་ཅད་རང་བདག་འཛིན་ལས་བྱུང་། །དགྲ་ལ་སོགས་པའི་སེམས་ཅན་དེ་ཀུན་ནི། །ངེས་པར་ཕན་འདོགས་དགེ་བའི་བཤེས་དང་མཚུངས། །དགྲ་གདོན་བགེགས་སྣང་རང་ཉིད་འཁྲུལ་པ་ཡིན། །ནད་གདོན་ཐམས་ཅད་རྒྱལ་བའི་རྣམ་འཕྲུལ་དང་། །ལྷ་དང་འདྲེ་རྣམས་བྱང་ཆུབ་སྒྲུབ་པའི་གྲོགས། །ལེགས་དགུ་མཐུན་རྐྱེན་བདུད་ཀྱི་ཆོ་འཕྲུལ་ཡིན། །ན་ཚ་སྡུག་བསྔལ་རྐྱེན་ངན་བྱང་ཆུབ་ཀྱི། །སེམས་མཆོག་འཕེལ་བའི་ཐབས་ལ་འབྱུང་བར་ཤོག །དགྲ་བོ་མ་ནོར་སྙིང་ལ་ཞུགས་པ་ཡི། །ང་དང་ང་ཡིར་འཛིན་པའི་འགོང་ཆེན་འདི། །ད་ལྟ་བདག་གི་བླ་མའི་དྲིན་ལས་མཐོང་། །ངེས་པར་ཁྱོད་མི་དགའ་བའི་སྡུག་བསྔལ་རྣམས། །ངེད་ཀྱིས་བླངས་ནས་འགོང་པོ་ཁྱོད་ལ་སྦྱིན། །གྲགས་སྙན་འབྱོར་སོགས་ཁྱོད་ལ་དགའ་བའི་རྫས། །གཅིག་ཀྱང་མ་ལུས་འཕྲོག་ནས་ཁྱོད་ཀྱིས་ནི། །དགྲ་རུ་བཟུང་བའི་སེམས་ཅན་དེ་ལ་སྦྱིན། །སྦྱིན་པ་དེ་བཞིན་ངེས་པར་ཐོབ་གྱུར་ཅིག །ཇོ་བོ་སེམས་ཅན་འདི་རྣམས་བཀའ་དྲིན་ཆེ། །འདི་རྣམས་ལ་ནི་གྲོགས་ངན་བྱེད་པ་རུ། །བདག་ནི་ནམ་ཡང་སངས་རྒྱས་ལ་མི་སྨོན། །སེམས་ཅན་ཚུལ་གྱིས་སེམས་ཅན་དོན་བྱེད་ཤོག །ང་ཡི་ལུས་འདི་ཡིད་བཞིན་ནོར་བུ་ལྟར། །འགྲོ་བ་རྣམས་ཀྱི་རེ་བ་བསྐངས་བྱས་ནས། །དེ་རྣམས་རྫོགས་སངས་རྒྱས་མཆོག་ཐོབ་པ་དང་། །བདག་གི་སེམས་མཆོག་མ་ཉམས་གོང་འཕེལ་ཤོག །དཀའ་སྤྱད་བཟོད་པའི་གོ་ཆ་རབ་བགོས་ནས། །ཆོས་རྣམས་རང་བཞིན་བདེན་མེད་ཤེས་པ་དང་། །རང་བཞིན་དོན་དམ་སྟོང་གསལ་འགགས་པ་མེད། །ཐོག་མཐའ་དབུས་བྲལ་སེམས་མཆོག་རྡོ་རྗེ་ཡིས། །སྒྲིབ་གཉིས་མུན་པ་རིང་དུ་སྤངས་བྱས་ནས། །ཡང་དག་ཡེ་ཤེས་སྣང་བ་རྒྱས་པ་ཡིས། །འགྲོ་བའི་དོན་ལ་མཐུ་སྟོབས་རྩལ་ལྡན་ཤོག །འཇམ་དཔལ་དཔའ་བོའི་རྣམ་ཐར་མངོན་བྱས་ནས། །བྱང་ཆུབ་སྤྱོད་པའི་རྒྱ་མཚོར་གཞོལ་བཞིན་དུ། །སེམས་ཅན་སྟོང་པར་མ་གྱུར་དེ་སྲིད་དུ། །དེ་ཡི་དོན་རྣམས་རབ་ཏུ་སྒྲུབ་པར་ཤོག །སངས་རྒྱས་རྒྱ་མཚོ་མཆོད་པ་བྱེད་པ་དང་། །ཞིང་ཁམས་རྒྱ་མཚོ་ཡོངས་སུ་སྦྱང་བ་དང་། །སེམས་ཅན་རྒྱ་མཚོ་ཡོངས་སུ་སྨིན་པ་ལ། །ཡེ་ཤེས་རྒྱ་མཚོ་ཆེ་ལ་འཇུག་པར་ཤོག །ཅེས་པའང་སྦྲུལ་ཟླ་བ་བརྒྱད་པའི་ཚེས་བཅུ་གསུམ་ལ་བྱང་ཆུབ་སེམས་དཔའ་བློ་གྲོས་ལུང་རྟོགས་རྒྱ་མཚོ་གཞན་ཕན་དྲི་མ་མེད་པའི་འོད་ཀྱིས་སྙིང་ནས་སྨོན་ལམ་དུ་བཏབ་པ་ངེས་པར་འགྲུབ་པ་ཞིག་བླ་མ་རྒྱལ་བ་སྲས་བཅས་ཀྱི་བྱིན་གྱི་རླབས་ཏུ་གསོལ། འདི་ཁོ་ན་འགྲུབ་པར་གྱུར་ཅིག། །།

[edit]

theg chen blo sbyong smon lam nor bu'i snying po zhes bya ba bzhugs so/__/na mo gu ru/__ston pa mnyam med shAkya'i rgyal po dang /__/spyan ras gzigs dang rje btsun sgrol ma'i zhabs/__/khro bo'i rgyal po mi g.yo mgon po dang /__/lha gcig jo bo chen po yab sras rnams/__/mi ngan bdag gi gtsug gi rgyan bzhugs nas/__/sgo gsum chos dang 'dres par byin gyis rlobs/__/rten gzhi phun tshogs dal dang 'byor pa 'di/__/dus brgya lan gcig thob pa da res tsam/__/mi tshe sos dal bskyal ba'i me long yis/__/bdud kyis ma bslus da res don yod du/__/dam pa'i chos la 'bad pa drag pos brtson/__/sang dang 'jig rten phyi ma'i snang ba gnyis/__/sngon la gang 'byung nges par cha mi 'tshal/__/yun ring sdod pa'i grabs chus ngan pa 'dis/__/gtan bde'i 'dun ma brlag par byed pas na/__/myur ba myur bar chos la 'bad par shog__/brtson 'grus nags kyi me chen rab sbar nas/__/'khor ba'i rgya mtsho skem par byed pa dang /__/dkar nag bsags pa'i las la grangs mi chod/__/gzhan la bgo skal byed du ma mchis shing /__/rang byas mtshon cha thams cad rang la 'khor/__/rang gi phung por myong ba gdon mi za/__/dkar nag las kyi 'bras bu ma nor ba/__/smin la bslu ba med pa'i nges rnyed shog__/las ngan bsags pa'i 'bras bu chen po ni/__/'khor ba'i gnas na sdug bsngal rgyun chad med/__/ngan song gsum gyi sdug bsngal bzod du med/__/mtho ris gsum gyi bde ba 'gyur nas 'gro/__/kun 'byung rgyus bskyed sdug bsngal gzeb tu tshud/__/sdug bsngal gsum gyis ma khyab rdul tsam med/__/gnas ngan len gyis rgyun thag gcod pa'i phyir/__/thar pa'i lam ston bshes gnyen bsten par shog__/ma nor lam bzang chos kyi nying khu ni/__/rin chen byang chub sems dang 'phrad par shog__/skyabs gnas bla ma mchog gsum dran pa dang /__/dad dang mos gus lam gyis gzhi rtsa tshugs/__/bla ma'i gdams ngag khog pa'i snying ltar bzung /__/dus rnams kun tu gsol ba drag po 'debs/__/dpal mgon bla ma'i byin rlabs 'jug par shog__/sems can 'di rnams bdag gi drin chen yin/__/thog ma med nas bdag gi pha ma byas/__/sku drin tshad med btags pa'i drin can ma/__/da lta sdug bsngal rgya mtsho'i klong du tshud/__/sdig dang sdug bsngal chu srin gyis bzung rnams/__/legs par bsam na sran pa'i go skabs bral/__/mig gi mchi ma drag tu 'khrugs pa dang /__/shas mi bzod pa'i byams dang snying rje sgom/__/rang gi bde ba ma rgan rnams la byin/__/de rnams sdug bsngal rgyu 'bras rang la blangs/__/lus 'di yang ni grangs med sbyin byas nas/__/bdag tu 'dzin pa'i 'dre chen brlag par shog__/nyes pa thams cad rang bdag 'dzin las byung /__/dgra la sogs pa'i sems can de kun ni/__/nges par phan 'dogs dge ba'i bshes dang mtshungs/__/dgra gdon bgegs snang rang nyid 'khrul pa yin/__/nad gdon thams cad rgyal ba'i rnam 'phrul dang /__/lha dang 'dre rnams byang chub sgrub pa'i grogs/__/legs dgu mthun rkyen bdud kyi cho 'phrul yin/__/na tsha sdug bsngal rkyen ngan byang chub kyi/__/sems mchog 'phel ba'i thabs la 'byung bar shog__/dgra bo ma nor snying la zhugs pa yi/__/nga dang nga yir 'dzin pa'i 'gong chen 'di/__/da lta bdag gi bla ma'i drin las mthong /__/nges par khyod mi dga' ba'i sdug bsngal rnams/__/nged kyis blangs nas 'gong po khyod la sbyin/__/grags snyan 'byor sogs khyod la dga' ba'i rdzas/__/gcig kyang ma lus 'phrog nas khyod kyis ni/__/dgra ru bzung ba'i sems can de la sbyin/__/sbyin pa de bzhin nges par thob gyur cig__/jo bo sems can 'di rnams bka' drin che/__/'di rnams la ni grogs ngan byed pa ru/__/bdag ni nam yang sangs rgyas la mi smon/__/sems can tshul gyis sems can don byed shog__/nga yi lus 'di yid bzhin nor bu ltar/__/'gro ba rnams kyi re ba bskangs byas nas/__/de rnams rdzogs sangs rgyas mchog thob pa dang /__/bdag gi sems mchog ma nyams gong 'phel shog__/dka' spyad bzod pa'i go cha rab bgos nas/__/chos rnams rang bzhin bden med shes pa dang /__/rang bzhin don dam stong gsal 'gags pa med/__/thog mtha' dbus bral sems mchog rdo rje yis/__/sgrib gnyis mun pa ring du spangs byas nas/__/yang dag ye shes snang ba rgyas pa yis/__/'gro ba'i don la mthu stobs rtsal ldan shog__/'jam dpal dpa' bo'i rnam thar mngon byas nas/__/byang chub spyod pa'i rgya mtshor gzhol bzhin du/__/sems can stong par ma gyur de srid du/__/de yi don rnams rab tu sgrub par shog__/sangs rgyas rgya mtsho mchod pa byed pa dang /__/zhing khams rgya mtsho yongs su sbyang ba dang /__/sems can rgya mtsho yongs su smin pa la/__/ye shes rgya mtsho che la 'jug par shog__/ces pa'ang sbrul zla ba brgyad pa'i tshes bcu gsum la byang chub sems dpa' blo gros lung rtogs rgya mtsho gzhan phan dri ma med pa'i 'od kyis snying nas smon lam du btab pa nges par 'grub pa zhig bla ma rgyal ba sras bcas kyi byin gyi rlabs tu gsol/__'di kho na 'grub par gyur cig/__//