JKCL-KABUM-12-NA-054

🚧 This website is under continued development. We appreciate your patience!

Previous Text Back to Volume PageNext Text

ཐེག་ཆེན་སྨོན་ལམ་སྲས་བཅས་རྒྱལ་བ་དགྱེས་པའི་རོལ་མོ།

Wylie title	theg chen smon lam sras bcas rgyal ba dgyes pa'i rol mo
Location	chos kyi blo gros bka' 'bum Volume 12, Text 54, Pages 269-271 (Folios 1a1 to 2a1)
Author	འཇམ་དབྱངས་མཁྱེན་བརྩེ་ཆོས་ཀྱི་བློ་གྲོས་
Less details More details
Citation	'jam dbyangs mkhyen brtse chos kyi blo gros. theg chen smon lam sras bcas rgyal ba dgyes pa'i rol mo. In Rdzong sar mkhyen brtse 'jam dbyangs chos kyi blo gros kyi gsung 'bum, Vol. 12: 269-271. Bir, H.P.: Khyentse Labrang, 2012.
Genre	Prayers - smon lam
Colophon	།ཅེས་པའང་ཤིང་ཁྱི་དབྱུ་གུ་ཟླ་བའི་ཚེས་ལ་ཆོས་ཀྱི་བློ་གྲོས་པས་སྨོན་པ་དེ་བཞིན་འགྲུབ་པར་གྱུར་ཅིག།
	/ces pa'ang shing khyi dbyu gu zla ba'i tshes la chos kyi blo gros pas smon pa de bzhin 'grub par gyur cig/

1 Texts in this Section (sde tshan or chos tshan)

269-271	ཐེག་ཆེན་སྨོན་ལམ་སྲས་བཅས་རྒྱལ་བ་དགྱེས་པའི་རོལ་མོ། theg chen smon lam sras bcas rgyal ba dgyes pa'i rol mo Prayers - smon lam	Text page View PDF
	[[|འཇམ་དབྱངས་མཁྱེན་བརྩེ་ཆོས་ཀྱི་བློ་གྲོས་ ()]]

Tibetan Text

Wylie

[edit]

ཐེག་ཆེན་སྨོན་ལམ་སྲས་བཅས་རྒྱལ་བ་དགྱེས་པའི་རོལ་མོ་ཅེས་བྱ་བ་བཞུགས་སོ། །ན་མོ་གུ་རུ། རྡོ་རྗེའི་བླ་མ་རིག་འཛིན་ཚོགས་རྣམས་དང་། །ཡི་དམ་གྲུབ་སྟེགས་ཌཱ་ཀཱི་ཆོས་སྐྱོངས་ཚོགས། །བདག་གི་ཇི་ལྟར་སྨོན་པ་འདི་བཞིན་དུ། །རྣམ་དག་འགྲུབ་པའི་དཔང་པོ་མཛད་དུ་གསོལ། །ཚེ་འདི་མི་རྟག་རྩ་རྩེའི་ཟིལ་པ་འདྲ། །དོ་ནུབ་སང་ཡང་ནམ་འཆི་ཆ་མེད་པས། །སྲིད་པའི་ཕུན་ཚོགས་ཀུན་ལ་ཞེན་ལོག་སྟེ། །ངེས་འབྱུང་གཏིང་ནས་སྐྱེ་བར་བྱིན་གྱིས་རློབས། །ཐར་པའི་ལམ་གྱི་གཞི་མ་ཚུལ་ཁྲིམས་ཀྱི། །ས་གཞི་གཙང་མ་བྱི་དོར་ལེགས་བྱས་ནས། །ལྟུང་བ་སྡེ་ལྔ་ཕྲ་རགས་དང་བཅས་པས། །ནམ་ཡང་གོས་པ་མེད་པར་བྱིན་གྱིས་རློབས། །གཞན་ཕན་བྱང་ཆུབ་སེམས་ཀྱི་ནོར་བུ་ལ། །རང་དོན་ཡིད་བྱེད་རྟོག་པ་ངན་པ་ཡིས། །མ་སླད་སྟོང་ཉིད་སྙིང་རྗེའི་སྙིང་པོ་ཅན། །མྱུར་དུ་རྒྱུད་ལ་སྐྱེ་བ༴ །མཚན་ཉིད་ཚང་བའི་རྡོ་རྗེ་སློབ་དཔོན་ལས། །རྣམ་དག་དབང་གིས་བདག་རྒྱུད་སྨིན་བྱས་ནས། །དམ་ཚིག་གཉན་པོ་ཚུལ་བཞིན་བསྲུང་བ་ཡིས། །རྡོ་རྗེའི་ལམ་མཆོག་ནོར་མེད་རྙེད་གྱུར་ཅིག །བསྐྱེད་དང་རྫོགས་པས་ཐ་མལ་སྣང་ཞེན་སྡོམ། །ཕུང་ཁམས་རྩ་རླུང་ཐིག་ལེའི་དྲྭ་བ་ཀུན། །ཤིན་ཏུ་རྣམ་དག་རྡུལ་བྲལ་འོད་གསལ་དུ། །སྨིན་ནས་འགྱུར་མེད་བདེ་ཆེན་མཐར་སོན་ཤོག །ཉེ་ལམ་ཟབ་མོའི་བླ་མའི་རིམ་པ་ཡིས། །གཉུག་མའི་སེམས་ལ་བྱིན་གྱིས་རློབས་པ་དང་། །མཁའ་ཁྱབ་རྡོ་རྗེའི་ཡེ་ཤེས་མཁའ་ཆེན་པོ། །མ་ནོར་ཇི་བཞིན་མངོན་སུམ་རྟོགས་པར་ཤོག །སྐྱེ་བ་ཀུན་ཏུ་བླ་མ་རྡོ་རྗེ་འཆང་། །རྩ་གསུམ་འདུས་ཞལ་ཆེན་པོར་ངེས་ཤེས་རྙེད། །བཅོས་མིན་མོས་གུས་ནང་ནས་སྐྱེ་བ་དང་། །རང་འབྲས་དང་པོའི་སངས་རྒྱས་ཐོབ་པར་ཤོག །སྲིད་པ་ཇི་སྲིད་གནས་ཀྱི་བར་དག་ཏུ། །བྱང་ཆུབ་སེམས་དཔའི་ལུས་བཟང་ལ་བརྟེན་ནས། །མཐར་ཡས་འགྲོ་བའི་དོན་རྣམས་སྒྲུབ་པ་ལ། །འཇམ་དཔལ་དཔའ་བོའི་སྨོན་ལམ་རྫོགས་པར་ཤོག །ཁྱད་པར་ལྔ་བརྒྱའི་ཐ་མར་བསྟན་འགྲོ་ལ། །འཚེ་བའི་འབྱུང་པོ་མི་དང་མི་མིན་རྣམས། །སྙིང་རྗེ་དྲག་པོར་ཁྲོས་པའི་སྟོབས་ཤུགས་ཀྱིས། །བདུད་ཀྱི་སྡེ་ཚོགས་ཕྱེ་མར་འཐག་བྱེད་ཤོག །གང་ཞིག་ལྟ་སྤྱོད་ངན་པའི་རྩ་སྦུར་རྣམས། །རྣམ་མང་ལུང་དང་རིག་པའི་ཞུགས་ཆེན་གྱིས། །སྐད་ཅིག་ཙམ་ལ་བསྲེག་ནས་ཡང་དག་གི །ལྟ་སྒོམ་སྤྱོད་པ་འཁྲུལ་མེད་གསལ་ནུས་ཤོག །སྔོན་བྱོན་ཇོ་བོ་ཡབ་སྲས་རྣམ་ཐར་དང་། །ཕྱག་རྫོགས་གྲུབ་པའི་སློབ་དཔོན་ཆེ་རྣམས་ཀྱི། །མཛད་པ་ཇི་སྙེད་ཀུན་ལ་དབང་འབྱོར་ཏེ། །རྒྱལ་བའི་བསྟན་ལ་བྱ་བ་བྱེད་པར་ཤོག །མདོར་ན་བྱང་ཆུབ་སྤྱོད་པའི་སྨོན་ལམ་རྣམས། །མ་ལུས་བདག་གི་རྒྱུད་ལ་ཡོངས་སུ་རྫོགས། །ནམ་ཞིག་འཁོར་བ་སྟོང་པར་གྱུར་པའི་ཚེ། །ཀུན་བཟང་ཆོས་སྐུའི་ཀློང་དུ་ཐིམ་གྱུར་ཅིག །ཅེས་པའང་ཤིང་ཁྱི་དབྱུ་གུ་ཟླ་བའི་ཚེས་ལ་ཆོས་ཀྱི་བློ་གྲོས་པས་སྨོན་པ་དེ་བཞིན་འགྲུབ་པར་གྱུར་ཅིག། །།

[edit]

theg chen smon lam sras bcas rgyal ba dgyes pa'i rol mo ces bya ba bzhugs so/__/na mo gu ru/__rdo rje'i bla ma rig 'dzin tshogs rnams dang /__/yi dam grub stegs DA kI chos skyongs tshogs/__/bdag gi ji ltar smon pa 'di bzhin du/__/rnam dag 'grub pa'i dpang po mdzad du gsol/__/tshe 'di mi rtag rtsa rtse'i zil pa 'dra/__/do nub sang yang nam 'chi cha med pas/__/srid pa'i phun tshogs kun la zhen log ste/__/nges 'byung gting nas skye bar byin gyis rlobs/__/thar pa'i lam gyi gzhi ma tshul khrims kyi/__/sa gzhi gtsang ma byi dor legs byas nas/__/ltung ba sde lnga phra rags dang bcas pas/__/nam yang gos pa med par byin gyis rlobs/__/gzhan phan byang chub sems kyi nor bu la/__/rang don yid byed rtog pa ngan pa yis/__/ma slad stong nyid snying rje'i snying po can/__/myur du rgyud la skye ba=____/mtshan nyid tshang ba'i rdo rje slob dpon las/__/rnam dag dbang gis bdag rgyud smin byas nas/__/dam tshig gnyan po tshul bzhin bsrung ba yis/__/rdo rje'i lam mchog nor med rnyed gyur cig__/bskyed dang rdzogs pas tha mal snang zhen sdom/__/phung khams rtsa rlung thig le'i drwa ba kun/__/shin tu rnam dag rdul bral 'od gsal du/__/smin nas 'gyur med bde chen mthar son shog__/nye lam zab mo'i bla ma'i rim pa yis/__/gnyug ma'i sems la byin gyis rlobs pa dang /__/mkha' khyab rdo rje'i ye shes mkha' chen po/__/ma nor ji bzhin mngon sum rtogs par shog__/skye ba kun tu bla ma rdo rje 'chang /__/rtsa gsum 'dus zhal chen por nges shes rnyed/__/bcos min mos gus nang nas skye ba dang /__/rang 'bras dang po'i sangs rgyas thob par shog__/srid pa ji srid gnas kyi bar dag tu/__/byang chub sems dpa'i lus bzang la brten nas/__/mthar yas 'gro ba'i don rnams sgrub pa la/__/'jam dpal dpa' bo'i smon lam rdzogs par shog__/khyad par lnga brgya'i tha mar bstan 'gro la/__/'tshe ba'i 'byung po mi dang mi min rnams/__/snying rje drag por khros pa'i stobs shugs kyis/__/bdud kyi sde tshogs phye mar 'thag byed shog__/gang zhig lta spyod ngan pa'i rtsa sbur rnams/__/rnam mang lung dang rig pa'i zhugs chen gyis/__/skad cig tsam la bsreg nas yang dag gi__/lta sgom spyod pa 'khrul med gsal nus shog__/sngon byon jo bo yab sras rnam thar dang /__/phyag rdzogs grub pa'i slob dpon che rnams kyi/__/mdzad pa ji snyed kun la dbang 'byor te/__/rgyal ba'i bstan la bya ba byed par shog__/mdor na byang chub spyod pa'i smon lam rnams/__/ma lus bdag gi rgyud la yongs su rdzogs/__/nam zhig 'khor ba stong par gyur pa'i tshe/__/kun bzang chos sku'i klong du thim gyur cig__/ces pa'ang shing khyi dbyu gu zla ba'i tshes la chos kyi blo gros pas smon pa de bzhin 'grub par gyur cig/__//