JKCL-KABUM-09-TA-033

🚧 This website is under continued development. We appreciate your patience!

Previous Text Back to Volume PageNext Text

ཟབ་གསང་པདྨའི་ཡང་ཐིག་ལས༔ པདྨ་དྲག་པོའི་སྨད་ལས་གདབ་ཁ་དང་༔ བཟློག་པ་མཚོན་ཆ་འཁོར་ལོ༔

Wylie title	zab gsang pad+ma'i yang thig las: pad+ma drag po'i smad las gdab kha dang: bzlog pa mtshon cha 'khor lo:
Location	chos kyi blo gros bka' 'bum Volume 9, Text 33, Pages 519-526 (Folios 1a1 to 4b1)
Author	འཇམ་དབྱངས་མཁྱེན་བརྩེ་ཆོས་ཀྱི་བློ་གྲོས་
Less details More details
Tertön	འཇམ་དབྱངས་མཁྱེན་བརྩེ་ཆོས་ཀྱི་བློ་གྲོས་ ('jam dbyangs mkhyen brtse chos kyi blo gros)
Citation	'jam dbyangs mkhyen brtse chos kyi blo gros. zab gsang pad+ma'i yang thig las pad+ma drag po'i smad las gdab kha dang: bzlog pa mtshon cha 'khor lo. In Rdzong sar mkhyen brtse 'jam dbyangs chos kyi blo gros kyi gsung 'bum, Vol. 9: 519-526. Bir, H.P.: Khyentse Labrang, 2012.
Genre
Cycle	ཟབ་གསང་པདྨའི་ཡང་ཏིག་ (zab gsang pad+ma'i yang thig)
Deity	pad+ma drag po
Colophon	ཆུ་སྦྲུལ་ས་ག་ཟླ་བའི་ཚེས་༧ལ་བྲིས་པའོ།།
	chu sbrul sa ga zla ba'i tshes 7la bris pa'o//

1 Texts in this Section (sde tshan or chos tshan)

519-526	ཟབ་གསང་པདྨའི་ཡང་ཐིག་ལས༔ པདྨ་དྲག་པོའི་སྨད་ལས་གདབ་ཁ་དང་༔ བཟློག་པ་མཚོན་ཆ་འཁོར་ལོ༔ zab gsang pad+ma'i yang thig las: pad+ma drag po'i smad las gdab kha dang: bzlog pa mtshon cha 'khor lo:	Text page View PDF
	[[|འཇམ་དབྱངས་མཁྱེན་བརྩེ་ཆོས་ཀྱི་བློ་གྲོས་ ()]]

Tibetan Text

Wylie

[edit]

ཟབ་གསང་པདྨའི་ཡང་ཐིག་ལས༔ པདྨ་དྲག་པོའི་སྨད་ལས་གདབ་ཁ་དང་༔ བཟློག་པ་མཚོན་ཆ་འཁོར་ལོ་བཞུགས༔ པདྨ་དྲག་པོར་ཕྱག་འཚལ་ལོ༔ དྲག་པོ་རྒྱུ་བའི་དུས་ཚེས་ཀྱི༔ ཉི་མ་ནག་པོར་ཕུང་ཤུལ་གྱི༔ ས་ལ་སྟེགས་བུ་བཅས་བྱས་ཏེ༔ དུར་ཁྲོད་རུས་ཆེན་རོ་སོལ་གྱིས༔ བྱུགས་པའི་དབུས་སུ་མ་ཏྲྃ་གཟུགས༔ དེ་ཡི་ལྟེ་བར་ལྕགས་འཁོར་ནི༔ རྩིབ་བཞི་རྣོ་བར་ཧཱུྃ་སྔོན་དང་༔ དེ་ཕྱིར་ཁྲག་ཁྱམས་རྡོ་རྭ་དང་༔ མེ་རླུང་འཁྲུགས་པས་མཚན་པ་བྲི༔ དེ་དབུས་ཤ་ཁྲག་རུས་པ་དང་༔ འབྲུ་ནག་དག་ལས་དྲག་གཏོར་ནི༔ ཐོག་མདིལ་དབྱིབས་ཅན་ཁྲུ་གང་བར༔ དྲེགས་པའི་གཏོར་ཆུང་བརྒྱད་ཀྱིས་བསྐོར༔ མཚེ་ཡུངས་རྩང་དང་ཤིང་ཚེར་གྱིས༔ རྭ་བས་བསྐོར་ཞིང་རྔམ་བརྗིད་ལྡན༔ རི་རོད་གད་ཆད་ལ་སོགས་དང་༔ དགྲ་བགེགས་བྱད་མའི་དྲི་མ་རྣམས༔ བསྲེས་པའི་རཱུ་པ་ཉམས་ཐག་པ༔ སོར་བཞིའམ་ནི་བརྒྱད་དག་བྱ༔ དེ་ཡི་སྙིང་གར་མཚོན་འཁོར་ནི༔ རྩིབས་བཞིའི་ལྟེ་བར་དགྲ་བགེགས་གཟུགས༔ སྙིང་གར་ནྲྀ་ཏྲི་ཁ་སྤྲོད་དང་། ལིངྒའི་གནས་ཡིག་སྤྱི་ལྟར་བཀོད༔ ལྟེ་སྲོག་མཐའ་ལ་ཆེ་གེ་ནི༔ ཁུག་ཛཿཤཱ་ཏཱུཾ་སྲོག་ལ་རྦད༔ ཅེས་པ་དག་གིས་བསྐོར་བྱས་ལ༔ ཛཿཁྲམ་གྱིས་ནི་མཐའ་ནས་འཁྱུད༔ དུག་ཁྲུས་བསད་ལྟེབས་བྱད་ཐག་འཆིང་༔ དེ་ཡི་སྣེ་ནས་ཚོན་སྐུད་ནི༔ དྲངས་ཏེ་གཏོར་ཆེན་འོག་ཏུ་དྲངས༔ སྔགས་པས་ཡི་དམ་སྒྲུབ་མཆོད་དང་༔ སྲུང་བ་རང་ཉིད་ཡི་དམ་དུ༔ གསལ་བའི་ཐུགས་སྲོག་ལས་འཕྲོས་པའི༔ འོད་ཀྱིས་རྩ་གསུམ་རྒྱལ་བ་དང་༔ དྲེགས་ཚོགས་སྤྱན་དྲངས་འོད་དུ་ཞུ༔ ཕྱག་མཚན་ལྔ་དང་ལྕགས་སྡིག་གི༔ སྲུང་བའི་གུར་ཁང་ཆེན་པོར་མོས༔ རྩ་བའི་སྔགས་མཐར༔ མ་མ་བཛྲ་རཀྵ་རཀྵ་ཧཱུྃ་ཏིཥྛ་བྷྲཱུྃ༔ ཞེས་བཏགས་སྲུང་དམིགས་ནན་ཏན་བྱ༔ མདུན་གྱི་གཏོར་མ་ལྷར་བསྐྱེད་ཅིང་༔ ལས་ཀྱི་རིམ་པ་ཅི་རིགས་བྱ༔ མདུན་བསྐྱེད་དྲག་པོའི་ལྷ་ཚོགས་ཀྱི༔ ཐུགས་ཀར་སྔགས་ཀྱིས་བསྐོར་བ་ལས༔ འོད་འཕྲོས་བྱིན་བསྡུ་ནུས་བསྐྱེད་དེ༔ མཐུ་རྩལ་རབ་རྫོགས་དབང་ཐོབ་བསམ༔ སླར་ཡང་འོད་འཕྲོས་གདུག་པ་ཅན༔ སྡེ་བརྒྱད་སྲོག་གི་སྙིང་པོ་འཕྲོག༔ ཐུགས་ཀའི་སྔགས་ཀྱི་འོག་ཏུ་བསྟིམ༔ དྲེགས་པའི་སྲོག་དབང་འདུས་པར་བསམ༔ ཐུགས་ནས་འོད་ཟེར་མཚོན་ཆ་ལྟར༔ རབ་ཏུ་རྩུབ་པ་འཕྲོས་པ་ཡིས༔ དགྲ་བགེགས་གནོད་བྱེད་ཐམས་ཅད་རྣམས༔ བཀུག་ནས་འབར་བའི་ཧོམ་དུ་བཅུག༔ སྙིང་གར་ཟངས་ལྕགས་འཁོར་ལོ་གཉིས༔ གཡས་གཡོན་དྲག་ཏུ་འཁོར་བ་དང་༔ སྡིག་པས་ཧབ་ཧབ་ཟོས་པར་བསམ༔ རྩ་སྔགས་དྲེགས་པའི་ཤམ་བུ་དང་༔ པདྨ་ཀྲོ་དྷཱི་དྲག་སྔགས་ནི༔ མེ་དཔུང་ཐོག་སེར་འབབ་ལྟར་བཟླ༔ གཏོར་ཆུང་གནོད་བྱེད་འགུགས་བསྟིམ་གྱི༔ དམག་ལྟོའི་ཚུལ་དུ་ཕུལ་བ་དང་༔ དྲག་པོའི་ཕྲིན་ལས་བཙེལ་བར་བྱ༔ ཆོས་སྐྱོང་གཏོར་བསྐང་ཚོགས་མཆོད་འབུལ༔ དེ་ནས་གསེར་སྐྱེམས་གཟུ་དཔང་ནི༔ ལས་རིམ་གཞན་ནས་འབྱུང་ལྟར་ལ༔ ཧཱུྃ༔ མི་མངོན་དབྱིངས་ན་བཞུགས་པ་ཡི༔ རྩ་གསུམ་རྒྱལ་བ་རབ་འབྱམས་ཀྱི༔ ཐུགས་དམ་བསྐུལ་ལོ་མཐུ་དཔུང་བསྐྱེད༔ ཉམས་པ་བསྒྲལ་བའི་དུས་ལ་བབ༔ རྔ་ཡབ་ལངྐ་པཱུ་རི་ནས༔ བླ་མ་དྲག་པོའི་ལྷ་ཚོགས་རྣམས༔ ཐུགས་རྗེའི་མཐུ་རྩལ་རབ་བསྐྱེད་དེ༔ དེང་འདིར་བསྐུལ་ལོ་དགོངས་པར་མཛོད༔ བདག་ཅག་བྱང་ཆུབ་སྒྲུབ་པ་ལ༔ བར་དུ་གཅོད་པའི་བདུད་དགྲ་དང་༔ བསྟན་ལ་གནོད་ཅིང་འཚེ་བ་ཡི༔ ཀླ་ཀློ་འབྱུང་པོའི་དཔུང་ཚོགས་རྣམས༔ ད་ལྟ་བསྒྲལ་བའི་དུས་ལ་བབ༔ ཐུགས་དམ་མ་གཡེལ་ས་མ་ཡ༔ ཁྱེད་རྣམས་གཟུ་དང་དཔང་མཛོད་ལ༔ བདེན་རྫུན་གཉིས་ཀྱི་ཤན་ཐང་འབྱེད༔ བདག་ཅག་མ་ཉེས་མ་ཡོའོ༔ འདི་ལ་སྐྱོབ་པ་སུ་ཞིག་ཡོད༔ ཉམས་པ་སྒྲོལ་བའི་དུས་འདི་ཡིན༔ ཕྱིས་ནས་ཁྱེད་ཀྱི་མཐུ་རྩལ་གྱིས༔ དགོས་པ་ཆུང་ཞིང་དེ་བས་ན༔ ད་ལྟ་ཉིད་དུ་མངོན་སྤྱོད་ཀྱི༔ ཕྲིན་ལས་དྲག་པོ་མཛད་དུ་གསོལ༔ ཧོམ་བསྐྱེད་དགུག་གཞུག་དྲག་ཏུ་བྱ༔ ཛ༔ ལྕགས་ཀྱུ་ཅན་གྱིས་སྙིང་ནས་ཟུངས༔ ཧཱུྃ༔ ཞགས་པ་ཅན་གྱིས་སྐེ་ནས་སྡོམས༔ བྃཿལྕགས་སྒྲོག་ཅན་གྱིས་ཡན་ལག་ཆིངས༔ ཧོཿདྲིལ་བུ་ཅན་གྱིས་མྱོས་སུ་ཆུག༔ ནྲྀ་ཏྲི་དགྲ་བགེགས་ཆེ་གེ་མོ་ཨཱ་ཀཪྵ་ཡ་ཛཿཛཿཧཱུྃ་བྃ་ཧོཿཡང་ཡང་བརྗོད༔ བྱ་འུག་སྒྲོ་དང་དུད་པས་བདུག༔ དབྱེ་བྱེད་ཕོ་ཉ་ཆེན་མོ་ཡི༔ རྫས་དང་སྔགས་ཀྱི་དགྲ་གདོན་གྱི༔ ལྷ་དང་སྲུང་མ་ཐམས་ཅད་ནི༔ དབང་མེད་ཕྲལ་ཏེ་མཐུ་མེད་མོས༔ ཛཿཔྲ་ཝེ་ཤ་ཡ་ཕཊ༔ ཨཱ་ཝེ་ཤ་ཡ་ཨཱཿཐུན་རྫས་དུག་ཁྲག་གཏིག་བྱས་ལ༔ ཧཱུྃ་བྷྱོ༔ ཕོ་ཉ་སྲིན་པོ་ཁྲོས་པ་ཡི༔ མྱོས་བྱེད་དུག་ཁྲག་ཆར་འབེབས་པས༔ ཉམས་པ་དྲན་མྱོས་བཀྲག་མདངས་ཉམས༔ སྐྱབས་བྲལ་མགོན་མེད་གྱུར་པར་མོས༔ ཛྭ་ལ་པ་ཡ་ཛྭ་ལ་པ་ཡ་མཱ་ར་ཡ་རྦད༔ དེ་ནས་ཕུར་བུ་ཐོགས་བྱས་ལ༔ གདིང་གསུམ་གསལ་བ་གསུམ་དང་ནི༔ ཚེ་ཁྲུས་དགོངས་པས་བཏབ་བྱས་ལ༔ ཧཱུྃ༔ པདྨ་དྲག་པོ་ཀཱི་ལ་ཡ༔ སྐུ་སྟོད་ཁྲོ་བོ་ཆེན་པོའི་སྐུ༔ སྐུ་སྨད་ལྕགས་སྲེག་ཕུར་བུ་ཡིས༔ དགྲ་གདོན་བགེགས་ཀྱི་སྙིང་ཁར་བཏབ༔ རྣམ་ཤེས་ཆོས་དབྱིངས་ཀློང་དུ་ཕཊ༔ རྩ་བའི་སྔགས་དང་དྲག་སྔགས་ཀྱི༔ སྙིང་ག་གཙོར་བྱས་གནས་རྣམས་ལ༔ བཏབ་སྟེ་འཚིངས་པ་གསུམ་ལྡན་མོས༔ ཐུན་རྫས་སྣ་ཚོགས་ཆར་དབབ་ལ༔ ཧཱུྃ༔ དྲག་པོའི་ལྷ་ཚོགས་ཐམས་ཅད་ལས༔ ཕོ་ཉ་མང་པོ་སྐར་ལྟར་འཁྲུགས༔ དགྲ་བགེགས་གཟུགས་ཕུང་རྡུལ་དུ་རློག༔ ཨོཾ་པདྨ་ཀྲོ་དྷ་དགྲ་བགེགས་མཱ་ར་ཡ་མཱ་ར་ཡ་ད་ཧ་ད་ཧ་པ་ཙ་པ་ཙ་གྷྲྀ་ཧྞ་གྷྲྀ་ཧྞ་བྷནྡྷ་བྷནྡྷ་ཧཱུྃ་ཕཊ༔ འབར་བའི་རལ་གྲིས་དུམ་བུར་གཏུབ༔ ཧཱུྃ་བྷྱོ༔ ཉམས་པའི་གཟུགས་ཕུང་ཡེ་ཤེས་ཀྱི༔ རལ་གྲི་རྣོ་དབལ་འབར་བ་ཡིས༔ དུམ་བུར་གཏུབ་ཅིང་སྐྱེ་རྒྱུན་གཅོད༔ མིང་གི་ལྷག་མ་མེད་པར་གྱུར༔ ཨོཾ་པདྨ་ཀྲོ་དྷ་དགྲ་བགེགས་ཚིནྡྷ་ཡ་ཚིནྡྷ་ཡ་ཧཱུྃ་ཕཊ༔ ཤ་ཁྲག་བདུད་རྩིར་སྤར་བྱས་ཏེ༔ ཧཱུྃ༔ དྲག་པོའི་ལྷ་ཚོགས་རྔམས་པའི་ཞལ༔ གྲུ་གསུམ་གནམ་ས་ལྟར་གདངས་པར༔ དགྲ་གདོན་ཤ་ཁྲག་རུས་གསུམ་སྟོབས༔ ཆེམ་ཆེམ་བཞེས་ཤིག་ཁ་རཾ་ཁཱ་ཧི༔ རྩ་སྔགས་མཐར༔ ཨི་དཾ་བ་ལིཾ་ཏ་ཁ་ཁ་ཁཱ་ཧི་ཁཱ་ཧི༔ དེ་ནས་དུག་ཁྲག་གཏོར་མ་དང་༔ ཁྲག་སྐྱེམས་བཤམས་ཤིང་རྔེའུ་ཆུང་བརྡུངས༔ བཟློག་པའི་ཕྲིན་ལས་བཅོལ་བ་ནི༔ ཧཱུྃ་ཧྲཱིཿགྲུ་གསུམ་སྨུག་ནག་འབར་བའི་དཀྱིལ་འཁོར་ནས༔ པདྨ་དྲག་པོ་ཡབ་ཡུམ་སྲས་འཁོར་བཅས༔ བཞེངས་ཤིག་བཞེངས་ཤིག་ཆོས་ཀྱི་དབྱིངས་ནས་བཞེངས༔ བསྐུལ་ལོ་བསྐུལ་ལོ་དྲག་པོའི་ལས་ལ་བསྐུལ༔ བཟློག་ཅིང་བསྒྱུར་བའི་ཕྲིན་ལས་མཛད་དུ་གསོལ༔ ཧཱུྃ་ཧྲཱིཿདཀྱིལ་འཁོར་གཙོ་མཆོག་གུ་རུ་དྲག་པོའི་སྐུ༔ རྔམ་བརྗིད་ཁྲོས་པའི་ངར་སྐད་ཕྱོགས་བཅུར་སྒྲོགས༔ འབར་བའི་མཚོན་ཆ་སྣ་ཚོགས་འཕྲོ་བ་དང་༔ སྐུ་མཆོག་རྔམ་ཞིང་བརྗིད་པའི་ཉམས་ལྡན་པས༔ དགྲ་གདོན་ཤ་ཁྲག་མཆོད་པ་འདི་བཞེས་ལ༔ གནོད་བྱེད་རྒྱལ་འགོང་མཐའ་བཞིའི་དམག་དཔུང་ཟློག༔ འབྱུང་བ་གཡོ་འཁྲུགས་ཕྱི་ནང་བར་ཆད་ཟློག༔ རྩ་རླུང་ཐིག་ལེའི་འདུ་བ་འཁྲུགས་པ་ཟློག༔ བན་བོན་མུ་སྟེགས་ཕྱི་པའི་ངན་སྔགས་ཟློག༔ མནན་བསྲེགས་འཕང་དང་འཕྲུལ་འཁོར་ཐམས་ཅད་ཟློག༔ རྨི་ལྟས་མཚན་ངན་སྐེག་སྲི་ཐམས་ཅད་ཟློག༔ ལྟས་ངན་གློ་བུར་ཡེ་འདྲོག་ཐམས་ཅད་ཟློག༔ བཟློག་གོ་དམར་ཆེན་གཏོར་མ་འདི་ཡིས་ཟློགཿབསྒྱུར་རོ་ཆགས་ཆེ་ཉམས་ང་དགྲ་ལ་བསྒྱུར༔ ཟློག་བསྒྱུར་བཅོལ་པའི་ཕྲིན་ལས་མཛད་དུ་གསོལ༔ ཧཱུྃ༔ གཉིས་མེད་སྦྱོར་བའི་ཡུམ་མཆོག་མཐིང་འོད་འབར༔ ཁྲོ་མོའི་ཆས་ལྡན་ཡབ་ལ་དགྱེས་པར་འཁྲིལ༔ ཨཱ་རལླི་དང་ཧི་ཧིའི་སྒྲ་ཆེན་སྒྲོགས༔ སྤྲུལ་པའི་ཁྲོ་མོ་སྐར་ལྟར་འཁྲུགས་པ་ཡིས༔ དགྲ་གདོན་ཤ་ཁྲག༴ སོགས་འགྲེས། ཧཱུྃ་ཡཿཔདྨ་དྲག་པོའི་སྐུ་ཡི་དཀྱིལ་འཁོར་ནས༔ འཇམ་དཔལ་གཤིན་རྗེའི་ལྷ་ཚོགས་དབྱིངས་ནས་བཞེངས༔ གཤིན་རྗེ་བྱེ་བ་འབུམ་སྡེའི་ཚོགས་བཅས་ཀྱིས༔ དགྲ་གདོན༴ ཧཱུྃ་ཧྲཱིཿཔདྨ་དྲག་པོའི་གསུང་གི་དཀྱིལ་འཁོར་ནས༔ དབང་ཆེན་རྟ་མཆོག་སྤྲུལ་པའི་ཚོགས་བཅས་ཀྱིས༔ དགྲ་གདོན༴ ཧཱུྃ་ཧཱུྃཿཔདྨ་དྲག་པོའི་ཐུགས་ཀྱི་དཀྱིལ་འཁོར་ནས༔ དཔལ་ཆེན་གསང་བདག་ཧེ་རུ་ཀ་ཡི་ཚོགས༔ ཐུགས་མཆོག་རིགས་ཀྱི་ཁྲོ་བོ་ཁྲོ་མོ་རྣམས༔ དགྲ་གདོན༴ ཧཱུྃ་བྃ༔ པདྨ་དྲག་པོའི་ཡོན་ཏན་དཀྱིལ་འཁོར་ནས༔ བདུད་འདུལ་ཁྲོ་མོ་དབྱིངས་ཕྱུག་སྡེ་ལྔའི་ཚོགས༔ དྷཱ་ཀི་བྱེ་བ་འབུམ་གྱི་འཁོར་ཚོགས་རྣམས༔ དགྲ་གདོན༴ ཧཱུྃ་ཡཿཔདྨ་དྲག་པོའི་ཕྲིན་ལས་དཀྱིལ་འཁོར་ནས༔ ཁྲོ་རྒྱལ་ཡཀྵ་མེ་དབལ་ལྷ་ཚོགས་རྣམས༔ དགྲ་གདོན༴ ཧཱུྃ་ཧྲཱིཿགཙོ་མཆོག་སྐུ་ཡི་གནས་ལྔའི་ཁྲོ་ཆེན་ལྔ༔ གསེར་ལྕགས་དུང་གཡུ་ཟངས་ཀྱི་སྡིག་པ་ལྔ༔ མགོ་དགུ་རྭ་ནི་བཅོ་བརྒྱད་ལྡན་པ་ཡི༔ མ་རུང་གདུག་པའི་གཟུགས་ཅན་འཁོར་བཅས་རྣམས༔ དགྲ་གདོན༴ ཧཱུྃ་ཧྲཱིཿགཞན་ཡང་སྟེང་འོག་ཕྱོགས་མཚམས་ཐམས་ཅད་དུ༔ རྩ་གསུམ་ཆོས་སྐྱོང་ནོར་ལྷ་གཏེར་བདག་ཚོགས༔ སྤྲུལ་པ་ཡང་སྤྲུལ་འཁོར་དང་བཅས་པ་རྣམས༔ དགྲ་གདོན༴ ཧཱུྃ་ཁྲོཾ༔ དཔལ་ཆེན་པདྨ་དྲག་པོའི་དབུ་གཙུག་གི༔ ཡེ་ཤེས་བྱ་ཁྱུང་སྒྲོ་གཤོག་མཆུ་སྡེར་གྱིས༔ གདུག་པའི་ཀླུ་རིགས་ཞལ་དུ་འདྲེན་མཛད་ཅིང་༔ ཀྲང་ཀྲང་ཀྲིང་ཀྲིང་སྒྲོ་གཤོག་མེ་འབར་བའི༔ སྤྲུལ་པའི་ཁྱུང་ཆེན་ཡང་སྤྲུལ་ཚོགས་དང་བཅས༔ དགྲ་གདོན༴ དེ་ནས་བྷྱོ་ཡི་གདབ་པ་དང་༔ ལྟས་ངན་བཟློག་པ་སྤྱི་ལྟར་བྱ༔ ཟོར་ཆེན་ཡེ་ཤེས་ནམ་མཁར་བཏེགས༔ གསེར་བསྐུལ་གཟུ་དཔང་སྒོ་དབྱེ་ཞིང་༔ དགྲ་བགེགས་དམིགས་བྱ་འབེན་དུ་བཅས༔ ཧཱུྃ་བྷྱོ༔ དགོངས་སུ་གསོལ་ལོ་གསན་དུ་གསོལ༔ དམ་ཉམས་སྡིག་ཆེན་དགྲ་བོ་རྣམས༔ སངས་རྒྱས་བསྟན་བཤིག་དཀོན་མཆོག་སྨད༔ དགེ་འདུན་འདུ་སྒོ་འཕྲོག་པ་དང་༔ རྣལ་འབྱོར་ཚེ་སྲོག་ལ་གཟན་ཅིང་༔ བྱང་ཆུབ་སྒྲུབ་ལ་བར་དུ་གཅོད༔ འཇིག་རྟེན་མི་བདེ་བྱེད་པ་ཡི༔ ལོག་ལྟའི་དཔུང་ཚོགས་སྡེ་བཅས་ལ༔ དྲག་པོ་ཁྲོས་པའི་ང་རོ་ཡི༔ གཏོར་ཟོར་མེ་དང་ནད་མཚོན་གྱི༔ འབར་བ་འདི་ཉིད་བརྒྱབ་པ་ཡིས༔ ལུས་སེམས་ཐལ་བའི་རྡུལ་བཞིན་རློགས༔ དགྲ་དཔུང་བདུན་བརྒྱུད་རྩད་ནས་ཆོད༔ ཡུལ་མཁར་ཁང་ཁྱིམ་རྨིངས་མེད་གཏོར༔ རྡུལ་ཕྲན་ཕྱེ་མར་འཐག་པ་དང་༔ སྡུག་བསྔལ་ཉམས་སུ་མྱོངས་སུ་ཆུག༔ བསྟན་དགྲའི་སྙིང་ལ་མཱ་ར་ཡ༔ བྷྱོ་བྷྱོ་བཟློག༔ དྲག་སྔགས་བཟླ་བཞིན་འཕང་བར་བྱ༔ ཁ་ཕུང་རྗས་མེད་གཏོར་བར་བསམ༔ སྲུང་འཁོར་བསྒོམ་ཞིང་ཕྱི་ལམ་བཅད༔ སྒོ་དྲུང་མནན་པས་ལྡང་མེད་བྱ༔ ཚེ་འགུགས་མཆོད་བསྟོད་ལ་སོགས་པ༔ རྗེས་ཀྱི་རིམ་པ་གཞུང་བཞིན་བྱ༔ དེས་ནི་བདུད་དང་བསྟན་དགྲ་རྣམས༔ ཚར་གཅོད་མིང་ཡང་མི་གྲགས་འགྱུར༔ ཨེ་མ་པདྨ་ཁྲག་འཐུང་གི༔ བཟློག་པའི་བྱང་བུ་བརྡ་ཡི་རྐྱེན༔ རིག་འཛིན་དཔའ་བོའི་སྙིང་ལ་སད༔ སྐལ་ལྡན་འགའ་ཡི་དོན་དུ་འགྱུར༔ ས་མ་ཡ༔ རྒྱ་རྒྱ་རྒྱ༔ ཆུ་སྦྲུལ་ས་ག་ཟླ་བའི་ཚེས་༧ལ་བྲིས་པའོ།། །།

[edit]

zab gsang pad+ma'i yang thig las:__pad+ma drag po'i smad las gdab kha dang :__bzlog pa mtshon cha 'khor lo bzhugs:__pad+ma drag por phyag 'tshal lo:__drag po rgyu ba'i dus tshes kyi:__nyi ma nag por phung shul gyi:__sa la stegs bu bcas byas te:__dur khrod rus chen ro sol gyis:__byugs pa'i dbus su ma tra~M gzugs:__de yi lte bar lcags 'khor ni:__rtsib bzhi rno bar hU~M sngon dang :__de phyir khrag khyams rdo rwa dang :__me rlung 'khrugs pas mtshan pa bri:__de dbus sha khrag rus pa dang :__'bru nag dag las drag gtor ni:__thog mdil dbyibs can khru gang bar:__dregs pa'i gtor chung brgyad kyis bskor:__mtshe yungs rtsang dang shing tsher gyis:__rwa bas bskor zhing rngam brjid ldan:__ri rod gad chad la sogs dang :__dgra bgegs byad ma'i dri ma rnams:__bsres pa'i rU pa nyams thag pa:__sor bzhi'am ni brgyad dag bya:__de yi snying gar mtshon 'khor ni:__rtsibs bzhi'i lte bar dgra bgegs gzugs:__snying gar nr-i tri kha sprod dang /__ling+ga'i gnas yig spyi ltar bkod:__lte srog mtha' la che ge ni:__khug dzaHshA tUM srog la rbad:__ces pa dag gis bskor byas la:__dzaHkhram gyis ni mtha' nas 'khyud:__dug khrus bsad ltebs byad thag 'ching :__de yi sne nas tshon skud ni:__drangs te gtor chen 'og tu drangs:__sngags pas yi dam sgrub mchod dang :__srung ba rang nyid yi dam du:__gsal ba'i thugs srog las 'phros pa'i:__'od kyis rtsa gsum rgyal ba dang :__dregs tshogs spyan drangs 'od du zhu:__phyag mtshan lnga dang lcags sdig gi:__srung ba'i gur khang chen por mos:__rtsa ba'i sngags mthar:__ma ma badz+ra rak+Sha rak+Sha hU~M tiSh+Tha b+h+rU~M:__zhes btags srung dmigs nan tan bya:__mdun gyi gtor ma lhar bskyed cing :__las kyi rim pa ci rigs bya:__mdun bskyed drag po'i lha tshogs kyi:__thugs kar sngags kyis bskor ba las:__'od 'phros byin bsdu nus bskyed de:__mthu rtsal rab rdzogs dbang thob bsam:__slar yang 'od 'phros gdug pa can:__sde brgyad srog gi snying po 'phrog:__thugs ka'i sngags kyi 'og tu bstim:__dregs pa'i srog dbang 'dus par bsam:__thugs nas 'od zer mtshon cha ltar:__rab tu rtsub pa 'phros pa yis:__dgra bgegs gnod byed thams cad rnams:__bkug nas 'bar ba'i hom du bcug:__snying gar zangs lcags 'khor lo gnyis:__g.yas g.yon drag tu 'khor ba dang :__sdig pas hab hab zos par bsam:__rtsa sngags dregs pa'i sham bu dang :__pad+ma kro d+hI drag sngags ni:__me dpung thog ser 'bab ltar bzla:__gtor chung gnod byed 'gugs bstim gyi:__dmag lto'i tshul du phul ba dang :__drag po'i phrin las btsel bar bya:__chos skyong gtor bskang tshogs mchod 'bul:__de nas gser skyems gzu dpang ni:__las rim gzhan nas 'byung ltar la:__hU~M:__mi mngon dbyings na bzhugs pa yi:__rtsa gsum rgyal ba rab 'byams kyi:__thugs dam bskul lo mthu dpung bskyed:__nyams pa bsgral ba'i dus la bab:__rnga yab lang+ka pU ri nas:__bla ma drag po'i lha tshogs rnams:__thugs rje'i mthu rtsal rab bskyed de:__deng 'dir bskul lo dgongs par mdzod:__bdag cag byang chub sgrub pa la:__bar du gcod pa'i bdud dgra dang :__bstan la gnod cing 'tshe ba yi:__kla klo 'byung po'i dpung tshogs rnams:__da lta bsgral ba'i dus la bab:__thugs dam ma g.yel sa ma ya:__khyed rnams gzu dang dpang mdzod la:__bden rdzun gnyis kyi shan thang 'byed:__bdag cag ma nyes ma yo'o:__'di la skyob pa su zhig yod:__nyams pa sgrol ba'i dus 'di yin:__phyis nas khyed kyi mthu rtsal gyis:__dgos pa chung zhing de bas na:__da lta nyid du mngon spyod kyi:__phrin las drag po mdzad du gsol:__hom bskyed dgug gzhug drag tu bya:__dza:__lcags kyu can gyis snying nas zungs:__hU~M:__zhags pa can gyis ske nas sdoms:__ba~MHlcags sgrog can gyis yan lag chings:__hoHdril bu can gyis myos su chug:__nr-i tri dgra bgegs che ge mo A kaR+Sha ya dzaHdzaHhU~M ba~M hoHyang yang brjod:__bya 'ug sgro dang dud pas bdug:__dbye byed pho nya chen mo yi:__rdzas dang sngags kyi dgra gdon gyi:__lha dang srung ma thams cad ni:__dbang med phral te mthu med mos:__dzaHpra we sha ya phaT:__A we sha ya AHthun rdzas dug khrag gtig byas la:__hU~M b+h+yo:__pho nya srin po khros pa yi:__myos byed dug khrag char 'bebs pas:__nyams pa dran myos bkrag mdangs nyams:__skyabs bral mgon med gyur par mos:__dz+wa la pa ya dz+wa la pa ya mA ra ya rbad:__de nas phur bu thogs byas la:__gding gsum gsal ba gsum dang ni:__tshe khrus dgongs pas btab byas la:__hU~M:__pad+ma drag po kI la ya:__sku stod khro bo chen po'i sku:__sku smad lcags sreg phur bu yis:__dgra gdon bgegs kyi snying khar btab:__rnam shes chos dbyings klong du phaT:__rtsa ba'i sngags dang drag sngags kyi:__snying ga gtsor byas gnas rnams la:__btab ste 'tshings pa gsum ldan mos:__thun rdzas sna tshogs char dbab la:__hU~M:__drag po'i lha tshogs thams cad las:__pho nya mang po skar ltar 'khrugs:__dgra bgegs gzugs phung rdul du rlog:__oM pad+ma kro d+ha dgra bgegs mA ra ya mA ra ya da ha da ha pa tsa pa tsa g+hr-i h+Na g+hr-i h+Na b+han+d+ha b+han+d+ha hU~M phaT:__'bar ba'i ral gris dum bur gtub:__hU~M b+h+yo:__nyams pa'i gzugs phung ye shes kyi:__ral gri rno dbal 'bar ba yis:__dum bur gtub cing skye rgyun gcod:__ming gi lhag ma med par gyur:__oM pad+ma kro d+ha dgra bgegs tshin+d+ha ya tshin+d+ha ya hU~M phaT:__sha khrag bdud rtsir spar byas te:__hU~M:__drag po'i lha tshogs rngams pa'i zhal:__gru gsum gnam sa ltar gdangs par:__dgra gdon sha khrag rus gsum stobs:__chem chem bzhes shig kha raM khA hi:__rtsa sngags mthar:__i daM ba liM ta kha kha khA hi khA hi:__de nas dug khrag gtor ma dang :__khrag skyems bshams shing rnge'u chung brdungs:__bzlog pa'i phrin las bcol ba ni:__hU~M hrIHgru gsum smug nag 'bar ba'i dkyil 'khor nas:__pad+ma drag po yab yum sras 'khor bcas:__bzhengs shig bzhengs shig chos kyi dbyings nas bzhengs:__bskul lo bskul lo drag po'i las la bskul:__bzlog cing bsgyur ba'i phrin las mdzad du gsol:__hU~M hrIHdkyil 'khor gtso mchog gu ru drag po'i sku:__rngam brjid khros pa'i ngar skad phyogs bcur sgrogs:__'bar ba'i mtshon cha sna tshogs 'phro ba dang :__sku mchog rngam zhing brjid pa'i nyams ldan pas:__dgra gdon sha khrag mchod pa 'di bzhes la:__gnod byed rgyal 'gong mtha' bzhi'i dmag dpung zlog:__'byung ba g.yo 'khrugs phyi nang bar chad zlog:__rtsa rlung thig le'i 'du ba 'khrugs pa zlog:__ban bon mu stegs phyi pa'i ngan sngags zlog:__mnan bsregs 'phang dang 'phrul 'khor thams cad zlog:__rmi ltas mtshan ngan skeg sri thams cad zlog:__ltas ngan glo bur ye 'drog thams cad zlog:__bzlog go dmar chen gtor ma 'di yis zlogaHbsgyur ro chags che nyams nga dgra la bsgyur:__zlog bsgyur bcol pa'i phrin las mdzad du gsol:__hU~M:__gnyis med sbyor ba'i yum mchog mthing 'od 'bar:__khro mo'i chas ldan yab la dgyes par 'khril:__A ral+li dang hi hi'i sgra chen sgrogs:__sprul pa'i khro mo skar ltar 'khrugs pa yis:__dgra gdon sha khrag=_sogs 'gres/__hU~M yaHpad+ma drag po'i sku yi dkyil 'khor nas:__'jam dpal gshin rje'i lha tshogs dbyings nas bzhengs:__gshin rje bye ba 'bum sde'i tshogs bcas kyis:__dgra gdon=_hU~M hrIHpad+ma drag po'i gsung gi dkyil 'khor nas:__dbang chen rta mchog sprul pa'i tshogs bcas kyis:__dgra gdon=_hU~M hU~MHpad+ma drag po'i thugs kyi dkyil 'khor nas:__dpal chen gsang bdag he ru ka yi tshogs:__thugs mchog rigs kyi khro bo khro mo rnams:__dgra gdon=_hU~M ba~M:__pad+ma drag po'i yon tan dkyil 'khor nas:__bdud 'dul khro mo dbyings phyug sde lnga'i tshogs:__d+hA ki bye ba 'bum gyi 'khor tshogs rnams:__dgra gdon=_hU~M yaHpad+ma drag po'i phrin las dkyil 'khor nas:__khro rgyal yak+Sha me dbal lha tshogs rnams:__dgra gdon=_hU~M hrIHgtso mchog sku yi gnas lnga'i khro chen lnga:__gser lcags dung g.yu zangs kyi sdig pa lnga:__mgo dgu rwa ni bco brgyad ldan pa yi:__ma rung gdug pa'i gzugs can 'khor bcas rnams:__dgra gdon=_hU~M hrIHgzhan yang steng 'og phyogs mtshams thams cad du:__rtsa gsum chos skyong nor lha gter bdag tshogs:__sprul pa yang sprul 'khor dang bcas pa rnams:__dgra gdon=_hU~M khroM:__dpal chen pad+ma drag po'i dbu gtsug gi:__ye shes bya khyung sgro gshog mchu sder gyis:__gdug pa'i klu rigs zhal du 'dren mdzad cing :__krang krang kring kring sgro gshog me 'bar ba'i:__sprul pa'i khyung chen yang sprul tshogs dang bcas:__dgra gdon=_de nas b+h+yo yi gdab pa dang :__ltas ngan bzlog pa spyi ltar bya:__zor chen ye shes nam mkhar btegs:__gser bskul gzu dpang sgo dbye zhing :__dgra bgegs dmigs bya 'ben du bcas:__hU~M b+h+yo:__dgongs su gsol lo gsan du gsol:__dam nyams sdig chen dgra bo rnams:__sangs rgyas bstan bshig dkon mchog smad:__dge 'dun 'du sgo 'phrog pa dang :__rnal 'byor tshe srog la gzan cing :__byang chub sgrub la bar du gcod:__'jig rten mi bde byed pa yi:__log lta'i dpung tshogs sde bcas la:__drag po khros pa'i nga ro yi:__gtor zor me dang nad mtshon gyi:__'bar ba 'di nyid brgyab pa yis:__lus sems thal ba'i rdul bzhin rlogs:__dgra dpung bdun brgyud rtsad nas chod:__yul mkhar khang khyim rmings med gtor:__rdul phran phye mar 'thag pa dang :__sdug bsngal nyams su myongs su chug:__bstan dgra'i snying la mA ra ya:__b+h+yo b+h+yo bzlog:__drag sngags bzla bzhin 'phang bar bya:__kha phung rjas med gtor bar bsam:__srung 'khor bsgom zhing phyi lam bcad:__sgo drung mnan pas ldang med bya:__tshe 'gugs mchod bstod la sogs pa:__rjes kyi rim pa gzhung bzhin bya:__des ni bdud dang bstan dgra rnams:__tshar gcod ming yang mi grags 'gyur:__e ma pad+ma khrag 'thung gi:__bzlog pa'i byang bu brda yi rkyen:__rig 'dzin dpa' bo'i snying la sad:__skal ldan 'ga' yi don du 'gyur:__sa ma ya:__rgya rgya rgya:__chu sbrul sa ga zla ba'i tshes 7la bris pa'o//__//