JKCL-KABUM-09-TA-010

🚧 This website is under continued development. We appreciate your patience!

Previous Text Back to Volume PageNext Text

Wylie title
Location	chos kyi blo gros bka' 'bum Volume 9, Text 10, Pages (Folios 1a1 to )
Author	འཇམ་དབྱངས་མཁྱེན་བརྩེ་ཆོས་ཀྱི་བློ་གྲོས་
Less details More details
Citation	'jam dbyangs mkhyen brtse chos kyi blo gros. '. In Rdzong sar mkhyen brtse 'jam dbyangs chos kyi blo gros kyi gsung 'bum, Vol. 9: . Bir, H.P.: Khyentse Labrang, 2012.
Genre	Vajra Songs - rdo rje'i glu

1 Texts in this Section (sde tshan or chos tshan)

85-97	དཔལ་མངོན་རྫོགས་རྒྱལ་པོའི་ཀལྤ་དུམ་བུའི་རྒྱུད་ཀྱི་ཟིན་བྲིས་ཉུང་གསལ། dpal mngon rdzogs rgyal po'i kalpa dum bu'i rgyud kyi zin bris nyung gsal Notes - zin bris	Text page View PDF
	[[|འཇམ་དབྱངས་མཁྱེན་བརྩེ་ཆོས་ཀྱི་བློ་གྲོས་ ()]]

Tibetan Text

Wylie

[edit]

༄༅། །དཔལ་མངོན་རྫོགས་རྒྱལ་པོའི་ཀལྤ་དུམ་བུའི་རྒྱུད་ཀྱི་ཟིན་བྲིས་ཉུང་གསལ་བཞུགས་སོ། ། ཟབ་བདུན་མ་མོ། །ན་མོ་གུ་རུ་ཤྲཱི་ཧེ་རུ་ཀཱ་ཡ། སངས་རྒྱས་གཉིས་པ་པདྨ་སམྦྷ་བའི་ཐུག་དམ་ཟབ་པ་སྐོར་བདུན་ལས། གནས་སྐབས་རྐྱེན་ཟློག་གི་ཟབ་པ་མ་མོ་རོལ་པའི་ཆོས་སྡེའི་རྩ་བ་ཁྲག་འཐུང་མངོན་རྫོགས་རྒྱལ་པོའི་ཀལྤ་དུམ་བུའི་རྒྱུད་འདི་འཆད་པ་ལ་གཉིས། རྒྱུད་བཤད་པའི་ཚུལ་དང་། མན་ངག་ཉམས་སུ་བླང་བའི་ཚུལ་ལོ། །དང་པོ་ལ་གསུམ། མཚན་དང་། གཞུང་དང་། མཇུག་གི་དོན་ནོ། །དང་པོ་ལ་གཉིས། གླེགས་བམ་གྱི་དབུར་བཀོད་པའི་མཚན་དང་། གཞུང་རང་གི་མཚན་གྱི་དོན་བཤད་པའོ། །དང་པོ་ནི། དཔལ་མངོན་རྫོགས་སོགས་ཏེ། དཔལ་ཁྲག་འཐུང་མངོན་རྫོགས་རྒྱལ་པོ་གཙོ་བོར་གྱུར་པའི་སྲིད་པ་མ་མོའི་རྒྱུད་སྡེ་མཐའ་ཡས་པ་ལས། ཀལྤ་ནི་རྟོག་པ་སྟེ་ལས་དང་དངོས་གྲུབ་སྒྲུབ་པའི་རྟོག་པ་དུམ་བུ་ལོགས་སུ་ཕྱུང་བའི་རྒྱུད་ཆུང་ངུ་བཞུགས་སོ། །ཞེས་པའོ། །གཉིས་པ་ལ་གཉིས། མཚན་བསྒྱུར་བ་དང་། དོན་བཤད་པའོ། །དང་པོ་ནི། ཡང་དག་པའི་སོགས་ཏེ། སྟོན་པ་ཡང་དག་པ་རྫོགས་པའི་སངས་རྒྱས་རྡོ་རྗེ་འཆང་དཔལ་ཁྲག་འཐུང་ཆེན་པོས་ཆོས་ཉིད་རྡོ་རྗེའི་རང་སྒྲར་སྣང་བའི་སྐད་དུ། ཤྲི་ཧེ་རུ་ཀ། དེ་བོད་སྐད་དུ་བསྒྱུར་ན། དཔལ་ཁྲག་འཐུང་ཞེས་པ་སྟེ་སྟོན་པ་དང་རྒྱུད་ཀྱི་མཚན་ཐུན་མོང་ངོ་། །གཉིས་པ་དོན་བཤད་པ་ལ་གསུམ། དྲང་དོན་ལྟར་བཤད་པ། ངེས་དོན་ལྟར་བཤད་པ། རྒྱུད་དོན་དང་སྦྱར་བའོ། །དང་པོ་ནི། ཤྲཱི་ནི་བསྟེན་པར་འོས་པས་ན་དཔལ། ཧེ་ནི་ཧི་ལ་སྟེ་རོལ་པ། རུ་ནི་རུ་དྷི་ར་སྟེ་ཁྲག །ཀ་ནི་བདག་པོའི་སྒྲ་སྟེ། སྲིད་ཞི་ཀུན་གྱིས་བསྟེན་པར་འོས་པའི་སྤྱི་དཔལ་ཀུན་ཏུ་བཟང་པོ་ཉིད་གདུལ་བྱ་གདུག་པ་ཅན་རུ་ཏྲ་ལ་སོགས་པའི་སྙིང་ཁྲག་ལ་དགྱེས་རྒུར་འཐུང་ཞིང་རོལ་པའི་ཆེད་དུ་འཇིགས་བྱེད་ཁྲོ་བོའི་རྒྱལ་པོར་བཞེངས་པ་ཆེ་མཆོག་ཧེ་རུ་ཀའི་མཚན་གཞན་མངོན་རྫོགས་རྒྱལ་པོ་སོགས་སུ་སྣང་བའོ། །གཉིས་པ་ནི། དེ་ལྟ་བུའི་དྲང་དོན་བརྡའི་དཔལ་ཁྲག་འཐུང་ཆེན་པོ་དེ་ཉིད་ངེས་དོན་ལྟར་ན། རྒྱུད་ལས། ཤྲཱི་ནི་གཉིས་མེད་ཡེ་ཤེས་ཏེ། ཧེ་ནི་རྒྱུ་སོགས་སྟོང་པ་ཉིད། རུ་ནི་ཚོགས་དང་བྲལ་བ་སྟེ། ཀ་ནི་གང་དུའང་མི་གནས་པའོ། །ཞེས་ཤྲཱི་ནི་གཉིས་སུ་མེད་པའི་ཡེ་ཤེས་ཏེ་རང་བཞིན་འོད་གསལ་བའི་རྣམ་པར་ཐར་པ་དང་། ཧེ་ནི་གཞི་སྟོང་པ་ཉིད། རུ་ནི་ལམ་མཚན་མ་མེད་པ། ཀ་ནི་འབྲས་བུ་སྨོན་པ་མེད་པ་སྟེ་རང་བཞིན་དང་། གཞི་དང་། རྒྱུ་དང་། ངོ་བོས་སྟོང་པའི་རྣམ་ཐར་སྒོ་བཞིའི་བདག་ཉིད་ཟུང་འཇུག་འདུས་མ་བྱས་པའི་ཡེ་ཤེས་དཀྱིལ་འཁོར་རབ་འབྱམས་ཀྱི་འཆར་གཞིར་བཞུགས་སོ། །གསུམ་པ་ནི། དེ་ལྟ་བུའི་དྲང་ངེས་ཀྱི་ཧེ་རུ་ཀ་ཡི་གེ་བཞིས་མཚོན་པར་བྱས་ཏེ། མཚོན་བྱ་ནི་གཞི་ལམ་འབྲས་བུའི་རྒྱུད་ཡིན་ལ། ཇི་ལྟར་མཚོན་པའི་ཚུལ་སྲིད་པ་མ་མོའི་གྲུབ་པའི་མཐའ། དབྱིངས་དང་ཡེ་ཤེས་ལས་འཇིག་རྟེན༔ སྲིད་པ་མ་མོ་རྣམ་བཞི་ནི༔ རྩ་རླུང་བྱང་ཆུབ་སེམས་ཡིན་ཏེ༔ གཞི་ལམ་འབྲས་བུའི་ཚུལ་དུ་གནས༔ ཞེས་པ་ལྟར། ཤྲཱི་དབྱིངས། ཧེ་ཡེ་ཤེས། རུ་ལས། ཀ་འཇིག་རྟེན་གྱི་མ་མོ་བཞི་མཚོན་པ་དེ་ཉིད། གཞིའི་དུས་སུ། དབྱིངས་ཀྱི་མ་མོ་སྟོང་པ། ཡེ་ཤེས་གསལ་ཆ། རུ་གཉིས་མེད་ཀྱི་རྩལ་སྣ་ཚོགས་སུ་ཤར་བ། ཀ་དེ་ལས་སྣོད་བཅུད་ཐ་དད་པར་སྣང་བའམ། དོན་དམ་ཆོས་ཉིད་བྱང་ཆུབ་ཀྱི་སེམས་དབྱིངས། ཀུན་རྫོབ་ཆོས་ཅན་བྱང་ཆུབ་ཀྱི་སེམས་ཡེ་ཤེས། རླུང་ལས། རྩ་འཇིག་རྟེན་པའི་མ་མོའི་ཚུལ་དུ་གནས་པའོ། །ལམ་གྱི་དུས་སུ། བུམ་དབང་གི་ལམ་བསྐྱེད་པའི་རིམ་པ་བསྒོམས་པས་འཇིག་རྟེན་གྱི་མ་མོ་བྲན་དུ་བཀོལ། གསང་དབང་གི་ལམ་རླུང་དང་གཏུམ་མོས་ལས་ཀྱི་མ་མོ་དབང་དུ་བྱས། ཤེར་དབང་ལམ་ཕོ་ཉའི་ཉེ་རྒྱུས་ཡེ་ཤེས་ཀྱི་མ་མོ་དཔེའི་ཚུལ་དུ་དྲངས། དབང་བཞི་པའི་ལམ་དབྱིངས་རིག་དབྱེར་མེད་པས་དོན་དམ་དབྱིངས་ཀྱི་མ་མོ་མངོན་སུམ་དུ་མཐོང་བ་ལ་བརྟེན་ནས། འབྲས་བུའི་དུས་སུ་སྐུ་གསུམ་དབྱེར་མི་ཕྱེད་པའི་དབྱིངས་བདེ་བ་ཆེན་པོའི་སྐུ། ཡེ་ཤེས་ནང་གསལ་དུ་འཁྱིལ་པ་ཆོས་སྐུ། བྱེད་ལས་ཕྱིར་གསལ་དུ་ཤར་བ་ལོངས་སྐུ། འཇིག་རྟེན་དང་རྗེས་སུ་མཐུན་པར་དོན་མཛད་པ་སྤྲུལ་པའི་སྐུ་སྟེ་སྐུ་བཞིའི་གོ་འཕང་མངོན་དུ་འགྱུར་བས་མཚོན་རྒྱ་ཆེར་ཤེས་པར་བྱའོ། །གཉིས་པ་གཞུང་གི་དོན་ལ་ལྔ། གླིང་གཞི་མདོར་བསྟན་པ། གླེང་སློང་གིས་མཚམས་སྦྱར་བ། རྒྱུད་དོན་དངོས་བཤད་པ། གདམས་ཤིང་གཏད་པས་དོན་བསྡུ་བ། ཞར་བྱུང་དགོས་འབྲེལ་གྱི་མཚོན་ཚུལ་ལོ། །དང་པོ་ནི། ཕུན་སུམ་ཚོགས་པ་ལྔ་ལས་དཔེ་མ་མོ་རྣམས་ཞེས་པས། དེས་ཞེས་ཚིག་གོང་མ་དཔལ་ཁྲག་འཐུང་ལ་སྙེགས་པས་ན་སྟོན་པ་དང་། མ་མོ་རྣམས་ཞེས་པས་འཁོར་དངོས་སུ་བསྟན་ཅིང་། གཞན་གསུམ་ཤུགས་ལས་མཚོན། །གཉིས་པ་ནི། དབང་དུ་བསྡུས་ནས་འདི་སྐད་ཅེས་གསུངས་སོ་ཞེས་ཟབ་དབང་གསུམ་བསྐུར་བས་དབང་དུ་བསྡུས་ཏེ་སྟོན་འཁོར་དགོངས་པ་དབྱེར་མེད་དུ་གྱུར་པ་ཐུན་མོང་མ་ཡིན་པའི་གླེང་སློང་གིས་གཞི་བཟུང་། མ་འོངས་པའི་དོན་དུ་ཞུ་བས་སྐབས་དབྱེ་བ་ལ་འདི་སྐད་དེ་རྒྱུད་དོན་རྫོགས་པར་གསུངས་སོ་ཞེས་ཐུན་མོང་གི་གླེང་སློང་གིས་མཚམས་སྦྱར་བའོ། །གསུམ་པ་ལ་གཉིས། རྒྱུད་གསུམ་གྱི་རྣམ་པར་བཞག་པའི་ཚུལ་གྱིས་ཁོག་ཕུབས་པ་དང་། ལམ་གྱི་ཆ་རྐྱེན་མདོས་ཀྱི་ཆོ་ག་ཁྱད་པར་དུ་དབྱེ་བའོ། །དང་པོ་ལ་གསུམ། སྒྲུབ་པའི་གཞི། སྒྲུབ་བྱེད་ཀྱི་ཐབས། གྲུབ་པའི་འབྲས་བུའོ། །དང་པོ་ལ་གཉིས། ཤེས་བྱ་ངོ་བོའི་གཞི་དང་། སྦྱང་བྱ་བཏགས་པའི་གཞི་སྟེ། དང་པོ་ནི། ཧཱུྃ། སྣང་སྲིད་སོགས་ཚིག་རྐང་དྲུག་དང་། གཉིས་པ་ནི། རིག་སོགས་ཚིག་རྐང་དགུའོ། །གཉིས་པ་ནི། དེ་ལ་ཟློག་པའི་སོགས་ཚིག་རྐང་བདུན་ཏེ། འདི་ལ་ཚིག་ལྟར་བཤད་ན་ཕྱི་མཚན་མ་རྫས་ཀྱི་མདོས། སྤྱི་དོན་ལྟར་བཤད་ན་བསྐྱེད་རིམ་ཕྱག་རྒྱའི་མདོས། སྦས་དོན་ལྟར་བཤད་ན་གསང་བ་རྩ་རླུང་ཐིག་ལེའི་མདོས། མཐར་ཐུག་ལྟར་བཤད་ན་ཡང་གསང་དབྱིངས་རིག་དབྱེར་མེད་བྱང་ཆུབ་སེམས་ཀྱི་མདོས་ཏེ། ལམ་ཡོངས་སུ་རྫོགས་པར་སྦྱར་དུ་ཡོད་ཅིང་། གཞུང་གི་དངོས་བསྟན་ནི་གཙོ་བོར་མཚན་མ་རྫས་དང་། ཞར་བྱུང་བསྐྱེད་རིམ་ཀྱང་མཚོན་ཙམ་བསྟན་ནོ། །གསུམ་པ་ལ་གསུམ། མཆོག་གི་དངོས་གྲུབ་འགྲུབ་ཚུལ། ཐུན་མོང་གི་ཕྲིན་ལས་འབྱུང་ཚུལ། གཉིས་ཀའི་དོན་བསྡུ་བ་སྟེ། དང་པོ་ནི། དེས་ན་སོགས་ཚིག་རྐང་གསུམ། གཉིས་པ་ནི། སྒྲུབ་པའི་སོགས་ཚིག་རྐང་གཉིས། གསུམ་པ་ནི། སྲིད་ཞིའི་སོགས་ཚིག་རྐང་གཉིས་སོ། །གཉིས་པ་མདོས་ཀྱི་ཆོ་ག་ཁྱད་པར་དུ་དབྱེ་བ་ལ་གཉིས། སྤྱིའི་དོན་དང་། ཡན་ལག་གི་དོན་ནོ། །དང་པོ་ལ་ལྔ། མཚན་ཉིད། སྒྲ་དོན། དབྱེ་བ། ཐབས་འབྲས་བུ་སྟེ། དེ་རྣམས་གཞུང་འདིས་ཀྱང་ཅི་རིགས་པར་བསྟན་ཅིང་། རྒྱས་པར་མ་མོའི་རྒྱུད་ལུང་མན་ངག་རྣམས་དང་ལོ་ཆེན་བཻ་རོའི་ཞུས་ལེན་སོགས་སྦྱར་ཏེ་རྒྱ་ཆེར་ཤེས་པར་བྱའོ། །གཉིས་པ་ལ་གཉིས། གློ་བུར་ལས་བཅོལ་གྱི་མདོས་དང་། བསྙེན་སྒྲུབ་ལས་སྦྱོར་དང་འབྲེལ་བའི་མདོས་སོ། །དང་པོ་ནི། ལས་ནི་ཆེ་ཕྲ་སོགས་ཚིག་རྐང་དྲུག་སྟེ། སྒྲུབ་པ་ཆེན་པོ་ལ་སོགས་པའི་ལས་ཆེ་ཕྲ་གང་བརྩམས་ཀྱང་ཐོག་མར་མདོས་ཀྱི་ཆོ་ག་རྒྱས་པར་བྱ་བའམ། སྐོང་བཤགས་དང་། གསོལ་ཁ་ཙམ་གྱིས་ཀྱང་ལས་ལ་བར་ཆད་མེད་ཅིང་མྱུར་དུ་འགྲུབ་པ་ལ་སོགས་པའི་ཕན་ཡོན་རྒྱ་ཆེར་ཡོད་ཅིང་། དེ་ལ་བདག་གི་རྣལ་འབྱོར་ཇི་ལྟར་རིགས་པ་སྔོན་དུ་འགྲོ་བས་མདོས་ཀྱི་ཆོ་ག་ལ་འཇུག་པ་ལས་བསྙེན་སྒྲུབ་སོགས་སྔོན་དུ་འགྲོ་མི་དགོས་པས་གློ་བུར་ལས་བཅོལ་གྱི་མདོས་ཞེས་བྱའོ། །གཉིས་པ་ལ་བཞི། དགོས་ཆེད། ཐབས། ཆོ་ག །ཕན་ཡོན་ནོ། །དང་པོ་ནི། རྣལ་འབྱོར་སོགས་ཚིག་རྐང་གསུམ་མོ། །གཉིས་པ་ནི། ཁ་སྒྱུར་སོགས་ཤློ་ཀ་གཅིག་སྟེ། མདོས་ཀྱི་གཞུང་དང་སྦྱར་ཏེ་ཤེས་པར་བྱའོ། །གསུམ་པ་ནི། དེ་ལ་སོགས་ཚིག་རྐང་གཅིག་སྟེ། དེ་ལྟ་བུ་ཚུལ་བཞིན་དུ་སྒྲུབ་པ་ལ་གསུམ། བསྙེན་པ་ཕྱག་རྒྱ་གཅིག་པ། སྒྲུབ་པ་ཕྱག་རྒྱ་སྤྲོས་བཅས། སྒྲུབ་པ་ཆེན་པོ་ལས་ལ་སྦྱར་བ་སྟེ། དེ་རྣམས་ཀྱི་དོན་འོག་ཏུ་མདོར་བསྡུས་ཙམ་འཆད་པར་འགྱུར་རོ། །བཞི་པ་ནི། སྐོང་དང་སོགས་ཚིག་རྐང་གསུམ་མོ། །བཞི་པ་ལ་གཉིས། ཁྱད་པར་ངེས་དོན་དུ་གདམས་པ་དང་། ཁྱད་པར་དུ་གཏད་པའོ། །དང་པོ་ནི། སྣང་སྲིད་སོགས་ཚིག་རྐང་གཉིས་ཏེ། འདི་ལྟར་སྣང་ཞིང་སྲིད་པས་བསྡུས་པའི་ཆོས་ཐམས་ཅད་ཡེ་གདོད་མ་ནས་རྣམ་པར་གྲོལ་བའི་ཡེ་ཤེས་རང་རིག་མཐའ་དབུས་མེད་པའི་དཀྱིལ་འཁོར་དུ་རྫོགས་པ་ནི་དོན་དམ་པའི་མདོས་ཡིན་པས། རྣལ་འབྱོར་པ་རྣམས་ཀྱིས་དགོངས་པ་མི་འགྱུར་བའི་སྲོག་ཏུ་བཟུང་ཞིང་གཟེར་གདབ་པས་ཁྲག་འཐུང་མངོན་རྫོགས་རྒྱལ་པོའི་ཐུགས་དང་དབྱེར་མེད་པའི་མཆོག་གི་དངོས་གྲུབ་ཀྱང་མངོན་དུ་བྱེད་ནུས་ན། ཐུན་མོང་གི་ལས་རབ་འབྱམས་དབྱིངས་གཏད་པ་ཙམ་གྱིས་གྲུབ་པ་སྨོས་ཅི་དགོས་སོ། །གཉིས་པ་ནི། རིག་འཛིན་སོགས་ཏེ། དེ་ལྟར་ན་རིག་པ་འཛིན་པ་རྒྱལ་བའི་གདུང་འཛིན་པ་སྟེ། དཔལ་ཧེ་རུ་ཀའི་སྤྱོད་ཡུལ་ལ་ཞུགས་པ་རྣམས་ཀྱིས། ཀུན་རྫོབ་བརྡར་བཏགས་པའི་མདོས་ཀྱི་ཆོ་ག་ཡང་ཡང་བྱ་ཞིང་། དོན་དམ་ནང་གི་རྣལ་འབྱོར་ལྷག་པའི་བདེན་གཉིས་དབྱེར་མེད་ཀྱི་མདོས་ཆེན་ལྟ་བ་ཐོས་བསམ་གྱིས་གཏན་ལ་ཕབས། བསྒོམས་པས་ཉམས་སུ་བླངས་ཏེ། ཉམས་རྟོགས་ཀྱི་གདིང་བསྐྱེད་ལ་རང་གཞན་གྱི་དོན་དུ་ཐུན་མོང་དང་མཆོག་གི་དངོས་གྲུབ་བསྒྲུབ་པར་གྱིས་ཤིག་ཅེས་གཏད་པའོ། །ལྔ་པ་ནི། ཞར་བྱུང་བརྗོད་བྱ། བརྗོད་བྱེད། དགོས་པ། ཉིང་དགོས། འབྲེལ་བ་དང་བཅས་པ་སྤྱི་ལྟར་སྦྱར་རོ། །གསུམ་པ་མཇུག་གི་དོན་ལ་གསུམ། ཀལྤ་དུམ་བུའི་རྒྱུད་ཀྱིས་མཚོན་ཏེ་རྒྱ་ཆེར་ཤེས་པར་བྱ་བ་དང་། བཀའ་རྒྱས་གདབ་པ་དང་། གཏེར་བྱང་གིས་མཇུག་བསྡུ་བའོ། །དང་པོ་ནི། ཅེས་ལ་སོགས་པ་རྒྱ་ཆེར་གསུངས་སོ། །ཞེས་པ་སྟེ། ཅེས་སྤྱིར་གཞི་ལམ་འབྲས་བུའི་རྒྱུད་དང་། བྱེ་བྲག་ཏུ་དྲང་བ་དང་ངེས་པའི་དོན་གྱི་མདོས་ཆེན་གྱི་རྣམ་པར་བཞག་པ་འདིས་མཚོན། དེ་ལ་སོགས་ཏེ་རྒྱུད་ཀྱི་དངོས་པོ་བཅུ་སོགས་སྦྱར་ཏེ་རྒྱུད་རྒྱས་པ་རྣམས་སུ་རྒྱ་ཆེར་ཤེས་པར་བྱའོ་ཞེས་གསུངས་སོ། །ཞེས་པའོ། །གཉིས་པ་ནི། ས་མ་ཡ་སོགས་མཁའ་འགྲོ་གསང་བའི་བརྡ་རིས་བཅས་དང་། གསུམ་པ་ནི། གུ་རུའི་གསུང་སྲས་སོགས་ཏེ་གོ་སླའོ། །གཉིས་མན་ངག་ཉམས་སུ་བླང་བའི་ཚུལ་ལ། སྒྲུབ་གཞི་ཀུན་གཞི་ལུས་ངག་ཡིད་སྲོག་དང་བཅས་པ་ཁམས་གསུམ་དུ་སྣང་བ་ཉིད་ནང་དུ་རྡོ་རྗེའི་ལུས་ཀྱི་གནས་པ་རྩ་དང་། གཡོ་བ་རླུང་། བཀོད་པ་བྱང་ཆུབ་སེམས་ཀྱི་ཕྲ་རགས་ཐམས་ཅད་རང་བཞིན་གདོད་ནས་ཁྲག་འཐུང་མངོན་རྫོགས་རྒྱལ་པོའི་ཡུམ་གྱི་མཁའ་ཀློང་ལས་མི་འདའ་བར་བཞུགས་པ། ཐོས་བསམ་གྱི་སྒྲོ་འདོགས་ཆོད་ཅིང་། བླ་མའི་མན་ངག་དང་བྱིན་རླབས་ཟབ་མོས་མངོན་སུམ་དུ་གཏན་ལ་ཕེབས་པ་ཉིད་སྒྲུབ་ཆོས་སྒོམ་པས། ཉམས་སུ་བླང་ཐབས་སྐུ་ཕྱག་རྒྱ་བསྐྱེད་རིམ་དབྱིབས་ཀྱི་རྣལ་འབྱོར་རིགས་འདུས་ཞི་བ་རྡོ་རྗེ་དབྱིངས་དང་། འཁོར་འདས་དབང་བསྒྱུར་མངོན་རྫོགས་ཧེ་རུ་ཀ་འབར་བ་ཁྲག་འཐུང་ཁྲོ་བོ་ཆེན་པོའི་དཀྱིལ་འཁོར་ཡེ་ཤེས་ལས་སྤྲུལ་པའི་འཁོར་འདས་དབྱིངས་ཀྱི་དབང་ཕྱུག་ཆེན་མོ། སྲོག་གི་རང་གཟུགས་བདེ་ཆེན་བྷ་གའི་ཀློང་ན་རྟག་ཆགས་ཀུན་ཏུ་བཟང་མོ་ཉིད་བཞི་མུ་ཁ་ལེ། དྭངས་མ་རྣམ་བཞིའི་ངོ་བོ་གསང་བའི་མ་བཞི། གབ་སྤས་རྟག་ཆགས་ཀྱི་མ་མོ་སྤྲུལ་པ་ཡང་སྤྲུལ་དང་བཅས་པ་སྟེ། སྣང་སྲིད་ཐམས་ཅད་སྲིད་པ་མ་མོའི་དཀྱིལ་འཁོར་དུ་ཤར་བ། ནང་དུ་རྡོ་རྗེའི་ལུས་ལ་རྩ་ཐིག་གཞལ་ཡས་ཁང་དུ་ཤེས་པས་གསལ་དག་བརྟན་པ་ཚད་དུ་ཕྱིན་པས་བསྙེན་པ། དགོངས་པ་རྣམ་བཞིའི་སྒོ་ནས་སྒྲུབ་པ། མ་མོའི་ཕྲིན་ལས་དཔལ་གྱི་མདོས་ཆེན་གྱི་ཆོ་གས་མཐར་དབྱུང་བ་ལས་སྦྱོར་ཏེ། སྒྲུབ་སྡེ་ཆེན་པོ་བརྒྱད་ཀྱི་བསྐྱེད་རྫོགས་ཀྱི་ཟབ་དོན་རྣམས་འདིར་ཚང་ཞིང་། མདོར་ན་ཡེ་ཤེས་དང་ལས་དང་སྤྲུལ་པས་བསྡུས་པའི་མ་མོ་རྣམས་རྒྱལ་པོ་དང་། བློན་པོ་དང་། བྲན་མོ་ལྟ་བུའི་རྩ་དང་རླུང་དང་བྱང་ཆུབ་སེམས་ཀྱི་ངང་ལས་མ་གཡོས་པར་གཞི་རང་བཞིན་ལྷུན་གྲུབ་ཀྱི་མ་མོའི་དཀྱིལ་འཁོར་དུ་རྟོགས་པའི་གདིང་ཐོབ་པས་འདོད་ཁམས་དག་བྱེད་སྐུ་དབྱིབས་ཕྱག་རྒྱའི་རྣལ་འབྱོར་དང་། གཟུགས་ཁམས་དག་བྱེད་རླུང་སྔགས་བཟླས་པའི་རྣལ་འབྱོར་དང་། གཟུགས་མེད་ཁམས་དག་བྱེད་ཐུགས་འོད་གསལ་ཆོས་སྐུའི་རྣལ་འབྱོར་དང་མདོས་ཀྱི་འཁྲུལ་འཁོར་གྱིས་ལས་སྒྲུབ་པའི་ཐབས་ཟབ་མོར་བརྩོན་པ་ཆུ་བོའི་རྒྱུན་བཞིན་གོམས་པ་དང་། མཁའ་འགྲོ་ཡང་གསལ་རླུང་གི་ཕོ་ཉས། བཀྲག་གསལ་འབར་བའི་མེ་ལྕེས། གཉེན་གསལ་ཐབས་ཀྱི་ཐིག་ལེ་བཞུ་བཏུལ་སོགས་རྩ་ཐིག་རླུང་གི་རྣལ་འབྱོར་འབར་འཕྲོའི་དྭངས་མ་གནས་སུ་སྨིན་པའི་སྔོན་འགྲོ་དང་། དངོས་གཞི་ཉེ་རྒྱུའི་སྤྱོད་པས་མ་མོ་རྒྱ་མཚོར་རྗེས་ཆགས་རལ་པའི་དགའ་སྟོན་བརྟུལ་ཞུགས་ཀྱི་སྤྱོད་པ་ཟབ་མོས་བོགས་དབྱུང་བས། བསྒྲུབས་པའི་འབྲས་བུ་འཕྲལ་ཡུན་གྱི་ཕྱི་ནང་གསང་བའི་རྐྱེན་བགེགས་ཉམས་ཆག་ཐམས་ཅད་བཟློག །ནང་རྩ་ཐིག་རླུང་གསུམ་རང་སོར་གཞུག་པས་སྣང་སྲིད་ཀྱི་གཡོ་འཁྲུགས་ཞི་ནས་སྲིད་པ་ཁོད་སྙོམས་ཕྲིན་ལས་རྣམ་བཞིའི་འཁོར་ལོས་བསྒྱུར་བ་ཆེན་པོའི་གོ་འཕང་ཐོབ་ཅིང་། སྲིད་པའི་རྒྱལ་མོའི་དམག་གིས་རིགས་དྲུག་གི་གྲོང་ཁྱེར་རྩད་ནས་བརླག །སྲིད་ཞིའི་མཐའ་ལ་མི་གནས་པའི་དབྱིངས་སྟོང་ཆེན་ཀུན་ཏུ་བཟང་མོའི་མཁའ་དབྱིངས་ཡངས་པའི་ཀློང་དུ་སྲིད་གསུམ་ཐམས་ཅད་བསྒྲལ་ནས་དབྱིངས་ཡེ་ཟུང་དུ་འཇུག་པའི་ཁྲག་འཐུང་མངོན་རྫོགས་རྒྱལ་པོ་འགོ་འཕང་དམ་པ་འགྲུབ་པ་ནི་ངེས་པ་ཡང་དག་པའོ། །ཞིབ་པ་ནི་རྒྱུད་དོན་མན་ངག་གིས་བཀྲལ་ཞིང་རྟོགས་པ་མཆོག་དང་ལྡན་པའི་བླ་མའི་ཞལ་ལུང་དང་རང་གི་དད་བརྩོན་གྱི་མྱོང་བས་རྟོགས་པར་བྱ་བ་ཁོ་ནའོ། །ཞེས་མངོན་རྫོགས་རྒྱལ་པོ་ཀལྤ་དུམ་བུའི་རྒྱུད་ཀྱི་ཟིན་བྲིས་ཉམས་སུ་བླངས་པའི་ཚུལ་ཞེས་པ་ཡན་ཅོད་༧ཀུན་གཟིགས་མཉྫུ་གྷོ་ཥའི་གསུངས་ལ་དེ་ཕྱིན་རྨོངས་བརྟུལ་ཆོས་ཀྱི་བློ་གྲོས་པས་བླ་མའི་གསུང་གི་སྣང་བ་ལ་བརྟེན་ནས་བྲིས་པ་དགེ་ལེགས་སུ་གྱུར་ཅིག །སརྦ་མངྒ་ལཾ།། །།

[edit]

@#/__/dpal mngon rdzogs rgyal po'i kalpa dum bu'i rgyud kyi zin bris nyung gsal bzhugs so/__/ zab bdun ma mo/__/na mo gu ru shrI he ru kA ya/__sangs rgyas gnyis pa pad+ma sam+b+ha ba'i thug dam zab pa skor bdun las/__gnas skabs rkyen zlog gi zab pa ma mo rol pa'i chos sde'i rtsa ba khrag 'thung mngon rdzogs rgyal po'i kalpa dum bu'i rgyud 'di 'chad pa la gnyis/__rgyud bshad pa'i tshul dang /__man ngag nyams su blang ba'i tshul lo/__/dang po la gsum/__mtshan dang /__gzhung dang /__mjug gi don no/__/dang po la gnyis/__glegs bam gyi dbur bkod pa'i mtshan dang /__gzhung rang gi mtshan gyi don bshad pa'o/__/dang po ni/__dpal mngon rdzogs sogs te/__dpal khrag 'thung mngon rdzogs rgyal po gtso bor gyur pa'i srid pa ma mo'i rgyud sde mtha' yas pa las/__kalpa ni rtog pa ste las dang dngos grub sgrub pa'i rtog pa dum bu logs su phyung ba'i rgyud chung ngu bzhugs so/__/zhes pa'o/__/gnyis pa la gnyis/__mtshan bsgyur ba dang /__don bshad pa'o/__/dang po ni/__yang dag pa'i sogs te/__ston pa yang dag pa rdzogs pa'i sangs rgyas rdo rje 'chang dpal khrag 'thung chen pos chos nyid rdo rje'i rang sgrar snang ba'i skad du/__shri he ru ka/__de bod skad du bsgyur na/__dpal khrag 'thung zhes pa ste ston pa dang rgyud kyi mtshan thun mong ngo /__/gnyis pa don bshad pa la gsum/__drang don ltar bshad pa/__nges don ltar bshad pa/__rgyud don dang sbyar ba'o/__/dang po ni/__shrI ni bsten par 'os pas na dpal/__he ni hi la ste rol pa/__ru ni ru d+hi ra ste khrag__/ka ni bdag po'i sgra ste/__srid zhi kun gyis bsten par 'os pa'i spyi dpal kun tu bzang po nyid gdul bya gdug pa can ru tra la sogs pa'i snying khrag la dgyes rgur 'thung zhing rol pa'i ched du 'jigs byed khro bo'i rgyal por bzhengs pa che mchog he ru ka'i mtshan gzhan mngon rdzogs rgyal po sogs su snang ba'o/__/gnyis pa ni/__de lta bu'i drang don brda'i dpal khrag 'thung chen po de nyid nges don ltar na/__rgyud las/__shrI ni gnyis med ye shes te/__he ni rgyu sogs stong pa nyid/__ru ni tshogs dang bral ba ste/__ka ni gang du'ang mi gnas pa'o/__/zhes shrI ni gnyis su med pa'i ye shes te rang bzhin 'od gsal ba'i rnam par thar pa dang /__he ni gzhi stong pa nyid/__ru ni lam mtshan ma med pa/__ka ni 'bras bu smon pa med pa ste rang bzhin dang /__gzhi dang /__rgyu dang /__ngo bos stong pa'i rnam thar sgo bzhi'i bdag nyid zung 'jug 'dus ma byas pa'i ye shes dkyil 'khor rab 'byams kyi 'char gzhir bzhugs so/__/gsum pa ni/__de lta bu'i drang nges kyi he ru ka yi ge bzhis mtshon par byas te/__mtshon bya ni gzhi lam 'bras bu'i rgyud yin la/__ji ltar mtshon pa'i tshul srid pa ma mo'i grub pa'i mtha'/__dbyings dang ye shes las 'jig rten:__srid pa ma mo rnam bzhi ni:__rtsa rlung byang chub sems yin te:__gzhi lam 'bras bu'i tshul du gnas:__zhes pa ltar/__shrI dbyings/__he ye shes/__ru las/__ka 'jig rten gyi ma mo bzhi mtshon pa de nyid/__gzhi'i dus su/__dbyings kyi ma mo stong pa/__ye shes gsal cha/__ru gnyis med kyi rtsal sna tshogs su shar ba/__ka de las snod bcud tha dad par snang ba'am/__don dam chos nyid byang chub kyi sems dbyings/__kun rdzob chos can byang chub kyi sems ye shes/__rlung las/__rtsa 'jig rten pa'i ma mo'i tshul du gnas pa'o/__/lam gyi dus su/__bum dbang gi lam bskyed pa'i rim pa bsgoms pas 'jig rten gyi ma mo bran du bkol/__gsang dbang gi lam rlung dang gtum mos las kyi ma mo dbang du byas/__sher dbang lam pho nya'i nye rgyus ye shes kyi ma mo dpe'i tshul du drangs/__dbang bzhi pa'i lam dbyings rig dbyer med pas don dam dbyings kyi ma mo mngon sum du mthong ba la brten nas/__'bras bu'i dus su sku gsum dbyer mi phyed pa'i dbyings bde ba chen po'i sku/__ye shes nang gsal du 'khyil pa chos sku/__byed las phyir gsal du shar ba longs sku/__'jig rten dang rjes su mthun par don mdzad pa sprul pa'i sku ste sku bzhi'i go 'phang mngon du 'gyur bas mtshon rgya cher shes par bya'o/__/gnyis pa gzhung gi don la lnga/__gling gzhi mdor bstan pa/__gleng slong gis mtshams sbyar ba/__rgyud don dngos bshad pa/__gdams shing gtad pas don bsdu ba/__zhar byung dgos 'brel gyi mtshon tshul lo/__/dang po ni/__phun sum tshogs pa lnga las dpe ma mo rnams zhes pas/__des zhes tshig gong ma dpal khrag 'thung la snyegs pas na ston pa dang /__ma mo rnams zhes pas 'khor dngos su bstan cing /__gzhan gsum shugs las mtshon/__/gnyis pa ni/__dbang du bsdus nas 'di skad ces gsungs so zhes zab dbang gsum bskur bas dbang du bsdus te ston 'khor dgongs pa dbyer med du gyur pa thun mong ma yin pa'i gleng slong gis gzhi bzung /__ma 'ongs pa'i don du zhu bas skabs dbye ba la 'di skad de rgyud don rdzogs par gsungs so zhes thun mong gi gleng slong gis mtshams sbyar ba'o/__/gsum pa la gnyis/__rgyud gsum gyi rnam par bzhag pa'i tshul gyis khog phubs pa dang /__lam gyi cha rkyen mdos kyi cho ga khyad par du dbye ba'o/__/dang po la gsum/__sgrub pa'i gzhi/__sgrub byed kyi thabs/__grub pa'i 'bras bu'o/__/dang po la gnyis/__shes bya ngo bo'i gzhi dang /__sbyang bya btags pa'i gzhi ste/__dang po ni/__hU~M/__snang srid sogs tshig rkang drug dang /__gnyis pa ni/__rig sogs tshig rkang dgu'o/__/gnyis pa ni/__de la zlog pa'i sogs tshig rkang bdun te/__'di la tshig ltar bshad na phyi mtshan ma rdzas kyi mdos/__spyi don ltar bshad na bskyed rim phyag rgya'i mdos/__sbas don ltar bshad na gsang ba rtsa rlung thig le'i mdos/__mthar thug ltar bshad na yang gsang dbyings rig dbyer med byang chub sems kyi mdos te/__lam yongs su rdzogs par sbyar du yod cing /__gzhung gi dngos bstan ni gtso bor mtshan ma rdzas dang /__zhar byung bskyed rim kyang mtshon tsam bstan no/__/gsum pa la gsum/__mchog gi dngos grub 'grub tshul/__thun mong gi phrin las 'byung tshul/__gnyis ka'i don bsdu ba ste/__dang po ni/__des na sogs tshig rkang gsum/__gnyis pa ni/__sgrub pa'i sogs tshig rkang gnyis/__gsum pa ni/__srid zhi'i sogs tshig rkang gnyis so/__/gnyis pa mdos kyi cho ga khyad par du dbye ba la gnyis/__spyi'i don dang /__yan lag gi don no/__/dang po la lnga/__mtshan nyid/__sgra don/__dbye ba/__thabs 'bras bu ste/__de rnams gzhung 'dis kyang ci rigs par bstan cing /__rgyas par ma mo'i rgyud lung man ngag rnams dang lo chen bai ro'i zhus len sogs sbyar te rgya cher shes par bya'o/__/gnyis pa la gnyis/__glo bur las bcol gyi mdos dang /__bsnyen sgrub las sbyor dang 'brel ba'i mdos so/__/dang po ni/__las ni che phra sogs tshig rkang drug ste/__sgrub pa chen po la sogs pa'i las che phra gang brtsams kyang thog mar mdos kyi cho ga rgyas par bya ba'am/__skong bshags dang /__gsol kha tsam gyis kyang las la bar chad med cing myur du 'grub pa la sogs pa'i phan yon rgya cher yod cing /__de la bdag gi rnal 'byor ji ltar rigs pa sngon du 'gro bas mdos kyi cho ga la 'jug pa las bsnyen sgrub sogs sngon du 'gro mi dgos pas glo bur las bcol gyi mdos zhes bya'o/__/gnyis pa la bzhi/__dgos ched/__thabs/__cho ga__/phan yon no/__/dang po ni/__rnal 'byor sogs tshig rkang gsum mo/__/gnyis pa ni/__kha sgyur sogs sh+lo ka gcig ste/__mdos kyi gzhung dang sbyar te shes par bya'o/__/gsum pa ni/__de la sogs tshig rkang gcig ste/__de lta bu tshul bzhin du sgrub pa la gsum/__bsnyen pa phyag rgya gcig pa/__sgrub pa phyag rgya spros bcas/__sgrub pa chen po las la sbyar ba ste/__de rnams kyi don 'og tu mdor bsdus tsam 'chad par 'gyur ro/__/bzhi pa ni/__skong dang sogs tshig rkang gsum mo/__/bzhi pa la gnyis/__khyad par nges don du gdams pa dang /__khyad par du gtad pa'o/__/dang po ni/__snang srid sogs tshig rkang gnyis te/__'di ltar snang zhing srid pas bsdus pa'i chos thams cad ye gdod ma nas rnam par grol ba'i ye shes rang rig mtha' dbus med pa'i dkyil 'khor du rdzogs pa ni don dam pa'i mdos yin pas/__rnal 'byor pa rnams kyis dgongs pa mi 'gyur ba'i srog tu bzung zhing gzer gdab pas khrag 'thung mngon rdzogs rgyal po'i thugs dang dbyer med pa'i mchog gi dngos grub kyang mngon du byed nus na/__thun mong gi las rab 'byams dbyings gtad pa tsam gyis grub pa smos ci dgos so/__/gnyis pa ni/__rig 'dzin sogs te/__de ltar na rig pa 'dzin pa rgyal ba'i gdung 'dzin pa ste/__dpal he ru ka'i spyod yul la zhugs pa rnams kyis/__kun rdzob brdar btags pa'i mdos kyi cho ga yang yang bya zhing /__don dam nang gi rnal 'byor lhag pa'i bden gnyis dbyer med kyi mdos chen lta ba thos bsam gyis gtan la phabs/__bsgoms pas nyams su blangs te/__nyams rtogs kyi gding bskyed la rang gzhan gyi don du thun mong dang mchog gi dngos grub bsgrub par gyis shig ces gtad pa'o/__/lnga pa ni/__zhar byung brjod bya/__brjod byed/__dgos pa/__nying dgos/__'brel ba dang bcas pa spyi ltar sbyar ro/__/gsum pa mjug gi don la gsum/__kalpa dum bu'i rgyud kyis mtshon te rgya cher shes par bya ba dang /__bka' rgyas gdab pa dang /__gter byang gis mjug bsdu ba'o/__/dang po ni/__ces la sogs pa rgya cher gsungs so/__/zhes pa ste/__ces spyir gzhi lam 'bras bu'i rgyud dang /__bye brag tu drang ba dang nges pa'i don gyi mdos chen gyi rnam par bzhag pa 'dis mtshon/__de la sogs te rgyud kyi dngos po bcu sogs sbyar te rgyud rgyas pa rnams su rgya cher shes par bya'o zhes gsungs so/__/zhes pa'o/__/gnyis pa ni/__sa ma ya sogs mkha' 'gro gsang ba'i brda ris bcas dang /__gsum pa ni/__gu ru'i gsung sras sogs te go sla'o/__/gnyis man ngag nyams su blang ba'i tshul la/__sgrub gzhi kun gzhi lus ngag yid srog dang bcas pa khams gsum du snang ba nyid nang du rdo rje'i lus kyi gnas pa rtsa dang /__g.yo ba rlung /__bkod pa byang chub sems kyi phra rags thams cad rang bzhin gdod nas khrag 'thung mngon rdzogs rgyal po'i yum gyi mkha' klong las mi 'da' bar bzhugs pa/__thos bsam gyi sgro 'dogs chod cing /__bla ma'i man ngag dang byin rlabs zab mos mngon sum du gtan la phebs pa nyid sgrub chos sgom pas/__nyams su blang thabs sku phyag rgya bskyed rim dbyibs kyi rnal 'byor rigs 'dus zhi ba rdo rje dbyings dang /__'khor 'das dbang bsgyur mngon rdzogs he ru ka 'bar ba khrag 'thung khro bo chen po'i dkyil 'khor ye shes las sprul pa'i 'khor 'das dbyings kyi dbang phyug chen mo/__srog gi rang gzugs bde chen b+ha ga'i klong na rtag chags kun tu bzang mo nyid bzhi mu kha le/__dwangs ma rnam bzhi'i ngo bo gsang ba'i ma bzhi/__gab spas rtag chags kyi ma mo sprul pa yang sprul dang bcas pa ste/__snang srid thams cad srid pa ma mo'i dkyil 'khor du shar ba/__nang du rdo rje'i lus la rtsa thig gzhal yas khang du shes pas gsal dag brtan pa tshad du phyin pas bsnyen pa/__dgongs pa rnam bzhi'i sgo nas sgrub pa/__ma mo'i phrin las dpal gyi mdos chen gyi cho gas mthar dbyung ba las sbyor te/__sgrub sde chen po brgyad kyi bskyed rdzogs kyi zab don rnams 'dir tshang zhing /__mdor na ye shes dang las dang sprul pas bsdus pa'i ma mo rnams rgyal po dang /__blon po dang /__bran mo lta bu'i rtsa dang rlung dang byang chub sems kyi ngang las ma g.yos par gzhi rang bzhin lhun grub kyi ma mo'i dkyil 'khor du rtogs pa'i gding thob pas 'dod khams dag byed sku dbyibs phyag rgya'i rnal 'byor dang /__gzugs khams dag byed rlung sngags bzlas pa'i rnal 'byor dang /__gzugs med khams dag byed thugs 'od gsal chos sku'i rnal 'byor dang mdos kyi 'khrul 'khor gyis las sgrub pa'i thabs zab mor brtson pa chu bo'i rgyun bzhin goms pa dang /__mkha' 'gro yang gsal rlung gi pho nyas/__bkrag gsal 'bar ba'i me lces/__gnyen gsal thabs kyi thig le bzhu btul sogs rtsa thig rlung gi rnal 'byor 'bar 'phro'i dwangs ma gnas su smin pa'i sngon 'gro dang /__dngos gzhi nye rgyu'i spyod pas ma mo rgya mtshor rjes chags ral pa'i dga' ston brtul zhugs kyi spyod pa zab mos bogs dbyung bas/__bsgrubs pa'i 'bras bu 'phral yun gyi phyi nang gsang ba'i rkyen bgegs nyams chag thams cad bzlog__/nang rtsa thig rlung gsum rang sor gzhug pas snang srid kyi g.yo 'khrugs zhi nas srid pa khod snyoms phrin las rnam bzhi'i 'khor los bsgyur ba chen po'i go 'phang thob cing /__srid pa'i rgyal mo'i dmag gis rigs drug gi grong khyer rtsad nas brlag__/srid zhi'i mtha' la mi gnas pa'i dbyings stong chen kun tu bzang mo'i mkha' dbyings yangs pa'i klong du srid gsum thams cad bsgral nas dbyings ye zung du 'jug pa'i khrag 'thung mngon rdzogs rgyal po 'go 'phang dam pa 'grub pa ni nges pa yang dag pa'o/__/zhib pa ni rgyud don man ngag gis bkral zhing rtogs pa mchog dang ldan pa'i bla ma'i zhal lung dang rang gi dad brtson gyi myong bas rtogs par bya ba kho na'o/__/zhes mngon rdzogs rgyal po kalpa dum bu'i rgyud kyi zin bris nyams su blangs pa'i tshul zhes pa yan cod 7kun gzigs many+dzu g+ho Sha'i gsungs la de phyin rmongs brtul chos kyi blo gros pas bla ma'i gsung gi snang ba la brten nas bris pa dge legs su gyur cig__/sarba mang+ga laM//__//